Category: Uncategorized

Kuri uyu wa Kane, Gen Kabarebe yahaye ikiganiro urubyiruko rwaturutse mu turere dutandukanye, byabereye i Mutobo mu Ntara y'Amajyaruguru.

Yagarutse ku mutwe wa FDLR umaze igihe uhungabanya umutekano w'u Rwanda, washinzwe na benshi bagize uruhare muri Jenoside yakorewe Abatutsi mu 1994.

Ni umutwe ufite ibirindiro muri Repubulika Iharanira Demokarasi ya Congo, ndetse muri iyi minsi ukorana byeruye n'Ingabo za Leta (FARDC) mu guhangana na M23 no guhungabanya umutekano w'u Rwanda.

Ku rundi ruhande, ubuyobozi bwa RDC bwakunze kuvuga ko abarwanyi ba FDLR nta mbaraga bagifite, nk'aho iyo u Rwanda rubavugaho, ruba rushaka urwitwazo.

Gen Kabarebe yagize ati “Ikibazo dufitanye na FDLR si icy'imibare. Igiteye inkeke ni ingengabitekerezo ya Jenoside. Na bya bindi by'iminota itanu ndabisubiramo. Ntayo bamara hano.”

Gen Kabarebe yavuze ko iyi ngengabitekerezo ya Jenoside yatangiranye n'abantu b'intiti bake cyane, nyuma y'imyaka 30 hapfa abantu miliyoni.

Yakomeje ati “Biteye inkeke. Abatangiye CDR muri Kaminuza ya Nyakinama, batarenze 10, muzi icyo yakoze. Yatangiwe n'agatsiko k'abantu bake cyane. Twe ntituvuga imibare kuri FDLR, tuvuga ibitekerezo.”

Yagarutse ku bayobozi ba FDLR barimo ba Gen Ntawunguka Pacifique Omega, avuga ko bazi icyo bakora.

Yakomeje ati “Njye mu 2009, nafashe telefoni ndi Gisenyi, mpamagara Pacifique ndamubwira nti uri umupilote, wize mu Bufaransa, nturi injiji. Iyo ntambara urwana wumva uzayitsinda, ko abandi batashye. Yarambwiye ati 'Mon general, nzagaruka mu Rwanda nta Mututsi ukirurimo. Ndamubwira nti ntarwo uzagarukamo.”

Muri icyo kiganiro, Gen Kabarebe yanagarutse mu mateka agaragaza uburyo uburyo mu 1996, hafashwe umwanzuro wo kuvanga ingabo kubera ko RDF yari ikeneye izindi mbaraga biba ngombwa ko hitabazwa ingabo z'aba-ex far.

Ni icyemezo cyatumye abafite “ibitekerezo bizima” bakirwa mu Ngabo z'u Rwanda, harimo n'abahoze muri FDLR ariko bahisemo guhindura inzira. Batandukanye n'abayigumyemo n'ubu bagihungabanya umutekano w'u Rwanda bari hakurya y'umupaka.

Gen Kabarebe ubwo yagezaga ikiganiro ku rubyiruko i Mutobo, yashimangiye ko ikibazo cya FDLR atari imibare y’abarwanyi bayo, ahubwo ari ingegabitekerezo yabo

---

Source : http://igihe.com/amakuru/u-rwanda/article/gen-kabarebe-yashimangiye-ko-fdlr-itamara-iminota-itanu-mu-rwanda

Ni ibintu Meya Nzabonimpa asanga byarenyegejwe no kuba hakiri umuco wo kunga abana basambanyijwe bagaterwa inda n'ababateye inda, aho kugana inzego z'ubutabera ngo zibarenganure.

Indi mpamvu kandi ni umuco mubi wa bamwe mu babyeyi batumva ko ari ikizira gushyingira umwana akiri muto.

Byatangajwe kuwa Gatatu tariki 8 Werurwe 2023 ubwo hizihizwaga umunsi mpuzamahanga wahariwe abagore, aho ku rwego rw'akarere ka Gicumbi wizihirijwe mu murenge wa Ruvune.

Meya Nzabonimpa Emmanuel yavuze ko umuco mubi wo kunga imiryango ifite abana batewe inda n'abakoze icyaha, ari kimwe mu bikomeje gutuma abasambanya abana batabicikaho.

Ati 'Abana 566 bo mu karere ka Gicumbi bari hagati y'imyaka 14 na 19 barashatse, gusa ababyeyi bafite umuco wo kunga abana bagashyingirwa bakiri bato, bakabashyingira abagabo babateye inda bagomba gukumirwa, kuko atari byo, Umwana utaragira umubiri wo kwihaza cyangwa ngo umubiri wiyubake akongera agashyiramo undi mwana, ntabwo aribyo'.

Yavuze ko iyo mikorere ishobora kugira ingaruka z'igihe kirekire ku buzima bw'umwana n'uwo atwite, kumutesha ishuri, ubukene mu miryango n'ibindi.

Kuri uyu wa Gatatu muri Gicumbi hasezeranyijwe imiryango igera kuri 688 yari isanzwe ibana mu buryo butemewe n'amategeko

Abaturage basabwe kugaragaza imiryango igira uruhare mu gushyingira abana bakiri bato, ikabihanirwa

Meya Nzabonimpa yasabye abaturage gushyira imbaraga mu guhangana n’abasambanya abana

---

Source : http://igihe.com/amakuru/u-rwanda/article/gicumbi-abakobwa-566-bashatse-abagabo-bataruzuza-imyaka-19

Aba bantu uko ari batatu batawe muri yombi ku wa Kane tariki ya 9 Werurwe 2023.

Amakuru agera ku IGIHE avuga ko inka yibwe ikanabagwa ari iy'uwitwa Gaseruka Jean ndetse abatawe muri yombi bafashwe nyuma y'uko hatanzwe amakuru inzego zibishinzwe zitangira kuyishakisha.

Bivugwa ko aba bantu batawe muri yombi bafatanywe ibintu byinshi mu ngo zabo bituma bakekwa ko aribo bibye iyo nka bakajya kuyibaga.

Umunyamabanga Nshingwabikorwa w'Umurenge wa Rubavu, Harerimana Emmanuel Blaise, yemereye IGIHE iby'aya makuru ariko avuga ko hari abandi bantu barimo gushakishwa ndetse iperereza rikomeje.

Yagize ati 'Yego nibyo biri mu iperereza byabaye ejo ariko ntabwo turi kugira ngo bikomeze byamamare kuko hari abantu babuzemo turimo gushakisha buriya ntidushaka kubivugaho byinshi.'

Yakomeje avuga ko aba bantu batawe muri yombi atari bo bibye iyo nka bakajya kuyihaga ahubwo bafashwe mu buryo bwo kugira ngo hamenyekane abakoze ubwo bujura.

Aba bantu bakekwa uko ari batatu kugeza ubu bafungiye kuri sitasiyo ya Polisi ya Rubavu mu gihe abo bandi bagishakishwa.

---

Source : http://igihe.com/amakuru/u-rwanda/article/rubavu-batatu-barimo-n-umugore-baguwe-gitumo-bamaze-kubaga-inka-y-umuturage

Buri uko imvura iguye itengura umukingo wubatseho ibyumba bitatu by'amashuri, ibintu bitera ubwoba abanyeshuri bahiga, abarezi bahakorera n'ababyeyi bafite abana bahiga by'umwihariko ababyeyi bahaturiye.

Umuyobozi wa GS Bushaka Ngirinshuti Theogene yabwiye IGIHE ko babuza abana gukinira hejuru y'uwo mu kingo kuko bitewe n'amazi aba yaragiye yinjira mu butaka bwaho, ushobora gutenguka isaha iyo ariyo yose ukaba wateza impanuka.

Ati 'Bigaragara y'uko hatagize igikorwa aya mashuri yaba aducitse tukabura aho twigishiriza abana'.

Ishimwe Pascaline wiga kuri iri shuri avuga ko uyu mukingo utenguka, ubatera ubwoba ko ushobora kuzatenguka bawicayeho umwana akaba yahanuka cyangwa akahapfira.

Ati 'Nta mwanya munini usigaye hagati y'umukingo n'umusingi [fondasiyo] w'ishuri. Icyo dusaba abayobozi ni uko bahubaka ntihakomeza gutenguka'.

Uwimana Celestin ufite abana babiri biga kuri iri shuri asanga aha hantu hakwiye gukorwa mu maguru mashya mu rwego rwo kwirinda ko hari umwana wahatakariza ubuzima.

Ati 'Buri uko imvura iguye haratenguka, hamaze no gucukuka cyane, umwana aguyemo yapfa kandi uretse n'umwana n'umuntu mukuru wahanyura yanyoye agacupa akahagwa yahasiga ubuzima'.

Umuyobozi w'Akarere ka Rutsiro wungirije ushinzwe iterambere ry'ubukungu, Havugimana Etienne yabwiye IGIHE ko ikibazo cy'iri shuri rigiye gusenywa n'umuvu bakizi ndetse ko bafite gahunda yo kuhubaka urukuta bitarenze ukwezi kumwe.

Ati 'Twifuza kubishyira mu byihutirwa, hari inguni y'ishuri neza neza yasatiriwe n'umuhanda kandi bigaragaza ko hagenda harushaho kwangirika, turi gushakisha uko twahubaka urukuta rufata ubutaka. Hari amafaranga duteganya ko azaturuka muri MINEDUC n'ejo twari twasabye ko bahakorera inyingo, hatagize igihinduka kiriya kibazo mu kwezi kumwe twaba tugikemuye'.

Ishuri rya GS Bushaka rigaho abanyeshuri 1371 barimo abiga mu mashuri y'incuke, abanza n'icyiciro cya mbere cy'ayisumbuye. Iri shuri ni irya kabiri mu gutsindisha abana benshi mu karere ka Rutsiro.

Umuvu w’amazi amanuka mu muhanda washyize iri shuri mu manegeka

Ikibuga abana biga kuri GS Bushaka bakiniramo nacyo gishobora gushyira ubuzima bwabo mu kaga

Iri shuri ni irya kabiri mu gutsindisha abana benshi mu karere ka Rutsiro

---

Source : http://igihe.com/amakuru/u-rwanda/article/rutsiro-impungenge-ku-ishuri-rya-gs-bushaka-rigiye-gusenywa-n-umuvu-w-amazi

Ibiciro by'ibiribwa n'ibinyobwa bidasembuye byazamutse ku kigero cya 67,7% mu cyaro, mu gihe mu mijyi byiyongereye kuri 42,4% ugeraranyije n'ukwezi kwa Gashyantare (02) kwa 2022 na Gashyantare y'uyu mwaka wa 2023.

Bikubiye mu mibare yatangajwe n'Ikigo cy'Igihugu cy'Ibarurishamibare (NISR/ National Institute of Statistics of Rwanda) kuri uyu wa Gatanu tariki 10 Werurwe 2023.

Iyi mibare igaragaza ko ibiciro by'ibiribwa n'ibinyobwa bidasembuye atari byo byazamutse gusa, kuko n'ibiciro by'ibinyobwa bisembuye n'iby'itabi byiyongereyeho 23,2% mu mujyi wa Kigali.

Naho mu bice by'icyaro, ibiciro by'ibinyobwa bisembuye n'iby'itabi ho byiyongereyeho 20,6% mu gihe ibiribwa n'ibinyobwa bidasembuye ari uriya mubare uri hejuru wa 67,7%.

Ikigo cy'Igihugu cy'Ibarurishamibare kandi kigaragaza ko no muri aya mezi ya mbere y'umwaka wa 2023, ibiciro bikomeje kuzamuka kuko muri Mutarama byari byarazamutse kuri 37%, muri Gashyantare bikagera kuri 38,8%, ni ukuvuga ko mu kwezi kumwe izamuka ryabyo ryiyongereyeho 1,1% mu mijyi mu gihe mu bice by'icyaro ho habayeho izamuka rya 3,2%.

Ibiciro by'ingufu na byo byarazamutse kuko ugereranyije na Gashyantare 2022 na Gashyantare 2023, byazamutseho 14,4% naho ibiciro by'ubwikorezi byo bikaba byarazamutseho 12,1%.

Ni izamuka ritabayeho mbere mu mateka y'izamuka ry'ibiciro by'ibiribwa ndetse n'ibindi bikenerwa mu buzima bwa buri munsi bw'abantu.

Mu nama y'Igihugu y'Umushyikirano iherutse kuba, Guverinoma y'u Rwanda yagarutse ku bibazo byabayeho byatumye ibiciro ku masoko bikomeza kuzamuka, birimo ibura ry'imvura yatumye umusaruro w'ibikomoka ku buhinzi n'ubworozi ugabanuka ndetse no kuba igiciro cy'ubuhinzi n'icy'inyongeramusaruro cyarazamutse.

Minisitiri w'Intebe, Dr Edouard Ngirente ubwo yagarukaga kuri ibi bibazo, yaboneyeho no gutanga ihumure ku baturarwanda ko uko ibintu byifashe ubu, hari icyizere ko ibiciro bigiye kumanuka.

Yagize ati 'Icyizere nabaha ni uko nk'umusaruro turimo tubona wavuye muri sizoni A ni ukuvuga icyiciro cy'ubuhinzi bwatangiye mu kwa cyenda k'umwaka ushize ubu turi gusarura mu kwezi kwa mbere n'ukwa kabiri, dufite icyizere ko umusaruro w'ibigori wikububye kabiri, uw'ibirayi wikuba kabiri, uw'ibishyimbo wo wagabanutseho akantu gato kubera amapfa yari yashatse kuba mu Majyepfo ndetse n'igice cyo mu burasirazuba.

Ibyo bisobanuye ko muri iyi minsi twatangiye kubona igiciro cy'ibigori kimanuka kiva ku mafaranga Maganinani (800Frw) kijya ku mafaranga maganane (400Frw), ubwo rero n'ibindi nk'ibiranyi biragenda biza kumanuka, ni cyo cyizere dufite.'

Dr Ngirente kandi yaboneyeho kwibutsa ko Leta yagiye itanga inyunganizi ku byashobora gutumwa ibiciro bitumbagira ku kigero gikabije nko mu biciro by'ibikomoka kuri peteroli, ku buryo iyo itabikora byari kuzamuka birenze uko byazamutse ubu.

Source : https://umuryango.rw/ubuzima-115/article/hatangajwe-izamuka-ry-ibiciro-mu-rwanda

Nta munsi w'ubusa, nta masaha acaho mu bice bitandukanye by'Umurenge wa Runda hatumvikanya Abaturage bataka ko bahohotewe n'Amabandi cyangwa se Abajura uko babivuga. Barabatega mu nzira, bakabatera mu ngo bitwaje intwaro 'Gakondo', bakabambura, ugize amahirwe bakamusiga ahumeka kuko hari abo batema haba ku manywa ndetse na n'Ijoro. Abaturage bakomeje gutabaza no gutakambira inzego zitandukanye by'umwihariko iz'umutekano ngo zigire icyo zikora cyangwa se nabo batangire kwirwanaho.

Mu gihe kitageze ku cyumweru kimwe, abantu babiri( abo twabashije kumenya) bamaze kugwa muri ibi bikorwa by'ubugizi bwa nabi bukorwa, haba ku manywa ndetse na n'ijoro. Abamaze gutemwa bo ni benshi kuko nta munsi w'ubusa bwakwira cyangwa ngo bucye hatumvikanye ugutaka kw'Abaturage bahohotewe n'aya mabandi.

Mukanya gashize, ahagana ku I saa kumi mu kagari ka Ruyenzi, umwe muri aba bajura cyangwa amabandi bamuvudukanye, mu guhunga agenda asimbuka ibipangu n'ibyo yari amaze kwiba, arenga imihanda ibiri abari bamukurikiye hasigaye umwe wagendaga avuza induru, bigera aho nawe atakibashije arahagarara.

Kuko uwavudukanaga uyu mujura yari yavugije induru abari ku muhanda uri hafi n'Akagari ka Ruyenzi babonye uyu mujura asimbuka igipangu ahagana kuri Kaburimbo, yikubita mu muhanda n'intwaro ye, bamwe bahunze uwabashije kumufata ni umugabo/sore w'ibigango baragundagurana kuko yari afite icyuma yagwanye nacyo. Inzego zahageze zasabye ko uyu mujura ajyanwa kwa muganga kandi akomerekeye mu gusimbuka ingo z'abaturage, bati' Ubonye iyo nibura tumwihanira tukavuza uwo twakosoye'. Gusa bakomeje guhiga ko aho bucyera baraza kwirwanaho.

Ahagana ku I saa tanu bwo, muri Gihara hari umuturage yatemwe mu mutwe arakomereka. Ibikorwa by'aba bajura bimaze kuba byinshi mu baturage kandi baravuga ko nta gisubizo babona, ari naho bahera batakambira inzego by'umwihariko iz'umutekano zirimo Igisirikare na Polisi.

Bamwe mu banyerondo baganiriye n'intyoza.com batifuje gutangaza amazina yabo, bavuga ko guhangana n'aba bajura bitwaje intaro gakondo bibakomerera kuko usanga bo igikomeye bafite ari inkoni, mu gihe abajura bitwaje imihoro n'ibyuma n'ibindi.

Umwe mu bo umunyamakuru yasanze ku muhanda utamenya uruhande wamubarizamo, yavuze ko uru rugomo no kwiba bigoye gucika kuko abafashwe n'ubundi ntawe ufungwa igihe, ko rero ugiye asiga bagenzi be bakora( biba) abafashwe nabo bakagera aho mugenzi wabo afungiye we basanga ataha cyangwa se yararekuwe.

Umuyobozi w'Akarere ka Kamonyi, Dr Nahayo Sylvere aganira n'umunyamakuru wa intyoza.com kuri iki kibazo cy'ubujura no kwibasira abaturage bagakorerwa urugomo, yavuze ko ubuyobozi buticaye ubusa, ko kandi hari inzego za Polisi n'Abasirikare mu gufasha ko iki kibazo gikemuka. Asaba abaturage kuba maso, kumva ko nabo umutekano ubareba, bagatanga amakuru neza kandi ku gihe.

Ati' Turimo kugerageza kugira ngo turebe ko twakongeramo imbaraga cyane! Buriya ni irondo rikwiye gukazwa cyane kugira ngo turebe ko ikibazo cyarangira rwose. Dufite n'Abashinzwe umutekano, abasirikare baba barimo. Ariko turimo guhangana nacyo kugira ngo ikibazo kirangire rwose, kandi kirarangira'.

Meya Dr Nahayo Sylvere, akomeza asaba abaturage ko bakwiye kumva ko ikijyanye n'umutekano kireba buri wese, ko atari ibireba gusa Abanyerondo, Abasirikare n'Abapolisi. Abasaba gutangira amakuru ku gihe kugira ngo inzego bireba zitabarire igihe, ariko kandi buri wese akita ku ruhare rwe rurimo gutanga Amafaranga y'irondo.

Inkuru bisa: Kamonyi-Runda: Baratabaza inzego z'umutekano ku bw'amabandi yitwaje intwaro gakondo abugarije

Abamaze guhura n'insanganya muri ubu bugizi bwa nabi, bavuga ko kenshi aba bajura bagenda ari itsinda, bitwaje intwaro gakondo zirimo imihoro n'ibyuma bitandukanye, hakaba n'igihe ngo bamwe usanga bari n'imbwa. Urugo bateye mu ijoro ryashize, umugore nyira rwo yabwiye umunyamakuru ko abaje bari kumwe n'umukobwa/Gore, ariko amahirwe abana bababonye bamaze kwinjira baratabaza, bahita biruka n'uwo w'igitsina gore bari kumwe. Ibintu bidasanzwe kumva igitsina gore mu bufatanye bw'ubujura buteye butyo. Abaturage barasaba gutabarwa byatinda bakirwanaho.

intyoza

Source : https://www.intyoza.com/2023/03/10/kamonyi-runda-ubugizi-bwa-nabi-bwamabandi-bukomeje-guhangayikisha-rubanda/

Madamu Proscovia Musoke,umubyeyi w'abahanzi bakomeye cyane muri Uganda,Jose Chameleone na Douglas Mayanja uzwi nka Weasel Manizo, yashyigikiye aba bahungu be nyuma yo gusomanira umunwa ku wundi ku rubyiniro.

Madamu Musoke yabwiye Itangazamakuru rya Uganda ko abahungu be barenganyijwe n'abantu ndetse ko uko bibasiwe bikabije cyane.

Ati “N'abavandimwe.Ntabwo ntekereza ko ari bibi.Ikibazo nuko abantu babibonye mu ishusho ya kinyafurika.Yego turi abanyafurika ariko.”

Yahise ahagarika ikiganiro kitarangiye kubera ko umuhungu we Pallaso yahise amuca mu ijambo gusa yongeyeho ko ibyabaye bitagakwiye gukomeza kugibwaho impaka.

Pallaso nawe amerewe nabi nyuma yo gushyira hanze amashusho y'indirimbo ye ari kubyinana na Chameleone mu buryo bumeze nk'ubw'umuhungu n'umukobwa.

Gusomana kwa Chameleone na Weasel kwabaye mu gitaramo cye kuwa 24 Gashyantare ahitwa Lugogo Cricket Oval i Kampala.

Ubwo yari ku rubyiniro,Weasel yarahamusanze basomana bahuje iminwa nk'umusore n'inkumi abantu barumirwa.

Icyakora nyuma y'aho uyu muhanzi w'umunyabigwi yasabye imbabazi nyuma yo kotswa igitutu,avuga ko yabitewe no kwishima cyane ndetse ko abyicuza cyane.

Source : https://umuryango.rw/imyidagaduro/umuziki/article/nyina-wa-chameleone-na-weasel-yavuze-ku-gusomana-kwabo-kwateje-impaka

Nyuma yo kugerageza kenshi gutsimbura M23 mu birindiro byayo,Igisirikare cya RDC cyitabaje abahoze mu gisirikare [abademobe] ngo baze kugiha umusada kuko byakomeye.

FARDC yatsinzwe kenshi, isanzwe ifatanya n'imitwe irimo FDRL, Nyatura, Mai-Mai, PARECO, ACPLS ndetse n'Abacanshuro bo mu mutwe w'Abarusiya uzwi nka Wagner ariko yabonye badahagije ijya gushaka n'abavuye mu gisirikare.

Minisitiri w'Ingabo wa RDC, Gilbert Kabanda wagiranye ikiganiro n'abahoze mu gisirikare cya FARDC, yavuze ko na bo bakeneweho umusanzu mu rugamba ruhuje FARDC na M23.

Ubwo yari amaze kuganira n'aba bahoze mu gisirikare, Gilbert Kabanda yagize ati 'Twaganiriye uburyo bafasha igisirikare kwirukana umwanzi.'

Yakomeje agira ati 'Murabizi ko na hariya muri Ukraine mu rugamba ihanganyemo n'u Burusiya, ntabwo ari abasirikare gusa bari mu rugamba, harimo n'abaturage baje kuyifasha. Natwe twiyambaje abana bacu ngo bagende bafashe igisirikare cyacu kugira ngo birukane umwanzi.'

Kuva kuwa 08 kugeza uyu munsi,uduce tugeze kuri 6 twibasiwe n'imirwano k'uburyo nta muturage n'umwe ukirangwa muri izo nsisiro zibarizwa mu gace ka Mutanda,muri Teritwari ya Rutshuru.

Ni imirwano iri kuva mu gace ka Karuba isa n'iyerekeza Kirotshi, aho inyeshyamba za M23 ziramutse zifashe umuhanda byaba bigoye kongera gukora ingendo zerekeza muri Kivu y'amajyepfo uturutse mu mujyi wa Goma.

Iyi mirwano ikomeje kuba ingorabahizi ishobora gusiga intara ya Kivu y'amajyaruguru yose iri mu maboko y'izi nyeshyamba,dore ko kugeza ubu 70% bamaze kubifata mu biganza.

Source : https://umuryango.rw/amakuru/mu-mahanga/umutekano/article/fardc-yitabaje-abahoze-mu-gisirikare-ngo-bayifashe-kwirukana-m23

Mu kiganiro yagiranye na inyaRwanda.com, Bushali yavuze ko atewe ishema n'umuvandimwe we B Threy ugiye gukora ubukwe, amushimira kubw'igitekerezo yabasangije nka Gang.

Bushali yakomeje avuga ko ari iby'agaciro kubona umuvandimwe basangiye akabisi n'agahiye ateye intambwe ya kigabo, ndetse avuga ko ari nawe utsinze igitego muri Gang yose.

Yagize ati: 'Ni iby'agaciro ku muniga wange B Threy, ubu turi mu myiteguro kandi byaradushimishije kuva ku munsi wa mbere. Ubu ikigezweho turi guhanagura amakoti, ku buryo umunsi w'ejo ari ibirori.''

 

B Threy aherutse kubwira inyaRwanda.com ko iki ari icyemezo yafashe, kandi ko nk'umugabo ari iby'agaciro kubana no guha agaciro uwo ukunda.

 

B Threy ubukwe bwe buteganyijwe kuba kuri uyu wa Gatandatu, aho buzaba ari ubukwe buteganyijwe kwitabirwa n'abahanzi ndetse n'abaraperi batandukanye, barimo n'itsinda rye rya KinyaTrap.

 

Usibye ubu bukwe uyu muhanzi afite igitaramo kizaba kuri uyu wa Gatandatu kizakurikira ubukwe, aho kizabera kuri Institut Français Kigali, guhera ku i saa kumi n'ebyiri za nimugoroba, aho azaba anamurika EP ye yise For Life.

 

Bushali yashyigikiye ndetse ashimira B Threy n’umugore we

Keza witegura gushyingiranwa na B Threy

B Threy ari mu myiteguro y’ubukwe

Ubukwe bwa B Threy na Keza buzaba ejo kuwa 11 Werurwe 2023

Nyuma y’ubukwe abantu benshi biteguye igitaramo

Source : https://inyarwanda.com/inkuru/126900/akari-ku-mutima-wa-bushali-kuri-b-threy-ubura-amasaha-make-ngo-akore-ubukwe-126900.html

Bona Nyapudzai Ouma Mugabe, umukobwa w'uwahoze ari Perezida wa Zimbabwe, Robert Mugabe, yatandukanye n'umugabo we bari bamaranye imyaka icyenda, Simbarashe Mutsahuni Chikore nyuma y'aho urugo rwabo rusenyutse ku buryo budasubirwaho nta cyizere cyo kwiyunga.

Ku wa kabiri, tariki ya 07 Werurwe, Bona yasabye gatanya mu rukiko rukuru i Harare. Yashakanye na Chikore mu 2014 mu bukwe budasanzwe bwabereye mu rugo rw'umuryango wabo i Harare,mu nkengero za Borrowdale ndetse abakuru b'ibihugu batatu bo mu karere bari mu bashyitsi bakuru.

Nk'uko impapuro z'urukiko zibivuga, aba bombi batakaje urukundo no kwitanaho biranga abakundana ndetse ngo bararaga ukubiri mu gihe kirenze amezi icyenda.

Aba bombi bafitanye abana batatu bafite imyaka irindwi, itanu, n'ibiri. Bona arasaba kurera abo bana agira ati: 'Ku bw'inyungu z'abana bato,Umugore arasaba guhabwa uburenganzira bwo kurera abana bose hanyuma Uregwa agahabwa uburenganzira bwo kubabona buri wikendi,guhera ku wa gatandatu saa mbili za mu gitondo kugeza ku cyumweru saa kumi n'imwe,ahantu hemeranijwe. '

Muri uru rubanza, Bona yagize ati: 'Mu gihe urukiko rutanze icyemezo cy'ubutane, urukiko rugomba gutegeka uregwa kwishyura indezo y'abana y'amafaranga angana na $ 2700 kuri buri mwana buri kwezi,…”

Bona yavuze ko mu gihe cyo gushyingirwa,ababurana bombi bafatanyije kugura ibintu byinshi yaba ibyimukanwa n'ibitimukanwa. Icyakora, yavuze ko gukemura ibibazo by'umutungo muri uru rubanza bizadindiza itangwa rya gatanya.

Source : https://umuryango.rw/ubuzima-115/imibereho/article/umukobwa-wa-nyakwigendera-perezida-mugabe-yasabye-gatanya-n-umugabo-we