Category: Uncategorized

Ni ko bimeze ku isi yose ndetse umuntu amenyekana yaranyuze muri byinshi. Ubu se wakwemera ko Umuraperi Shawn Corey Carter uzwi nka Jay Z, uri mu baraperi mu bari ku Isi y'abazima bake bafite umutungo ubarirwa muri Miliyari imwe y'amadorali y'Amerika yabayeho mu buzima bubi?

N'ubwo atari byo ngambiriye kuvugaho uyu munsi nagira ngo ubanze wumve ko umuntu kugira ngo abe icyamamare anyura muri byinshi. Uyu mugabo yacuruje ibiyobyabwenge mbere y'uko atangira umuziki akaba umuraperi ukomeye ku isi.

Ibya Jay-Z reka tubireke tuzabigarukaho ubutaha! No mu Rwanda hari benshi uzi ariko utazi inzira zitandukanye banyuze ariko nta n'umwe wanyuze mu nzira nk'iy'uyu muraperi.

Benshi uzi uyu munsi mu Rwanda bagiye banyura mu nzira nyinshi zimwe zikanga izindi zikanyerera cyangwa se bakabona bitari kugenda uko babyifuza bagaca indi mivuno.

Dashim

Dushimimana Dashim ni umwe mu bazwi cyane muri iki gihe mu itangazamakuru. Azwi cyane mu biganiro birimo icyo yise 'Inzu y'Ibitabo' atambutsamo agace kihariye yise 'Ijambo ryahindura ubuzima'. Kuri ubu ni umunyamakuru wa Fine Fm iri muri radiyo zikunzwe.

Mbere yo kwimariramo itangazamakuru, Dashim yabanje kuba umuhanzi ariko ashimyeho biranga. Uyu musore yakoze indirimbo zirimo iyo yise 'Gasaro ka Mama'. Iyi ndirimbo yagiye hanze mu 2011 ikorwa na Lick Lick mu buryo bw'amajwi.

Dashim yatangiye ari umuhanzi nyuma aza kubivamo 

David Bayingana

Ni umwe mu banyamakuru bakundwa cyane mu gice cy'amakuru ajyanye n'imikino ariko mu busesenguzi. Ubu ni umwe mu banyamakuru ba B&B FM UMWEZI.

Bayingana ni umwe mu banyamakuru bakoraga ibiganiro kuri Voice of Africa aho yakoranaga na Bagabo Adolphe wamenyekanye nawe mu muziki nka Kamichi aho bakoraga ikiganiro cya Star Forum cyakundwaga mu myaka ya 2008. Ibi biganiro yabikomatanyaga n’ibya Siporo.

Bayingana yaje kuva kuri iyi radiyo yerekeza mu zirimo Radio 10 ari naho yazamuye izina rye cyane muri siporo kurusha mu biganiro by’imyidagaduro. 

Akunda kugendana n'abahanzi ariko asa nk'uwahinduye umuvuno akigira muri siporo. Ibirori bitandukanye bijyanye na siporo ni we witabazwa nka MC. Twatanga urugero nko muri CHAN 2016, Imikino y'amagare n'ibindi bitandukanye.

Bayingana yatangiriye itangazamakuru kuri radiyo Salus akomereza muri Voice of Africa, aha hose yakoraga ibiganiro birimo n’iby’imyidagaduro aza kubivamo yinjira muri siporo. 

Seburikoko

Uyu musore azwi cyane muri sinema nyarwanda. Amazina ye asanzwe ni Niyitegeka Gratien. Muri kaminuza yize ibijyanye n'ubwarimu ndetse yigeze kubikoraho abifatanya no gukina filime.

Nyuma yaje kwirundumurira mu gukina filime atera umugongo ubwarimu detse ni umwe mu bakinnyi ba filime bakundwa na benshi mu Rwanda. Kuri ubu uretse 'Seburikoko' yamwitiriwe, afite indi filime y'urwenya acisha ku rubuga rwa Youtube yise 'Papa Sava' nayo ikundwa na benshi.

Seburikoko yabanje kuba umwarimu, nyuma aza kubivamo yiyegurira sinema 

Dj Pius

Uyu mugabo ubusanzwe yitwa Rickie Pius Rukabuza ariko mu myidagaduro azwi nka Dj Pius. Ni umwe mu bamaze igihe kinini mu ruganda rw'imyidagaduro yabayeho umu-Dj igihe kinini ndetse anaba umunyamakuru ku maradiyo atandukanye arimo nka City Radio mu biganiro by'imyidagaduro.

Yabaye mu itsinda ry'abaririmbyi rya Two 4Real ariko riza gutandukana. Ubu ni umuhanzi ku giti cye kandi ni umwe mu bakundwa na benshi mu Rwanda.

Dj Pius yabanje kuba umu-dj abivamo yiharira umuziki 

Murungi Sabin

Kuri ubu iyo umuntu avuze uyu mugabo buri wese ahita yumva ISIMBI TV. Murungi yabaye igihe kinini umunyamakuru w'imyidagaduro ariko yandika. Yakoreye Igihe na InyaRwanda. Yigeze kugerageza gukora itangazamakuru kuri radio Magic Fm ariko biza kwanga.

Mu 2018 ni bwo yinjiye mu biganiro byo kuri Youtube atangiza Isimbi Tv iri muri shene zikundwa na benshi mu Rwanda. Ugereranyije izina yari afite yandika n'iryo afite uyu munsi, ubona ko yahiriwe.

Murungi Sabin yamaze igihe kinini yandika nyuma aza kubireka ajya kuri Youtube 

KNC

Uno mugabo azwi nka Kakooza Nkuriza Charles ari naho havuye impine ya KNC. Yamenyekanye cyane ari umunyamakuru kuri City Radio ndetse yamenyekanye nka Dr Runiga mu ikinamico yise 'Indya Nkurye'.

Ntabwo yagiye kure cyane y'itangazamakuru kuko ubu yashinze Radio 1 na Tv 1 biri mu bitangazamakuru bikundwa na benshi mu Rwanda. Uyu mugabo wahiriwe n'ubushabitsi ni nyiri ikipe ya Gasogi United ikina mu cyiciro cya mbere cy'umupira w'amaguru mu Rwanda.

KNC yaretse gukina amakinamico n’umujyo w’itangazamakuru yakoraga aca undi muvuno ndetse ashinga ibitangazamakuru bye 

Alliah Cool

Uyu mukobwa yamenyekanye nka Alliah Cool muri sinema nyarwanda. Amazina ye asanzwe yitwa Isimbi Alliance. Izina rye ryabanje kunyura mu itangazamakuru aho yakoraga kuri Flash TV.

Ryakomeje kuzamuka ubwo yatangiraga gukina filime mu buryo bw'umwuga ubwo yakinaga muri filme yiswe 'Rwasa'. 

Ubu yahinduye umuvuno atangira gukora filime ze abifashijwemo na One Percent International MGT imureberera inyungu. Yahereye ku yo yise 'Alliah The Movie' ndetse hari n'indi yagiye gukorera muri Nigeria mu minsi yashize.

Alliah Cool yatangiye akina filime z’abandi aba n’umunyamakuru byose yarahagaritse ajya gutangiza filime ze

Yago

Nyarwaya Innocent wamenyekanye cyane ku izina rya “YAGO” ni umunyamukuru. Yakoreye ibitangazamakuru birimo Goodrich Tv, Radio&Tv10, ubu akaba afite umuyoboro we wa shene ya Youtube aho yawitiriye izina rye “YAGO TV SHOW”.

Kuva yahindura umuvuno akajya kuri Youtube ni bwo izina rye ryatangiye kuzamuka. Uyu musore aheruka kwinjira mu muziki aho yahereye ku ndirimbo 'Suwejo' ndetse aheruka gushyira hanze iyo yise 'Rata' naho kandi akaba ari gukora ibihangano bigakundwa.

Yago yahinduye umuvuno arahirwa 

Boubou

Uyu mugabo azwi mu gutegura ibitaramo bitandukanye, yamenyekanye mu birimo: 'Iwacu Muzika Festival, 'Primus Guma Guma Super Star [PGGSS]', East Africa Muzika n'ibindi. Mbere yari umubyinnyi.

Ni we washinze itsinda ry'ababyinnyi ryigeze kumenyekana mu 2000 ririmo umuhanzi Daddy Cassanova. Iri tsinda ryitwaga Cool Family, yaritangije mu 1997.

Muri iri tsinda, Boubou ntiyaribayemo igihe kinini, nyuma y'umwaka yahise ajya muri Canada aho yamaze imyaka ine, agaruka mu Rwanda iri tsinda naryo riri mu marembera.

Kuva ubwo iby'umuziki yatangira kubirebera ku ruhande n'ubwo yari agifite rwa rukundo.

Mu 2008 ni bwo yateguye igitaramo cya mbere cya East African Party yo gusoza umwaka wa 2008.

Icyo gihe yari yatumiye abahanzi bagera kuri barindwi bo mu Karere ka Afurika y'Uburasirazuba nka Nameless wo muri Kenya, Kidumu, Juliana Kanyomozi, itsinda ryahoze ryitwa Blue 3 na Micheal Ross, Zanto wo muri Tanzania, Dr Claude, Miss Jojo na Rafiki.

Kuva uyu mugabo yatangira gutegura ibitaramo ni umwe mu babikora bagahirwa ku buryo bamwe batebya bakavuga ko ari we nyirabyo.

Boubou watangiye ari umubyinnyi ubu ni umushoramari mu muziki

Bamenya

Uyu mugabo ni umwe mu bazwi muri filime nyaranda. Ubusanzwe yitwa Benimana Ramadhan, yavukiye mu Karere ka Nyarugenge i Nyamirambo. Yakuze azi umubyeyi we umwe cyane ko Se yitabye Imana muri Jenoside yakorewe Abatutsi mu 1994.

Bamenya ni umwe mu bakinnyi ba filime bamaze igihe kinini ariko ntabwo yari yarahiriwe. Yagiye no mu itangazamakuri kuri Flash Tv biranga ahitamo gukuramo ake.

Nyuma yo guhindura agatangira gucisha filime yanamwitiriwe kuri Youtube, izina Bamenya ryaratumbagiye ndetse rinazamura abandi batandukanye bakinana barimo Kanimba, Kecapu, Bijoux n'abandi.

Bamenya yahiriwe muri sinema nyuma yo gutangira gukina filime yamwitiriwe

Rayon Sports yongeye gutsindwa umukino wa 3 wikurikiranya nyuma yo gutsindwa na Etincelles FC na APR FC. Wari umukino usoza umunsi wa 15 wa shampiyona ari na wo munsi usoza imikino ibanza ya shampiyona. Iminota 15 ya mbere nta mahirwe afatika yabonetse uretse amwe ku ruhande rwa Gasogi United ariko Maxwell ntiyayabyaza umusaruro.

Ku munota wa 18, umukino wahagaze iminota 8 nyuma y'uko umunyezamu Hakizimana Adolphe yagonganye na rutahizamu wa Gasogi United, Maxwell, uyu munyezamu yahise atwarwa kwa muganga muri Ambulance yahise asimburwa na Hategekimana Bonheur.

Rayon Sports yaje gukora impinduka zitateguwe ku munota wa 34 ubwo havagamo Onana kubera imvune hinjiramo Paul Were. Uyu mukinnyi yafashije Rayon Sports kuko nyuma y'umunota umwe, yinjiranye ubwugarizi bwa Gasogi United ariko ateye mu izamu, Gael awohereza muri koruneri.

Ku munota wa nyuma w'igice cya mbere, Rudasingwa Prince yahawe umupira ashyizeho umutwe umupira uruhukira mu ntoki za Cuzuzo Gael. Ku munota wa 4 w'inyongera, Bugingo Hakim yahaye umupira mwiza Theodore Malipango yatsindiye Gasogi United igitego cya mbere. Amakipe yagiye kuruhuka ari 1-0.

Rayon Sports yatangiye igice cya kabiri ikora impinduka, Ndekwe Felix aha umwanya Moussa Camara.Ibi byafashije cyane Rayon Sports yashyize igitutu kuri Gasogi United mu minota 15 ya mbere y'igice cya kabiri ariko Prince na Moussa Camara ntibabyaza umusaruro amahirwe babonye.

Gasogi United na yo yanyuzagamo igasatira ari na ko abakinnyi barimo Hakim bagerageje amahirwe ariko imipira ntiyajya mu izamu, umukino warangiye ari 1-0.

Undi mukino wabaye uyu munsi, Kiyovu Sports yatsinze Marines FC 1-0. Nyuma y'umunsi wa 15, AS Kigali ni yo iyoboye urutonde n'amanota 30 inganya na Kiyovu Sports, APR FC ni iya 3 n'amanota 28 inganya na Gasogi United ya 4 ndetse na Rayon Sports ya 5.

Dr Butera ugiye kumara ukwezi muri Guverinoma, yasezeranye ku manywa yo kuri uyu wa Gatanu mu Rusengero rwa Christian Life Assembly i Nyarutarama mu Mujyi wa Kigali.

Ni nyuma y’iminsi ibiri n’ubundi asezeranye imbere y’amategeko n’uyu mukobwa mu muhango wabereye mu Mujyi wa Kigali.

Dr Butera Yvan w’imyaka 32, ni we muto mu bagize Guverinoma y’u Rwanda.

Kuri uyu wa Kane Agence France-Presse nibwo yatangaje ko hari raporo y’impuguke za Loni ku bibazo by’umutekano wa RDC yabonye, yemeza ko u Rwanda rwafashije umutwe wa M23 mu ntambara imazemo iminsi n’igisirikare cya Congo, FARDC.

Ni raporo yakunze kwibazwaho uburyo igera mu itangazamakuru Loni itarayisohora, dore ko no muri Nyakanga uyu mwaka imbanzirizanyandiko y’iyo raporo yagiye mu itangazamakuru igihe kitaragera.

U Rwanda rumaze iminsi ruhakana gufasha umutwe wa M23, rugaragaza ko ari ikibazo kireba Guverinoma ya Congo kuko ibyo M23 isaba ari amasezerano atarashyizwe mu bikorwa yasinywe n’iyo Guverinoma.

Umuvugizi wa Guverinoma y’u Rwanda, Yolande Makolo abinyujije kuri Twitter kuri uyu wa Gatanu, yavuze ko gukomeza kwegeka ibibazo bya RDC ku Rwanda, nta muti bizatanga.

Ati 'Politiki yo gushinja u Rwanda nk’uburyo bwo kwihunza inshingano ku ntege nke za Guverinoma ya RDC, ingaruka zabyo ni akaga ku baturage bo ku mipaka ihuza ibihugu byombi.'

Umuvugizi wungirije wa Guverinoma y’u Rwanda, Alain Mukuralinda kuri uyu wa Kane yabwiye TV5 Monde ko 'Ingabo z’u Rwanda ntabwo zijya zirenga umupaka, ingabo z’u Rwanda zicungira umutekano ku butaka bwarwo. Ntabwo u Rwanda rukeneye kwambuka imipaka mu gihe nta masezerano rufitanye na Guverinoma ya Congo.'

Mukuralinda yavuze ko Guverinoma y’u Rwanda itagira icyo itangaza kuri ibyo birego mu gihe raporo itarajya hanze, ngo hagaragazwe ibimenyetso simusiga.

Ati 'Ni ngombwa gutegereza ko ibimenyetso simusiga byerekanwa kugira ngo Guverinoma ibashe kugira icyo ibivugaho kuko iyo raporo ni nayo irimo ko ingabo za Congo zikorana na FDLR. Niho batubwira inama zahuje FARDC n’imitwe yitwaje intwaro ahitwa Pinga, baduha amatariki. Ni ibintu byo kwitondera rero kuko izo mpuguke ziratubwira M23 na FDLR, nyamara mu itangazamakuru bahisemo kuvuga gusa M23.'

Iyi raporo igarutse nyuma y’iminsi mike ibihugu birimo Leta Zunze Ubumwe za Amerika, u Bufaransa, U Budage n’ibindi nabyo bisohoye amatangazo bisaba u Rwanda guhagarika ubufasha kuri M23.

Mukuralinda avuga ko ubwo buryo atari wo muti w’ikibazo ahubwo ari ugutuma kidakemuka.

Ati 'Ntabwo kuba byavuzwe n’ibihugu bikomeye aribyo bibigira ukuri, mu gihe ibihugu byo mu karere by’umwihariko Perezida uyoboye kuri ubu Umuryango wa Afurika y’Iburasirazuba, yavuze ko nta bimenyetso simusiga byerekana ko ari u Rwanda. Ni ukwitondera ibiri kuvugwa n’ibihugu bya kure aho kureba ku bivugwa n’abayobozi ba hafi.'

Mu bihe bitandukanye uyu mwaka, FARDC ifatanyije na FDLR yarashe ku butaka bw’u Rwanda mu karere ka Musanze, ibisasu bigira ingaruka ku buzima bw’abaturage.

U Rwanda rumaze igihe rubigaragaza ndetse rugasaba Congo guhagarika ubwo bufatanye n’umutwe ugizwe n’abasize bakoze Jenoside yakorewe Abatutsi, ukaba unagamije guhungabanya umutekano w’u Rwanda.

Yolande Makolo yagize ati 'Raporo y’impuguke za Loni kuri RDC yanyereye ikajya mu itangazamakuru ikura urujijo ku byo u Rwanda rwari rusanzwe ruvuga. Ingabo za Congo (FARDC) zikomeje gufasha imitwe yitwaje intwaro by’umwihariko gukorana bya hafi n’umutwe ushingiye ku ngengabitekerezo ya Jenoside wa FDLR.'

U Rwanda kandi rwamaganye ubugizi bwa nabi bwibasiye abaturage bavuga Ikinyarwanda bakomoka mu Burasirazuba bwa RDC by’umwihariko abo mu bwoko bw’Abatutsi, bamaze iminsi bicwa bazizwa uko bavutse.

Intumwa yihariye y’Umunyamabanga Mukuru wa Loni ishinzwe kurwanya Jenoside, iherutse gusohora itangazo igaragaza ko ibiri gukorerwa muri Congo bishobora kubyara Jenoside hatagize igikorwa.

Mu ntangiriro z’Ukuboza 2022, Umuryango w’Ubumwe bw’u Burayi (EU) wafatiye ibihano abantu 17 bo muri RDC barimo na Justin Bitakwira wahoze muri Guverinoma, wahanwe ashinjwa gukwirakwiza imvugo z’urwango zibasiye abatutsi.

Diamond Platnumz wari utegerejwe i Kigali kuhakorera igitaramo, yavuze ko kitakibaye kubera guhuzagurika kw’abagiteguye.

Iki gitaramo cyagombaga kubera muri Kigali Arena kuri uyu wa Gatanu tariki ya 23 Ukuboza 2022, ni mu gihe yagombaga kugera i Kigali ejo hashize ariko baramutegereza baramubura.

Abinyujije ku mbuga nkoranyambaga, Diamond yavuze ko ababajwe no kuba atakitabiriye igitaramo yari yatumiwemo i Kigali ku bw’impamvu z’abamuteguriye igitaramo.

Ati 'Bitewe no guhuzagurika kw’abateguye igitaramo, mbabajwe no kubamenyesha ko igitaramo cyacu cy’i Kigali – Rwanda cyari giteganyijwe uyu munsi ku wa 23 Ukuboza 2022 kitakibaye.'

Uyu muhanzi yahishuye ko abajyanama be ndetse n’abanyamategeko be batangiye gukora kuri iki kibazo.

Diamond yavuze ko yatangiye gutekereza gukorera igitaramo mu Rwanda agataramana n’abakunzi be mu minsi ya vuba.