Category: Uncategorized

Gusambanya umwana, itegeko risobanura ko umuntu wese ukorera ku mwana kimwe mu bikorwa bishingiye ku gitsina bikurikira, aba akoze icyaha: Ibyo bikorwa bivugwa mu Ingingo ya 133 y'Itegeko no 68/2018 ryo ku wa 30/8/2018 riteganya ibyaha n'ibihano muri rusange ihinduwe ku buryo bukurikira. 

Gushyira igitsina mu gitsina, mu kibuno cyangwa mu kanwa k'umwana. Gushyira urugingo urwo ari rwo rwose rw'umubiri w'umuntu mu gitsina cyangwa mu kibuno cy'umwana. Gukora ikindi gikorwa cyose ku mubiri w'umwana hagamijwe ishimishamubiri. Iyo abihamijwe n'urukiko, ahanishwa igifungo kitari munsi y'imyaka 20 ariko kitarenze imyaka 25.

Iyo umuntu mukuru asambanyije umwana uri munsi y'imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha.

Iyo umuntu mukuru asambanyije umwana ufite cyangwa urengeje imyaka 14 bigatera umwana indwara idakira cyangwa ubumuga, igihano kiba igifungo cya burundu.

Iyo umuntu mukuru asambanyije umwana bigakurikirwa no kumugira umugabo cyangwa umugore, igihano kiba igifungo cya burundu kidashobora kugabanywa kubera impamvu nyoroshyacyaha.

Iyo umwana ufite imyaka 14 ariko utarageza 18 y'amavuko asambanyije umwana uri munsi y'imyaka 14, ahanwa hakurikije ibiteganywa mu ngingo ya 54 y'iri tegeko.

Iyo umwana ufite nibura imyaka 14 asambanyije umwana ufite imyaka 14 akoresheje imbaraga, iterabwoba, uburiganya cyangwa abikoze ku ntege nke z'uwakorewe icyaha, ahanwa hakurikijwe ibiteganywa mu ngingo ya 54 y'iri tegeko.

Ubusambanyi uko buhanwa n'uko bukurikiranwa

Ingingo ya 136 y'Itegeko no 68/2018 ryo ku wa 30/8/2018 riteganya ibyaha n'ibihano muri rusange ihinduwe ku buryo bukurikira: Umuntu wese washyingiwe ukorana imibonano mpuzabitsina n'uwo batashyingiranywe aba akoze icyaha. Iyo abihamijwe n'urukiko ahanishwa igifungo kitari munsi y'amezi 6 ariko kitarenze umwaka.

Gukurikirana icyaha cy'ubusambanyi ntibishobora kuba hatareze uwahemukiye mu bushyingiranywe ku buryo bwemewe n'amategeko. Muri icyo gihe, hakurikiranwa uwarezwe n'uwakoranye icyaha na we. 

Uwahemukiwe ashobora gusaba guhagarika ikurikirana ry'urubanza, aho rwaba rugeze hose, iyo yisubiyeho akareka ikirego cye. Ukureka urubanza cyangwa irangiza ryarwo bigira ingaruka no kuwakoranye icyaha n'uregwa.

Ese ibimenyetso bigenderwaho ni ibihe mu guhamya icyaha cyo gusambanya umwana?

Umunyamategeko Muramira Innocent yabwiye InyaRwanda ko icyaha cyo gusambanya umwana 'Child defilement' cyangwa se gufata ku ngufu 'Rape', ibihano byabyo birasobanutse. Ati:'Abantu bose ntabwo bagomba gukora ibi byaha kuko bigira ingaruka ku mpande zose no ku muryango nyarwanda'.

Yakomeje avuga ko uwasambanyijwe cyangwa se uwafashwe ku ngufu hafatwa ibimenyetso by'intanga. Ariko rero mu bihe byo gushaka ibimenyetso harebwa ibya gihanga 'Medical evidences' nyamara ababuranyi bose bagomba gutanga ibimenyetso birega cyangwa se bishinjura.

Ibimenyetso byose bihabwa agaciro n'urukiko nk'uko itegeko rya 65 ry'ibimenyetso ribiteganya. Ati:'Hari ibindi bimenyetso bifatwa nk'intanga zakoreshejwe ku mukobwa, abatangabuhamya n'ibindi byaboneka nka DNA, utunyangingo ndangasano'.

Muramira Innocent avuga ko urukiko rusuzuma ibimenyetso ku buryo hafatwa icyemezo gishingiye ku byemezo bya gihanga cyangwa se ibindi bimenyetso.

Yasoje avuga ko ari gusambanya umwana no gufata ku ngufu ni icyaha mpuzamahanga kandi ntigisaza. 

Umunyamategeko Innocent Muramira amaze imyaka irenga 7 ari impuguke mu mategeko arebana n’ibya gatanya, amategeko y’umurimo, ay’ubucuruzi, areba abimukira akaba ari umunyamategeko wa Ambasade ya Uganda ya mu Rwanda. Ariko anafite ikigo gitanga ubufasha mu by’amategeko kitwa Muramira & Co Advocates. 

Minisiteri y’uburinganire n’iterambere ry’umuryango ‘MIGEPROF’ yigeze kumurika imibare yo kuva muri Nyakanga kugeza mu Ukuboza kwa 2022 abangavu 13,000 batarageza ku myaka 19 batewe inda imburagihe. Ni imibare yatangajwe ku itariki 2 Gashyantare 2023. Imibare yo mu 2021 igaragaza ko mu gihugu hose abangavu 23,000 batewe inda z’imburagihe bari munsi y’imyaka 18 y’amavuko.

Gusambanya umwana ni icyaha kidasaza

Buri muntu agira imiterere ye n’uko abona bintu bitandukanye n’abandi, hari abagira ubwoba n’abadatinya kuvuga uko biyumva aho baba bari hose cyangwa uwo babwira, muri make bakaba batavugirwamo ikintu bamwe babona nk’inenge.

Muri iyi nkuru turagaruka ku bakinnyi bamwe na bamwe bakina muri shampiyona y’u Rwanda, cyane cyane abanyarwanda batavugirwamo, badatinya kubwira abayobozi babo n’abatoza uko babona ibintu nubwo byaba biri bubakoreho.

Aba bakinnyi akenshi na bagenzi babo baba babazi ndetse banabatinya, rimwe na rimwe niyo hari ikibazo mu ikipe usanga ari bo bashobora imbere kugira ngo bajye kubavuganira kuko bo ntacyo batinya.

Hategekimana Bonheur — Rayon Sports

Ni umunyezamu wa Rayon Sports, akaba umwe mu bakinnyi batavugirwamo muri iyi shampiyona y’u Rwanda, n’abakinnyi bagenzi be baramutinya kuko ntawe atinya yaba na kapiteni w’ikipe.

Akenshi ibi uzabibona atsinzwe igitego, umukinnyi ukoze ikosa ni we uzakubarira inkuru kuko anarebye nabi yamukubita, umwaka ushize w’imikino yigeze guhanwa kubera gutuka abakinnyi bagenzi be nyuma yo gutsindwa igitego.

Umukino ufunura shampiyona ya 2023-24 ubwo yatsindwaga igitego cya penaliti mu minota ya nyuma, Serumogo Ali wayikoze yari yagowe, umutoza aje kubihosha na we barashwanye, umutoza yagize umujinya aramutuka undi na we aramutuka atitaye ku kuba ari umutoza.

Hakizimana Muhadjiri — Police FC

Ni umukinnyi ukina asatira muri Police FC. Ni umukinnyi uba ubona atuje w’umwana mwiza ariko iyo agize ikimutesha umutwe nibwo umenya ko ari umukinnyi utavugirwamo.

Mu makipe yose yagiye anyuramo yagiye agarukwaho ku kibazo cy’imyitwarire itari myiza, haba gukora icyo ashaka nko kudakunda imyitozo no kugirana ibibazo n’abatoza.

Uwo wabwira ko Muhadjiri atavugirwamo akurikirana siporo ntiyagutera ibuye, tutagiye mu bya kera benshi bibuka umukino APR FC iheruka gutsindamo Police FC1-0, Muhadjiri yashwanye n’umutoza we Mashami.

Mashami ubwo yari amuhamagaye ashaka kumuturisha nyuma yo gushwana na Rutanga, yahise akoresha amaboko asa n’umubwira ati 'genda', Mashami yahise arakara ahagurutsa umusimbura ngo ajye kwishyushya, Muhadjiri yahise yongera gukoresha amaboko asa n’umwereka ngo 'muzane ansimbure', ibi byatumye igice cya mbere kirangiye ahita asimbuzwa.

Manishimwe Djabel — Mukura VS

Manishimwe Djabel intizanyo ya APR FC muri Mukura VS, kimwe mu bintu azwiho na we ni uko atajya aripfana kandi akavuga icyo yumva ashaka atitaye ku wo abwira cyangwa uwo avuga.

Uyu mukinnyi iyo ari mu ikipe bitewe n’imiterere ye cyangwa kutavugirwamo kwe, bivugwa ko hari ukuntu aba afite ijambo mu ikipe ikipe ishobora no kujya kugura umukinnyi akabyanga cyangwa akaba yatuma irekura uwo adashaka. Uyu mugabo wari kapiteni wa APR FC benshi baribuka ubwo Adil yamuvugaga mu itangazamakuru ndetse akanavuga ko atari kapiteni we ari uwa APR FC, benshi batunguwe n’amagambo uyu kapiteni yaje kumusibiza aho yavuze ko iyo umugabo asangiye n’undi ibihe byiza n’ibibi agashaka kumwigarama, nta mugabo uba umurimo.

Djabel kandi yongeye gutungura benshi ubwo yari atarasohoka muri iyi kipe ngo ajye muri Mukura, avuga ku banyamahanga yaguze aho yavuze ko nta tandukaniro abona bafite n’abakinnyi b’abanyarwanda iyi kipe yakoreshaga, gutangaza aya magambo mu ikipe ukirimo ntibyafashwe neza. Ni we mukinnyi wafashe icyemezo abwira ubuyobozi bw’iyi kipe yagisirikare ko bukwiye gukuraho ibyo kuba i Shyorongi (cyane ko benshi bafite imiryango hakaba hari n’abatorokaga na we arimo) bakajya bahaza bitegura umukino, byaje gukorwa.

Niyonzima Olivier Seif — Kiyovu Sports

Ubu ni kapiteni wa Kiyovu Sports. Ni umukinnyi utapfa kumva avuga ariko ibikorwa bye byereka benshi uburyo ari umukinnyi utavugirwamo, yateguye gukora ikintu icyo wakora cyose ntiwahagarika Niyonzima Olivier Seif.

Uyu mukinnyi 2021 yahagaritswe mu Mavubi kubera ko ubwo yari yagiye gukina na Kenya muri Kenya, uwari perezida wa FERWAFA, Nizeyimana Olivier yababwiye ko nta mukinnyi ugomba gusohoka kuri hoteli bari bacumbitsemo ndetse akaba n’umwe mu babyemeye mbere ariko aza guturoka byatumye bamusigayo bamubuze.

Bamwe mu nshuti ze bakubwira ko ari umukinnyi ushobora kwifata agasiba imyitozo nta mutoza cyangwa umuyobozi yabimenyesheje bitewe n’uko we yiyumva, ibi yakundaga kubikora ari muri AS Kigali.

Kakule Mugheni Fabrice — Musanze FC

Ni umukinnyi ukomoka muri DR Congo umaze imyaka myinshi akina mu Rwanda, yakiniye Marines FC, Rayon Sports, Kiyovu Sports, AS Kigali akaba ageze muri Musanze FC.

Kalule Mugheni na we ni umukinnyi uzwiho kutavugirwamo akenshi iyo yatekereje ikintu aragikora. Ni umukinnyi ikipe ishobora kubura igihe runaka batazi aho ari bakamubona ibyo arimo yabisoje. Nk’umwaka ushize AS Kigali yayikiniye imikino mbarwa aho yari yarigendeye.

Benshi bamwibukira ku kuntu 2018 yigeze kujya mu myitozo ya Kiyovu Sports yakiniraga yambaye umwambaro wa Rayon Sports yari yaravuyemo. Ikirenze kuri ibyo aya makipe yombi ni amakeba akomeye mu Rwanda.

Umutoza wa Rayon Sports, Zelfani Yamen yari amennye ibikoresho by’itangazamakuru Imana ikinga akaboko.

Hari ku mugoroba w’ejo ku wa Gatatu tariki ya 30 Kanama 2023 ku myitozo ya Rayon Sports yitegura umunsi wa 3 wa shampiyona izakinamo na Amagaju FC.

Rayon Sports yari yatumijeho abanyamakuru aho bagombaga gufata iminota 20 ya mbere y’imyitozo ndetse bakaza kuvugana n’umutoza ndetse n’umukinnyi umwe nyuma y’umukino.

Abanyamakuru bavugishije umunyezamu Hategekimana Bonheur ariko ku mutoza Yamen Zelfani biba ingorabahizi.

Ubwo yarimo aganira n’itangazamakuru, uyu mutoza yabajijwe icy’uko yatutse umutoza wa Gorilla FC, Gatera Moussa mu Cyarabu nk’uko yabitangaje nyuma y’umukino wabahuje mu mpera z’icyumweru gishize banganyijemo ubusa ku busa.

Yasubije ati “ntabwo muzi! Ntabwo muzi. Mwebwe abanyamakuru muba mushaka kuzana byacitse, muba mushaka kuzana byicitse. Zimya iyo camera.”

Yahise atera nk’intambwe ebyeri agira ati “njye ndabubaha ariko mwe mugashaka guteza ibibazo, ni ibibazo mushaka?”

Aha nibwo yahise ahindukira arebye asanga hari abari bakirimo gufata amashusho, nibwo yahise agira umujinya asa nuhubuza camera ariko ku bw’amahirwe ntihagira iyangirika.

Urwego rw’Igihugu rw’Iterambere rwashyize hanze urutonde rw’abantu barimo n’ibyamamare mpuzamahanga bazitabira umuhango wo Kwita Izina uzaba ku nshuro ya 19, aho abana b’ingagi 23 bavutse mu mezi 12 ashize aribo bazahabwa amazina muri ibi birori bizabera mu Kinigi mu K

arere ka Musanze ku itariki 01 Nzeri 2023.

Mu byamamare bizitabira uyu muhango harimo umunyarwenya kabuhariwe Kevin Hart waruherutse gusura u Rwanda arikumwe n’umuryango we. Harimo kandi n’icyamamare muri Sinema, Idris Elba n’umugore we Sabrina Elba hamwe na Dania Guria na Winston Duke bamenyekanye muri filime ya ‘Black Panther’ mu gice cya mbere n’icya kabiri.

Dore ibyamamare bizita amazina abana b’ingagi 23 mu muhango wo Kwita Izina uzaba ku nshuro ya 19:

1. Kevin Hart

Umunyarwenya akaba n’umukinnyi wa filime afatanya n’ishoramari, Kevin Darnell Hart, agiye kugaruka mu Rwanda ku nshuro ya Kabiri aho azitabira umuhango wo Kwita Izina ubura amasaha make ukaba. Uyu muryarwenya yaherukaga kuza gutembera mu Rwanda arikumwe n’umuryango we. Ku wa 17 Nyakanga 2023 nibwo  yasesekaye i Kigali aje mu biruhuko aho yanasuye Ingagi.

Kevin Hart n’umuryango we baheruka gufatira ikiruhuko mu Rwanda

Kevin Hart ni umwe mu banyarwenya bakomeye ku Isi ndetse akaba amaze no gukina muri filime zigera kuri 49 harimo nka ‘Soul Plane’, ‘Ride Along’, ‘Jumanji’ ‘Think Like A Man’ zatumye akundwa cyane. Uyu munyarwenya kandi yagiye akorana n’ibyamamare birimo Sylvester Stallone, Eddie Murphy,The Rock hamwe n’abandi batumye izina rye rirushaho gushinga imizi.

Uretse gukina filime, Kevin Hart w’imyaka 44 y’amavuko amaze gukora ibiganiro by’urwenya harimo n’ibya nyuze kuri Netflix bigera kuri 9 harimo na ‘Reality Check’ aherutse gusohora. Uyu mugabo kandi anafite ibiganiro bikunzwe binyura kuri televiziyo mpuzamahanga harimo ‘Heart To Hart’ kinyura kuri Peacock, ‘Celebrity Prank Wars’ akorana na Nick Cannon hamwe na ‘Celebrity Game Face’ byose binyura kuri televiziyo ya E!News.

Umunyarwenya akaba n’umukinnyi wa filime, Kevin Hart agiye kugaruka mu Rwanda mu birori byo Kwita Izina abana b’Ingagi

Kevin Hart utunze Miliyoni 450 z’Amadolari, ari mu banyarwenya bakize cyane ku Isi  kandi yigeze gushyirwa ku rutonde rw’abantu 100 bavuga rikijyana ku Isi mu 2015.

2. Idris Elba

Umukinnyi wa filime w’icyamamare Idris Akuna Elba, uzwiho gukundwa cyane n’igitsinagore nawe ari mu bazitabira umuhango wo Kwita Izina ku nshuro ya 19. Yavukiye mu mujyi wa London mu Bwongereza mu 1972, ari naho abarizwa gusa afite inkomoko ku mugabane wa Afurika. Se umubyara akomoka mu gihugu cya Sierra-Leone mu gihe Nyina akomoka muri Ghana.

Icyamamare muri Sinema, Idris Elba, ari mubazita izina abana b’ingagi

Idris Elba yatangiye kumenyekana ubwo yakinaga muri filime y’uruhererekane yitwa ‘The Wire’ mu 2002 yatumye atangira gukorana n’abatunganya filime i Hollywood. Kugeza ubu Idris Elba amaze gukina filime nyinshi zakunzwe.

 Byumwihariko izo yakinnye zikigarurira imitima ya benshi harimo ”Obsessed’ yakinanye na Beyone mu 2009, ‘Daddy’s Little Girls’ mu 2007, ‘Takers’ mu 2010, ‘No Good Deeds’ mu 2014, ‘Pacific Rim’ mu 2013, ‘Luther’ yakinnye kuva mu 2010 kugeza mu 2019.

Kubera ubuhanga bwe mu gukina filime, Idris Elba yagiye anibikaho ibihembo bikomeye muri Sinema birimo nka ‘Golden Globe Award’ yahawe mu 2012 kubera filime y’uruhererekane ya ‘Luther’. ‘Screen Actors Guild Award yahawe mu 2016 kubera filime ye ‘Beast of No Nation’, NAACP Image Award yahawe mu 2018 kubera filime ‘Thor: Ragnarok, ‘Gotham Independent Film Tribute Award yahawe mu 2021 kubera filime ‘The Harder They Fall’ yashowemo imari na Jay Z.

Idris Elba kandi azaba arikumwe n’umugore we Sabrina Elba

Idris Elba w’imyaka 50 y’amavuko uvanga gukina filime no gukora umuziki, amaze no kwibikaho ibihembo bya BET Award bigera kuri 3. Agiye kuza mu Rwanda arikumwe n’umugore we w’umunyamideli Sabrina Elba bazanafatanya mu Kwita Izina abana b’Ingagi.

3. Winston Duke

Umukinnyi wa filime w’icyamamare, Winston Duke, uzwiho kugira ibigango n’ijwi ryihariye, ari mu bazitabira mu bazita amazina abana b’ingagi 23 bavutse mu mezi 12 ashize. Winston Duke akomoka ku kirwa cya Trinidad & Tobago giherereye mu majyaruguru ya Venezuela.

Winston Duke, uzwi cyane nka ‘M’Baku’ yamamaye muri filime ya ‘Black Panther’

Izina rye ryatangiye gutumbagira ku ruhando mpuzamahanga mu 2018 ubwo yakinaga muri filime yanditse amateka ya ‘Black Panther’ ndetse anakina mu gice cyayo cya kabiri cyiswe ‘Wakanda Forever’. Winston Duke w’imyaka 36 anazwi kandi mu zindi filime zashimangiye umwihariko we zirimo nka ‘Spencer Confidential’ yakinanye na Mark Wahlberg mu 2020. ‘Us’ yakinanye na Lupia Nyong’o mu 2019, ‘Avengers: Endgame’ yakinanye n’abarimo nyakwigendera Chadwick Boseman, Chris Evans mu 2019.

Winston Duke benshi bita ‘M’Baku’ (Izina akinisha muri Black Panther), amaze guhabwa ibihembo bitandukanye birimo MTV Movie Award mu 2018, NAACP Image Award mu 2019, Excellence in Acting Award yahawe mu 2020. Mu 2019 kandi wari umwaka udasanzwe kuri Winston Duke kuko ikinyamakuru People Magazine cyamushyize ku rutonde rw’abakinnyi ba filime 15 bakurura igitsinagore kurusha abandi.

4. Dania Gurira

Uyu mugore nawe yamenyekanye kubera filime ya ‘Black Panther’ aho yagaragarijemo ubuhanga bwo kurwanisha amacumu. Dania Jekasai Gurira, ni umukinnyi wa filime wanakunzwe cyane muri filime y’uruhererekane ya ‘The Walking Dead’. Akomoka mu gihugu cya Zimbabwe akaba yaragiye muri Leta Zunze Ubumwe za  Amerika afite imyaka 16 y’amavuko ari nabwo yatangiye kwiga ibijyanye no gukina filime.

Guria wamamaye muri filime zirimo ‘Black Panther’ nawe azita izina abana b’ingagi

Dania Gurira w’imyaka 45 y’amavuko amaze gukina filime zigera kuri 28 harimo niyatumye akundwa cyane ivuga ku buzima bwa Tupac Shakur yitwa ‘All Eyes On Me’ yakinnye mu 2017, aho yakinnye ari nyina w’uyu muraperi yitwa Afeni Shakur. 

5. Sabrina Elba

Umunyamidelikazi ukomoka muri Canada, Sabrina Dhowre Elba akaba n’umugore w’icyamamare Idris Elba, nawe ni umwe mubazita Izina mu Kinigi ku wa 01 Nzeri. Uyu mugore w’imyaka 33 y’amavuko asanzwe ari amabasaderi w’Umuryango w’Abibumbye  (UN) kuva mu 2020. 

Umugore wa Idris Elba, Sabrina, azitabira umuhango wo Kwita Izina ku nshuro ya 19

Sabrina Elba nawe kandi afite inkomoko ku mugabane wa Afurika  dore ko ababyeyi be bombi bavuka mu gihugu cya Somalia. Bakaba baragiye muri Canada nk’impunzi ari naho babyariye Sabrina. Yatangiye gukundana na Idris Elba mu 2017 barushinga mu 2019 aho bakoreye ibirori muri Morroco ndetse banarira ukwezi kwa buki muri Zanzibar. 

Amafoto ya Sabrina Elba yagiye acuruzwa mu binyamakuru by’imideli bikomeye birimo British Vogue, Elle Magazine, ndetse yamamariza inzu z’imideli zizwi zirimo nka Luis Vuitton, Gucci hamwe na Dior.

6. Anders Holch Povlsen

Umushoramari mu by’imideli, Anders Holch Povlsen, ukomoka mu gihugu cya Danemark ni umuyobozi w’ikigo gicuruza imyambaro cyitwa Besteller. Uyu mugabo kandi anafite imigabane myinshi mu kigo cy’Imideli cy’Abongereza cyitwa ASOS, akaba uwa kabiri mu bafite imigabane muri Zalando iduka ricuruza inkweto n’imyenda mu Budage.

Umuherwe akaba n’umushoramari mu by’imideli, Anders Holch Povlsen nawe azita izina abana b’ingagi

Anders Holch Povlsen ni umuherwe ufite ubutaka bunini mu gihugu cya Ecosse akaba anafite umutungo ubarirwa muri Miliyari 8.5 z’Amayero.

Aba ni bamwe mu byamamae muri Sinema no mu mideli bazitabira umuhango wo Kwita Izina abana b’ingagi ku nshuro ya 19.

 

Ku kijyanye no kureka umupira w’amaguru burundu, amakuru ahari aravuga ko Tuyisenge Jacque icyo yaretse ari ukuwukinira mu Rwanda. Kuri ubu abashinzwe kumushakira amakipe bari kuyashakira ahandi gusa mu gihe byakomeza kwanga ikipe ikabura nibwo yahita afata umwanzuro wo gusezera kuri ruhago.

Amezi abiri araburaho iminsi iminsi 7 umukinnyi w’umunyarwanda,Tuyisenge Jacque ari muri Leta zunze ubumwe za Amerika ,Texas aho yerekeje agiye mu biruhuko.

Nk’uko bigaragara ku rubuga rwe rwa Instagram yagiye amenyesha abamukurikira ibijyanye n’ibiruhuko bye aho yagiye ashyira amafoto hanze ari ahantu hatandukanye nkaho yarebye umukino wa gishuti wahuzaga Real Madrid na FC Barcelona wari wabereye muri Leta zunze ubumwe za Amerika ndetse akaba aheruka no gushyira ifoto hanze yahuye n’umuhanzi w’umunyarwanda Ngabo Medard uzwi nka Meddy.

Nubwo yagiye agiye mu biruhuko,kuri ubu amakuru yizewe InyaRwanda yamenye ni uko Tuyisenge Jacques yamaze kugura inzu muri Leta Zunze ubumwe za Amerika ndetse yewe bikaba bishoboka cyane ko atazagaruka mu Rwanda.

Tuyisenge Jacques ni umwe mu bakinnyi b’Abanyarwanda bagiye binjira mu makipe baguzwe amafaranga menshi haba ayo mu Rwanda ndetse n’ayo hanze.

Mu makipe yo hanze yakiniye harimo Gormahia yo muri Kenya,Petro de Luanda yo muri Angola naho ayo mu Rwanda harimo Kiyovu Sports,APR FC ndetse na AS Kigali yakiniraga mu mwaka ushize w’imikino.

Tuyisenge Jacque mu mwaka ushize w’imikino yakiniraga AS Kigali

Tuyisenge Jacque wakiniye APR FC aguzwe Miliyoni 45 z’Amanyarwanda

Tuyisenge Jacque wagiye muri Leta zunze ubumwe z’Amerika agiye mu kiruhuko akaza no kureba umukino wa FC Barcelona na Real Madrid

Dore urutonde rwa filime zakunzwe mu bihe byahise zikarebwa na benshi zikandika amateka n’ubu zikaba zikirebwa nk’uko byatangajwe na New Vision:

1.     Titanic

Filime ya 'Titanic' ni filime yakunzwe ku Isi yose bitewe n'inkuru yayo yagarutse ku rukundo rwa Jack na Rose.Iyi filime yayobowe na James Cameron mu 1997 Ugushyingo,igaragaza umunezero abantu bari bafite bagenda mu bwato bishimiye ndetse, yitsa ku rukundo rwa Jack na rose kugeza Jack apfuye n'abandi barenga 1500 bari mu bwato.

Ubwo Jack yabonaga ubuzima bwanze nta mahirwe yo kurokoka yabwiye Rose ati 'Nsezeranya ko uzarokoka,ugakomeza kurwana uko byagenda kose, nubwo waba udafite ibyiringiro gute,nsezeranya nonaha. Roza nawe ati 'Ndagusezeranya'

2.     My Left Foot (1989)

Iyi filime yashyizwe ahagaragara kuwa 24 Gashyantare 1989 igaruka ku nkuru y'umugabo wagize 'Paralysis' kumugara igice cy'umubiri ntigikore,akajya akoresha imirimo ye ikirenge cy'ibumoso cyane cyane ashushanya.Iyi filime yarakunzwe cyane kuko yashishikarizaga abantu kwiyakira kandi bagakora mu mbaraga zabo nkeya.

3.     Psycho (1960):

Iyi filime yakunzwe cyane bitewe n'inkuru yagarukaga ku munyamabanga wanyereje $400.000,igihe yari mu cyumba cya Hoteli yari acumbitsemo aza gufatwa ndetse ahita yirukanwa.

4.     Some like it Hot (1959)

Iyi filime yaririmo abagabo babiri b'abanyarwenya biyoberanyaga bakigira nk'abagore ubwo bahigwaga na polisi  bagerageza kuyicika.Yayobowe na Billy Wilder mu 1959.

5.     A Separation (2011)

A separation ni filime yakinwe muri 2011 ikinwa n’abanya Iran,umuryango wagaragaje urukundo nyakuri nyuma y’uko bahuye n'ikibazo cyo kurwaza umwana indwara yo gutakaza ubushobozi bw'ubwonko nti bukore neza (Alzheimer),bakimukira mu kindi gihugu kubwo kwita ku mwana.Iyi filime yagagaje urukundo nyakuri rw'umwana n'umubyeyi.

6.     Au Hasard Balthazar (1966)

Iyi filime yakinwe n'Abafaransa,igaragaza uburyo abantu bangaga indogobe bayitoteza,umugore wabaga wenyine wari wanzwe na rubanda akaza kuyitaho ikamubera inshuti bituma bose bamumenya baramukunda.

7.     The Third Man (1949)

Iyi filime yagaragayemo umugabo w'umunyamerika Holly Martins washimishijwe no kubona akazi bitewe n'inshuti ye Harry Lime ariko umunezero we ntiwarambye kuko yaje kumva inkuru mbi ko uwahoze ari inshuti ye yapfuye bitunguranye amera nk'uhungabanye.

8.     The Shawshank Redemption

Yanditswe na Darabont Frank aranayiyobora mu 1994.Iyi filime yavugaga ku bagabo babiri bafunzwe bazizwa icyaha batakoze,ariko muri gereza baza kuba inshuti cyane,bakomeza kwizera ko ukuri bafite n'urukundo ruzabafunguza.

9.     City Night

Iyi filime yanditswe n'icyamamare mu gusetsa Charlie Chaplin ikinwa muri Mutarama ,30,1931 .Uyu munyarwenya yagaragaye muri iyi filime akusanya amafaranga yose akorera kugira ngo abashe kugurira indabo umukunzi we.

10.   12 years a Slave

Iyi filime yayobowe na Steve McQueen kuya 31 Mutarama 2014,ikinamo abakinnyi barimo Lupita Nyongo umukinnyi w'umwirabura wakunzwe cyane.Iyi filime yarebwe na benshi bitewe n'inkuru yayo yavugaga ku bucakara n'amacakubiri yari ashingiye ku ruhu n'ibindi,maze umwana w'imyaka 12 akagirwa umucakara mu mirima,bakagaragaza uburyo yakuze nabi mu gahinda yifuza ubwigenge.