Category: Uncategorized

Adel Amrouche, wahoze ari umutoza w'Ikipe y'Igihugu ya Kenya, yamaze kumvikana na FERWAFA na Minisiteri ya Siporo kugira ngo atoze Amavubi. Uyu mutoza ukomoka muri Algeria, akaba anafite ubwenegihugu bw'u Bubiligi, ni we watoranyijwe mu batoza batatu batoranyijwe mu rutonde rurerure rw'abifuzaga uwo mwanya. FERWAFA ivuga ko uyu mutoza ari igihamya cy'icyerekezo gishya cy'ishyirahamwe, aho bashaka abatoza bafite ibigwi n'ubushobozi bwo guteza imbere ikipe y'Igihugu.

Amrouche afite ubunararibonye mu gutoza amakipe yo muri Afurika. Yigeze guhagarikwa na CAF kubera amagambo yatangaje mu gikombe cya Afurika giheruka, ariko yari umwe mu mpuguke eshanu zifatanya na Arsène Wenger mu guteza imbere umupira w'amaguru ku Isi. Yatoje u Burundi hagati ya 2007 na 2012, aho yafashije abakinnyi barenga 15 kubona amakipe i Burayi, barimo Papy Faty na Saido Ntibazonkiza. Yanatoje Kenya ayihesha igikombe cya CECAFA cya 2014, ndetse ajyana Tanzania mu gikombe cya Afurika akoresheje ikipe y'abakinnyi bakiri bato.

Uyu mutoza afite Licence ya UEFA Pro, kandi yari asanzwe ari umwe mu batoza b'inzobere mu Bubiligi, aho yatozaga abandi batoza barimo Luc Eymael wigeze gutoza mu Rwanda. FERWAFA yizeye ko ubunararibonye bwe buzafasha Amavubi kuzamuka ku rwego mpuzamahanga.

Amavubi ari kwitegura imikino yo gushaka itike y'igikombe cy'Isi, aho bazakina na Nigeria ku wa 17 Werurwe ndetse na Lesotho ku wa 24 Werurwe. Iyo mikino izabera kuri Stade Amahoro, kandi Amrouche ashobora kuzaba ayoboye Amavubi muri iyo mikino.

Source : https://yegob.rw/adel-amrouche-mu-nzira-zo-gutoza-ikipe-yigihugu-amavubi/

Perezida wa Rayon Sports, Twagirayezu Thadée, yahakanye amakuru yavugwaga ko ubuyobozi bw'ikipe buri gutekereza kwirukana umutoza w'umunya-Brazil, Robertinho. Aya makuru yatangiye gukwirakwira nyuma y'uko Rayon Sports yanganyije na Amagaju igitego 1-1 kuri Stade ya Huye.

Mu kiganiro yahaye InyaRwanda dukesha iyi nkuru, kuri uyu wa Gatanu, tariki 28 Gashyantare 2025, Twagirayezu yavuze ko nta mpamvu yatuma birukana umutoza uri ku mwanya wa mbere muri shampiyona. Yagize ati: 'Robertinho ari ku mwanya wa mbere, kandi asigaje imikino itarenze 12. Nubwo hari ibyo ashobora kunanirwa, ntitwakwihutira kumwirukana kuko umupira w'amaguru ni uguhangana.'

Perezida wa Rayon Sports yagaragaje ko amakipe yose ahura n'ibihe bigoye, ndetse atanga urugero rw'uko na APR FC, mukeba wabo ukomeye, yigeze kunanirwa gutsinda Amagaju i Huye. Yashimangiye ko Robertinho akora uko ashoboye kandi kugeza ubu ari we uhiga abandi mu gutsinda.

Nubwo hari abavuga ko Robertinho ashobora kwirukanwa, Rayon Sports ifite imikino ikomeye imbere yayo. Ku itariki 2 Werurwe izahura na Gasogi United, naho ku itariki 9 Werurwe icakirane na APR FC. Iyi mikino ishobora gutanga ishusho nyayo y'ahazaza h'uyu mutoza mu ikipe.

Source : https://yegob.rw/perezida-wa-rayon-sports-yashyize-ukuri-hanze-ku-makuru-yuko-robertinho-yirukamwe/

Duarte Marivoet yavutse tariki ya 2 Gashyantare mu 2005 mu Bubiligi. Afite ibilo 59 n’uburebure bwa metero 1.85.

Yatangiye gukina umukino w’igare mu 2022 ahereye mu ikipe y’abato ya Team Auto yo mu gihugu cy’u Budage.

Muri uyu mwaka yitabiriye amasiganwa atandukanye arimo Grote Prijs A. Noyelle-Ieper,Internationale Cottbuser Junioren-Etappenfahrt, Course de la Paix Juniors,World Championships MJ ndetse n’andi.

Mu 2023 Duarte Marivoet yitabiriye andi marushanwa arimo Gent-Wevelgem aho yabaye uwa 8 ku rutonde rusange,muri Course de la Paix Juniors aba uwa 23 ku rutonde rusange ,muri Grand Prix Rüebliland aba uwa 28 naho muri Ain Bugey Valromey Tour aba uwa 6.

Mu mwaka wa 2024 Duarte Marivoet yahinduye ikipe yerekeza muri UAE Team Emirates Gen i Dubai.

Muri uyu mwaka nabwo yitabiriye amarushanwa atandukanye gusa ho ntabwo yitwaye neza ugereranyije nuko byari byagenze mu mwaka wabanje.

Yitabiriye Giro della Regione Friuli Venezia Giulia aba uwa 33 ku rutonde rusange,yitabira Vuelta a Burgos aba uw’ 125,Giro d’Italia Next Gen ava aba uwa 28 ndetse anitabira Volta a la Comunitat Valenciana aba uwa 109.

Mu ntangiriro z’uyu mbere y'uko Duarte Marivoet yitabiriye Tour of Sharjah ikinirwa i Dubai aho yabaye uwa 6 ku rutonde rusange ndetse akaba yaranabaye umukinnyi mwiza ukuri muto muri rusange.

Duarte Marivoet wegukanye agace ka Gatanu ka Tour du Rwanda ya 2025

Source : https://inyarwanda.com/inkuru/152895/ibyo-wamenya-kuri-duarte-marivoet-wegukanye-agace-ka-gatanu-ka-tour-du-rwanda-ya-2025-152895.html

Ibi biyobyabwenge babifatanywe mu ijoro ryo ku itariki 27 Gashyantare 2025.

Muri Nyagatare mu Murenge wa Tabagwe hafatiwe ibiro umunani by'urumogi, Karama hafatirwa ibilo 20 by'urumogi byose byari bikuwe muri Uganda.

Mu Murenge wa Rwempasha hafatiwe litiro icyenda za kanyanga mu gihe mu Karere ka Rwamagana hafatiwe ibiro 2,5 by'urumogi ndetse na kanyanga.

Umuvugizi wa Polisi y'u Rwanda mu Ntara y'Iburasirazuba, SP Twizeyimana Hamduni, yabwiye IGIHE ko ibi biyobyabwenge byose byafatiwemo abantu batanu bari hagati y'imyaka 25 na 30, asaba urubyiruko gushaka ibindi bakora aho kwiringira gucuruza ibiyobyabwenge.

Ati ''Ibiyobyabwenge bihanwa n'amategeko kandi bigira ingaruka ku buzima bwacu, ni byo bitera amakimbirane yo mu ngo bikararura benshi kandi bikanica benshi. Turasaba buri wese ubicuruza cyangwa se ubinywa kubireka kuko Polisi ntizigera ibarebera, tuzakomeza kubafata kugira ngo babihanirwe rero inama tubagira ni ukubireka ababicuruza bagashaka ikindi bakora.''

SP Twizeyimana yavuze ko bibabaje kuba hari urubyiruko rugifatirwa muri ibi bikorwa byo gushaka kwinjiza ibiyobyabwenge mu gihugu asaba buri wese kujya atanga amakuru kugira ngo Polisi ibikurikirane hakiri kare. Kuri ubu abafatiwe muri ibi bikorwa bafungiye kuri Sitasiyo za Polisi mu gihe iperereza rigikomeje.

---

Source : http://igihe.com/amakuru/u-rwanda/article/iburasirazuba-abantu-batanu-batawe-muri-yombi-bazira-urumogi-na-kanyanga

Bobby Pittman ni umugabo ufite ubunararibonye mu bijyanye n'ishoramari ndetse n'iterambere, by'umwihariko ku Mugabane wa Afurika. Ari mu bashinzwe ibigo Kapunda Capital na Oath Africa.

Ibiro by'Umukuru w'Igihugu, Village Urugwiro, byanditse ko “Perezida Kagame yakiriye Bobby Pittman, uri mu bashinze Oath Africa na Kupanda Capital, ndetse akaba ari Umuyobozi w'Inama y'Ubutegetsi ya Banki Nyarwanda Itsura Amajyambere (BRD).”

Bakomeje bavuga ko “ibiganiro byagarutse ku mahirwe y'ishoramari ari mu gihugu.”

U Rwanda ni kimwe mu bihugu bifite amahirwe y'ishoramari bitewe n'uko ubukungu buzamuka ku muvuduko mwiza, kandi rukaba igihugu gifite umutekano ndetse kitarangwamo ruswa iri ku kigero cyo hejuru.

Kupanda Capital ni ikigo cyigenga gikora ishoramari, kikanatanga ubujyanama ku bijyanye n'uburyo bwo kubaka ndetse no kwagura ibigo by'ubucuruzi muri Afurika.

Iki kigo gitanga ubujyanama ku bigo by'ubucuruzi, bubifasha kwagukira ku masoko yo hirya no hino muri Afurika.

Kinagira kandi uruhare mu gushinga ibigo bishya by'ubucuruzi, hibanzwe cyane ku bigo bihanga udushya ndetse bikaba biri mu nzego zitanga umusaruro mwinshi.

Ku bigo bisanzwe bikora, Kupanda Capital igira uruhare mu kubifasha kwagukira hirya no hino muri Afurika.

Iki kigo kandi kinakora ishoramari mu bindi bigo by'ubucuruzi bifite amahirwe yo kwaguka ndetse no kugira uruhare mu guhindura ubuzima bw'Abanyafurika.

Mu ishoramari ryayo, yibanda ku nzego zirimo ikoranabuhanga, ubuhinzi ndetse na serivisi z'imari. Nk'ubu binyuze mu kigo cya Kupanda Holdings, ku bufatanye na Universal Music Group (UMG), hashinzwe Mdundo, urubuga rufasha mu kumenyekanisha ibihangano nyafurika.

Perezida Kagame yakiriye Umuyobozi w’Inama y’Ubutegetsi ya BRD n’itsinda ryamuherekeje

---

Source : http://igihe.com/amakuru/u-rwanda/article/perezida-kagame-yakiriye-umuyobozi-w-inama-y-ubutegetsi-ya-brd

Mu itangazo ryarwo, rwagize ruti 'Gutangaza amakuru arebana n'intambara bisaba ubunyamwuga buhambaye. Abanyamakuru n'abandi bakoresha imbuga nkoranyambaga bagomba gushyira imbere ibimenyetso, kutabogama no guharanira ko inkuru batangaza zitabonekamo amakabyankuru bagamije gukurura abasomyi n'ababakurikira.'

RMC yasabye abanyamakuru bose kwisubiraho ku kuba batangaza amakuru atizewe, imitwe y'inkuru ishobora kuyobya umusomyi ndetse n'amarangamutima bagamije kwigarurira imitima ya benshi aho gutangaza ukuri n'ibindi bidakozwe kinyamwuga.

Ibi bije nyuma y'uko umunyamakuru Joseph Hakuzwumuremyi yagaragaje ko u Rwanda rwakunze kugaragaza ko rutazakomeza kurebera, yemeza ko Minisitiri Nduhungirehe yatangaje intambara.

Ati 'Nduhungirehe we yatangaje intambara. Namwumvise, yavuze ko u Rwanda rutazabyihanganira.'

Mugenzi we Uwera Jean Maurice yahise amubaza niba Minisitiri Nduhungirehe afite ububasha bwo kuba yatangaza intambara.

Undi ati 'Mu kanama k'Uburenganzira bwa Muntu ka UN, Minisitiri w'Ububanyi n'amahanga yavuze ko u Rwanda rutazabyihanganira. Yavuze ko RDC iri kurasa Minembwe, avuga ahantu hatatu Kinshasa bari kwica Abatutsi, Minembwe bari kurasa imisozi kuko ari Abatutsi, CODECO umutwe avuga ko ufatanya na Leta ya Congo uri kwica Abahima muri Ituri.”

Yakomeje agira ati 'Hanyuma ashyiraho na Bujumbura ko Abatutsi bari gufatwa bagashyirwa ahantu hamwe, bamwe bakicwa abandi bagafatwa mu buryo butaboneye, ngo u Rwanda ntiruzabirebera. Yasabye ako kanama ko impuguke kohereje zazakora raporo ifatika kuri ibyo bintu biriyo. Leta ya Congo ikomeje imvugo z'urwango zirimo ubugome kandi zihembera ubwicanyi mu baturage, Leta y'u Rwanda rero ntizabirebera. Iyo avuze ko itazabirebera hari icyo uba utumva?'

Mu butumwa yashyize ku rubuga rwa X asubiza ibyari byatangajwe n'umunyamakuru wa Radio ya SK FM kuri urwo rubuga, Minisitiri Nduhungirehe Olivier yavuze ko abo banyamakuru babeshya.

Yagize ati 'Aba banyamakuru nka Hakuzwumuremyi, bavuga ibyo bishakiye, babeshyera abayobozi b'u Rwanda ngo batangaje intambara, bakabikora kubera ko bashaka “gutwika” cyangwa se bashaka kurebwa, bagomba kubiryozwa.'

Yakomeje ashimangira ko ibihe u Rwanda rurimo bitagomba gukinishwa. Ati 'Ibi bihe turimo ntabwo ari ibyo gukinisha imvugo nk'izi.'

Uretse Minisitiri Nduhungirehe, n'abandi bakoresha imbuga nkoranyambaga bagaragaje ko izo mvugo zidakwiye kandi ko abo banyamakuru bakwiye gukeburwa.

Uyu munyamakuru Hakuzwumuremyi, akimara kubona ubutumwa bwa Minisitiri Nduhungirehe, yahise agaragaza ko yumvise inama yagiriwe.

Ati “Ni byo cyane Honorable, inama yanyu nayumvise! Amagambo amwe n'amwe muri politiki ni ayo kwitondera atari n'abanyamakuru gusa kandi ni byiza kudukebura! Gusa uwakase aka ka video yakase gatoya akeneye muri gahunda ze bwite, nemeza ko kadatanga ishusho yose y'ikiganiro! Ndabashimiye cyane.”

Aba banyamakuru nka @HAKUZWUMUREMYI bavuga ibyo bishakiye, babeshyera abayobozi b’u Rwanda ngo bakoze declaration y’intambara, bakabikora kubera ko bashaka “gutwika” cyangwa se bashaka views, should be held accountable. Ibi bihe turimo ntabwo ari ibyo gukinisha imvugo nk’izi.

— Olivier J.P. Nduhungirehe (@onduhungirehe) February 28, 2025

---

Source : http://igihe.com/amakuru/u-rwanda/article/minisitiri-nduhungirehe-yihanangirije-abanyamakuru-bakoresha-imvugo-zo-gutwika

Ku wa 27 Gashyantare 2025, Gene Hackman w'imyaka 95, hamwe n'umugore we Betsy Arakawa w'imyaka 63, basanzwe bapfuye mu rugo rwabo ruherereye i Santa Fe, muri Leta ya New Mexico. Umwe mu mbwa zabo na yo yasanzwe yapfuye, mu gihe indi yari ikiri muzima. Ibi byabaye nyuma y'uko inshuti n'abavandimwe batari babona cyangwa bumva aba bombi mu gihe cy'ibyumweru bibiri, bikaba byaratumye basaba abashinzwe umutekano gukora igenzura.

Iperereza ry'Urupfu

Sherifu wa Santa Fe yatangaje ko urupfu rwa Hackman n'umugore we rufitanye isano n'ibintu bidasobanutse, kandi ko raporo y'ibizamini bya muganga izaba ingenzi mu gusobanura icyateye uru rupfu. Nubwo nta bimenyetso byerekana ko habayeho icyaha, hari ibintu byagaragaye bitera urujijo. Urugi rw'inzu rwari rufunguye, hari ibinini byari byasandaye hafi y'imirambo, kandi nta bimenyetso byerekana ko habayeho uburozi bwa monoxyde de carbone cyangwa izindi mpanuka zituruka ku miyoboro y'amashanyarazi cyangwa y'amazi.

Amateka ya Gene Hackman

Gene Hackman yari umwe mu bakinnyi ba filime b'inararibonye kandi bubashywe muri Hollywood. Yamenyekanye cyane mu myaka irenga 40 ishize, akinira muri filime nyinshi zakunzwe nka 'The French Connection', 'Unforgiven', 'Bonnie and Clyde', n'izindi. Yatwaye ibihembo bibiri bya Oscar, bibiri bya BAFTA, ndetse na bine bya Golden Globe. Yashakanye na Betsy Arakawa mu 1991, bakaba bari bamaze imyaka irenga 30 babana.

Amafoto

 

Icyifuzo Abakunzi ba sinema n'abakunzi ba Gene Hackman barasabwa kwibuka ibikorwa bye by'indashyikirwa mu ruganda rwa sinema, ndetse no gusengera umuryango we muri ibi bihe by'akababaro.

Urupfu rwa Gene Hackman n'umugore we Betsy Arakawa ni igihombo gikomeye ku ruganda rwa sinema no ku bakunzi babo. Iperereza rirakomeje kugira ngo hamenyekane icyateye uru rupfu, kandi raporo y'ibizamini bya muganga izatanga amakuru arambuye mu minsi iri imbere.

Source : https://kasukumedia.com/icyamamare-muri-sinema-gene-hackman-numugore-we-basanzwe-bapfuye-mu-rugo-rwabo/

Mukandayisenga Jeannine, uzwi nka Kaboy, yakuwe mu mwiherero w'Ikipe y'Igihugu y'u Rwanda y'abagore, bivugwa ko ari kubera uburwayi bw'ibicurane. Ikipe yiteguraga imikino yo gushaka itike y'Igikombe cya Afurika, ariko Kaboy yamenyeshejwe ko atakomeza kubera uburwayi. Nyamara, hari andi makuru yavugaga ko yakuwe mu mwiherero kubera ko yapimwe bagasanga afite imisemburo myinshi ya kigabo (Testosterone), bitamwemerera gukina.

Mu kiganiro yagiranye na Bagirishya Jean de Dieu (Jado Castar) kuri B&B Kigali FM, Kaboy yavuze ko nta kuri kuri ibyo bivugwa. Yemeje ko nta muntu wigeze amupima ngo asangwemo iyo misemburo myinshi. Yavuze kandi ko mbere yo kwirukanwa, muganga w'ikipe yamubwiye ko yamaze gukira ibicurane, bityo akibaza impamvu nyayo yatumye asezererwa.

Kaboy yavuze ko asezerewe atigeze asobanurirwa neza impamvu. Yumvise ko ari urwitwazo rw'abashatse kumukuramo ku bushake, kuko batigeze bamuha ibisobanuro bifatika. Yemeje ko nubwo ibyo byamubayeho, adahangayitse, ariko anibaza uko bishobora kumugiraho ingaruka ku kazi ke ko gukinira Yanga Princess muri Tanzania.

Nyuma yo gukuramo Kaboy, ikipe y'u Rwanda yakinnye na Misiri mu mikino ibiri. Umukino wa mbere wabereye mu Rwanda, warangiye u Rwanda rutsinzwe igitego 1-0. Umukino wa kabiri wabereye muri Misiri urangira ari ibitego 2-2. Ibyo byatumye u Rwanda rusezererwa, rutabonye itike y'Igikombe cya Afurika.

Source : https://yegob.rw/rutahizamu-wikipe-yigihugu-amavubi-yabagore-kaboy-yashyize-ukuri-hanze-ku-cyatumye-akurwa-mu-mwiherero-wikipe-yigihugu-hakabeshya-ko-ari-uburwayi/

Ni mafoto yafashwe n'ibitangazamakuru bitandukanye birimo ESPN, agaragaza imbere mu kibuga cya Manchester United mbere y'uko umukino batsinzemo Ipswich Town ibitego 3-2 utangira.

Si ubwa mbere imbeba zigaragaye muri iyi stade mu bihe bya vubaha, dore ko abakunzi bayo bahora binubira ko iyi stade y'amateka ishaje, itajyanye n'igihe, ndetse yangiritse ahantu hatandukanye dore ko hari igihe imvura ijya igwa igisenge cya stade cyikava.

Source : https://yegob.rw/muri-stade-ya-manchester-united-hongeye-kugaragara-imbeba-amafoto/

 

Mu kwezi kwa Mata umwaka ushize, Banki ya Citigroup yakoze ikosa rikomeye ubwo yoherezaga amafaranga angana na $81 triliyoni kuri konti y'umukiriya aho kuba $280. Iki kibazo cyagaragaje imbogamizi ziri mu mikorere ya banki ndetse n'uburyo bwo kugenzura amakosa mu bikorwa by'imari.

Ibyabaye

Nk'uko byatangajwe na Financial Times, muri Mata 2024, umukozi wa Citigroup yohereje amafaranga angana na $81 triliyoni kuri konti y'umukiriya aho kuba $280. Iri kosa ryabanje kuburirwa na babiri mu bakozi bashinzwe kugenzura, ariko nyuma y'amasaha abiri, umukozi wa gatatu yararibonye maze amafaranga asubizwa kuri konti ya banki. Nta mafaranga yigeze ava muri banki, kandi iki kibazo cyamenyeshejwe Ikigo gishinzwe kugenzura banki muri Amerika (OCC) ndetse na Banki Nkuru ya Amerika (Federal Reserve).

Ingaruka n'Icyo Bivuze ku Mikorere ya Banki

N'ubwo nta ngaruka zigaragara zageze ku mukiriya cyangwa kuri banki, iki kibazo cyagaragaje imbogamizi zikomeye mu mikorere ya Citigroup. Nk'uko byatangajwe na Business Insider, iki kibazo cyerekanye ko hari ibibazo mu buryo bwo kugenzura amakosa ndetse no mu mikorere y'ikoranabuhanga rya banki. Jane Fraser, umuyobozi mukuru wa Citigroup kuva muri Werurwe 2021, ari gukora ibishoboka byose ngo akemure ibi bibazo binyuze mu mushinga wa 'Transformation' ugamije kunoza uburyo bwo kugenzura ingaruka no guhaza ibisabwa n'inzego zigenzura.

Iki si cyo kibazo cya mbere cya tekiniki kibaye muri Citigroup. Mu mwaka wa 2020, banki yohereje amafaranga angana na miliyari $900 ku bakiriya bayo mu buryo bw'ikosa, nk'uko byatangajwe na New York Post. Ibi byerekana ko hari ibibazo by'imikorere bikomeje kugaragara muri iyi banki, n'ubwo hashyizweho ingamba zo kubikemura

Iri kosa rya Citigroup ryo kohereza $81 triliyoni ku mukiriya aho kuba $280 ryerekanye ko hakiri ibibazo mu mikorere no mu buryo bwo kugenzura amakosa muri banki. N'ubwo nta ngaruka zigaragara zageze ku mukiriya cyangwa kuri banki, iki kibazo cyerekanye ko hakenewe ingamba zikomeye zo kunoza imikorere no gukoresha ikoranabuhanga rigezweho mu rwego rwo kwirinda amakosa nk'aya mu bihe bizaza.

Amafoto

Reba video ikurikira kugira ngo umenye byinshi kuri iki kibazo cya Citibank:

Source : https://kasukumedia.com/citibank-yibeshye-yohereza-81-triliyoni-ku-mukiriya/