Author: webrwanda

Umunsi wa kabiri wa shampiyona y’icyiciro cya mbere mu Rwanda usize ikipe ya Gasogi United iyoboye urutonde rwa shampiyona, ni nyuma yo gutsinda Marines.

Umunsi wa 2 wa shampiyona wa 2024-25 watangiye mu mpera z’icyumweru gishize ku wa Gatanu aho Gasogi United yatsinze Marines 1-0 cya Christian Malipangou.

Kuri uwo munsi Rayon Sports yakiriye ndetse inanganya n’Amagaju FC ibitego 2-2. Rayon Sports yatsindiwe na Nsabimana Aimable na Adama Bagayogo ni mu gihe Amagaju FC yatsindiwe na Richard Mapoli Kevin na Iragire Saidi.

Shampiyona yakomeje ku wa Gatandatu, Mukura VS inganya ubusa ku busa na Etincelles ni mu gihe Rutsiro FC ikaba yaratsindiye i Rubavu Vision 1-0 cya Yves Habimana.

Ejo hashize ku Cyumweru, i Ngoma, Muhazi United yahanganyirije na Gorilla FC ubusa ku busa.

Umunsi wa kabiri wasojwe uyu munsi aho AS kigali yari yakiriye Musanze FC kuri Kigali Pele Stadium.

AS Kigali yaje kwegukana amanota 3 ya mbere ni nyuma y’uko yari yatsinzwe na Kiyovu Sports mu mukino w’umunsi wa mbere. Uyu munsi yatsinze Musanze FC 1-0 cya Ndayishimiye Didier.

Hasubitswe imikino 2 ya APR FC na Police FC yari mu mikino Nyafurika. Police FC yagombaga gukina na Kiyovu Sports ni mu gihe APR FC yagombaga gukina na Bugesera FC.

Nyuma y’umunsi wa kabiri, Gasogi United ni yo iyoboye urutonde rwa shampiyona n’amanota 6, Gorilla FC ni iya kabiri n’amanota 4, Kiyovu Sports, Rutsiro na AS Kigali zifite amanota 3, Amagaju FC, Rayon Sports na Muhazi United zifite 2, Etincelles, Bugesera FC, Musanze FC, Mukura VS na Marines Fc zifite inota 1, APR FC na Police FC zitarakina umukino n’umwe zifite ubusa ni mu gihe Vison FC yatsinzwe imikino 2 ari yo ya nyuma n’ubusa.

Gasogi United ni yo iyoboye urutonde rwa shampiyona

Umurambo w'uyu musore wo mu Karere ka Gicumbi waje kuboneka ku wa 25 Kanama 2024, nyuma y'iminsi ine abuze. Yakoreraga mu isantere ya Rukomo ku muhanda uhuza Akarere ka Gicumbi n'aka Nyagatare.

Amakuru IGIHE ifite ni uko nyakwigendera yari asanzwe akora akazi ko kwikorera imizigo (umukarani) no gucukura amabuye, akaba yari amaze iminsi igera kuri ine ashakishwa na nyina umubyara, aribwo yaje kumva aho umurambo we uherereye nawe yahagera agahita abimenyesha inzego z'umutekano zigatangira iperereza.

Umwe baturanyi ba nyakwigendera yagize ati 'yabonywe n'umwana waragiraga ihene hejuru ku mukingo. Nibwo yatabaje tuza kureba dusanga afite ibikomere byinshi mu mutwe! Nyina umubyara yari amaze iminsi avuga ko yabuze umuhungu we kuko yatahaga iwe mu rugo, nibwo yahise ahamagara ubuyobozi butangira gukora iperereza'.

Umuvugizi wa Polisi mu ntara y'Amajyaruguru, SP Mwiseneza J Bosco yatangarije IGIHE ko hari abantu batatu batawe muri yombi ngo bakorweho iperereza ryimbitse, asaba abaturage gutangira amakuru ku gihe.

Ati 'Hatangiye gukorwa iperereza, hafashwe batatu bakekwaho kugira uruhare mu rupfu rwa nyakwigendera, bafungiwe kuri Polisi Sitasiyo ya Byumba, barimo gukurikiranwa n'Urwego rw'Ubugenzacyaha.'

'Ubutumwa duha abaturage ni ugutangira amakuru ku gihe ku bantu bafitanye amakimbirane icyaha kigakumirwa kitaraba”.

Umurambo wa Nyakwigendera wajyanywe ku bitaro bya Byumba gukorerwa isuzuma ngo hamenyekane icyamwishe.

Kugeza ubu muri iyi ntara hari toni zirenga ibihumbi 16 zitari zabonerwa isoko. Ni ikibazo kigaragara mu turere twose tugize Intara y'Iburasirazuba, aho Amakoperative menshi arira ayo kwarika bitewe nuko bagifite toni nyinshi batari babonera isoko.

Hari n'abafite umuceri mwinshi ukiri ku mbuga ku buryo bibateye impungenge ko uzahagirira ibibazo.

Umuyobozi wa Koperative Indatwa ihinga mu gishanga cya Rwinkwavu giherereye mu Karere ka Kayonza, Mumarakizizi Egide, yavuze ko bafite toni 1000 z'umuceri batari babonera isoko.

Mu minsi ishize ngo Umukuru w'Igihugu avuga ku kibazo cy'umuceri babonye umuguzi atwara toni 170 hasigara toni 1000, kuri ubu ngo ntibaramenya aho bazakura isoko.

Indi koperative ihinga umuceri mu Murenge wa Murundi mu Karere ka Kayonza yo ifite toni 600 batari babonera isoko mu gihe izigera kuri 800 zagurishijwe.

Mu Karere ka Kirehe muri koperative KOPRIKI ihinga umuceri mu gishanga gihuza Ngoma na Kirehe, bo bavuga ko bafite toni zirenga 5300 z'umuceri utari wabonerwa isoko. Muri izo toni harimo toni 3000 z'umuceri udatonoye na toni 2300 z'umuceri utonoye.

Muri Ngoma ho muri koperative KORIMI ifite umuceri utonoye udukufa tw'ibilo 25 tugera kuri 7030 baburiye isoko. Ibi byatumye barekera aho gutonora umuceri ku buryo bafite izindi toni 970 zikiri aho.

Muri Rwamagana bafite toni 560 z'umuceri ukiri ku mbuga mu gihe indi koperative ya KOPRIMA yo muri Ngoma mu Murenge wa Rurenge ifite toni 530 nazo zikiri ku mbuga.

Mu Bugesera muri koperative ya Mwogo bafite toni 3000 zitari zabonerwa isoko. Gatsibo muri koperative ya Coproriz Ntende bafite toni zirenga 2000 zitari zabonerwa isoko.

Akarere ka Nyagatare muri koperative ya KODERIVAM ihinga umuceri mu mirenge ine, bafite toni zirenga 2209 n'ibilo 856 by'umuceri udatonoye wabuze isoko.

Umuyobozi wa koperative Coproriz Ntende, Munyaburanga Emmanuel, yavuze ko abaturage benshi muri iki gihe bakeneye amafaranga cyane ariko ko isoko ryabuze ku buryo mu bubiko bwabo hakiri umuceri mwinshi cyane babuze aho bagurisha.

Yaboneyeho gusaba Leta ko niba umuceri izawugura yawugura hakiri kare kugira ngo abahinzi babone amafaranga yo gushora mu bindi bikorwa by'ubuhinzi.

Minisitiri w'Ubutegetsi bw'Igihugu, Musabyimana Jean Claude, ubwo yasozaga umwiherero w'abayobozi bo mu Ntara y'Iburasirazuba, yavuze ko ikibazo cy'umuceri utari wabonerwa isoko cyahawe umurongo w'uko uwo muceri wose uzagurwa na Leta bahereye ku muceri uri ku mbuga bikazakorwa mu gihugu hose.

Ati 'Ni ukuvuga ngo Leta yiyemeje kugura umuceri wose udafite abaguzi duhereye ku muceri wari ukiri ku mbuga hanze. Kubera ko ufite ibyago by'uko imvura iguye wakwangirika niyo gahunda ihari. Birasaba ko bikorwa vuba kuko ni amatoni menshi ariko niwo murongo uhari kandi birimo gukorwa.'

Minisitiri Musabyimana yavuze ko abaturage batari bagurirwa ari uko iki kibazo kiri ahantu henshi mu gihugu ariko ko uwo murongo w'uko uwo muceri uzagurwa na Leta ariwo watanzwe kandi bizakorwa hose mu gihugu.

Uyu muyobozi yanenze abayobozi b'uturere batigeze batangira amakuru ku gihe ko bose bafite umuceri wabuze isoko kugira ngo bikemurwe hakiri kare, bikarindira kugera ku Umukuru w'Igihugu.

Yavuze ko ubushobozi bwo gukemura iki kibazo buri gukoreshwa buhari kandi buba bwaranakoreshejwe kare. Biteganyijwe ko uyu muceri uzagurwa ugatonorwa ukagaburirwa abanyeshuri ku mashuri.

Toni zisaga ibihumbi 16 z’umuceri zabuze isoko mu Burasirazuba

Duhereye muri Kenya ,ku munsi w’ejo ku Cyumweru ikipe ya  AFC Leopards ikinamo Gitego Arthur yakinaga umukino wo ku munsi wa mbere wa shampiyona ya 2024/25.

Iyi kipe yakinaga na Mathare United ndetse inayitsinda ibitego 4-0. Muri uyu mukino uyu rutahizamu w’Amavubi yari yabanje mu kibuga ndetse yewe ni nawe watsinze igitego cya 1 cy’iyi kipe.

AFC Leopards yahise ifata umwanya wa mbere ikaba izasubira mu kibuga tariki ya 15 z’ukwezi gutaha kwa 19 ikina na Posta Rangers.

Muri Libya mu ikipe ya Al Ahly Tripoli ikinamo Manzi Thierry ku wa Gatanu yatsindaga ikipe ya Uhamiaji yo muri Zanzibar ibitego 3-1 mu mukino wo kwishyura w’ijonjora ry’ibanze rya CAF Confederation Cup.

Iyi kipe yahise inayisezerera ku kinyuranyo cy’ibitego 5-1 ihita yerekeza mu ijonjora rikurikiyeho aho izahura na Simba SC yo muri Tanzania.

Kuri uyu mukino uyu myugariro w’Amavubi yabanje mu kibuga ndetse anarangiza iminota yose y’umukino adasimbujwe.

Muri shampiyona y’icyikiciro cya mbere mu gihugu cy’u Bubiligi mu ikipe ya Standard de Liege ikinamo Hakim Sahabo,ku munsi w’ejo ku Cyumweru yatsindaga Beerschot igitego 1-0.

Nyuma y’uko Hakim Sahabo avuye mu mvune ntabwo yigeze akinishwa kuri uyu mukino ariko yari ku ntebe y’abasimbura.

Standard de Liege iri ku mwanya wa 6 muri shampiyona ikazasubira mu kibuga ku wa Gatandatu ikina na Oud-Heverlee Leuven.

Muri shampiyona y’icyiciro cya kabiri muri Sweden,ku munsi w’ejo ku Cyumweru ikipe ya Sandvkens IF ikinamo Byiringiro League na Mukunzi Yannick yanyagiraga iyo bita Trelleborg ibitego 4-0.

Byiringiro League yinjiye mu kibuga asimbuye ku munota wa 89 ndetse anatanga umupira wavuyemo igitego cya 4 ariko Mukunzi Yannick we nta nubwo yari ku ntebe y’abasimbura.

Kugeza ubu Sandvkens IF iri ku mwanya wa 2 muri shampiyona, ikazasubira mu kibuga ikina na Osters IF ku wa Gatandatu w’iki Cyumweru.

Tukiri muri iyi shampiyona,ku munsi w’ejo ku Cyumweru ikipe ya Gefle IF ikinamo Rafael York nayo yatsindaga iyitwa Oster ibitego 2-1.

Ntabwo uyu mukinnyi w’Umunyarwanda yari yabanje mu kibuga ariko yinjiyemo asimbuye ku munota wa 65. Gefle IF iri ku mwanya wa 14 muri shampiyona, ikazasubira mu kibuga ku Cyumweru ikina na Skovode.

Ku wa Kane w’icyumweru gishize ikipe ya FC Kryvbas Kryvyi Rih yo muri shampiyona y’icyiciro cya mbere muri Ukraine ikanakinamo Kapiteni w’Amavubi, Bizimana Djihad yari yakiriye Real Betis ikina shampiyona y’icyikiro cya mbere muri Espagne kuri Kosice Football Arena mu mikino ya kamarampaka ya UEFA Conference League.

Uyu mukino warangiye Real Betis iyitsinze ibitego 2-0 bya Ezequiel Avilla ku munota wa 13 ndetse na Rodri ku munota wa 62 ku mupira yahawe n’ubundi na Ezequiel Avilla.

Kuri uyu mukino Bizimana Djihad yari yabanje mu kibuga ndetse anakina iminota yose y’umukino. Biteganyijwe ko FC Kryvbas Kryvyi Rih izakina umukino wo kwishyura na Real Betis ku wa Kane w’icyumweru gitaha tariki ya 29 Kanama 2024 nabwo yayitsinda igahita iyisezerera muri UEFA Conference League.

Nyuma yo gutsindwa muri UEFA Conference League iyi kipe ku munsi w’ejo yamanutse mu kibuga muri shampiyona . FC Kryvbas Kryvyi Rih yanganyije na FC Inhulets Petrove igitego 1-1. Bizimana Djihad yari yabanje mu kibuga ndetse arangiza n’iminota yose adasimbujwe.

FC Kryvbas Kryvyi Rih iri ku mwanya wa 3, ikazasubira mu kibuga ikina na Shakhtar Donetsk ku Cyumweru muri shampiyona.

Ku wa Kane w’icyumweru gishize kandi ikipe ya Omonoia FC yo muri Cyprus yari yakiriye Zira FK yo muri Azerbaijan ikinamo myugariro w’Amavubi, Mutsinzi Ange.

Uyu mukino warangiye iyo Zira FK inyagiwe ibitego 6-0 bya Khammas ku munota wa 13,Semedo ku munota wa 34 kuri penaliti ndetse no ku wa 70, Stępiński ku munota wa 45+1 no ku wa 54’ndetse na Ewandro ku munota wa 60.

Kuri uyu mukino banyagirirwagamo , Mutsinzi Ange yari yabanje mu kibuga ndetse anarangiza iminota yose y’umukino. 

Biteganyijwe ko Zira FK izakira Omonia FC mu mukino wo kwishyura ku wa Kane w’icyumweru gitaha. Ubwo bivuze ko isabwa kuyitsinda nibura ibitego biri hejuru ya 7-0.

Nyuma y’uko Zira FK itsinzwe muri UEFA Conference League no ku munsi w’ejo ku Cyumweru muri shampiyona yatsinzwe na Shamakhi igitego 1-0.

Mutsinzi Ange yari yabanje mu kibuga gusa aza gusimbuzwa ku munota 46. Kugeza ubu Zira FK iri kumwanya wa 4 ikazasubira mu kibuga ikina na Omonia ku wa Gatanu muri shampiyona.

Muri shampiyona y’icyiciro cya mbere muri Macedonia ku munsi w’ejo ku Cyumweru, ikipe ya FC Shkupi ikinamo Rwatubyaye Abdul yatsindaga FK Vardar ibitego 3-0. Muri uyu mukino uyu mukinnyi yari yabanje mu kibuga ndetse nta nubwo yigeze asimbuzwa.

Ikipe ya FC Shkupi iri ku mwanya wa 5 kugeza ubu, ikazasubira mu kibuga ikina na Sileks ku wa Gatandatu muri shampiyona.

Muri shampiyona y’icyiciro cya kabiri muri Leta Zunze Ubumwe za Amerika,ku munsi w’ejo ikipe ya Rhode Island ikinamo Kwizera Jojea yanganyaga na Loudoun United FC 0-0. Uyu mukinnyi w’Umunyarwanda yari yabanje mu kibuga ndetse arangiza n’umukino adasimbujwe.

Rhode Island iri ku mwanya wa 8, ikazasubira mu kibuga ikina na Birmingham Legion FC ku Cyumweru.

• Gitego Arthur watangiye atsinda 

Ifaranga ni kimwe mu bipimo fatizo bishingirwaho mu bukungu bw'abantu n'ibihugu muri rusange. Ifaranga ryo ubwaryo nk'urupapuro cyangwa igiceri ntirigira agaciro, ahubwo ibyo rikoreshwa nko kugura ikintu no kurivunjamo andi mafaranga ni byo biryongera cyangwa bikarigabanyiriza agaciro.

Uzumva Banki Nkuru y'igihugu (BNR) ivuga ko ifaranga ryagabanutse ku rugero runaka, nujya ku isoko guhaha ubone ibiciro byazamutse cyane ndetse utangire gukoresha amafaranga menshi cyane kandi uhaha ibintu bicye.

Hariho imyumvire n'ibitekerezo bitandukanye kuri iyi ngingo, ariko inzobere mu bukungu zisobanura ko ifaranga rita agaciro iyo ibintu rishobora guhaha birimo kugenda bigabanuka. 

Akenshi ibi bigendana n’umusaruro, aho iyo ibintu runaka bikenewe n’abaturage birimo ibiribwa n’ibindi bikoresho bibaye bicye ndetse bikarushaho no guhenda, ifaranga naryo rigenda rita agaciro.

Mu kiganiro yagiranye na InyaRwanda, impuguke mu by’ubukungu akaba n’umusesenguzi mu bya Politiki, Dr. Bihira Canisius yavuze ko iyo igihugu gishaka ko ryacyo ribona agaciro cyongera umusaruro, ku buryo ibyo cyohereza hanze birusha agaciro ibyo gitumiza hanze.

Avuga ku Rwanda yagize ati: “Twe rero ntabwo byari byashoboka, ibintu dutumiza hanze bifite agaciro kanini kurusha ibyo twohereza hanze. 

Dushaka rero ko ifaranga ryacu rigumana agaciro rikanakomera, twakongera umusaruro ku buryo buri kintu twatumizaga hanze aho kugitumiza ahubwo twe twohereza hanze, tukabona amafaranga y’amanyamahanga noneho ifaranga ryacu rikazamura agaciro.”

Uko imyaka yagiye isimburana, ifaranga ry’u Rwanda ryagiye ritakaza agaciro ugereranyije n’andi mafaranga y’amanyamahanga. Nko mu minsi yashize idolari ryari rihagaze kuri 900 Frw, ariko ubu rigeze hafi ku 1,200 Frw. 

Nubwo bimeze bityo ariko, inzobere mu by’ubukungu zishimangira ko bidakabije cyane, kuko n’ibyabaye byatewe n’uko umusaruro w’igihugu wari waguye mu minsi ishize noneho ibikoresho byose bikazamura ibiciro ugasanga birahenze.

Inzobere zivuga ko nubwo ifaranga ry’u Rwanda ritataye agaciro cyane, igihugu kidakwiye kwirara ahubwo gikwiye kongera umusaruro kikohereza ibintu byinshi mu mahanga, mu rwego rwo gusubiza agaciro iri faranga ryahoranye imbere y’amanyamahanga.

Itakazagaciro ry'ifaranga risobanurwa n'izamuka ry'ibiciro no kugabanuka kw'ubushobozi bw'ifaranga, ibi bishobora gupimwa n'igipimo cy'ihindagurika ry'ibiciro by'ibicuruzwa. Iyo byagenze bityo, amafaranga menshi agura ibicuruzwa bicye, Byumvikana ko ifaranga ritakaza imbaraga zo kugura.

Ingaruka zo gutakaza agaciro kw'ifaranga:

Bishobora kubaho ko ifaranga ritakaza agaciro ku buryo budasanzwe aribyo bizwi nka ‘Hyperinflation,’ aho ifaranga riba ritagifite ubushobozi bwo kugura ibicuruzwa, ibi bituma ibicuruzwa bihenda ku buryo bukabije.

Iyo ifaranga ryatakaje agaciro usanga ujyana amafaranga menshi ku isoko nyamara ugahahamo ibintu bicye.

Aha igihugu ubwacyo nacyo ntikiba kigifite ubushobozi bwo kugenzura ifaranga ryacyo kuko ibiciro biba bishobora kwiyongera ku kigero kirenze 50% ku munsi.

Ikindi kandi itakazagaciro ry'ifaranga rituma habaho ubusumbane mu mibereho n’ubukene bukabije. Kubera ko mu bihe nk’ibyo ibiciro bizamuka, bamwe babura amafaranga abandi bakayinjiza cyane.

Nubwo umukino wa mukeba wasubitswe, Rayon Sports yabyungukiyeho kuko amakuru avuga ko bari bamaze kumenyeshwa ko Stade Amahoro yari kuzawakira itazaboneka.

Rayon Sports yagombaga kwakira APR FC mu mukino w’umunsi wa 3 wa shampiyona ya 2024-25 wari kuzaba tariki ya 14 Nzeri 2024.

Uyu mukino wamaze gusubikwa kuko APR FC ifite umukino ubanza w’ijonjora rya nyuma rya CAF Champions League na Pyramids yo mu Misiri tariki ya 13 Nzeri 2024.

Amakuru ISIMBI yamenye ni uko Ishyirahamwe ry’Umupira w’Amaguru mu Rwanda ryari ryamaze kumenyeshwa ko amahirwe menshi tariki ya 14 Nzeri, Stade Amahoro itazaboneka ngo ibe yakwakira umukino wa APR FC na Rayon Sports bitewe n’Igiterane kizaberamo.

Tariki ya 15 Nzeri 2024, muri Stade Amahoro hateganyijwe kuzaberamo Igiteramo cya Rwanda Shima Imana, igiterane gisanzwe gihuza abaturuka mu matorero atandukanye bagasenga bashimira Imana aho u Rwanda rugeze.

Kuri iyi nshuro kizakorwa hashimwa Imana ku rugendo rw’imyaka 30 ishize Jenoside yakorewe Abatutsi mu 1994 ihagaritswe.

Bitewe n’imyiteguro yacyo rero bikaba ngo bitari gukunda ko tariki ya 14 Nzeri 2024 hakinirwamo uyu mukino.

Bikaba byari kuzateza Rayon Sports igihombo mu buryo bw’amafaranga kuko yari kuzajyana umukino kuri Kigali Pele Stadium yakira abantu batarenze ibihumbi 10 mu gihe Amahoro ari ibihumbi 45. Ikindi ni uko iyi kipe bigiye kuyongerera igihe cyo kwitegura cyane ko umutoza Robertinho yavuze ko abakinnyi be bataramenyerana neza.

Umukino Rayon Sports yari kuzakiramo APR FC wasubitswe

Chairman wa APR FC, Col Richard Karasira yavuze ko abavuga ko umutoza Darko Nović ashobora kwirukanwa batazi iby’umupira kuko utakwirukana umutoza nyuma y’amezi abiri gusa.

Col Richard Karasira yabitangaje nyuma yo gusezerera Azam FC muri CAF Champions League ku wa Gatandatu tariki ya 24 Kanama 2024 iyitsinze 2-0 biba 2-1.

Mbere y’uyu mukino hagiye humvikana inkuru nyinshi z’uko umutoza Darko Nović ashobora gusezererwa mu gihe atasezerera Azam FC.

Chairman wa APR FC akaba yanenze bikomeye abantu bavuga ko ikipe ishobora kwirukana umutoza nyuma y’amezi 2 gusa.

Ati “havuzwe byinshi, mboneraho nsaba abantu baba mu mupira, basesengura umupira nta mutoza ukorera isuzuma nyuma y’amezi abiri, mujye mubirekera abantu bo mu muhanda, haba hakiri kare.”

Yakomeje avuga ko nubwo yasinye amasezerano y’imyaka 3, mu masezerano ye harimo ko buri mwaka bazajya bakora isuzuma bakareba niba yaritwaye neza cyangwa byaranze.

Ati 'Ni byo ko umutoza yasinye amasezerano y’imyaka itatu ariko muri yo hari ingingo ivuga ko buri mwaka tuzajya twicarana na we tukareba umusaruro afite twasanga udakwiriye tukamusezerera.'

'Gusa turizera ko umusaruro uzaba ari mwiza kuko urebye turi mu nzira nziza kandi n’ibindi turizeza abafana ko bizaguma kuba byiza.'

Yasabye abakunzi ba APR FC gukomeza gushyigikira ikipe ya bo bakirengagiza ibivugwa byose ahubwo bakareba umusaruro mu kibuga.

Col Richard Karasira yavuze ko utakwirukana umutoza nyuma y’amezi 2 gusa

Umutoza wa Police FC, Mashami Vincent yavuze ko bababajwe cyane no gusezererwa na CS Constantine muri CAF Confederation Cup, ubu bagiye kwitegura ngo barebe ko umwaka utaha bazongera gusohoka.

Ni nyuma y’uko isezerewe mu Ijonjora ry’Ibanze rya CAF Confederation Cu na CS Constantine yo muri Algeria ku giteranyo cy’ibitego 4-1, umukino ubanza 2-0 n’aho uwo kwishyura wabaye ejo ku Cyumweru ukaba wararangiye ari 2-1.

Umutoza Mashami Vincent yavuze ko uyu mukino bakuyemo amasomo bityo ubu bagiye guhatana barebe ko umwaka utaha bazongera kubona itike yo gusohoka.

Ati “Nyuma y’igihe ikipe itabasha gusohoka si byo byari ibyifuzo byacu ariko turakuramo amasomo hanyuma dutegure uburyo umwaka utaha twazashobora kwitabira aya marushanwa ariko birumvikana turababaye.”

Yakomeje avuga ko ikintu cyabakozeho ari igitutu cy’imibare bari bariho aho basabwaga gutsinda ku kinyuranyo cy’ibitego 3.

Ati “igitutu cy’uko tugomba gutsinda, igitutu cy’uko twatsinzwe, igitutu cy’uko tugomba gushaka ibitego runaka, icyo gihe rero iyo udatuje neza igihunga kiba ari cyinshi imbere y’izamu … imibare yakomeje kudukoraho mu mikinire yacu wabonaga ko turimo gutekereza imibare cyane biratubuza gutuza no kugabanya amakosa.”

Police FC yari yasohokeye u Rwanda nyuma yo kwegukana igikombe cy’Amahoro cya 2024, mu mwaka wa 2024-25 irasabwa kwegukana shampiyona cyangwa icy’Amahoro na none kugira ngo yongere gusohokera u Rwanda mu Mikino Nyafurika.

Mashami Vincent yavuze ko yababajwe no gukurwamo na CS Constantine