Blog

Umuherwe akaba n'umushoramari w'ikirangirire mu rwego rw'ikoranabuhanga, Elon Musk, yongeye gushyira izina rye mu mateka y'Isi nyuma yo kugera ku rwego rw'umutungo udasanzwe, aho abaye umuntu wa mbere ku Isi ugeze ku mutungo ungana na miliyari 600 z'Amadolari ya Amerika. Ibi byatumye izina rye rirushaho kuvugwa mu itangazamakuru mpuzamahanga no mu bushakashatsi ku bukungu bw'abaherwe ku Isi.

Uyu mugabo ukomoka muri Leta Zunze Ubumwe za Amerika azwi cyane nk'umuyobozi mukuru w'ibigo bikomeye birimo Tesla ikora imodoka zikoresha amashanyarazi, SpaceX ikora ibijyanye n'ikorwa ry'indege zo mu isanzure, ndetse n'indi mishinga ijyanye n'ikoranabuhanga igezweho. Iterambere ry'ibi bigo, by'umwihariko Tesla na SpaceX, ryagize uruhare runini mu gutuma umutungo we wiyongera ku muvuduko udasanzwe.

Ubwiyongere bw'agaciro k'imigabane ya Tesla ku masoko mpuzamahanga y'imari, hamwe n'amasezerano mashya SpaceX igenda igirana n'inzego zitandukanye ku Isi, byafashije Elon Musk kurenga imbibi zose zari zisanzwe zizwi mu mateka y'abaherwe. Abasesenguzi b'ubukungu bagaragaza ko uyu mutungo utapfa kuba amafaranga abitse, ahubwo ugizwe ahanini n'agaciro k'imigabane n'ishoramari rifite icyizere cyo gukomeza kwaguka.

Elon Musk akunze kuvuga ko intego ye atari ukwiyungura umutungo gusa, ahubwo ko ari uguhindura ejo hazaza h'ikiremwamuntu binyuze mu guhanga udushya, nko guteza imbere ingufu zisubira, gutwara abantu mu isanzure, no kunoza ikoranabuhanga rihuza abantu.

Iyi ntambwe yatewe na Musk ifatwa nk'ikimenyetso cy'uko ikoranabuhanga rifite uruhare rukomeye mu guhindura ubukungu bw'Isi, bikanerekana ko Isi igenda yinjira mu gihe gishya aho udushya n'ibitekerezo bishya bishobora guteza umutungo utigeze ugerwaho mbere.

Source : https://kasukumedia.com/elon-musk-yanditse-amateka-mu-bukungu-bwisi-agera-ku-mutungo-utarigeze-ugerwaho/

Bruno Fernandes, kapiteni wa Manchester United, yatangaje amagambo yagaragaje intimba n'agahinda, avuga ko ubuyobozi bw'iyi kipe bwigeze kugaragaza ko kumurekura akagenda. Mu kiganiro yagiranye na Canal 11, uyu Munya-Portugal yavuze ko yumvaga mu mutima we ko hari abari biteguye kumurekura muri ikipe ya Manchester United, ariko bikabangamirwa n'uko umutoza Rúben Amorim yamwifuzaga cyane mu ikipe.

Ati: 'Manchester United yashakaga ko ngenda, mbifite mu mutwe. Ntekereza ko batagize ubutwari bwo gufata uwo mwanzuro kuko Rúben Amorim yanshakaga hano. Ariko ku ruhande rw'ikipe, numvaga ko iyo ngenda bitari kubabaza cyane.'

Bruno Fernandes yemeye ko yahawe igitekerezo cyo kujya muri Al Hilal yo muri Arabie Saoudite, aho umushahara wari kuba uri hejuru cyane, ariko agahitamo kuguma muri Manchester United kubera urukundo ayifitiye. Ati: 'Al Hilal yaranyifuzaga, umushahara wari munini cyane, ariko nahisemo kuguma hano kuko nkunda Manchester United by'ukuri. Ariko ubu ubudahemuka ntibugihabwa agaciro nk'uko byahoze.'

Yakomeje avuga ko icyamugumishije cyane mu ikipe ari ibiganiro yagiranye n'umutoza Rúben Amorim, anongeraho n'impamvu z'umuryango we Ati: 'Nkunda Manchester United by'ukuri, ni yo mpamvu navuze ko nguma hano. Hari n'impamvu z'umuryango. Ibiganiro nagiranye n'umutoza Rúben Amorim byagize uruhare rukomeye mu kumfasha gufata uwo mwanzuro.'

Nubwo bimeze bityo, Bruno Fernandes ntiyahishe ko yumvise ababajwe n'uko ubuyobozi bw'ikipe bwagaragazaga ko kugenda kwe bitari kubabaza cyane. Ati: 'Ku ruhande rw'ikipe, numvise bimeze nk'aho bavuga bati 'mbaye ngiye ngiye si ikibazo gikomeye'. Ibyo byarambabaje cyane.' Yakomeje agira ati: 'Ntabwo byambabaje gusa, byarambabaje mu mutima. Ndi umukinnyi udakwiye kunengwa. Mpora niteguye gukina, haba ari byiza cyangwa bibi. Mpora ntanga byose ku bw'ikipe.'

Ku bijyanye n'ejo hazaza, Bruno Fernandes yavuze ko atigeze yanga burundu kujya gukina muri Arabie Saoudite, ariko ko icyo gihe atari cyo. Ati: 'Niba hari umunsi nzajya gukina muri Arabie Saoudite, nzahakina. Ariko muri icyo gihe sinumvaga ari byo.'

Yasoje avuga ko yabibwiye abayobozi b'ikipe, ariko ko batewe ubwoba no gufata icyemezo, kubera ko umutoza yamwifuzaga cyane. Ati: 'Nabibwiye abayobozi, ariko ntekereza ko batagize ubutwari bwo gufata icyemezo, kuko umutoza yanshakaga. Iyo mvuga ko nshaka kugenda, bari kunyemerera.'

Source : https://kasukumedia.com/bruno-fernandes-yababajwe-no-kumva-ko-ikipe-ya-manchester-united-yiteguye-kumurekura-akagenda/

Perezida wa Uganda, Yoweri Kaguta Museveni, yatangaje ko impamvu akunze kugaragara yambaye ingofero ahanini ahari ari inama yahawe n'umuhungu we, Gen Muhoozi Kainerugaba. Museveni yavuze ko uwo muhungu we yamugiriye inama yo kwirinda imirasire y'izuba ishobora guteza indwara ya kanseri y'uruhu, by'umwihariko bitewe n'imyaka amaze n'igihe kinini amara ari hanze mu bikorwa bya politiki.

Uyu muyobozi w'imyaka 80 yavuze ko kwambara ingofero atari ibintu bya politiki gusa, ahubwo ari uburyo bwo kwita ku buzima bwe, ashimangira ko umuntu ugeze mu izabukuru agomba kurushaho kwitwararika. Yongeyeho ko inama ya Muhoozi yayifashe nk'iy'ingenzi, kuko nk'umusirikare n'umuyobozi, aba azi neza ingaruka z'imirasire ikabije y'izuba ku mubiri w'umuntu.

Ibi yabitangaje mu gihe yari mu myiteguro yo kwiyamamaza ku mwanya wa Perezida wa Uganda ku nshuro ya karindwi, mu matora ateganyijwe tariki ya 15 Mutarama 2026. Museveni amaze kuyobora Uganda kuva mu 1986, igihe yafatanaga ubutegetsi n'ishyaka rye, National Resistance Movement (NRM).

Uwo mubare w'imyaka amaze ku butegetsi umushyira ku mwanya wa kane mu bayobozi bo muri Afurika bamaze igihe kirekire bayobora ibihugu byabo. Nubwo hari abamunenga bavuga ko yamaze igihe kinini ku butegetsi, Museveni akomeza kugaragaza ko agifite imbaraga n'ubushake bwo gukomeza kuyobora, ashingiye ku byo avuga ko ari ubunararibonye n'icyerekezo cyo gukomeza guteza imbere Igihugu cya Uganda.

Source : https://kasukumedia.com/museveni-yavuze-impamvu-ahora-yambaye-ingofero-mu-gihe-yitegura-amatora-ya-2026/

Umunyamakuru Kayitesi Yvonne wamamaye ku izina rya Tessy yakorewe ibirori byihariye byo gusezera ku bukumi, bizwi nka Bridal Shower, mu rwego rwo kwizihiza intambwe nshya ari gutera mu buzima bwe bwo kurushinga. Ibi birori byari byitabirire n'inshuti ze za hafi, abo mu muryango ndetse n'abo bakorana mu itangazamakuru.

Bridal Shower ya Tessy yaranzwe n'ibiganiro byuje urwenya, inama zigenewe umugeni ugiye gushinga urugo, abitabiriye uburyo bwo kwishimira urugendo rushya agiye gutangira bari bishimiye ibyo birori. Abari bahari bagaragaje urukundo n'inkunga yabo, bamwifuriza ishya n'ihirwe mu muryango agiye kubaka.

Tessy yitegura kurushinga n'umukunzi we, umuraperi Ishimwe Shizzo uzwi nka AfroPappi, umwe mu bahanzi bakomeje kwigaragaza mu muziki Nyarwanda. Urukundo rw'aba bombi rumaze igihe rugaragara mu ruhame, aho bagiye basangiza abakunzi babo ibyishimo byabo mu bihe bitandukanye, bigatuma benshi babifuriza kurushinga neza.

Ubukwe bw'aba bombi buteganyijwe kuba ku tariki ya 10 Mutarama 2026, bukazabera mu Intare Conference Arena, imwe mu nyubako nini zifashishwa mu birori bikomeye mu Mujyi wa Kigali. Biteganyijwe ko buzitabirwa n'abantu batandukanye bo mu myidagaduro, itangazamakuru n'abandi banyacyubahiro.

Ibirori bya Bridal Shower ya Tessy byabaye ikimenyetso cy'uko imyiteguro y'ubukwe iri mu murongo mwiza, mu gihe abakunzi babo bakomeje kubategereza babifuriza urugo ruhire ruzarangwa n'urukundo, ubwubahane n'iterambere.

Source : https://kasukumedia.com/kayitesi-yvonne-tessy-yakorewe-bridal-shower/

Jaysqueezer, uzwi cyane ku mazina zina nka Kasuku, Wamipango n'andi menshi atandukanye yateganyije igikorwa cyihariye cyo gusangira umunsi mukuru wa Noheri n'abana bo mu Murenge wa Masaka, Akagari ka Cyimo, ku itariki ya 27 Ukuboza 2025. Iki gikorwa kizibanda ku bana babarizwa mu muryango wa BIGTIME FAMILY, uzwiho kwita ku bana bakeneye ubufasha n'ubuvugizi mu buzima bwa buri munsi.

Jaysqueezer, usanzwe akoresha imbuga nkoranyambaga mu gusangiza abantu inkuru, ibitekerezo n'ubukangurambaga butandukanye, yavuze ko yahisemo gukoresha ijwi rye n'izina afite mu gufasha abana no kubashakira ibyishimo mu gihe cya Noheri. Yagize ati: 'Noheri ni umunsi mukuru wizihizwa n'Abakirisitu ku itariki ya 25 Ukuboza, wizihizwa ivuka rya Yezu Kristu, gusa njye na team yanjye twifuje gusangira n'abana bakeneye ubufasha ku wa 27 Ukuboza k'uyu mwaka wa 2025. Nifuza ko abana ba BIGTIME FAMILY bumva ko batari bonyine, ko hari abantu babitaho kandi babatekerezaho umunsi k'uwundi.'

Bimwe mu biteganyijwe muri iki gikorwa harimo umuganda rusange uzabera mu Murenge wa Masaka, aho Jaysqueezer azifatanya n'abaturage, urubyiruko n'abanyamuryango ba BIGTIME FAMILY mu bikorwa byo guteza imbere isuku n'iterambere ry'aho batuye. Ibi bigamije kongera umuco wo gufatanya no kwigisha abana akamaro ko kwitangira umuryango Nyarwanda.

Nyuma y'umuganda, hazakurikiraho igikorwa cyo gusangira Noheri n'abo bana, aho bazahabwa impano zitandukanye zirimo imyambaro, ibikoresho by'ishuri n'ibindi bikenerwa ku bana. Hazanabaho ibiganiro by'ubaka n'ubukangurambaga bugamije kubashishikariza gukunda ishuri, kwiyumvamo ubushobozi no guharanira ejo hazaza heza.

Iki gikorwa cya Jaysqueezer Wamipango kigaragaza ko abanyabigwi ku mbuga nkoranyambaga bashobora kugira uruhare rufatika mu mibereho myiza ya sosiyete, bakifashisha ubwamamare bwabo mu guteza imbere ubumuntu, urukundo n'iterambere rusange.

Source : https://kasukumedia.com/kasuku-arateganya-kwizihiza-noheri-hamwe-nabana-babarizwa-mu-muryango-wa-bigtime-family/

Kuva muri 2023, abayobozi b'Uburundi bagiranye amasezerano na Repubulika iharanira demokarasi ya Kongo yo koherezayo ingabo mu kurwanya umutwe wa M23, akaba amasezerano ataravuzweho rumwe, aho bivugwa ko perezida Ndayishimiye ahabwa arenga ibihumbi bitanu by'amadorari kuri buri musirikare woherejweyo.

Si amafranga arya wenyine, kuko n'umugaba wingabo z'Uburundi Prime Niyongabo, nawe yahawe isoko ryo kuvura abasirikare bakomerekeye ku rugamba, aho boherezwa mu bitaro bye bwite, aho kujyanwa ku bitaro bya gisirikare bya Kamenge nkuko bisanzwe nkuko tubikesha ikinyamakuru Sarambwe.com.

Amakuru Rushyashya yamenye, Centre Medico-Chirurgical de Kinindo (CMCK), bikaba aribyo bitaro bya Prime Niyongabo, nibyo byakira abakomerekeye ku rugamba, amafaranga ubusanzwe yahabwaga ibitaro bya gisirikare, akisanga mu mufuka wa Niyongabo, dore ko nibyo bitaro binacungwa bya hafi ni umugore we.

Umwe mu basesenguzi ba politike muri aka karere waganiriye na Rushyashya, ahamya ko uku gushakira amafaranga mu basirikare b'Abarundi haba abazima cyangwa inkomere, biri mu bituma intambara muri Kongo itarangira, aho batsinda babona amafaranga, ariko nanone banatsindwa bakigwizaho andi biciye mu nkomere.

Ibi byose byo kwigwizaho amafaranga binyuze mu gushora abasirikare b'Abarundi mu ntambara itari ngombwa muri Kongo, biri kuba mu gihe Uburundi bwongeye kugarizwa n'ikibazo kibura by'ibitoro ndetse n'amadevize muri rusange, tutibagiwe nibindi byemezo byagiye bifatwa ngo bashimishe ubahemba Tshisekedi birimo nko gufunga umupaka ubuhuza n'u Rwanda, bikomeje gukenesha no kubeshaho nabi abarundi.

Source : https://rushyashya.net/abasirikare-babarundi-bakomerekera-muri-kongo-igishoro-nubutunzi-kuri-prime-niyongabo/

Mu misozi y'i Mulenge, mu ntara ya Kivu y'Amajyepfo, haravugwa imirwano ikomeye yabereye mu gice cya Rwitsankuku, hafi ya centre ya Minembwe. Iyi mirwano ihanganishije umutwe wa Twirwaneho n'ihuriro ry'ingabo za Leta ya Repubulika Iharanira Demokarasi ya Congo (RDC), zirimo FARDC, iz'u Burundi, Wazalendo na FDLR.

Amakuru ava muri ako Karere agaragaza ko imirwano yatangiye mu rukerera rwo kuri uyu wa Kabiri, tariki ya 16 Ukuboza 2025, igahita ifata intera mu masaha ya mbere y'umunsi. Abaturage baturiye Rwitsankuku bavuga ko ari ingabo za Leta zagabye igitero, mu gihe Twirwaneho yo ivuga ko yari mu mwanya wo kwirwanaho no kurinda ibirindiro byayo n'abaturage bahatuye. Kuva mu gitondo, humvikanye urusaku rw'imbunda ziremereye n'izoroheje, bigaragaza ubukana bw'iyo mirwano.

Amakuru yizewe aturuka ku baturage n'abandi bakurikirana iby'umutekano muri Mulenge avuga ko, nubwo imirwano ikomeje, hari aho ihuriro ry'ingabo za Leta ryagaragaje gusubira inyuma. Bivugwa ko bamwe mu barwanyi bagiye berekeza mu gace ka Point Zero, abandi bagana mu Bibogobogo no mu mujyi wa Baraka.

Rwitsankuku ni agace Twirwaneho yafashe mu kwezi k'Ugushyingo 2025, nyuma yo kwirukana ingabo zari zirimo iz'u Burundi, Wazalendo, FDLR na FARDC. Iyi mirwano ibaye kandi mu gihe uwo mutwe uherutse kwigarurira agace ka Ndondo muri grupema ya Bijombo, ndetse ukagura ibirindiro byawo mu bice bitandukanye by'imisozi y'i Mulenge birimo Mikarati, Kigazura na Nyamara.

Mu gihe imirwano ikomeje, umutekano w'Akarere ugenda urushaho kuzamba, abaturage bagaragaza impungenge ku buzima bwabo bwa buri munsi, bategereje kureba icyerekezo cy'iki kibazo gikomeje kugira ingaruka ku mutekano no kuri politiki mu Burasirazuba bwa RDC.

Source : https://kasukumedia.com/mulenge-rwitsankuku-yahindutse-isibaniro-ryimirwano-ikaze-hagati-ya-twirwaneho-ningabo-za-leta-ya-rdc/

Umutwe w'iterabwoba wa FDLR ukomeje ibikorwa byawo byo guhungabanya umutekano no kwica abaturage mu Burasirazuba bwa Repubulika Iharanira Demokarasi ya Congo, mu gihe Leta y'iki gihugu ikomeje kuvuga ko uyu mutwe utagifite ubushobozi kandi igafatanyanawo mu mirwano irwanya umutwe wa M23.

Mu rukerera rwo kuri uyu wa Mbere tariki ya 15 Ukuboza 2025, abarwanyi ba FDLR batwitse igiturage giherereye muri Teritwari ya Walikale, mu gace ka Busurungi ho muri Gurupoma ya Waloa Loanda, banica abaturage bane bari batuye muri ako gace.

Abo barwanyi bayobowe n'uwitwa General Mudayongwa, bateye icyo giturage mu gihe abaturage bari bakiryamye, batwika amazu menshi, bituma benshi bahunga berekeza mu bice bya Kifuruka, Kaundju, Katambira na Busurungi.

Urubuga Actualité.cd rwatangaje ko abo barwanyi ba FDLR, ugizwe ahanini n'abasize bakoze Jenoside yakorewe Abatutsi mu Rwanda mu 1994, binjiye muri ako gace bafite intwaro, bagamije gutera ubwoba abaturage no kubirukana ku butaka bwabo.

Abaturage bavuga ko General Mudayongwa amaze igihe asaba abaturage kwimuka, avuga ko ubwo butaka ari ubwe, akabukoresha mu korora no guhinga ku gahato, ibintu bikomeje guteza umutekano muke n'ihungabana mu baturage baho.

Muri ibi bikorwa by'ubugizi bwa nabi, bivugwa ko hari n'abantu bo mu mitwe yitwaje intwaro ya Wazalendo bahasize ubuzima, by'umwihariko abarwanyi ba Mai-Mai Kifuafua, ibintu byatumye imirwano ikomeye yubura hagati ya FDLR n'iyo mitwe ya Mai-Mai.

Ibi bibaye mu gihe raporo zitandukanye z'Umuryango w'Abibumbye zagiye zerekana ko Leta ya Congo yakiriye, ikanakorana n'abarwanyi ba FDLR, nubwo uyu mutwe uri ku rutonde mpuzamahanga rw'imitwe y'iterabwoba. Izi raporo zigaragaza ko hari ubufatanye hagati ya FDLR n'ingabo za Leta ya Congo (FARDC) mu bikorwa bya gisirikare, ibintu bikomeje gushyira mu kaga umutekano w'abaturage b'abasivili.

Ni mu gihe kandi ubutegetsi bwa Kinshasa bukomeje gutangaza ko FDLR itakiri ikibazo gikomeye, mu gihe ibikorwa byayo byo kwica abaturage, gutwika imidugudu no kwigarurira ubutaka bigenda byiyongera mu Ntara ya Kivu y'Amajyaruguru.

Mu rwego rwo gushakira umuti urambye iki kibazo, amasezerano y'amahoro hagati y'u Rwanda na Repubulika Iharanira Demokarasi ya Congo yasinyiwe i Washington D.C ku buhuza bwa Leta Zunze Ubumwe za Amerika, ateganya ko impande zombi zigomba gufatanya mu gusenya no guhashya umutwe wa FDLR, ugambiriye guhungabanya umutekano w'u Rwanda n'akarere kose.

Gusa uko iminsi igenda ishira, ibikorwa bya FDLR bikomeje kugaragaza ko uyu mutwe ugifite ubushobozi bwo kwica no guhungabanya umutekano, mu gihe abaturage b'abasivili bakomeje kuba igitambo cy'intambara n'imikino ya politiki mu Burasirazuba bwa Congo.

Source : https://rushyashya.net/fdlr-ikomeje-kwica-abaturage-muri-walikale-mu-gihe-leta-ya-congo-ivuga-ko-itakiri-ikibazo/

Umuhanzi w’Umunyarwanda unavuga ko ari uwa mbere mu Rwanda, Bruce Melodie yagiye Nyabugongo abantu bahurura kuza kumureba bafunga imihanda bahamukura shishi itabona.

Byabaye ejo hashize ku wa Mbere tariki ya 15 Ukuboza 2025 nyuma y’uko yari avuye mu kiganiro n’itangazamakuru na The Ben cyagarukaga ku gitaramo bazakorana cya The NU-Year Groove kizaba tariki ya 1 Mutarama 2026.

Amakuru ISIMBI yamenye ni uko yagiyeyo kubera ubusabe bw’umwe mu bafana be wamusabye kuzajyayo akamarayo umwanya ko yazahava yagize igitekerezo cy’indirimbo yahakora bitewe n’ubuzima azaba yahabonye.

Ubwo yari akigerayo imodoka ye yahise yuzuraho abantu benshi, kugenda biragorana ubona buri umwe ashaka kumukoraho no ku musuhuza cyane yanavuye mu modoka akabapepera.

Aha ni naho yabonye umubyeyi wari uhetse abana arimo acuruza imigati yumva bimukoze ku mutima maze aragenda aramwegera bagirana ikiganiro, amakuru avuga ko yamuremeye.

Uko iminota yashiraga ni nako abantu bagendaga baba benshi n’imihanda itangira kwifunga kubera akavuyo k’abantu bari baje kumureba, byabaye ngombwa ko bahita bahamukura igihe yateguye kumahara kitarangiye.

Nyabugogo umuhanda wari wafunzwe kubera akavuyo

Yavuye mu modoka asuhuza abakunzi be

Yaremeye umubyeyi uzunguza imigati

Umutekano we abasore b’ibigango bawucungiraga hafi

Byari ibyishimo ku bantu bari Nyabugogo kumubona

Source : http://isimbi.rw/bruce-melodie-yafunze-imihanda-nyabugogo-ahasiga-inkuru-nziza-amafoto.html

Nubwo yamaze kugarura abakinnyi bayo bari bamaze iminsi mu mvune, Ndikumana Asman na Fall Ngagne watangiye imyitozo, Rayon Sports yatakaje undi mukinnyi wari uyihetse, Aziz Bassane.

Gikundiro nk’uko abakunzi bayo bakunda kuyita ntabwo yigeze igira amahirwe yo kubona abakinnyi bayo bose kandi ngenderwaho bitewe n’imvune zayugarije.

Iyi kipe yari mu byishimo by’uko ba rutahizamu bayo Ndikumana Asman na Fall Ngagne bakirutse imvune ndetse Asman we akaba yaranatangiye gukina imikino itandukanye.

Gusa yaje guhura n’ikindi kibazo kandi gikomeye cyo gutakaza rutahizamu wayo usatira unyuze ku Mpande, Aziz Bassane wagize ikibazo cy’imvune ikaba igiye kumubura igihe kirekire.

Ni mvune yagiriye ku mukino wa Rayon Sports na Bugesera FC, ubwo umukino wari ugeze ku munota wa 49 yaje kuva mu kibuga asimburwa na Ndikumana Asman.

Uyu mukinnyi akaba yaragize ikibazo cy’imvune y’ukuboko izatuma amara iminsi hanze y’ikibiga adakina, yanatangiye kwitabwaho n’abaganga kugira ngo barebe niba yazagaruka vuba.

Rayon Sports ubu ikaba yamaze kumvikana na rutahizamu w’Umugande wakiniraga Express FC y’iwabo kuba yaza mu Rwanda kuyikinira.

Muhammad Ssenoga Kagawa amakuru akaba anavuga ko yamaze kugera mu Rwanda aho yaje kurangizanya na Rayon Sports ku buryo azatangira kuyikinira mu mikino yo kwishyura ya shampiyona ya 2025-26.

Rayon Sports yamaze kwemeza Lomami Marcel nk’umutoza wungirije ikaba itegereje umutoza mukuru, Umufaransa Bruno Ferry, iri ku mwanya wa 5 n’amanota 17 mu gihe Police FC ya mbere ifite 26.

Aziz Bassane yahise abasimbura aba ari we uvunika

Fall Ngagne na Asman Ndikumana bakirutse imvune

Ssenoga Kagawa yaje kurangizanya na Rayon Sports

Source : http://isimbi.rw/rayon-sports-agahinda-karashira-akandi-ari-ibagara.html