Webrwanda Backend

Category: Uncategorized

  • Korali Shekinah ya Rwimbogo yakoze igitaramo… – #rwanda #RwOT

    Iki gitaramo cya Shekinah Choir cyasojwe ku Cyumweru tariki 02 Mata 2023 kuva saa Munani z’amanywa. Cyaranzwe n’ubwitabire bwo ku rwego rwo hejuru dore ko urusengero rwari twakubise rwuzuye. Cyaranzwe n’ibihe byo guhimbaza Imana, ubuhamya ndetse n’Ijambo ry’Imana.

    Ni igiterane Shekinah Choir yatumiyemo korali y’inshuto yayo ikunzwe cyane muri iyi minsi, iyo akaba ari Umuseke choir ikorera umurimo w’Imana muri ADEPR Nyamata. Yari kumwe kandi n’andi yo muri ADEPR Rwimbogo ariyo Herubana choir na Elayono choir.

    Kitabiriwe kandi n’abakozi b’Imana banyuranye barimo Umushumba wa ADEPR Rwimbogo, Umushumba Athanase SENGUMUREMYI wa ADEPR Nyamata waje aherekeje Umuseke Choir. Pastor Charles Cyubahiro wa ADEPR Matyazo – Huye ni we wigishije ijambo ry’Imana.

    Shekinah Choir yateguye iki giterane, ubwo yari ku ruhimbi yashimishije abakunzi bayo n’abandi bose bitabiriye, mu ndirimbo zabo nziza ndetse abantu barahaguruka bose bati “Vuga” imwe mu ndirimbo zabo irimo ikibazo kigira kiti ese mvuge iteraniro ryose ati “Vuga”.

    Umuseke Choir ijya ku ruhimbi yahawe kuririmba indirimbo 6 icyarimwe maze, benshi barizihirwa mu buryo bukomeye. Mu ndirimbo zuzuye ubuhanga zinafite amajwi menshi (Mass vocals), Umuseke yashimishije abitabiriye igitaramo cya Shekinah.

    Korali Umuseke yatunguye benshi ubwo yari ihawe umwanya wo kuriimba. Samuel, umuyobozi w’indirimbo yagize ati: “Tugiye kuririmba iyi ndirimbo umuntu uri bufashwe aze adufashe”. 

    Mu buryo butunguranye yahise atera indirimbo “Ntawe muhwanye” ya Korari Shekinah, maze Shekinah inanirwa kwiyumanganya ihita ihaguruka ifatanya nabo kuyiririmba.

    Perezida wa Shekinah Choir, Bwana Erneste NYETERA, yatangaje ko iki cyumweru bari bafite intego bise “Ukwihana kuzana guhembuka”, cyatanze umusaruro ugaragarira buri were. Yagize ati: “Umusaruro uvuye muri iki cyumweru twakozemo ivugabutumwa ni ukuri wagaragariye buri wese”

    Perezidante wa Umuseke Choir, Uwase Grace, yabwiye itangazamakuru ko mu 2022 bagize gahunda nyinshi basura amatorero menshi mu Rwanda ariko uyu mwaka bagabanyije ingendo kuko bahugiye mu yindi mirimo yo kwitoza no gukora ibihangano byinshi kandi kandi bigezweho.

    Shekinah Choir niyo yateguye iki giterane igitumiramo Umuseke choir

    Iki gitaramo cyitabiriwe bikomeye gihembura benshi

    Korali Umuseke yeretswe urukundo rwinshi

    Ubwitabire bwari ku rwego rwo hejuru

    Shekinah Choir iri mu makorali akunzwe cyane muri Kigali

    Umuseke Choir yakoreye agashya Shekinah Choir

    Perezida wa Shekinah Choir avuga ku migendekere y’igitaramo cyabo, hano yari kumwe na Nelson Mucyo wa Paradise Tv

    Iki gitaramo cyaranzwe no guhimbaza Imana mu buryo bukomeye

    AMAFOTO: Benju Photography

    Source : https://inyarwanda.com/inkuru/127765/shekinah-choir-yakoze-igitaramo-gikomeye-itungurwa-na-umuseke-choir-yi-nyamata-amafoto-127765.html

  • Minisitiri w'Intebe Dr Ngirente yagaragaje impamvu igihe kigeze ngo abashora imari babenguke ubuhinzi n'ubworozi – #rwanda #RwOT

    Ni ibyo yatangaje kuri uyu wa 3 Mata 2023, ubwo yagezaga ku Nteko Ishinga Amategeko, Imitwe yombi, ibikorwa bya Guverinoma ku kongera umusaruro w'ubuhinzi n'ubworozi, hakurwaho imbogamizi muri uru rwego.

    Urwego rw'ubuhinzi n'ubworozi, rwakunze gutinywa n'abashoramari baba abantu ku giti cyabo cyangwa ibigo by'ishoramari ndetse n'amabanki muri rusange.

    Impamvu zatumaga abantu badashora muri uru rwego, ni uko babonaga rufite ibyago byinshi byo guhomba, ku mpamvu zishingiye ku mateka y'ubuhinzi bwo mu Rwanda.

    Ku rundi ruhande ariko, ni urwego rutunze Abanyarwanda hafi ya bose, ndetse runasagurira amasoko yaba ayo mu karere ndetse no hanze ya Afurika muri rusange.

    Si mu Rwanda gusa kuko imibare ya Banki y'Isi yo mu 2021, igaragaza ko mu myaka itanu ishize, ubuhinzi n'ubworozi bwihariye 4,2% by'umusaruro wose w'Isi.

    Muri Afurika buri kuri 17% by'umusaruro mbumbe, naho mu Karere ka EAC u Rwanda ruherereyemo, uru rwego rwihariye 25% kugera kuri 40% by'umusaruro mbumbe.

    Ni imibare igaragaza ko nibura 70% by'inganda ziri muri aka karere ka Afurika y'Iburasirazuba, ni izitunganya umusaruro ukomoka ku buhinzi n'ubworozi. Ni ukuvuga ngo ubuhinzi bwagenze nabi, izo nganda nazo zagira ikibazo gikomeye.

    Minisitiri w'Intebe Dr Ngirente ati 'Iyo tuvuga gutegura urwego rw'inganda, tugomba gutegura n'urw'ubuhinzi. Inganda dufite nazo zitunganya ibivuye ku buhinzi.'

    Ibikomoka ku buhinzi n'ubworozi byihariye 65% by'ingano y'ibyo ibihugu byo mu karere bicuruzanya hagati yabyo.

    Ku ruhande rw'u Rwanda, imibare igaragaza ko kuva mu 2017-2022, rufite 25% by'umusaruro mbumbe. Ni mu gihe uru rwego rwihariye uruhare rungana na 35% mu kugabanya ubukene mu gihugu.

    Minisitiri w'Intebe Dr Ngirente ati ''Bigaragara ko urwego rw'ubuhinzi n'ubworozi rufatiye runini igihugu. Niyo mpamvu Guverinoma y'u Rwanda ishyiraho ingamba zirimo kugabanya imbogamizi zituma abantu batinya uru rwego.'

    Kubera ko abakora ubuhinzi mu Rwanda bagenda basaza, hakenewe ingamba zo gushishikariza urubyiruko kujya muri uru rwego ariko rukajyamo rusangamo inyungu n'imibereho muri rusange.

    Minisitiri w'Intebe yagaragaje ko imbogamizi zakunze kugaragara muri uru rwego zirimo kuba inyongeramusaruro zidahagije mu bwinshi no mu bwiza. Ikindi ni ukuba amafaranga ashorwa mu buhinzi yari make kuko ari leta yashoragamo gusa.

    Indi mbogamizi ni ishingiye ku musaruro wangirika mu gihe cy'isarura. Aho muri Afurika hatakara 40% by'umusaruro wose.

    Yagaragaje ko ikindi kibazo cyari icyo kuba harabonekaga umusaruro ariko amasoko akaba ari make cyangwa n'ahari abahinzi bakaba batazi kuyageraho cyangwa batazi umusaruro ukeneweho.

    Ikindi cyakunze kugaragara nk'igitera ubwoba abashoramari, ni ibyonnyi by'imbuto n'izindi ndwara zitandukanye zibasiraga ubuhinzi n'ubworozi ariko kuri ubu leta yagiye ishyiraho ingamba zo gushaka umuti.

    Minisitiri w'Intebe ati 'Ibyo rero ni imbaraga leta igenda ishyiramo kugira ngo imbogamizi ziri mu buhinzi tuzimareho tuzigabanye ku buryo umuntu ushaka gushyira imari mu buhinzi yumve ko yashoye ahantu afashijwe na leta, atuje ashobora kunguka, ubuhinzi bukaba umwuga wamutunga akabaho neza.'

    Minisitiri w’Intebe Dr Ngirente Edouard yagaragaje ko ubuhinzi bwakozwe neza bubyara umusaruro

    Ishusho y'ubuhinzi n'ubworozi mu myaka itanu ishize

    Kuva mu 2017, ubwo hatangizwaga gahunda yo kwihutisha iterambere ry'igihugu [NST1], umusaruro w'ubuhinzi wagiye urushaho kwinjiriza igihugu amafaranga menshi.

    Mu byagaragaye ni uko umusaruro w'ibinyampeke bigizwe n'ibigori, umuceri, ingano n'ibindi wiyongereye ku gipimo cya 16%. Wavuye kuri toni zisaga ibihumbi 700 (701.059) zo mu 2017 ugera kuri toni zisaga ibihumbi 812 (812.427) mu 2022.

    Nk'ibigori byavuye kuri toni ibihumbi 410 zasarurwaga mu 2017, ugera kuri toni zirenga ibihumbi 458 zasaruwe mu 2022.

    Ibinyabijumba birimo ibirayi, imyumbati, ibijumba n'ibindi byo byiyongereye ku gipimo cya 21% kuko wavuye kuri toni zirenga miliyoni eshatu ugera kuri toni zirenga 400000.

    Minisitiri w'Intebe avuga ko ukutiyongera k'umusaruro kwaturutse cyane ku mihindagurikire y'ikirere aho mu bice by'Amajyepfo n'Uburasirazuba havuye izuba ryinshi.

    Iryo zuba ryinshi zatumye umusaruro w'ibishyimbo ugabanyuka ku gipimo cya 1%. Wari toni ibihumbi 455, ugera kuri toni ibihumbi 449. Ni mu gihe umusaruro w'amashaza na soya wo wariyongereye.

    Ku bijyanye n'umusaruro ukomoka ku bworozi by'umwihariko umukamo w'amata wavuye kuri litiro zisaga ibihumbi 800 ugera kuri litiro zigera ku bihumbi 990.

    Bitewe n'inganda zashyizweho zibungabunga amatungo n'ibiyakomokaho birimo inyama n'amagi nazo zakomeje kugenda ziyongera uko imyaka yagiye itambuka.

    Umusaruro w'inyama wavuye kuri toni zirenga ibihumbi 162 mu 20217, zigera kuri toni zisanga ibihumbi 185 mu 2022. Ni mu gihe amagi yo yavuye kuri toni birindwi agera kuri toni zirenga ibihumbu umunani.

    Ibi bijyanye kandi no kwiyongera k'umusaruro w'amafi kuko wavuye kuri toni zirenga ibihumbi 31 ugera kuri toni zirenga ibihumbi 43.

    Amadovize yinjizwa n'ubuhinzi

    Guverinoma y'u Rwanda kandi yashyize imbaraga mu gufasha abaturage kongera umusaruro w'ibihingwa ngengabukungu kugira ngo bibashe kwinjiriza igihugu amadovize.

    Amadovize igihugu cyinjije aturutse ku bikomoka ku buhinzi n'ubworozi yavuye kuri miliyoni zisaga $500 mu 2018/19 agera kuri miliyoni $640. Ni ukuvuga ko habayeho ubwiyongere bwa 24,2%.

    By'umwihariko ku bijyanye n'umusaruro w'ikawa, hashyizweho ingamba zo kongerera agaciro umusaruro w'ikawa hibandwa ku gutunganya no kugurisha ikawa binyujijwe mu nganda.

    Ibi byatumye ikawa itunganyijwe iva kuri 54% mu 2017, kuri ubu ikaba igeze kuri 80,2% by'ikawa yoherezwa mu mahanga. Ni ukuvuga ko iyoherezwa mu mahanga imaze gutunganywa iruta cyane iyoherezwayo itaratunganywa.

    Ikawa yoherejwe mu mahanga yari yinjije miliyoni $69 mu 2017, mu gihe iyoherejweyo mu 2022, yinjirije igihugu agera kuri miliyoni $75.

    Minisitiri w'Intebe Dr Ngirente agaragaza ko hari icyizere cy'uko mu gihe kiri imbere umusaruro w'ikawa uzagenda wiyongera.

    Ku bijyanye n'icyayi, umusaruro wacyo wiyongereye ku gipimo cya 18%, aho wavuye kuri toni zirenga ibihumbi 30 ugera kuri toni ibihumbi 36. Byatumye ayo icyayi cyoherejwe mu mahanga yageze kuri miliyoni $103 mu 2021/22, avuye kuri miliyoni $88 yariho mu 2017.

    Amadovize igihugu cyinjije avuye mu bireti nayo yageze kuri miliyoni zirenga $6, naho indabo zo zinjije miliyoni $6 zivuye kuri miliyoni $4 zariho mu 2017.

    Imibare ikomeza igaragaza ko amadovize ava mu mbuto yageze muri miliyoni $14 mu 2021/22 avuye kuri miliyoni $6 mu 2017. Ni ukuvuga ko habayeho ubwiyongere bwa 114%.

    Visi Perezida wa Sena ushinzwe ibijyanye n’Amategeko no kugenzura ibikorwa bya Guverinoma, Nyirasafari Espérance, ubwo yari akurikiye ibisobanuro bitangwa na Minisitiri w’Intebe

    Visi Perezida w'Umutwe w'Abadepite mu Nteko Ishinga Amategeko, Ushinzwe Amategeko no kugenzura Ibikorwa bya Guverinoma, Edda Mukabagwiza

    Minisitiri w’Intebe Dr Ngirente yagejeje ku Nteko Ishinga Amategeko, ingamba za Guverinoma mu kongera umusaruro w’ubuhinzi n’ubworozi, havanwaho imbogamizi zikiri muri uru rwego

    Perezida wa Sena y’u Rwanda, Dr Kalinda François Xavier na Visi Perezida w'Umutwe w'Abadepite mu Nteko Ishinga Amategeko, Ushinzwe Amategeko no kugenzura Ibikorwa bya Guverinoma, Edda Mukabagwiza

    Minisitiri w'Ubutegetsi bw'Igihugu, Musabyimana Jean Claude n’Umunyamabanga wa Leta muri Minisiteri y’Imari n’Igenamigambi, Dr Uwera Claudine

    Abasenateri bitabiriye Inteko Rusange

    Abagize Biro z’Imitwe yombi mu Nteko Ishinga Amategeko bakiriye Minisitiri w’Intebe, Dr Edouard Ngirente

    Amafoto: Irakiza Yuhi Agustin

    Source : http://igihe.com/amakuru/u-rwanda/article/minisitiri-w-intebe-dr-ngirente-yagaragaje-impamvu-igihe-kigeze-ngo-abashora

  • Rwamagana: RIB yatahuye aho umuntu wishwe yashyinguwe nyuma y'imyaka irenga 10 – #rwanda #RwOT

    Umuryango wa Ayinkamiye uvuga ko bamaze igihe batabona umuvandimwe wabo bakaza gucyeka ko ashobora kuba yarishwe n'umugabo.

    Ati 'Twamubuze guhera muri 2012, dukeka ko yaba yaragiye gushaka ubuzima hamwe n'umugabo we muri Uganda ariko tuza kumenya ko ashobora kuba yarishwe muri 2009 ndetse akanajugunywa mu bwiherero nibwo twatanze ikirego muri RIB.'

    RIB ivuga ko ikimara kwakira ayo makuru hakozwe iperereza ikusanya amakuru ndetse no gushakisha aho yaba yarashyinguwe, hanyuma RIB iza gusanga umubiri wa nyakwigendera yarishwe akajungunywa mu bwiherero bwaho babaga.

    RIB ivugako hamaze gufatwa impagararizi (sample) ubu hakaba hagiye gupimwa uturemangingo ndangasabo (ADN) muri Rwanda Forensic Laboratory kugira ngo hamenyekane niba koko uwo mubiri ari uwa Ayinkamiye Rebecca.

    Amakuru aturuka aho bari batuye, avuga ko urwo rugo bari babanye mu makimbirane aho umugabo yakubitaga uwo mugore akahukana akazagaruka hashize amezi nk'abiri.

    Abaturage bahatuye bemeza ko ngo akimara kumwica yahise ashaka undi mugore, ngo babonye uwo mugore atangiye kujya yambara ibitenge bya nyakwigendera nibwo batangiye gukeka ko ashobora kuba yarapfuye.

    Batangiye guhwihwisa amakuru ko bishoboka ko umugabo we Harerimana yaba yaramwishe dore ko bari babanye nabi; ngo yahise atoroka.

    Ucyekwaho icyaha afungiye kuri Sitasiyo ya RIB ya Kigabiro mu gihe dosiye ye iri gukorwa ngo ishyikirizwe Ubushinjacyaha.

    Icyaha akurikiranyweho ni ubwicyanyi gihanwa n'ingingo ya 107 y'itegeko No 68/2018 ryo ku wa 30/08/2018 riteganya ibyaha n'ibihano muri rusange, gihanishwa igifungo cya burundu.

    RIB irashishikariza abantu kujya itanga amakuru hakiri kare kuko bifasha mu iperereza. Ikindi RIB yibutsa abantu nuko guhishira icyaha cy'ubugome bihanwa n'amategeko bivuze ko ari inshingano za buri Muturarwanda wese ko kudahishira icyaha cy'ubugome nubwo uwagikoze yaba ari umugabo cyangwa umugore wawe.

    RIB iributsa na none ko umuntu wese ko kwica umuntu ari icyaha cy'ubugome kandi ko ubikoze wese agomba gushyikirizwa ubutabera. RIB kandi irashishikariza buri wese gutanga amakuru ku murongo utishyurwa wa 166 cyangwa kuri Sitasiyo ya RIB imwegereye.

    Source : http://igihe.com/amakuru/u-rwanda/article/rwamagana-rib-yatahuye-aho-umuntu-wishwe-yashyinguwe-nyuma-y-imyaka-irenga-10

  • U Rwanda rwashyizwe mu bihugu abagore bashobora gutemberamo ntacyo bikanga – #rwanda #RwOT

    Uru ni urutonde rwakozwe n'igitangazamakuru BBC mu gace kahariwe ubukeragendo aho cyagaragaje ibihugu bitanu abagore bashobora gutembereramo uko bashaka batekanye.

    Muri iki gihe mu bukerarugendo hagezweho icyiswe 'travel Solo' aho bitagisaba umuntu gukenera abandi bagendana kugira ngo atembere ahubwo ashobora no kugenda wenyine.

    Ubushakashatsi bwakozwe na Norwegian Cruise Line bwagaragaje ko umwe muri ba mukerarugendo batatu aba ashaka gutembera wenyine. Naho ubwakozwe na Virtuoso bwagaragaje ko abashaka gutembera bonyine bagiye bazamuka mu 2022 bageze 18% bavuye kuri 4% bariho mu 2019.

    Ikindi cyagaragaye ni uko abakunda kugenda bonyine biganjemo abagore ariko bakaba bahura n'imbogamizi zitandukanye mu duce bagiyemo nko kuba nta mutekano uhari bishobora kubaviramo kwamburwa cyangwa gukorerwa irindi hohoterwa.

    Hagendewe ku mutekano, ituze, agaciro abagore bahabwa mu Rwanda n'uburyo abantu bakirwa by'umwihariko, rwashyizwe mu bihugu bitanu byizewe umugore ashobora gutembereramo afite umudendezo.

    Umuryango wita ku mutekano w'abagore WPS, washyize u Rwanda muri kimwe mu bihugu byizewe umugore yabamo afite umutekano uhagije kandi ko abagore bafite umwanya mu nzego zitandukanye bigaragaza ko bubashywe muri iki gihugu.

    Rebecca Hansen umwe mu bagore bigeze gutemberera mu Rwanda mu 2019, yavuze ko yatunguwe n'inzego z'umutekano yahasanze n'uburyo bakira abantu.

    Ati 'Hari abapolisi n'abasirikare mu duce dutandukanye kandi baba bahari amanywa n'ijoro, bishobora kugutera ubwoba ukibibona ariko ubona ko abo bose bambaye impuzankano babereyeho abaturage, bashobora gutanga ubufasha mu gihe cyose bukenewe.'

    Yakomeje avuga ko ikindi cyiza ari uko abantu b'ingeri zose bakiranwa urugwiro kandi ukabasha gutumanaho mu Cyongereza, Igifaransa, Igishwahili n'ururimi gakondo rw'Ikinyarwanda.

    Rebecca Hansen yasoje agaragaza tumwe mu duce ushobora gusura igihe ugeze mu Rwanda nko ku Rwibutso rwa Jenoside rwa Kigali ruri ku Gisozi, Pariki y'Igihugu y'Ibirunga, Pariki ya Nyungwe n'iy'Akagera.

    Usibye u Rwanda hari n'ibindi bihugu birimo Slovenia, Leta Zunze Ubumwe z'Abarabu, u Buyapani na Norvège byashyizwe kuri uru rutonde.

    Ikiraro cya Canopy Walk kiri muri pariki ya Nyungwe, ni kimwe mu bikundwa n’ab’igitsinagore

    Source : http://igihe.com/amakuru/u-rwanda/article/u-rwanda-rwashyizwe-mu-bihugu-abagore-bashobora-gutemberamo-ntacyo-bikanga

  • Umuhuza mu kibazo cya Kongo, Uhuru Kenyatta, arasaba ko umutwe wa M23 ushyikirana n'ubutegetsi bwicyo gihugu #rwanda #RwOT

    Kuri uyu wa mbere, tariki 03 Mata 2023, Umuhuza mu kibazo cya Kongo, Uhuru Kenyatta wigeze no kuba Perezida wa Kenya, yasohoye itangazo ryishimira kuba umutwe wa M23, urwanya ubutegetsi bwa Kongo, ukomeje gushyira mu bikorwa amasezerano agamije kugarura amahoro, nk'uko byemejwe mu nama za Luanda, Nairobi, Bujumbura na Adis Abebba.Muri iryo tangazo, Uhuru Kenyatta aremeza ko M23 muri iyi minsi yarekuye utundi duce twinshi yari yarigaruriye ,nka Kitshanga, Kilolirwe na Mushaki muri Teritwari ya Masisi, ndetse na Bunagana yo muri Twitwari ya Rutshuru, idushyikiriza ingabo z'Umuryango w'Afrika y'Uburasirazuba zagiye kugarura amahoro mu burasirazuba bwa Kongo.

    Umuhuza mu kibazo cya Kongo, Uhuru Kenyatta, arasanga ubu bushake bwa M23 bwagombye gutuma ijya mu mitwe igirana imishyikirano na Leta ya Kongo, nta rundi rwitwazo, ndetse akifuza ko uwo mutwe wazitabira icyiciro cya 4 cy'imishyikirano giteganyijwe mu minsi mike iri imbere.Kugeza ubu M23 ntiyari yarigeze yemererwa kwitabira ibyiciro bya mbere bitatu by'iyi mishyikirano ibera i Nairobi, dore ko ubutegetsi bwa Kinshasa bwakomeje gutsimbarara, buvuga ko 'butazigera bushyikirana n'umutwe w'iterabwoba'.

    Magingo aya ibyo biganiro byafatwaga nk'ikinamico, dore ko kugeza ubu byitabiriwe n'imitwe yitwaje intwaro, bivugwa ko ari ikorera mu kwaha kwa leta.M23 irashimwa kuba yubahiriza ibyo yasabwe mu kurangiza intambara ica ibintu muri Kivu y'Amajyaruguru, mu gihe Leta yo yanze gushyira mu bikorwa ibyo isabwa, birimo guhagarika imirwano no kureka gukorana n'imitwe yitwaje intwaro, irimo n'uw'abajenosideri wa FDLR.

    Aho kuyoboka inzira y'ibiganiro nk'uko yabigiriwemo inama ubugira kenshi, Leta ya Tshisekedi yahisemo gukomeza intambara ibifashijwemo n'abacancuro ba Wagner, abajenosideri ba FDLR-Nyatura, n'inyeshyamba za PARECO na Wazalendo.

    Hari amakuru avuga kandi ko Leta ya Kongo yakomeje kurundanya abasirikari n'ibitwaro mu burasirazuba bw'igihugu, nubwo bitayibujije gukubitwa inshuro mu duce tugenzurwa na M23 bagabyemo ibitero, ndetse bituma M23 yagura ibirindiro byayo.

    Amakuru agera kuri Rushyashya arahamya ko aka kanyafu kaba karatumye ubutegetsi bwa Tshisekedi bucisha make, bukanemera kuganira na M23. Aya makuru yanashimangiwe na Perezida wa Uganda, Yoweri K. Museveni, mu mpera z'icyumweru gishyize, ubwo Uganda yoherezaga muri Kongo abasirikari bayo bagize itsinda ry'ingabo z'Umuryango w'Afrika y'Uburasirazuba.

    Mu itangazo rijyanye n'iki gikorwa, Perezida Museveni yahishuye ko imishyikirano hagati ya Leta ya Kongo n'Intare za Sarambwe (nk'uko 23 yiyita) irimbanyije mu ibanga. Yaba leta ya Kongo, yaba na M23, ntawe uragira icyo avuga kuri aya makuru yatanzwe na Perezida Museveni, cyangwa ku busabye bwa Uhuru Kenyatta.

    The post Umuhuza mu kibazo cya Kongo, Uhuru Kenyatta, arasaba ko umutwe wa M23 ushyikirana n'ubutegetsi bwicyo gihugu appeared first on RUSHYASHYA.

    Source : https://rushyashya.net/umuhuza-mu-kibazo-cya-kongo-uhuru-kenyatta-arasaba-ko-umutwe-wa-m23-ushyikirana-nubutegetsi-bwicyo-gihugu/?utm_source=rss&utm_medium=rss&utm_campaign=umuhuza-mu-kibazo-cya-kongo-uhuru-kenyatta-arasaba-ko-umutwe-wa-m23-ushyikirana-nubutegetsi-bwicyo-gihugu

  • Menya agaciro k'imodoka Bahavu yegukanye n'akayabo kinjiye mu matora y'ibihembo bya RIMA #rwanda #RwOT

    Mu itangwa ry'ibi bihembo ryabaye ku wa 1 Mata 2023, Usanase Bahavu Jeannette ni we wegukanye imodoka ya KIA K5 yakozwe mu 2012 nubwo atahise ayihabwa ahubwo yizezwa ko azayishyikirizwa mu minsi iri imbere.

    Kwegukana imodoka kuri uyu mugore ntabwo byatunguranye ku basanzwe bakurikiranira hafi ibya sinema kuko amatora yarangiye ari we uyoboye abandi mu majwi.

    Uretse ibyo, muri ibi bihembo byatanzwe kuwa 01 Mata 2023, yegukanye kandi igihembo cy'umukinnyikazi mwiza w'umwaka (Best Actress) abicyesha filime ye 'Impanga'.

    Mu magambo ye yashimiye Imana agira ati 'Ibi ntabwo mbifata nk'ibintu bituma ncika intege, ngo numve ko ngezezeyo ahubwo ni itangiriro ryiza kuri njye mpawe kugira.

    Nyuma y'uko yegukanye iyi modok, twabakusanyije ibyavuye mu majwi bigaragaza ko uyu mugore yegukanye imodoka arusha bikomeye amajwi abo bari bahanganye. Yari afite 56 336 bivuze ko abamutoye bashoye 5 633 600Frw.

    Ni umwanya yari akurikiweho na Benimana Ramadhan uzwi nka Bamenya wari ufite amajwi 39 642, uyu akaba yaratoreshejwe 3 964 200Frw, undi wabagwaga mu ntege ni Iradukunda Abouba Ibra ukina muri sinema yitwa Yvan watowe n'amajwi 31 117 bivuze ko yinjirije abateguye iki gikorwa 3 111 700Frw.

    Aba nabo bakurikiwe na Iraguha Francis Zahabu wamamaye nka Steven watowe n'amajwi ibihumbi 11 766 bisobanuye ko yinjirije abateguye iki gikorwa 1 176 600 Frw.

    Uretse aba tugarutseho batowe n'amajwi menshi, bagenzi babo na bo batowe mu buryo bunyuranye kugeza kuri Uwimpundu Sandrine wamamaye nka Rufonsina wagize amajwi 18 bivuze ko yinjirije abateguye iki gikorwa 1 800Frw.

    Uteranyije amanota yose yatoreshejwe abakinnyi ba sinema muri iki gikorwa usanga baratowe na 150 234 bivuze ko binjirije abategura iri rushanwa 15 023 400Frw.

    Aya mafaranga yose yakusanyijwe mu majwi mu gihe imodoka bahataniraga ifite agaciro ka miliyoni 13Frw ukurikije uko ibiciro bihagaze ku isoko ry'u Rwanda.

    Source : https://umuryango.rw/imyidagaduro/article/menya-agaciro-ki-modoka-bahavu-yegukanye-n-akabo-kinjiye-mu-matora-y-ibihembo

  • #Kwibuka29: Hatangajwe amabwiriza azakurikizw… – #rwanda #RwOT

    Aya mabwiriza yasohotse kuri uyu wa Mbere tariki 3 Mata 2023, agaragaza ko insanganyamatsiko yo kwibuka izakomeza kuba 'Kwibuka twiyubaka'.

    Akomeza avuga ko icyumweru cy'icyunamo kizatangirizwa ku Urwibutso rwa Kigali ku Gisozi ku itariki ya 7 Mata 2023, ni mu gihe mu Turere: Icyunamo kizatangirizwa ku Urwibutso rw'Akarere.

    Kuri uwo munsi, kuva saa tatu za mu gitondo hose mu midugudu abaturage bazahabwa ikiganiro kijyanye no kwibuka Jenoside yakorewe Abatutsi, bisozwe no gukurikirana ubutumwa nyamukuru bw'uwo munsi. Abaturage bose basabwe kwitabira icyo gikorwa. Nibirangira, abaturage bazasubira mu mirimo yabo uko bisanzwe. Kuri uwo munsi, nta rugendo rwo Kwibuka ruteganyijwe.

    Kuva tariki ya 8 Kugeza 12 Mata 2023 ni icyumweru cy'icyunamo giteganyijwemo ibikorwa byo kwibuka ahantu hatandukanye mu gihugu ku matariki Abatutsi biciweho, ibigenewe Abahagarariye ibihugu byabo n'Imiryango Mpuzamahanga mu Rwanda, ibiganiro bihuza urubyiruko, abanyamakuru n'ibindi byiciro.

    Aya mabwiriza avuga ko ibikorwa by'ubucuruzi, siporo z'abantu ku giti cyabo n'indi mirimo itunze abantu n'ibyara inyungu izakomeza mu cyumweru cy'icyunamo.

    Avuga ko nta biganiro biteganyijwe mu midugudu nyuma ya saa sita hagati ya tariki 8 Mata na 12 Mata 2023. Kandi mu cyumweru cy'icyunamo ibendera rirururutswa rikagezwa hagati.

    Ku Rwego rw'Igihugu, icyunamo cyizasozwa tariki ya 13 Mata 2023 ku Rwibutso rwa Rebero, hibukwa abanyapolitike bishwe bazira kurwanya Jenoside n'ingengabitekerezo yayo.

    Mu Turere, ubuyobozi bwako bufatanyije n'izindi nzego bazagena aho icyumweru cy'icyunamo gisorezwa.

    Iri tangazo kandi rigaragaza ibikorwa bibujijwe mu cyumweru cy'icyunamo birimo:

    Ibirori by'ibyishimo bihuza imbaga y'abantu; ubukwe n'imihango ijyanye nabwo, amarushanwa uretse siporo zikorwa n'abantu ku giti cyabo;

    Umuziki utajyanye no Kwibuka haba mu tubari, aho bafatira amafunguro, aho batunganyiriza imisatsi (salon de coiffure), aho batunganyiriza umuziki (studio) n'ahandi hantu hahurira abantu benshi nk'aho abantu bategera imodoka, n'ahandi.

    Ibindi bikorwa bitemewe harimo Imikino y'amahirwe; kwerekana imipira, ibitaramo mu tubyiniro, utubari, iby'urwenya, iby'indirimbo, iby'imbyino, sinema, n'ikinamico ritajyanye no Kwibuka.

    Ibikorwa byo kwibuka bizakomeza mu minsi ijana kugeza tariki ya 3 Nyakanga 2023, birimo gushyingura imibiri yabonetse cyangwa iyimurwa muri gahunda yo guhuza inzibutso yumvikanyweho n'Uturere.

    Muri aya mabwiriza kandi bavugamo ko 'igikorwa cyo kwibuka Jenoside yakorewe Abatutsi ntikirenza amasaha atatu (3), kandi kigomba gukurikirana kuri ubu buryo:

    Kumenyesha gahunda; gufata umunota wo Kwibuka, Isengesho ry'uhagarariye amadini ku babyifuza, Ijambo ry'ikaze, Ikiganiro kijyanye no Kwibuka Jenoside yakorewe Abatutsi; 

    Ubuhamya kuri Jenoside yakorewe Abatutsi; ubutumwa bw'Umuryango IBUKA, ubutumwa bw'uhagarariye abashyinguye ababo igihe igikorwa cyo Kwibuka cyahujwe no gushyingura imibiri yabonetse, kwimura imibiri ivanywe ahandi izanwa mu rwibutso cyangwa habaye igikorwa cyo guhuza inzibutso, Ubutumwa bw'umushyitsi mukuru.

    Hagati y'ibi bikorwa hashobora gushyirwamo umuvugo n'indirimbo bifasha Kwibuka Jenoside yakorewe Abatutsi.

    Guhabwa ikiganiro no Kwibuka Jenoside yakorewe Abatutsi muri za Minisiteri, Uturere, mu bigo bya Leta, iby'abikorera, imiryango ishingiye ku myemerere, amashyirahamwe no mu zindi nzego z'ubuyobozi, bizakorwa ku munsi batoranyije mu gihe cy'iminsi yo kwibuka hagati ya tariki 8 mata na 3 nyakanga 2023.

    Mu ngingo ya munani y'aya mabwiriza, bavugamo ko ibigo by'amashuri bizateganya umunsi wihariye wo Kwibuka no guhabwa ikiganiro mu gihe abanyeshuri bazaba bagarutse ku mashuri no ku bigo byabo bavuye mu biruhuko.

    Muri aya mabwiriza yashyizweho umukono na Minisitiri, Dr Bizimana Jean Damascene, banavugamo ko mu gikorwa cyo Kwibuka Jenoside yakorewe Abatutsi, nta busumbane bugomba kuba mu madini.

    Misa n'amateraniro ntibishyirwa muri icyo gikorwa kuko abitabira Kwibuka Jenoside yakorewe Abatutsi atari abayoboke b'idini rimwe. Ariko mu gihe igikorwa cyo kwibuka Jenoside yakorewe Abatutsi cyateguwe n'idini, itorero cyangwa ibigo by'abihaye Imana byemewe n'amategeko, hagamijwe Kwibuka abayoboke babo cyangwa abanyamuryango babo bishwe muri Jenoside yakorewe Abatutsi, icyo gihe abateguye icyo gikorwa babikora bakurikije uko imyemerere yabo iteye, hakubahirizwa ibiteganywa n'amategeko n'amabwiriza.

    Umugoroba w'ikiriyo ubanziriza umunsi wo Kwibuka cyangwa gushyingura imibiri y'abazize Jenoside yakorewe Abatutsi uremewe, ariko usozwa bitarenze saa yine z'ijoro, mu rwego rwo kubungabunga ubuzima n'umutekano w'abantu.

    Mu gihe hateguwe urugendo rwo kwibuka, rukorwa mu ituze bikamenyeshwa mu nyandiko ubuyobozi, inzego z'umutekano n'iz'ubuzima byibura iminsi itanu (5) mbere y'igikorwa, zikagena uburyo urugendo rwo kwibuka rwakorwa bitabangamiye uruva n'urujya rw'abantu n'ibintu.

    Amabwiririza agena uko ibirango byo Kwibuka bikorwa ari kuri www.kwibuka.rw hari n'ibirango byo Kwibuka byemejwe bigomba gukoreshwa. Aya mabwiriza avuga ko 'nta muntu n'umwe wemerewe kunyuranya n'aya mabwiriza mu gukora ibirango byo Kwibuka.'

    Mu rwego rw'isuku rusange no kubungabunga ibidukikije, inzego zose zirakangurirwa gukoresha ibyapa (bill board), screen, teardrops, pull up banner cyangwa agasanduku kabugenewe (branded box), nk'uko bigaragara mu birango byatanzwe, bigashyirwa aho abagana urwego bakirirwa (reception) cyangwa ahandi hagaragarira buri wese.

    Ibigo by'amashuri n'ibiro by'utugari bizamanika amakarita (Posters) nk'uko bigaragara mu birango byatanzwe byibutsa itegurwa n'ishyirwa mu bikorwa rya Jenoside yakorewe Abatutsi, n'uburyo bwo gufasha uwahungabanye. Aya makarita azamanikwa ahantu hagera abantu benshi, kandi mu buryo atangirika.

    Kanda hano usome birambuye aya mabwiriza: 

    Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascéne

    Source : https://inyarwanda.com/inkuru/127753/kwibuka29-hatangajwe-amabwiriza-azakurikizwa-nibikorwa-bibujijwe-127753.html

  • Dore ibibazo ukwiye kubaza umuntu wifuza ko yakubera umukunzi w'ubuzima bwawe bwose #rwanda #RwOT

    1. Ese waba ufite umwanya w'urukundo mu buzima bwawe ?

    Hari abantu bajya aho ibintu biberekeje hose bakajya mu bintu byose ubuzima bubajyanyemo ukuyemo kuba yajya mu rukundo.

    Iki kibazo kizagufasha kumenya uko ukwiye kwitwara kuri uwo muntu biguhe n'umurongo wagenderamo umutereta.

    2. Ese wifuza kubyara abana ?

    Kubyara no kurera abana si ibya buri wese, bamwe babifata nk'impano. Niba wowe wifuza kubyara abana uwo wifuza gutereta akaba adashaka abana ndetse adakozwa ibyo kubyara, nimukundana bikagera kure bizarangira umubano wanyu ujemo agatotsi.

    Hari igihe wasanga nta gahunda yo kubyara abana afite ashaka ko mukundana gusa, akaba kuri we yumva igihe cyo kubyara kitaragera.

    3. Gushyingiranwa ubifata gute ?

    Gushyingiranwa imbere y'Imana n'amategeko hari ababifata nk'ikintu cya ngombwa cyane, gusa uyu munsi hari n'abatabyemera na gato.Ni byiza kumenya niba umuntu wifuza ko yakubera umukunzi yemera imihango y'abashyingiranwa.

    4. Ese ufitanye umubano mwiza n'ababyeyi bawe ?

    Mbere yo gukundana n'umuntu muhuye bwa mbere, uzamenye ko uburyo afata ababyeyi be nawe niko azagufata nimumara kubana.

    Niba uwo muntu abana n'ababyeyi be neza kandi abitaho, nawe azakwitaho kandi agufate neza, gusa niba atita ku babyeyi be, hari ibyago byinshi ko nawe atazakwitaho.

    5. Ukunda akazi ?

    Benshi muri twe tumara umwanya munini cyane mu kazi ka buri munsi, Ni byiza ko mbere yo gukundana n'umuntu umenya niba ari umuntu ukunda gukora cyane ndetse ukitegura kwihanganira kuzajya uhabwa akanya gato ko kubana nawe kuko umwanya munini awumara mu kazi ke.

    6. Ese waba uteganyiriza amasaziro yawe ?

    Nibyiza kubaza umuntu wifuza gukundana nawe inzozi afitiye ubuzima bwe bwo mu masaziro ndetse ukamubaza niba hari icyo yahateganyirije.

    Source : https://umuryango.rw/imyidagaduro/article/dore-ibibazo-ukwiye-kubaza-umuntu-wifuza-ko-yakubera-umukunzi-w-ubuzima-bwawe

  • Zinchenko yahishuye ukuntu yicuza uburyo yakoresheje yambika impeta umukunzi we #rwanda #RwOT

    Umukinnyi wa Arsenal, OIeksandr Zinchenko, yavuze ko uburyo yasabye umugore we ko bazashyingiranwa bwari bubi cyane ku buryo ntawe yakwifuza ko yamwigana.

    Uyu mukinnyi w'inyuma ku ruhande rw'ibumoso, washakanye n'umunyamakuru wa TV Vlada mu 2020, yemera ko uko yabigenje ngo asabe umukunzi we kuzamubera umugore ari bubi cyane kandi ko azabyicuza ubuzima bwe bwose.

    Aganira na www.FootballersLives.tv, Zinchenko yagize ati: “Uburyo namusabye ko yazambera umugore nibwo buryo bubi cyane kuruta ubundi bwose, – ntibishoboka, biteye isoni.”

    Nkuko tubizi Vlada yavuze yego, nubwo bitigeze bishidikanywaho na Zinchenko nubwo ngo yabikoze saa kumi za mu gitondo yambaye akenda k'imbere.

    Uyu mugabo w'imyaka 26 yagize ati: “Nibyo koko yarabyemeye.Mbere ya byose kuko ndi Brad Pitt w'umunya Ukraine kandi nari nambaye akenda k'imbere -mfite umubiri utangaje.”

    Yongeyeho ati: 'Mvugishije ukuri nzahora nicuza ubuzima bwanjye bwose uburyo nasabye umukunzi wanjye ko tubana- ikintu kibi cyane kuruta ibindi byose – biteye ubwoba.

    “twari twakinnye na Portugal mu rugo, dushaka kwerekeza muri Euro. Nari niteguye kumusaba ko twazabana. Nari nzi ko Vlada arakora kuri uriya mukino.

    Nashakaga gusaba shebuja ngo aze muhe ikiganiro kandi nashakaga kumwambikira impeta mu kiganiro. Iki gitekerezo cyari cyiza – twatsinze umukino 2-1. Impeta yanjye yari mu mufuka wanjye kandi nashakaga kubikora.

    “Ariko kuva nkiri muto, nari nzi ko mbere yo gusaba umukunzi wawe ko mwazabana ugomba gusaba uruhushya ababyeyi be. Atari kuri terefone, ahubwo imbonankubone.

    Kubona umwanya byari bigoye cyane. Nari ngiye kubaza umutoza niba nshobora kuva mu ikipe kubera ibibazo byanjye bwite nkagaruka nyuma y'amasaha atanu. Sinashoboraga kubikora, sinashakaga kubikora mbere, mbere yuko nsaba uruhushya.

    Nyuma y'ibi, nabikoze muri iryo joro ahagana mu ma saa kumi za mu gitondo, cyangwa saa cyenda za mu gitondo mu nzu ye, nambaye akenda k'imbere gusa, hafi no kwambara ubusa.

    Ndashaka guha inama buri wese uteganya gusaba umukunzi kurushinga, nyamuneka ntuzabikore nkuko nabikoze. Icyo gihe nabaye nk'umusazi nyuma y'aho. Nagiye hanze gutembera,mugurira indabo nyinshi muri icyo gitondo.

    Aba bashakanye batangiye gukundana muri 2019, Zinchenko ndetse asoma Vlada ari kuganira nawe kuri TV.

    Ubu bafitanye umwana umwe.

    Source : https://umuryango.rw/imyidagaduro/imikino/article/zinchenko-yahishuye-ukuntu-yicuza-uburyo-yakoresheje-yambika-impeta-umukunzi-we

  • Perezida Kagame yongeye gutanga imbabazi kubandi bagororwa #rwanda #RwOT

    Abagore 13 bari barahamijwe icyaha cyo gukuramo inda bari bafungiwe muri gereza ya Nyarugenge, Ngoma Musanze na Nyamagabe nibo bahawe imbabazi bahawe imbabazi na Perezida Kagame.

    Mu mpera z'ukwezi gushize umukuru w'Igihugu yari aherutse no kubabarira Paul Rusesabagina na bagenzi be bari barahamijwe ibyaha by'iterabwoba.

    N'ubwo mu itegeko riteganya ibyaha n'ibihano muri rusange ryasohotse mu 2018 no mu iteka rya Minisitiri w'Ubuzima rya 2019, gukuramo inda ntibyemewe, gusa harimo ingingo iteganya ukutaryozwa mu mategeko icyaha cyo gukuramo inda.

    N'ubwo itegeko rigena ibyaha n'ibihano muri rusange rivuga ko Nta buryozwacyaha bubaho iyo gukuramo inda byakozwe kubera impamvu :

    1º Kuba utwite ari umwana.

    2º Kuba uwakuriwemo inda yarakoreshejwe imibonano mpuzabitsina ku gahato.

    3º Kuba uwakuriwemo inda yarayitwaye nyuma yo kubanishwa n'undi nk'umugore n'umugabo ku gahato.

    4º Kuba uwakuriwemo inda yaratewe inda n'uwo bafitanye isano ya hafi kugera ku gisanira cya kabiri.

    5º Kuba inda ibangamiye ubuzima bw'utwite cyangwa ubw'umwana atwite.

    Hari abagore n'abakobwa bagifungwa bahamijwe icyaha cyo gukuramo inda bityo hakaba hari imiryango iharanira uburenganzira bwa muntu n'uburenganzira bw'abagore n'abana by'umwihariko ibasabira koroherezwa kuko bishoboka ko baba bakuyemo inda bitari amahitamo yabo.

    Perezida wa repubulika atanga imbabazi buri mwaka ahanini ziba zigizwe n'abana baba bafunzwe ariko baratsinze ibizamini bya Leta ndetse n'abagore baba barakuyemo inda n'abandi baba barahamijwe ibyaha bitandukanye barasabye imbabazi.

    @Intego

    Source : https://umuryango.rw/amakuru/mu-rwanda/ubutabera/article/perezida-kagame-yongeye-gutanga-imbabazi-kubandi-bagororwa