Category: Uncategorized

Mu kiganiro yagiranye na Fox News, JD Vance, yavuze ko Amerika yateye intambwe mu guha urubuga impande zombi zigatanga ibitekerezo byazo mu gukemura amakimbirane.

Ati “Dufite inyigo y'uko amahoro yaboneka ndetse twarayitanze tugiye gukora uko dushoboye mu minsi 100 iri imbere kugira ngo tugerageze guhuza impande zombi.'

JD Vance yavuze ko Amerika yakoze akazi gakomeye mu kunga impande zombi avuga ko mbere y'uko ubutegetsi bwa Trump bwinjira mu kibazo cya Ukraine n'u Burusiya, ibyo bihugu bitari byarigeze bigirana imishyikirano na mike, ahubwo byakoraga bikozanyaho.

Yavuze ko kugeza ubu byibura ibiganiro bya dipolomasi ari byo biri gutuma impande zombi zihura.

Mu bituma amahoro ataboneka hagati y'impande zombi harimo kuba buri ruhande rutemera ibyo urundi rusaba.

Perezida w'u Burusiya, Vladimir Putin, yavuze ko kugira ngo amasezerano y'amahoro agerweho Ukraine igomba kwemera ko uduce tune harimo na Crimea ari utw'u Burusiya ndetse igahagarika n'icyifuzo cyayo cyo kwinjira muri OTAN.

Intumwa ya Trump, Keith Kellogg, yavuze ko Ukraine igomba kwemera guhara tumwe mu duce ikemera ko ari utw'u Burusiya kugira ngo intambara hagati y'ibi bihugu byombi ihagarare. Gusa Ukraine yavuze ko ibyo bitashoboka.

U Burusiya bwashimye uburyo ubutegetsi bwa Trump bwitwaye muri iki kibazo aho Putin yavuze ko butandukanye n'ubwabanje bwa Joe Biden.

Amerika yihaye indi minsi 100 mu gukemura amakimbirane ya Ukraine n'u Burusiya

Meya Muzungu yavuze ko nyuma y'urupfu rwa Nyiranyamibwa Beatrice wishwe n'abagifite ingengabitekerezo ya Jenoside, bashyizeho ingamba zo kwigisha no gutahura hakiri kare abafite ingengabitekerezo ya Jenoside.

Yari mu kiganiro ako karere kagiranye n'abanyamakuru ku wa Gicurasi 2025, cyibanze ku kugaragariza ishusho y'akarere mu nkingi zose ubukungu, imiyoborere n'imibereho myiza y'abaturage.

Meya Muzungu yavuze ko mu busesenguzi bakoze basanze mu bituma aka karere kagaragaramo ingengabitekerezo ya Jenoside ku bwinshi bishingira kuba hari abahamijwe ibyaha bya Jenoside bagatoroka ubutabera ntibafungwe no kuba hari imiryango itabwiza abana babo ukuri kuri Jenoside yakorewe Abatutsi.

Ati 'Ingengabitekerezo ni uburozi. Biturutse ku kazi kakozwe kuva muri Nyakanga 2024 tumaze kwakira ibirego by'ingengabiterezo [ya Jenoside] 58, bashyikirijwe ubutabera ndetse baranakatirwa.'

Perezida wa IBUKA mu Karere ka Karongi, akaba na Perezida w'Inama Njyanama y'ako karere, Ngarambe Vedaste, mu kiganiro na IGIHE yavuze ko ibirego 58 by'ingengabitekerezo ya Jenoside mu mezi icyenda ari nyinshi cyane.

Ati 'Biteye isoni n'agahinda kubona muri iki gihugu hari abibona mu moko no kwica abacitse ku icumu.'

Kubera imbaraga zashyizwe mu guhiga abahamijwe ibyaha bya Jenoside bagatoroka ubutabera, Akarere ka Karongi ku bufatanye n'izindi nzego kamaze kuta muri yombi abantu 38, abenshi bari baratorokeye mu Ntara y'Iburasirazuba.

Aka karere kashyizeho gahunda ihoraho yo kwigisha abaturage ibijyanye ubumwe n'ubudaheranwa na gahunda ya Ndi Umunyarwanda.

Mu mezi icyenda i Karongi habonetse ibirego 58 by'ingengabitekerezo ya Jenoside

Bagaragaza ko bagorwa no gukora icyo kizamini gishya bitewe n'uko gisaba mudasobwa kandi bose batazitunze, icyakora bakavuga ko ikizamini ubwacyo nta kibazo giteye.

Habimana Olivier yabwiye RBA ati 'Icya mbere ugomba kuba ufite ni mudasobwa irimo 'webcam' kandi si buri wese mu bana barangije kwiga uba ufite mudasobwa nziza gutyo.'

Mudacumura Rosette we yavuze ko hari bamwe mu rubyiruko rushaka akazi bajya ku ruga rwa MIFOTRA basanga kiriho bakabireka bitewe no kubona nta buryo bwo kugikora bafite.

Bizimana Fiston we yagize ati 'Kujya gukoresha mudasobwa zo muri 'cyber cafe' na byo bisaba ubundi bushobozi kandi ho haba hari n'urusaku bigoye kuhakorera ikizamini.'

Minisitiri w'Abakozi ba Leta n'Umurimo, Amb Nkulikiyinka Christine, yasobanuye ko ikizamini cya 'psychometric test' nta we ukwiye kukigiraho ikibazo kuko uburyo giteguyemo bworohereza abantu kugikora, icyakoze ko hari ibizakomeza kunozwa.

Ati 'Tuzi neza ko hari abashobora kuba badafite ibyo bikoresho koko ariko uko abantu bagenda bamenyera, haboneka ubushobozi bizagenda na byo bihinduka.'

Ikizamini cy'isuzumabushobozi ni cyo kibanza mbere yo gukora ikizamini cy'akazi cyanditse ndetse n'icyo mu buryo bw'ikiganiro (interview).

Abagikora, basabwa kugira nibura amanota 50% kugira ngo bemererwe gukora ibindi bizamini bizanzwe by'akazi.

MIFOTRA yashyizeho icyo kizamini mu ntangiriro za Werurwe 2025.

Giteganywa mu ngingo ya karindwi y'Iteka rya Perezida nimero 128/01 ryo ku wa 03 Ukuboza 2020 ryerekeye gushaka abakozi ba Leta n'amahugurwa ahabwa abakozi bagitangira akazi.

Mu rwego rwo korohereza abasaba akazi, icyo kizamini gikorerwa aho umuntu aherereye hose bitamusabye kujya kuri site z'ibizamini ariko kigakorerwa kuri mudasobwa kandi ifite internet ihagije.

Bamwe mu rubyiruko batangaje ko bagorwa no gukora ikizamini gishya MIFOTRA yashyizeho kuko gisaba imashini kandi ntazo bagira

Buzubakwa hafi y'Ibitaro bya Nyagatare aho buri ku buso bwa hegitari eshatu, bukazuzura butwaye miliyoni 309 Frw.

Muri ubu busitani hazashyirwamo ibyuzi bihangano, ahateye ibiti byiza bikurura amafu, inzu zicururizwamo ikawa n'ibyo kurya, ibice birimo intebe zo kwicaraho n'ibindi byinshi.

Umuyobozi w'Akarere ka Nyagatare, Gasana Stephen, yavuze ko bahisemo kubaka ubu busitani buri ku buso bunini mu rwego rwo kongera ibikorwaremezo birushaho guteza imbere uyu mujyi no gufasha abawutemberera kubona iby'ibanze nkenerwa.

Ati 'Hazaba harimo n'intebe mo imbere no hanze, tuzashyiramo intenet kugira ngo urubyiruko rwiga muri izi kaminuza ebyiri dufite, abiga mu mashuri yisumbuye n'abandi babone iyo internet kandi ayibone ahantu hisanzuye ku buryo bimufasha gukora ubushakashatsi bwe no mu masaha ya nimugoroba.'

Meya Gasana avuga ko bazakomeza kubaka ibikorwaremezo mu Mujyi wa Nyagatare yaba imihanda, sitade, ikigo cy'urubyiruko, ibikorwa by'amashanyarazi n'ibindi.

Bigwi Channel wiga muri Kaminuza y'u Rwanda Ishami rya Nyagatare, yabwiye IGIHE ko bishimiye ubu busitani bugiye kubakwa kuko buzabafasha cyane.

Ati 'Bizadufasha gukora ubushakashatsi kuko byatugoraga kubona internet, wayiboneraga mu kigo gusa wahava bikaba birarangiye ariko ubu tuzajya tunagenda tugere mu mujyi tuyibone.''

Uwera Claire we yavuze ko ubu busitani babwishimiye kuko nta handi hantu hari hahari hanini hahurira abantu benshi.

Kugeza ubu Akarere ka Nyagatare kabarizwamo kaminuza ebyiri, harimo Kaminuza y'u Rwanda, Ishami rya Nyagatare na East Africa University, kuri ubu hamaze kubakwa ibirometero 25.5 by'imihanda ya kaburimbo ifasha abatuye muri uyu mujyi.

Ubusitani bugiye gushyirwa mu Mujyi wa Nyagatare buzashyirwamo n’ibyuzi bihangano

Biteganyijwe ko mu busitani buzashyirwa mu Mujyi wa Nyagatare hazashyirwamo na internet ikoreshwa n’ababurimo

Ubusitani bugiye gushyirwa mu Mujyi wa Nyagatare buzashyirwamo inzu zicuruza ikawa n’ibindi

Mu buhamya yatangiye mu gikorwa cyo kwibuka Abatutsi barenga ibihumbi 14 biciwe kuri Paruwasi ya Mibilizi no mu nkengero zaho yavuze ku wa 7 Mata 1994, Abatutsi bo mu karere ka Rusizi bahise batangira kwicwa.

Umuryango we n'abaturanyi be bahungiye ku ishuri rya Nyakanyinya, Interahamwe zihageze zibasaba kuva mu byumba by'amashuri bakajya muri 'atelier'.

Aho muri atelier ni ho Interahamwe zabagoteye zibateramo ama-grenade kuva saa cyenda kugera saa kumi n'ebyiri za mu gitongo. Muri izo grenade harimo iyamuguyeho ata ubwenge, aho azanzamukiye abona afite igikomere kinini ku itako.

Ati 'Nakangutse mfite igikomere kinini ku itako, murabona kumwe botsa inyama ikikunjakunja ni ko hari habaye, nta maraso yavaga iyo gerenade yari yahatwitse. Nararebye mbona ikintu cy'umweru nkozeho numva ni igufwa.'

Nyiranzabicaho yavuze ko uwo munsi Interahamwe zishe Abatutsi zikananirwa, zisaba abagore n'abana bari batarapfa gusohoka, zikajya zambika umwana ubusa uwo zisanze ari umuhungu zikamucamo ibice.

Nyuma izo Nterahamwe zagiye mu ikawa zari hafi aho zifata amashara zitwika imirambo n'abari bagitera akuka.

Birangiye kandi haje Interahamwe z'i Mururu zifata bamwe mu bakobwa n'abagore bakiri bato zikajya zibasambanya.

Nyiranzabicaho yavuye aho yerekeza ku Cyato ahura n'umuntu bari baziranye na we wari uri gukora Jenoside ariko ntiyamwica bageze ku Cyato, aharara rimwe baramwoza, bamujyana mu Bitaro bya Mibilizi.

Mu nzira yerekeza i Mibilizi ntiyabashaga kugenda kubera cya gikomere cyo ku itako cyanyuzagamo kikava amaraso.

Hari aho yaciye ku bagore b'Abahutukazi bamubwira ko nakomeza umuhanda ahura n'Interamwe zagiye kwica i Mibilizi zihindukiye zikamwica.

Yaribwiye ati 'Uwampa ayo mahirwe nkahura na bo bakampuriraho ari benshi bakanyica'.

Ku wa 30 Mata 1994 yavuye mu Bitaro bya Mibilizi ajya kuri Paruwasi ya Mibilizi, ahasanga abantu bake kuko abenshi bari baramaze kwicwa.

Mu nterahamwe zamusanze kuri Paruwasi ya Mibilizi harimo Yusuf Munyakazi yabagezeho afite inkota ndende yambaye imyenda ya MRND arebye ukuntu bari gutaka arabareka arigendera kuko yari ashimishijwe n'uko bari gupfa bababaye.

Abifashijwemo na Cyrille utarahigwaga yavuye i Mbilizi ajya mu Gishoma, na ho ahava ajya i Mushaka, aharwarira kuva muri Gicurasi na Kamena ahava yerekeza i Bukavu.

I Bukavu yasanzeyo ababikira bakomeza kuvura cya gisebe, abagore b'Abanyekongo bakamugirira impuhwe, ariko nyuma Interahamwe zigeze muri RDC yahoze ari Zaïre, Abanyekongo barahinduka bajya babona Umututsi bakamutera amabuye. Byatumye ahava ajya i Goma, nyuma ahava ajya i Kigali.

Ashima Inkotanyi zamufashije akiga uburezi, ubu akaba ari umurezi muri Kaminuza ya Mudende kandi 'Nigisha abanyeshuri bose ntabavanguye.'

Nyiranzabicaho yanyuze mu bihe bitoroshye muri Jenoside yakorewe Abatutsi mu 1994

Abarokokeye i Mibilizi banenga ababasabye imbabazi nyamara bakabima amakuru y’aho ababo bajugunywe

Babigarutseho ubwo hatangwaga ibitekerezo ku mushinga w'itegeko rigenga serivisi z'ubuvuzi rikomeje kwigwaho no gusesengurwa muri Komisiyo y'Imibereho myiza y'Abaturage mu Nteko Ishinga Amategeko.

Ingingo ya 77 muri uwo mushinga w'itegeko iteganya ko gutwitira undi byemewe iyo umuganga yemeje ko uwasabye gutwitirwa n'undi adashobora gutwita cyangwa kubyara cyangwa hemejwe ko ubuzima bwe n'ubw'umwana bwajya mu kaga mu gihe cyo gutwita cyangwa kubyara.

Ingingo ya 76 yo yemeza ko gutanga intanga cyangwa urusoro ari igikorwa abantu ku giti cyabo cyangwa abashyingiranywe bakora batanga ku bushake intanga zabo cyangwa urusoro rwabo kugira ngo bafashe abandi gutwita.

Icyakora gutanga intanga cyangwa urusoro hagamijwe kororoka byemerwa gusa iyo izo ntanga cyangwa urwo rusoro bihabwa abashyingiranywe.

Dr. Joseph Ryarasa Nkurunziza yagaragaje ko izo ngingo zikwiye kuvugururwa hagatangwa uburenganzira ku bantu bose, kuko hari abo usanga batarashyingiranywe kubera impamvu zitandukanye cyangwa batifuza gukora imibonano mpuzabitsina ariko bifuza kubona umwana.

Ati 'Mu by'ukuri ni byo hari abadashobora kubyara baragerageje byaranze barageze no kwa Muganga […] akenshi ntabwo umugabo ari we uhitamo ko umugore akeneye gutwitirwa, ahubwo hari n'umukobwa wabuze amahirwe yo kubona umugabo ariko akeneye kubyara, hari n'undi udakeneye kuryamana n'uwo mugabo ariko akeneye intanga ze. Itegeko ntirirebe gusa wa wundi udashobora kubyara, kuko nshobora kuba nta gikundiro mfite ariko nkaba najya ahabikwa intanga nkababaza izo bafite bakaba bazimpa.'

Yavuze ko hari n'abantu baba barazinutswe abagabo kubera ibikorwa by'ihohoterwa biba byarababayeho, babonye, ibyakorewe ababyeyi babo cyangwa banyuzemo ariko bakifuza kubona abana.

Umuyobozi Mukuru wa HDI, Dr Kagaba Aflodis, yasabye ko hashyirwamo ingingo y'uko hazajyaho iteka rya Minisitiri rizasobanura uko bizajya bikorwa mu kwirinda ko itegeko rizajya rihinduka uko iterambere ryagenda riza.

Ati 'Ntabwo twashobora gutekereza ko uko twororokaga mu myaka 200 ishize ariko bizakomeza. Hari impamvu nyinshi cyane, zirimo uburwayi ariko na sosiyete yacu hari umuntu uvuga ngo njyewe nta mugabo nshaka ariko ugasanga yashaka umwana. Ashobora kuba ari ubushake bwe cyangwa ari ukubura uza kumutereta.'

Yakomeje ati 'Tuvuze ko ugomba kubyara ari uko wakoze imibonano mpuzabitsina twaba twirengagije ko ikoranabuhanga riri gutera imbere, dushobora kubyara tudakoze imibonano mpuzabitsina.'

Yavuze kandi ko bidakwiye gukorwa nk'ubucuruzi nk'uko usanga bimwe mu bihugu abagore b'abakene baba baragizwe nk'imashini zibyarira abandi kubera amafaranga.

Depite Mujawabega Yvonne yavuze ko iri tegeko rikwiye gutanga ibisubizo ku bantu bafite ibibazo byo kutabyara, aho guharanira ko abantu bazabyara abana badafitiwe inkomoko izwi.

Itegeko riteganya ko uwemerewe gutwitira undi agomba kuba afite hagati y'imyaka 21 na 40 y'amavuko, kuba yarabashije gutwita kugeza abyaye nta bibazo no kuba kuba afite ubuzima bwiza.

Sosiyete sivile yasabiye abatarashyingiranywe kwemererwa gutwitirwa

Ni ingingo yagarutsweho n'Intumwa yihariye ya EU mu Karere k'Ibiyaga Bigari, Johan Borgstam, mu kiganiro yagiranye n'itangazamakuru i Kinshasa ku wa Kane tariki 1 Gicurasi 2025.

Borgstam yavuze ko EU ishyigikiye ibiganiro by'amahoro biri kuba hagati y'u Rwanda na RDC bigizwemo uruhare na Qatar na Amerika.

Yavuze ko guhura kwa Perezida Paul Kagame na Félix Antoine Tshisekedi i Doha n'amahame agamije gushaka amahoro yashyizweho umukono ku wa 25 Mata i Washington, ari intambwe ikomeye.

Yakomeje avuga ko nubwo bimeze gutyo, ibi biganiro bidakwiriye gutesha agaciro ibyari byagezweho na Perezida João Lourenço.

Ati 'Ni ingenzi ko buri buryo bushya butangijwe, bwubakira ku byagezweho n'ibiganiro byo ku rwego rw'akarere biri kuba. Nk'uko mubizi, Perezida wa Angola, João Lourenço na Guverinoma ye bashyize ubushobozi n'imbaraga mu biganiro bya Luanda. Izi mbaraga zatinze umusaruro kandi tugomba kwirinda gutangira bundi bushya.'

Johan Borgstam atangaje ibi mu gihe byitezwe ko muri Kamena 2025, u Rwanda na RDC bizasinya amasezerano y'amahoro azasinyirwa imbere ya Perezida Donald Trump.

Kugeza ubu kandi ibiganiro byabaga binyuze muri gahunda ya EAC-SADC, byakuweho ahubwo bihurizwa mu mutaka wa Afurika Yunze Ubumwe, bivuze ko bikorwa birangajwe imbere na Togo.

Johan Borgstam ari i Kinshasa

Mu butumwa bugenewe Umunsi Mpuzamahanga w'Umurimo CESTRAR yatangaje kuri uyu wa 1 Gicurasi 2025, yagaragaje ko hari ibyo Leta yakoze mu kwita ku mukozi ariko igaragaza ko icy'umushahara fatizo kikiri ikibazo ku mibereho yabo.

Yakomeje iti 'Turashimira Leta y' u Rwanda ku mavugurura aherutse gukorwa mu birebana n'ubwiteganyirize bw'izabukuru aho dufite icyizere cyinshi ko iyongerwa ry'umusanzu ryabayeho rizagira ingaruka nziza cyane cyane ku bari basanzwe bafata amafaranga y'ubwiteganyirize y'intica ntikize.'

CESTRAR yagaragaje ariko ko ibyo byaje byongera uburemere ku mushahara w'umukozi na wo ubwawo utari uhagije ugereranyije n'ibiciro biri ku isoko n'ibindi byinshi by'ibanze umukozi akenera nk' ifunguro, ingendo, icumbi, kwivuza n'ibindi, isaba Leta kugira icyo ikora.

Iti 'Nk'uko tumaze igihe tubisaba, Leta ikwiriye gushyiraho uburyo buhamye bwo kuvugurura umushahara hashingiwe ku izamuka ry'ibiciro n'ihindagurika ry'agaciro k'ifaranga. Twongeye kandi kwibutsa ko gushyiraho umushahara fatizo n'ingengabihe yo kuwuvugurura itarengeje imyaka itanu, byarushaho kubungabunga imibereho myiza y'umukozi n'umuryango we, n'ubukungu bw'Igihugu muri rusange.'

CESTRAR kandi yashimye abakoresha bubahirije ibyo Leta yashyizeho bakongera ingano y'umusanzu w'ubwiteganyirize bishyurira abakozi babo, iboneraho kubikangurira abandi bakoresha basigaye byaba ngombwa Leta ikabitangaho inama cyangwa amabwiriza.

Ibipimo ku mibereho myiza y'abaturage (EICV7) byasohotse muri Mata 2025 bigaragara ko imirimo mishya ihangwa buri mwaka mu Rwanda yiyongereye iva ku mirimo 155.994 mu 2017 igera ku 358.564 mu 2024.

Umubare w'abaturage bose bakorana wo wavuye kuri miliyoni 2.9 bingana na 44.2% mu 2017 ugera kuri miliyoni 4.4 bingana na 53.5% mu 2024.

Bitewe n'ingaruka za Covid-19, ubushomeri bwari bwarazamutse bugera kuri 21.1% mu 2021 buvuye kuri 17.3% bwariho mu 2017, icyakora mu 2024 bwaramanutse bugera kuri 14.9%.

Ibyo bipimo byatumye ubukene na bwo bugabanuka buva kuri 39.8% mu 2017 bugera kuri 27.4% mu 2024.

CESTRAR ariko yasabye ko hashyirwaho uburyo bwo kugenzura ko imirimo ihangwa igira impinduka nziza ku bayikora kugira ngo hatazabaho kugendera ku mibare y'imirimo ihangwa gusa, hatitawe ku miterere n'akamaro kayo.

Yasabye kandi urubyiruko gushishikarira guhanga imirimo by'umwihariko gukoresha ikoranabuhanga harimo iry'ubwenge buhangano (AI) ariko bakirinda ko ribasimbura mu kazi ndetse isaba inzego bireba gufasha mu kugenzura ingaruka z'iryo koranabuhanga ku buzima bw'abakozi kuko rikomeje gukoreshwa cyane.

Yibukije umukozi ko atari igikoresho ahubwo ari umufatanyabikorwa mu kazi bityo ko uburenganzira bwe bugomba kubahirizwa agahabwa agaciro kamukwiye.

CESTRAR yasabye Leta gushyiraho umushahara fatizo no kujya iwuvugurura buri myaka itanu