Blog

Nyuma y’igihe kinini yibasirwa ku mbuga nkoranyambaga kubera impinduka zigaragara mu mibereho n’imigaragarire ye, Shaddyboo yasabye kubahwa nk’umuntu ufite amahitamo ye.

Abinyujije ku rubuga rwa Instagram, Shaddyboo yagaragaje ko anyuzwe n’uko abayeho ubu, anenga imvugo zimugenera imbibi mu mikoreshereze y’umubiri we ndetse n’imyitwarire ye.

Mu butumwa bwe, Mbabazi Shadia yasabye abantu kubaha uburenganzira bwe bwo kwiyumva no kwifatira imyanzuro ku buzima bwe, avuga ko umubiri n’ubuzima bwe ari amahitamo ye bwite.

Ati 'Umubiri wanjye. Imbibi zanjye. Niyumva neza uko ndi. Ndabinginze mubyubahe.'

Ibi yabivuze nyuma y’uko mu minsi ishize yari aherutse kugaragaza ko umwaka ushize wamubereye igihombo gikomeye ku mutima, aho yumvaga yisanga wenyine mu rugamba rutoroshye rwo kwishakisha no gukira ibikomere byo mu mutima.

Yavuze ko yanyuze mu bihe byo kwiheba n’agahinda gakabije, ariko akabihisha, kuko yumvaga atabasha gusangiza abandi intimba ye.

Nubwo yari afite inshuti, Shaddyboo yagaragaje ko muri icyo gihe nta n’umwe wamubaye hafi ngo amufashe kwikorera uwo mutwaro, bigatuma yiyumvamo irungu rikomeye.

Kurundi ruhande ariko uyu mubyeyi w’abana babiri yahishuye ko nubwo yanyuze mu mwaka wuzuye intimba n’irungu, yabashije kwiyubaka ahereye ku bana be no ku kwizera kwe, ahitamo gukomeza ubuzima yishimiye uwo ari we.

Yagaragaje ko abakobwa be babiri ari bo bamubereye urumuri mu mwijima, bamubera imbaraga zo gukomeza kubaho no guhaguruka buri munsi n’iyo byamugoraga.

Shaddyboo yasabye abantu kumurekera ubuzima bwe yahisemo kubamo

Umuyobozi w’Ishyirahamwe ry’Ibigo bikora Imirimo y’Ubwubatsi mu Rwanda (AEBTP), Munyakazi Sadate yavuze ko bafite intego yo kujya bajya no guhatana ku rwego mpuzamahanga aho yavuze bifuza kugera ku rwego rwo kujya kubaka mu bihugu bikomeye nk’Ubushinwa nk’uko nabo baza mu Rwanda.

Ibi Munyakazi yabigarutseho kuri uyu wa Gatanu tariki ya 23 Mutarama 2026 yahuje Abagize Ishyirahamwe ry’Ibigo bikora Imirimo y’Ubwubatsi mu Rwanda (AEBTP) n’inzego za Leta mu rwego rwo kuganira kugira ngo barebe uko icyo bafasha Igihugu ariko na none bakoranye n’Inzego za Leta kuko niyo nkingi yo kubaka Igihugu.

Yari yitabiriwe na Meya w’Umujyi wa Kigali, Dusengiyumva Samuel wavuze ko kugeza muri 2029 bafite intego yo kuba barubatse amacumbi agezweho ibihumbi 187 mu rwego rwo guca akajagari.

Ati “Imibare y’Ikigo cy’Igihugu cy’Ibarurishamibare (NISR), yatugaragarije ko dukeneye inzu ibihumbi 187 kugeza mu 2029, kugira ngo tubashe gucubya ikibazo cy’abantu bakeneye amacumbi aciriritse, hanakemurwe icyo kibazo cy’akajagari. Ni ukuvuga inzu nshya ziyongera ku zisanzwe hagamijwe ko abatuye umujyi baba ahantu heza. Ibi rero birerekana ko hari amahirwe menshi kuri mwebwe nk’ishyirahamwe ry’abubatsi bo mu Rwanda'.

Sadate yavuze ko byaba bisekeje nyuma y’Imyaka 31 U Rwanda rwibohoye hari serivisi bajya gusaba abanyamahanga rero ko bakwiye kubigiraho bakajya no kubikora mu bihugu byabo.

Ati “Byaba bisekeje cyane kuba nyuma y’imyaka 31 hari serivisi twaba tujya gusaba Abanyamahanga, ni yo mpamvu umuryango wacu twahagurutse ngo twigire kuri abo banyamahanga noneho ibyo batwigisha tubibyaze umusaruro.”

Uyu mushoramari wanayoboye Rayon Sports, yavuze ko yifuza kuba yabonaga u Rwanda rujya nko kugira ibyo rwubaka mu Bushinwa nk’uko nabo babikora mu Rwanda.

Ati “Agaciro k’umuntu ni ibikorwa bye, niba wubaka ibisenyuka, agaciro kawe ni igisenyuka, ni yo mpamvu tugomba kubaka umwuga unoze kandi wihuse uhatana ku isoko rya hano mu Rwanda ariko tukagira n’ubwo bushobozi bwo guhatana ku masoko mpuzamahanga, ntabwo tugomba kuguma hano mu Rwanda, tugomba kwaguka nk’uko abashinwa baza kubaka hano mu Rwanda natwe tukabasanga iwabo, bikaba kimwe kimwe.”

Yemeje ko ubu uyu muryango ufite Kompanyi zimwe na zimwe zubaka hanze y’u Rwanda nko muri Centrafrique.

Ati “Iyo ntambwe tumaze kuyitera, tujya no kurunguruka n’ahandi tukareba uko bimeze, aho muri Centrafrique n’ahandi, yego turacyari bake.”

Yavuze ko nk’abikorera imbogamizi bagihura nazo zikomeye ni uko kugeza ubu amasoko menshi ahabwa abantu ku giti cyabo rimwe na rimwe baba batanafite ubushobozi bakubaka nabi ejo bigasenyuka, yasabye abahagarariye inzego za Leta kujya batanga isoko babanje kureba ko uwo muntu barihaye abarizwa mu muryango (Association).

Minisitiri w’Ibikorwa Remezo, Dr Jimmy Gasore yavuze ko ashimira uruhare rw’abubatsi mu iterambera ry’igihugu ndetse ko bakwiye gushyigikirwa.

Ati 'Imibare dufite ni uko 7% by’umusaruro mbumbe w’Igihugu waturutse mu rwego rw’ubwubatsi, urumva ko ari uruhare runini cyane bityo ko ari ngombwa kongeramo imbaraga. Ni yo mpamvu tugomba kongera imikoranire hagati ya Leta n’abikorera cyane cyane abari mu rwego rw’ubwubatsi, kugira ngo turusheho kunoza ibyo dukora, ndetse tunavaneho imbogamizi zaba ziri kuri buri ruhande'.

AEBTP yavutse mu 1997 igamije guhuriza hamwe abakora umwuga w’ubwubatsi kugira ngo batere imbere banateze imbere Igihugu muri rusange.

Bamwe mu bagize Umuryango w’Ibigo by’abubatsi mu Rwanda

Abayobozi mu nzego zitandukanye bari bahari

Meya w’Umujyi wa Kigali, Dusengiyumva Samuel na Munyakazi Sadate

Meya w’Umujyi wa Kigali yavuze ko muri 2029 hazaba hamaze kubakwa amacumbi ibihumbi 187

Minisitiri w’Ibikorwa Remezo, Dr Jimmy Gasore yavuze ko abubatsi bakwiye gushyigikirwa kuko bagira uruhare mu iterambera ry’igihugu

Munyakazi Sadate yavuze ko bakigowe no kubona amasoko

Yifuza kubona hari Kompanyi zo mu Rwanda zubaka mu bihugu bikomeye

Tombola y’uko amakipe azahura mu gikombe cy’Intwari, yasize APR FC igomba guhura AS Kigali, Rayon Sports na Police FC.

Ni Tombola yabereye ku Cyicaro gikuru cya FERWAFA ku gicamunsi cy’uyu wa Gatanu tariki ya 23 Mutarama 2025.

Benshi bari biteze ko amakipe abiri akunzwe mu Rwanda, Rayon Sports na APR FC ashobora guhura ariko amategeko ntabwo yabyemeraga.

Iri rushanwa rw’Igikombe cy’Intwari 2026, rizahuza amakipe 4 yabaye aya mbere mu mwaka w’imikino ushize.

APR FC yabaye iya mbere na Rayon Sports yabaye iya kabiri akaba yagombaga gutomborwa, AS Kigali yatamboye APR FC maze Police FC itombora Rayon Sports.

Bivuze ko kugira ngo aya makipe ahure muri iri rushanwa ni uko yahurira ku mukino wa nyuma.

Imikino ya 1/2 APR FC izakina na AS Kigali tariki ya 28 Mutarama, bukeye bwaho Rayon Sports ikine na Police FC Imikino izabera kuri Kigali Pelé Stadium mu gihe umukino wa nyuma uzaba tariki ya 1 Gashyantare 2026 kuri Stade Amahoro. Uzabanzirizwa n’umukino w’abagore uzahuza Rayon Sports WFC na Indahangarwa.

APR FC na Rayon Sports zakwepanye

Police FC yasinyishije abakinnyi batatu bashya bagomba kuza kongera imbaraga bakayifasha kwegukana shampiyona.

Police FC yasoje imikino ibanza ya shampiyona aho ifite amanota 34 ku mwanya wa 2 inyuma ya Al Hilal ifite 35, APR FC ibura umukino umwe ifite 33.

Police FC ikaba yasinyishije abakinnyi batatu barimo myugariro ukomoka muri Nigeria, Isaac Ezeh na rutahizamu Rudasingwa Prince bavuye muri AS Kigali. Yasinyishije kandi umukinnyi wo hagati Nshimirimana Ismail Pitchou ukomoka i Burundi utari ufite ikipe aho aheruka muri APR FC.

Iyi kipe irimo gukora ibishoboka byose ngo irebe ko yatwara igikombe cya Shampiyona yatandukanye na Eric Ssenjobe bivugwa ko ishobora kurekura abarimo Ndizeye Samuel na Henry Musanga wagiye mu igeragezwa.

Isaac Ezeh ni yakiniraga AS Kigali, ubu yerekeje muri Police FC

Rudasingwa Prince yavuye muri AS Kigali

Pitchou ni umukinnyi wa Police FC

Umuhanzi nyarwanda Bruce Melodie ari kubarizwa muri Kenya, aho yagiye muri iki gihugu mu rwego rwo gukomeza urugendo rwo kumenyekanisha indirimbo ye nshya yise 'Pom Pom' ku rwego mpuzamahanga.

Mu ijoro ryo ku wa Kane rishyira ku wa Gatanu, Bruce Melodie n’itsinda rimufasha rya 1:55 AM Ltd bahagurutse ku Kibuga cy’Indege cya Kigali berekeza mu mujyi wa Nairobi, aho ateganya kugirana ibiganiro n’ibitangazamakuru bitandukanye byo muri Kenya.

Intego nyamukuru y’uru rugendo ni ugushyira indirimbo 'Pom Pom' ku rwego mpuzamahanga, ikarushaho kumenyekana mu karere no hanze yako.

Nyuma ya Kenya, biteganyijwe ko Bruce Melodie azakomereza uru rugendo mu bindi bihugu birimo Uganda, Tanzania ndetse n’Ubwongereza, mu rwego rwo kwagura isoko ry’umuziki we.

Ku bunani bwa 2026 ni bwo Bruce Melodie yashyize hanze indirimbo 'Pom Pom', yakoranye n’umuhanzi w’icyamamare muri Afurika ,Diamond Platnumz ndetse na Brown Joel wo muri Nigeria.

Iyi ndirimbo yakiriwe neza cyane n’abakunzi b’umuziki, by’umwihariko kubera umwihariko wayo wo kuririmbwamo indimi gakondo z’aba bahanzi, bikaba byarashimishije benshi.

Ubuyobozi bwa 1:55 AM Ltd, buherutse gutangaza ko iyi ndirimbo yatwaye asaga ibihumbi 100 by’amadolari ya Amerika, arenga miliyoni 140 z’amafaranga y’u Rwanda.

Bwitsa cyane ku kwemeza ko iryo shoramari rikomeye ryakozwe hagamijwe gushyira umuziki wa Bruce Melodie ku ruhando mpuzamahanga no kuwugeza ku bantu benshi batari mu Rwanda.

Mu buryo bw’amajwi, indirimbo 'Pom Pom' yakozwe na C-Tea Beat, mu gihe amashusho yayo yakozwe ku bufatanye bwa Sasha Vybz wo muri Uganda na Fayzo wo mu Rwanda.
Kugeza ubu, iyi ndirimbo imaze kurebwa n’abantu barenga miliyoni 4.3 kuri YouTube mu byumweru bitatu gusa imaze isohotse.

Bruce Melodie yerekeje muri Kenya kumenyekanisha indirimbo ye Pom Pom

Tom Close yaragaraje amikoro nk’imwe mu mpamvu zatumye habaho ugutinda mu gutegura igitaramo cyo kumurikira abakunzi be album ye yise 'Essense’ iri mu zakunzwe cyane.

Muri 2023 nibwo Dr. Muyombo Thomas wamamaye nka Tom Close yasohoye album ya cyenda yise 'Essence’ aca agahigo mu ruganda rw’umuziki Nyarwanda ko kuba umuhanzi ushyize hanze album nyinshi.

Iyi album yaje no kwegukana igihembo cy’album nziza yari yosohotse muri uyu mwaka mu bihembo bya Isango na Muzika.

Ubwo yasubizaga ku cyatumye igitaramo cyo kumurika album ye kitaba, Tom Close yatangaje ko abantu bakwiye gufata umuziki nk’ubundi bwoko bw’ishoramari rikorwa mu buzima busanzwe risaba amafaranga atubutse kandi rimwe na rimwe kuyakusanya biba bitoroshye.

Ati 'Niba igitaramo nka 'Nu-Year Groove’ gishobora gushorwamo miliyoni zisaga 100 z’amafaranga y’u Rwanda, birerekana ko umuziki ari ikintu gisaba igishoro kinini kandi cyakuwe ahantu hagutse.”

'Igitaramo cyanjye cyatindijwe n’ubushobozi bugikusanywa ariko inkono ihira igihe.' Nk’uko yabitangarije mu kiganiro yagiranye n’umunyamakuru Ally Soudy.

Tom Close yavuze ko yiteguye kwakira abashoramari bashaka gutera inkunga iki gitaramo mu rwego rwo kwihutisha igihe cyagombaga kuzabera.

Ati 'Njyewe umushoramari ubyifuza cyangwa undi muntu wibera hanze y’u Rwanda ushaka gutera inkunga iki gitaramo niteguye kumuha ikaze tukabiganiraho, yanyandikira tukabipanga kandi byagenda neza aho gutegereza igihe kirekire.'

Tom Close ahamya ko iyi album yagizweho uruhare n’abantu benshi barimo Producer Knox wayikoze, Bob Pro watunganyije amajwi yayo na Ishimwe Clement wakurikiranaga ikorwa ryayo.

Tom Close watangiye umuziki mu 2005, aho yakoze indirimbo 'Mbwira’ yari kuri album yise 'Kuki’ yasohoye mu 2008, nyuma yaje gukora izindi album zirimo ‘Sibeza’, ‘Ntibanyurwa’, ‘Komeza Utsinde’, ‘Ndakubona’, ‘Isi’, ‘Igikomere’ na ‘So Fine’.

Tom Close yavuze ko amikoro ari yo yatumye adasohora album ye