Author: webrwanda

Ni nyuma y'igihe kirenge ibyumweru bitatu, inzego z'umutekano zirimo Polisi n'Ubugenzacyaha zishakisha uyu mugabo ukurikiranyweho icyaha cyo kwica umugore we witwaga Mukashyaka Nathalie w'imyaka 38, ariko zitaramubona.

Mu ijoro rishyira ku wa 12 Ugushyingo 2024, ahagana saa saba z'ijoro, ni bwo umuturage yatabaje irondo na Polisi ko abonye Ntaganzwa Emmanuel ahitwa i Remera, ari na yo yabaye intandaro y'ifatwa rye.

Amakuru avuga ko uyu Ntaganzwa ngo yaje kuri moto ashaka kwinjira mu rugo rw'umugore bakeka ko ari inshoreke ye, maze uwamubonye atabaza irondo ndetse ahamagara na Polisi, inzu yarimo iragotwa kugeza bamutaye muri yombi, aho ngo yasanganywe, udukingirizo tubiri mu mufuka we, ariko atarinjira mu nzu y'uwo mugore bikekwa ko ari inshoreke ye, bigakekwa ko yahoraga ahaza, akazinduka asubira kwihisha.

Umunyamabanga Nshingwabikorwa w'Umurenge wa Nyamabuye, Nshimiyimana Jean Claude, yemereye IGIHE ko koko Ntaganzwa yafashwe bigizwemo uruhare n'abaturage bagize amakenga ya moto yagendagaho mu gicuku.

Yagize ati' Ntaganzwa yekekwagaho urupfu rw'umugore we Mukashyaka Nathalie, kuko kuva yapfa, we ntiyongeye kugaragara. Urumva ko rero hakurikiyeho kumushakisha, muri iri joro rero, ahagana saa saba na cumi n'itanu ni bwo yafatiwe mu Kagari ka Gifumba, Umudugudu wa Rugarama, ahita ashyikirizwa RIB.''

Gitifu Nshimiyimana, yavuze ko Ntaganzwa yafashwe ataragera aho yerekezaga neza ariko bakaba biteze ko ibizava mu iperereza bizagaragaza abo bakoranaga muri iki gihe yari yihishe.

Ntaganzwa Emmanuel bikekwa ko yasize yishe umugore we Mukashyaka Natalie taliki ya 20 Ukwakira 2024, agasiga yoronshe umurambo, n'abana akabahisha ko yapfuye, akaba yakoraga muri Farumasi iherereye mu Mujyi wa Muhanga.

Ni mu gihe uwo mugore bikekwa ko yishe bari bafitanye abana batatu, ubu nyuma yo gufatwa akaba afungiwe kuri RIB, ishami rya Nyamabuye.

Indi nkuru bifitanye isano:

https://mobile.igihe.com/amakuru/u-rwanda/article/muhanga-yasanzwe-mu-nzu-amaze-iminsi-ine-yishwe

Ibi biro by’Umurenge wa Nyamabuye muri Muhanga, ahabereye icyaha

Iyi ndege yagenzurwaga na Sosiyete yahoze ari iyo muri Kenya yitwa JetLink Express, mu izina rya RwandAir. Yari ifite icyicaro ku Kibuga Mpuzamahanga cy'Indege cya Jomo Kenyatta, yaje guhagarika ibikorwa byayo mu 2012.

Yari yarakozwe na Sosiyete ya Bombardier Aviation Company mu 1997, ishyikirizwa JetLink Express muri Kamena 2007. Mu myaka 12 yari ishize ikora, yari imaze kugenda amasaha 17.140 mu kirere, igwa cyangwa ihaguruka ku kibuga cy'indege inshuro 17.025.

Yari ifite moteri ebyiri zakozwe n'ikigo cya General Electric zo mu cyiciro cya CF34-3A1.

Bombardier CRJ100 yakoze impanuka ubwo yari imaze guhaguruka i Kigali yerekeje ku Kibuga Mpuzamahanga cy'Indege cya Entebbe muri Uganda. Muri iyo ndege hari harimo abakozi bayo batanu n'abagenzi 10. Umugore umwe muri bo yaje kwitaba Imana nyuma y'impanuka.

Byagenze bite?

Iyi ndege yahagurutse nk'uko bisanzwe ku kibuga cy'indege i Kigali, nyuma y'iminota ibiri ikimara kugera mu kirere abapilote babwira abagenzuzi b'ingendo z'indege ku kibuga hasi ko igikoresho cyifashishwa mu kongerera umuvuduko moteri y'ibumoso [left thrust lever] kitakiri gukora.

Ibi byabaye iyi moteri igifite umuvuduko yahagurukanye ku butaka kandi yamaze gufata ikirere.

Ku ndege zifite moteri ebyiri, buri imwe igira iki gikoresho umupilote yifashisha mu kugenzura umuvuduko wayo. Wakigereranya na 'accélérateur' y'imodoka isanzwe.

Mu guhaguruka rero kwa Bombardier CRJ100, moteri zombi zari zahawe umuvuduko mwinshi [usanzwe ukenerwa mu gihe indege ihaguruka], nyuma yo kugera mu kirere, cya gikoresho cya moteri y'ibumoso gihagarara gukora bituma iyo moteri imwe igumana umuvuduko mwinshi.

Byarashobokaga ko abapilote bifashisha icyo nakwita agatabo kari karimo uburyo bakwitwara mu gukemura icyo kibazo 'Thrust Lever Jammed Abnormal Checklist Procedure' ariko ntibabikora ahubwo bahitamo gufata icyemezo cyo gusubiza indege ku butaka ahagana saa 11:30 z'igitondo.

Moteri y'iburyo yo yashoboraga kugenzurwa neza.

Indege yaguye neza ku butaka, iyoborwa aho guhagarara hafi y'inyubako itegererezamo abagenzi b'icyubahiro.

Ubwo bari bari gushyiraho ibitega amapine ngo ihagarare neza, kuko ya moteri y'ibumoso yari igikora, itangira kugenda ihindukirira mu buryo bwayo, igeze nko muri metero 500 ihita yinjira muri ya nyubako itegererezamo abagenzi hafatwa nk'inkongi yazimijwe mu mwanya muto.

Iyi ndege yagonze inyubako itegererezamo abagenzi b’abanyacyubahiro

Abantu bahise batangira gukurwa mu ndege benshi muri bo bakomeretse, n'umupilote wa kabiri akurwamo akiri muzima nyuma yo kumaramo amasaha atatu yabuze uko asohoka. Umugenzi umwe w'umugore niwe waje kwitaba Imana nyuma yo kugezwa kwa muganga.

Bivugwa ko abantu benshi bari bamaze gufungura imikandara y'ubwirinzi [seat belts] kuko biteguraga kuva mu ndege kubera ko yari yahagaze, igonga batari bayifunga nanone bituma benshi bakomereka.

Nyuma y'impanuka itsinda ribishinzwe ryabashije kuzimya ya moteri yateje ikibazo.

Uwari umuvugizi wa RwandAir icyo gihe yavuze ko 'Yaguye [ku butaka] neza iyoborwa aho iparika. Kubera impamvu itazwi, indege yavuye aho yari ihagaze itangira kugenda ku muvuduko wo hejuru maze ihindukira iburyo igonga umunara ugenzurirwamo ingendo z'indege [Tower building].'

Uwari umupilote wa mbere w'iyi ndege yari umugabo w'imyaka 37 y'amavuko wari ufite igihe kingana n'amasaha 11.478 mu kirere atwara indege, 1.110 muri yo yarayakoranye n'indege ya Bombardier CRJ100.

Umupilote wa kabiri we yari umugore w'imyaka 27 y'amavuko wari ufite amasaha 1.558 mu kirere, harimo 533 yakoreye muri Bombardier CRJ100 yakoze impanuka.

Leta y'u Rwanda ibinyujije muri Minisiteri y'Ibikorwaremezo, icyo gihe yatangaje ko iyi mpanuka yatewe n'ubumenyi buke bw'abapilote mu kumenya uko hakemurwa ikibazo bahuye na cyo mu kirere no kuba feri z'indege zarakoreshejwe nabi mu gihe yari iri kongera kugwa ku kibuga cy'indege.

Ikindi cyagaragaye ni uko habayeho kudakurikiza amabwiriza asanzwe yo mu kazi, no kuba abapilote ba JetLink Express batari basobanukiwe uburyo buteganywa n'uwakoze indege bwo kwirinda mu bihe by'ibyago.

RwandAir nayo yasohoye itangazo nyuma gato y'iyo mpanuka, ivuga ko yo n'urwego rw'igihugu rushinzwe iby'indege za gisivili, Rwanda Civil Aviation Authority- RCAA, bakoze ubugenzuzi bw'igenga kuri JetLink Express, bareba uburyo ikora, aho ikorera isuzuma ry'indege zayo, ubushobozi bwayo mu gutwara abagenzi mu buryo bufite umutekano usesuye n'ibindi.

Nyuma y'iyi mpanuka RwandAir yahisa ihagarika ibikorwa yari ifitanye na JetLink Express.

Bivugwa ko muri uwo mwaka habaye impanuka z'indege 43 hirya no hino ku Isi. Mu Ugushyingo 2009 habaye impanuka ya RwandAir, n'indi y'indege ya Ilyushin Il-76 yari iy'igisirikare cy'u Burusiya, yakoze impanuka nyuma yo guhaguruka ku kibuga cy'indege cya Mirny muri Yakutia, yica abantu 11 bari bayirimo.

Iyi ndege yari irimo abagenzi 10 n’abakozi bayo batanu, umwe muri bo aba ari we witaba Imana

RwandAir yahise ihagarika ibikorwa yari ifitanye na JetLink Express

Mu byateye iyi mpanuka, hagaragajwe ko harimo n’ubumenyi buke bw’abapilote b’iyi ndege

Iyi ndege yagenzurwaga na Sosiyete yahoze ari iyo muri Kenya yitwa JetLink Express, yahagaritse ibikorwa mu 2012

Ni ubutumwa bwanyujijwe ku rukuta rw'Ibiro bya Perezida, Village Urugwiro, ku rubuga rwa X.

Umukuru w'Igihugu na Al Hussein bahuriye mu mujyi wa Baku muri Azerbaijan, aho bitabiriye inama ya 29 y'Umuryango w'Abibumbye yiga ku mihindagurikire y'ikirere, COP29.

Ubwami bwa Jordanie n'u Rwanda ni ibihugu bifitanye umubano ukomeye ushingiye ku masezerano impande zombi zagiye zisinyana mu bihe bitandukanye, arimo n'ayakuyeho ikiguzi cya Visa ku Banyarwanda bifuza kujya muri ubu bwami.

Ubwo Umwami Abdullah II aheruka kugirira uruzinduko i Kigali muri Mutarama uyu mwaka, hashyizwe umukono ku masezerano arimo ajyanye no gukumira ko ibicuruzwa biva mu gihugu kimwe bijya mu kindi bishobora gusoreshwa kabiri, ay'ubufatanye mu buhinzi, ubucuruzi n'ubukungu ndetse n'ajyanye n'ubutwererane mu rwego rw'ubuzima n'ubuvuzi hagati y'u Rwanda na Jordanie.

Aya yaje yiyongera ku yandi ibihugu byombi byari bisanganywe arimo ajyanye no guhana ibitekerezo mu bya politiki hagamijwe gushimangira ubufatanye mu bucuruzi n'ishoramari, ubukerarugendo n'ubuhinzi.

Uru ruzinduko kandi rwakurikiwe n'urwa Minisitiri w'Ubukerarugendo muri Jordanie, Makram Mustafa A. Queisi nawe waje i Kigali muri Gashyantare 2024, asiga atangaje ko igihugu cye n'u Rwanda bigiye gushyiraho gahunda zihuriweho zo guteza imbere ubukerarugendo bushingiye ku muco, ubuvuzi n'imyemerere.

President Kagame met with Prince Al Hussein bin Abdullah, Crown Prince of the Hashemite Kingdom of Jordan. Their discussion focused on the existing mutually beneficial relations between Rwanda and Jordan. #COP29 pic.twitter.com/NykAeI6gPp

— Presidency | Rwanda (@UrugwiroVillage) November 12, 2024

Perezida Paul Kagame yahuye n’Igikomangoma Al Hussein bin Abdullah baganira ku mubano mwiza usanzwe hagati y’ubu bwami n’u Rwanda

Ubwami bwa Jordanie n'u Rwanda ni ibihugu bifitanye umubano ukomeye ushingiye ku masezerano impande zombi zagiye zisinyana mu bihe binyuranye

Amakuru yatangajwe n’ibiro by'Umukuru w'Igihugu (Village Urugwiro) avuga ko Ibiganiro byabo byibanze ku mubano ufitiye inyungu u Rwanda na Jordan.

Igihugu cy'u Rwanda n'icya Jordan bisanzwe bifitanye umubano mwiza, ndetse abayobozi mu nzego nkuru zabyo basanzwe bagendererana. Ibihugu byombi bifitanye amasezerano agamije kurushaho gushimangira umubano w'ibihugu byombi.

Ayo masezerano arimo ayerekeye gukuraho gusoresha kabiri ibicuruzwa, no gukumira kunyereza imisoro, ubufatanye mu rwego rw'ubuzima, mu by'ubukungu n'ubucuruzi no mu bijyanye n'ubuhinzi n'ibindi.

Perezida Kagame ari kubarizwa i Azerbaijan , aho yitabiriye inama ya 29 y'Umuryango w'Abibumbye yiga ku kurwanya imihindagurikire y'ikirere, COP29.

Iyi nama iri kuba mu gihe ubushyuhe bukomeje kwiyongera ku Isi. Abakuru b'ibihugu na za guverinoma bateganya kuganira ku ishoramari ry'imishinga igamije kurengera ikirere no kugabanya ingaruka z'ihumana ryacyo ku binyabuzima.

Biteganyijwe ko ahura n'abakuru b'ibihugu na za guverinoma bitandukanye, barimo Perezida wa Azerbaijan, Ilham Aliyev.

Perezida Kagame yaganiriye n’igikomangoma cya Jordan, Al Hussein bin Abdullah

Ibiganiro byabo byabereye muri Baku i Azerbaijan aho bitabiriye inama ya COP29

Bombi bari muri iki gihugu aho bitabiriye inama ya 29 y'Umuryango w'Abibumbye yiga ku kurwanya imihindagurikire y'ikirere, COP29.

Bibinyujije ku rukuta rwa X, Ibiro bya Perezida, Village Urugwiro, byatangaje ko aba bakuru b'ibihugu bombi, baganiriye ku buryo bwo gushimangira ubufatanye mu by'ubukungu mu nzego zitandukanye ku bw'inyungu z'abaturage b'u Rwanda n'aba Kazakhstan.

Umubano w'u Rwanda na Kazakhstan washinze imizi ubwo rwagenaga umuntu ugomba kuruhagararira muri icyo gihugu mu 2016.

Muri Nzeri uyu mwaka ubwo i New York muri Leta Zunze Ubumwe za Amerika haberaga Inama y'Inteko Rusange ya Loni, Minisitiri w'Ububanyi n'Amahanga, Olivier Nduhungirehe, yasinyanye amasezerano na mugenzi we wa Kazakhstan, Murat Nurtleu, ajyanye no gukuraho Visa ku baturage b'ibihugu byombi mu koroshya urujya n'uruza.

Kazakhstan ni igihugu gikomeye muri Aziya yo Hagati mu by'ubukungu n'ubushobozi bwa politiki, kikaba kinatanga umusaruro wa 60% by'umusaruro mbumbe w'Akarere, ahanini bitewe n'ubucuruzi bwa peteroli na gaz, kikanagira umutungo munini w'amabuye y'agaciro.

Muri iyi nama aba bakuru b'ibihugu bitabiriye, bateganya kuganira ku ishoramari ry'imishinga igamije kurengera ikirere no kugabanya ingaruka z'ihumana ryacyo ku binyabuzima.

Raporo y'Umuryango w'Abibumbye yiswe IPPC, igaragaza ko imyuka abatuye Isi bohereza mu kirere, iri gutuma mu mwaka wa 2030 uyu mubumbe uzaba ushyushye ku kigero kirenze icyari cyitezwe.

This morning in Baku, President Kagame met with President Kassym-Jomart Tokayev of Kazakhstan on the sidelines of #COP29. They discussed ways to strengthen economic cooperation in various sectors for the benefit of the people of Rwanda and Kazakhstan. pic.twitter.com/Wshw0qm9Hj

— Presidency | Rwanda (@UrugwiroVillage) November 12, 2024

Perezida Kagame yahuriye na mugenzi we wa Kazakhstan, Kassym-Jomart Tokayev, i Baku mu Murwa mukuru wa Azerbaijan bagirana ibiganiro bigamije kunoza ubufatanye bw’ibihugu byombi

Baganiriye ku buryo bwo gushimangira ubufatanye mu by’ubukungu mu nzego zitandukanye

Ibi Madamu Jeannette Kagame yabigarutseho ubwo yari yitabiriye Inama Mpuzamahanga yiga ku guteza imbere ubumenyi bw'ibanze buhabwa abana muri Afurika.

Iyi Nama izwi nka 'Africa Foundational Learning Exchange (FLEX 2024)', iri kubera muri Kigali Convention Center, igamije kureba uko ibihugu bya Afurika byagabanya ibihombo biterwa n'uko abana badahabwa ubumenyi bukwiye mu byerekeye gusoma, kwandika no kubara hakiri kare.

Madamu Jeannette Kagame yashimangiye ko hari byinshi byakozwe mu rwego rwo guteza imbere uburezi ku Mugabane wa Afurika birimo kongera umubare w'abanyeshuri, icyakora ashimangira ko ireme ry'uburezi bahabwa rikiri ikibazo kuko hari umubare munini w'abana bato ukigorwa no gusoma ndetse no kwandika.

Yagize ati “Mfite impungenge z'uko nubwo umubare w'abiga uri kwiyongera mu bihugu byacu byose, ibyo bikajyana no kuzirikana akamaro k'uburezi bw'ibanze, imirire iboneye ku bana, ubufasha mu myumvire n'imibanire ndetse n'uburezi bw'amashuri y'incuke bwateye imbere, haracyari ibibazo, bishobora no kwiyongera mu bihe biri imbere.”

Yashimangiye ko ikibazo cyo gusoma, kwandika no kubara kikiri ingutu kuri benshi mu rubyiruko rwo muri Afurika, ati “Gusoma no kumva inyandiko zoroheje, nk'uko byagarutsweho na Minisitiri w'Uburezi w'u Rwanda, biracyari ikibazo ku bana icyenda mu 10 bafite imyaka iri munsi ya 20, mu bihugu byinshi bya Afurika.”

Yavuze ko uretse n'ubumenyi busanzwe, aba bana hari ubwo batagira amahirwe yo kubona ubundi bumenyi bw'ingenzi mu mibereho yabo, burimo ubuzafasha kuzuza inshingano zabo neza mu gihe bazaba barakuze.

Ati “Reka dutekereze kuri aba bana b'imyaka 10 badashobora gusoma neza, kwandika no kubara neza. Abana bari ahantu hatabemerera kwiyubakamo ubushobozi, ndetse reka twibaze kuri sosiyete y'aho abana benshi batabona uburyo bwo kubaka ubundi bumenyi nko kugira ubugwaneza, impuhwe, kubaha, kwigomwa, kwihangana, ubunyangamugayo no gukorera hamwe binyuze mu guhabwa ubumenyi bw'ibanze, ibyo bigatuma badashobora kubaka imibanire myiza n'abandi, imyitwarire myiza muri sosiyete ndetse no kugira uruhare mu kwiteza imbere no guteza imbere aho bakorera.”

Madamu Jeannette Kagame yatanze umuburo w'ibihe bigezweho, aho usanga ababyeyi badashobora kubona umwanya uhagije wo kurera abana babo, ati “Turi kuba mu bihe aho ababyeyi bari mu bintu byinshi bitandukanye, bibakura ku nshingano yabo y'ibanze yo kurera abana no kubaka imiryango mizima. Abana bashyirwa mu burezi, ariko se tujya tugira umwanya wo kuganira [hagati y'ababyeyi n'abarezi] mu rwego guhuza ibifasha abana ku ishuri, mu rugo no muri sosiyete yacu?”

Yaboneyeho kugaragaza ko abahanga mu by'uburezi bakwiriye guhabwa iya mbere kugira ngo bagire uruhare mu kuyobora impinduka zizatuma uburezi bukwiriye bugerwaho, kandi ubumenyi bukagera kuri bose.

Yanagaragaje ko ubumenyi bukenewe ari ubujyanye n'ibihe tugezemo, cyane cyane uburyo bwo kubyaza umusaruro ikoranabuhanga ry'ubwenge bw'ubukorano.

Ati “Twese tuzi ko uburezi, cyane cyane uburezi bw'ibanze ari urufatiro rwubakirwaho ubumenyi, kandi ubumenyi bugomba kujyana n'ibihe. Ubumenyi bwari bukenewe mu myaka ya kera cyangwa mu bihe by'itangira ry'inganda, ntabwo ari bwo bukenewe muri ibi bihe by'ikoranabuhanga cyangwa buzaba bukenewe mu bihe biri imbere [bizarangwa] n'iterambere ry'ubwenge bw'ubukorano.”

Yagaragaje ko kugira ngo ibi bishoboke, bikwiriye ko Afurika iba ifite integanyanyigisho zikwiriye kandi zishobora guhinduka zikajyana n'ibihe bigezweho.

Yagize ati “Uburyo twigisha, tumenyereza abakiri bato ku bijyanye h'ahazaza h'umurimo n'iterambere ni ingenzi cyane, kandi ibi bikubiyemo gushyiraho ingamba [zifasha muri urwo rugendo] gushyiraho integanyanyigisho ishobora kujyana n'impinduka zigezweho, kubaka ubushobozi bw'abarimu bigisha, gusaranganya ubushobozi, uruhare rw'ababyeyi n'umuryango mugari muri rusange.”

Madamu Jeannette Kagame yatanze umuburo, avuga ko mu gihe Afurika yananirwa guha abana bayo ubumenyi bukwiriye, ibi bishobora kuvamo ibyago bitandukanye birimo kuba aba bana batazagira icyo bimarira mu gihe baba bamaze gukura.

Ati “Turamutse tunaniwe gushyira imbaraga mu burezi bw'ibanze no guteza imbere imitekerereze, kongera umubare w'abanyeshuri barangiza amashuri abanza, ndetse no kongera ubushobozi dushyira mu rwego rw'uburezi, cyane cyane ku banyeshuri bafite amikoro make [yabafasha kwiga], ni ikihe kiguzi ku rubyiruko rw'uyu Mugabane, ku bushobozi bwabo bwo kwiga, kubona akazi ndetse n'ubuzima bwabo muri rusange?”

Yasabye ibihugu bya Afurika gushyira imbaraga mu kugeza uburezi kuri bose, atanga urugero ku Rwanda rwahoze rufite uburezi buheza, butarimo ishoramari kandi butanga umusaruro muke, ari ubu ibintu bikaba byarahindutse nyuma y'uko Leta ifashe ingamba zirimo kugeza uburezi kuri bose mu gihugu.

Yagaragaje isano iri hagati y'uburezi n'amahoro n'ituze muri sosiyete, ati “Uburezi bwubaka kwigirira icyizere, kwigirira icyizere bikubaka icyizere, icyizere kikubaka amahoro. Amahoro y'u Rwanda azakomeza kuba intego nyamukuru [ya Leta y'u Rwanda], ari nayo mpamvu ishoramari mu burezi ari ikintu kitagibwaho impaka.”

Madamu Jeannette Kagame yashimangiye ko hari byinshi byakozwe mu rwego rwo guteza imbere uburezi ku Mugabane wa Afurika birimo kongera umubare w’abanyeshuri, icyakora ashimangira ko ireme ry’uburezi bahabwa rikiri ikibazo kuko benshi mu bana batazi gusoma, kwandika no kubara ku kigero gikwiriye

Madamu Jeannette Kagame yagaragaje ko ibihugu bya Afurika bikwiriye kongera ishoramari bishyira mu rwego rw’uburezi

Madamu Jeannette Kagame ubwo yari akurikiye iyi Nama

Inama Mpuzamahanga yiga ku guteza imbere ubumenyi bw’ibanze buhabwa abana muri Afurika, ‘Africa Foundational Learning Exchange (FLEX 2024)’ yahuje abahanga mu by’uburezi baturutse hirya no hino muri Afurika

Abahanga mu burezi baturutse hirya no hino ku Isi bitabiriye iyi Nama

Abana b’abanyeshuri bahawe umwanya muri iyi Nama

Imbyino zigaragaza umuco Nyarwanda zifashishijwe

Intore zihamiriza mu muco Nyarwanda aho zashimishije abitabiriye iyi Nama

Jackie Lumbasi ni we wari umusangiza w’amagambo

Madamu Jeannette Kagame ari kumwe n’abandi bayobozi bari mu bitabiriye iyi Nama

Mu buzima bwacu bwa buri munsi kugira ngo umuntu abeho bisaba ko afata ifunguro, ariko ifunguro ryose ntabwo riba ryujuje intungamubiri ni yo mpamvu hari indwara abantu benshi barwara indwara ziturutse ku bumenyi buke bafite mu gutegura indyo yuzuye (imirire mibi), urugero: Umubyibuho ukabije, bwaki, kugwingira n'izindi nyinshi.

Abantu benshi kenshi batekereza ko gutegura indyo yuzuye bisaba gushaka amafunguro ahenze, ariko ntabwo ari byo. Ahubwo bisaba ko umenya ibiribwa ndetse n'intungamubiri. Kugira ngo indyo ibe yuzuye igomba kuba igizwe n'Ibyubaka umubiri (Proteins), Ibitera imbaraga (Carbohydrates) n'Ibirinda indwara (Vitamins) mu mafunguro ya buri munsi.

Mu kiganiro na InyaRwanda, Umuyobozi Mukuru ushinzwe Ubworozi muri Minisiteri y’Ubuhinzi n’Ubworozi (MINAGRI), Jean Claude Ndorimana, yasobanuye byinshi ku mirire iboneye ndetse n’ibigize indyo.

Ibi yabigarutseho muri iki gihe cy’ukwezi kwahariwe guteza imbere imirire iboneye mu Rwanda, kuva tariki 16 Ukwakira kugeza tariki 15 Ugushyingo 2024, mu nsanganyamatsiko igira iti: ‘Uburenganzira ku Biribwa: Ubuzima Bwiza N’Ejo Heza’.

Jean Claude Ndorimana asobanura ibigize ifunguro ryuzuye, yagize ati: ”Indyo yuzuye igizwe n’ibyubaka umubiri, ibitera imbaranga n'ibirinda indwara”. Avuga ko gutegura indyo yuzuye bitagoye na cyane ko mu Rwanda imboga ntizihenda cyane cyane ku batuye mu byaro ahenshi imboga zirimeza munsi y'urugo.

Yongeyeho ko ingo nyinshi ziba zoroye amatungo magufi nk'inkoko zikabaha amagi n'inyama, inkwavu, ingurube zikabaha inyama, amafaranga n'ifumbire. Yasabye ko buri umwe uteguye ifunguro yajya yibaza ngo umubiri wanjye urakuramo iki.

Gutegura indyo yuzuye, ntibisaba gushaka amafunguro ahenze. Ahubwo bisaba kumenya umumaro wa buri kiribwa dusanganwe, maze ukamenya n'uko wabitegura bikagirire akamaro ababirya.

Mu biribwa bw'ingenzi bikenewe kugira ngo umuntu ategure indyo yuzuye, hakenewe ibyubaka umubiri; ari byo ibinyampeke n'ibinyamisogwe, bigaragaramo ibigori, ibishyimbo, amasaka, inyama, igi, indagara, amata ndetse na soya.

Hakenewe kandi ibitera imbaraga, ari byo ibijumba, imyumbati, umuceli, ibirayi n'ibindi. Hakaza ibirinda indwara ari byo mboga (dodo, amashu, karoti, n'imbuto nk'imineke, avoka, inanasi, amatunda n'ibindi.

Ibi byose bishobora kubonwa na buri rugo rugize umuryango nyarwanda. Hakaba hakiri ikibazo cy'ababyeyi basuzugura bimwe muri ibi biribwa cyane cyane imboga, maze bakagaburira abana indyo imwe.

Mu kwifatanya n’abatuye Isi mu ntego yo kwihaza mu biribwa bihagije kandi bifite intungamubiri, Minisiteri y’Ubuhinzi n’Ubworozi {MINAGRI} n’Ishami ry’Umuryango w’Abibumbye rishinzwe Ubuhinzi n’Ibiribwa (FAO), basaba abanyarwanda ko indyo yuzuye yagirwa umuco mu miryango.

Ibijumba biri mu bitera imbaraga, igihe ubitetse ujye uzirikana imboga ndetse n’ibyubaka umubiri nk’ibishyimbo, indagara n’ibindi

Umuceri uri mu bitera imbaraga umubiri w’umuntu

Igi ni ingenzi cyane ku ifunguro ryawe bikaba akarusho ugiye urirya buri munsi

Karoti ntizihenda, ziri mu bwoko bw’ibiribwa birinda indwara

Ushobora kubura ubushobozi bwo kugura inkoko cyangwa ifi ariko byose binganya intungamubiri n’indagara kandi zo zirahendutse cyane

Ibirayi biri mu bwoko bw’ibiribwa bitera imbaraga kandi biraboneka hirya no hino mu gihugu

Kurya ifi ku ifunguro ryawe ntako bisa kuko ikungahaye ku ntungamubiri zitandukanye

Amata ni ingenzi cyane ku buzima bw’umuntu akaba ari mu byubaka umubiri mu cyiciro kimwe n’inyama, amagi, indagara n’ibishyimbo

Imbuto zirimo Avoka, Imineke, Pomme, Watermalon, Amacunga n’Amatunda ni ingenzi cyane kuri buri funguro ryawe

Ubunyobwa ni kimwe mu biribwa bidahenze kandi byunganira cyane indyo yuzuye

Gutegura indyo yuzuye ntabwo bisaba gushaka amafunguro ahenze, ibishyimbo biri mu cyiciro kimwe n’inyama

Inama y’uyu mwaka ya YouthConnekt yari imaze iminsi itatu ibera i Kigali mu Rwanda, yabaye amahirwe akomeye ku rubyiruko rwabashije kuyitabira, by’umwihariko ku Banyarwanda kuko usibye n’ubumenyi babashije no kwegukana ibihembo bikomeye, abandi barimo ababyinnyi, aba-DJs, abashyushyarugamba, ababyinnyi, n’abanyarwenya bakomeye bahabwamo akazi.

Dore bimwe mu bintu by'ingenzi byaranze iyi nama:

1.     Yitabiriwe n'abarenga 3000 ifungurwa na Perezida Paul Kagame

Perezida wa Repubulika Paul Kagame niwe watangije ku mugaragaro Inama ya 7 y'Ihuriro ry'Urubyiruko muri Afurika, YouthConnekt Africa 2024 yari ifite insanganyamatsiko igira iti 'Imirimo y’urubyiruko ishingiye ku guhanga ibishya'.

Iyi nama yitabiriwe n'abarenga 3000 hagati ya tariki 8-10 Ugushyingo 2024 ibera muri Kigali Convention Centre.

Muri iyi nama, Perezida Kagame yatanze ikiganiro kigaruka ku ruhare rw'urubyiruko mu gusigasira umurage wo guteza imbere Afurika. Ni ikiganiro yahuriyemo na Minisitiri w'Intebe wa Lesotho, Samuel Ntsokoane Matekane na Rwiyemezamirimo wo muri Kenya akaba n'uwashinze Ikigo Power Learn Project, Mumbi Ndung'u.

2.     Hatanzwe ibihembo bifite agaciro ka miliyoni 110 Frw

Imishinga itanu y'urubyiruko yahize indi binyuze mu irushanwa ngarukamwaka rya Hanga Pitch Fest rigamije guteza imbere urubyiruko rufite imishinga y'ikoranabuhanga yitezweho impinduka, yahembwe miliyoni 110Frw.

Ikigo Sinc-Today Ltd cyashinzwe na Eric Mupenzi hagamijwe guhindura urwego rw'imitegurire y'inama n'ibirori hifashishijwe urubuga rwayo ruhuriza hamwe serivisi zikenerwa muri uru rwego kuva ku matike ukagera ku gutegura inama n'ibindi, ni cyo cyatsindiye irushanwa rya Hanga Pitchfest 2024, cyegukana miliyoni 50Frw.

Irushanwa rya Hanga Pichfest rihuza ba rwiyemezamirimo bato bafite imishinga itanga ibisubizo mu nzego zitandukanye. Ni ku nshuro ya kane ryari ribaye. Ritegurwa na Minisiteri y'Ikoranabuhanga na Inovasiyo ku bufatanye n'Urwego rw'Igihugu rw'Iterambere, RDB, Ishami ry'Umuryango w'Abibumbye rishinzwe iterambere, UNDP n'abandi.

Ba rwiyemezamirimo batanu bageze mu cyiciro cya nyuma, nibo batoranywamo uwahize abandi agahembwa miliyoni 50Frw, uwa kabiri agahabwa miliyoni 20 Frw, uwa gatatu miliyoni 15 Frw , uwa kane n'uwa gatanu buri umwe agahembwa miliyoni 12,5 Frw.

3. Hatangijwe icyiciro cya mbere cya gahunda ya Timbuktoo HealthTech Hub

Ku munsi wa kabiri w'inama ya YouthConnekt, Perezida Kagame yatangije icyiciro cya mbere cya gahunda ya Timbuktoo HealthTech Hub, igamije gutera inkunga imishinga y'ikoranabuhanga mu rwego rw'ubuzima.

Timbuktoo ni umushinga w'Ishami ry'Umuryango w'Abibumbye rishinzwe Iterambere, UNDP, ugamije guteza imbere ibikorwa by'ishoramari muri Afurika aho kugeza ubu ufite icyicaro i Kigali mu Rwanda.

Binyuze muri iyi gahunda abafite imishinga n'ibigo biri gutangira mu rwego rw'ikoranabuhanga mu buzima bagera kuri 957 batanze imishinga yabo hatoranywamo 40, ari na bo batangiranye n'icyiciro cya mbere cyayo.

Gahunda ya Timbuktoo yitezweho gufasha Umugabane wa Afurika kwigobotora ibibazo bikomeje kwibasira urwego rw'ubuzima birimo ibyatangiranye n'Icyorezo cya Covid-19. 

Imishinga izajya iterwa inkunga binyuze muri Timbuktoo HealthTech Hub yitezweho guhanga ibishya bizahindura urwego rw'ubuzima, kugeza serivisi z'ubuvuzi muri Afurika no kongera amahirwe y'ibigo cyangwa imishinga igitangira mu guhanga ibishya mu rwego rw'ubuzima.

4. Hatangiwemo impanuro n'abayobozi bakomeye ndetse na ba rwiyemezamirimo biteje imbere

Mu butumwa yagejeje ku rubyiruko rwitabiriye iyi nama n’abandi Banyafurika muri rusange, Perezida Kagame yavuze ko Umugabane wa Afurika ufite umubare munini w’urubyiruko, ariko bidakwiye kugarukira mu mibare gusa ahubwo bigomba kujyana no kurwubakira ubushobozi.

Ati: 'Akenshi hari ibyo twirengagiza, tugatanga uburezi, tukita ku buzima bwabo, tukabashishikariza kugira uruhare mu iterambere ryabo n'igihugu ariko hagomba no kubaho wa mwuka utuma ibintu byose bigenda neza.'

Perezida Kagame yabwiye urubyiruko ko rudakwiye gukura amasomo mu byo ruhura na byo gusa ahubwo rukwiye no kwigira ku mateka y'abandi cyangwa ibyo rubona biba hirya no hino mu bihugu byabo cyangwa ahandi.

Ni mu gihe Ambasaderi w'Umuryango w'Ubumwe bw'u Burayi mu Rwanda, Belén Calvo Uyarra yagize ati: 'Imibare ivuga ko 60% by'Abanyarwanda bari munsi y'imyaka 30 kandi 60% by'Abanyafurika bari munsi y'imyaka 25, ariko ntabwo ari imibare gusa. Urubyiruko rufite uruhare rukomeye mu kugena ahazaza h'u Rwanda na Afurika.'

Minisitiri w'Intebe Dr Ngirente yavuze ko umutungo ukomeye Afurika ifite ari urubyiruko rwayo, bityo hakenewe gahunda ziruhuriza hamwe kugira ngo rwigire hamwe uko rwakemura ibibazo byugarije umugabane. 

Ati: 'Turasaba ko hajyaho gahunda zitandukanye z'Umugabane wa Afurika zihuza urubyiruko kugira ngo rukemure ibibazo bibangamiye iterambere rya Afurika, ruyobore impinduka zikenewe.'

Rwiyemezamirimo wo muri Kenya akaba n'uwashinze Ikigo Power Learn Project, Mumbi Ndung'u, yakanguriye urubyiruko bagenzi be kugira amakuru y'ibiri kubera mu bihugu byabo no ku Isi, kuko ari byo bizabafasha kumenya ibyo bashobora gukora ngo bagere ku iterambere. 

Yavuze ko inzego zishinzwe iterambere ry'urubyiruko na Leta muri rusange bakwiye kugira uruhare mu gushyiraho uburyo rubona imirimo kuko ari byo bizafasha mu iterambere ry'ubukungu.

5. Abitabiriye babonye umwanya uhagije wo kwidagadura

Ku ikubitiro, abana b'abakobwa n'abahungu babarizwa mu Muryango Sherrie Silver Foundation, bafashije abitabiriye iyi nama gususuruka no kuyitangira bari mu mwuka mwiza nk'urubyiruko. 

Binyuze mu mbyino zidasanzwe zirimo izigezweho n'iza Gakondo, indirimbo zivuga ibyiza by'u Rwanda n'iziha ikaze abitabiriye, aba bana bishimiwe n’ibihumbi by'abari bateraniye muri Kigali Convention Centre.

Abanyarwenya barimo Anne Kansiime uri mu bafite izina rikomeye muri Uganda ndetse na Mammito wo muri Kenya, bataramiye abitabiriye inama ya Youth Connekt imaze iminsi ibera mu Rwanda.

Aba banyarwenya biyongeraho abo mu Rwanda nka Rusine Parick, Herve Kimenyi na Babu bataramiye muri Kigali Convention Centre mu gitaramo cyiswe 'Gen-Z Comedy Night' cyari kiyobowe na Fally Merci.

Mammito witabiriye iki gitaramo bigaragara ko akuriwe, ntabwo yigeze agaragaza intege nke ku rubyiniro ahubwo yatanze ibyishimo ku bakunzi b'urwenya bari bakoraniye muri Kigali Convention Center.

Iki gitaramo cyasojwe n'umunyarwenya Anne Kansiime waherukaga i Kigali ubwo yari yitabiriye igitaramo cya Seka Live muri Nzeri 2023.

Ni igitaramo cy'urwenya cyabaye mu ijoro ryo ku wa 9 Ugushyingo 2024, cyitabirwa n'abiganjemo urubyiruko rwitabiriye inama ya Youth Connekt. Iki gitaramo kandi cyari cyitabiriwe n'abarimo Minisitiri w'Urubyiruko no guteza imbere ubuhanzi Dr. Utumatwishima Jean Nepo Abdallah.

Muri iyi nama kandi, umuhanzikazi Aline Sano Shengero wamamaye nka Alyn Sano afatanije na Christiane Boukuru ndetse na bamwe mu banyempano batsinze mu cyiciro cya gatatu cya Art Rwanda Ubuhanzi, na bo bahawe umwanya basusurutsa abayitabiriye mu njyana gakondo.

Aba-DJs b’abakobwa barimo Dj Ira na Dj Sonia babonye akazi muri iyi nama, ndetse n’itsinda ry’ababyinnyi bayobowe na Titi Brown uri mu bafite izina rikomeye mu myidagaduro Nyarwanda bahawe umwanya basusurutsa abitabiriye YouthConnekt 2024.

YouthConnekt imaze imyaka 12 itangiye mu Rwanda aho yatangijwe na Perezida Kagame nyuma yo gusanga ari ngombwa ko urubyiruko ruhurira hamwe, rugafata ingamba ku iterambere ryarwo rubigizemo uruhare ariko hakabaho no kwigiranaho no gusangizanya ibitekerezo bishingiye ku iterambere.

Cyatangiye ari igitekerezo cy'u Rwanda muri gahunda y'Igihugu yo kwishakamo ibisubizo, ariko kuri ubu abafatanyabikorwa batandukanye basanze ari igitekerezo gikwiye kuba icya Afurika yose.

Kugeza ubu, ibihugu 33 byo muri Afurika bimaze gufata Youth Connekt nk'uburyo bwo kwita ku rubyiruko no kuruteza imbere. Abayitabira babona umwanya uhagije wo kumva impanuro, kuganira, kumenyana no gusangizanya ubumenyi n'amakuru yatuma rubasha kwisubiriza ibibazo birwugarije ari nabyo bikoma mu nkokora iterambere ryarwo.

Uyu mwaka, iyi nama yitabiriwe n'urubyiruko rubarizwa mu nzego z'umutekano zirimo Polisi, Ingabo z'u Rwanda, Urwego rw'Igihugu rushinzwe Igorora ndetse n'Urwego rwa DASSO, ba rwiyemezamirimo bato, abanyeshuri mu mashuri makuru na za kaminuza, urubyiruko rubarizwa mu nzego z'ubuyobozi zitandukanye, abahagarariye ibyiciro bitandukanye by'urubyiruko n'abandi.

Urubyiruko rukoresha imbuga nkoranyambaga ndetse n’abandi baturutse hirya no hino muri Afurika bari mu bitabiriye ndetse bagasangiza abandi aho bageze mu rugendo rwo kwiteza imbere

REBA AMASHUSHO Y’UKO BYARI BIMEZE MURI YOUTHCONNEKT

Itangazo ryashyizwe ahagaragara na RCS kuri uyu wa 11 Ugushyingo 2024, rigaragaza ko ari icyemezo cyemejwe n'Inama y'Abaminisitiri yateranye ku wa 9 Ugushyingo 2024.

RCS iti 'Aba bakozi birukanywe kubera imyitwarire mibi mu kazi ruswa n'ibindi byaha.'

Abirukanywe barimo Komiseri umwe, ba Ofisiye Bakuru 26, ba Ofisiye bato 20 ba su Ofisiye n'aba Wada 364.

Itangazo rikomeza rivuga ko 'imyanzuro yo kubirukana ijyanye n'amahame yo kwimakaza imikorere myiza ya RCS'

Muri Gicurasi 2024 inzego z'ubutabera zitangaje ko hari abacungagereza barenga 135 bari bakurikiranyweho ibyaba bitandukanye, barimo 20 bahise basubizwa mu kazi abandi bashyikirizwa Urwego rw'Igihugu rw'Ubugenzacyaha mu gihe abandi benshi basabiwe kwirukanwa burundu muri uyu mwuga.

Abacungagereza birukanywe harimo abahowe imyitwarire mibi mu kazi, ruswa n’ibindi byaha

Mu itangazo rigenewe abanyamakuru yashyize hanze ku wa 11 Ugushyingo 2024, Donald Trump yagize ati 'Ntewe ishema no kwemeza Elise Stefanik ngo azabe mu bagize guverinoma yanjye nka ambasaderi wa Amerika mu Muryango w'Abibumbye.'

'Elise ni umuntu utangaje cyane w'umunyembaraga kandi w'umunyabwenge, akarwanirira Amerika mbere y'ibindi byose.'

Mu gihe byaba byemejwe na sena ya Amerika, Stefanik, yazasimbura Linda Thomas-Greenfield, wari uhagarariye iki gihugu muri Loni kuva mu 2021.

Mu butumwa yashyize ku rubuga rwa X ku Cyumweru, Stefanik yanditse ko Leta Zunze Ubumwe za Amerika 'ziteguye gusubira mu bukangurambaga bwa 'Maximum Pressure' bwa Perezida Trump bwo guhangana na Iran.”

Yavuze ko iki gihugu cyakomejwe cyane n'intege nke z'ubuyobozi bwa Biden na Harris.

Maximum Pressure ni ubukangurambaga bwatangijwe ku butegetsi bwa Trump, nyuma y'uko mu 2018 iki gihugu cyikuye mu masezerano mpuzamahanga yashyizweho mu 2015, agamije gukumira ibikorwa byo gukora ibisasu bya kirimbuzi bya Iran hirindwa ingaruka mbi zishobora guterwa na byo hagamijwe amahoro n'umutekano ku Isi. Aya masezerano azwi nka [JCPOA- Joint Comprehensive Plan of Action].

Trump yavugaga ko aya masezerano atigeze akumira ibikorwa bya Iran, icyo yakoze ari ukubitinza gusa bigakomeza gukorwa, bityo ahitamo gushyiriraho iki gihugu ibindi bihano bikakaye binyuze muri ubu bukangurambaga.

Stefanik ni umwe mu bashyigikiye cyane Israel mu ntambara ikomeje kujya mbere hagati yayo na Hamas muri Gaza no mu bitero by'indege igaba ku mutwe wa Hezbollah muri Liban.

Yanashyigikiye icyemezo cya Israel cyo kwamagana ibikorwa by'Ishami ry'Umuryango w'Abibumbye ryita ku Mpunzi z'Abanya-Palestine [UNRWA], nyuma y'uko abakozi baryo bashinjwe gufasha abarwanyi ba Hamas.

Mu kwezi gushize Stefanik yavuze ko 'Ubutegetsi bwa Biden na Harris bwahaye UNRWA arenga miliyari imwe y'amadolari kuva mu 2021, buzuza ikigega cy'uyu mutwe w'iterabwoba. Ibi bigomba guhagarara.'

Intumwa ya Israel mu Muryango w'Abibumbye, Danny Danon, yakiriye neza aya makuru, ashimira Stefanik kudahwema kugaragaza 'icyiza n'ikibi'.

Uyu mugore avugwaho kurwanirira Amerika no kuba umunyabwenge mu bya politiki

Depite Elise Stefanik ni umwe mu bashyigikiye Israel

Depite Elise Stefanik abarizwa mu ishyaka ry’Aba-Républicains