Category: Uncategorized

Ibi Minisitiri Dr. Nsanzimana yabitangarije mu nama y'Urugaga rwa Afurika rushinzwe kurwanya Kanseri y'Ibere, yabereye i Kigali ku wa 4 Werurwe 2025, ubwo yagarukaga ku ngamba u Rwanda rwashyizeho mu guhangana na Kanseri n'izindi ndwara zitandura.

Yavuze ko mu ngamba zafashwe na Leta y'u Rwanda harimo ko serivisi zose zo gusuzuma no kuvura kanseri ubu zisigaye ziboneka ku Bwisungane mu Kwivuza (Mutuelle de santé).

Yagize ati “Nk'urwego rw'ubuzima, mu minsi ishize twarishimye ubwo Inama y'Abaminisitiri yemeza ko gusuzuma no kuvura kanseri, bizajya byishyurwa 100% n'Ubwisungane mu Kwivuza, bisobanuye byinshi ku baturage bacu, kuko kuvura kanseri birahenze, by'umwihariko abakennye, ariko Guverinoma yanzuye ko kuko bihenze, reka tube ari twe twikorera uwo mutwaro uremereye nka guverinoma, Kugira ngo abaturage bakomeze bite ku bindi bya buri munsi bibareba nk'imiryango.”

Yavuze ko kugira ngo ibyo bigerweho bisaba ubufatanye bw'inzego zose atari Guverinoma gusa.

Ati “Ubu bwisungane mu kwivuza ntabwo ari inshingano za Guverinoma gusa, ni inshingano duhuriyeho twese, ni muri urwo rwego inzego zitandukanye zasabwe gutangamo inkunga, harimo urwego rw'amabanki, nka rumwe mu nzego zikize, ku nshuro ya mbere rwatangiye gushyira amafaranga mu gushyigikira ubwisungane mu kwivuza,”

Yakomeje avuga ko “Ku batwara muri Kigali mwabonye izi camera nziza zo ku muhanda, iyo urengeje umuvuduko zirakwandikira, hanyuma amafaranga wishyuye, igice cyayo kinini kijya muri Mutuelle de santé. Ntabwo dushishikariza abantu kurenza umuvuduko kuko na byo byateza ibindi bibazo, ariko iyo urengeje umuvuduko [bakakwandikira] hari umusanzu uba utanze ku nyungu rusange.”

Nubwo amafaranga atangwa n'abandikiwe n'izo camera zo ku muhanda agira uruhare mu gushyikira ubwisungane mu kwivuza, Polisi y'u Rwanda itangaza ko zitagamije guhana abantu no kuba isoko y'amafaranga, ahubwo ari izigamije kubungabunga umutekano w'abakoresha umuhanda.

Inama y'Abaminisitiri yateranye ku wa 17 Mutarama 2025, ni yo yemeje ingamba zo mu rwego rw'ubuzima zirimo kongera serivisi z'ubuvuzi zishingirwa n'ubwisungane mu kwivuza, mu guteza imbere ubuzima bw'Abanyarwanda.

Ubwishingizi bwa Mituelle busanzwe bukoreshwa n'Abanyarwanda bagera kuri 92% bwongerewemo serivisi 14 nshya z'ubuvuzi.

Muri zo harimo ubuvuzi bwa kanseri, umutima, kuyungurura amaraso no gusimbuza impyiko, kubaga bigezweho hakoreshejwe ikoranabuhanga nko kubaga umutwe w'igufa ryo mu kuguru, mu ivi, urutirigongo n'ahandi, ndetse n'ibijyanye n'insimburangingo n'inyunganirangingo.

Mutuelle kandi yongereweho imiti ya kanseri yagoraga abakoresha ubwo bwishingizi kuyibona, guhabwa ibigize amaraso nk'udufashi (plaquettes) insoro zitukura (globules rouges) n'umushongi (plasma), ibijyanye n'inyunganiramirire n'indi miti itabaga kuri Mutuelle.

Minisitiri Dr. Nsanzimana yasobanuye ko hari igice kinini cy’amafaranga atangwa n’abandikirwa na camera zo ku muhanda gishyirwa muri Mutuelle

Ni mu gihe hari abaturage bakigaragara mu mihanda n'ahandi hahurira abantu benshi basabiriza, abandi bagakora uburaya kugira ngo babone ikibatunga.

Abagore bayobotse akazi ko kurimbisha ibikoresho bikorerwa mu gakiriro banenga umuco wo gusabiriza no gusambanira amafaranga, bagasaba abagore n'abakobwa bakibikora kubihagarika bagashaka indi mirimo bakora itabatesha agaciro.

Iyamurera Noella umaze imyaka itatu akorera mu gakiriro ka Nyamasheke akazi ko gusena no gusiga amarangi na verine ibikoresho bikorerwa muri aka gakiriro, yabwiye IGIHE ko mu myaka itatu amaze akora aka kazi amaze kwizigama ibihumbi 250Frw.

Ati “Nagiye nyakorera nkayatanga mu ishyirahamwe hano hepfo mu isoko, twagabana nkayajyana muri SACCO. Nyafitiye umushinga. Namara kugwira akaba nka miliyoni 1 Frw, nzashinga butike”.

Iyamurera avuga ko amafaranga akorera amurinda ibishuko no kujya kwiba.

Ati “Hari bagenzi banjye, niba ari ubunebwe simbizi, usanga kubera gukwepa imirimo bajya kwiba cyangwa gusambanira amafaranga”.

Mu gakiriro ka Nyamasheke, gusena no gusiga verine urugi ni amafaranga ari hagati 1000Frw na 2500Frw bitewe n'ubwoko bw'urugi. Ameza manini kuyasena no kuyasiga verini ni 4000Frw.

Yambabariye Fortunee, umubyeyi w'abana batatu, umaze imyaka itandatu muri aka kazi avuga ko iyo byagenze neza ku munsi ashobora gukorera 5000Frw cyangwa 6000Frw.

Ati “Niba nakoreye nka 5000Frw nizigama 3000Frw mu kimina nkarya 2000Frw. Twazagabana nkagura itungo nkabasha kwiteza imbere. Aka kazi katurinda gusabiriza no kuba indaya. Ku giti cyanjye aka kazi kamfasha kwishyura amafaranga y'ishuri ry'abana nkanabatangira ayo kurya ku ishuri”.

Umuyobozi w'agateganyo w'Agakiriro ka Nyamasheke, Ntigurirwa Léopold, yabwiye IGIHE ko muri aka gakiriro hakoreramo abantu barenga 80 barimo abagore 15 bakora akazi ko kurimbisha ibikoresho baba bakoze.

Ntigurirwa avuga ko akazi ko kurimbisha ibikoresho bihabarizwa abagore babikora neza kimwe n'uko abagabo babikora.

Ati “Dufite abafundi bateranya noneho ba bagore bakaza banogereza bakoresheje umuseno, banadufasha gusiga ibyakozwe. Harimo abagore bamaze kubimenya ku buryo aho yasennye akanahasiga utahatandukanya n'aho umugabo yakoze”.

Umuyobozi w'Akarere ka Nyamasheke wungirije ushinzwe imibereho myiza y'abaturage, Mukankusi Athanasie, yavuze ko abari n'abategarugori nk'uko bahawe ijambo badakwiye kwiheza mu mirimo basaza babo bakora.

Ati “Imirimo y'amaboko itanga imibereho ku bagore n'abakobwa kimwe n'uko abasore n'abagabo bakora iyo mirimo ikabatunga. Abakobwa n'abagore nabo tubashishikariza gukora imirimo yose nta n'umwe basuzuguye kuko umurimo niyo waba muto waguha imibereho aho kugira ngo wisange waguye mu ngeso zitari nziza cyangwa wisange hari umuntu uri kugushukisha ya mafaranga yakoreye muri ya mirimo iciriritse”.

Gusena no kurimbisha intebe n'inzugi n’ibitanda ni imirimo itavugwa yakungahaje abagore b'i Nyamasheke

Urugi rwa make kurusena no kurusiga verini ni 1000Frw

Yambariye, akazi ko gusena no gusiga irangi na verine ibikoresho byo mu mbaho kamurinze igisuzuguriro

Umuyobozi w’Agakiriro ka Nyamasheke avuga ko aba bagore bashoboye

Ikinyamakuru Forbes Magazine cyandika ibyerekeranye n'ubukungu bw’ibyamamare cyashyize hanze urutonde rw'abakinnyi 20 ba filime bahembwe amafaranga menshi mu mwaka ushize wa 2024, barimo abazwi cyane nka The Rock, Will Smith, Ryan Reynolds hamwe n’abandi.

Uru rutonde rwakozwe hagendewe ku bakinnyi ba filime bishyurwa menshi n’urubuga rwa Netflix kuko ari nayo ikomeje kwigaragaza mu ruhando rwa Sinema. Uru rubuga nta myaka myinshi rumaze rukora ariko rurayoboye, ndetse benshi bari kuri uru rutonde bagiye bahabwa na Netflix amafaranga yaturutse muri filime bakinnye.

Mu gukora uru rutonde, habazwe amafaranga binjije ariko havuyemo ayagiye yishyurwa mu misoro itandukanye.

Dwayne Johnson uzwi nka The Rock uri ku mwanya wa mbere (uyu ni umwaka wa gatatu ari ku mwanya wa mbere), yinjije Miliyoni 88 z'amadolari.

Dore urutonde rw'abakinnyi 20 bahembwe amafaranga menshi mu 2024:

1. Dwayne Johnson — Miliyoni 88$

Dwayne Johnson wamamaye nka 'The Rock', yongeye kuza ku mwanya wa mbere nyuma yo kubona igihembo kinini kurusha ibindi mu mateka ya filime zitambuka kuri televiziyo abikesha filime yitwa ‘Red One’ yamuhesheje miliyoni 50$, ariko ibyo ntiyari bihagije. Yongeyeho amafaranga yakuye muri ‘Moana 2’, aho yabaye umuyobozi wungirije w'iyo filime, bikazamura umusaruro we wose w’umwaka wa 2024 biwugeza kuri miliyoni 88$.

2. Ryan Reynolds — Miliyoni 85$

Ryan Reynolds yagaragaye mu gice gishya cya ‘Deadpool & Wolverine,’ filime yinjije arenga miliyari 1.3$ ku isi hose. Si ibyo gusa kuko yagaragaye no muri ‘IF’ ndetse n’izindi zihenze zamuhesheje kwinjiza akayabo mu 2024.

3. Kevin Hart — Miliyoni 81$

Kevin Hart yihariye umwaka wa 2024 akora filime nyinshi, ibiganiro bitandukanye, ndetse n'ibitaramo by'urwenya byitabiriwe ku bwinshi. Yagaragaye muri Borderlands, Lift, Die Hart 2: Die Harter n'indi mishinga nka Fight Night kuri Peacock. Uyu mukinnyi w'imyaka 45 yinjije amafaranga menshi mu bucuruzi bw'imyidagaduro, bituma aza mu bakinnyi ba filime bahembwe cyane uwo mwaka.

4. Jerry Seinfeld — Miliyoni 60$

Jerry Seinfeld, nubwo yamenyekanye cyane kuri televiziyo, aza no ku rutonde rw’abinjiza amafaranga atubutse muri Sinema. Mu mwaka wa 2024, yashyize hanze filime ‘Unfrosted’ yanditse akanayiyobora. Ku yo yinjije, hiyongereyeho n’amafaranga ahoraho yinjiza kuri filime ye y'ibihe byose, ‘Seinfeld.’

5. Hugh Jackman — Miliyoni 50$

Hugh Jackman yongeye kugaragara nka Wolverine muri ‘Deadpool & Wolverine,’ nyuma y'uko yari yasezeye kuri uwo mwanya mu 2017. Ubucuti bwe na Ryan Reynolds bwatumye asubira muri iyo filime, ibintu byamuhesheje umushahara munini kurusha izindi filime yakinnye mbere.

6. Brad Pitt — Mliyoni 32$

Brad Pitt yakinnye muri ‘Wolfs,’ filime yaguzwe na Apple TV+ mbere yo kujya mu mazu ya Sinema. Uyu mukinnyi kandi afite kompanyi itunganya filime, Plan B, ikomeje gutanga filime zikunzwe n'abatari bacye ku Isi.

7. George Clooney — Miliyoni 31$

George Clooney wakoranye na Brad Pitt muri Wolfs, bivugwa ko bombi bahembwe miliyoni $35 kuri iyo filime. Nubwo yagiye avuga ko ayo mafaranga atari yo nyayo, ariko iri mu zazamuye amafaranga yinjije mu mwaka ushize.

8. Nicole Kidman — Miliyoni 31$

Nicole Kidman yongeye kuba umwe mu bagore bahembwa amafaranga menshi muri Sinema, cyane cyane binyuze mu mafilime atambuka kuri televiziyo n’ahandi herekanirwa filime. Yakinnye muri The Perfect Couple, Lioness, ndetse na Expats, byose bikaba byarazamuye umushahara we mu 2024.

9. Adam Sandler — Miliyoni 26$

Adam Sandler afitanye amasezerano akomeye na Netflix, imwishyura amafaranga menshi buri mwaka. Yagaragaye muri ‘Spaceman,’ bituma akomeza kwinjiza amafaranga aza yiyongera ku aturuka muri filime ze zo hambere nka ‘Happy Gilmore’ n’izindi.

10. Will Smith — Miliyoni 26$

Nyuma y'imyaka ibiri atavugwa cyane, Will Smith yagarutse muri Sinema akina muri ‘Bad Boys: Ride or Die,’ filime yinjije miliyoni 400$ ku isi hose, ibyamufashije kwinjiza agatubutse mu 2024.

11. Mariska Hargitay — Miliyoni 25$

Mariska Hargitay ni umwe mu bakinnyi ba filime zitambuka kuri televiziyo bahembwa amafaranga menshi. Akina muri filime y’uruhererekane yitwa ‘Law & Order: SVU,’ aho yinjije hafi miliyoni 25$ mu 2024.

12. Channing Tatum — Miliyoni 24$

Nubwo ‘Fly Me To The Moon,’ filime yakinnyemo ititwaye neza, Channing Tatum yakomeje kwinjiza amafaranga menshi kubera amasezerano akomeye afite n’inzu zisakaza amashusho.

13. Jason Statham — Miliyoni 24$

Jason Statham uzwi cyane mu gukina filime z’uruherekane nka ‘The Transporter na Fast & Furious,’ yakinnye muri The Beekeeper, filime yitwaye neza ikamuhesha kwinjiza agatubutse mu mwaka ushize.

14. Mark Wahlberg — Miliyoni 23$

Mark Wahlberg w’imyaka 53 yakomeje kugaragara muri filime zitandukanye, harimo ‘The Union’ itambuka kuri Netflix n’indi mishinga ye ku giti cye irimo nka ‘Arthur The King,’ igaruka ku nkuru y'umukino w'amarushanwa.

15. Matt Damon — Miliyoni 23$

Ubufatanye bwa Matt Damon na Ben Affleck bwatumye filime zabo zikomeza kwinjiza amafaranga menshi mu 2024. Iyitwa ‘The Instigators,’ yakinnyemo, yaguzwe na Apple TV+ ku giciro cyo hejuru bimuhesha kuza mu bakinnyi ba filime binjije agatubutse.

16. John Cena — Miliyoni 23$

Umwaka ushize John Cena yakomeje gukina muri filime nyinshi nka ‘Argylle’ yatambutse kuri Apple, ‘Ricky Stanicky’ yatambutse kuri Hulu na ‘Jackpot!’ yanyuze kuri Amazon.

17. Denzel Washington — Miliyoni 23$

Denzel Washington yakinnye muri Gladiator II, filime yari yitezweho kwinjiza menshi, nubwo itamuhesheje igihembo cya Oscar yari ategerejweho. Gusa, ibi ntibyatumye atinjiza amafaranga menshi kuko ni umukinnyi w’icyamamare wagiye agaragara no mu zindi filime zikomeye.

18. Jake Gyllenhaal — Miliyoni 22$

Jake Gyllenhaal yakinnye muri ‘Road House,’ filime byarangiye igurishijwe kuri Amazon aho gukinwa bisanzwe muri sinema. Ibi byatumye ahembwa amafaranga menshi mu 2024.

19. Scarlett Johansson — Miliyoni 21$

Scarlett Johansson yakinnye muri ‘Fly Me To The Moon,’ ‘Transformers One,’ n’izindi, aho yakuye amafaranga menshi abarirwa muri miliyoni 21 z’amadolari. 

20. Joaquin Phoenix — Miliyoni 19$

Nubwo filime ‘Joker: Folie à Deux’ ititwaye neza ku isoko, Joaquin Phoenix yahawe igihembo gikomeye kubera igikundiro cye mu ruhando rwa Sinema.

Aba nibo bakinnyi 20 ba filime bahembwe amafaranga menshi ku Isi umuntu atatinyuka kuvuga ko bayayoresha igitiyo dore ko aya mafaranga uyashyize mu manyarwanda ahita aba menshi kurushaho. 

Aya mafaranga ariko si ayo binjije kuri filime imwe gusa ahubwo ni ayo binjize mu ma filime bamaze gukina ari ku rubuga rwa Netflix, yaba ari ayo uru rubuga rwashoyemo amafaranga mu ikorwa ryayo cyangwa ayo yaguze amaze gukinnywa ikabona kuyacuruza.

 

Kuri uyu wa Gatatu itariki 5 Werurwe 2025 ikipe ya APR FC yakiriye Gasogi United mu mukino wo wishyura muri ¼ mu gikombe cy'Amahoro.

UKO UMUKINO URI KUGENDA UMUNOTA KU MUNOTA

UMUKINO URATANGIYE

Abakinnyi babanje mu kibuga ku ruhande rwa Gasogi United ni Dauda Ibrahima Bareli, Muderi Akbar, Iradukunda Axel, Hakizimana Adolphe, Nduwayo Alex, Udahemuka Jean De Dieu, Mugisha Josepf Rama, Mbaye Alioune, Kokoete Udo Ibiok, Hamis Hakim na Ngono Guy Herve.

Abakinnyi babanje mu kibuga ku ruhande rwa APR FC ni Ishimwe Pierre, Niyigena Clement, Niyomugasbo Claude, Nshimiyimana Yunusu, Nshimirimana Ismael, Byiringiro Gilbert, Niyibizi Ramadhan, Ruboneka Bosco, Denis Omedi, Hakim Kiwanuka na Cheik Djibril Ouattra.

Ni umukino ikipe ya APR FC ifata nk'uwo kwihorera kuko mu mwaka w'imikino ushyize ubwo yasezererwaga muri Kimwe cya kane muri iri rushanwa, yavanywemo na Gasogi United.

Kuri uyu wa Gatatu APR FC yaje nta gahunda yo kongera gukora ikosa kuko idashaka gusezererwa na Gasogi United inshuro ebyiri zikurikiranya.

Ku wa Kane w'icyumweru gishyize nibwo Gasogi United yari yakiriye APR FC mu mukino ubanza wa ¼ mu gikombe cy'Amahoro aho uwo mukino warangiye ku munota wa mbere kuko igitego Niyibizi Ramadhan yatsinze aricyo cyatandukanyije impande zombi.

Kuri uyu wa Gatatu ikipe ya APR FC niyo ifite amahirwe menshi yo kurenga kimwe cya kane ikagera muri ½, kuko umukino ubanza yawutsinze ndetse ikanacyura igitego cy'impamba yo hanze yatsindiye kwa Gasogi United.

Kugira ngo Gasogi United ibashe gusubira mu byo yakoze mu mwaka w'imikino ushyize igasezerera APR FC, birayisaba gusoza umukino itsinze ibitego bibiri ku busa bwa APR FC.

Intsinzi yose Gasogi United iragira ariko irengeje igitego kimwe irayifasha kugera muri kimwe cya kabiri. Mu gihe umukino Gasogi United ifite igitego kimwe ku busa bwa APR FC byasaba kwiyambaza za Penaliti.

Ikipe iza kurokoka hagati ya APR FC na Gasogi United izacakirana na Polkice FC muri kimwe cya kabiri. Ikipe ya Police yahageze nyuma yo gusezerera AS Kigali ku giteranyo cy’ibitego 4-3.

Abakinnyi ba Gasogi United bari kwishyushya mbere y’uko umukino utangira

Abakinnyi ba APR FC bari kwishyushya mbere y’uko umukino utangira

APR FC yakiriye Gasogi United mu mukino wo kwishyura muri kimwe cya kane mu gikombe cy’Amahoro

AGPF yasuye uturere 15 tw'igihugu turimo 11 twegereye imipaka u Rwanda rugabaniraho n'ibindi bihugu.

Senateri Prof. Dusingizemungu Jean Pierre,akaba na Perezida w'Ihuriro ry'Abagize Inteko Ishinga Amategeko rikumira Jenoside, Ipfobya n'Ihakana rya Jenoside yakorewe Abatutsi (AGPF), ubwo yari mu nama nyunguranabitekerezo yateguwe n'Inteko Ishinga Amategeko ku miterere y'ingengabitekerezo ya Jenoside mu karere u Rwanda ruherereyemo, ingaruka zayo n'ingamba zo kuyirwanya, yatangaje ko ibikorwa byo guhohotera abarokotse Jenoside yakorewe Abatutsi byagaragaye cyane muri Kanama kugeza mu Ukuboza 2024 byari bifitanye isano n'ingengabitekerezo ya Jenoside.

Yagaragaje ko basanze ingengabitekerezo ya Jenoside itagaragara ku bantu benshi, hari ibimenyetso 16 basanze bigaragaza ko iki gitotsi hari aho kikigaragara.

Ati 'Ibimenyetso twabonye 16 biraduha gutekereza ko bifitanye isano n'ingengabitekerezo ya Jenoside, 12 byagaragaye ku barengeje imyaka 30, bibiri bigaragara ku basore n'inkumi noneho bitatu bigaragara ku bana bari hagati y'imyaka 12 na 16.'

AGPF yasanze mu turere twegereye imipaka ari ho higanje ibikorwa bigaragaramo ingengabitekerezo ya Jenoside ndetse hari n'abaturage usanga bakorana n'imitwe yayishyize imbere ikorera mu Burasirazuba bwa RDC nka FDLR.

Prof. Dusingizemungu ati 'Hari ikindi twabonye cyane cyane ku mupaka usanga hari abagore bambuka umupaka bakajya gukora icyo badusobanuriye bise 'kwiteza agashinge', ubwo bikaba ari ukujya kwiteza inda mu bantu bo muri FDLR kugira ngo babone icyororo. Ngira ngo ubyumva yakumva icyo bishatse kuvuga.'

Utu turere twegereye imipaka kandi bagaragaje ko turimo abaturage bashobora kuyobywa n'ibiganiro bya by'abantu bakwirakwiza ingengabitekerezo ya Jenoside babinyujije ku mbuga nkoranyambaga.

Ati 'Hari n'uturere twavuzwemo abadukomokamo cyangwa abakomoka hafi yatwo bakora ibikorwa byo gushaka kwigarurira urubyiruko barushora mu macakubiri n'ingengabitekerezo ya Jenoside.'

Yongeyeho ati 'Hari abaturage batuye mu Rwanda bigaragara ko bakivugana n'abari muri FDLR cyangwa abandi barwanya ubuyobozi bw'u Rwanda bakomeje kubacengezamo ingengabitekerezo ya Jenoside.'

Yatanze urugero rwo mu murenge wa Bwisige mu Karere ka Gicumbi, aho abaturage bagaragaje ko hari abantu bakiyoba kubera ibiganiro bya Gen. Habyarimana Emmanuel ukomoka muri ako gace, muri Nyamasheke hakaba abumva Padiri Nahimana na Padiri Rudakemwa Fotunatus bakomoka mu karere ka Rusizi gaturanye na Nyamasheke.

I Ngororero kandi hakomoka abantu benshi bari mu mutwe wa FDLR ku buryo ingengabitekerezo yabo bayigeza no ku batuye muri ako karere.

Mu karere ka Gisagara hari urubyiruko ruhabwa Sim Card zo mu bindi bihugu zitababaruyeho kugira ngo ubutumwa burimo ingengabitekerezo batanga 'babikore bumva ko bikingiye ko batazagerwaho n'ubutabera.”

Muri Nyaruguru hagaragaye umwana w'imyaka 12 wafataga abana bagenzi be akareba mu biganza byabo ababwira ko ari kubarebera niba ari Abatutsi cyangwa Abahutu, ndetse ngo umwarimu yamuhaye ikiganza ngo amurebere ahita yiyamira ngo 'wowe uri mwene wacu ntacyo tuzagutwara.'

Hari kandi umusore w'imyaka 26 wariye inzoka ku manywa y'ihangu avuga ko ngo ayiriye 'nk'uko bazarya Abatutsi.'

Mu Karere ka Nyamagabe kandi basanze hari ahantu hari imibiri y'abishwe muri Jenoside yakorewe Abatutsi bakahubaka inzu, ndetse hari umusaza wamaze imyaka 30 mu nzu adasohoka kubera uruhare yagize muri Jenoside yakorewe Abatutsi.

Prof. Dusingizemungu ati 'Hari abayobozi iyo bumvise amakuru arebana n'ingengabitekerezo ya Jenoside bagerageza kunga abagaragaweho ibimenyetso n'abarokotse Jenoside, hamwe na hamwe usanga bashaka guhishira icyo cyaha kandi ari icyaha gihanwa n'amategeko.'

AGPF igaragaza ko umubare w'abantu basanganye ibimenyetso by'ingengabitekerezo ya Jenoside ari muto ariko nanone ugomba gufatirwa ingamba kugira ngo irandurwe.

Ati 'Ibyo twagiye tubona ni ibitotsi, ni ingaruka z'iyo mitwe ivugwa ishaka kuzana ibikorwa bya Jenoside bivuga ko tugomba kubikurikirana ariko ntabwo ari byinshi.'

Prof. Dusingizemungu yagaragaje ko abaturage benshi bagaragaje ko amahitamo bakora ashingira ku bikorwa byiza babona mu Rwanda aho gushingira ku macakubiri arangwa mu bihugu bituranye n'u Rwanda.

Inteko Ishinga Amategeko y’u Rwanda yagaragaje ko ingengabitekerezo ya Jenoside igomba guhagurukirwa

Yabigarutseho mu nama nyunguranabitekerezo yateguwe n'Inteko Ishinga Amategeko ku miterere y'ingengabitekerezo ya Jenoside mu karere, ingaruka zayo n'ingamba zo kuyirwanya, yabaye ku wa 5 Werurwe 2025.

Gen (Rtd) James Kabarebe yagaragaje ko intambara irwanirwa mu Burasirazuba bwa RDC irimo imitwe myinshi igizwe n'ingabo za FARDC, FDLR, SAMIRDC, by'umwihariko hakaba abacanshuro b'Abanyaburayi bahawe ikiraka nyamara bitemewe n'amategeko mpuzamahanga.

Ati 'Nta munsi n'umwe umuryango mpuzamahanga wigeze uvuga ku kibazo cy'abacanshuro muri RDC kandi ari ibintu bitemewe n'umuryango mpuzamahanga. […] ahubwo no kugira ngo bave i Goma bace mu Rwanda bataha na byo bari babirwanyije. Abazungu bari babirwanyije, hari za Ambasade rwose hano zahagurutse ziraduhagurukira ziravuga ziti 'muramenye bariya bantu batavanwa mu nkambi za Monusco ngo bace mu Rwanda bagenda'. Icyo bangaga ni iki? Bangaga kumwara. Bangaga ikimwaro no kubagaragaza.'

Gen (Rtd) Kabarebe yagaragaje ko ibyo bihugu byirinda guseba.

Ati 'Barabapfukiranye ntibigeze bashaka ko bamenyekana n'umunsi n'umwe. Ikindi bangaga kubona ku mupaka w'u Rwanda abasirikare bacu n'Abapolisi basaka uruhu rwera. Iyo abacanshuro baba Abirabura, baba barabemeye baranabavuze ariko kuko bari Abazungu barabahishiriye banga kubavuga n'umunsi n'umwe no kugeza n'uyu munsi ntacyo barigera babavugaho.'

Abacanshuro barenga 280 banyujijwe ku mupaka uhuza u Rwanda na RDC mu mpera za Mutarama 2025 nyuma y'uko bafatiwe ku rugamba n'umutwe wa M23.

Aba bacanshuro bo mu mutwe wa RALF wo muri Romania, bifatanyaga n'Ingabo za Repubulika Iharanira Demokarasi ya Congo mu kurwanya umutwe witwaje intwaro wa M23 kuva mu 2022.

Gen. (Rtd) Kabarebe yatangaje ko abazungu bari bafite ipfunwe ryo kwandagazwa n’inzego z’umutekano z’u Rwanda zibasaka

Ibi Minisitiri Biruta yabigarutseho ku wa 4 Werurwe 2025, ubwo habaga igikorwa cyo gusubiza mu buzima busanzwe abagore n'abakobwa 204 bamaze umwaka urenga bagororerwa mu Kigo Ngororamuco cya Gitagata, giherereye mu Karere ka Bugesera.

Ubwo Minisitiri Biruta yasozaga iyi gahunda yo kugorora aba bagore n'abakobwa 204 ku mugaragaro, yabibukije ko bari muri iki kigo kubera imyitwarire mibi, bityo babonye umwanya uhagije wo kwitekerezaho kugira ngo bafate umwanzuro ntakuka wo kuva mu bibi byose bahozemo.

Yagize ati 'Ibikorwa bibi byabarangaga mutaraza hano birashoboka ko mwabireka burundu mubifashijwemo n'aya mahugurwa mumazemo iminsi, ndahamya ko mufite ubumenyi n'ubushobozi by'ibanze byabafasha gutandukana n'imico mibi no gutangira ubuzima bushya.'

Abagorerwaga muri iki kigo bose uko ari 204 bigishijwe imyuga irimo guteka, ubudozi, gutunganya imisatsi n'ibindi bizabafasha kwiteza imbere n'imiryango yabo.

Umulisa Joseline uri mu basubijwe mu buzima busanzwe yabwiye IGIHE ko yakoreshaga ibiyobyabwenge ariko inyigisho n'inama yagiriwe bigiye kumufasha gukora neza umwuga wo guteka yigishijwe.

Ati 'Nageze hano narakoreshaga ibiyobyabwenge, nari umwari utarifatira umwanzuro, ntaritekerezaho, ariko nahawe inama n'ubukangurambaga butandukanye, nigishwa indangagaciro na kirazira z'umuco nyarwanda kuko nari narazitaye, mu by'ukuri nta mwari w'u Rwanda ukwiriye kwiyandarika.'

Umuyobozi Mukuru w'Ikigo Ngororamuco cya Gitagata, Bahame Hassan yasabye gufasha abasubiye mu buzima busanzwe.

Ati 'Icyo dusaba sosiyete ni ukudakomeza kubabona mu ndorerwamo bari babaziho ya kera, niba yari umujuru, indaya n'ibindi. Bamufate, bamwakire, bamwegere bamenye ko avuye mu mahugurwa, bamube hafi kuko nibatabikora azongera ahure na cya kibazo kuko abona ko sosoyete yamwanze.'

Imibare y'Ikigo cy'Igihugu gishinzwe Igororamuco, NRS igaragaza ko abarenga 7000 kuri ubu bari guhererwa amasomo ku bigo by'igororamuco birimo n'iki cya Gitagata.

Abayobozi basuye ibikorwa bitandukanye abagororwaga bigishijwe

Mu bagorowe harimo n’abagishijwe umwuga wo kudoda

Abagera kuri 204 ni bo basubijwe mu buzima busanzwe nyuma yo kumara umwaka urenga bagororwa

Minisitiri Dr. Vincent Biruta na Umulisa Joseline wahawe impamyabushobozi igaragaza ko yasoje amasomo yigishijwe yo guteka afite amanota meza

Umuyobozi Mukuru w’Ikigo cy'Igihugu gishinzwe Igororamuco, Mufulukye Fred yasabye abagororwaga kwitwara neza muri sosiyete bagiyemo

Umuyobozi Mukuru w'Ikigo Ngororamuco cya Gitagata, Bahame Hassan yasabye Abanyarwanda kwakira neza abamaze kugororwa

Umuyobozi mukuru w’Ikigo cy'Igihugu gishinzwe Igororamuco, Mufulukye Fred na Minisitiri Biruta bari bitabiriye igikorwa cyo gusubiza mu buzima busanzwe abagore n’abakobwa bagororerwaga i Gitagata

Abayobozi bo mu nzego zitandukanye n’abasubijwe mu buzima busanzwe

Hafashwe n’ifoto y’urwibutso