Webrwanda Backend

Author: webrwanda

  • Kamonyi-G.S Ruramba: Hatangijwe ku mugaragaro Itorere mu mashuri #rwanda #RwOT

    Ubuyobozi, Abarimu ndetse n'Abanyeshuri mu rwunge rw'Amashuri rwa RURAMBA( G.S. RURAMBA), ruherereye mu kagari ka Kigese, Umurenge wa Rugalika ho mu Karere ka Kamonyi, ku gicamunsi cyo kuri uyu wa 25 Nzeri 2024 batangije ku mugaragaro Itorero mu mashuri. Bashima Perezida wa Repubulika, Paul Kagame we wagaruye Itorero. Bahamya ko rizafasha cyane mu kwimakaza Indangagaciro ya Ndumunyarwanda, rigategura neza ahazaza hafite icyerekezo gihamye kuri uru rubyiruko rw'Abanyeshuri.

    Ibirori byo gutangiza ku mugaragaro Itorero mu mashuri, byabereye imbere mu kigo cya G.S. RURAMBA, byitabirwa n'Abanyeshuri babarizwa mu'Amasibo' 14, Abarimu, Ubuyobozi bw'Ikigo ndetse na bamwe mu babyeyi b'abana biga muri iki kigo.

    Christine Nyirahabimana/Umurezi akaba ari nawe ushinzwe itorero muri G.S. Ruramba

    Nyirahabimana Christine, Umurezi muri G.S. Ruramba akaba ari nawe ushinzwe Itorero muri iki kigo, ahamya ko kugarura Itorero noneho by'umwihariko mu mashuri ari igikorwa kije kurushaho kwigisha abana amateka y'Igihugu, kubaremamo Umunyarwanda ukwiye, ufite muri we Urukundo rw'Igihugu, urangwa no kugira muri we Indangagaciro na Kirazira byubakiye ku muco Nyarwanda, wumva ko muri we gukunda Igihugu ari ihame ridakuka.

    Avuga ku cyo Itorero rije kumarira Abanyeshuri muri iki kigo, yagize ati' Itorero rije Kwigisha no gukundisha abana Igihugu, kwimakaza muri bo Indangagaciro na Kirazira by'Umuco Nyarwanda, kubatoza gukunda Igihugu ukaba wakwemera no kukimenera Amaraso'.Kuri

    Buri wa Gagatu w'icyumweru nyuma ya saa sita nibwo Gahunda z'itorero zateganijwe mu bigo by'Amashuri.

    Mu mboni ze, mwarimu Nyirahabimana ahamya ko Itorero mu mashuri hari agaciro gakomeye rizaniye umunyeshuri. Ati' Itorero mu mashuri rizubaka byinshi ku munyeshuri, mu myigire ye. Azamenya indangagaciro zizamuranga nk'umunyeshuri, uko ari kwiga amenye uko abyitwaramo, amenye ngo ndabana n'abandi gute, amenye ngo ndavuga gute, ndagenda gute, bimufashe gutera intanbwe yifuza gutera ntawe abangamiye nta n'uwo ahutaje'. Akomeza avuga ko Itorero ari 'UBUZIMA'.

    Kuri we, asaba abana gukunda itorero mu buzima bwabo bwa buri munsi kuko Itorero ari 'Ubuzima', ari nko kuba mu rugo, ryigisha gukundana, gufashanya n'izindi ndangagaciro zafasha umwana gukura neza. Asaba kandi Ababyeyi kumenya ko kuba mu Itorero bifasha ku kumenya icyo kuba umubyeyi nyawe ari cyo, kumva agaciro ko kurerera u Rwanda ugatanga umusanzu wawe ku Gihugu. Yibutsa Abarezi ko nta gaciro gakomeye karuta kurerera neza Igihugu, ko uwo ari umusanzu ukomeye ku Gihugu wo kurera umwana uzi kandi ufite muriwe Indangagaciro na Kirazira by'Umuco Nyarwanda.

    Byari ibyishimo bigaragara mu bana bigishwa Amasomo ku bijyajye n'Itorero.

    Mwarimu Nyirahabimana, asaba abanyeshuri haba igihe bari mu kigo, byaba se igihe batashye kurangwa iteka n'Indangagaciro z'Umuco Nyarwanda aho bari hose, Kubaha, Kudahemukirana, Gukunda Igihugu, Gukunda Abavandimwe, Kurangwa n'Ikinyabupfura, kugira Isuku, kwirinda ivangura iryo ariryo ryose, kugira urukundo, Kwita cyane ku masomo no guharanira kuba ab'umumaro ku Gihugu bategura ahazaza habereye bo ubwabo, Imiryango yabo n'Igihugu muri rusange.

    Emmanuel Munyaneza, Umuyobozi wa G.S. Ruramba yishimira itangizwa ry'Itorero mu mashuri. Ahamya ko iki ari igikorwa cyiza ku bana b'u Rwanda by'umwihariko ku kongera kwigishwa byimbitse Amateka y'Igihugu, Umuco, Indangagaciro na Kirazira.

    Emmanuel Munyaneza/Umuyobozi wa G.S. Ruramba

    Avuga ko mu gihe gito hatangijwe Itorero mu mashuri hari impinduka zigaragara. Ati' Impinduka zirahari kandi zirigaragaza. Iyo ubona umwana yigishwa Umuco Nyarwanda, uko u Rwanda rwahoze Amatorero n'Amadini bitari byaza, akigishwa Indangagaciro na Kirazira, akerekwa ibikoresho byakoreshwaga mu muco Nyarwanda, ubona umwana abyishimiye kandi anafite ubushake bwo kumenya ibyari mu muco Nyarwanda '.

    Akomeza ati' Nubwo umwana aba arimo kwiga, yiga ubwenge, Ubumenyi, imibare, Icyongereza, Igifaransa…. ariko iyo hiyongereyeho n'impinduka mu muco imigirire n'imigenzereze, yubaha adashobora guhohotera mugenzi we, adashobora kurwana, adashobora kubeshya biba bigaragaza ko na nabona n'akazi azagakorana Indangagaciro na Kirazira agatanga umusaruro. Aba nibo Rwanda rw'ejo dutegereje kandi twizera ko bazaba amaboko mazima yubaka Igihugu'.

    Itorero muri G.S. Ruramba rigizwe n'Amasibo 14

    Emmanuel, ashingiye ku byo amaze kubona mu gihe gito batangije Itorero muri iki kigo, ahamya ko rije rikenewe kandi bigaragara ko rizatanga umusaruro. Gusa na none, avuga ko hakenewe guhugura byimbitse abafite inshingano kuri iri torero mu mashuri, bakagira ubumenyi buhagije ku mateka y'Igihugu, ku Indangagaciro na Kirazira by'Umuco Nyarwanda kugira ngo babe bafite mu buryo buhagije ibyo baha abana. Asaba kandi ko hanatekerezwa ku gushyira mu mashuri ibikoresho bihagije bigaragaza amateka ashingiye k'umuco gakondo w'Abanyarwanda.

    Urwunge rw'Amashuri rwa RURAMBA( G.S. RURAMBA) ni ikigo cya Leta kimaze imyaka ine gishinzwe. Rifite ibyiciro bitatu; Ikiciro cy'ishuri ry'incuke, Ikiciro cy'ishuri ribanza ndetse n'ikiciro cya mbere cy'ishuri ryisumbuye, aho ritangira ryatangiranye abana 780 ariko ubu rigeze ku bana 1800. Amasomo ajyanye n'Itorero nkuko byagenwe na Leta, atangwa ku wa Gatatu nyuma ya saa sita.

    Beatha Musengamana, yasusurukije abari muri iki kigo.
    Gusoma kuri iyi ntango, yaba Ubuyobozi bw'ikigo, byaba Abarimu cg Abanyeshuri bivuze Kwiyemeza, ko Uhize Kwesa imihigo mu byo ushinzwe.

    Munyaneza Théogène

    Source : https://www.intyoza.com/2024/09/28/kamonyi-g-s-ruramba-hatangijwe-ku-mugaragaro-itorere-mu-mashuri/

  • 404 ERROR | #rwanda #RwOT

    Source : http://igihe.com/amakuru/u-rwanda/article/zinda-victor-wakuranye-ubumuga-agiye-kumurika-igitabo-kigaruka-ku-buzima

  • Amaherezo y'inzira ni mu nzu: Umujenosideri Ernest Rwamucyo arashyize agejejwe mu butabera #rwanda #RwOT

    Nyuma y'igihe kinini urubanza rw'uyu mujenosideri rutegerejwe, kuva kuri uyu wa kabiri tariki 01 Ukwakira 2024, urukiko rw'i Paris mu Bufaransa rwatangiye kuburanisha Dogiteri Eugène Rwamucyo ukurikiranyweho ibyaha biremereye, birimo uruhare muri Jenoside yakorewe Abatutsi.

    Mbere no mu gihe cya Jenoside yakorewe Abatutsi, Eugène Rwamucyo yari umuganga akaba n'umwarimu mu ishami ry'ubuvuzi rya Kaminuza y'uRwanda, i Butare, ari naho yakoreye ibyaha aregwa.

    Mu nyandiko ikubiyemo ibyo aregwa n'ibimenyetso byabyo, ashinjwa kuba yarashyigikiye akanakwiza ubutumwa bwa Leta y'abicanyi, by'umwihariko mu ijambo yavugiye muri iyo Kaminuza tariki 14 Gicurasi 1994, aho yashishikarije mu ruhame Abahutu kwica Abatutsi.

    Dr Rwamucyo kandi yanagaragaye kuri bariyeri zaguyeho Abatutsi benshi mu mujyi wa Butare, anategeka ko imirambo yabo ijugunywa mu cyobo rusange, mu rwego rwo gusibanganya ibimenyetso.

    Uregwa ndetse n'abanyamategeko bamwunganira mu rubanza ntibahakana ibyo gutaba iyo mibiri mu cyobo rusange, ariko bakavuga ko ngo yabikoreye kwanga ko iyo yakurura indwara z'ibyorezo mu baturage.

    Umwe muri abo banyamategeko ba Dr Rwamucyo ni Me Philippe Meilhac, wamamaye mu kuburanira abajenosideri, barimo Agatha Kanzoga na Felisiyani Kabuga.

    Biteganyijwe ko iburanisha ry'uru rubanza rizapfundikirwa tariki 29 z'uku kwezi, humviswe abatangabuhamya 60, barimo abashinja Eugène Rwamucyo n'abamushinjura.

    Muri abo bamushinjura higanjemo abajenosideri, ndetse n'abahakana bakanapfobya Jenoside yakorewe Abatutsi, nka Charles Onana nawe uzatangira kuburana tariki 07 z'uku kwezi.

    Eugène Rwamucyo w'imyaka 65 y'amavuko, akomoka mu yahoze ari Komini Gatonde mu Ruhengeri. Yabaye umuyoboke ukomeye wa MRND na CDR, akaba n'umuhezanguni utarahishaga kwanga Abatutsi urunuka.

    Kuva ahunze uRwanda muw'1994, Dr Rwamucyo yabaye umuganga mu Bubiligi no mu Bufaransa. Muw'2010 yigeze gutabwa muri yombi ariko aza kurekurwa, ubu akaba aburana adafunze.

    Dr Eugène Rwamucyo abaye Umunyarwanda wa 8 uburanishijwe mu Bufaransa ku byaha bifitanye isano na Jenoside yakorewe Abatutsi, barimo undi muganga, Sosthène Munyemana, uherutse gukatirwa imyaka 25 y'igifungo. Uyu Munyemana yarajuriye, urubanza rwe mu bujurire rukaba ruteganyijwe kuva tariki 17 Nzeri kugeza kuya 15 Ukwakira 2025.

    Mu gihe Eugène Rwamucyo yahamwa n'ibyaha, amategeko ateganya ko yahanishwa igihano gishobora kugera ku gifungo cya burundu.

    The post Amaherezo y'inzira ni mu nzu: Umujenosideri Ernest Rwamucyo arashyize agejejwe mu butabera appeared first on RUSHYASHYA.

    Source : https://rushyashya.net/amaherezo-yinzira-ni-mu-nzu-umujenosideri-ernest-rwamucyo-arashyize-agejejwe-mu-butabera/?utm_source=rss&utm_medium=rss&utm_campaign=amaherezo-yinzira-ni-mu-nzu-umujenosideri-ernest-rwamucyo-arashyize-agejejwe-mu-butabera

  • Rwamagana: Umugore w'imyaka 38 birakekwa ko yicishijwe umwenda we – #rwanda #RwOT

    Urupfu rw'uyu mugore rwamenyekanye mugitondo cyo kuri uyu Kabiri tariki ya 1 Ukwakira 2024 mu Mudugudu wa Gahonogo mu Kagari ka Nyagasenyi mu Murenge wa Kigabiro. Ubuyobozi bwavuze ko inzego z'umutekano zatangiye iperereza ngo hamenyekane icyamwishe.

    Umunyamabanga Nshingwabikorwa w'Umusigire w'Umurenge wa Kigabiro, Alex Rugarukirwa, yabwiye IGIHE ko ko kuri ubu inzego z'umutekano zatangiye iperereza kugira ngo hamenyekane abishe uwo mubyeyi babanje kumunigisha imyenda ye.

    Yaguze ati 'Ni umugore wapfuye birakekwa ko yishwe. Uwo mugore yari afite imyaka 38 yari afite abana babiri, gusa abo bana babanaga na nyina mu nzu nini we akaba mu nzu nto mugikari, rero abana be bagiye kumusuhuza mugitondo mbere yo kujya mu ishuri basanga yapfuye umwenda we wari uri mu kanwa.'

    Rugarukirwa yavuze ko inzego z'umutekano zagiyeyo zinatangira iperereza. Yavuze ko kuri ubu umubiri we wajyanywe ku bitaro bya Rwamagana aho uri gukorerwa isuzuma ngo hamenyekane icyo yazize.

    Rugarika yasabye abaturage kujya batangira amakuru ku gihe cyane cyane ku bantu bateza umutekano muke mu Mudugudu wabo ndetse n'abandi baba batazi babona aho batuye kuko akenshi aribo bateza ibibazo.

    Umugore wo mu Karere ka Rwamagana yasanzwe mu nzu ye yapfuye bikekwa ko yishwe

    Source : http://igihe.com/amakuru/u-rwanda/article/rwamagana-umugore-w-imyaka-38-birakekwa-ko-yicishijwe-umwenda-we

  • Agahinda ka Muhayeyesu wakuze atazi se, akagorwa n'ubuzima – #rwanda #RwOT

    Muhayeyesu Christelle w'imyaka hafi 30 wabuze mama we ku myaka ibiri, yakuze yisanga arerwa na sekuru na nyirakuru babyara mama we mu Karere ka Kamonyi.

    Yahuye n'ikibazo cy'agahinda gakomeye kubera ubuzima bushaririye yanyuzemo bitewe n'uko atazi Se umubyara.

    Ubwo yaganiraga na The NewTimes, yavuze ko ikintu azi kuri Se umubyara ari uko yabaga mu ngabo z'Umuryango w'Abibumbye zari zaraje mu butumwa bw'amahoro mu Rwanda mu 1993 (MINUAR), gusa nta bindi birenze azi kuri Se umubyara.

    Yagize ati 'Icyo nzi ni uko yabaga mu ngabo za MINUAR gusa nta kindi nzi kirenze ibyo. Ntabwo mbizi niba yarabanaga na Mama cyangwa batarabanaga. Nakomeje gushaka uko nabona umuntu wampa amakuru ye ariko kugeza ubu byakomeje kumbera ingorabahizi.'

    Nyuma y'uko nyirakuru yitabye Imana, hari umugore wamufashije gushaka Papa we binyuze mu muryango utegamiye kuri Leta witwa Haguruka, ariko ntacyo byatanze.

    Ati 'Nyuma y'uko ababyeyi babyara Mama bitabye Imana, hari umugore wabaga i Kanombe wareraga musaza wanjye tuvukana kuri Mama nanjye yaramfashe atangira kundera. Twagerageje uko dushoboye ngo dushakishe Papa, ariko byaratugoye kuko byadusabaga amafaranga menshi.'

    Yakomeje agira ati 'Uwo mugore yari afite ifoto bikekwa ko ari iya Papa ndetse n'impapuro zamfasha kubona Papa ariko naje kuzibura nyuma y'uko yitabye Imana.'

    Kuva icyo gihe Muhayeyesu yavuze ko ubuzima bwamubereye ingorabahizi kuko ahantu hose yageraga bamwitazaga. Ibyo byose byatumye abona ko abana bameze nka we bahura n'imbogamizi nyinshi mu buzima.

    Abahanga mu by'imitekerereze ya muntu bavuga ko kuba umwana atazi inkomoko ye bishobora kumuviramo ingaruka zo kugira agahinda gakabije cyangwa se akaba yakwishora mu ngeso mbi.

    Nyuma y'ibyo bibazo byose, Muhayeyesu yatewe inda itateganyijwe maze umuryango uramutererana.

    Ati 'Nyuma yo kubyara abavandimwe nari nsigaranye barantereranye, bakambwira ngo ndi indangare nagiye mu bagabo, gusa nababwiye ko ibyambayeho n'undi wese byamubaho.'

    Nta munsi n'umwe Muhayeyesu ubuzima bwamworoheye kuko no mu gufata Indangamuntu byaramugoye cyane, kuko nta hantu yari yanditse ibyatumye ku Ndangamuntu ye bashyiraho imyaka 27 kandi afite isaga 30.

    Ikibazo cyo kutamenya Se umubyara, Muhayeyesu agihuriyeho n'abandi bana bo mu bihugu bitandukanye nabo babyawe n'ingabo zijya mu butumwa bw'Amahoro.

    Muhayeyesu kuri ubu akora muri restaurant kugira ngo abashe kwita ku mwana we w'imyaka ine. Ni akazi katoroshye kuko akora amasaha 13 ku munsi.

    Muhayeyesu avuga ko yakuze agowe n’ubuzima

    Source : http://igihe.com/amakuru/u-rwanda/article/agahinda-ka-muhayeyesu-wakuze-atazi-se-akagorwa-n-ubuzima

  • Perezida Kagame yatangiye uruzinduko rw'akazi muri Latvia – #rwanda #RwOT

    Amakuru dukesha Village Urugwiro avuga ko Perezida Kagame yageze muri iki gihugu cy'i Burayi kuri uyu wa Kabiri. Aho yabanje gusura inzu ndangamurage y'iki gihugu (Occupation Museum), ikubiyemo amakuru ajyanye n'amateka y'iki gihugu.

    Perezida Kagame azagirana ibiganiro na mugenzi we wa Latvia mu muhezo, hanyuma bazanaganira n'itangazamakuru.

    Azasura kandi ikibumbano cyubatswe mu guha icyubahiro abasirikare baguye mu ntambara y'ubwigenge bwa Latvia, ndetse anageze ijambo ku bazitabira umuhango wo kumurika ikimenyetso cyashyizweho mu guha agaciro abazize Jenoside yakorewe Abatutsi mu 1994.

    Latvia ni kimwe mu bihugu bito mu Burayi, aho kiri ku buso bwa kilometero kare 64,589, Umurwa Mukuru wacyo ukitwa Riga, aho washinzwe mu 1201. Ni igihugu gituwe n'abari munsi ya miliyoni ebyiri z'abaturage. Hejuru ya 50% by'ubuso bw'igihugu bugizwe n'amashyamba, ibisobanura impamvu gikungahaye cyane mu bucuruzi bw'imbaho muri rusange.

    Bitewe n'uko cyabonye ubwigenge mu 1991 kivuye mu maboko ya Leta Zunze Ubumwe z'Abasoviyete, benshi bakeka ko abaturage bacyo bavuga Ikirusiya gusa si ko bimeze, kuko bavuga ururimi rwabo ruzwi nka Latvian rukaza mu ndimi zimaze igihe kinini ku Mugabane w'u Burayi.

    Umubano w'u Rwanda na Latvia watangiye byeruye mu 2007. Rwohereje Ambasaderi warwo muri iki gihugu muri Mutarama 2022.

    Mu ruzinduko Perezida Kagame azagirira muri Latvia azagirana ibiganiro na mugenzi we, Edgars Rinkēvičs

    Atangira uru ruzinduko, Perezida Kagame yabanje gusura inzu ndangamurage y’iki gihugu

    Ni inzu ndangamurage ibumbatiye amateka y’iki gihugu

    Inzu ndangamurage ya Latvia ni imwe muzisurwa na ba mukerarugendo benshi

    Source : http://igihe.com/amakuru/u-rwanda/article/perezida-kagame-yatangiye-uruzinduko-rw-akazi-muri-latvia

  • Minisitiri Utumatwishima yageneye urubyiruko… – #rwanda #RwOT

    Uyu munsi tariki ya 01 Ukwakira ni umunsi  wo Gukunda Igihugu. Kuri iyi tariki, ni umunsi abanyarwanda bazirikana umurimo ukomeye Inkotanyi zakoze maze bakarushaho gukunda igihugu no kucyitangira. 

    Abinyujije ku rubuga rwe rwa X, Minisitiri w’Urubyiruko Utumatwishima Abdallah yifurije urubyiruko umunsi mwiza wo gukunda igihugu maze ababwira ko bakwiriye kujya bafata umwanya bagashima abafashe iya mbere bagatangiza urugamba rwo kubohora igihugu.

    Yagize ati: “Rubyiruko, ku munsi nk'uyu, tujye dushimira abafashe iya mbere bagatangiza urugamba rwo kubohora u Rwanda. Abo ni Inkotanyi. Abari bato n'abakuru, abariho n'abatakiriho. 

    Tujye kandi dusuzuma niba ubumenyi dufite, uburere, imyitwarire n'imikorere byacu bidutegurira kuba Abanyarwanda bazarinda neza ibyagezweho, tukubaka ibindi byiza byinshi kandi tugahangana n'uwo ari we wese washaka kubihungabanya. Umunsi mwiza wo Gukunda Igihugu.”

    Tariki ya 01 Ukwakira buri mwaka, u Rwanda rwizihiza Umunsi wo Gukunda Igihugu. Abanyarwanda bazirikana by’umwihariko ubwitange, umurimo unoze, kwihangana, umurava, ishyaka, ubumwe, gukunda Igihugu, kureba kure, ubumuntu, kuba umunyakuri n'izindi ndangagaciro zaranze urugamba rwo kubohora Igihugu rwatangiye ku 01 Ukwakira 1990 rugasozwa ku wa 04 Nyakanga 1994. 

    Ku munsi nk'uyu ukomeye mu mateka y'u Rwanda, buri wese asabwa kuzirika icyo gukunda Igihugu bivuze kuri we ubwe no mu mibanire ye n'abandi.  Gukunda Igihugu ni Indangagaciro ikomeye cyane yazahuye u Rwanda mu bihe bikomeye rwanyuzemo. 


    Minisitiri Utumatwishima yibukije urubyiruko kujya rushimira abafashe iya mbere bagatangiza urugamba rwo kubohora igihugu 

    Source : https://inyarwanda.com/inkuru/147357/minisitiri-utumatwishima-yageneye-urubyiruko-ubutumwa-bwihariye-ku-munsi-wo-gukunda-igihug-147357.html

  • Yanditse amateka! Umukecuru w’imyaka 80 ahata… – #rwanda #RwOT

    Ni uwitwa Choi Soon-hwa ukomoka muri Koreya y'Epfo utangaza ko yafashe umwanzuro wo guhatana kugira ngo yerekane ko n'umuntu ukuze ashobora kuba afite ubuzima bwiza bumwemerera guhatana.

    Mu kiganiro yagiranye na CNN ati 'Nashakaga kwereka Isi ko umuntu w'imyaka 80 yaba afite ubuzima buzira umuze. Bakibaza bati ni gute yabungabunze ubuzima bwe?

    'Ni ibihe biryo arya? Nashakaga kwerekana ko dushobora kubaho mu buzima buzira umuze nubwo twaba dukuze.'

    Choi Soon-hwa avuga ko yahisemo kwitabira uyu mwaka nyuma y'uko imbogamizi zahoze muri iri rushanwa zakuwemo urugero nk'imyaka y'abitabira, waba ufite abana, umugabo ndetse n'izindi mbogamizi zakuwemo.

    Uyu mukecuru akaba azahatana n'abandi 31 bazaba baturutse mu bihugu bitandukanye muri Miss Universe izabera muri Mexique mu Ugushyingo 2024.

    Muri uyu mwaka, Lorraine Peters w'imyaka 58 na Alejandra Marisa Rodríguez w'imyaka 60 bitabiriye Miss Universe Canada na Miss Universe Argentina gusa ntibabashije kwegukana amakamba.

    Ese mbere yakoraga iki?

    Mbere yo gufata umwanzuro wo kuza guhatana muri aya marushanwa, Choi Soon yahoze ari umukozi wa kwamuganga aho yitaga ku barwayi barembye cyane (Medical care). Ibi yabikoze kuva afite imyaka 24 kugeza afite imyaka 58. 

    Yabwiye CNN ko bitewe n’uko yumvaga atazapfa adakoze iby’imideli, ubwo yarafite imyaka 72 nibwo bwa mbere yatangiye kwerekana imideli kugirango abane amafaranga. Ati: ”Narimfite imyenda myinshi ngomba kwishyura kandi amafaranga navanye kwa muganga ntiyarahagije. Bambwiye ko mu mideli nabasha gukuramo amafaranga yamfasha”.

    Mu 2017 nibwo Choi Soon yagannye ishuri ryo muri Seoul ryigisha ibijyanye n’imideli kugeza mu 2019. Kuva ubwo yatangiye kumenyekana muri Koreya y”Epfo ndetse amafoto ye yacurujwe mu binyamakuru by’imideli nka Harper’s Bazaar na Elle Magazine.

    Yasoje avuga ko yiteguye guhagararira igihugu cye gusa ngo ikiri ku mutima kurusha ibindi ari ukwereka isomo abuzukuru be. Choi ati: ”Mfite abuzukuru 3 nshaka kwigisha, ndashaka kubaha isomo ry’uko uko waba ungana kose ugomba gukurikira inzozi zawe kandi ukazigeraho”.

    Choi Soon-hwa w’imyaka 80 ahatanye mu marushanwa y’ubwiza ya ‘Miss Universe’ ari kubera muri Mexico

    Choi ari kumwe n’abakobwa bakiri bato bahagarariye Koreya y’Epfo muri aya marushanwa

    Kuva mu 2017 kugeza mu 2019 Choi yigaga ibyo kumurika imideli

    Yahoze akora kwa muganga yita ku barwayi kugeza ahawe ikiruhuko cy’izabukuru

    Yatangiye kwerekana imideli afite imyaka 74

    Ari mu banyamideli bakunzwe muri Koreya y’Epfo

    Amafoto ye ashyirwa mu bibyamakuru by’imideli mpuzamahanga

    Avuga ko ari nzozi zibaye impamo mu guhatana mu marushanwa y’ubwiza

    Choi Soon ubura amezi macye ngo yuzuze imyaka 81, anamamaza imyenda yo kogana

    Source : https://inyarwanda.com/inkuru/147358/yanditse-amateka-umukecuru-wimyaka-80-ahatanye-mu-marushanwa-yubwiza-amafoto-147358.html

  • Joeboy ategerejwe i Kigali kurangiza indirimb… – #rwanda #RwOT

    InyaRwanda ifite amakuru yizewe avuga ko uyu muhanzi agera mu Rwanda, kuri uyu wa Kabiri tariki 1 Ukwakira 2024, agamije gushyira akadomo ku mushinga w'indirimbo yakoranye na Bruce Melodie iri mu zizaba zigize Album ye nshya y'uyu muhanzi ubarizwa muri 1:55 AM.

    Iyi ndirimbo iri mu bikorwa Bruce Melodie amaze igihe ari gutegura mu rwego rwo gushyira umuziki we ku isoko Mpuzamahanga. Aherutse kubigaragaza ubwo yashoraga arenga Miliyoni 50 Frw, mu ikorwa ry'indirimbo ye 'Sowe' yakoreye muri Nigeria.

    Joeboy yagiye atumirwa mu Rwanda mu bihe bitandukanye. Ku wa 28 Gashyantare 2020, yatanze ibyishimo ku banyarwanda n'abandi ubwo yaririmbaga mu bitaramo bya Kigali Jazz Junction byabereye muri Kigali Conference and Exhibition Village ahazwi nka Camp Kigali.

    Muri Kamena 2021, yari mu Rwanda aho yahuriye n'umuhanzi Mr Eazi umufasha mu muziki abinyujije muri sosiyete ye y'umuziki yashinze mu 2018 yise 'emPawa Africa' ifasha abahanzi bo mu bihugu 11 byo muri Afurika.

    Icyo gihe Joeboy ari mu bitabiriye ikiganiro Mr Eazi yatumiyemo bamwe mu bahanzi bo mu Rwanda n'abandi bahuriye muri Centre Culturel Francophone du Rwanda, abaganiriza byinshi ku muziki, uko umuhanzi yitwara n'ibindi.

    Ku wa 4 Ukuboza 2022, Joeboy yataramiye muri BK Arena binyuze mu gitaramo 'Kigali Fiesta'. Kiriya gitaramo cyanaririmbyemo abahanzi barimo Bruce Melodie, Christopher, Davis D, Bushali, Juno Kizigenza, Kenny Sol ndetse na Chris Eazy. Amakuru yizewe avuga ko umubano w'aba bahanzi bombi wagutse kuva kiriya gihe kugeza ubwo banaiyemeje gukorana indirimbo.

    Bruce Melodie agiye gukorana indirimbo na Joeboy, mu gihe aherutse gushyira ku isoko indirimbo 'Iyo Foto' yakoranye na Bien-Aime Baraza, umunyamuziki wafatwaga nka nimero ya mbere mu itsinda rya Sauti Sol ryamamaye muri Kenya.  

    Joeboy w’imyaka 26 y'amavuko wamamaye mu ndirimbo zirimo 'Sip (Alcohol)' yavutse yitwa Joseph Akinfenwa Donus akorana n'inzu zireberera inyungu z'abahanzi nka Banku Music.

    Yasohoye Album yise 'Love&Night' anahatanira ibihembo bya 'The Headies Award for Next Rated'. Yakunzwe mu ndirimbo nka 'Bad Girl' yasohoye mu 2017, 'Don't call me back', 'All for you' n'izindi.

    Mu 2020 yasohotse ku rutonde rwa BBC rw'abahanzi bo kwitega. Iki kinyamakuru cyavuze ko uyu musore yatangiye guhangwa amaso na benshi abicyesha indirimbo ye yise 'Baby' imaze kurebwa n'abarenga Miliyoni 11 ku rubuga rwa Youtube.

    Ni umuhanzi w'umuhanga ufite ijwi ryihariye rimufasha gutanga ubutumwa mu njyana ya Afrobeat na Pop yashyize imbere. Amaze gukorera ibitaramo bikomeye mu bihugu bitandukanye byo muri Afurika ndetse yanaririmbiye mu Bwongereza. 

    Umuhanzi w'umunya-Nigeria, Joeboy ategerejwe i Kigali mu rugendo rugamije gufata amashusho y'indirimbo ye na Bruce Melodie

    Kuva mu 2022, Bruce Melodie yaguye umubano we na Joeboy bigeze ku gukorana indirimbo

    Bruce Melodie yatangiye imirimo ya nyuma kuri Album ye nshya yahurijeho abarimo Shaggy, Bien-Aime n'abandi 


    Ku wa 1 Ukuboza 2022, Joeboy yabwiye itangazamakuru ko yatangiye ibiganiro by’imikoranire na Bruce Melodie ndetse na Ish Kevin

    KANDA HANO UREBE AMASHUSHO Y'INDIRIMBO 'IYO FOTO' YA BRUCE MELODIE NA BIEN-AIME

    “>

    KANDA HANO UREBE AMASHUSHO Y'INDIRIMBO 'SIP' YA JOEBOY

    “>

    REBA IKIGANIRO JOEBOY YAVUGIYEMO IBY’IMIKORANIRE YE NA BRUCE MELODIE

    “>

    Source : https://inyarwanda.com/inkuru/147359/joeboy-ategerejwe-i-kigali-kurangiza-indirimbo-ye-na-bruce-melodie-ni-ibiki-byagejeje-ku-g-147359.html

  • Tariki ya 1 Ukwakira: Umunsi wahinduye amateka y'Abanyarwanda 'Beatrice Uwera' #rwanda #RwOT

    Kera tukiri bato, umusirikare ni umuntu twumvaga tugashya ubwoba. Kenshi twumvaga ari umugabo munini cyane, wirabura ufite ijwi rikomeye rikangata, wa wundi utera intambwe ukayumva koko, mbega ukumva umuntu nk'uwo, ujya kumera nka Goliyati wo muri Bibiliya, ari we ukwiriye kwizerwa mu kurinda umutekano w'igihugu.

    Mu mateka yacu yihariye, umusirikare we yagombaga kuba avuka mu turere turi mu Majyaruguru y'u Rwanda, akaba avuga Igikiga cyangwa Ikigoyi, akaba yarariye inyama akarenzaho byeri ibondo rikamukundira, rikifora bimwe bifatika.

    Kera twumvaga igisirikare atari umwuga wakorwa n'Abanyarwanda bose, tukumva ko hari ubwoko bugomba kuvamo abasirikare, hakaba n'ubundi bubyara abagabo b'intege nke, badafite imbaraga zihagije zaterura imbunda iremereye.

    Umusirikare twiyumvishaka kera yagendanaga imbunda ayirase imbere ye, akagenda ikiboko uwo anyuzeho wese atamushaka ubwo agahutaza, agakubita kugeza ubwo amugaje akamuta iyo mu mihanda yanegekaye. Ubwo kandi babaga baguhora uko usa, uko ureshya, imiterere y'isura yawe n'ibindi nk'ibyo, ubundi rwose umuntu atakazize.

    Twakuze tuzi ko mu kigo cya gisirikare ari naho imiryango y'abasirikare ituye, bafite abagore bavuga nabi n'abana buzuye agasuzuguro gakabije, ibi ndabyibuka iwacu ku Muhima na Kiyovu, baradukandagiraga bakadukubita twababona tugahungabana.

    Iyo wahuraga n'umusirikare mu nzira ufite indangamuntu idasobanutse, ibyawe byabaga bikurangiriyeho! Wabaga uzi ko niba atagukubitiye aho arakujyana ukazagaruka iwanyu uri igisenzegeri cyangwa ntunagaruke!

    Twakuze tubona amakamyo manini yuzuye imifuka myinshi n'ama-casier ya byeri, icyerekezo ari mu bigo bya gisirikare.

    Gusa itariki ya 1 Ukwakira, twasanze ibyo byose byari ibikabyo biri aho, gusa, bari baratubeshye.

    Ndabyibuka twari mu Ishuri ryisumbuye ry'Abakobwa mu Byimana, ku manywa nka saa saba nibwo twumvise amakuru avuga ko Inyenzi ziyise Inkotanyi zateye u Rwanda, ziza zitwaje imiheto, amacumu, amabuye n'ibindi biri aho bidashinga, zica mu Mutara ziyahura mu muriro w'Inzirabwoba.

    Mu makuru kuri radiyo bavugaga ko abo bantu ari 'utuntu tw'Udututsi' twishwe n'inzara tutagira inkweto, tutagira epfo na ruguru mbega twapfuye duhagaze. Bavugaga ko tugira amaso manini nk'ay'udusimba, amatwi maremare atendera ndetse ngo bakayazirikira inyuma ku mutwe, bikarimba kandi, tumwe muri two tukaba dufite imirizo miremire.

    Twari twarumiwe, abarimu bacu nabo ntako batari baragize, bahoraga babidusubiriramo kenshi ngo twumve neza ishyano igihugu cyagushije.

    Nyuma y'iyo tariki, twasanze ibyo batubwiraga byose ari ibinyoma.

    Nyuma y'itariki ya 1 Ukwakira, twakomeje kumva Ibigwi by'izo Nkotanyi, twumva ntizatezutse ku ntego yatumye zinjira mu gihugu, zikomeza Urugamba rukomeye, iminsi iba myinshi ariko zikomeza intego mu butwari ntagereranywa, zihangana n'inzitane nyinshi ariko zibohora u Rwanda, none n'ubu abakiriho dufatanyije nazo kurwubaka cyane.

    Izo Nkotanyi ni abagabo n'abagore b'umucyo mwinshi mu byo bakora, ni abasore n'Inkumi bafite ishyaka ryo guteza igihugu cyacu imbere. Ni urumuri rumurikiye Abanyarwanda, ni inkingi ikomeye y'amahoro mu Rwanda, mu karere kacu no ku Isi yose.

    Izo Nkotanyi zo kabaho!
    Izo Nkotanyi zo kavugwa!
    Izo Nkotanyi zo karamba ingoma ibihumbi!

    The post Tariki ya 1 Ukwakira: Umunsi wahinduye amateka y'Abanyarwanda 'Beatrice Uwera' appeared first on RUSHYASHYA.

    Source : https://rushyashya.net/tariki-ya-1-ukwakira-umunsi-wahinduye-amateka-yabanyarwanda-beatrice-uwera/?utm_source=rss&utm_medium=rss&utm_campaign=tariki-ya-1-ukwakira-umunsi-wahinduye-amateka-yabanyarwanda-beatrice-uwera