Category: Uncategorized

Guhera ku Bubiligi, Ubudage, Ubwongereza, Amerika, Ubufaransa, Canada, Ubumwe bw’Uburayi muri rusange n’ibindi bihugu bikomeje gufatira u Rwanda ibihano bitandukanye usanga hari n’ibindi bivuga ko bizabifata. Ikibabaje ariko ni ukubona hari bamwe mu banyarwanda bagaragaye mu bikorwa byo kwishimira ko igihugu cyabo cyafatiwe ibihano.

Hari amafoto twabashije kubona y’abishyize hamwe nabo baba bangamwabo bajya kwishimira ibihano u Rwanda rwafatiwe nyamara bibagiwe umugani w’ikinyarwanda uvuga ko amazi ashyuha ariko atibagirwa iwabo wa mbeho, nabo bibagiwe ko nta kindi gihugu cyabarutira u Rwanda bakomokamo.

Aha kandi buri wese yakwibaza niba bazatekereza kongera guhirahira bagaruka mu Rwanda cyangwa niba nanone nta miryango bafite ishobora kugirwaho n’ikibi cyose cyagera ku Rwanda nk’igihugu cyababyaye.

Uko biri kose ariko, u Rwanda rukomeje kwihagararaho ruvuga ko aho kwemera gukuraho ingamba zashyira mu kaga umutekano w’Abanyarwanda, rwakemera rugafatirwa ibihano birimo no gukurirwaho inkunga n’amahanga yarushyigikiraga mu burezi, ubuvuzi, igisirikare n’ibindi kuko ntacyaruta ubuzima bw’abaturage.

Ni amasezerano yo kwagura imikoranire yasinywe kuri uyu wa 13 Werurwe 2025 mu ruzinduko Gen Muganga we n'itsinda ayoboye bari kugirira muri Ethiopia.

Gen Muganga n'itsinda bari kumwe basuye icyicaro gikuru cy'Ingabo za Ethiopia ari na ho ayo maseserano yashyiriweho umukono.

Gen Muganga muri urwo ruzinduko muri Ethiopia yari kumwe na Ambasaderi w'u Rwanda muri icyo gihugu, Karamba Charles, Umuyobozi Mukuru muri Minisiteri y'Ingabo z'u Rwanda ushinzwe ubutwererane mpuzamahanga, Brig Gen Patrick Karuretwa hamwe n'abandi bayobozi bakuru bo muri Minisiteri y'Ingabo y'u Rwanda.

Umubano mu bya gisirikare w'u Rwanda na Ethiopia umaze imyaka irenga 20, aho byifatanya mu guhugura abasirikare. Kuri ubu ubwo bufatanye bwagukiye no muri Polisi z'ibihugu byombi.

Uretse ubufatanye bw'ingabo na polisi kandi, u Rwanda na Ethiopia bafitanye umubano ushingiye ku butwererane mu nzego zirimo ubuhinzi, ubucuruzi, uburezi n'izindi.

Mu myaka irindwi ishize kandi u Rwanda na Ethiopia byasinyanye amasezerano y'ubufatanye kuri serivisi z'ingendo zo mu kirere, bituma sosiyete z'ubwikorezi bwo mu kirere za RwandAir na Ethiopian Airlines bikorana nta nkomyi.

Umugaba Mukuru w'Ingabo z'u Rwanda, Gen Mubarakh Muganga (ibumoso) na Mugenzi we w’Ingabo za Ethiopia, Field Marshal Birhanu Jula

Umugaba Mukuru w'Ingabo z'u Rwanda, Gen Mubarakh Muganga n’itsinda ayoboye bari mu ruzinduko muri Ethiopia

Binyuze mu itangazo rigenewe abanyamakuru izi nzego z'umutekano zashyize hanze kuri uyu wa 13 Werurwe 2025 zatangaje ko Ingabo, Polisi n'izindi nzego bagiye kwifatanya n'abaturage mu bikorwa byo gufasha mu kuzamura imibereho myiza yabo n'iterambere.

Ibyo bikorwa bizakorerwa mu gihugu hose kuva ku itariki 17 Werurwe 2025 bikomeze mu gihe cy'amezi atatu.

Bifite insanganyamatsiko igira iti 'Ubufatanye bw'abaturage n'inzego z'umutekano mu kwizihiza Kwibohora 31 n'imyaka 25 y'imikoranire na Polisi y'u Rwanda'.

Ibyo bikorwa bizibanda mu byiciro bitandukanye bigamije guteza imbere imibereho myiza y'abaturage birimo iby'ubuvuzi, kubungabunga ibidukikije, kubaka ibikorwaremezo, ubworozi no kubakira imiryango itishoboye.

Uruhare rw'Ingabo na Polisi by'u Rwanda mu bikorwa by'iterambere n'imibereho myiza y'abaturage biteganywa n'amategeko agenga izo nzego.

Ingabo na Polisi by'u Rwanda byongeye gushimira abaturage ku ruhare n'ubufatanye badahwema kugaragaza mu bikorwa byo kubungabunga umutekano n'iterambere ry'u Rwanda.

Ibikorwa nk'ibyo mu 2024 byasize hakozwe byinshi birangwajwe imbere n'abaturage barenga ibihumbi 10 babazwe indwara zitandukanye, abandi 5000 bari barahumye bongera kureba n'ibindi.

Uretse kuvura abo baturage hanubatswe inzu 31 zihabwa abatishoboye, hubakwa n'ingo mbonezamikurire (ECD) 15 n'ibiraro 13, hanatangwa ubwato bune ku baturage bo mu Ntara y'Iburengerazuba n'Amajyaruguru.

Hatanzwe amatungo 800, hakwirakwizwa amazi n'amashanyarazi ndetse ingo 327 zihabwa amashanyarazi y'imirasire, imirenge itanu yahize indi muri buri ntara ihabwa imodoka n'ibindi bikorwa bitandukanye.

Aha byari mu 2024 ubwo Umuyobozi Mukuru wa Polisi y'u Rwanda, CG Namuhoranye Félix yatahaga inzu zubakiwe abatishoboye mu Karere ka Musanze

Mu 2024 Umurenge wa Tumba wo mu Karere ka Rulindo washyikirijwe imodoka watsindiye nk’umurenge wahize indi yose yo mu Majyaruguru mu kwimakaza isuku n’umutekano

Mu Bugesera Minisitiri w’Ingabo, Juvenal Marizamunda (uwa kabiri ku ruhande rw’iburyo) ari kumwe n’abandi bayobozi basuye umuturage mu nzu nshya yubakiwe na RDF ku bufatanye na Polisi. Hari mu 2024

Amagare 90 yatanzwe ku bagize amahuriro y’Imboni z’Impinduka kugira ngo abafashe kwiteza imbere

Imodoka zitandukanye zatanzwe mu gufasha abaturage kurinda umutekano no kwimakaza isuku

Umwaka ushize hatashywe amarerero 15 yubatswe na Polisi n’Ingabo z’u Rwanda

Mu 2024 inzu 31 zubakiwe abatishoboye bikozwe na RDF na RNP

Mu 2024 abapolisi n’abasirikare bubatse ibiraro 13 mu bice bitandukanye by’igihugu

Aba bana bakubiswe n'inkuba mu mvura nke yaguye mu ijoro rya tariki ya 12 Werurwe 2025, ikaba yaraguye mu tugari twa Butezi na Muhamba two mu Murenge wa Gahara mu Karere ka Kirehe.

Umunyamabanga Nshingwabikorwa w'Umurenge wa Gahara, Munyana Josette, yavuze ko aba bana bakubiswe n'inkuba yari iri mu mvura idasanzwe yaguye muri uyu Murenge irimo inkuba n'imirabyo byinshi cyane.

Ati 'Imvura yaguye ariko ntabwo yari nyinshi cyane ahubwo yari irimo inkuba n'imirabyo byinshi. Umwana yakubiswe n'inkuba ubwo yari ari kumwe n'ababyeyi be. Bahise bamuzana kwa muganga ariko bagiye kumwakira yitabye Imana. Indi nkuba yakubitiye umwana mu Kagari ka Butezi yari ari kumwe na se, umwana ahita yitaba Imana ariko se agira ihungabana, yajyanywe kwa muganga.'

Gitifu Munyana yavuze ko ubuyobozi bwageze ku miryango y'ababuze ababo burayihumuriza, asaba abaturage kwitwararira muri ibi bihe bakirinda kugama munsi y'ibiti, akangurira ababyeyi ko iyo imvura iguye irimo n'inkuba kujya birinda kuvugira kuri telefone n'ibindi byinshi.

Kugeza ubu imirambo y'aba bana yahise ishyingurwa mu gihe ubuyobozi bwasabye abaturage kuba maso muri iki gihe cy'imvura bagakomeza ibisenge by'inzu zabo.

Raporo ya Minisiteri y'Ibidukikije igaragaza ko mu myaka icyenda ishize kugeza mu 2023 abantu 1595 bishwe n'ibiza bitandukanye, mu gihe byakomerekeje abandi 2368.

Imyuzure yishe 307 ikomeretsa 101, inkangu zihitana abantu 425 ikomeretsa 187, inkuba zica abantu 538 zikomeretsa 1338, imvura nyinshi ihitana 315 ikomeretsa 612, mu gihe umuyaga mwinshi wahitanye abantu 10 ukomeretsa abandi 128.

Ibiro by’Akarere ka Kirehe

Ni inyota abo banyeshuri bagaragaje nyuma y'ibyo bagejejweho ku makuru muri Jenoside yakorewe Abatutsi mu 1994, igice cyabowe n'umunyamateka wo mu Bufaransa witwa Fabien Théofilakis.

Ni umunyamateka akaba n'umwarimu muri Kaminuza ya Paris 1 Panthéon-Sorbonne. Fabien Théofilakis yagize uruhare mu kumenya jenoside zitandukanye zabaye ku Isi harimo na Jenoside yakorewe Abatutsi mu 1994.

Iri murikabikorwa ni kimwe mu bigize umushinga wa Fabien Théofilakis uzwi nka 'Le Rwanda et Nous' ryabaye ku wa 16 Mutarama 2025 ahazwi nka 'Centre Marc Bloch mu Murwa Mukuru w'u Budage, Berlin.

Icyo gihe abo banyeshuri bagaragaje uburyo banyotewe no kumenya ayo mateka, ariko noneho byaba akarusho bakaganirizwa n'umwe mu barokotse Jenoside yakorewe Abatutsi kugira ngo ababwire urugendo rwe rwo kurokoka n'uko ibintu byari bimeze muri icyo gihe.

Bashakaga kumenya by'umwihariko uburyo ayo mateka mabi yaranze u Rwanda yabaye, uburyo abarokotse Jenoside yakorewe Abatutsi n'igihugu bataheranwe n'agahinda ahubwo bagaharanira kwiyubaka kugeza ku iterambere igihugu kigezeho ubu.

Mu buryo bwo kuzirikana ibyifuzo by'abo banyeshuri, hateguwe ibiganiro byo kuganira kuri iyo ngingo no gusubiza ibibazo byose bibaza.

Mu baganirije abo banyeshuri ku wa 13 Werurwe 2025 harimo Rose Ilibagiza warokotse Jenoside yakorewe Abatutsi mu 1994 akaba anatuye i Berlin mu Budage afatanyije na Fiona Mamboleo. Baganiriye n'abo banyeshuri bagerageza gusubiza ibibazo byose bibajijwe kuri ayo mateka.

By'umwihariko Ilibagiza yagarutse ku buhamya bwe agaragaza ubuzima bwe mbere, mu bihe bya Jenoside yakorewe Abatutsi ndetse na nyuma yayo.

Abanyarwanda baba mu Budage n'igihugu muri rusange bakomeje kugira uruhare mu bikorwa bitandukanye bigamije kugaragaza amateka yaranze u Rwanda, guhangana n'abayagoreka, cyangwa bayahakana bakanayapfobya.

Mu gushimangira ibyo bikorwa mu gihe u Rwanda rwiteguraga kwibuka ku nshuro ya 30 Jenoside yakorewe Abatutsi, i Lauchringen mu Budage hatashywe urwibutso rwa mbere muri iki gihugu nyuma y'igihe kinini byifuzwa.

Magingo aya u Rwanda rumaze kugira inzibutso za Jenoside zirenga 20 mu bihugu bitandukanye ku Isi harimo ibyo ku mugababe w'u Burayi, Canada no muri Afurika kandi zikomeza kwiyongera uko amahanga agenda arushaho kumva no guha agaciro Jenoside yakorewe Abatutsi mu 1994.

Izi nzibutso zifasha abarokotse Jenoside yakorewe Abatutsi batuye muri ibi bihugu n'abandi bose babyifuza kubona aho bibukira Abatutsi bishwe mu 1994, ndetse no kubera imfashanyigisho urubyiruko, amashuri bikaba imbarutso yo kuganira ku mateka ya Jenoside yakorewe Abatutsi kugira ngo itazongera kubaho ahandi ku Isi.

Abanyeshuri bo muri Lycée Français de Berlin basobanuriwe amateka ya Jenoside yakorewe Abatutsi

Ilibagiza Rose warokotse Jenoside yakorewe Abatutsi yasobanuriye abanyeshuri b’Abadage amateka mabi yaranze u Rwanda n’uko rwiyubatse benshi batabyumva

Lycée Français de Berlin ni rimwe mu mashuri amaze igihe atanga uburezi bufite ireme mu Budage

[email protected]

Mu itangazo REG yashyize hanze ku wa 13 Werurwe 2024, yagaragaje ko ikibazo cy'ibura ry'umuriro cyagaragaye mu Rwanda no mu bihugu bituranyi cyatewe n'ubujura bw'ibikorwaremezo by'amashanyarazi.

Iti 'Ibi bibazo byagaragaye mu Rwanda no mu bihugu duturanye, kubera ko dukoresha umuyoboro dusangiye. Byatewe n'ubujura bwakorewe ku bikorwaremezo by'umuyoboro munini w'amashanyarazi uduhuza n'ibihugu duturanye bitera ibibazo mu kugenzura ihuzwa ry'imiyoboro y'amashanyarazi mu Karere u Rwanda ruherereyemo.'

Ubuyobozi bwa REG bwakomeje buvuga ko imirimo yo gusana uwo muyoboro ikomeje bikaba biteganyijwe ko izarangira bitarenze ku wa 17 Werurwe 2025 ndetse ko hafashwe ingamba mu kwirinda ko ibyo bibazo byaba ukundi.

Iyo sosiyete kandi yaboneyeho kwihanganisha abagizweho ingaruka n'iryo bura ry'umuriro rya hato na hato.

Iti 'Turazirikana ingaruka byagize ku baturage, ibikorwa by'ubucuruzi, ndetse n'ibigo bitanga serivisi z'ingenzi.'

REG yasabye afatabuguzi bayo kandi kwihangana no kwitondera insinga z'amashanyarazi mu gihe umuriro wakongera kubura kuko imirimo yo gusana uwo muyoboro ikiri gukorwa.

REG yatangaje ko ibura ry’umuriro rya hato na hato riherutse ryatewe n’abibye ibikoresho by’amashanyarazi ku miyoboro ihuza u Rwanda n’ibihugu ruturanye na byo

Nubwo bamwe muri aba bagore bafatwa nk’indashyikirwa by’umwihariko ab’abirabura begukanye ibihembo bikomeye nka Oscars, ntibyabahaye amahirwe angana n'ay'abagabo cyangwa abandi bakinnyi batari abirabura. Urugero, nyuma yo gutsindira ibihembo bikomeye, Hattie McDaniel, Rita Moreno, na Miyoshi Umeki bakomeje guhabwa imirimo ya nyakabyizi n'indi mirimo y'urukozasoni muri filime, bigaragaza uko uruganda rwabaga rwuzuyemo imyumvire y'ivangura.

Nyamara, uko imyaka yagiye ihita, hari abagore bagize uruhare rukomeye mu guhindura uko abagore babonwa mu ruganda rwa sinema. Kubona filime z’abagore nka 'Barbie' yaciye agahigo ka filime yinjiza amafaranga menshi ku isi ni ikimenyetso cy'uko ibintu bigana aheza.

Mu rwego rwo kwizihiza Ukwezi kw'Abagore, turagaruka ku bagore 25 bagize uruhare rukomeye mu mateka ya sinema, bagahindura ibihe kandi bagaha icyizere abakiri bato.

1. Hattie McDaniel

Mu 1940, yabaye umugore w'umwirabura wa mbere watsindiye Oscar mu cyiciro cy'umukinnyi mwiza ushyigikira abandi, ‘Best Supporting Actress’ abikesheje filime 'Gone with the Wind.' Nubwo yatsindiye iki gihembo, ntiyahawe amahirwe yo kwitabira ibirori by'imurikwa ry'iyo filime i Atlanta kuko aho byaberaga hatageraga abirabura.

2. Sophia Loren

Mu 1962, yabaye umukinnyi wa mbere watsindiye Oscar mu bihugu bitavuga ururimi rw’Icyongereza kubera filime ye 'Two Women.' Mu mwuga we, Loren yatsindiye ibihembo byinshi birimo bibiri bya Oscar, Golden Globe eshanu, BAFTA, na birindwi bya David di Donatello. Ni umwe mu bagore bazwi ku Isi, kandi yagize uruhare rukomeye mu guteza imbere sinema y’Ubutaliyani ku rwego mpuzamahanga.

3. Viola Davis

Ni umukinnyi w'umwirabura rukumbi wegukanye ibihembo bitatu bikomeye mu mateka y’umwuga wo gukina filime bizwi nka ‘Triple Crown of Acting,’ birimo Oscar, Emmy na Tony. Yamenyekanye muri filime nka ”The Help, ‘Fences,’ na ‘How to Get Away with Murder.’ Davis azwi cyane nk’umugore wamaganye ivangura rishingiye ku ruhu no kudaha abagore agaciro mu bijyanye n’ibihembo no kwishyurwa bihwanye n’abandi bakinnyi.

4. Rita Moreno

Mu 1962, yatsindiye igihembo cya Oscar nk'umukinnyi mwiza muri filime ‘West Side Story,’ aba Umunyamerika wa mbere ufite inkomoko muri Amerika y'Epfo wegukanye Oscar. Na nyuma n’ubwo yakomeje guhabwa inshingano mbi muri filime, yaje kwishakira inzira kugeza ubwo atsindiye ibindi bihembo bikomeye nka Grammy, Tonny, Emmy n’ibindi bikomeye. Yashyizwe no kuri Hollywood Walk of Fame nk’icyamamare cyagize uruhare runini mu iterambere rya sinema n’imyidagaduro.

5. Kathryn Bigelow

Mu 2010, yabaye umugore wa mbere watsindiye Oscar nk'umuyobozi mwiza wa filime w’umugore ‘The Hurt Locker.’

6. Edith Head

Azwi cyane nk’umwe mu bagize uruhare runini mu gutunganya imyambaro y’abakinnyi ba filime. Yegukanye ibihembo umunani bya Oscar mu cyiciro cy'imyambarire muri sinema, aba umwe mu bagore batsindiye ibihembo byinshi mu mateka y'ibi bihembo.

7. Zoe Saldaña

Ni we mukinnyi rukumbi wakinnye muri filime zinjije amafaranga menshi ku Isi, aho enye mu zo yakinnyemo zinjije miliyari $2 (imwe ku yindi), zirimo Avatar na Avengers: Endgame.

8. Barbra Streisand

Mu 1984, yabaye umugore wa mbere watsindiye Golden Globe nk'umuyobozi wa filime kubera ‘Yentl,’ atwara n’icya Oscar cy’umukinnyi mwiza.

9. Michelle Yeoh

Mu 2023, yabaye umugore wa mbere w'Umunya-Asia wegukanye Oscar nk'umukinnyi mwiza abikesha filime yitwa ‘Everything Everywhere All at Once.’

10. Halle Berry

Mu 2002, yabaye umugore wa mbere w'umwirabura wegukanye Oscar nk'umukinnyi mwiza wa filime kubera ‘Monster's Ball.’ Ni umwe mu bagize uruhare rukomeye mu guhindura isura y’abagore muri sinema. Azwi kandi mu bikorwa bitandukanye birimo iby’ubugiraneza n’imirimo yo guteza imbere amahirwe y’abagore mu mwuga wo gukin filime.

11. Meryl Streep

Afite Oscar 3, Golden Globes 8, na BAFTA 2, uduhigo twamugize umwe mu bakinnyi ba filime batsindiye ibihembo byinshi mu mateka y'ibi bihembo.

12. Miyoshi Umeki

Mu 1958, yabaye Umuyapani wa mbere watsindiye igihembo cya Oscar kubera filime ‘Sayonara’ mu cyiciro cy’umukinnyi mwiza w’umugore.

13. Ariana DeBose

Mu 2022, yabaye Umunyamerika wa mbere w'umwirabura kandi w'umugore, ufite inkomoko muri Amerika y'Epfo watsindiye Oscar, kubera filime yitwa ‘West Side Story.’

14. Katharine Hepburn

Ni umukinnyi wa filime na we ufite agahigo ko gutsindira Oscar nyinshi mu mateka, aho yegukanye enye.

15. Chloé Zhao

Mu 2020, yabaye umugore wa mbere ufite inkomoko muri Aziya wegukanye Oscar nk'umuyobozi wa filime abikesha iyitwa ‘Nomadland.’

16. Greta Gerwig

Mu 2023, yanditse amateka akora filime iyoboye izinjije amafaranga menshi ku isi yayobowe n'umugore, 'Barbie', yinjije miliyari 1.4$.

17. Octavia Spencer

Yamenyekanye muri filime The Help, Hidden Figures, na ‘The Shape of Water,’ aba umwe mu bakinnyi b’abagore begukanye ibihembo byinshi ndetse yanakoze uko ashoboye agaragaza imbogamizi z'ivangura rishingiye ku mushahara.

18. Marilyn Monroe

Ni umwe mu bagore bazwi cyane mu mateka ya sinema kubera uruhare rwe muri filime nyinshi zirimo iyitwa ‘Some Like It Hot,’ ‘The Seven Year Itch,’ ‘Gentlemen Prefer Blondes’ n’izindi. Yagize uruhare rukomeye mu kwigarurira imitima y’abakunzi ba filime mu gihe cya 1950.

19. Lily Gladstone

Mu 2024, yabaye Umunyamerika wa mbere w'umwimerere watsindiye Golden Globe nk'umukinnyi mwiza, abikesha filime yitwa ‘Killers of the Flower Moon.’

20. Ruth E. Carter

Azwi cyane nk’umunyabugeni w’imyenda idasanzwe yambwikwa abakinny ba filime zinyuranye, ariko yamenyekanye cyane kuri Black Panther, aba umugore w'umwirabura wa mbere watsindiye Oscar muri icyo cyiciro.

21. Awkwafina

Mu 2020, yabaye Umushinwakazi wa mbere watsindiye Golden Globe nk'umukinnyi mwiza wa filime z'urwenya, abikesha iyitwa ‘The Farewell.’

22. Thelma Schoonmaker

Ni umwe mu bagore bafite Oscar nyinshi mu gutunganya amashusho, aho afite eshatu zose.

23. Jane Campion

Ni umugore rukumbi watowe inshuro ebyiri mu bihembo bya Oscar nk'umuyobozi wa filime, akaba yaratsinze muri 2022 kubera iyitwa ‘The Power of the Dog.’

24. Hildur Guðnadóttir

Yabaye umugore wa mbere watsindiye Oscar nk'umuhanga mu muziki wumvikana muri filime, abikesha ahanini iyitwa ‘Joker.’

25. Audrey Hepburn

Audrey Hepburn yari umukinnyi wa filime w'ibihe byose. Azwi cyane kubera filime nka ‘Breakfast at Tiffany's’ na ‘Roman Holiday,’ zamuhesheje igihembo cya Oscar. Yari icyitegererezo mu myambarire, akorana bya hafi na Hubert de Givenchy. Mu bihembo yatsindiye harimo Emmy, Grammy, Oscar, na Tony. Nyuma yo gukundwa mu ruganda rwa sinema, yitangiye ibikorwa by'ubutabazi muri UNICEF, afasha abana bo mu bihugu bikennye. Nubwo yitabye Imana mu 1993, aracyafatwa nk'ikitegererezo cy'ubwiza, ubuhanga, n'impuhwe.

Aba bagore banditse amateka yihariye mu ruganda rwa sinema, bahindura uburyo abagore bagaragara muri filime, ndetse bakanaharanira uburinganire n'ubwisanzure muri uru ruganda. Ni intwari mu mateka y'amafilime kandi baracyakomeza guha icyizere ibisekuruza bizaza nubwo benshi muri bo batakiriho.

 

Mu itangazamakuru no ku mbuga nkoranyambaga hari bamwe bagiye bagaragaza ko gukorera muri iyi nyubako bihenze cyane; nyamara ugereranyije n'izindi nyubako ziberamo ibitaramo, ibirori cyangwa se inama iri mu zishyuza macye, hashingiwe ku munsi wasabiyeho gukorera igikorwa cyawe. 

Wumvise inkuru ya ntuza wakoreyemo igitaramo agakuramo Miliyoni 2 Frw, wumvise n'igitaramo cya kanaka cyabereyemo agakuramo Miliyoni 70 Frw, ushobora kuba waranumvise ko ba bahanzi babiri bo muri Nigeria bakoreyemo igitaramo cyabo cyinjije Miliyoni 61 Frw, ariko kandi na ya korali byavuzwe ko ariyo yinjije menshi.

Wamenye ko ubwo biteguraga kwakira igitaramo cya Diamond, uwari wamutumiye bamworohereje inyubako akayikodesha Miliyoni 5 Frw? Ariko hari n'undi uherutse gutaramiramo bimusaba kwishyura ari hagati ya Miliyoni 6 Frw na Miliyoni 8 Frw- Bisa n'aho ibiciro bitangana! 

Mu busanzwe si inyubako yagenewe ibitaramo n'ibirori, kuko yubatswe ari iy'imikino- Bivuze ko gukoreramo ibitaramo ni uguhengekereza.

Perezida wa Chorale de Kigali, Horadi Jean Claude, ku wa 24 Ukuboza 2024 yabwiye abari bitabiriye igitaramo cy'iyi korali, ko Guverinoma ikwiye kubaka ikindi gikorwaremezo cyafasha abahanzi kubona ahantu heza ho gukorera ibitaramo.

Abavuga ibi bashingira mu kuba nta nzu ihari igenewe ibitaramo by’abahanzi, kuko nka BK Arena iberamo ibitaramo by’abahanzi mu busanzwe yagenewe imikino. No muri Camp Kigali, ni amahema yubatswe ku buryo umuririmbyi aririmba nyiramubande zumvikana mu bice bicikikije imbuga ya Camp Kigali.

Ibi bituma kenshi ibitaramo by’abahanzi bihabwa amasaha bitagomba kurenza, ahanini bitewe n’uko biba biteza urusaku mu baturanyi. Ni na ko bimeze no mu zindi nzu nka Kigali Convention Center, kuko ari inyubako zubatswe zigenewe inama n’ibirori kurusha ibitaramo.

Ati “Bishobotse tukagira inzu yagenewe muzika, abantu bakora igitaramo kenshi kuko guhenda biba bicyeya. Ubwo ndabasabye mubitekerezeho nanone nk’uko mwaduhaye ino nzu muzaduhe bene iyo nzu abandi bita ‘amphitheater’ nziza idahenze ku buryo bwo kongeramo ibindi bintu byo kugirango iririmbirwemo.'

Kuva mu myaka nk'itatu ishize, iyi nyubako yakiriye ibikorwa bikomeye Mpuzamahanga birimo nka Giants Africa, Move Africa, Trace Awards, FIA Awards, Inama ya FIFA n'ibindi byagiye bisigira za Miliyari ababaga bahawe akazi ko kubitegura.

Ni inyubako kandi yatumye abahanzi bo mu Rwanda bagaragarizwa urukundo rudasanzwe, kuko nka Israel Mbonyi ubu niwe wa mbere wabashije kurenza umubare w'abatu 10376, iyi nyubako isanzwe yakira.

Nubwo bimeze gutya ariko, Massamba Intore aherutse kubwira InyaRwanda, ko ubuyobozi bwa BKArena bukwiye korohereza abahanzi mu gihe bashatse gukoreramo ibitaramo.

Ati ' Abanyarwanda bafite inyota yo kubona ibitaramo byiza, kuko bafite abahanzi beza. Abantu bafite amazu (y’imyidagaduro) yaba BK Arena, nibagabanye ibiciro, nibajyane hasi, Abanyarwanda babone ibitaramo.”

Ibi biherekezwa n'ibyagiye bivugwa cyane mu itangazamakuru by'uko hari abahanzi bakoreye ibikorwa byabo muri iyi nyubako bagahomba, byatumye batongera gutekereza gusubirayo ukundi.

Muri Werurwe 2024, Itorero Inyamibwa ryakoreye igitaramo gikomeye muri BK Arena bise 'Inkuru 30' cyanitabiriwe na Perezida Kagame na Madamu. Cyabaye igitaramo kidasanzwe mu rugendo rw'iri torero, kandi cyabafashije kuba itorero rya mbere rikoreyemo igitaramo.

Bahuye n'igihombo cyatumye badasubirayo?

Muri iki gihe iri torero riri kwitegura igitaramo cyabo kizaba ku wa Gatandatu tariki 15 Werurwe 2025 muri Kigali Conference and Exhibition Village ahazwi nka Camp Kigali. Baherukaga muri iyi nyubako, mu 2023 ubwo bakoraga igitaramo 'Urwejeje Imana'. 

Mu kiganiro n'itangazamakuru kuri uyu wa Gatatu tariki 12 Werurwe 2025, Umuyobozi w'iri torero, Rusagara Rodrigue yavuze ko kudasubira gukorera igitaramo muri BK Arena, bidahuye n'ibyagiye bivugwa ko bahombye.

Ati 'Nta gihombo twagiriye muri Arena. Umuntu uzavuga ko Inyamibwa zahombeye muri Arena azaba abeshya. Nta gihombo. Ahubwo twagize inyungu idasanzwe. Nta gihombo, cyaba icy’amafaranga.”

Yavuze ko guhitamo gukorera igitaramo cyabo muri Camp Kigali, byatewe n’insanganyamatsiko. Ati “Ubu ntabwo ari ukumurika Album. Ni ukuvuga ngo ‘Inkuru ya 30’ (bakoreye muri BK Arena) imwe mu nkuru ya 30 harimo BK Arena, uko byasa kose nubwo hatari kuza abantu ibihumbi 10 twari kujya muri Arena […] BK Arena yari mu byo twifuzaga gukora muri kiriya gihe.”

InyaRwanda yakoze ubucukumbuzi ku bintu BK Arena isaba abantu bakorerayo ibitaramo, ndetse iganira na bamwe mu bantu bagiye bakorerayo ibitaramo. 

1.Ni ibiki BK Arena isaba ushaka gukoreramo igitaramo

Intambwe ya mbere yo gukorera muri BK Arena ni ukubanza kuvugana n'ubuyobozi bwayo, ugasaba itariki ushaka ko uzakoreramo igikorwa cyawe, hakarebwa niba iyo tariki itarafashwe n'undi muntu, hanyuma ugakorerwa 'Quotation'. 

Mu yandi magambo buri wese ukoreramo igitaramo aba yamaze kwemera no gushyira umukono kuri 'Quotation' aba yahawe igizwe n'ibice birindwi:

Igice cya mbere:

–Venue Rental cyangwa se gukodesha aho gukorera. Iki gice kigizwe n'umunsi wo kwinjiza ibikoresho (Load in), aho usabwa kwishyura amafaranga ari hagati ya Miliyoni 3 na 4 Frw. Ni ikigereranyo ushingiye kuri 'Quotation' zagiye zitangwa mu bihe bitandukanye.

Amakuru y'ibanze agaragaza ko ku biciro byabo buri mwaka bongeraho 10%. Bitewe n'igikorwa wateguye uhitamo n'iminsi ushaka ko uzinjirizamo ibikoresho, bivuze ko niba uhisemo ko uzinjiza ibikoresho byawe mu gihe cy'iminsi itatu, ubwo ni ukwishyura Miliyoni 9 Frw. Ariko umunsi wa 'Set Up' n'umunsi wa 'Sound Check' ntabwo wishyuzwa.

-Umunsi w'igikorwa/Umunsi w'Igitaramo (Event Day): Mbese ni ya tariki abafana bajya kwihera ijisho igitaramo muri BK Arena, uwateguye ashobora kwishyura amafaranga ari hagati ya Miliyoni 8 na Miliyoni 10 Frw.

-Load Out (Umunsi wo gusohora ibikoresho): Amakuru y'ibanze agaragaza ko kenshi BK Arena itishyuza abantu mu gusohora ibyuma byabo, ariko hari n'abishyuzwa. Biterwa n'imikoranire uwateguye icyo gikorwa aba asanzwe afitanye na BK Arena.

-VIP Lounge: Iyo uri mu gitaramo muri BK Arena mu mpande hagaragaramo ibyumba byihariye, aho kimwe gishobora kwakira abantu bari hagati ya 20 na 30, ubona b'abasirimu.

Kugirango abantu babashe kujya muri biriya byumba, bisaba ko uwateguye abyishyurira, hanyuma we agashyiraho igiciro ashaka.

Hari umwe mu bakoreye muri ziriya 'Premium suit' na 'VIP Suit' zigera kuri esheshatu, aho icyumba kimwe yishyuye ari hagati ya Miliyoni 1 Frw na Miliyoni 1.5 Frw.

Umwe mu bakoreye igitaramo muri BK Arena yabwiye InyaRwanda ko igiciro cyo gukodesha BK Arena gishobora guhinduka bitewe n'ibyo uwateguye ashaka cyangwa se bitewe n'uko igikorwa yateguye kimeze.

Ati 'Ku bijyanye no gukodesha BK Arena igiciro cy'umwe gitandukana n'undi bitewe n'ibyo yakeneye. Hari ugira igikorwa kidakenera iby'ibyuma, ndahamya ko abakoreramo iby'imipira ntabwo bakenera nk'ibyo dukenera mu gitaramo. Bo, ntibakenera iminsi nk'itatu yo kwitegura. Mu yandi magambo, ubunini bwa 'Event' yawe nibwo butuma igiciro cyo gukodesha BK Arena kizamuka cyangwa kimanuka. Ariko icyo nagutangariza, ntabwo BK Arena ihenda mu kuyikodesha.'

Amakuru agaragaza ko ihema rinini rya Camp Kigali rihagaze nibura Miliyoni 5 Frw, ni mu gihe Kigali Convention Center iri hejuru ya Miliyoni 8 Frw.

2.Igice cya Kabiri cyo kwinjira muri BK Arena: Venue Logistics —Uko abantu bazinjira, umutekano w'abantu n'ibindi uwateguye uzakenera

Kuri iki gice, BK Arena ifitanye amasezerano n'abandi bantu bazana ibyo bikoresho biba bikenewe nk'amahema, ibyuma bifasha mu gusaka abantu, ameza n'ibindi byose bisabwa kugirango igitaramo cyangwa se igikorwa runaka cyateguwe kigende neza. Uwateguye asabwa kubikodesha.

Hakodeshwamo amahema. Buri wese ahitamo amahema azakenera, imwe ikodeshwa ari hejuru y'ibihumbi 200 Frw- Ni amafaranga ashobora guhinduka bitewe n'igikorwa.

Hakodeshwa kandi ameza (Table): Hano BK Arena itanga uburenganzira ku muntu wateguye igikorwa, akemererwa kuba yashakira 'Table' ahandi, cyangwa se akamera gukoresha izabo basanganywe. Imibare igaragaza amafaranga y'aho ari hejuru y'ibihumbi 18 Frw, no hanze ya BK Arena ibiciro biri muri iki kigero.

Muri iki gice kandi, BK Arena igusaba ibyuma byorohereza abashinzwe umutekano gusaka. Bitewe n'igikorwa wateguye, bishobora kongera cyangwa se bikagabanya umubare w'ibyuma ukenera- Aha naho bakwereka ibiciro byabo ugahitamo.

Muri iki gice ni naho hazamo ibijyanye no gukodesha 'Generator' kuko ariyo itanga umuriro wizewe, kuko amashanyarazi ashobora kugenda mu buryo butunguranye. Ibikorwa byinshi bibera muri BK Arena bikoreshwaho 'Generator'.

Ariko uwateguye igitaramo cyangwa se ikindi gikorwa, ahabwa amahitamo yo kuba yakoresha amashanyarazi cyangwa se agakoresha 'Generator'.

'Generator' igira ibiciro bitandukanye, kuko bishingira ku gihe umuntu amara ayikoresha. Hari umwe mu bakoreye muri BK Arena mu gihe cy'amasaha arenga arenga atandatu (6) wakoresheje 'Generator' yishyura arenga Miliyoni 7 Frw.

Muri iki gice kandi hishyurwamo ibijyanye na 'Internet'. Uwateguye niwe uhitamo kwishyura internet ashaka, yaba ari iyo kwifashisha gukora igikorwa cye mu buryo bwa Live, 'internet ishobora gukoreshwa n'abanyamakuru, cyangwa se ku gice cya Production.

Ntabwo BK Arena ikodesha 'esikariye' cyangwa se 'Elevator' nk'uko byagiye bivugwa: Muri iki gice, basobanura ko amafaranga yishyurwa agera ku bihumbi 110 Frw, abarirwa ku batekinisiye yaba umwe cyangwa se babiri baba bashinzwe gutabara mu gihe cyose ziriya esikariye zagira ikibazo.

3.Igice cya Gatatu: Security, Usher, Crowd, /Umutekano, 'Protocol' n'uburyo bwo kureba uko abantu binjira, bakanasohoka na Ambulance

Uwateguye igitaramo niwe usaba abantu bazamufasha kugenzura amatike y'abantu binjira, yishyura umwe ku giti cye ari hagati y'ibihumbi 20Frw n'ibihumbi 40 Frw.

Ahitamo kandi umubare w'abantu ba 'Protocol' bamufasha, buri umwe agira igiciro cye. Muri iki gice, unasabwa 'Ambulance', ndetse hanakerwa abashinzwe umutekano kuri 'Set-Up', yaba ku munsi wo kumanika ibyuma no kubimanura nyuma y'igitaramo.

BK Arena ntabwo ariyo itanga Ambulance, ahubwo bakurangira abo gukorana nabo.

4.Igice cya Cleaning/ Amasuku akorwamo mbere na nyuma y'igikorwa cyabaye

Muri iki gihe BK Arena ibara amafaranga ishingiye ku minsi y'abantu bakoramo amasuku kuko haba hakenewe abantu benshi bakora amasuku.

Iyo urebye kuri 'Quotation' zagiye zitangwa, ibiciro by'amasuku ku munsi waba uwa 'Production Day', 'Consumable Day' usanga biri hejuru y'ibihumbi 250 Frw.

5.Icyiciro cya Gatanu kijyanye n'ibyo kurya no kunywa (Food and Beverages)

BK Arena ivugana n'uwateguye igitaramo cyangwa se igikorwa runaka, bakamubwira ko hari 'restaurant' zihari basanzwe bakorana, zimufasha kubona ibyo kurya ndetse no kunywa, hanyuma yabikenera akazishyura nyuma, hakarebwe ibyakoreshejwe byose.

6.Production

Ubuyobozi bwa BK Arena butanga amahirwe ku muntu ushaka gukoreramo igikorwa, bakamusaba gutanga urutonde rw'ibyuma ashaka kuzakoresha, bakagenzura ubushobozi bwabyo. Aha niho ugaragaza 'Sound' ushobora kubona, amatara, 'Speaker' n'ibindi babona bitari ku rwego rwiza bakakugira inama y'uwo mwakorana.

Iyi nyubako igitangira ibikorwa byabo, bamwe mu bakoreragamo ibitaramo bakoranaga n'abantu bo hanze bafite ibyuma, ariko nyuma bamwe baje gukora amakosa, abandi basanga nta byagombwa bafite bibemerera kumanika ibyuma mu nyubako nk'iyi iri ku rwego mpuzamahanga.

Nyuma yo kubona ko abantu benshi bafite ibyuma ariko nta byangombwa bibemerera kumanika ibyuma, BK Arena yahisemo kugirana amasezerano y'imikoranire na Rwanda Events, iba ariyo ihabwa uburenganzira bwo kumanikamo ibyuma, kuko bafite n'abakozi babyigiye.

Ariko bongeye kubyoroshya bashyiramo ko mu gihe cyose utakoresheje Rwanda Events nk'abantu babifitiye uburenganzira uzajya utanga arenga za Miliyoni kubera ko utakoranye na Rwanda Events.

Iyo wakoranye na Rwanda Events mu bijyanye no kugukorera 'Production' bigera kuri Miliyoni 30 Frw- Aya mafaranga yavuye kuri Miliyoni zirenga 12 Frw nibura umuntu yatangaga mu myaka itatu ishize, iyo yabaga yakoranye n'abandi.

7.Igice cya nyuma/ Assurance

Iyo wateguye igitaramo unasabwa kwishyura 'assurance' yo kurengera ibyo abantu bawe bashobora kwangiza.

Ushobora guhitamo kwigurira 'Assurance' muri kompanyi zinyuranye. Ubwishingizi uba ufashe bwishyura bimwe mu bintu bishobora kwangizwa.

Igiciro cyacyo gishyirwaho bitewe n'umubare w'abantu ufite, cyangwa ibyabereye mu gikorwa.

Ibi si umwihariko wa BK Arena, kuko n'izindi nyubako mpuzamahanga ziberamo ibi bikorwa, usanga ibyo iyo nyubako isaba, ari nabyo n'abandi basaba.

Iyo umaze gusobanukirwa ibi byose, uwateguye 'Quotation' ya BK Arena ashyiraho umukono, hanyuma n'uwateguye icyo gikorwa agashyiraho umukono- Bivuze ko baba batangiye noneho urugendo rw'imikoranire.

Mu ncamake:

Imiterere ya 'Quotation' igizwe n'ibice bibiri: Igice cyitwa 'Venue Hire' ariyo mafaranga ya BK Arena binyuze muri kompanyi yabo 'QA and Venue Solutaion'.

Igice cya Kabiri: Ni abantu cyangwa se kompanyi zagiranye amasezerano na BK Arena batanga serivisi zinyuranye zigahabwa ushaka gukoreramo igikorwa

Mu y'andi magambo, BK Arena yakira amafaranga atarenze Miliyoni 10 Frw, andi ajya mu bafatanyabikorwa bayo.

Si buri gitaramo wakorera muri BK Arena- Guhomba bibaho, ariko turantunguka

Nubwo bimeze gutya ariko, hari amajwi y'abantu yagiye azamuka agaragaza ko batishimira ibintu byose BK Arena isaba kugirango ukoreremo igikorwa.

Nemeyimana Fiacre usanzwe afite Ikompanyi yitwa ‘Fiacre Tent Maker’, ni umwe mu bamaze gukorera ibikorwa byinshi muri BK Arena. Yakoreyemo ibitaramo bikomeye birimo nk'igitaramo cya The Ben, icya Chorale de Kigali n'ibindi bikomeye, ndetse muri uyu mwaka afiteyo ibindi bikorwa azakorerayo.

Mu kiganiro cyihariye na InyaRwanda, Nemeyimana Fiacre yasobanuye ko abantu bakwiye kubanza kumva neza imiterere y'igikorwa bari gutegura mbere yo kwerekeza amaso kuri BK Arena, kuko ushobora gusanga ushaka kujya gukorerayo, kandi imitererere y'igikorwa cyawe itakwemerera kujyayo.

Ati 'Ndi umwe mu bantu bamaze gukorerayo ibikorwa byinshi muri BK Arena. Hari ibyo ntegura nkasubirayo, ibindi nkabireka nka Chorale de Kigali nasubiyeyo. Imiterere ya 'Event' umuntu aba afite ishobora gutuma ntekereza nti aho gukorera hajyanye n'imiterere y'igikorwa cyanjye nihe? Nkasanga ni BK Arena uko yaba iri kose ngomba kujyayo. Hari n'igitaramo nshobora kuba mfite nkavuga nti nzakorera muri Canal Olympia, iyi yo ndabona ijyanye na Camp Kigali, iyi yo ndabona ijyanye na Rubavu.'

Akomeza ati 'Nibyo hari abahomba! Hari 'event' duhomba, hari n'izindi twunguka. Ariko mu by'ukuri nivugiye ku bwanjye, niba hari iyo nahombye, ntabwo ikosa ndishinja BK Arena, ni njye uryishinja. Ni njyewe uryishinja. Ntabwo 'event' zose ari izo kujya muri BK Arena, ntabwo n'ubwo 'event' zose ari izo kujya muri Camp Kigali, hari n'izibera muri Hoteli kandi zikagenda neza.'

Nemeyimana Fiacre yavuze ko buri wese utegura igikorwa akumva ko ashaka kugikorera muri BK Arena akwiye no kubanza kwibaza niba yujuje ibisabwa ku byo BK Arena isaba.

Avuga ati 'Umuntu araho arabizi ko abantu be nibura batarenga ibihumbi bibiri cyangwa bitatu, ateguye igitaramo akijyanye BK Arena haje abantu ibihumbi bitatu cyangwa se bine.

Kuko BK Arena ntabwo ariyo yamamaza kugirango abantu baze, amafaranga yashoye arazamutse kuri BK Arena ageze kuri Miliyoni 30 Frw cyangwa se Miliyoni 40 Frw, mu by'ukuri biragoye ko ba bantu ibihumbi bitatu bazagaruza yayandi watanze. Mu y'andi magambo tuvugishije ukuri, icyo gitaramo nticyari icya BK Arena.' 

Nashakaga kugerageza uburyo bushya!

Umuramyi Chryso Ndasingwa, ku wa 5 Gicurasi 2024 yakoreye igitaramo gikomeye muri BK Arena- Icyo gihe byamugize umuhanzi wa Kabiri w'indirimbo zo kuramya no guhimbaza Imana wabashije kuzuza iriya nyubako.

Muri iki gihe ari kwitegura gukora igitaramo cye cyo kwizihiza Umunsi wa Pasika, ndetse agitangaza bwa mbere yavugaga ko azagikorera muri BK Arena. 

Ariko aherutse gutangaza ko azataramira mu Intare Conference Arena, aho azaba ari kumwe n'abandi bahanzi barimo nka Papi Clever na Dorcas, True Promises n'abandi.

Iki gitaramo yise 'Easter Experience' kizaba ku wa 20 Mata 2025. Mu kiganiro na InyaRwanda, Chryso Ndasingwa yasobanuye ko kudasubira gutaramira muri BK Arena byashingiye ahanini mu kuba yarashakaga kugerageza uburyo bushya.

Ati 'Nahisemo kudasubira muri BK Arena kuko nashakaga kugerageza ubundi buryo bushya no gutanga ubunararibonye butandukanye ku bakunzi n'abafatanyabikorwa banjye. Ntabwo ari uko hari ikibazo kihariye cyabaye, ahubwo ni icyemezo cyafashwe hashingiwe ku cyerekezo cy'uyu mwaka no ku buryo nshaka ko igitaramo kigenda.'

Chryso Ndasingwa yanavuze ko kudasubira muri BK Arena bidashingiye ku makuru yavuzwe ko yahombeye mu gitaramo yahakoreye.

Ati 'Oya! Ibyo si byo. Igitaramo cyabereye muri BK Arena cyari igitaramo gikomeye kandi cyagize impinduka zikomeye mu muziki wanjye.'

Akomeza ati 'Ibibazo by'ubucuruzi bihora bihari. Ariko ibyo sinabifata nk'igihombo ahubwo ni amasomo n'ubunararibonye. Uyu mwaka mfite indi gahunda itandukanye, kandi nizeye ko izatanga umusaruro mwiza.'

Byose biterwa no gukorera ahantu utazi amakuru yayo, kandi ni ubucuruzi

Umwe mu bagabo bakoreye ibitaramo bitatu muri BK Arena, yabwiye InyaRwanda ko gukorera igitaramo muri iriya nyubako ugasubirayo cyangwa ntusubireyo biterwa n'impamvu nyinshi.

Ati 'Hari ibitaramo byinshi BK Arena itera inkunga, ariko ugasanga wowe ugiyeyo nta makuru ufite, ugasanga baguciye Miliyoni 50 Frw ukabyemera kubera ko nta makuru ufite, nta bumenyi ufite muri ibyo bikorwa, bikarangira uhombye.'

'Abanyarwanda tugira ikibazo cyo kwigana, ugasanga ndi kuvuga nti niba kanaka akoreyemo kuki njyewe ntakoreramo, abantu benshi njyewe mbona bahombera aho. Ariko muri Arena harimo uburyo bwo gufasha abahanzi, n'ubwo abo turi kuvugaho ari abacuruzi. Iyo uje werekana ko ufite ubushobozi, urwo ruhande rwo gutera inkunga ntarwo ubona. Si abantu bacye Arena imaze gutera inkunga.'

Uyu mugabo yanavuze ariko ko bitumvikana ukuntu BK Arena ifata 15% ku buri tike wakongeraho 18% y'umusoro, bikaba 32% kuri buri tike.

Ariko kandi anavuga ko bitumvikana ukuntu yiharira ibikorwa, ku buryo udashobora no gucururizamo ibyo kurya no kunywa. Ati 'Aho hose Arena ijyamo igashyiramo umuheha, igatwaramo amafaranga.'

Anavuga ko n'igiciro cya 'Bouncer' umwe cyakabaye cyumvikanwaho, kuko ukorera muri BK Arena ahembwa ibihumbi 25 Frw 'ni mu gihe hanze aha nshobora kubona uw'ibihumbi 10 Frw'.

Abajijwe niba ateganya gusubira gukorera muri Arena, yasubije ko bishoboka cyane 'kuko njye nzi imikorere yabo, nzi uko dukorana'.

Abahanzi batinya guhomba bakagurisha ibitaramo byabo?

Ushobora kuba warumvise ko Israel Mbonyi yagurishaga ibitaramo bye bya Noheli  kuri East African Party (EAP), wanumvise ko icyo aheruka yari yakigurishije Authentic.

Kugirisha igitaramo ku muhanzi ni kimwe mu bikorwa no hirya no hino ku isi; hari ababikora mu rwego rwo kwirinda ko bahomba, hari n'abandi babigurisha kubera ko baba bashaka gufata igihe kinini cyo kwitegurira ibikorwa byabo by'umuziki.

Nemeyimana Fiacre yabwiye InyaRwanda ko atemeranya n'abavuga ko abahanzi bagurisha ibitaramo byabo kubera ko baba batinya guhomba.

Ati 'Ubundi se kuki aririmba akanitegurira. Ntabwo umuntu yakabaye ari umuririmbyi ngo hanyuma ajye mu byo gutegura 'Stage' noneho yongere anategure 'Performance' ye, ategura uko aramamaza, uko azamanika ibyapa, uko atanga za 'Invitation', iyo si imirimo y'umuhanzi, ni imirimo ya 'Promoters', ahubwo umuhanzi utabikora njyewe numva nakwibaza uko aba akora.

'Umuntu ibye ni impano, ni ukunezeza abafana. Hari abandi n'abo bashinzwe gutegura no gushyira mu bikorwa ibitaramo. Buriya se ugirango ni ukuyigurisha, buriya urebye mu mikoranire wasanga ari ubufatanye baba bafitanye hagati y'abo bantu bombi, yaba 'Promoter' ndetse n'umuhazi. Ubuse Israel Mbonyi na The Ben bakugurishe igitaramo wabaha angahe? 

Ni ibiki abategura ibitaramo basaba ubuyobozi bwa BK Arena?

Nemeyimana avuga ko n'ubwo bimeze gutya ariko, hakwiye kurebwa uburyo abahanzi bateguriramo ibitaramo bashyigikirwa bagahabwa ubufasha buborohereza gukoreramo ibitaramo.

Yavuze 'Birababaje kuba wakumva ko ibitaramo by'imbere mu gihugu byabereye mu mwaka bitarenze bine, kandi iriya ni inzu iri ku rwego mpuzamahanga y'abanyarwanda. Nasaba Leta ko abahanzi bacu bashyigikirwa, ugiye muri BK Arena, bishobotse bamuhe aho gukorera, yishyure ibindi bisigaye asabwa.'

Nemeyimana Fiacre yanasabye abanyamafaranga n'abandi gushora imari mu muziki, no gutera inkunga ibitaramo n'ibikorwa by'abahanzi biteguwa, kuko iyo urebye usanga abategura ibitaramo baterwa inkunga n'abantu bamwe. Avuga ati 'Rero kwigondera iriya nyubako udafite abaterankunga ntabwo bishoboka.'

Yavuze ko hanakewe ibindi bikorwaremezo, kuko nka Israel Mbonyi yamaze kugaragaza ko yarenze urwego rwa BK Arena, bityo Leta ikwiye gutekereza uburyo yanashyiraho uburyo bworohereza abahanzi gutaramira muri Sitade Amahoro.

Ariko kandi anasaba abashoramari gutekereza ku rwego rw'uruganda rw'umuziki, bagashoramo imari 'kuko harimo amafaranga'. 

Ati 'Byumvikana neza kudasubira muri BK Arena ntabwo bishingiye ku gihombo gusa. Erega wateguye igitaramo ukabona abantu ibihumbi mu nyubako yakira abantu ibihumbi 10, uhita wibwiza ukuri, ukamenya ko wari wagiye ahantu hatari ahawe.' 

'Ntabwo Israel Mbonyi yahombye, ntabwo The Ben yahombye, batanasubiyeyo si impamvu z'uko ari igihombo, ni utundi tuntu tujyanye n'imitegurire.'

Israel Mbonyi amaze gukorera ibitaramo bitatu muri BK Arena yikurikiranya, ariko biba biri mu maboko y’abandi babiguze
Ibihumbi by’abantu bakoranira muri BK Arena bakihera ijisho igitaramo, ni mu gihe bamwe mu bahanzi basoza bataka igihombo

Muri Gicurasi 2024, Chryso Ndasingwa yakoreye igitaramo gikomeye muri BK Arena- Yatangaje ko kudasubirayo byatewe n’impamvu zirenze ibihombo byavuzwe
Ku wa 1 Mutarama 2025, The Ben yakoreye igitaramo gikomeye muri BK Arena mu kumurika Album ‘Plenty Love’