Category: Uncategorized

Ku munsi w’abakundana uzwi nka “Saint Valentin”, umuhanzi nyarwanda Bwiza Emerence azasusurutsa abantu mu gitaramo yise “A Night of Romance”.

Iri Joro ry’Urukundo riteganyijwe ejo ku wa Kabiri tariki ya 14 Gashyantare 2023, umunsi Isi yose iba yizihiza umunsi w’abakundana.

Bwiza witegura gutaramira i Burayi ku wa 4 Werurwe 2023, azasusurukiriza abakunzi be ku munsi w’abakundana muri Galaxy Hotel guhera saa 18h kugeza saa 22h.

Kwinjira ni ibihumbi 25 by’amafaranga y’u Rwanda ku muntu mu gihe abakundana (couple) ari ibihumbi 40 by’amafaranga y’u Rwanda, aya mafaranga batanze bakazayakoresha bageze mu gitaramo (ticket consumable).

Bwiza Emerance azasusurutsa abakunzi be ku munsi w’abakundana

Chief Inspector of Police (CIP) Mucyo Rukundo, ushinzwe guhuza ibikorwa bya Polisi n'abaturage mu Ntara y'Iburengerazuba, yavuze ko habanje gufatwa uwa mbere ahagana ku isaha ya saa tanu z'amanywa, biturutse ku makuru yatanzwe n'umuturage.

Yagize ati: 'Tugendeye ku makuru twahawe n'umuturage ko ateze imodoka yerekeza mu mujyi wa Kigali afite ibiyobyabwenge, hateguwe igikorwa cyo kumufata hashyirwa bariyeri mu muhanda Rubavu-Musanze mu mudugudu wa Kirerema, ubwo imodoka yari arimo yasakwaga basanga afite udupfunyika tw'urumogi 2,040 yari yashyize mu mufuka urimo ibishyimbo na karoti mu rwego rwo kuruhisha.'

Akimara gufatwa yavuze ko uwarumuhaye yamusabye kurushyira abakiriya be mu mujyi wa Kigali, akaba yari bumwishyure ibihumbi 30Frw agezeyo ariko nawe akaba arubitsa kuri mugenzi we bombi batuye mu kagari ka Kanyirabirori nabo bahise batabwa muri yombi.

Bose uko ari batatu bashyikirijwe urwego rw'Ubugenzacyaha (RIB) kuri sitasiyo ya Kanama kugira ngo hakomeze iperereza ku cyaha bakurikiranyweho, mu gihe hagishakishwa n'abandi bafatanya muri ubu bucuruzi.

Iteka rya Minisitiri Nº001/MoH/2019 ryo ku wa 04/03/2019 rigena urutonde rw'ibiyobyabwenge n'ibyiciro byabyo rishyira urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n'ibihano muri rusange, ingingo ya 263, ivuga ko umuntu wese ukora, uhinga, uhindura, utunda, ubika, uha undi, ugurisha mu Gihugu ibiyobyabwenge cyangwa urusobe rw'imiti ikoreshwa nka byo mu buryo bunyuranije n'amategeko, aba akoze icyaha.

Iyo abihamijwe n'urukiko ahanishwa igifungo cya burundu n'ihazabu y'amafaranga y'u Rwanda arenze miliyoni 20 ariko atarenze miliyoni 30 ku byerekeye ibiyobyabwenge bihambaye.

Umuyobozi wa Rayon Sports, Uwayezu Jean Fidele yasabye abakunzi b’iyi kipe gukomeza gushyira hamwe kuko abakinnyi babakeneye.

Ni nyuma y’uko ejo hashize ku Cyumweru tariki ya 12 Gashyantare 2023 batsinze APR FC 1-0 mu mukino w’umunsi wa 19 wa shampiyona ya 2022-23 ni umukino wabereye i Huye.

Nyuma y’uyu mukino, Uwayezu Jean Fidele uyobora Rayon Sports, yabwiye ISIMBI ko ashimira abakunzi b’iyi kipe uburyo bafatanyije mu bibazo ntibacike intege.

Ati “Ubutumwa ni uko mbashimira twarafatanyije, ibibazo twagiye tujyamo ntabwo twacitse intege kandi ntabwo twatatanye twashyize hamwe, nkaba mbashimira inkunga ya bo muri uru rugendo turimo.”

Yakomeje abasaba kugumya kuba hafi y’ikipe ya bo kuko ubu ari bwo ibakeneye cyane.

Ati “Ndabashishikariza gukomeza kuba hafi y’ikipe ya bo, turatsinze abakinnyi bakeneye ko tubashimisha kugira ngo bakomeze kwitwara neza, rero ndabasaba ko batera inkunga, inkunga y’ibitekerezo, inkunga y’ikindi cyashoboka ngo dukomeze uru rugendo kandi abakinnyi bacu bishimye. “

Rayon Sports ikaba yahise ifata umwanya wa 4 n’amanota 36 inganya na Gasogi United ya 3 na AS Kigali 2 ndetse na Etincelles FC ya 5 ni mu gihe APR FC iyoboye urutonde ifite amanota 37.

Perezida wa Rayon yasabye abakunzi ba yo kugumya kuyiba hafi

Hari mu mukino w’umunsi wa 19 wo Rayon Sports yaraye itsinzemo APR FC, benshi batunguwe no kubona Ishimwe Fiston buri kanya imyenda ye (Jersey) yuzuyeho amaraso bituma aza no gusimbuzwa aho umutoza we yavuze ko yakomerekeye muri uyu mukino.

Ishimwe Fiston yinjiye mu kibuga igice cya kabiri kigitangira asimbura Byiringiro Lague utari wahiriwe n’igice cya mbere.

Ubwo umukino wari ugeze ku munota wa 73, abantu batunguwe no kubona Ishinwe Fiston asohotse mu kibuga, yahise ahamagara abanga, ikabutura ye ahagana ku kibero cy’ibumoso hari huzuyeho amaroso.

Abaganga bamuhaye ubutabazi bw’ibanze ndetse n’ikabutura barayitunganya asubira mu kibuga.

Umusifuzi Nsoro yongeye gusohora uyu musore ku munota wa 80 ubwo ikabutura ye yari yongeye kuzuraho amaraso, ibintu bitemewe kuba yakinana umwenda uriho amaraso, yahise asimburwa na Mugisha Gilbert.

Nyuma y’umukino, umutoza wa APR FC, Ben Moussa yavuze ko Ishimwe Fiston yakomeretse abaganga bagerageza gutanga ubuvuzi bw’ibanze biranga.

Ati “Fiston yasohotse kubera igikomere, yari yakomeretse. Yagaragaje inshuro 2 amaraso ku myambaro ye, twagerageje gushaka igisubizo n’umuganga ariko amaraso yanga kurekera kuva, nahatirijwe kongera gukuramo Fiston nkashyiramo Mugisha, ni impinduka zitateguwe.”

Ishimwe Fiston yakomerekeye mu mukino bituma aza no gusimbuzwa

Ni ubutumwa yatanze kuri iki Cyumweru tariki 12 Gashyantare 2023, ubwo yaganiraga n'Abanyarwanda baba ku Mugabane w'u Burayi mu rwego rwo kwizihiza Umunsi w'Intwari z'Igihugu.

Ni ibiganiro byabaye hifashishijwe ikoranabuhanga byitabirwa n'Abanyarwanda baba mu bihugu by'i Burayi na ba Ambasaderi bahagarariye u Rwanda mu bihugu bigize Umugabane w'u Burayi.

Abatanze ibiganiro barimo Minisitiri w'Urubyiruko n'Umuco, Mbabazi Rosemary, Ambasaderi w'u Rwanda mu Buholande, Nduhungirehe Olivier, Ambasaderi w'u Rwanda mu Budage, Igor Cezar n'abandi.

Umuyobozi muri Minisiteri y'Ingabo, Lt Gen Kabandana yavuze ko kugira ngo Jenoside yakorewe Abatutsi ibeho ari uko mu gihugu hariho politiki mbi yigisha amacakubiri, yigisha abantu urwango ikanaheza Abanyarwanda bamwe mu gihugu cyabo.

Ati 'Ibyo byose tutibagiwe n'ubuhunzi n'ibindi byinshi byatumye u Rwanda ruhura n'ibibazo byagejeje kuri Jenoside yakorewe Abatutsi mu 1994. Iki gihugu nyuma ya Jenoside cyageze ku ndiba yo kuzahara, rero hari hakenewe intwari zikomeye zireba kure, zireba u Rwanda rurenze aho rwari ruri, kandi hagashyirwa mu bikorwa byo gusana abantu n'ibintu.'

Yavuze ko n'ubwo Jenoside yari imaze guhagarikwa ndetse FPR Inkotanyi yatangiye gushyiraho gahunda zo kubaka u Rwanda n'Abanyarwanda, hari abakomeje kugera amacumu igihugu.

Ati 'Ndetse abashakaga kugihungabanya bari benshi kandi bagifite imbaraga, cyane cyane muri Congo niho hari benshi, ibyo byose twabiciyemo igihe kirekire.'

'Kuva 1995 kugeza mu 2001 hari hari intambara nyinshi cyane, iz'Abacengezi, zari intambara zikomeye, izo kujya kugarura Abanyarwanda bari barafashwe bugwate muri Congo barenga miliyoni eshatu […] ibyo byose byari ibintu bisaba ubutwari bukomeye n'ubwitange.'

Lt Gen Kabandana yavuze ko muri icyo gihe abanzi u Rwanda rwari rufite biganjemo abashakaga kongera gukora Jenoside ku bw'inyungu zitandukanye, ababoshyaga n'abandi babashyigikiye.

Ati 'Abo bose byari ngombwa kubakumira kugira ngo badahutaza urugendo igihugu cyari kirimo. Umwanzi wa gatatu ubu ukinahari ni ingengabitekerezo ya Jenoside, uwo mwanzi ahora abyara abandi batandukanye, ba bandi babaye imbata y'ayo mateka mabi.'

Yakomeje agira ati 'Kubaka rero u Rwanda no gusigasira ibyo tugenda tugeraho, bisaba ubutwari, bisaba buri wese. Ku rugamba rw'iyi minsi ntabwo abarwana ari abafite imiheto ku rugamba n'imbunda […].'

Hari abagishaka gutera u Rwanda…

Lt Gen Kabandana yavuze ko Abanyarwanda basabwa gukomera ku bumwe kuko iyo bubuze ibindi byose bihungabana ari nako byagenze ubwo bwahungabanaga hakabaho byinshi bibi birimo ubuhunzi, amacakubiri ndetse na Jenoside yakorewe Abatutsi.

Yavuze ko ibikorwa by'iterambere u Rwanda rugenda rugeraho umunsi ku munsi nyuma ya Jenoside yakorewe Abatutsi hari Intwari zibigiramo uruhare.

Ati 'Navuga ko nta butwari igihugu nticyabaho. Kubera ko haba hari impamvu nyinshi ibihugu bindi bishobora kwifuza ko igihugu kitabaho cyangwa abanzi b'icyo gihugu bakifuza ko kitabaho. Noneho nk'igihugu cyacu rero cyahuye n'ibibazo nk'ibyo twahuye nabyo navuze mbere, kiba kigifite abibaza ko byakongera gushoboka.'

'Bisaba rero ubutwari bukomeye, kwitanga gukomeye kugira ngo igihugu kigarure ishema kigirirwe icyizere n'abagituye ndetse n'abatekereza ko byashoboka kuba bagihungabanya baturutse hanze yacyo babone ko bidashoboka.'

Lt Gen Kabandana avuga ko u Rwanda rufite abahora bagambiriye kurusenya binyuze mu kurutera ariko kubera ko rurinzwe bakaba barabuze aho bamenera.

Ati 'Byarageragejwe, n'uyu munsi hari ababyifuza, hari abajya babihigira ariko ikibabaniza ntabwo ari uko batabishatse ni uko baba batabishoboye. Aho rero hari ababa babikora.'

'Hari abasirikare n'izindi nzego n'abaturage tugomba guhorana ubutwari kugira ngo ubusugire bw'igihugu […] niyo shingiro y'ibyo dukora byose kubera ko igihe twabuze ubusugire nibwo igihugu cyagiye mu kangaratete.'

Yakomeje agira ati 'Ndagira ngo rero mbizeze ko Ingabo z'u Rwanda zirabishoboye, ziritanga bihagije, dufitemo intwari mu ngeri zosem uretse n'ibyo dukorera hano mu gihugu n'abatwiyambaje […] iyo ingabo zibisabwe zifasha ibyo bihugu kugera ku mutekano baba babuze.'

Lt Gen Kabandana yatanze ingero z'ibihugu birimo Mozambique, Centrafrique, Sudan y'Epfo n'ahandi, aho Ingabo z'u Rwanda zikomeje kuba indashyikirwa mu kugarura no kubungabunga amahoro ndetse no kwigisha indangagaciro zo kwimakaza ubumwe no gushyira ubutwari imbere.

Lt Gen Kabandana yinjiye mu Ngabo z'u Rwanda mu 1990, aza kuba umwe mu bagize uruhare mu kubohora u Rwanda no guhagarika Jenoside yakorewe Abatutsi mu 1994.

Ni umugabo ufite ubunararibonye mu bya gisirikare n'ubuyobozi bw'Ingabo, aho yanabaye umuyobozi ushinzwe ubufatanye mu bya gisirikare muri ambasade y'u Rwanda i Washington's DC.

Mu zindi nshingano kandi yabaye Umuyobozi w'amasomo ku Ishuri rya Gisirikare rya Gako aba n'Umuyobozi wungirije w'Ingabo mu butumwa bw'umuryango w'Abibumbye muri Sudani y'Epfo, UNMISS.

Yanabaye umuyobozi muri RDF ushinzwe ibikoresho, Umuyobozi w'ishuri rya gisirikare, Rwanda Peace Academy.

Mu mpera za 2021, nibwo Perezida Paul Kagame yamuzamuye mu ntera amukuru ku ipeti rya Gen Maj, nyuma yo gusoza ikivi nk'umuyobozi w'ibikorwa by'inzego z'umutekano zoherejwe kugarura amahoro mu Ntara ya Cabo Delgado, muri Mozambique.

Intwari z'u Rwanda zashimiwe

Minisitiri w'Urubyiruko, Mbabazi Rosemary yashimiye intwari zatabarutse n'izikiriho ku musanzu zatanze ngo u Rwanda rugere aho rugeze ubu ndetse rukaba ruri gutanga umusanzu mu kugarura amahoro hirya no hino muri Afurika.

Ati 'Ubutwari mbubona mu buryo bubiri: Icya mbere ni umutima ufite ishyaka, umuhate n'ubushake bwo gukora ikintu wemera udakorera ku jisho. Icya kabiri, ubutwari ni igikorwa gitiye abantu benshi akamaro, kidakorewe ku jisho cyangwa ishimwe.'

Yasabye ababyeyi baba mu mahanga ndetse n'ababa mu Rwanda kwigisha abana ikinyarwanda nk'ururimi ruhuza abanyarwanda, kuko igihe batarumenye nta kizabahuza igihe bahuriye hamwe cyangwa basuye imiryango yabo.

Minisitiri Mbabazi yasabye abitabiriye ibiganiro cyane urubyiruko kutaba ntibindeba cyangwa indorerezi mu kunyomoza abagoreka amateka y'u Rwanda, ahubwo bagafata iya mbere mu kuvuga amateka yarwo nyayo.

Iki kiganiro ku Ntwari z’u Rwanda cyahurije hamwe abayobozi b’imbere mu gihugu, Abanyarwanda baba i Burayi n’abahagarariye u Rwanda kuri uwo mugabane

Minisitiri w’Urubyiruko n’Umuco, Rosemary Mbabazi yashimye ubutwari bwagiye buranga Abanyarwanda mu bihe bitandukanye

Lt Gen Kabandana yaburiye abagishaka guhungabanya umutekano w'Igihugu

Ikibazo cy'impanuka zo mu muhanda ni kimwe mu bimaze igihe bihangayikishije Leta y'u Rwanda cyane ko umubare w'iziba n'abo zihitana ukomeje kwiyongera.

Mu 2020 impanuka zo mu muhanda zavuye kuri 4160 zigera ku 8639 mu 2021, ndetse byageze ku wa 20 Ukuboza, umwaka wa 2022 umaze kubamo izirenga 8000.

Izo mpanuka zahitanye abantu benshi barimo 629 mu 2020, 655 mu 2021, mu gihe byageze mu Ukuboza mu 2022 hamaze gupfa 687. Muri izi mpanuka inyinshi ni izagiye zikorwa n'amakamyo.

Iyi mibare ishyira u Rwanda ku mwanya wa 15 ku isi mu bihugu 153 mu kugira impanuka zihitana abantu benshi, aho igaragaza ko mu bantu 100,000 bapfa, abantu 44 bicwa n'impanuka buri mwaka.

Iki kibazo cy'impanuka kandi cyatumye mu Ukuboza 2022, Inteko Rusange ya Sena, yemeza gutumiza uhagarariye Guverinoma, ngo atange ibisobanuro mu magambo ku ngamba zo gukuraho imbogamizi zigaragara mu gukumira no kurwanya impanuka zo mu muhanda.

Hashobora gushyirwaho ishuri ry'abashoferi

Minisitiri w'Ibikorwaremezo, Dr Nsabimana Erneste yavuze ko kugeza ubu Leta y'u Rwanda iri kuganira ku ngingo zitandukanye, hagamijwe kureba icyaba umuti kuri iki kibazo cy'impanuka gikomeje kwiyongera.

Ibi yabigarutseho ubwo yatahaga ku mugaragaro imashini n'amakamyo bishya bya sosiyete ya Construck Ltd, ku wa wa Gatanu i Jabana mu Karere ka Gasabo.

Yavuze ko ku mpanuka zagiye zibaho hari ibyo polisi yagaragaje ariko nyuma y'ibyo hari itsinda riri gusuzuma impamvu zitera impanuka; niba ari imiterere y'imihanda, imodoka zishaje, amagaraje adafite ubushobozi bwo gukemura ibibazo by'imodoka, cyangwa uruhare rw'abashoferi.

Ati 'Ngira ngo murabizi tumaze iminsi dufite ikibazo cy'amakamyo agenda akora impanuka hirya no hino mu gihugu. Hari itsinda ririmo kubikurikirana. Hari imyitwarire y'abashoferi kurusha uko ikibazo gishobora kuba ari icya mekanike. Hari n'abamaze igihe berekanwa batwaye amakamyo ugasanga hari abafashe no ku biyobyabwenge.'

Yavuze ko kimwe mu bisubizo biri gutekerezwaho harimo no kureba uburyo hashyirwaho ishuri ryigisha abashoferi b'amakamyo b'umwuga.

Ati 'Ubundi mu bindi bihugu hari n'aho usanga ikigo ikamyo nk'iyo yaza ari nshya ugasanga ibanje gupimwa. Ari nabyo usanga hamaze iminsi hatekerezwa ko hashobora kujyaho ishuri naryo ryigisha abantu gutwara amakamyo, ugasanga umuntu usibye kugira uruhushya rwo gutwara ibinyabiziga hari andi mahugurwa n'ubumenyi yahawe.'

Yavuze ko Ikigo cy'Igihugu Gishinzwe Ubuziranenge (Rwanda Standard Board) kigomba no kuzajya kigenzura niba amakamyo yinjira mu gihugu yujuje ibipimo bya ngombwa.

Ati 'Hari icyamaze kugaragara ko n'ibyo bipimo bigomba kurebwaho. Mu bindi bihugu hari aho usanga hari ikigo aho ikamyo nk'iyi nshya yinjira mu kuyigerageza bakabanza bakayijyana mu misozi, ahamanuka n'ahatambika bakareba ko ishobora guhangana n'imiterere y'igihugu. Ibyo byose ni ibintu birimo bitekerezwaho.'

Ikindi kigomba gukorwa ni ukureba niba amagaraje afite ubushobozi bwo gukemura ibibazo bya tekiniki by'imodoka.

'Howo' zikomeje gushyirwa mu majwi

Iyo benshi baganira ku mpanuka zo mu muhanda cyane cyane izikorwa n'amakamyo ntibasiba kugaruka ku zizwi nka 'Howo', cyane ko ari zimaze iminsi zigaragara zakoze impanuka cyane.

Benshi basabye ko izi modoka za Howo zimenyerewe mu bikorwa by'ubwubatsi cyane cyane mu gutunda umucanga, itaka ndetse n'amabuye zacibwa mu Rwanda babisanishije ahanini n'izindi mpanuka zagiye zikora, bakanzura ko zaba zifite ibibazo cyane cyane ibya feri.

Hari abavuga ko impanuka za Howo zishobora no guterwa n'uburyo ikoze. Basobanura ko ahantu hose iyi modoka ikoresha imyuka, iyo itiyo y'imyuka icitse ihita igaragara ku buryo utayikata ngo ikunde. Bavuga ko harebwa uko bakoresha moteri yayo ikamera nka Fuso isanzwe kuko yo ivanga imyuka n'amavuta.

Ku rundi ruhande, Polisi y'u Rwanda iravuga ko yatangiye iperereza ku modoka za Howo zimaze igihe zivugwaho gukora impanuka. Kuva uyu mwaka watangira izi modoka 15 zakoze impanuka zahitanye abantu.

Aba bose ntibavuga rumwe na Nsabimana Désiré ukora muri Asia Machinery Investments Ltd icuruza ikamyo za Howo mu Rwanda, uvuga ko 'nta kibazo cya feri izi modoka zifite kuko zituruka aho zakorewe zikagera mu gihugu zujuje ubuziranenge'.

Ati 'Kugira ngo zinjire mu gihugu dufite icyemezo kandi ibigo bibishinzwe birazikurikirana. Zidafite ubuziranenge ntabwo twabona icyangombwa kitwemerera kuzicuruza mu gihugu'.

Muhire Joseph utunze Howo amaranye imyaka ibiri n'ukwezi kumwe, yabwiye IGIHE ko nta kibazo cya feri izi modoka zigira kuko zose zikorerwa ubugenzuzi.

Ati 'Ziriya modoka zigira feri ariko twabuze abantu badufasha ku bashoferi kuko tujya mu bugenzuzi bw'ibinyabiziga bakaduha ibyemezo ko zifite ubuziranenge. Polisi nidufashe natwe dufatanye nayo turwanye kiriya kintu cy'ubusinzi. Urirukana umushoferi wazana undi ugasanga ni kimwe ahubwo anamurenze'.

Yasabye polisi kujya ihagarika izi modoka ikagenzura n'abashoferi bazo kugira ngo hakumirwe impanuka zirimo kuba.

Muhirwa Jean Bosco amaze imyaka irenga ine atwara ikamyo ya Howo, imodoka atwara ni iya gatatu. Yavuze ko kuyitwara ari ukuyubaha ahamanuka kubera umuzigo iba ifite ukayitwarira ku muvuduko yagenewe.

Ati 'Ni imodoka igira feri nk'izindi. Hari abatazubaha aho hari ubwo umushoferi aba afite gukora inshuro 'tour' nyinshi agashaka kuzirangiza vuba kandi bidashoboka, niyo igutegeka mu kazi ukora'.

Aba bose bahuriza ku kuba abashoferi benshi batwara Howo usanga bakora impanuka igihe basinze cyangwa igihe iyi kamyo yatwawe n'umushoferi utabifitiye uruhushya.

Minisitiri w'Ibikorwaremezo, Dr Nsabimana Erneste yavuze ko hashobora gushyirwaho ishuri ryihariye ry'abashoferi b'amakamyo mu rwego rwo kugabanya impanuka zo mu muhanda

Bijyana n'uko abakora ibikorwa byo gukusanya imyanda bavuga ko iki kimoteri kidakoze ku buryo bugezweho kuko bapfa kurunda iyo myanda aho babonye batitaye ku kuba ibora cyangwa aitabora.

Kubera akajagari kayo ibi bituma abantu batekereza ko ubu butaka bwahariwe kumenwamo imyanda ari buto hakwiriye gushakwa ahandi hakoreshwa mu gukusanya imyanda.

Babijyana n'uko abaturage biyongera umunsi ku wundi aho kugeza ubu Umujyi wa Kigali utuwe n'abaturage barenga miliyoni 1,630,000, ibiteganyijwe ko mu myaka 30 iri imbere bazaba ari 3,800,000 byumvikana ko imyanda nayo izaba yariyongereye.

Kuri ubu ku munsi iki kimoteri cyakira imyanda iri hagati ya toni 550 na 600 mu gihe mu 2030 izaba igeze kuri toni 900, ingano ishobora kuziyongera uko iminsi izajya ihita.

Mu kiganiro Urubuga rw'Itangazamakuru cyo kuri uyu wa 12 Gahyantare 2923, Umuyobozi w'Umujyi wa Kigali wungirije Ushinzwe Imiturire n'Ibikorwaremezo, Dr Mpabwanamaguru Merard, yavuze ko impungenge zigomba kuvaho kuko kiriya ari igice cyateguriwe gutunganyirizwamo imyanda bigakorwa ku buryo bugezweho.

Yavuze ko icyangombwa atari ugushaka ibimoteri bitandukanye cyane ko n'umujyi atari munini ugereranyije n'ibikorwa biteganyijwe ahubwo ikoranabuhanga rikoreshwa mu gutunganya imyanda ari ryo ryashyirwamo imbaraga.

Yagaragaje ko urugamba rukomeye bari kurwana guhera mu 2012 ari urwo kubona Ingengo y'imari yo kwimura abatuye mu mbago z'ahateganyijwe gutunganyirizwa imyanda ku mpamvu z'inyungu rusange.

Kugeza ubu Umujyi wa Kigali umaze kwimura abagera kuri 821 mu gihe abagera kuri 80 batarimurwa.

Dr Mpabwanamaguru ati 'Uyu munsi biradusaba ingengo y'imari irenga gato kuri miliyari 3 Frw kugira ngo tube twimuye abantu bose bari mu mbago z'ahagomba kujya ikimoteri. Dufite abagera kuri 23 dushaka kwimura ubu, muri bo 17 bamaze kutugezaho ibyangombwa ku buryo bitarenze uku kwezi bazahabwa amafaranga.'

Biteganyijwe ko abo 23 bazahabwa agera kuri miliyoni 517 Frw n'abandi bakazimurwa uko ubushobozi buzaboneka.

Nubwo izo ngamba ziri gushyirwa mu bikorwa, gutwara imyanda biracyagoranye bijyanye n'abaturage bataramenya uburyo bwo kuyivangura ndetse na leta itaravugurura icyimoteri ku buryo bugezweho.

Umuyobozi w'Ikigo gikura imyanda mu baturage kikayijyana i Nduba cya COPED, Buregeya Paulin yavuze ko nubwo hari abagerageza kuyivangura bo bayitwara mu modoka imwe n'ubundi yongeye kuvangwa kuko ikimoteri ubwacyo kidafite ubwo buryo.

Ati 'Impamvu nta mbaraga nyinshi abakozi bacu bagira mu kujyana imyanda ivanguye ni uko n'aho baba bayijyanye iba irongera kuvangwa.'

Asaba Umujyi wa Kigali kwihutisha uburyo bugezweho bwo kuvangura imyanda abaturage na bo bakigishwa uko bayivangura hanyuma n'abayitwara bakagerageza gukurikiza uko ivanguye, bose bagatahiriza umugozi umwe kugira ngo imyanda ibyazwe umusaruro aho kuba ikibazo.

Hakenewe asaga miliyari 3 Frw ngo abatuye mu nkengero z’ahagenwe kubakwa ikimoteri cya Nduba bimurwe

Amarushanwa ya iDebate ategurwa mu rwego rwo gufasha abanyeshuri kwagura ubumenyi mu kuvuga no kubatinyura bakagura ibitekerezo byabo ku bintu runaka. Ni irushanwa riterwa inkunga na Banki ya Kigali.

Umuyobozi wa iDebate Rwanda, Habineza Jean Michel, yavuze ko kuva Banki ya Kigali yatangira gutera inkunga iri rushanwa, byatumye n'abana bo mu bigo by'amashuri bitari mu Mujyi wa Kigali cyangwa ibidafite ubushobozi buhambaye nabyo byitabira.

Ati 'Turabigisha uko bashaka inkuru, uko bategura ibyo bashobora kuvuga bakabikora buri cyumweru ku ishuri. Twari dufite imbogamizi z'ibigo bya Leta aho usanga abanyeshuri batagera ku bikoresho by'ibanze bikenewe no gukoresha ururimi neza. BK rero yaduhaye amafaranga kugira ngo ayo mashuri nayo ashobore kubona ubwo buryo. Uyu munsi bafasha amashuri agera kuri 25 bakabishyurira buri kimwe kijyanye n'ibiganiro mpaka.'

Yakomeje avuga ko bibafasha gutsinda bwa bwoba kuko usanga bakora imenyereza mbere yo kuza mu marushanwa nk'aya aho baba bagiye guhangana n'ibigo bikomeye birimo n'ibiri ku rwego mpuzamahanga.

Ati 'BK yadufashije kugira ngo abo banyeshuri biga mu bigo bya Leta, bashobore kuza mu irushanwa tunabahe n'ibishoboka byose kugira ngo bagere ku rwego rumwe n'abandi. Ubu ubona ko nibura 60% by'amashuri dukorana ari aya Leta kandi ukabona ko nabo bashoboye kuko batsinda.'

Yagaragaje ko itegurwa ry'aya marushanwa rigamije kuzamura ubumenyi bw'abanyeshuri b'abanyarwanda ku buryo babasha guhangana ku ruhando mpuzamahanga mu bijyanye no gutambutsa ibitekerezo binyuze mu biganiro mpaka.

Ni amarushanwa ategurwa hagendewe ku nsanganyamatsiko runaka abana bakayunguranaho ibitekerezo. Kuri iyi nshuro yari afite insanganyamatsiko igaruka ku imihingagurikire y'ibihe.

Abanyeshuri bitabiriye aya marushanwa bagaragaza ko abafasha kwagura ubumenyi bwabo binyuze mu gutambutsa ibitekerezo.

Nyagatare Gift wiga muri Kagarama Secondary School yabigarutseho yagize ati 'Kenshi tuza aha kugira ngo tuvuge ku bintu runaka byugarije Isi tukabitangaho ibitekerezo nk'abato kuko nitwe b'ahazaza. Bivuze ko aritwe tuzaba dufata ibyemezo mu gihe cyizaza bityo dukwiye gutangira uyu munsi . Binyuze muri ibi biganiro mpaka bidufasha gufata ibyemezo bitwubakamo umwuka n'icyizere cyo kuba abayobozi beza bifuzwa.'

Muri aya marushanwa ibigo byitabiriye bisaga 35 birimo n'ibigo Mpuzamahanga aho ibigo bine bya mbere byabaye Kagarama Secondary School, Gs Remera Rukoma, Riviera High School na Petit séminaire Zaza.

Hahembwe kandi n'abanyeshuri 20 barushije abandi kuba intyoza mu kuvuga barimo batandatu biga muri Maranyundo Girls School. Buri munyeshuri yahawe igihembo kimufasha gukomeza kuzamura impano ye giherekejwe n'impano zitangwa na Banki ya Kigali.

Umunyeshuri wahize abandi yiga muri Gs Remera Rukoma yabaye iya kabiri muri aya marushanwa, Umubyeyi Ineza Lisa yavuze ko ibikorwa nk'ibi bibatinyura nk'abakobwa bakumva ko bashoboye.

Ati 'Amarushanwa nk'aya aratwigisha, gufunguka no kwaguka mu bitekerezo. Atwigisha gutekereza vuba kandi twunguka ubumenyi bwinshi. Kuba ndi umwana w'umukobwa ni ikigaragaza ko natwe dushoboye. Si abiga mu bigo by'i Kigali gusa cyangwa abahungu batsinda amarushanwa nk'aya kuko twese turashoboye.'

Kuva amarushanwa ya iDebate Rwanda yatangizwa yatanze umusaruro ugaragara kuko abanyeshuri b'u Rwanda bakunze kwitwara neza mu marushanwa nk'aya ku ruhando mpuzamahanga.

Aba banyeshuri bagaragaza ko kurushanwa bibubakamo imbaraga

Aba banyeshuri bagaragaza ko bibungura ubwenge bwo kuvugira mu ruhame

Abagize akanama nkemurampaka baba bandika amanota

Abanyeshuri ba Kagarama Secondary School bishimira igikombe begukanye

Abanyeshuri ba Petit Seminaire Zaza uyu munsi ntibahiriwe

Aya marushanwa yabereye muri Riviera High School

Buri munyeshuri yabaga afite ingingo ashingiraho

Bwiza Irene wiga muri Maranyundo ari mu bahembwe

Byari ibyishimo bisendereye muri iki gikorwa

Ni amarushanwa yitabiriwe n’abanyeshuri batandukanye

Umubyeyi Ineza Lisa wahize abandi yavuze ko ibikorwa nk'ibi bibatinyura nk'abakobwa bakumva ko bashoboye

Umwe mu Bana ba Kagarama Secondary School asobanura ingingo ye

Victor Emmaneul wiga muri Kagarama Secondary School niwe wabaye uwa kabiri

Amafoto: Nezerwa Salomo

Ibi byabaye mu gitondo cyo ku wa Gatanu tariki ya 10 Gashyantare 2023.

Abaturage babwiye IGIHE, ko babangamiwe cyane n'uburyo abanyerondo bo mu Biryogo bakunda guhohotera abaturage, bagasaba inzego zibishinzwe gukurikirana iki kibazo.

Bavuga ko uyu muturage yagiranye ikibazo n'aba banyerondo bananirwa kumvikana bahita batangira kumukubita barangije bamuta mu muhanda barigendera.

Ntwari Hamza yagize ati ' Twe twabonye bamukubita gusa turatabara dutangiye kubabaza bahita bamuta aho barigendera kandi si ubwa mbere abanyerondo b'aha bagira urugomo.'

Uwineza Rose we yagize ati 'Ntituzi igihe iki kibazo cy'abanyerondo bahohotera abaturage kizarangirira pe nonese koko bemerewe gukubita umuntu gutya bakamuvuna imbavu ku buryo ananirwa kugenda? dore uko amaguru bayahinduye ibisebe.'
Umunyamaabnga Nshingwabikorwa w'Umurenge wa Nyarugenge, Murekatete Patricie, yabwiye IGIHE ko uyu muturage wahohotewe ari kwa muganga ndetse abamukubise bagiye kuri Polisi.

Ati 'Bagiye kuri Polisi kugira ngo hamenyekane ukuri kw'ibi bintu.'

Si ubwa mbere abanyerondo bavugwaho guhohotera abaturage mu bihe bitandukanye ku buryo no mu minsi ishize Umuyobozi w'Umuryango urwanya ruswa n'akarengane mu Rwanda (TI-RW), Ingabire Marie Immaculée, yatunze urutoki urugomo n'amahano bikorwa n'abanyerondo, asaba inzego zose kubihagurukira kuko bihangayikishije Abanyarwanda.

Abaturage bo mu Biryogo barasaba ko uyu muturage wakubiswe n'abanyerondo ahabwa ubutabera