Category: Uncategorized

Christopher Clive Froome w'imyaka 37 akinira Israel—Premier Tech yo muri Israel. Ni umwe mu bakinnyi bari bahanzwe amaso mbere y'uko Tour du Rwanda 2023 itangira. Uyu Mwongereza ni umunyabigwi mu gusiganwa ku magare kuko yegukanye Tour de France enye.

Muri Tour du Rwanda ntiyahiriwe kuko mu minsi umunani irushanwa ryamaze yagaragaye cyane umunsi umwe. Hari ku wa 23 Gashyantare 2023 ubwo hakinwaga Etape ya Gatanu yahagurukiye mu Karere ka Rusizi igana mu ka Rubavu.

Uyu munsi waramuhiriye kuko yabaye umukinnyi wacomotse mu bandi akagenda ibilometero byinshi ayoboye, ibizwi nka 'Longest Breakaway'. Ibi byatumye yambikwa na Bella Flowers, ihemba umukinnyi wayoboye isiganwa igihe kirekire.

Muri etape ya gatanu, abakinnyi bagenderaga cyane mu gikundi, bake bakagerageza kuyobora isiganwa ariko batangira kwiyungurura ubwo Chris Froome yabasigaga nyuma yo kwinjira i Karongi.

Gusa, uyu mukinnyi yagize ibyago byo gutobokesha igare ubwo yari amaze gusohoka muri Gishwati, abandi bamucaho.

Chris Froome ukinira Israel-Premier Tech yahembwe na Bella Flowers nk’Umukinnyi wayoboye isiganwa igihe kirekire ubwo hakinwaga Etape ya Gatanu ya Tour du Rwanda 2023

Si uguhemba abakinnyi gusa kuko Bella Flowers ni nayo muterankunga w'imena urimbisha ahabereye isiganwa hose binyuze mu kuhategura no kuhataka indabo ziteye amabengeza.

Umukozi ushinzwe Ubucuruzi muri Bella Flowers, Rucogoza Keagan, yavuze ko hari uduhigo tubiri iki kigo cyavanye muri Tour du Rwanda.

Yagize ati 'Mbere na mbere turishimira uduhigo tubiri tuvanye muri Tour du Rwanda, two kuba aritwe gusa twajyanye na buri mukinnyi wese wahembwe, kuko yahabwaga indabo zacu. Ikindi nitwe twenyine twabashije guhemba umukinnyi watwaye Tour de France enye, ari we Chris Froome.'

Indabo ni impano umuntu ashobora kugenera undi kuko amwishimiye cyangwa yagize ibirori birimo isabukuru n'ibindi.

Rucogoza yavuze ko mu kurushaho kwegera abakiliya, bagiye gukomeza gusura abafatanyabikorwa babo bari mu turere dutandukanye no gushyiraho abashya aho batari.

Bella Flowers ni umushinga ukorera ubuhinzi bw'indabo ku buso bwa hegitari zigera kuri 60, uhinga amoko 16 y'indabo za rose mu mabara icumi. Ni indabo zikunzwe cyane ku masoko y'i Burayi na Aziya no mu bihugu bya Afurika.

Iki kigo giherutse gutangaza ko kigiye gushyira ku isoko ubwoko bushya bw'indabo z'amaroza bitarenze amezi abiri.

Imibare yo mu 2020 yerekana ko Bella Flowers yoherezaga mu mahanga hagati ya toni 20 na 30, ndetse yinjije arenga miliyari 10 Frw mu myaka ine yari imaze itangiye. Icyo gihe, Leta yari imaze kuyishoramo arenga miliyari 13 Frw kuva mu 2016.

Bella Flowers itanga akazi ku biganjemo abo ku gicumbi cyayo i Rwamagana kuko mu bayikorera, abagera ku 1000 ni ho bakomoka.

Christopher Clive Froome w'imyaka 37 akinira Israel—Premier Tech yo muri Israel

Yishimiye guhembwa na Bella Flowers

Mark Stewart ukinira Bolton Equities ni we wahembwe nk’Umukinnyi wayoboye isiganwa igihe kirekire muri #TdRwanda23

Indabo ni impano waha umuntu wawe kuko umwishimiye, yagize ibirori, isabukuru n'ibindi

Bella Flowers ni yo irimbisha ahasorezwa isiganwa binyuze mu kuhategura no kuhataka indabo ziteye amabengeza

Bella Flowers ifite imirima y'indabo mu Karere ka Rwamagana mu Ntara y'Iburasirazuba

Umukozi ushinzwe Ubucuruzi muri Bella Flowers, Rucogoza Keagan (ibumoso) yari afite akanyamuneza nyuma yo gushyikiriza Meya w’Umujyi wa Kigali, Rubingisa Pudence, indabo zo kumushimira

---

Source : http://igihe.com/amakuru/u-rwanda/article/ishimwe-rya-bella-flowers-ikigo-rukumbi-cyahembye-chris-froome-muri-tdrwanda23

Ikipe ya Rayon Sports yatsinze Intare FC ibitego 2-1 mu mukino ubanza wa 1/8 cy'igikombe cy'Amahoro wabereye Kuri Ikirenga stadium.

Rayon Sports yari yazanye mu kibuga ikipe y'abakinnyi badakunze gukina, ni yo yabanje gufungura amazamu ku munota wa 45 kuri penaliti yatewe na Paul Were.

Iki gitego cyaje kwishyurwa na Nshuti Aime Cedric ku munota wa 50.

Rayon Sports yakoze impinduka izana abakinnyi bakomeye nka Luvumbu waje kuyibonera igitego cy'intsinzi ku munota 80, kuri kufura yari hafi y'urubuga rw'amahina.

Undi mukino wabaye uyu munsi, Esperance yatsinze Rwamagana City 1-0.

Gahunda y'imikino ibanza ya 1/8 cy'igikombe cy'Amahoro

Ku wa Gatatu tariki ya 1 Werurwe 2023

Ivoire Olympique vs APR FC

Bugesera FC vs Musanze FC
La Jeunesse vs Kiyovu Sports

Sunrise FC vs Police FC
Rutsiro FC vs Mukura VS
Marines FC vs Etincelles FC

Source : https://umuryango.rw/imyidagaduro/imikino/article/luvumbu-yakuye-rayon-sports-mu-nzara-z-intare-fc-yari-yayihagamye

Prince Kid yongeye gusubira mu nkiko nyuma yaho urukiko rwisumbuye rwa Nyarugenge rwari rwamugize umwere ku byaha yari akurikiranyweho ariko ubushinjacyaha ntibwanyurwa buhita bujuririra Urukiko Rukuru.

Nyembo Emelyne wunganira Ishimwe, ni we wemeje iyi taliki akaba ari nawe uzakomeza kumwunganira mu Rukiko Rukuru. Kuri ubu itariki yemejwe Prince Kid azaburaniraho ni itariki ya 10 Werurwe 2023 aho azajya kuburana ubujurire bwe nyuma yo kuba umwere ariko ubushinjacyaha ntibunyurwe Prince Kid washinze Rwanda Inspiration Back Up yeteguraga irushanwa rya Miss Rwanda, yaregwaga gukoresha undi imibonano mpuzabitsina ku gahato, gusaba no gukora imibonano mpuzabitsina ku gahato no guhoza undi ku nkeke bifitanye isano n'imibonano mpuzabitsina.

Icyakora, nyuma y'uko uyu musore agizwe umwere, Ubushinjacyaha bwahise bujuririra iki cyemezo mu Rukiko rukuru, dore ko mbere bwari bwamusabiye igifungo cy'imyaka 16.

Ishimwe Dieudonné yafungiwe muri Gereza ya Nyarugenge iri i Mageragere kuva ku wa 16 Gicurasi 2022 kugeza ku wa 2 Ukuboza 2022, kugeza ubwo yagirwaga umwere ku byaha yaregwaga.

Src:Inyarwanda

Source : https://umuryango.rw/imyidagaduro/article/hamenyekanye-igihe-prince-kid-azasubira-kuburana

Perezida Kagame yasabye abayobozi kureka inama bahoramo zidatanga umusaruro ahubwo bakita ku cyateze imbere umuturage ndetse ibibazo bihora bigaruka bigakemuka.

Ibi yabigarutseho ubwo yasozaga ku mugaragaro Inama y'Igihugu y'Umushyikirano yabaga ku nshuro ya 18.

Perezida Kagame yatangiye ijambo rye abaza abitabiriye iyi nama ati “Icyo tuvanyemo n'iki?kugeza ryari?turayiheraho dukore iki?.Hari ubwo twayiteze amatwi,twatanze n'ibitekerezo ariko biranashoboka ko dushobora guhaguruka,twataha tukabisiga hano.Ibyo birashoboka kandi rimwe na rimwe niko bigenda.

Tuba dukwiriye gukomeza kugendera ku nama,ibitekerezo,uko byagenze.Ariko niko n'izindi nama zikwiriye kuba zigenda.Hari umuco w'inama zidashira.

Hari uwambwiye ngo uko inama ziba,ushaka umuntu uwo ariwe wese,kuri telefoni bakakubwira ko ari mu nama.Wabikoze mu gitondo wakongera nimugoroba bakakubwira ko ari mu nama.Wakongera kumushaka bakakubwira ko ari mu nama.

Inama wasanga ziruta umwanya w'ibikorwa.Umwanya w'inama uruta uw'ibikorwa ndetse ni nayo mpamvu nkeka ko kenshi kwa gukurikirana,kwa kugira ngo urebe aho ibintu bigeze ntabwo umwanya uboneka.Haboneka umwanya w'inama.

Iteka nkanabaza izo nama zibamo iki?.Inama za buri mwanya zikorerwamo iki?.Inama zo zizaba ariko ukoresha inama kugira ngo usuzume ibintu bitandukanye,kureba aho bigeze,kureba icyakongerwa mu bitekerezo byatanzwe ubushize.Ariko hakaba n'inama yo gusuzuma ibikorwa.Hanyuma ukabona umwanya wundi wo kujya mu bikorwa noneho.

Inama za buri munsi niba zidakemura ibibazo twakomeje kuvuga hano,umuntu ntiyazisuzuma ngo arebe icyo uwo mwanya wakoreshwa kindi atari izo nama za buri kanya.Inama igira akamaro bitewe n'icyayiganiriwemo n'ibikorwa byavuye muri iyo nama,ntabwo ari inama gusa igira akamaro.Dukwiriye guhindura rero…”

Perezida kagame yasabye abayobozi kutagendera ku ruvire nk'urw'igare cyangwa kumera nk'isaha zimwe zimara amasaha 24 zibara waba utayikozeho igahagarara.

Ati “Abantu ntabwo bakora batyo.Ntabwo bakenera uruvire rwa buri masaha 24,abantu barikoresha,bikaba nk'amasaha mashya ya auatomatic.”

Perezida Kagame yavuze ko intego y'Abanyarwanda ari ukwifuza kugera ku iterambere ukihuta 'kugera ngo ugere kure aho abandi bageze.”

Perezida Kagame yavuze ko impamvu akarere ka Burera kabaye aka nyuma ari uko kagaragaramo kanyanga nyinshi mu gihe Nyagatare yabaye iya mbere yo iyo kanyanga yagabanutse ariyo mpamvu bateye imbere.

Yavuze ko hari ibibazo yaba iby'abana bagwingira,abakiri bato bajya mu tubari n'ibindi byagakwiye kuba byararangiye kera kuko ari u Rwanda rw'ejo.Ati “Ntabwo twagakwiye kuba tubyihanganira…twagakwiye kuba twumva uburemere bwabyo.”

Perezida Kagame yahaye abakuru kugira imyitwarire 'irera abakibyiruka'kugira ngo bazagire ejo hazaza heza ndetse abarangwa n'ubusinzi n'imyitwarire mibi bakibutswa yaba mu nyigisho,ukinginga byakwanga ugahana.

Perezida Kagame yanenze kandi umuco mubi urangwa mu bayobozi wo gukingirana ikibaba aho gufatanya kurwanya ikibi.

Ati “.Abantu barabuze,umuntu abona undi akora icyaha akirebera hirya akamwihorera,niba icyo cyaha gifite inyungu wenda y'igihe gito,ubwo bikaba bivuze ngo ntumuvuga ngo nawe hatazagira ugucyaha nawe wabikoze ushaka za nyungu.Bikaba kumvikana mu cyaha.

Abantu bakwiriye kubwira umuntu bati sigaho,ntabwo aribyo,suko bigenda,birangiza,biratwangiza twese,s'umuntu umwe gusa byangiza.”

Aha niho yatanze urugero rw'umwana w'imyaka 14 ujya mu kabari agasangira inzoga n'abasaza n'abakecuru,ababyeyi,abagabo bamurebera aho kumucyaha.

Yasabye ko inzego zajya zihana ababyeyi be bari gusangira inzoga mu kabari na nyiri akabari wemeye kumuha inzoga.

Perezida Kagame yasoje ijambo rye avuga ku bayobozi yise ko 'batagira amaso abona',batabona ikibi ngo bagitandukanye n'icyiza.

Ati “Ukicara mu byondo,isayo,ugategereza uza kukubwira ngo 'uziko wicaye mu isayo'.Ntabwo aribyo…Niba ugenda ukabona umwanda uri ku nzira,hari n'abantu bahagaze aho.

Twihaye intego yo gusukura,ntabwo ari ugusukura imihanda ingo,natwe ubwacu.Hari ibishobora kudukiza umwanda.Umwanda n'ubukene biratandukanye.Ntabwo bivuze ko niba uri umukene ugomba kugira umwanda.Ntushobora kugira umwanda uturiye amazi,urakaraba,urakarabana na bike ufite.Ntabwo ugomba kugenda ujugunya umwanda aho ubonye hose,umwanda ufite aho ujya….Iyo utagira amaso atandukanya ibyiza n'ibibi ntaho dushobora kugera.”

Yasoje avuga ko kubona ikibi bigomba gutera buri wese kukirwanya.Yasoje asaba abayobozi gukorana kuko 'igihugu kitatezwa imbere n'umuntu umwe cyangwa babiri ahubwo kigomba kugira abantu bahagije babyumva babikorera babishaka,ibintu bikagenda bizamuka mu mibare no mu bikorwa.”

Source : https://umuryango.rw/amakuru/mu-rwanda/politiki/article/perezida-kagame-yongeye-gusaba-abayobozi-kureka-inama-zidatanga-umusaruro

Ku wa Mbere tariki 27 Gashyantare nibwo uyu mukinnyi wa filime yibarutse umwana we w'umuhungu yise Leodis Andrellton Jackson, nyuma y'igihe kitari gito atangaje ko atwite.

Uyu ni umwana abyaranye n'umukunzi we Darius Daulton Jackson, bamaranye imyaka ibiri bakundana, akaba ari n'umuvandimwe w'umukinnyi wa filime Sarunas J. Jackson.

Keke Palmer w'imyaka 29, yamenyekanye cyane muri filime z'abana zikorwa na sosiyete zizwi nka Disney, Nickelodeon n'izindi.

Yatangiye gukina filime ku myaka 12, aza kugaragara muri filime zakunzwe nka 'Rags', 'Joyful Noise', 'The longshots' yahuriyemo na Ice cube, 'Nope' n'izindi.

Source : https://umuryango.rw/imyidagaduro/article/keke-palmer-ari-mu-byishimo-byo-kwibaruka-imfura

Akarere ka Nyagatare niko kabaye aka mbere mu kwesa imihigo y'umwaka wa 2021/2022, mu nkingi zitandukanye mu rwego rw'igihugu aho kagize amanota 81.64% .

Aka karere katsinze Huye yabaye iya kabiri na 80.97% ndetse na Rulindo yabaye iya gatatu na 79.8%.

Uturere twesheje imihigo ku gipimo cya 66% ku birebana no gukemura ibibazo by'abaturage.

Intara y'Iburasirazuba yabaye iya mbere mu kwesa imihigo n'amanota 79%, ikurikirwa n' Amajyepfo n'amanota 78%, iy'Iburengerazuba 76%,
Umujyi wa Kigali 75%, mu gihe Intara y'Amajyaruguru yabaye iya nyuma n'amanota 70%.

Minisitiri w'Intebe,Dr Edouard Ngirente yavuze ko mu kwesa imihigo uturere 6 twa mbere twitwaye neza cyane mu manota turimo: Nyagatare, Huye, Rulindo, Nyaruguru, Rwamagana na Rusizi.

Uko uturere dukurikirana mu kwesa imihigo :

1.Nyagatare: 81.64%
2.Huye: 80.97%
3.Rulindo: 79.8
4.Nyaruguru: 79.5
5.Rwamagana: 79.5
6.Rusizi: 79.2%
7.Ruhango: 79.1.
8.Kamonyi: 79.02%
9.Gatsibo: 79%
10.Ngoma: 79%
11.Karongi: 78.97
12.Muhanga: 78.9
13.Rubavu: 78.74
14.Kirehe: 78.68
15.Gusagara: 78.55
16.Nyabihu: 78.41
17.Kayonza: 78.15
18.Ngororero: 77.76
19.Nyanza: 77.66
20.Bugesera: 77.26
21.Nyamasheke: 76.6
22.Nyamagabe: 71
23.Gakenke: 70.9
24.Gicumbi: 70.8
25.Musanze: 67.65
26.Rutsiro: 66.27
27.Burera: 61.7

Source : https://umuryango.rw/amakuru/mu-rwanda/politiki/article/nyagatare-yabaye-iya-mbere-mu-kwesa-imihigo

Nyuma y’uko agizwe umwere ku byaha yaregwaga ndetse agahita anafungurwa ariko Ubushinjacyaha bukajurira, Ishimwe Dieudonné [Prince Kid] azatangira kuburana mu bujurire mu kwezi guhata.

Biteganyijwe ko Urukiko Rukuru ruzatangira kuburanisha mu bujurire urubanza rwa Prince Kid tariki ya 10 Werurwe 2023.

Tariki ya 2 Ukuboza 2022 ni bwo Urukiko Rwisumbuye rwa Nyarugenge rwagize umwere ku byaha 3 yari akurikiranyweho ari byo; gukoresha undi imibonano mpuzabitsina ku gahato, gusaba cyangwa gukoresha ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Ibi byaha aregwa kuba yarabikoreye bamwe mu bakobwa bitabiriye Miss Rwanda mu bihe bitandukanye nk’umuyobozi wa Rwanda Inspiraton Backup yateguraga irushanwa rya Nyampinga w’u Rwanda.

Ubushinjacyaha bwari bwasabiye uyu musore gufungwa imyaka 16, nyuma yo kugirwa umwere bwahise bujuririra iki cyemezo.

Prince Kid agiye gusubira imbere y’Urukiko

Source : http://isimbi.rw/imyidagaduro/article/itarki-prince-kid-azasubirira-imbere-y-urukiko

Rayon Sports yakandagije ikirenge kimwe muri 1/4 cy’igikombe cy’Amahoro nyuma yo gutsinda Intare FC 2-1 mu mukino ubanza.

Ni umukino wabaye uyu munsi ku wa Kabiri aho Intare FC yakiririye Rayon Sports kuri Stade Ikirenga i Shyorongi.

Rayon Sports yari yabanjemo ikipe umuntu yakwita iya 2, ni yo yabanje gufungura amazamu ku munota wa 45 kuri penaliti yatewe na Paul Were.

Iki gitego cyaje kwishyurwa na Nshuti Aime Cedric mu miniota ya mbere y’igice cya kabiri ku munota wa 50.

Rayon Sports yagiye ikora impinduka izanamo abakinnyi nka Luvumbu waje kuyibonera igitego cy’intsinzi ku munota 80, ni kuri kufura yari hafi y’urubuga rw’amahina.

Undi mukino wabaye uyu munsi, Esperance yatsinze Rwamagana City 1-0. Indi mikino izakomeza ku munsi w’ejo.

Gahunda y’imikino ibanza ya 1/8 cy’igikombe cy’Amahoro

Ku wa Kabiri tariki ya 28 Gashyantare 2023

Intare FC 1-2 Rayon Sports
Esperance FC 1-0 Rwamagana City

Ku wa Gatatu tariki ya 1 Werurwe 2023

Ivoire Olympique vs APR FC

Bugesera FC vs Musanze FC
La Jeunesse vs Kiyovu Sports

Sunrise FC vs Police FC
Rutsiro FC vs Mukura VS
Marines FC vs Etincelles FC

Intare FC zagerageje kwihagararaho

Paul Were watsindiye Rayon igitego cya mbere

Iradukunda Pascal, umwana ukiri muto uyu munsi yari yagiriwe icyizere

Bishimira igitego cya Paul Were

Hategekimana Bonheur ni we umutoza yari yahisemo kubanza mu kibuga

Source : http://isimbi.rw/siporo/article/rayon-sports-yatsinze-intare-fc-amafoto

Bamwe mu baturage batuye mu mujyi wa Nyagatare, barasaba leta gukemura ikibazo cy'amazi kuko cyafashe indi ntera.

Ibyumweru bibiri birirenze amazi yarabuze mu mujyi wa Nyagatare.

Abaturage batuye muri uyu mujyi, bavuga ko ubuzima buri kubagora cyane kubera kubura amazi yo gukoresha, mu buzima bwa buri munsi.

Iyo ugenda genda mu mujyi wa Nyagatare usanga amagare ariho amajerekani ariyo ahiganje, ajya gutunda amazi mu bice by'ibyaro cyangwa se abandi bakavoma ibiziba mu muvumba.

Umwe ati 'Naje hano mu gakuba nje kuvoma amazi ndayabura, nikubita hano kwaba manyobwa nsanga amazi naho yakamye, nikubita kuri 'nursing' naho amazi ndayabura. Ubu mvomye umuvumba amazi nayabuze, dore mfite idomoro imwe yonyine nari najyanye ibidomoro 5.'

Undi ati 'Navuye murugo saa moya njya gushaka amazi ubu ni saa munani, amavomo rusange nasanze hari abazi benshi dore. Ubu turi kuvoma umuvumba kandi si amazi meza.'

Kugeza ubu mu bwiherero bukoresha amazi, usanga harimo umwanda kubera kuyabura.

Abaturage barasaba ko leta yakemura iki kibazo kuko ubuzima. Bubagoye kugeza nago ijerekani igura amafaranga 500.

Umwe ati 'Ijerikani imwe y'amazi meza ni 500Frw, amazi mabi ni 300Frw. Ubuzima bwo muri Nyagatare bwarahagaze hashize ibyumweru bibiri, kuko babanje kutubeshya ngo hariya mukabasazi ibigega byaho byarapfuye bari kubisana, none nanubu amazi twarayabuze.'

Undi ati 'Nkubu ijerekani twayiguraga amafaranga makumyabiri, ariko ubu iyo ugiye hakurya mu gakuba, ukayigeza hano mu mujyi, ihita igura amafaranga Magana atanu. Ufite nk'umuryango w'abantu batatu ugakenera nk'amajerikani abiri uba usabwa igihumbi, kandi  kiba kingana n'ikiro cy'umuceri. Twe turifuza ko ibintu nk'ibi by'ibura ry'amazi rya hato na hat,o abayobozi bagira icyo badufasha amazi akongera akaboneka.

Umuyobozi bw'Ikigo cy'Igihugu gishinzwe Amazi Isuku nIsukura WASAC ishami rya Nyagatare,bwasobanuye ko iki kibazo cyetewe no guturika kw'igihombo kijyana amazi mu bigega.

Umuyobozi w'iri Shami,Bwana Byamugisha Bernard, avuga ko barimo kugisana kuburyo mu gihe gito amazi agera ku baturage.

Yagize ati 'Iyo tiyo yagize ikibazo bitewe n'ahantu iri, n'uburyo yubakiye hariho amabeto bidutwara umwanya munini kugira ngo tuyisane. Ariko ubu tuvugana twamaze kuyisana amazi twamaze kuyasubiza mu muyoboro.'

Ikibazo cy'ibura ry'amazi muri uyu mujyi wa Nyagatare, kigarazwa nk'ikimaze igihe, dore nk'ubu mbere y'uko amazi abura mu mujyi wose, hari ibice bimwe na bimwe byabanje kubura amazi.

Kugeza ubu ikigo WASAC muri Nyagatare, kiragaraza ko kirimo guteganya kubaka urundi ruganda rw'amazi ruzahangana n'ubuke bw'amazi muri uyu mujyi, kugeza no mu bindi bice.

Ntambara Garleon

The post <strong>Abatuye umujyi wa Nyagatare bamaze ibyumweru bibiri nta mazi bafite</strong> appeared first on FLASH RADIO&TV.

Source : https://flash.rw/2023/02/28/abatuye-umujyi-wa-nyagatare-bamaze-ibyumweru-bibiri-nta-mazi-bafite/?utm_source=rss&utm_medium=rss&utm_campaign=abatuye-umujyi-wa-nyagatare-bamaze-ibyumweru-bibiri-nta-mazi-bafite

Impuzamashyirahamwe y'umupira w'Amaguru muri Afurika (CAF) yatangaje ko igiye guha Perezida Paul Kagame n'Umwami wa Maroc, Mohammed VI igihembo cy'indashyikirwa mu guteza imbere siporo kizwi nka 'CAF President's Outstanding Achievement Award 2022'.

Nk'uko byatangajwe mu ibaruwa yagiye ahagaragara, iki gihembo cyagenewe Umukuru w'Igihugu, Paul Kagame n'Umwami wa Maroc kizatangirwa mu Mujyi wa Kigali mu kwezi gutaha kwa Werurwe.

Mu nyandiko igaragaza ubutumire bwashyizweho umukono n'Umunyamabanga Mukuru wa CAF, Véron Mosengo-Omba, ku wa 20 Gashyantare 2023, bumenyesha abaperezida b'amashyirahamwe ya ruhago muri Afurika kuzitabira ibirori bizatangirwamo ibihembo.

Mu banyacyubahiro bazabyitabira harimo Perezida w'Ishyirahamwe ry'Umupira w'Amaguru ku Isi, Gianni Infantino n'abanyacyubahiro ba CAF bayobowe n'Umuyobozi wayo, Patrice Motsepe.

Ibyo birori bizabera mu Rwanda ku itariki  14 Werurwe 2023, ni mbere yaho iminsi ibiri ngo hazateranire inama y'Inteko Rusange ya 73 ya FIFA izaba ku wa 16 Werurwe muri Kigali Convention Centre.

Biteganyijwe ko iyi nteko ariyo izemerezwamo Gianni Infantino  nk'umuyobozi wa FIFA muri manda y'imyaka ine iri imbere, ibi bikaba bibaye nyuma yaho Infantino yagaragaye nk'umukandida rukumbi wa FIFA.

The post Perezida Paul Kagame agiye guhabwa igihembo cy'indashikirwa na CAF kubera guteza imbere siporo appeared first on RUSHYASHYA.

Source : https://rushyashya.net/perezida-paul-kagame-agiye-guhabwa-igihembo-cyindashikirwa-na-caf-kubera-guteza-imbere-siporo/?utm_source=rss&utm_medium=rss&utm_campaign=perezida-paul-kagame-agiye-guhabwa-igihembo-cyindashikirwa-na-caf-kubera-guteza-imbere-siporo