Category: Uncategorized

Kuri uyu wagatatu guhera saa tatu z’ijoro, ikipe ya Manchester City iri ku mwanya wa 2 yakiriye Arsenal iri kumwanya wambere ku rutonde rwa gateganyo muri Premier League. 

Uyu ni umukino wo gupfa no gukira kuko ikipe iratsinda indi irahita itangira kurusha indi amahirwe yo kuba yayitwara igikombe,kugeza ubu Arsenal irusha Manchester City amanota 5 ndetse n’imikino 2.

Abakinnyi 11 ba Manchester City babanje mu kibuga: Ederson, Walker, Dias, Akanji, Stones, Rodrigo, De Bruyne, Gundogan, Bernardo, Grealish na Haaland.

Abakinnyi 11 ba Arsenal babanje mu kibuga: Ramsdale; White, Holding, Gabriel, Zinchenko; Partey, Xhaka, Odegaard; Saka, Jesus na Martinelli.

Uko umukino uri kugenda umutoza ku munota

40′ Abakinnyi ba Arsenal bari kurwana n’ubuzima, Gündogan ahaye umupira Haaland nawe arekura ishoti ariko Ramsdale agira Imana umupira ufata mu maguru ye

39′ Bernardo Silva ahaye umupira mwiza Jack Grealish imbere y’izamu ariko Robi Holding atabara neza umupira uhita uterekwa imbere y’izamu rya Arsenal

33′ Arsenal irase uburyo aho Robi Holding yaratanze umupira mwiza kwa Gabriel Jesus ariko atera hanze

27′ Haaland arase uburyo ari imbere y’izamu wenyine afite umupira ariko awuburira mu maguru barawumwaka 

25’  Haaland yongeye guha umupira mwiza De Bruyne aragenda agera mu rubuga rw’amahina asigarana na Magalhaes ndetse na Ben White agerageza kubacenga ashose White aba maso atega ukuguru

22′ Arsenal ibonye uburyo aho Xhaka arekuye kufura mu kibuga hagati maze Magalhaes ashyiraho umutwe ariko umupira unyura impande y’izamu

21′ Bernardo Silva yaratsinze igitego yinjiye mu rubuga rw’amahina ariko Ramsdale aratabara afata umupira

19′ Arsenal yabuze umupira burundu, abakinnyi batangiye gufata umwanzuro wo gukina nabi kugira ngo barebe ko bawufata

16′ Umukino uri kugenda gake buri kipe itegereje ko harindi ikora ikosa ngo iribyaze umusaruro ibe yatsinda igitego

13′ Abakinnyi ba Arsenal bari kugerageza kubaka bahereye inyuma ariko kurenga mu kibuga hagati byananiranye

10′ Kevin De Bruyne ahaye umupira mwiza Haaland imbere y’izamu maze Magalhaes ahita atabara ariko n’ubundi umusifuzi asifura ko umukinnyi wa Arsenal yakorewe ikosa

9′ Manchester City ikomeje gusatira ba myugariro ba Arsenal bo bararwana no gukuraho umupira imbere y’izamu

7′ Stones ahaye umupira mwiza Haaland nawe ashyira kwa Kevin De Bruyne ahita aterekamo igitego cya 1

2’Jack Grealish ahinduye umupira mwiza imbere y’izamu umuzamu wa Arsenal awukozaho intoki ugaruka mu rubuga rw’amahina Haaland agiye gutsinda igitego umusifuzi asifura ikosa

1’ikipe ya Arsenal  niyo yatangije umukino 

Uyu ni umunsi umwe mu mwaka, ndetse uyu munsi usiga urwibutso mu mitima y'abahanzi n'abakunzi babo bitewe n'uko buri umwe yashigikiwe.

Ibihembo bya The Choice Awards byafashe indi ntera mu bikorwa bya benshi, ndetse bihabwa intebe y'icyubahiro nk'ibihembo bitegurwa neza mu Rwanda.

Kujya mu kiciro byibuze kimwe muri The Choice Awards biba bigoye, kimwe n'uko uwakigezemo aba adashaka kurekura. Birumvikana ko habaho ihangana rikomeye.

Muri ibi bihembo Bruce Melodie yanze kurekura mu byiciro bibiri ahatanyemo, Papa Sava nawe yanga kurekura nk'umunyarwenya w'umwaka.

Mu bahanzi bashya Afrique aracyayoboye, mu gihe Bigirimana Abed ariwe mukinnyi umaze gutorwa n'ubwo aha nta ntera nini irimo.

Abarimo Alliah Cool, Alyn Sano, Dj Brianne, Jojo, Nyambo, Gad, Ndasingwa na Urutozi nibo bayoboye abandi ndetse banahabwa amahirwe yo kwegukana ibihembo.

Iminsi ine gusa niyo ibura ibihembo bigatangwa 

Aba mvuze haruguru, nibo bayoboye ikiciro barimo, gusa n'ubwo bimeze gutyo nta ntera nini irimo mubahatanye.

Kugeza ubu aho ibihembo bya The Choice bizabera hamaze kumenyekana, ndetse uwahawe ubutumire niwe uzinjira.

Ibi bihembo bizatangirwa mu Kiyovu ahazwi nka Park inn, ndetse bikaba bizanyura kuri tereviziyo ya Isibo imbonankubone.

Nyambo Jesca ayoboye ikiciro arimo

Vestine na Dorcas ni bamwe mu bahanzi batanga ikizere bagezweho

Inkindi Aisha na Nyaxo ni bamwe mu bagezweho muri Comedy

Iryo tsinda turi kuvuga ryitwa “Soul’s Brothers”. Rigizwe n’abasore b’impanga ari bo Elie na Elise babonye izuba mu mwaka wa 1996, bivuze ko bafite imyaka 27 y’mavuko. Aba basore barahuye ubumenyi mu ishuri ry’umuziki, bari kuririmbana n’umubyeyi wabo witwa Mugisha Emmanuel.

“Kuba turirimbana nk’umuryango biradushimisha cyane kuko twize n’umuziki, rero gukorana umuziki n’umubyeyi ni byiza cyane.” Izi mpanga ubwo zaganiraga na inyaRwanda.com

Nubwo ari bashya mu muziki nyarwanda, ariko bafite indirimbo nyinshi zikiri muri Studio. “Amaraso ya Yesu” niyo bamaze gushyira hanze. Ariko bavuga ko mu minsi ya vuba bazashyira hanze indi yitwa “Turayisenga Ikumva”. Indirimbo zabo bazinyuza kuri shene bise Soul Tv Studio.

Elie na Elise basengera muri ADEPR, ni bo bagize igitekerezo cyo kuririmbana n’umubyeyi wabo, baramwegera barabimusaba, nawe arabemerera. Bavuze ko ari nabo bagize igitekerezo cyo gukora itsinda “Soul’s Brothers” kubera “dufite Studio kandi ni twe dukoramo”.

Mbere basubiragamo indirimbo z’abandi (Cover), nyuma babona bakwiriye gutangira gukora izabo ku giti cyabo. Kuba baririmbana ari abavandimwe, birabanyura cyane. Bati “Twishimira kuba turirimbana kandi twese tuziranye neza twisanzuranyeho”.

Babwiye inyaRwanda ko kuririmbana bibafasha kuguma mu gakiza neza. Bati “Mu gihe cyo gukora indirimbo ntabwo bitugora, biratworohera kuko akenshi tuba turi kumwe”. Nubwo kuri ubu baririmbana na Se, bavuga ko “bikunze twashyiramo na Mama ariko sibirakunda neza”.

Soul’s Brothers bafite intego yo gukora amateka mu muziki wa Gospel basohora indirimbo zifasha abakristo kwegera Imana. Banateguje Album yabo ya mbere muri uyu mwaka wa 2023. Bati “Muri uno mwaka twiyemeje kuzasohora album yacu ya 1”.

Mu ndirimbo yabo nshya “Amaraso ya Yesu”, banyujijemo ubutumwa buvuga ko “twacungujwe amaraso ya Yesu ku bwo kwizera”. Bayanditse bisunze Abaheburayo 10: 19-39. Ni indirimbo yakiriwe neza dore ko mu gihe gito imaze kuri Youtube, imaze kurebwa n’abarenga ibihumbi bitanu.

REBA INDIRIMBO “AMARASO YA YESU” YA SOUL’S BROTHERS FT DADDY

Soul’s Brothers hamwe n’umubyeyi wabo bahuriye mu ndirimbo “Amaraso ya Yesu”

Bakora umuziki bashyigikiwe n’umubyeyi wabo

Batangaje ko bafite indirimbo nyinshi cyane biteguye gushyira hanze

Elie na Elise bavuga ko biryoshye cyane kuririmbana nk’umuryango

Kiyovu Sports yageze muri 1/2 cy’igikombe cy’Amahoro nyuma yo gusezerera Rwamagana City iyitsinze 5-3 mu mikino yombi.

Nyuma y’uko umukino ubanza Rwamagana City iyitsinze 3-2, nta kosa Kiyovu Sports yagombaga gukora mu mukino wo kwishyura.

Ni umukino wabereye kuri Stade Muhanga maze Kiyovu Sports iyitsinda 3-0.

Muhozi Fred ni we wafunguye amazamu ku munota wa 41, Erissa Ssekisambu atsinda icya 2 ku munota wa 59 n’aho Iradukunda Jean Bertrand ashyiramo agashinguracumu ku munota wa 75.

Undi mukino Musanze FC yatsinze Mukura VS 1-0 biba 1-1 kuko Mukura yari yatsinze umukino ubanza bahita bitabaza penaliti. Mukura VS yinjije 4-2.

Umukino wahuzaga Rayon Sports na Police FC, warangiye Rayon itsinze 3-2. Ngendahimana Eric ku ku munota wa 9, Musa Esenu ku munota wa 16 na Onana ku munota wa 33.

Police FC yatsindiwe na Mugisha Didier ku munota wa 45+4 ndetse no kuri penaliti ku munota wa 63. Umukino wo kwishyura uzaba tariki ya 3 Gicurasi 2023, izakomeza izahura na Mukura muri 1/2.

Kiyovu Sports ikaba igomba guhura muri 1/2 na APR FC yasezereye Marines FC.

Kiyovu Sports izahura na APR FC muri 1/2

Ni impuruza yatanze ubwo Inteko Rusange y'Umutwe w'Abadepite yagezwagaho raporo y'uko Uturere, Intara n'Umujyi wa Kigali twakoresheje ingengo y'imari ya Leta mu mezi atandatu ya mbere ya 2022/23.

Ni raporo yakozwe na Komisiyo y'Ingengo y'Imari n'Umutungo by'Igihugu nyuma yo kugirana ibiganiro n'abayobora izo nzego.

Mu byo Abadepite basabye ko byakwitabwaho harimo uturere tugikorera mu nyubako zishaje, ibintu bavuga ko bidindiza imitangire ya serivisi.

Ku rundi ruhande ariko hari uturere tugenda tubona ingengo y'imari ahanini bigendeye ku byihutirwa kurusha ibindi, bityo utwo turere tukabasha kubakwa mu gihe utundi tugitegereje.

Depite Bitunguramye yavuze ko Akarere ka Rulindo kari mu dukeneye kubakirwa aho gukorera ndetse ari ibintu bikwiye gukorwa mu maguru mashya.

Ati 'Ni akarere kubatse mu manegeka, no hirya yaho hatangiye gutenguka ndetse ngira ngo n'iyo imvura igiye ushobora no gusanga no mu biro bya meya amazi yinjiramo.'

'Nagira ngo aka karere ngakorere ubuvugizi ku buryo byazitabwaho nako kakabonerwa ingengo y'imari kakaba kakwimurwa aho kari kandi ngira ngo nabo bakomeje kubigaragaza.'

Ni ikibazo Perezida wa Komisiyo y'Ingengo y'Imari n'Umutungo by'Igihugu, Muhakwa Valens, yavuze ko gikomeye ndetse hazakomeza ibiganiro biganisha ku gushaka ingengo y'imari yo kubaka aka karere.

Ati 'Iki nacyo tuzareba kubera ko na Meya w'Akarere ka Rulindo yari yaragaragaje ko ari ikibazo kibakomereye, ndumva rero tuzakomeza tukiganire turebe niba naho hashakwa ingengo y'imari bikaba byatangira cyangwa se indi gahunda guverinoma ibafitiye.'

'Ni yo mpamvu tuzakomeza kubiganiraho tukareba icyakorwa kuko iki kibazo kirazwi ari na Minecofin [Minisiteri y'Imari n'Igenamigambi] cyangwa n'izindi nzego barakizi.'

Ku rundi ruhande ariko Depite Muhakwa yagaragaje ko akenshi kugena ingengo y'imari harebwa ku byihutirwa kurusha ibindi ariko icy'Akarere ka Rulindo nacyo basanze kiri mu byihutirwa.

Depite Bitunguramye Diogène yasabye ko Akarere ka Rulindo kubakirwa

Ibi biraro birimo ibimaze igihe kirekire bisenyutse ariko ibya vuba ni ibyasenywe n'ibiza byatewe n'imvura idasanzwe yaguye guhera muri Gashyantare 2022.

Mu byasenyutse harimo igihuza Umurenge wa Runda na Rugalika mu gishanga cya Bishenyi, kitarubakwa mu buryo burambye, igihuza Akagali ka Sheli muri Rugalika na Muganza muri Runda ndetse n'igihuza Sheli na Kabagesera mu Murenge wa Runda.

Nyuma y'umwaka urenga umwe bisenyutse, hari abaturage bagaragaza ko byateye impagarara n'ibibazo mu migenderanire y'abatuye imirenge yombi.

Hamwe hashyizweho ibiti byo gukandagiraho ku buryo amagare na moto bishobora gutambuka ariko ku modoka ntibishoboka.

Ubwikorezi bwakorwaga hifashishijwe ibyo biraro ntibugishoka ku ruhande rumwe kuko amakamyo atabona uko yambuka akagezi ka Kayobora.

Abatuye hakurya y'aka kagezi mu Kagari ka Muganza batahagayo n'imodoka ntibakihanyura ahubwo byabasabye guhindura icyerekezo no guca inzira iziguye kubera ko nta yandi mahitamo bafite.

Ntezimana Elias wo mu Kagari ka Sheli yagize ati 'Hashize umwaka imvura iguye igasenya iki kiraro cyaduhuzaga n'Akagari ka Muganza.Kitarasenyuka imodoka zarambukaga ariko isenyuka ryacyo ryateje impagarara n'ibibazo bitewe n'uko imihahiranire yahagaze.'

Yakomeje ati 'Reba nk'ubu umucanga tuba twinuye mu mazi wabuze uko uva hano kandi n'abaturage bafite imodoka bakoreshaga iki kiraro bahinduye inzira, bamwe bajya kunyura Bishenyi bakamanukira kuri uyu musozi wa Muganza. Byaraboroheraga cyane ariko ubu iyo nzira ni iya kure cyane.'

Umuturage wo mu Kagari ka Kabagesera, yavuze ko bagorwa no kugerwaho n'ibikoresho by'ubwubatsi birimo umucanga kubera isenyuka ry'ibiraro. Ngo byatumye igiciro cy'umucanga cyikuba kabiri kubera ko bisaba ko imodoka ziwupakira zizenguruka.

Umuyobozi w'Akarere ka Kamonyi, Dr Nahayo Sylvère, yavuze ko ubuyobozi burimo gukora ibishoboka byose ngo ibiraro byasenyutse bikorwe. Ati 'Ibiza bitugiraho ingaruka ariko tugomba kwishakamo ibisubizo kandi birashoboka. Icyo twakwizeza abaturage ni uko dukomeza gufatanya na bo ibyagiye byangirika tubisane, imihanda yongere ibe nyabagendwa.'

Ibiza by'umwaka ushize n'uwawubanjirije byangije ibiraro 47 mu Karere ka Kamonyi. Ubuyobozi buvuga ko hari ibyagiye bisanwa ku bufatanye n'abaturage ariko hakaba n'ibindi bisaba amafaranga menshi.

Uretse icyatangiye gukorwa mu Murenge wa Kayumbu n'ikindi cyashyizwe muri gahunda umwaka utaha kiri hagati y'Umurenge wa Karama na Kayumbu, ibindi bisaba ingengo y'imari nini ntibirasanwa ndetse n'inyigo y'ayo bizatwara ntirakorwa.

Ikibazo cy'ibiraro ni kimwe mu byo Minisitiri w'Ibikorwaremezo, Dr Nsabimana Erneste yasabwe gutangaho ibisobanuro ku wa 18 Ukwakira 2022 ubwo yitabaga abagize Inteko Ishinga Amategeko, Umutwe w'Abadepite.

Abadepite bavuze ko mu ngendo bakoreye mu turere muri Werurwe uwo mwaka basanze hari imihanda myinshi ifite ibiraro bikeneye kwitabwaho mu maguru mashya.

Minisitiri Dr Nsabimana icyo gihe yibanze ku byubatswe kera bitakijyanye n'uburemere bw'imodoka zibigendaho ariko hari n'ibisenyuka burundu uko ubukana bw'ibiza bugenda bwiyongera mu duce runaka.

Ati 'Ni ikibazo gikomeye. Hari amateme dufite amaze imyaka 30, 40 cyangwa 50. Icyo gihe bayubaka ikamyo iremereye yabaga ipima toni esheshatu, ubu dufite amakamyo afite toni 26, ni yo akoresha utwo turaro dutoya; hari n'ibyo akandagiraho bigahita biturika.'

Yakomeje ati 'Aho tumariye gukora ibarura, twabonye ibigera kuri 400 bikenewe gukorwa mu buryo bwihutirwa kuko ntibyagiye byubakwa bijyanye n'iterambere ryihuta. Ibyo biraro bishaje tumaze kubishyira hamwe turimo gushaka amafaranga.'

Ahitabajwe ibiti hajyaga hanyura n’imodoka ariko ubu ntibishoboka

Ku kagezi ka Kayobora hakozwe inzira y’abanyamaguru, imodoka ntizikihanyura kubera ko ikiraro cyasenyutse

Wambuka uva muri Rugalika ugana mu Kagari ka Muganza hari ikiraro cyasenyutse gihagarika urujya n’uruza rw’ibinyabiziga

Kongera kubaka iki kiraro bisaba imbaraga nyinshi ugereranyije n’imiterere y’igishanga n’amazi akinyuramo iyo imvura yabaye nyinshi

Abaturage bavuga ko umucabga ucukurwa mu Kagezi ka Kayobora bisigaye bigoye ko ugezwa ku bawukeneye kubera ko imihanda itakiri nyabagendwa

Ni agace kamaze guturwa cyane ku buryo gakeneye ibikorwaremezo birimo imihanda, byo korohereza abaturage

Ikiraro guhuza Akagari ka Sheli mu Murenge wa Rugalika n’aka Kabagesera muri Runda cyarasenyutse hitabazwa ibiti binyurwaho n’abanyamaguru, amagare n’amapikipiki

Ubuyobozi buvuga ko iki kiraro kigiye kubakwa ku bufatanye n’abaturage

Minisiteri y'Umutekano itangaza ko impamvu zo guhindura iryo tegeko zishingiye ku kuba iryari risanzwe ryagaragaramo imbogamizi cyane cyane kuva mu 2017 hamaze gushyirwaho Urwego rw'Igihugu Rushinzwe Ubugenzacyaha (RIB).

Ni urwego rwahawe zimwe mu nshingano zari zisanzwe zifitwe na Polisi y'u Rwanda, ari na cyo cyatumye uyu mushinga w'itegeko utegurwa mu kunoza imikorere ya Polisi y'u Rwanda.

Izo mbogamizi zirimo kutagira ububasha bwo gusaka ahakekwa ko hakorewe icyaha, kutagira ububasha bwo gufatira ibintu bimwe na bimwe bifitanye isano n'icyaha, kutagira ububasha bwo gukusanya ibimenyetso by'ibanze ahabereye icyaha no kutagira ububasha bwo kugenza ibyaha byo mu muhanda.

Hari kandi kudateganya inshingano z'abayobozi bungirije ba Polisi y'u Rwanda, kutagaragaza ibihe umupolisi ashobora gukoresha imbaraga zishobora gutera ibura ry'ubuzima no kudateganya ibyaha n'ibihano byerekeranye no gutoroka Polisi y'u Rwanda.

Minisitiri w'Umutekano mu Gihugu, Alfred Gasana yasobanuriye Inteko Ishinga Amategeko ko izo ari imbogamizi kuri Polisi y'u Rwanda kuko nk'urwego rushinzwe umutekano ikwiriye kuba ifite ububasha bwo gukora ibikorwa by'ibanze.

Ni ukugira ngo n'inzego zishinzwe ubugenzacyaha zibone aho zihera zikora akazi kazo. Iyi ikaba ari imwe mu mpamvu hatekerejwe kuvugurura itegeko rigenga Polisi y'u Rwanda kugira ngo hakemurwe izo mbogamizi.

Polisi izajya ikora ubugenzacyaha

Ni itegeko rishyira umuco ku bijyanye n'uko inshingano za Polisi y'u Rwanda n'iz'Urwego rw'Igihugu Rushinzwe Ubugenzacyaha (RIB) zizashyirwa mu bikorwa mu rwego rw'ubugenzacyaha.

Minisitiri Gasana yavuze ko ububasha bw'ubugenzacyaha butahawe Polisi y'u Rwanda yonyine, busanzwe bufitwe n'Urwego rw'Igihugu Rushinzwe Ubugenzacyaha.

Gusa ngo mu rwego rwo kugenza ibyaha atari RIB yonyine yari ifite ububasha bw'ubugenzacyaha mu Rwanda. Hari izindi nzego zifite ububasha bw'ubugenzacyaha zishyikiriza dosiye zazo Ubushinjacyaha.

Ku bijyanye na Polisi y'u Rwanda n'Urwego rw'Igihugu Rushinzwe Ubugenzacyaha, ububasha bwuzuye bw'ubugenzacyaha Polisi y'u Rwanda ibufite ku bijyanye n'ibyaha bikorerwa mu mihanda.

Ku bindi byaha, Urwego rw'Igihugu Rushinzwe Ubugenzacyaha ni rwo rufite ububasha bw'ubugenzacyaha, ariko hari igihe Polisi y'u Rwanda iba iri ahakorewe ibyaha.

Mu itegeko risanzwe, Polisi y'u Rwanda ntiyari ifite ibikorwa by'ibanze by'iperereza mu nshingano.

Ku bijyanye n'ibyaha bikorerwa mu muhanda, muri iri tegeko, Polisi y'u Rwanda ihabwa ububasha bwuzuye bwo gukora ubugenzacyaha kuri ibyo byaha.

Minisitiri Gasana yavuze ko ku bindi byaha, nta mpamvu y'uko Polisi y'u Rwanda ibijyamo kuko hari abagenzacyaha bashinzwe kubikurikirana no kugenza ibyo byaha bindi.

Muri iri tegeko Polisi izajya iba ifite amasaha 24 kugira ngo ikore raporo yayo iyo ifashe umuntu, kuko raporo Polisi ikora ari iy'ibanze igaragaza amakuru n'ibimenyetso bifasha ubugenzacyaha.

Ikindi ni uko aya masaha atagomba kuba menshi kuko hagomba no kwitabwa ku masaha umuntu ufashwe agomba kuba yagejejwe imbere y'ubushinjacyaha.

Guverinoma kandi yasobanuye ko hari gutegurwa umushinga w'itegeko rigenga ikoreshwa ry'umuhanda rizagaragaza inshingano z'umugenzacyaha n'abandi bakora akazi gasanzwe ko mu muhanda.

Rikaba ari na ryo rizagena uburyo umugenzacyaha ashyikiriza umushinjacyaha ibyaha yabonye mu muhanda.

Mu byo Abadepite babajije Minisitiri w'Umutekano ubwo yabagezagaho iri tegeko ni impamvu abakekwaho ibyaha, Polisi y'u Rwanda ibashyira mu ruhame imbere y'itangazamakuru.

Minisitiri Gasana yavuze ko gushyira mu ruhame imbere y'itangazamakuru umuntu ukekwaho icyaha atari ukugaragaza ko uwo muntu ari guhamywa icyaha kandi akiri umwere.

Avuga ko bikorwa mu rwego rwo gukumira icyaha muri rusange kandi ko ari uburyo bwo kugaragariza Abanyarwanda aho inzego zibishinzwe zigeze zikurikirana icyaha cyakozwe.

Abagize Biro y’Umutwe w’Abadepite mu Nteko Ishinga Amategeko ubwo bari barimo gutora Itegeko rishya rigenga Polisi y’u Rwanda