Author: webrwanda

Uyu mukobwa ni umwe mu baririmbye mu gitaramo “3040 y’ubutore” cy’umuhanzi Massamba Intore cyabereye muri BK Arena, kuri uyu wa Gatandatu tariki 31 Kanama 2024. Yagaragaje ko yakozwe ku mutima no kuba uyu muhanzi yamuhaye umwanya akaririmba muri iki gitaramo.

Ku rutonde rw’indirimbo yaririmbye harimo na ‘Kunda Ugukunda’ ya Kamaliza. Iri mu ndirimbo zakomeje izina ry’uyu munyabigwi mu muziki, ndetse mu bihe bitandukanye benshi mu bahanzi bakuze bafatira urugero, bagiye bayisubiramo.

Massamba Intore yari aherutse gutangaza ko, bateguye uburyo bwo guha icyubahiro Kamaliza muri iki gitaramo, kubera ko ari umuntu babanye igihe kinini, yaba ku rugamba rwo kubohora u Rwanda no mu buzima busanzwe.

Yavuze ko Kamaliza aho ari yishimye, kuko ‘icyo yarwaniye twakigezeho’. Kandi, yibuka ko ubwo yahimba indirimbo ‘Intare’ bari kumwe.

Uyu mukobwa wageze ku rubyiniro ahagana saa mbili n’iminota 20′ yanaririmbye indirimbo ye yise ‘Wowe Gusa’. Yagaragaje ko yari amaze igihe yitegura kuririmba iyi ndirimbo, ndetse asoje kuyiririmba yabajije abari bamukurikira niba biteguye gutaramana nawe. Yavuze ko “ndishimiye cyane kuririmba mu gitaramo nk’iki.”

Mu mashusho y'iyi ndirimbo yifashishijemo ababyeyi be, ndetse yigeze kuvuga ko babaye urufatiro rwo kuba uyu munsi akora umuziki. Ati 'Mu muco wacu, ababyeyi bashyigikira abana babo kuko baba bafite ubutumwa bwihariye, ntabwo byantwaye igihe kinini kugira ngo mbumvishe ko baza mu mashusho y'indirimbo.'

'Mfite ababyeyi batangaje, ndabakunda cyane, ndabubaha, baranshyigikira cyane, ndabyibuka data yari afite ikiriyo yagomba kujyamo ariko arigomwa mujyana mu ntara muri Nyabihu ndabashimira imbere y'abanyarwanda bose, njye byarandenze byanyigishije ibintu byinshi cyane.”

Uyu mukobwa yavuze ko by'umwihariko, Mama akunze kumwohereza amajwi (Audio) iyo avuye muri studio, bityo nyinshi mu ndirimbo ashyira hanze azimenya mbere.

Ati 'Mama nkunda kumwoherereza amajwi, buri gihe uko mvuye muri studio, we na mukuru wanjye Alliane nibo bantu noherereza ibintu byanjye kugira ngo bumve, nibo bampa ibitekerezo by'ukuri ku bihangano byanjye, ni ibintu biba bikenewe muri uru ruganda, kuko dufite abantu benshi batubeshya, rero uba ukeneye umuntu ukubwiza ukuri n'iyo kwaba kubabaza, ukareba ukuri kwabyo.'

Ari ku rubyiniro, yakurikijeho indirimbo yise ‘Ntabwo yantegereza’. Yavuze ko yayihimbye kugirango akangurire abantu gukundana. Ati “Abatugirira nabi ntabwo tugomba kubitura inabi, ahubwo tugomba kubahata urukundo.”

Iyi ndirimbo ye yagiye hanze, ku wa 24 Ukuboza 20220, bivuze ko imaze imyaka itatu igiye hanze. Yakomereje ku ndirimbo ye yise ‘You should know’ yahimbye mu rwego rwo kubwira uwari umukunzi we, ko yamukunze by’igihe kirekire, kandi ko nta wundi muntu ateze kumusimbuza.

‘You Should Know’ yayishyize ku muyoboro we wa Youtube, ku wa 2 Ugushyingo 2022. Yaririmbye muri iki gitaramo, mu gihe mu 2025 azashyira hanze Album ye nshya, kandi yasabye abitabiriye iki gitaramo kuzamushyigikira ubwo azaba amurika iyi Album.

Ariel Wayz yeretswe urukundo mu gitaramo cya Massamba cyabereye muri BK Arena, kuri uyu wa Gatandatu tariki 31 Kanama 2024

Ariel Wayz yaririmbye indirimbo ya Kamaliza mu rwego rwo kumuha icyubahiro nk'umuhanzi afatiraho urugero'

Ariel yavuze ko yishimiye guhurira ku rubyiniro na Massamba, umuhanzi wizihiza imyaka 40 mu muziki

Umuyobozi w’Umujyi wa Kigali, Dusengiyumva Samuel yitabiriye igitaramo cya Massamba Intore 

Umuhanzi utanga ibyishimo ku bisekuru byombi, Makanyaga Abdul yashyigikiye Massamba wizihiza imyaka 40 mu muziki 

Umuhanzi Jules Sentore na Andy Bumuntu bitabiriye iki gitaramo

ARIEL WAYZ YAKURIWE INGOFERO MU GITARAMO CYA MASSAMBA INTORE MURI BK ARENA

“>

Kanda hano urebe amafoto menshi yaranze igitaramo cyo kwizihiza imyaka 40 ishzie Massamba ari mu muziki

Yabigaragaje mu ijoro ryo kuri uyu wa Gatandatu tariki 31 Kanama 2024, ubwo yakoraga igitaramo yise “3040 y’ubutore” cyabereye muri BK Arena. Ni ubwa mbere uyu mugabo w’igikwerere, akoreye igitaramo muri iyi nyubako yakira abantu abarenga ibihumbi 10.

Imibare ya hafi yerekana ko iki gitaramo cye kitabiriwe n’abantu barenga ibihumbi 6. Yagikoze ashyigikiwe n’abahanzi bakomeye muri gakondo barimo nka Ruti Joel, Nziza Francis, Jules Sentore, Ariel Wayz, n’abandi.

Kandi yataramiye imbere y’ibihumbi by’abantu barimo Teta Diana, Muyango Jean Marie, Andy Bumuntu n’abandi banyuranye. Massamba yakoze iki gitaramo yitaye cyane ku  ndirimbo ze zakunzwe mu bihe bitandukanye, cyane cyane izo mu bukwe, izo ku rugamba n’izindi zinyuranye.

Yigaragaje mu myambaro itandukanye inshuro eshatu, ahanini ashingiye kuri buri gice cy’indirimbo yaririmbye.

Ariko kandi ku rubyiniro yari afashijwe mu majwi n’abasore n’inkumi, ndetse hagiye haseruka abo mu matorero atandukanye mu rwego rwo kumufasha.

InyaRwanda igiye kugaruka ku bintu 10 byaranze igitaramo cye yizihirijemo imyaka 40 ishize ari mu muziki:

1.Yakiriwe bidasanzwe muri iki gitaramo cye

Uyu mugabo yageze ku rubyiniro ahagana saa 21:15′, ariko mbere y’aho yari yakiriwe n’ibihumbi by’abantu bisunze gucana amatara no kuvuza akaruru k’ibyishimo.

Ku rubyiniro, yari kumwe na Ruti Joel ndetse na Clement wacurangaga gitari. Uyu mugabo wizihiza imyaka 40 ari mu muziki, yinjiye ku rubyiniro yambaye imyambaro yiganjemo ibara ry’umweru, ndetse n’umukara, ariko kandi yari yambaye n’ingofero.

Mu gice cya mbere yitaye cyane ku ndirimbo ze zakunzwe nka “Amarebe”, “Imihigo y’imfura”, “Amararo”, “Impuga inanga” yaririmbye acurangiwe inanga na Nziza Francis witegura gusohora Album ye nshya, ndetse na “Berenadeta”.

2.Massamba yagaragaje ko guhamiriza ari ibintu yavukanye

Yagiye mu ngamba maze ahuza imbaraga n’abasore b’intore barahimiriza biratinda. Uyu muhanzi aherutse kuvuga ko yakuriye mu muryango w’intore, byamufashije kwisanga neza mu muziki.

Yavuze ko yakoze injyana zinyuranye zirimo nka Zouk, Reggae n’izindi, ariko ko Se yamubwiye gukomera cyane ku ndirimbo zivuga kuri gakondo y’Abanyarwanda.

Kandi, nawe yumvikanisha ko kuguma kuri gakondo byatumye aba uwo ariwe uyu munsi. Muri iyi myaka 40 amaze mu muziki, uyu mugabo avuga ko yabaye iy’amateka adasanzwe, birimo kujya ku rugamba, kuririmba asohora abageni, gutaramira mu bihugu bitandukanye n’ahandi henshi.

3.Yahinduye imyambaro agaruka mu mwambaro wa Gisirikare

Massamba aherutse kubwira itangazamakuru ko ku rugamba yari ashinzwe ibintu bitatu; byarimo gukora ubukangurambaga, gushishikariza urubyiruko kujya ku rugamba no gushaka inkunga yafashaga abari ku rugamba.

Yavuze ko byari ibihe bidasanzwe kuri we, kandi yishimira ko inganzo yagize uruhare mu rugamba rwo kubohora igihugu.

Ubwo yari ahinduye imyambaro, yinjiriye mu ndirimbo ye yise ‘Inkotanyi’, ndetse yafashe umwanya wo kugenda aramukanya n’abakunzi be, abafana be, abo mu muryango we n’abandi banyuranye.

Yanaririmbye kandi indirimbo ‘Duhakananye umurego’, ‘Dushengurukanye isheja’, ‘ Kibonge’, ‘Iya mbere Ukwakira’, ‘Atatukuonde’.

Ku rubyiniro, Massamba yifashishije yane Ruti Joel baserukanye mu ndirimbo hafi ya zose yaririmbye. Uyu muhanzi w’imyaka 28 y’amavuko, aherutse kubwira  itangazamakuru, ko ari ibyishimo n’umunezero udasanzwe kuri we, kuba Massamba yaramuhisemo ngo bataramane muri iki gitaramo.

Yavuze ko Massamba yamubereye umubyeyi mu muziki, ndetse nyinshi mu ndirimbo ze yazifashe mu mutwe.

4.Indirimbo ‘Dushengurukanye isheja’ yaciye ibintu

Massamba Intore aherutse kubwira itangazamakuru, ko iyi ndirimbo yayihimbye mu 1993 ubwo yari mu Mujyi wa Arusha muri Tanzania, ahasinywe amasezerano y’amahoro hagati ya Leta y’u Rwanda na FPR- Inkotanyi yari mu buhunzi.

Ni indirimbo ibitse amateka kuri we, n’ubwo amasezerano impande zombi zashyizeho umukono atigeze ashyirwa mu bikorwa, kuko Jenoside yakorewe Abatutsi yashyizwe mu bikorwa, bigatuma ingabo zari iza RPA zitabara, zikayihagarika.

5.Massamba yagiye aramukanya n’inshuti ze:

Uyu muhanzi aherutse kuvuga ko iki gitaramo kidasanzwe kuri we, kuko cyubakiyemo amateka y’abantu babanye igihe kinini, yaba mu muziki no mu buzima budasanzwe. Ndetse, benshi muri bo abafiteho urwibutso rudasanzwe.

Yitaye cyane ku kuramutsa abantu benshi babanye, ndetse yagiye ava ku rubyiniro akanyura mu bantu baganira, abandi akabaha indangururamajwi kugirango baririmbe. Byageze aho bamwe umwe mu bafana amusanga ku rubyiniro, maze bafatanya kuririmba.

6.Yagarutse mu ndirimbo zivuga ku bukwe

Kuva mu 1997, Massamba yakoreye amafaranga menshi mu birori byo gusohora abageni, ndetse yagiye anatumirwa mu bihugu bitandukanye. Ni kimwe mu byo akora byatumye izina rye rikomera, ndetse izi ndirimbo zica ibintu hirya no hino ku Isi.

Ni indirimbo zuzuye ibihozo, zigaruka ku musore n’umukobwa yagiye aririmba mu bihe bitandukanye. Bisa n’aho ku rutonde rw’izo yagombaga kuririmba yazihaye umwana munini muri iki gitaramo, ariko kandi byatumye ataramana n’ibihumbi by’abantu mu gihe kirekire.

Byamusabye guhindura imyambaro, ubundi yinjirira mu ndirimbo nka ‘Araje araje’, ‘Humura Humeka’, ‘Ari hehe’ yabaye ikita rusange mu muziki we, akomereza ku ndirimbo nka ‘Nyangezi’, ‘Mpore Mpore’, ‘Ikizungerezi’, ‘Agasaza’, ‘Nyaruguru’ n’izindi zidasanzwe mu rugendo rwe rw’umuziki.

7.Abanyamuziki batunguranye ku rubyiniro

Massamba yamaze igihe kinini atoza abakiri bato kuri we mu muziki, abigisha uburyo baririmba, uko baseruka mu ngamba n’ibindi.

Abo yigishije barimo Jules Sentore, Lionel Sentore, Andy Bumuntu n’abandi bamusanze ku rubyiniro maze bataramana nawe. Ni mu gihe Jules Sentore yafatanyije nawe kuririmba indirimbo yitwa ‘Ari hehe’.

Massamba aherutse kuvuga ko afite icyizere ku bakiri bato, kuko buri gihe abatoza gusigasira umuco, kandi abona ko bitanga icyizere. Nyuma yo kuririmba muri iki gice, Massamba yagize ati “Kuva nabaho sindabona abantu bishimye nkamwe.”

Mu gice cya nyuma cy’iki gitaramo, yitaye ku ndirimbo zo hambere n’izo muri iki gihe mbere y’uko agaruka ku rubyiniro, umushyushyarugamba Luckman Nzeyimana yabanje kubwira abitabiriye iki gitaramo gushimira Massamba, kuko imyaka 40 ishize ari mu muziki yagaragaje ubudasa, kandi hari benshi bamufatiraho urugero.

Ndetse, yavuze ko benshi bamuzi ku izina rya ‘Tonto Mass’. Yinjiriye mu ndirimbo ye yise ‘Wirira’. Yigeze kuvuga ko yahimbye iyi ndirimbo biturutse ku mukobwa wo mu gihugu cy’u Burundi bakundanye, ariko akaza kumusiga agiye ku rugamba rwo kubohora igihugu. Massamba yavuze ko uriya mukobwa yananiwe kumutegereza, kuko yasanze yarashatse undi mugabo.

8.Yahamagaye umukobwa we Ikirezi ku rubyiniro

Massamba yafashe umwanya ahamagara ku rubyiniro umukobwa witwa Ikirezi bahurira ku rubyiniro. Ni gacye bombi bagiye bagaragara bari kumwe mu bitaramo nk’ibi.

Uyu mukobwa yagiye avuga ko yakozwe ku mutima no kuba Se yaramushyigikiye mu muziki, ndetse byinshi mu bihangano bye yabigizemo uruhare.

Mbere y’uko Ikirezi agera ku rubyiniro, Massamba yagzie ati “Mbifurije kuzagira imyaka 40 nk’iyanjye, ndetse mukarenzaho cyane cyane. Nagize amahirwe ngira umukobwa wanjye uba muri Canada, nagirango mputumire.”

Massamba n’umukobwa we baririmbye bakomerwa amashyi, kugeza ubwo bombi bavaga ku rubyiniro. Ndetse, byageze ubwo amwambika ingofero yari yambaye.

Uyu munyabigwi mu muziki yavuye ku rubyiniro, amaze aharira umwanya we  umukobwa we aririmba indirimbo ye yise ‘Smile’. Ni indirimbo yashyize hanze, ku wa 15 Gicurasi 2020. Yanagaragaje kandi umukobwa we yise Gicanda ubarizwa mu Bubiligi.

9.Josh Ishimwe, Lionel Sentore, Teta Diana, batunguranye muri iki gitaramo

Uyu musore yasanganiye ku rubyiniro, Massamba Intore baririmbana indirimbo ‘Sinogenda ntashimye’ yamamaye cyane. 

Ni indirimbo zatumye Josh akundwa cyane, ndetse yabishimangiye cyane mu bitaramo yakoze mu myaka ishize, cyane cyane ibaybereye muri Camp Kigali n’ahandi. Ubwo yakoraga igitaramo nawe, Josh Ishimwe yahamagaye ku rubyiniro Massamba bataramana.

Yanatumiye kandi ku rubyiniro, Jules Sentore afatanya na Teta Diana kuririmba indirimbo ‘Umpe akanya’ yakunzwe mu buryo bukomeye. Iyi ndirimbo yatumye benshi batekereza ko bombi bakundana, ariko bagiye babihakana igihe kinini.

Muri iki gitaramo, kandi yatunguwe n’inshuti ze n’abandi bamwifuriza isabukurutore nziza, ndetse yahawe impano y’ifoto ari kumwe na perezida Kagame. Iyi foto ni sanzwe mu rugendo rwa Massamba Intore, kuko yakunze kuyishyira igihe kinini ku mbuga nkoranyambaga, mu rwego rwo kugaragaza uburyo yakozwe ku mutima n’imiyoborere ya Perezida Kagame.

10.Dj Marnaud yashyuhije abanyamujyi!

Uyu musore wamamaye mu kuvanga imiziki, yongeye kugaragaza ko adasanzwe mu rugendo rw’umuziki. Yageze ku rubyiniro, mu masaha ya nyuma y’iki gitaramo acuranga indirimbo ‘Umudereva’ yakoranye na Ruti Joel na Massamba Intore.

Iyi ndirimbo yaciye ibintu cyane mu gihe cy’amatora y’Umukuru w’Igihuigu, kuko yacuranzwe igihe kinini. Ubutumwa burimo bwagiye bwifashishwa n’abantu benshi ku mbuga nkoranyambaga. 

Ifoto Massamba yahawe iriho na Se Sentore Athanase wamukundishije umuziki gakondo

Massamba yavuze ko afite amateka yihariye n’iyi foto yafashwe ari kumwe na Perezida Kagame

Ibyishimo byari byose kuri Massamba Intore nyuma y’uko ahawe ifoto yakozwe ari kumwe n’Umukuru w’Igihugu

Massamba yahawe impano yarimo ifoto ari kumwe na Perezida Paul Kagame yafashwe mu 2017

Massamba Intore yahawe igikombe, ashimirwa uruhare rwe mu muziki w’u Rwanda

Massamba yakoze igitaramo gikomeye yizihirijemo imyaka 40 ishize ari mu muziki

Massamba yatangaje ko yakoze igitaramo umutima we unezerewe, bitewe n’ibihumbi by’abantu bari bamushyigikiye

Intore Massamba yitaye cyane ku ndirimbo ze zakunzwe mu bihe bitandukanye kugeza n’ubu

Umucuranzi wa Gitari, Clement yongeye kugaragaza ubuhanga budasanzwe muri iki gitaramo

Massamba yavuze ko yitaye cyane kuri buri ndirimbo yagiye asabwa n’abantu banyuranye mu bihe bitandukanye

Ruti Joel ari kumwe n’umwe mu bana bo mu Itorero Ibihame by’Imana

Umutima wishimye kuri Massamba Intore nyuma yo gukora iki gitaramo cyihariye mu rugendo rwe rw’umuziki

Massamba Intore yaserukanye n’abasore n’intore mu ngamba, batanga ibyishimo

Massamba Intore yashimiye Ruti Joel, amugaragaza nk’umuhanzi uzatera ikirenge mu cye 

Umuhanzikazi Teta Diana yanogewe muri iki gitaramo cy’umuhanzi wamuciriye inzira

Massamba yashimye bikomeye Nziza Francis wacuranze ubwo yaririmbaga zimwe mu ndirimbo ze

Ruti Joel niwe wateguye buri kimwe cyasabwa kugirango Massamba Intore akore igitaramo cyiza, cyane cyane ku rubyiniro

MASSAMBA YAKOZE AMATEKA AKOMEYE YUZUZA INYUBAKO YA BK ARENA KU NSHURO YE YA MBERE

“>

RUTI JOEL YARIRIMBYE YUNAMIRA YVAN BURAVAN WABAYE INSHUTI YE IGIHE KININI

“>

ARIEL WAYZ YUNAMIYE UMUHANZIKAZI KAMALIZA WABAYE IKITEGEREREZO KURI WE

“>

Kanda hano urebe amafoto menshi yaranze igitaramo cya Massamba Intore cyo kwizihiza imyaka 40 ari mu muziki

Amasite ni agashya abaturage bo muri uyu Mudugudu bishyiriyeho kugira ngo bibafashe mu kwikemurira ibibazo batarindiriye kubigeza ku muyobozi w'Umudugudu.

Umuyobozi wa Site n'umwungiriza we baba bayobora Amasibo atanu aho Isibo imwe bayihaye ingo icumi. Umuyobozi w'Isibo atanga raporo ku muyobozi wa Site na we agatanga raporo ku muyobozi w'Umudugudu.

Uyu Mudugudu ugizwe n'ingo zirenga 300 ubarizwamo abayobozi b'Amasite batandatu n'abungiriza babo bagira uruhare mu kumenya ibibazo by'ingo 50 ziba ziri muri buri site. Abaturage babita Abayobozi b'Umudugudu bungirije.

Habumugisha Isaie uyobora Site ya Manene, yavuze ko afite Amasibo atanu, buri mugoroba ngo ahabwa raporo n'Umuyobozi w'Isibo ku kuntu mu Isibo ye umutekano wiriwe n'ibibazo byahagaragaye. Ibibazo ngo akunze gukemura ni ibijyanye n'amakimbirane hagati y'abashakanye kuko ibindi by'ubujura usanga Mutwarasibo yabikemuye.

Ati 'Iyo hari ikibazo kitunaniye cyangwa tubona kigoranye dukora raporo tukakigeza ku muyobozi w'Umudugudu hanyuma tukajyayo na ba bantu tukagishakira igisubizo. Ibi byatumye nta bibazo byinshi bigaragara mu Mudugudu wacu, yewe no mu Kagari ntabwo bajya bakira ibibazo byacu byinshi kuko ibyinshi turabyikemurira.'

Umuyobozi w'Umudugudu w'Akinteko, Twagirayezu Daniel, yavuze ko Umudugudu we ubarizwamo ingo 312 ku buryo gushyiraho Site byamufashije kumenya amakuru ya buri rugo umunsi ku munsi.

Ati 'Amasite twashyizeho yadufashije cyane mu kumenya amakuru y'abaturage. Ubuyobozi bw'Isibo ni sawa ariko nkanjye gufata Amasibo atanu nkayahuza nkashyiraho umukuru wa Site uhagarariye ingo 50 ni byiza cyane kuko wa muyobozi w'Isibo atanga raporo ku muyobozi wa Site bigatuma twese dufatanyiriza hamwe.'

Twagirayezu yavuze ko kandi iyi miyoborere yatumye abaturage bose bashyira hamwe biyubakira ibiro by'Umudugudu bya mbere, Akarere kabaha kanashyiramo Ivuriro ry'Ibanze. Kuri ubu banubatse ibindi biro by'Umudugudu bishya inzu yari isanzwe bayirekera Ivuriro ry'Ibanze kugira ngo rikoreremo ryisanzuye.

Umuyobozi w'Akarere ka Rwamagana, Mbonyumuvunyi Radjab, yavuze ko buri muyobozi wese afite umwanya wo guhitamo ikimufasha gusubiza ibibazo by'abaturage. Yavuze ko nkuko mu Mudugudu w'Akinteko bahisemo gucamo Amasite n'abandi bayobozi bemerewe kubikora bagakoresha abaturage b'inyangamugayo.

Ati 'Icyangombwa ni uko uburyo bwose washyiraho abaturage ari bo babuhitamo kuko nibo biba bigiye gufasha. Iki ni igitekerezo cyiza twanashishikariza n'abandi kubikora aho kugira ngo Umukuru w'Umudugudu ayobore Umudugudu munini wenyine yanagira abamwungirije bamufasha.'

Yavuze ko hari n'indi midugudu yashyizeho imboni zo mu midugudu zireberera ingo eshatu bashinzwe kureba ibihakorerwa byose bagatanga raporo ku muyobozi w'Isibo cyangwa uw'Umudugudu.

Kuri ubu abaturage bo mu Mudugudu w'Akinteko batangije konte y'Umudugudu imaze kugeraho ibihumbi 260 Frw, barifuza kandi kuzagira koperative y'Umudugudu wabo ikazajya ikora ibikorwa by'ubuhinzi n'ibindi byinshi bitandukanye.

---

APR FC yakinnye umukino wa gicuti na Marines FC iyitsinda 2-1 bya Tuyisenge Arsene na Victor Mbaoma.

Ni umukino wabaye kuri uyu wa Gatandatu tariki ya 31 Kanama 2024 kuri Stade Ikirenga i Shyorongi.

Umutoza wa APR FC yari yakinishije benshi mu bakinnyi batahabwaga amahirwe mu mikino yatambutse nka Chidiebere Nwobodo Johnson wakinaga umukino we wa mbere muri APR FC.

Uyu mukinnyi wakinnye iminota yose 90, uretse umupira yatanze wavuyemo igitego, yanaremye uburyo butandukanye benshi bibaza impamvu ari wo mukino
we wa mbere.

APR FC yabonye igitego ku munota wa 13 cyatsinzwe na Tuyisenge Arsene ku mupira yari ahawe na Chidiebere Nwobodo Johnson.

APR FC yaje kubona igitego cya kabiri cyatsinzwe na Victor Mbaoma ku munota wa 47 kuri penaliti ku ikosa ryari rikorewe Godwin Odibo.

Marines FC yaje kubona igitego cy’impozamarira cyatsinzwe Mbonyumwami Taiba kuri penaliti ku ikosa yari akorewe na Taddeo Lwanga.

Abafashwe ni abagabo batatu n'umugore umwe, bafatiwe mu cyuho bazicururiza mu tubari duherereye mu Mudugudu wa Birembo, Akagari ka Ngara, mu Murenge wa Bumbogo, ahagana Saa Kumi n'Imwe za mu gitondo ku wa Kane tariki ya 29 Kanama 2024.

Umuvugizi wa Polisi mu Mujyi wa Kigali, CIP Wellars Gahonzire, yavuze ko gufatwa kwabo byagizwemwo uruhare n'abaturage batanze amakuru.

Ati 'Abaturage bahaye amakuru Polisi ikorera muri uriya murenge ko aba bantu uko ari bane bafite utubari bacururizamo inzoga bikorera zitujuje ubuziranenge. Habayeho kugenzura biza kugaragara ko amakuru yatanzwe ari impamo, mu bikorwa byateguwe bifatirwamo bane bari bafite bose hamwe litiro 3500, ndetse mu tubari tubiri muri two hafatirwa imashini zikinishwa urusimbi zizwi ku izina ry'Ibiryabarezi eshanu, abaje kuhanywera bakinaga rwihishwa mu masaha ya nijoro bwamara gucya bakabihisha.'

CIP Gahonzire yavuze ko kenshi ahantu hacururizwa bene izo nzoga zitujuje ubuziranenge, hakunze kugaragara urugomo rurimo gukubita no gukomeretsanya ndetse rimwe na rimwe bikaba byabyara n'imfu.

Ati 'Bitewe n'ingaruka tugenda tubona ziterwa n'izi nzoga, Polisi yakajije umukwabu wo gufata abazikora n'abazicuruza kugira ngo bahanwe banabere abandi akabarore.'

Yaburiye buri wese uzi ko azikora cyangwa azicuruza n'uwateganyaga kubijyamo ko ashatse yabireka kuko igikorwa cyo kubafata gikomeje hirya no hino mu Mujyi wa Kigali ku bufatanye n'izindi nzego n'abaturage.'

Yasabye abanywa izi nzoga kuzireka kuko zigira ingaruka ku buzima bwabo bitewe n'ibyo bazikoramo, asaba kandi abaturage kujya bihutira gutanga amakuru aho bazibonye ndetse ashimira ababigizemo uruhare rwatumye ziriya zifatwa zitaragurishwa.

Iteka rya Minisiteri y'ubuzima riteganya urutonde n'ibyiciro by'ibiyobyabwenge rishyira ibinyobwa byose bicuruzwa bidafite icyangombwa cy'ubuziranenge mu cyiciro cy'ibiyobyabwenge byoroheje.

Ingingo ya 263 mu itegeko riteganya ibyaha n'ibihano muri rusange, ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge aba akoze icyaha.

Iyo abihamijwe n'urukiko ahanishwa igifungo kitari munsi y'imyaka 7 ariko kitarenze imyaka 10 n'ihazabu y'amafaranga y'u Rwanda atari munsi ya miliyoni 5 ariko atageze kuri miliyoni 10 ku byerekeye ibiyobyabwenge byoroheje.

---

Kwitabira ubu bukangurambaga bisaba kugura ipaki yo guhamagara cyangwa iyo gukoresha kuri internet nk'uko bisanzwe, ubundi umuntu agahabwa ibihembo.

Ibyo bisobanuye ko uko umuntu agura ama-unites inshuro nyinshi ari na ko ubikora azaba yongera amahirwe yo kwegukana ibihembo byinshi.

Ibihembo biri mu buryo bubiri. Ubwa mbere bujyanye n'ibihembo by'amafaranga kuva ku bihumbi 10 Frw kugeza ku gihembo nyamukuru cya miliyoni 5 Frw kizahabwa abanyamahirwe babiri.

Ikindi cyiciro kigizwe n'ibihembo bitari amafaranga bizahabwa abagize uruhare muri ubwo bukangurambaga birimo ingendo zo muri kajugujugu ku bufatanye na Akagera Aviation.

Birimo kandi guhabwa za moto, amagare, ibikoresho bitanga umuriro uturuka ku mirasire y'Izuba, telefone zigezweho n'ibindi nk'ama-unites yo guhamaga n'ayo gukoresha kuri internet.

Ni amahirwe MTN Rwanda yashyizeho hagamijwe gufasha Abaturarwanda gukomeza imirimo yabo no kuba hafi y'inshuti n'abavandimwe babo ariko bakanabihemberwa.

Nta paki yihariye yashyizweho, ahubwo ni izisanzwe, uko ugura ama-unites uhita ujya mu irushanwa, ndetse bikareba abari mu bice byose by'u Rwanda.

Umuyobozi ushinzwe Serivisi zihabwa Abakiliya n'ibijyanye n'ikoranabuhanga muri MTN Rwanda, Rosine Dusabe yavuze ko icyo gikorwa kigaragaza uburyo bahora batekerereza abakiliya babo ibibateza imbere.

Yavuze ko iki kigo cy'itumanaho cyiyemeje guhuza abaliliya babo n'inshuti n'abavandimwe zabo, ariko ubikoze akanagira izindi nyungu abona zituruka muri ibyo bihembo.

Ati 'Turakangurira abakiliya bacu bose gukomeza kugura ama-unites bakabona iminota yo guhamagara inshuti n'abavandimwe babo, bagura n'ama-unites yo kujya kuri internet. Uretse kuba hafi y'inshuti n'abavandimwe abakiliya bacu bazabona n'ibihembo bindi byiyongera.'

MTN Rwanda kandi yatekereje no kubakira ubushobozi abayihagarariye mu bice bitandukanye by'igihugu (agents), aho na bo igiye kubashyiriraho ibihembo bya buri cyumweru.

Umu-agent wese uzajya agurisha cyangwa akarenza ama-unites ya 3000 Frw azajya ashyirwa mu banyamahirwe bazajya batsindira ibihembo bitandukanye birimo guhabwa moto n'ibihumbi 100 Frw.

MTN Rwanda izabashyira mu byiciro bijyanye n'intara bakoreramo, abatsinze bajye batoranywa buri cyumweru, hahembwe abanyamahirwe 10.

Dusabe ati 'Aba-agent bacu ni inkingi ya mwamba mu iterambere ry'ikigo cyacu. Bagira uruhare rukomeye mu kugeza ku bakiliya serivisi zacu zose. Dushaka kububakira ubushobozi ariko tunabashimira iyo mirimo yo kuduhuza n'abakiliya bacu bakora.'

MTN Rwanda ni kimwe mu bigo bikomeye ku isoko ry'u Rwanda mu bijyanye n'itumanaho na cyane ko imaze imyaka igera kuri 26 ikorera mu Rwanda.

Ni nako abafarabuguzi bayo bakomeje kwiyongera kuko igihembwe cya mbere cy'uyu mwaka, cyarangiye ku wa 31 Werurwe 2024 cyasize ifite abafatabuguzi barenga miliyoni 7,4.

---

Ni inama yabaye ku wa 26 na 27 Kanama. Usomye imyanzuro y'inama, nta na hamwe harimo izina ry'u Rwanda, gusa ku munsi wayo wa mbere, rwagarutsweho cyane kubera Intumwa za Repubulika Iharanira Demokarasi ya Congo, zongeye gukoresha umwanya zari zihawe, mu kugaragaza ko ibibazo igihugu cyabo gifite biterwa n'u Rwanda.

Raporo ku mutekano yamuritswe igaragaza ko Uburasirazuba bwa Congo ari agace kadatekanye, kandi ko iki gihugu kibarizwamo imitwe yitwaje intwaro irenga 120 igira uruhare mu gukongeza amakimbirane n'imvururu mu karere.

Ivuga uko ibintu byari byifashe hagati ya Mutarama na Kamena 2024, ko Ingabo za RDC zaburijemo ihirikwa ry'ubutegetsi bwa Tshisekedi muri Gicurasi 2024 kandi ko ari amakuru yatanzwe n'inzego nkuru z'iki gihugu.

Abantu bitwaje intwaro bateye ingo z'abayobozi bakuru mu gihugu ndetse raporo ivuga ko bafashe igice gito cy'Ibiro by'Umukuru w'Igihugu mu Murwa Mukuru, Kinshasa. Muri ibyo bikorwa, ngo abantu batatu barishwe, abandi 50 barafungwa.

Abagize iri huriro bavuze ko ku wa 3 Nzeri 2023, Guverinoma ya RDC yaciye iteka rigamije guhuriza hamwe abarwanyi batandukanye muri FARDC, kugira ngo barwanye umutwe wa M23.

Raporo ivuga ko mu bagiye muri iryo huriro, harimo n'Ingabo z'u Burundi ndetse n'abarwanyi b'umutwe wa FDLR wagize uruhare muri Jenoside yakorewe Abatutsi. Ivuga ko umutwe wa Wazalendo watumye ibintu bidogera mu Burasirazuba bwa Congo.

Ibiganiro byahinduye isura, RDC ishinja u Rwanda

Umwe mu Badepite bari bahagarariye RDC mu nama, Boniface Kabanda Matanda, yavuze ko ikibazo cy'amakimbirane muri RDC giterwa n'u Rwanda, ko gukomeza gushakira igisubizo i Luanda na Angola ari uguta umwanya.

Abari mu nama, by'umwihariko Intumwa z'u Rwanda, bavuze ko kuba RDC ibona ko nta gisubizo kizava mu biganiro bya Luanda na Nairobi, bigaragaza ko nta bushake iki gihugu kiri gushyira mu gushaka umuti.

Amashusho yashyizwe hanze na Televiziyo ya NTV yo muri Uganda, agaragaza Matanda agira ati 'Amakimbirane yo muri RDC areba ibihugu bibiri aho kimwe ari igishotoranyi, ari cyo u Rwanda.'

Anagaragaza Senateri Uwizeyimana atishimiye ibyo Intumwa za RDC zari ziri kuvuga, kugeza n'aho asaba Perezida wayo guhagarika izo mvugo zidafite ishingiro.

Muri iyi nama, byasaga n'aho ibihugu byinshi byayitabiriye, byumva neza umuzi w'ikibazo cyo mu Burasirazuba bwa RDC cyane ko hari Delegasiyo y'Inteko zo muri ICGLR yari iherutse gukorera urugendo mu Burasirazuba bwa Congo, igasura inkambi ku buryo yari ifite amakuru ya nyayo.

Intumwa ya RDC yageze n'aho ivuga ko ibyo Monusco yatangaje ko M23 ifite intwaro nyinshi atari byo. Umwe mu bari bitabiriye, yasubije ko izo ntwaro zigurwa na Leta ya Congo, ikaziha imitwe yitwaje intwaro, M23 ikaziyambura.

Depite Kabanda yabwiye Senateri Uwizeyimana ko ikote yambaye ryaguzwe mu mabuye y'agaciro yibwe muri Congo

Impaka mu cyumba cy'inama zarakomeje, bigera n'aho Depite Kabanda wari uhagarariye Inteko ya RDC, azamura ibirego bisanzwe by'uko ngo u Rwanda rwiba amabuye muri Repubulika Iharanira Demokarasi ya Congo.

Bivugwa ko yageze n'aho arengera, abwira Senateri Uwizeyimana Evode ko n'ikote yambaye, agomba kurisubiza kuko ngo ryaguzwe mu mafaranga yavuye mu mabuye y'agaciro yibwe muri Congo.

Nyuma y'ayo magambo, Senateri Uwizeyimana yahise asaba ijambo avuga ko delegasiyo ya Congo itangiye gutandukira, asaba uyoboye inama guhagarika impaka zidafite umumaro no gukoresha imvugo zidakwiriye ku muntu uhagarariye igihugu mu nama.

Delegasiyo ya RDC yari igizwe n'abantu barenga batanu.

Ihuriro ry'Abadepite bo mu bihugu byo muri ICGLR ryitabirwa n'abo mu bihugu 12 binyamuryango. Ibyo ni Angola, u Burundi, Repubulika ya Centrafrique, Repubulika ya Congo, RDC, Kenya, Uganda, Sudani y'Epfo, Sudani, Tanzania, Zambia n'u Rwanda.

Mu bindi byavugiwe muri iyo nama, harimo nk'aho Intumwa za RDC zavuze ko Gen Makenga uyobora umutwe wa M23 atari Umunye-Congo, ko ari Umunyarwanda, gusa ngo abari bitabiriye bamubaza uko yageze mu Ngabo za FARDC.

Zavuze kandi ko nta muntu n'umwe wo muri M23 w'Umunye-Congo abari bitabiriye basubiza ko kugira ngo ibyo bishoboke, byasaba ko imyanzuro y'Inama y'i Berlin yaciye imipaka yaseswa.

Byageze n'aho uwari uyoboye inama atangira kwima ijambo Intumwa za RDC, avuga ko atari inama y'ibihugu bibiri.

Senateri Uwizeyimana yabwiye abari mu nama, ko RDC ibona ikibazo ko ari M23 gusa yirengagiza indi mitwe irenga 240 yitwaje intwaro. Yatanze inama ko niba RDC iticaranye na M23 ngo ibibazo bikemuke, bijyanye n'umusanzu utangwa n'ibindi bihugu binyuze mu masezerano ya Luanda na Nairobi; amaherezo hazavuka na M24 cyangwa M25 kuko igisubizo cy'intambara cyashyizwe imbere kidashoboka.

Yavuze ko atumva ukuntu intumwa za Leta ya RDC zivuga ko ibiganiro bya Luanda na Nairobi bitazatanga umusaruro, kandi iki gihugu kikibyitabira. Kuri we, ngo ni ukutagira ubushake mu gukemura ikibazo.

Mu yandi magambo adafite gihamya yavuzwe n'Intumwa za RDC harimo ko ngo Inteko Ishinga Amategeko y'u Rwanda iherutse gutora umwanzuro wemerera Perezida Kagame gushoza intambara kuri RDC; ibintu byamaganiwe kure n'abari mu cyumba.

---