Blog

Umutoza w’Ikipe y’Igihugu Amavubi, Stephen Constantine yamaze gutoranya abakinnyi 26 azifashisha mu mikino mpuzamahanga ya gicuti ya FIFA Series 2026, aho mu basezerewe harimo n’abategewe indege.

Muri rusange hahamagawe abakinnyi 31 ariko 26 ari bo bagomba gusigara bakazakina iri rushanwa ririmo kubera mu Rwanda.

Bivuze ko batanu ari bo bagombaga gusezererwa, gusa icyatunguye benshi ni uko mu basezerewe batatu muri bo bakina hanze y’u Rwanda.

Abakinnyi babiri basezerewe bakina mu Rwanda ni Niyongira Patience wa Police FC na Ruboneka Bosco wa APR FC.

Abandi ni Nshuti Innocent wa Al Wefaq Ajdabia yo muri Libya wagize ikibazo cy’imvune, Niyo David wa NK Veres Rivne FC yo muri Ukraine na Ndayishimiye Matteo Karl wa KVC Wilrijk yo mu Bubiligi.

U Rwanda rurakina na Grenada itsinda izahure n’iza gutsinda hagati ya Kenya na Estonia ku wa Mbere w’icyumweru gitaha.

Nshuti Innocent wagize ikibazo cy’imvune yavuye mu mwiherero

Ruboneka Bosco asanzwe ukinira APR FC ari mu basezerewe

Umunyezamu wa Police FC, Niyongira Patience na we yatashye

Niyo David (wambaye icyatsi) ukina muri Ukraine na we yasezereye

Matteo Ndayishimiye Karl waturutse mu Bubiligi yasezerewe

Umutoza Haringingo Francis arabunza imitima nyuma y’uko umutima we n’umubiri byamaze kugera muri Rayon Sports ariko Kiyovu Sports ikaba idashaka kumurekura.

Haringingo Francis akaba yaramaze kumvikana na Rayon Sports kujya gusimbura Umufaransa Bruno Ferry watandukanye na Rayon Sports tariki ya 20 Werurwe 2026.

Gikundiro nk’uko abakunzi bayo bakunda kuyita, yavuganye n’abatoza benshi ariko yashimye Haringingo Francis cyane ko ari na we bashakaga kuva ku itangiriro.

Uyu mutoza wabahesheje igikombe cy’Amahoro cya 2023, Rayon Sports ibona ari we wabafasha kugendana n’icyerekezo ishaka.

Haringingo Francis usigaranye amezi abiri muri Kiyovu Sports, ku munsi w’ejo yasezeye kuri iyi kipe gusa nayo yamwereretse ko ititeguye kuba yamurekura adasoje amasezerano ye.

Amakuru ISIMBI yamenye ni uko Rayon Sports yamukubiye kabiri umushahara ahabwa muri Kiyovu Sports maze yemera gutoza umwaka umwe wiyongeraho amezi abiri asigaye ngo shampiyona ya 2025-26 irangire.

Mu gihe Kiyovu Sports itakwemera kumurekura mu buryo bworoshye, Haringingo Francis n’abareberera inyungu ze bafashe umwanzuro ko ajya muri Rayon Sports maze Kiyovu yarega bakishyura amezi yari asigaranye mu Rucaca.

Ku ruhande rwa Kiyovu Sports amakuru avuga ko biteguye kurega Haringingo Francis muri FERWAFA mu gihe yajya muri Rayon Sports kuko yaba atarubahirije amasezerano bagiranye.

Haringingo Francis yamaze kumvikana na Rayon Sports

Umuhanzikazi w’icyamamare muri Uganda, Juliana Kanyomozi, yahakanye amakuru amaze iminsi akwirakwira avuga ko yaba yarahagaritse gukora muzika nk’umwuga nyuma yo kuva mu kiruhuko cyo kubyara.

Juliana yabitangaje mu kiganiro aherutse kugirana n’itangazamakuru, aho yasobanuye neza ko ibyo bivugwa bidafite ishingiro, ashimangira ko gukunda muzika kwe bitigeze bigabanuka.

Uyu muhanzikazi yavuze ko amaze igihe yumva abantu bavuga ko atagishaka gukora nk’uko byahoze, cyane cyane nyuma yo kubyara, ariko akemeza ko ibyo ari ibitekerezo bidahuye n’ukuri.

Yagize ati 'Abantu bavuze ko ntashaka gukora, ko kuva mvuye mu kiruhuko cyo kubyara ntagishaka gukora muzika. Ibyo si byo.'

Juliana yakomeje avuga ko muzika ari igice gikomeye cy’ubuzima bwe, ndetse ari ibintu akunda cyane ku buryo adashobora kubireka uko byagenda kose.

Yagize ati 'Bamenye uko nkunda akazi kanjye cyane. Nkunda kuririmba, nkunda umuziki kuko umpa ibyishimo byinshi. Sinshobora na rimwe kubyuka ngo mvuge ko nahagaritse gukora muzika.'

Aya magambo yaje akuraho urujijo ku bakunzi be bari batangiye kwibaza impamvu adakora cyane nk’uko byahoze mbere.

Juliana Kanyomozi ni umwe mu bahanzikazi bafite izina rikomeye mu karere ka Afurika y’Iburasirazuba, aho amaze imyaka myinshi ari ku gasongero k’umuziki wa Uganda no ku rwego mpuzamahanga.

Kanyomozi yanyomoje amakuru yo guhagarika umuziki

Ikipe y’igihugu ya Liechtenstein itahabwaga amahirwe, yatunguye Tanzania maze iyitsinda igitego kimwe ku busa.

Wari umukino wa kabiri w’itsinda B ry’imikino ya gicuti ya FIFA Series irimo kubera mu Rwanda, ni nyuma y’uko Aruba yari yatsinze Macau 4-1.

Igice cya mbere Tanzania yihariye umukino inarema uburyo bwinshi binyuze muri Feisal Salum wagoye cyane Liechtenstein gusa kuyabyaza umusaruro biragorana.

Fei Toto nyuma yo kugenda aremera bagenzi be uburyo bwinshi ariko ntibabubyaze umusaruro, mu munota wa 43 yafashe icyemezo ashaka gutsinda ariko umupira ukubita igiti cy’izamu. Amakipe yombi yagiye kuruhuka ari ubusa ku busa.

Liechtenstein yaje kunyura mu rihumye Tanzania maze ku munota wa 56, Ferhat Sağlam ayitsindira igitego cya mbere.

Tanzania yahise ishyira igitutu cyinshi kuri Liechtenstein ishaka kwishyura biranga maze umukino urangira ari 1-0.

Ku Cyumweru Tanzania izakina na Macau bahatanira umwanya wa gatatu mu gihe Liechtenstein izakina na Aruba bashaka ikipe ya mbere.

Fei Toto yagoye Liechtenstein, arema uburyo bwinshi ariko biranga

Liechtenstein yatunguranye itsinda Tanzania

Umunyamakuru Tijara Kabendera yahishuye ko nyuma yo gutoranywa mu bazayobora umuhuro wa Perezida wa Repubulika y’u Rwanda, Paul Kagame n’abagize Umuryango w’Abayisilamu mu Rwanda yumvise afite ubwoba bitewe n’icyubahiro amugomba.

Ni umuhuro wabaye ejo hashize ku wa Gatatu tariki ya 25 Werurwe 2026 muri Kigali Arena, ahari hakoraniye Abayisilamu benshi bari barangajwe imbere na Sheikh Sindayigaya, Mufti w’u Rwanda.

Mu kiganiro yagiranye na ISIMBI,Tijara yavuze ko atabyiyumvishaga, byamutunguye bikanamutera ubwoba.

Ati 'Ibaze kubwirwa ko ugiye guhura na Perezida imbonankubone, inzozi za buri umwe wese rero ntabwo nakubwira ko byari bisanzwe kuko nahise numva mfite ubwoba budasanzwe.'

Tijara wakoreye Ikigo cy’Igihugu cy’Itangazamakuru imyaka irenga 18 yakomeje ashimangira ko yahise yiragiza Imana anayereka inshingano yari ahawe kugira ngo azabashe kuzisohoza nta nkomyi zibayeho.

Ati 'Nagize ubwoba ariko nibuka ko ndi umuyisilamu kuko nubundi nta na kimwe njya nishoboza, ibyo ngeraho uwo ndi we mbishobozwa na Allah. Ndabisengera ntangira kwizera ko hariya nzitwara neza.'

Tijara kandi yavuze ko yashimishijwe bikomeye no kwibona yegeranye na Perezida Kagame yambaye nk’Umuyisilamu.

Ati “Icyanshimishije cyane ni ukwibona mpagaze imbere ya Perezida nambaye neza, nambaye nk’Umuyisilamu wa nyawe. Kuba nari mpagaze imbere ya Perezida ni cyo kintu cyonyine kirenze mu mutima wanjye.”

“Ntabwo nigeze mpagarika n’Isaha imwe kubwira Imana nti ‘Mana mfasha aha hantu bigende neza’, kandi byagenze neza nk’uko nayisabye.”

Tijara yanashimiye itsinda rigari ry’abacungira umutekano Perezida kubera ko ritigeze risa nk’irimushyira ku gitutu ahubwo rimushishikariza kuba we kuruta gutwarwa n’igitutu cyo gusangiza ijambo mu muhango witabiriwe n’umukuru w’igihugu.

Perezida Kagame yahuye n’abayisilamu agaragaza ko icyo bakwiye gushyira imbere ari iterambere ry’abaturage kandi nibabigenza gutyo nta kabuza Igihugu kizabafasha mu mishinga itandukanye bakora, abereka ko ubuyobozi buri kumwe nabo muri iyo mishinga,

Tijara yari MC mu muhuro Perezida Kagame yakiriyemo Abayisilamu

Yakabije inzozi buri muntu wese aba arota

Yahamije ko ari ibintu bidasanzwe mu buzima bwe

Uyu munsi ni bwo hatangiye imikino ya gicuti mpuzamahanga ya ‘FIFA Series’ aho yafunguriwe muri Kigali Pelé Stadium yagaragaraga mu isura nshya.

U Rwanda rwakiriye imikino mpuzamahanga ya gicuti ya FIFA Series aho hagomba gukinira amatsinda abiri aho uyu munsi hakinnye itsinda B.

Ni itsinda ririmo Liechtenstein, Aruba, Macau na Tanzania, akaba ari itsinda rizajya rikinira muri Kigali Pelé Stadium.

Habanje umukino wa Aruba na Macau, gusa ukinjira muri iyi Stade wahitaga ubona yahindutse bitewe n’uburyo yateguwemo.

Ni umukino waje kurangira Aruba atsinda 4-1 bya Fermina ku munota wa 5, Romano ku munota wa 13 na 16 na Kilsdonk ku munota 66.

Ikipe ya Macau wabonaga iri hasi cyane, yagerageje gushaka n’igitego cy’impozamarira iza kukibona ku munota wa 88 gitsinzwe na Ka Hang Leong.

Hakaba hagiye guhita hakurikiraho umukino ugiye guhuza Tanzania na Liechtenstein saa 16h30.

Kigali Pelé Stadium mu isura nshya

Aruba yanyagiye Macau