Category: Uncategorized

Mu 2017, Leta y'u Rwanda yatangije umushinga w'Ikigega cy'Ubwiteganyirize cyiswe Ejo Heza, wari ugamije gufasha Abanyarwanda kubona uburyo bwo kwizigama by'igihe kirekire.

Amarembo yafunguriwe abanyamushahara, abikorera, abakorera abandi mu byiciro by'imirimo itandukanye, harimo n'itagengwa n'amategeko y'umurimo cyangwa amategeko yihariye.

Mu nama y'ihuriro ry'Ibigo by'Ubwiteganyirize yabereye i Abidjan muri Côte d'Ivoire kuva kuwa 17 kugera kuwa 19 Gicurasi 2023, u Rwanda rwahize ibindi bihugu bya Afurika yo munsi y'Ubutayu bwa Sahara mu bihembo bya ISSA by'uwakoze ibikorwa by'intangarugero 'Good Practice Awards.'

U Rwanda rwasangije iri huriro ibanga ryakoreshejwe kugira ngo iki kigega kigere ku ntego zacyo, zirimo udushya mu ikoranabuhanga, amafaranga ya nkunganire Leta iha abizigama, ikoranabuhanga mu kwiyandikisha no kwishyura imisanzu hakoreshejwe telefoni zigendanwa, ndetse na bimwe mu byo gishobora kwishyura umunyamuryango mbere y'uko agera mu za bukuru.

Kuba umunyamuryango wa 'Ejo Heza' bikorwa ku bushake, biroroha kandi abantu bose bashobora kuyigana bazigamira izabukuru.

Umuyobozi Mukuru wungirije ushinzwe Ibigenerwa Abanyamuryango mu Kigo cy'Igihugu cy'Ubwiteganyirize mu Rwanda, RSSB, Dr Regis Hitimana, yavuze ko iki gihembo bahawe kigaragaza ko u Rwanda rwakoze cyane kandi rudaheza abaturage mu guteganyiriza ejo habo hazaza.

Ati 'Iki gihembo ni igihamya cy'ubushake Guverinoma y'u Rwanda ifite mu guha Abanyarwanda bose ubwiteganyirize nta busumbane, kinagaragaza kandi ibikorwa by'indashyikirwa Leta y'u Rwanda yakoze mu myaka myinshi ishize.'

Imibare yo muri Gicurasi igaragaza ko ubwizigame bw'abanyamuryango ba Ejo Heza bugeze kuri miliyari 45,4 Frw.

Kugeza muri Werurwe 2023, abanyamuryano ba Ejo Heza bari bamaze kugeza kuri miliyoni eshatu n'ibihumbi 100, bivuze ko bari 23,4% by'abaturage bose, kandi 38,7% by'abafite imyaka yo gukora bizigamye biganjemo abari mu miryango yinjiza amafaranga make.

Imibare yo muri uko kwezi igaragaza ko abanyamuryango bizigama mu buryo buhoraho bari miliyoni ebyiri n'ibihumbi 600, mu gihe 49% by'abizigama ari abagore naho abangana na 32% ni bo babarirwa mu bwiteganyirize bw'izabukuru bwa RSSB.

Imibare yo muri Gicurasi 2023, igaragazaga ko 88% by'abanyamuryango ari abakora imirimo itagengwa n'amategeko y'umurimo, naho 12% bakora imirimo igengwa n'amategeko.

Abanyamuryango ba Ejo Heza muri Gicurasi 2023 bariyongereye bagera kuri 3.223.205, barimo abagabo bangana na 50,6% n'abagore bangana na 49,4%.

Imibare mishya yakusanyijwe mu ibarura rusange ry'abaturage ryabaye mu 2022, igaragaza ko umubare w'urubyiruko rufite munsi y'imyaka 30 wagabanyutse, uva kuri 70,3 mu 2012 ugera kuri 65,3% mu 2022, ndetse byitezwe ko mu 2050 bazaba bageze kuri 54,3%.

Naho abaturage bafite imyaka hagati ya 16-64 bavuye kuri 53,4% mu 2012 bagera kuri 56,0% mu 2022, ndetse byitezwe ko mu 2050 bazaba bageze kuri 61,4%.

Mu ibarura rya 2012 umubare w'Abanyarwanda bari hejuru y'imyaka 60 wari ibihumbi 500. Icyo gihe mu 2032, uwo mubare uzikuba kabiri, ari nayo mpamvu hatekerejwe iki kigega kugira ngo kizagoboke abaturage bari kurushaho kugana mu zabukuru.

U Rwanda rwahawe igihembo kubera ikigega Ejo Heza

Ku mugoroba wo kuri uyu wa Gatanu, abatuye mu Mujyi wa Goma bari bagize ubwoba nyuma yo kubona ikirunga cya Nyamulagira cyaka umutuku, nka kimwe mu bimenyetso by'uko kiri cyangwa kigiye kuruka.

Ni nyuma y'umunsi umwe ikigo OVG gitangaje ko hari amahindure yagaragaye mu Murwa w'Ikirunga cya Nyamulagira, ashobora gusohoka hanze isaha n'isaha.

Itangazo rishya icyo kigo cyashyize hanze ku mugoroba wo kuri uyu wa Gatanu, rivuga ko hari amahindure amaze igihe azamuka mu murwa w'Ikirunga cya Nyamulagira, gusa bagaragaza ko aramutse asohotse nta ngaruka yagira ku baturage kuko inzira azerekezamo ari igana muri Pariki ya Virunga aho kuba mu bice bya Goma n'ahandi hatuwe n'abaturage.

Bagize bati 'Turasaba abaturage ba Goma gutuza bagasubira mu mirimo yabo batekanye'.

Icyakora bagiriwe inama yo kubanza kuronga neza ibyo guteka nk'imboga mu gihe bagiye kubitunganya no kwitondera kunywa amazi yo mu bigega.

OVG yatangaje ko ikomeje gukurikiranira hafi iby'ikirunga cya Nyamulagira, ku buryo amakuru yose mashya abaturage baza kuyamenyeshwa.

Nyamulagira iheruka kuruka mu buryo bukomeye mu 2011. Iki kirunga kiri rwagati muri pariki ya Virunga, icumbikiye inyamaswa nk'ingagi zo mu misozi.

Ikirunga cya Nyamulagira giheruka kuruka mu buryo bukomeye mu 2011

Komisiyo y’Amatora ya FERWAFA, yamaze gutangaza ingengabihe y’amatora ya Komite Nyobozi y’iri shyirahamwe ry’umupira w’amaguru mu Rwanda izaba mu kwezi gutaha.

Nk’uko byemejwe n’inama y’inteko rusange idasanzwe yabaye ku wa 15 Werurwe 2023, ku wa 24 Kamena 2023 hazaba inama y’inteko rusange isanzwe izatorerwamo abagize Komite Nyobozi ya FERWAFA.

Ni nyuma y’uko bamwe mu bari bayigize beguye bigatuma Komite yose iseswa. Abazatorwa bazayobora mu gihe cy’imyaka 2 yari isigaye kuri manda ya Nizeyimana Olivier.

Nk’uko bigaragara mu itangazo ryashyizweho umukono na Kalisa Adolphe, umuyobozi wa Komisiyo y’Amatora ya FERWAFA ni uko kuva tariki ya 22 kugeza 27 Gicurasi 2023 ari umwanya wo gutanga kandidatire.

Tariki ya 29 kugeza 30 Gicurasi 2023, ni umwanya wo kuzuza dosiye y’abakandida nk’uko bisabwa na Komisiyo y’amatora. Tariki ya 31 Gicurasi kugeza 6 Kamena 2023, ni umwanya wo gusuzuma kandidatire zakiriwe.

Ku wa 6 Kamena 2023, ni ugutangaza abakandida bujuje ibisabwa, ni mu gihe bukeye bwaho tariki ya 7 Kamena ari ugutanga ubujurire muri komisiyo y’amatora y’ubujurire.

Tariki ya 9 kugeza 12 Kamena 2023 ni ugusuzuma ubujurire bwakiriwe, ni mu gihe ku wa 13 Kamena ari ugutangaza ibyemezo bya kamisiyo y’amatora y’ubujurire.

Mu kiganiro n’itangazamakuru kizaba tariki ya 14 Kamena 2023, nibwo iyi komisiyo izatangaza urutonde ndakunda rw’abakandida bemerewe gupiganira kujya muri Komite Nyobozi ya FERWAFA.

Ku wa 15 — 23 Kamena 2023 ni ukwiyamamaza ku bakandida, ni mu gihe ku wa 24 Kamena 2023 ari bwo hazaba amatora, n’aho tariki ya 27 Kamena 2023 ni ugutanga raporo ya nyuma y’amatora no gushyingura inyandiko.

FERWAFA yagaragaje ingengabihe y’amatora

Abahanzi nyarwanda, Juno Kizigenza, Kenny Sol, Ariel Wayz n’umunya-Kenya, DJ Fully Focus nibo basusurutsa abitabira ibirori bitangiza imikino ya nyuma ya shampiyona Nyafurika ya Basketball (Basketball Africa League).

Iri rushanwa ririmo kuba ku nshuro ya 3,riratangira uyu munsi muri Kigali Arena aho nyuma y’imikino y’ijonjora, 1/4 cyakomereje i Kigali.

Saa 16h00 z’i Kigali mu Rwanda nibwo haba umukino wa mbere uri buhuze Stade Malien yo muri Mali ndetse na Cape Town Tigers yo muri Afurika y’Epfo.

Umukino karundura utegerejwe na benshi ni uwo Al Ahly yo mu Misiri iza gukinamo na REG BBC yo mu Rwanda ku isaha ya saa 19h30′.

Mu rwego rwo gufasha abitabiriye iyi mikino kuryoherwa, haraza kuba hari abahanzi babasusurutsa barangajwe imbere na Kenny Sol, Juno Kizigenza ndetse na Ariel Wayz.

Uretse abo haraba hari kabuhariwe mukavangavanga imiziki, Michael Ndung’u wamamaye ku mazina ya DJ Fully Focus ukomoka muri Amerika.

Juno Kizigenza na Ariel Wayz barasusurutsa abitabira BAL

Kenny Sol na we araba ahabaye

DJ Fully Focus ni umwe mubitezweho gushimisha abitabiriye iyi mikino

Impuzamashyirahamwe y’Umupira w’Amaguru muri Afurika, CAF, iherutse gusohora itangazo ryemeza ko u Rwanda rwatewe mpaga ku mukino rwakinnyemo na Benin ukaba wari warangiye amakipe yombi anganyije igitego 1-1.

Wari umukino wo ku munsi wa 4 mu gushaka itike y’igikombe cy’Afurika kizabera muri Cote d’Ivoire mu mwaka utaha. Uyu mukino wari wabereye i Kigali none byarangiye Benin yegukanye amanota 3 uko ari imbumbe.

Icyo Amavubi yazize ni ugukinisha umukinnyi ukina mu kibuga hagati ariwe Muhire Kevin kandi yarabonye amakarita 2 y’umuhondo mu mikino 2 yikurikiranya. 

Iyo mikino ni uwa Senegal ndetse n’uwa Benin ubanza. Bivuze ko ku mukino wabereye i Kigali atari gukandagira mu kibuga ariko yagiye mu kibuga arakina bituma ikipe y’Igihugu ya Benin ihita ifata iya mbere ijyana ikirego muri CAF.

Nk’uko Itegeko rya 42 ku bijyanye n'imikino yo gushaka itike y'Igikombe cya Afurika rivuga ko umukinnyi ubonye amakarita abiri y'umuhondo agomba gusiba umukino ukurikiyeho ariko ku Mavubi siko byagenze aribyo byatumye Benin yibonera amanota 3 yemye nta nkomyi maze u Rwanda ruterwa mpaga y’ibitego 3-0.

Nyuma y’uko iki gikorwa kibaye benshi batangiye kwibaza niba nta muntu ugomba kubibazwa cyangwa ngo abe yanabizira. 

Ku makuru InyaRwanda yamenye ni uko uwari ushinzwe ubuzima bwa buri munsi bw’ikipe y’igihugu Amavubi (Team Manager) ariwe Rutayisire Jackson yamaze kwegura ku mirimo ye nyuma y’imyaka 5 yari amaze kuri uyu mwanya.

Ubusanzwe ‘Team Manager’ n iwe uba ushinzwe kumenya umukinnyi wemerewe gukina cyangwa utabyemerewe kubera amakarita y’umuhondo.

Bivuze ko Rutayisire Jackson nawe ari mu bagombaga kubazwa ukuntu Muhire Kevin yakandagiye mu kibuga kandi atabyemerewe dore ko aba ari nawe wicaye yandika abakinnyi bahawe amakarita y’umuhondo.

Ibi bibaye kandi nyuma y’uko hari andi makuru yagiye hanze avuga ko Minisiteri ya siporo yasabye Ferwafa ibisonuro birambuye kuri mpaga yatewe Amavubi.

Rutayisire Jackson wari umukozi wa Ferwafa ushinzwe ikipe y’igihugu Amavubi yeguye ku mirimo ye