Category: Uncategorized

Kuri uyu wa Gatandatu tariki 2 Nzeri 2023, nibwo batangaje aba bakobwa bageze mu cyiciro kibanziriza icya nyuma 'Rwanda Global Top Model Top 20 Semi Finalist'. Ni nyuma y'amatora yo kuri Internet bamaze igihe bahatanyemo.

Ndekwe Paulette uhagarariye Embrace Africa itegura iri rushanwa yabwiye InyaRwanda ko 'aba bakobwa bazavamo batatu bazajya mu bikorwa Mpuzamahanga by'imideli bigamije kubateza imbere'.

Yavuze ko abatoranyijwe hashingiwe 'ku majwi buri umwe yagize binyuze mu itora ryo kuri Internet ndetse n'uburyo buri umwe agaragara (Physical Look)'.

Ndekwe Paulette avuga ko ku wa 23 Nzeri 2023, ari bwo hazaba umuhango wo guhitamo abakobwa batatu bazafashwa guserukira u Rwanda.

Ni ku nshuro ya kabiri iri rushanwa ribaye. Ndekwe Paulette avuga ko ashima Leta “idufasha mu gushyigikira impano z'urubyiruko” kuko bibafasha muri byinshi, aho guta umwanya mu biyobyabwenge n'ibindi byabangiriza ejo hazaza.

Aba bakobwa 20 bakomeje bavuye muri 44 bari biyandikishije. Ndetse bagiye bahatana mu matora yabereye ku rubuga Noneho Events.

Mu minsi ishize iri rushanwa ryaciye agahigo nyuma y’uko rigeze ku musozo, risohoka muri 'Magazine' yo muri Leta Zunze Ubumwe za Amerika.

Magazine, ubundi ni ikinyamakuru ariko kiba gisohoka bitari buri munsi, ahubwo mu bihe runaka kandi kibanda ku bintu bimwe muri ibyo harimo n'imideli.

Muri Gashyantare 2023 ni bwo hashyizwe akadomo ku nshuro ya mbere y’iri rushanwa ryari rimaze amezi agera kuri atatu ritangiye mu birori byabereye kuri Olympic Hotel Kimironko.

Ababashije kuryegukana barimo Kenson Munyana, Laura Sarah, Diane Ngabonziza, Amelia Mwiza, Rwemerakurinda Mac Alan na Nshogoza Jean.

Abakobwa 20 batsindiye gukomeza mu cyiciro kibanziriza icya nyuma 

Amazina y’abakobwa bazavamo batatu bazaserukira u Rwanda 

Abagize Akanama Nkemurampaka kifashishijwe mu guhitamo abakobwa 20 bakomeje

Ku munsi wa 6 w'igiterane, kuri uyu wa 02 Nzeri, abashyitsi batandukanye bitabiriye “2023 Africa Ignite Connection Conference” basuye urwibutso rwa Jenoside yakorewe Abatutsi rwa Kigali ruri ku Gisozi, bunamira inzirakarengane z’Abatutsi bishwe muri Jenoside yakorewe Abatutsi mu 1994.

Iki giterane cy’iminsi 7 cyatangiye tariki 28 Kanama 2023, kikaba gisozwa kuri ki cyumweru tariki 03 Nzeri 2023. Kitabiriwe n’abakozi b'Imana bavuye mu bihugu bitandukanye, bahawe ikaze na Dr Bishop Fidele Masengo uyobora iri torero n’umufasha we Pastor Solange Masengo. 

Abo bakozi b’Imana ni Bishop Dr Aloys Rutivi uyobora House of Transformation ryo muri Kenya, ariko rifite amashami hirya no hino ku isi, akaba yarazanye n'itsinda ry'abantu 40 barimo n'abaramyi baturutse mu gihugu cya Kenya. 

Pastor Daniel Mgogo wo mu gihugu cya Tanzania, Bishop John Kamanzi umwe mu ba Bishop babarizwa mu itorero rya Foursquare ishami rya Uganda, Apostle Constant Damba w’i Kinshasa, Pastor Christine Gatabazi wo mu Rwanda, ni bamwe mu bacyitabiriye.

Cyatumiwemo kandi Abaramyi b’amazina akomeye mu Rwanda nka James&Daniella, Pastor Ben&Chance, Josh Ishimwe, na Rose Muhando wo muri Tanzania. Giteguwe mu gihe, abanyafurika bashishikajwe no kwishakamo ibisubizo ku bibazo bitandukanye byugarije umugabane wa Africa.

Iki giterane cyateguwe mu cyumweru cya nyuma cyo gusoza amasengesho y'Iminsi 40 kitabiriwe n'abashyitsi batandukanye bava Leta Zunze Ubumwe za Amerika (USA), Russia, Kenya, Ugadanda, Tanzania, Zambia, Zimbabwe n’ahandi.

Iki giterane kigambiriye kwatsa Itabaza mu ngeri zose z'Ubuzima; Abayobozi, Abashumba, Business, Umuryango, Urubyiruko ndetse n'Ubuzima.

Bishop John Kamanzi, Umushumba wa Foursquare Uganda yibukije abashumba ko badakwiye kuba abizerwa mu itorero ngo bibagirwe kwita k'iterambere ry'umuryango.

Yifashishije 2 Abami 4:1-7, (Elisa akiza umupfakazi umwenda yari arimo), yibukije abashumba ndetse n'Abakristu muri rusange ko bidakwiye ko bakena, kuko kuva Imana irema umuntu yamuhaye inshingano zo gukora (Itangiriro 2:15).

Mu buhamya bwe yatanze urugero ko akorera Imana nk'umushumba uyoboye amatorero ya Foursquare Uganda ariko kandi akaba anakora ubucuruzi bityo n'abamukomokaho bakaba bishimira gukorera Imana kuko batabibona nkokubura ubwenge.

Yavuze ko inzira imwe yoroshye kuvugamo ubutumwa ari ukubwiriza ubutumwa bwiza udakennye kuko bikurinda kubugoreko kuko ino minsi abashumba benshi bagoretse ubutumwa Bwiza kubera kwishakira indamu bityo bakabesha abantu bagambiriye kubiba.

Bishop Dr. Fidele Masengo Uyobora amatorero ya Foursquare Gospel Church mu Rwanda nawe yibukije abashumba ko kugira umurimo bakora ubyara inyungu bitabuza umuntu gukora umurimo w'imana kuko burigihe Imana iha umugisha imirimo y'amaboko yacu. (Gutegeka kwa kabiri 28:1-14).

Itorero rya Fourquare Gospel Church rimaze imyaka isaga 18 rikorera mu Rwanda, kugeza ubu rikaba rifite amatorero arenga 30 akorera hirya no hino mu Rwanda ndetse by'umwihariko FGR ikaba yaratangije City Light Church muri Kenya Kitengera mu rwego rwo kwagura ivugabutumwa.

Mbere y’uko bava mu Rwanda, abakozi b’Imana bo mu bihugu bitandukanye basuye urwibutso rwa Jenoside rwa Kigali

Bunamiye abazize Jenoside yakorewe Abatutsi mu 1994 baruhukiye mu rwibutso rwa Jenoside rwa Kigali

Abashyitsi bitabiriye igiterane cya Fousquare Gospel Church basobanuriwe amateka asharira u Rwanda rwanyuzemo

Bishop Dr Fidele Masengo Umushumba Mukuru wa Foursquare Gospel Church mu Rwanda

Ingagi zo mu birunga ziyongera ku rugero rwa 23% mu myaka 10 ishize. Mu bana b'ingagi bahawe amazina mu 2023, abangana na 57% ni ab'igitsina gore. Ese igitekerezo cyavuye he? Inyungu iri he?

Igitekerezo cyo kwita abana b'ingagi amazina cyavukiye mu cyahoze ari Office Rwandais du Tourisme et des Parcs Nationaux, ORTPN.

Intego yari iyo guha ingagi agaciro ikwiye, abana bayo bagahabwa amazina kandi bigakorwa mu muhango wiyubashye witabiriwe n'Abanyarwanda n'Abanyamahanga.

Kuva mu myaka 19 ishize, Kwita izina byarakomeje keretse muri Guma mu rugo yo mu mwaka wa 2020. Uyu mwaka wabaye impfabusa mu mateka y'abantu benshi!

Kuva aho zitangiye kwitwa amazina, zikarindirwa umutekano, ingagi zarororotse karahava.

Niyo mpamvu Urwego rw’Igihugu rw’Iterambere, RDB, ruri gushaka uko rwakwagura ubuso bwa Pariki y'Ibirunga kugira ngo ingagi zikomeze zisugire kandi zisagambe mu Rwanda.

Bisa n'aho Abanyarwanda batari bazi akamaro k'ingagi kugeza ubwo mu mwaka wa 1970, Umunyamerikakazi witwaga Dr. Dian Fossey aziye mu Rwanda akabakangura!

Yari umuhanga mu binyabuzima wigaga imico n'imibereho y'ingagi zo mu Birunga. Kubera ko yabanaga nazo, Fossey ashobora kuba ari we muntu wa mbere wise izina ingagi.

Muri uko kuzitaho ntiyabuze kuhahurira n'ibizazane kuko yagombaga kuzivura kandi akazirinda ba rushimusi. Aba rero nibo bari babi kuri we no ku ngagi kubera ko nyuma baje no kumuhitana ku italiki 26 Ukuboza 1985.

Inyandiko yasize asohoye zatumye yamamara cyane ndetse n'abandi bahanga bamenya byinshi ku ngagi zo mu birunga by'u Rwanda. Haje no gushingwa ikigega cyo kuzitaho cyamwitiriwe kitwa Dian Fossey Gorilla Fund International. 

Ikindi ni uko hari ikigo gikora ubushakashatsi ku ngagi kiba mu birunga kitwa Karisoke Research Center. Abakozi bacyo bafite n'inshingano zo kurinda ba rushimusi ngo badasagarira ingagi.

Mu magambo avunaguye, kwita abana b'ingagi amazina ni ukubaha ikibaranga kizatuma buri mwana mu muryango yitabwaho kuzageza akuze akagirira igihugu akamaro. 

Abo bana biswe amazina iyo bakuze bahinduka isoko y'amadovize igihugu gikura muri ba mukerarugendo baza gusura ingagi z'u Rwanda.

Abanyarwanda basanzwe bita abana babo amazina mu muhango buri rugo rwavukishije umwana rukora witwa 'Kwita umwana'. Abawitabiriye cyane cyane abana barya icyo bita ubunnyano.

Si abana gusa Abanyarwanda bita amazina ahubwo n'inka z'Abanyarwanda zagiraga amazina…ndetse n'imbwa ni uko!

Impamvu ni uko yaba inka, yaba imbwa, aya matungo yombi yari afitiye aborozi akamaro kanini, inka igakamwa, igatanga ifumbire, igatanga uruhu, ikaba inkwano… naho imbwa ikaba umurinzi w'umutungo wa Shebuja kandi ikaba indahemuka muri byose.

Amasuka y'abahinzi b'Abanyarwanda bo mu Rwanda rwo hambere nayo yagiraga amazina harimo ayitwaga amaberuka. Ikitwaga izina rero ni icyabaga ari ingirakamaro mu mibereho ya mwene Kanyarwanda kugira ngo agitandukanye n'ikindi kitagize icyo kimubwiye.

Mu Rwanda rwa nyuma ya Jenoside yakorewe Abatutsi, cyane cyane mu myaka 20 ishize, Guverinoma y'u Rwanda yasanze haramutse habayeho umuhango twakwita 'mpuzamahanga' wo kwita abana b'ingagi amazina, ntacyo byaba bitwaye.

Ni bwo hatekerejwe igikorwa ngarukamwaka cyo kwita abana b'ingagi amazina.

Ese kuki ingagi arizo ziri ku ibere mu Rwanda?

Pariki y'akagera ifite inyamanswa 5 nini buri wese uyisura aba yifuza kureba'big five'. Ni imbogo, Intare, Ingwe, Inzovu n'Inkura. Izi nyamanswa zose ntabwo zapfundura udushumi tw'inkweto z'Ingagi zo mu Birunga bitewe nuko ziri ku ibere kuko uhereye kuri Bill Gates kugeza ku bakinnyi b'umupira w'amaguru, aba sinema, abahanzi, abanyacyubahiro babashije kuzisura. 

Ubundi Ingagi zibamo amoko abiri. Hari izo mu gice cy'uburasirazuba' Eastern Gorrillas' n'izo mu gice cy'uburengerazuba' Western Gorrillas'. Izo mu Burengerazuba uzisanga mu Rwanda, Uganda na RDC. Nibura imibare yerekana ko arizo nyinshi zisigaye ku isi kuko hari izisaga 5000 muri kiriya gice cyo mu Burengerazuba. Ariko rero nazo zirimo ubwoko.

Hari ubwoko buba mu misozi miremire zikabasha kwihanganira ubukonje'Mountain Gorrillas' ari naho usanga izo muri Pariki y'Ibirunga. Hakaba izo muri Eastern Lowland Gorrila ziri muri RDC. Izi zitungwa n'imbuto n'imizi, amashami y'ibiti n'ibyatsi. Mu 1960 hari ingagi zisaga 17,000 muri biriya bice ariko zagiye ziyongera ku kigero cya 60%.

Ingagi zo mu bice bya Western Lowland Gorrilla zisaga 316,000 zose hamwe. Ziboneka mu bihugu nka Gabon, Central Republic, Cameroun na Congo Brazaville. Hari ubundi bwoko'species' bwitwa Cross River Gorrillas usanga muri Nigeria na Cameroun. Izi abashakashatsi bazivumbuye mu kinyejana cya 20 nibwo babashije kubona ko ari ingagi zibera ku nkombe y'imigezi.

Ingagi ziri mu binyabuzima bihigwa bukware kandi hadafashwe ingamba zacika ku isi burundu

Imiterere y'ingagi ihuye n'iy'umuntu ku kigero cya 98%. Ingagi zishobora kubana n'abantu nk'abavandimwe ntihagire ikibazo kivuka. Kandi koko uriya Dr Diana Fossey yabanaga nazo mu Birunga zimufata nka mugenzi wazo. Utunyangingo ndangasano tw'ingagi tujya kumera nk'utw'umuntu ku kigero cya 98%.

Ibintu ni Magirirane!

Uko abaturage basabwa kubungabunga ingagi ni nako nazo zibakamira.

Kuva iyi gahunda yatangira mu 2005, imishinga irenga 500 ijyanye n'ubuhinzi n'ubworozi, ibikorwaremezo, amashuri, amazi, amavuriro n'ibindi yatewe inkunga mu mirenge 12 ikikije Pariki y'Ibirunga. Iyi mishinga yose ikaba yaragize uruhare mu iterambere ry'abatuye mu Ntara y'Amajyaruguru n'Iburengerazuba.'

Ingagi zagize uruhare mu kuzamura Musanze

Umujyi wa Musanze kugeza uba usa n'uwamaze kugwa mu ntege Umurwa Mukuru Kigali, kubera iterambere rikomeye ugenda ugaragaza umunsi ku wundi.

Musanze iri mu mijyi itandatu yunganira uwa Kigali, imaze kugaragaza impinduka zidasanzwe bitewe n'iterambere rimaze kuhagera. Kuri ubu nta washidikanya kuvuga ko Musanze igwa Kigali mu ntege mu mijyi yihagazeho mu Rwagasabo. Musanze ibamo amahoteli 42 zirimo 5 zifite inyenyeri 5 n'andi macumbi 112.

Buri mwaka Urwego rw'Igihugu rushinzwe Iterambere, RDB, rugenera abaturiye Pariki zitandukanye z'igihugu 10% by'amafaranga yinjiye biturutse muri gahunda z'ubukerarugendo, bagahabwa ibikorwa bitandukanye bigira uruhare mu guhindura ubuzima bw'abahatuye.

RDB igaragaza amafaranga asaranganywa imirenge ituriye Pariki y'Igihugu y'Ibirunga, yagiye yiyongera kuko mu 2005 bahawe miliyoni 16 Frw ariko kuri ubu ageze kuri miliyari 1 na miliyoni 140 Frw mu 2023, ni ukuvuga ko yikubye inshuro zirenga 71.

Imishinga ikorwa mu guteza imbere abaturiye za pariki z'igihugu imaze gushorwamo miliyari 10 Frw mu bikorwa biteza imbere abazituriye. Mu 2017 icyo gice cyavuye kuri 5% kigera ku 10% by'inyungu yavuye mu bukerarugedo mu mwaka.

Urwego rw'Iterambere, RDB, rugaragaza amafaranga asaranganywa imirenge ituriye Pariki y'Igihugu y'Ibirunga, yagiye yiyongera kuko mu 2005, bahawe miliyoni 16 Frw ariko kuri ubu ageze kuri miliyari 1 na miliyoni 140 Frw, ni ukuvuga ko yikubye inshuro zirenga 71.

Ni amafaranga agenda yiyongera bitewe n'ubwiyongere bw'ibyinjizwa n'iyi pariki kuko urebye mu 2005, ku mwaka umwe hasurwaga na ba mukerarugendo batageze 2000, ariko kuri ubu usanga umwaka ushira hasuwe na ba mukerarugendo bagera mu bihumbi 40.

Imibare y'umwaka ushize wa 2022, igaragaza ko abasura Pariki y'Igihugu y'Ibirunga barengaga gato ibihumbi 34, harimo ibihumbi bitanu by'Abanyarwanda baba baje gusura ibikorwa bitandukanye biyirimo.

Pariki y'igihugu y'ibirunga ubu yari ifite kilometero kare 160, ikaba yari ntoya ugereranyije n'urusobe rw'ibinyabuzima ruyirimo. Iyi niyo mpamvu hafashwe icyemezo cyo kuyongeraho izindi kilometero kare zirenga 37.

Kwita izina mu 2024 hazaba umwihariko

Umuyobozi Mukuru wa RDB, Clare Akamanzi, yavuze ko mu 2024, mu muhango wo Kwita Izina ku nshuro ya 20, hazatumirwa abantu bose bagize uruhare mu Kwita Izina abana b'ingagi mu myaka 19 ishize mu kwishimira intambwe yatewe mu kubungabunga Ingagi zo mu Birunga muri iyo myaka.

Ati 'Umuhango wo Kwita Izina mu mwaka utaha ku nshuro ya 20, uzaba urimo ibikorwa bitandukanye bigamije kwishimira imyaka 20 tumaze tubungabunga ingagi zo mu misozi miremire. Tuzatumira abantu bose bise amazina mu myaka 19 yose bazaze kwifatanya natwe.'

Akamanzi yashimiye Madamu Jeannette Kagame na Perezida Kagame bise amazina abana b'ingagi b'impanga ku nshuro ya mbere ubwo uyu muhango watangiraga mu 2005.

Kugeza ubu abana b'ingagi bamaze guhabwa amazina ni 374, mu gihe ingagi zo muri Pariki y'Ibirunga ziyongereye ku mpuzandengo ya 23%. Mu bana b'ingagi bahawe amazina mu 2023, abangana na 57% ni ab'igitsina gore. Habarurwa ingagi zirenga 600 muri Pariki y'ibirunga. 

Impamvu zituma Ingagi ziri ku ibere nuko zinjiza agatubutse, zikamenyekanisha u Rwanda. Naho Intare ziba muri Tanzania aho ari ho habarirwa nyinshi ku isi ku buryo nta gihugu cyakandiraho.

Izindi nyamanswa ziri mu Rwanda zigiye ziri no mu bindi bihugu kandi bifite ubukerarugendo bukataje ku buryo kuba u Rwanda rwahisemo Ingagi ari umuvuno n’iturufu nziza kuko kamere muntu ikunda gusura ibintu bishya bitaboneka ahandi.

Kwita Abana b’ingagi amazina byamenyekanishije u Rwanda ku rwego rw’isi

Kwita Izina biri mu byatumye u Rwanda rumenyekana ku isi hose

Umwana w’imyaka 12 yise izina mu muhango wari urimo Nyakubahwa Madamu Jeannette Kagame

Nyakubahwa Madamu Jeannette Kagame yasabye abatuye isi kwita ku binyabuzima

Abana b’ingagi 23 biswe amazina mu muhango wari uryoheye ijisho

Ingagi zo mu misozi miremire y’ibirunga ziri muri nke zisigaye ku isi. Kuzibungabunga ni ingenzi kuko ziteye nk’abantu ku kigero cya 98%

Kwita Izina bitanga akazi ku bahanzi. Bwiza yashimishije abitabiriye atanga ibyishimo

Bwiza i Musanze yatanze ibyishimo ku bihumbi birenga 30 byitabiriye

Bwiza ari mu bahanzi bahabwa akazi mu Kwita Izina

Abaturage b’i Musanze bahinduriwe ubuzima biciye mu mafaranga bagenerwa ava mu bikorwa by’ubukerarugendo

Buri mwaka haba ibirori byo Kwita Izina

Musanze yabaye igicumbi cy’ubukerarugendo

REBA IBIHE BYARANZE KWITA IZINA KU NSHURO YA 19

Mu ijoro ryo kuri uyu wa Gatanu tariki 1 Nzeri 2023, uyu musore yakoze igitaramo cye yise 'Amateka Live Concert' cyabereye muri Kigali Conference and Exhibition Village ahazwi nka Camp Kigali, gihuza amagana y'abakristu begeranye n'Imana.

Ni ubwa mbere yari akoze igitaramo cye bwite nyuma y'imyaka ibiri ishize ari mu muziki w'indirimbo ziha ikuzo. Yifatanyije na Alex Dusabe, Israel Mbonyi, True Promises Ministries, Bosco Nshuti na Christian Irimbere.

Yateguye iki gitaramo ari no mu myiteguro y'ubukwe bwe buzaba ku wa 4 Ugushyingo 2023.

Mu kiganiro yagiranye na InyaRwanda, Emmy Vox yavuze ko imyaka ibiri ishize ari mu rukundo rwitamuriye na Nathalie Justine, kandi igihe kirageze cyo kubana nk'umugabo n'umugore.

Ati 'Ndatekereza imyaka ibiri ishize. Naramukunze cyane kandi mbona ari cyo gihe cyo kubana nawe.'

Uyu mukobwa 'Nathalie Justine' kuri konti ye ya Instagram afiteho ifoto imuranga ari kumwe na Emmy Vox.

Aba bombi bagiye gukora ubukwe nyuma y'uko muri Mutarama 2023 bahanye isezerano ryo gusezerana imbere y'amategeko ya Repubulika y'u Rwanda.

'Amateka’ yitiriye igitaramo cye yakoze kuri uyu wa Gatanu ni imwe mu ndirimbo ze amaze gushyira hanze mu gihe cy’imyaka ibiri ishize ari mu muziki w’indirimbo ziha ikuzo Imana.

Yigeze kubwira InyaRwanda ko iyi ndirimbo ayifiteho urwibutso biri mu byatumye ayitirira igitaramo cye cya mbere, akanayitirira album ye ya mbere.

Uyu musore avuga ko iyi ndirimbo Imana yayimushyize ku mutima nyuma y’uburwayi bwamuheranye igihe kinini.

Yavuze ati “Ni indirimbo Imana yampaye ndi mu bihe bidasanzwe by’uburwayi mfata ibihe by’amasengesho. Imana irambwira ngo ‘Ni Imana ihindura amateka, abantu bagahindura amagambo.”

Emmy Vox avuga ko iyi ndirimbo ayifata nka nimero ya mbere mu bihangano bye, ashingiye ku bihe yanyuranyemo n’Imana n’uburyo yaje gushibukamo igihangano cyiza.

Uyu musore aherutse gusohora indirimbo 'Narabohowe' yakoranye na Adrien Misigaro, 'Umusaraba', 'Ntabe ari njye' n'izindi. Emmy Vox kandi agaragara asubiramo indirimbo z'abahanzi batandukanye.

Impano y'uyu musore yatangiye gutangarirwa ubwo yasubiragamo neza indirimbo y'umuhanzi Alpha Rwirangira, wahise atangaza ko yiteguye kumushyigikira mu muziki we.

Emmy Vox yatangaje ko agiye gukora ubukwe n'umukunzi we Nathalie Justine

Emmy yavuze ko imyaka ibiri yari ishize ari mu rukundo n'uyu mukobwa igejeje kurushinga 

Muri Mutarama 2023, Emmy Vox n'umukunzi we Nathalie basezeranye imbere y'amategeko

Kuri uyu wa Gatanu tariki 1 Nzeri 2023, Emmy Vox yakoze igitaramo cye cya mbere-Aha yaririmbanaga n’umubyeyi we

Nathalie Justine, umukunzi w’umuramyi Emmy Vox bagiye kurushinga

KANDA HANO UREBE AMASHUSHO Y’INDIRIMBO ‘AMATEKA’ YA EMMY VOX

Kanda hano urebe amafoto menshi yaranze igitaramo cya Emmy Vox

Kuri uyu wa Gatandatu taliki 2 Nzeri 2023 saa cyenda habaye imikino yo ku munsi wa 3 ya shampiyona y’icyiciro cya mbere mu Rwanda.

Ikipe ya APR FC yaherukaga gutsinda Police FC yari yarekeje mu karere ka Ngoma gukina n’ikipe ya Etoile de l’Est. Ni umukino wagaragayemo gukina neza ku basore ba APR FC, gusa abasore ba Etoile de l’Est bagakina bihambira dore ko bashakaga inota ryabo rya mbere bitewe n’uko imikino yose iheruka bayitsinzwe.

Akagozi ka Etoile de l’Est baje gucika ubwo Kwitonda Allain Bacca yinjiraga mu kibuga asimbuye kuko yaje gutsinda igitego kiza cy’umutwe. Umukino warangiye APR FC ariyo itahanye amanota 3.

Kuri sitade y’akarere ka Bugesera naho haberaga undi mukino aho ikipe ya Bugesera FC itari yakabonye inota na rimwe yari yakiriye Kiyovu Sports. 

Abasore ba Bugesera FC baje mu mukino babizi neza ko bagomba kubona intsinzi ku bubi ndetse no ku bwiza, byaje kubakundira mu gice cya mbere rutahizamu ukomoka muri Nigeria, Elijah Ani afungura amazamu.

No mu gice cya kabiri Bugesera FC yakomeje gukinana inyota y’igitego maze kuwa 60 Vincent Adams aterekamo icya 2. Bugesera FC yakomeje kivunderezamo, umukino uza kurangira itsinze ibitego 4-0, ibindi 2 byatsinzwe na Ndizeye Eric witsinze ndetse na Olivier Muzungu

Mu karere ka Musanze naho haberaga undi mukino aho Musanze FC yari yakiriye Sunrise. Musanze FC yagiye muri uyu mukino iyoboye urutonde rwa shampiyona, ni nayo yaje gufungura amazamu hakiri kare kuko ku munota wa gatatu gusa Mohamed Sulley yari yatsinze igitego cya 1.

Mu gice cya kabiri, Sunrise FC yaje kubona igitego cyo kwishyura, gusa umukino ugiye kurangira Musanze FC yabonye igitego cya kabiri cy’Intsinzi gitsinzwe na Anicet uzwi ku izina rya  Gasongo.

Mu yindi mikino yabaye, AS Kigali yatsinzwe na Gasogi United ibitego 2-1 naho Marine FC itsinda Etincelles FC igitego 1-0.

Abakinnyi ba AS Kigali babanje mu kibuga ku mukino batsinzwemo na Gasogi United 

AS Kigali yatsinzwe umukino wayo wa 2

Bugesera FC yanyagiye Kiyovu Sports ibitego 4-0

Abakinnyi 11 ba Gasogi United babanje mu kibuga 

Perezida wa Gasogi United, KNC areba umukino 

Sitade yari yambaye ubusa kuri uyu mukino 

Inyandiko yo kuri internet y'isomero ivuga ko amagambo 'icyo Imana yateranyirije hamwe' adashatse kuvuga ko Imana ari yo ihuza umugabo n'umugore. Ahubwo ayo magambo yo muri Bibiliya yumvikanisha ko Umuremyi ari we watangije ishyingiranwa, bityo ishyingiranwa akaba ari ikintu kigomba gufatanwa uburemere.

Imana yifuza ko abashakanye babaho bishimye (Imigani 5:18). Yashyize muri Bibiliya amahame n'inama byafasha abashakanye kugira umuryango mwiza.

Twifashishe aya magambo mu rwego rwo kugaruka birambuye ku rugendo rw'ubukwe bwa Ishimwe Dieudonne uzwi nka Prince Kid ndetse na Iradukunda Elsa wabaye Nyampinga w'u Rwanda 2018.

Aba bombi basezeranye imbere y'amategeko ku wa 2 Werurwe 2023 mu muhango wabereye mu Murenge wa Rusororo mu karere ka Gasabo muri Kigali.

Ni mu gihe ku wa 31 Kanama 2023, Prince Kid yasabye anakwa umukunzi we mu birori binogeye ijisho byabereye kuri Jalia Garden i Kabuga.

Naho ku wa 1 Nzeri 2023, bombi basezeranye imbere y'Imana mu busitani bwo mu Intare Conference Arena, wayobowe na Rev. Alain Numa.

Ni ubukwe bwari butegerejwe na benshi, ahanini biturutse ku kuntu Miss Iradukunda Elsa yarwaniye ishyaka Prince Kid afunze kugeza n'ubu.

InyaRwanda igiye kugaruka ku bintu 10 byaranze ubukwe bw'aba bombi- Abakunzi b'igihe kirekire bahujwe n'irushanwa rya Miss Rwanda.

1.Umutekano wari wakajijwe; gufata amafoto na Video bitemewe

Mu byumweru bitatu bishize ni bwo 'invitation' z'ubukwe bwa Prince Kid na Miss Iradukunda Elsa zatangiye gutangwa! Habaga hariho amazina yawe. Bivuze ko bitoroheye buri wese kwinjira adafite ubutumire.

Iyo winjiraga ahabereye ubukwe ntiwabazwaga niba waratumiwe. Ariko kandi nta bukwe bubura 'abavumba'.

Itangazamakuru ntiryari ryemerewe gufata amashusho n'amafoto, ariko ikipe ngari yafashe ibi byose yahitagamo amafoto y'ingenzi bakayasangiza itangazamakuru.

Ni amafoto yasamirwaga hejuru cyane n'abakoresha imbuga nkoranyambaga n'abandi bashaka gukora inkuru batanguranwa. Yafashwe mu buryo bwihariye, kuko nta foto yigeze isohoka itaganiriweho.

Yaba mu gusaba no gukwa, gusezerana imbere y'Imana no kwakira abatumiwe, ntibyari byemewe gufata amafoto na Video ukoresheje telefoni yawe.

Hari abasore bagendaga banyura mu bantu babuza buri wese gufata amashusho n'amafoto, ndetse hari bamwe mu banyamakuru bagiye basabwa gusiba ibyo bafashe.

N'ubwo byari bimeze gutya, hari ababaciye mu rihumye bafata amashusho n'amafoto, ari nabyo benshi bahererekanyije.

2.Amasura y'abitabiriye ubukwe yiganjemo abo bakoranye muri Miss Rwanda

Ubu bukwe bwitabiriwe n'abantu amagana biganjemo cyane abagiye bakorana na Prince Kid na Miss Elsa mu bihe bitandukanye by'irushanwa rya Miss Rwanda.

Abageni bafotowe n'abasore babiri [Emma na Sabin] bazwi cyane mu gufata amafoto cyane ko mu bihe binyuranye bagendanye n'irushanwa rya Miss Rwanda bafataga amafoto abakobwa babaga bahatanira guserukira Intara kugeza ku mukobwa wegukanye ikamba.

Bwitabiriwe n'abarimo kandi abanyamakuru bakoranye igihe kinini n'irushanwa rya Miss Rwanda baritangazaho amakuru anyuranye, yaba inkuru zisesenguye, kuvuga ibyabaye n'ibindi.

Bwanitabiriwe kandi na bamwe mu bantu bagiye bagira uruhare mu guhitamo abakobwa bakomeje mu kindi cyiciro nka Ingabire Egidie Bibio, Pamela Mudakikwa, James Munyaneza wa The New Times, Mariya Yohanna n'abandi.

Abakobwa barimo Teta Ndenga Nicole, Miss Umuratwa Kate Anitha wabaye Miss Supranational Rwanda 2021, Umutesi Denise wabaye igisonga cya Kabiri cya Miss Rwanda 2020, Uwase Hirwa Honorine [Miss Igisabo] wabaye Miss Popularity muri Miss Rwanda 2017;

Ikirezi Brune wahatanye muri Miss Rwanda 2020, Iradukunda Liliane wabaye Miss Rwanda 2018, Uwase Muyango Claudine wabaye 'Miss Popularity' muri Miss Rwanda n'abandi banyuranye, bitabiriye ubu bukwe. 

3.Ni ubukwe bwongeye guhuza ibyamamare mu ngeri zinyuranye

Mu myaka irenga 12 Prince Kid yamaze ategura irushanwa rya Miss Rwanda ryamuhuje n'abantu banyuranye barimo ibyamamare by'amazina akomeye, abashoramari b'ingeri zinyuranye, abayobozi mu ngeri zinyuranye. Biri mu byatumye ubukwe bwe bwitabirwa na benshi bazwi cyane.

Ubukwe bwe bwitabiriwe n'Umuvugizi Wungirije wa RDF, Lt. Col Simon Kabera, Umuyobozi Ushinzwe Umuco muri Minisiteri y'Ubumwe bw'Abanyarwanda n'Ishingano Mboneragihugu, Aimable Twahirwa, Umuyobozi Ushinzwe ubudaheranwa muri Minisiteri y'Ubumwe bw'Abanyarwanda n'Inshingano mboneragihugu (Minubumwe), Uwacu Julienne;

Umuhanzi Platini P, umuraperi Riderman [Prince Kid yamubereye Parrain mu bukwe na Agasaro Nadia], umuhanzi The Ben [Byavuzwe ko yahageze], umuhanzi akaba n'umuganga Dr Tom Close, Muyoboke Alex wabaye umujyanama w'abahanzi bakomeye mu Rwanda;

Mushyoma Joseph utegura ibitaramo bya Iwacu Muzika Festival [Wabaye Parrain we], Mariya Yohanna, Massamba Intore, Gacinya Denis wayoboye Rayon Sports, umukinnyi wa filime uzwi nka 'Ndimbati', Umuyobozi wa Transparency international Rwanda, Ingabire Marie Immaculée n'abandi.

4.Ubukwe bwa Prince Kid na Miss Elsa bwasize Miss Iradukunda Liliane atangaje ubukwe bwe

Iradukunda Liliane wabaye Nyampinga w'u Rwanda 2018 yagaragaje ko yiteguye gukora ubukwe n'umukunzi we witwa Imfura Kenny, ni nyuma y'uko mugenzi we Iradukunda Elsa ajugunye mu kirere indabo akaba ariwe uzifata 'ibizwi nko gusigirwa igifunguzo.'

Iradukunda yari mu Magana y'abantu yatashye ubukwe bwa Ishimwe Dieudonne na Iradukunda Elsa bwabaye kuri uyu wa Gatanu tariki 1 Nzeri 2023 mu Intare Conference Arena.

Ubwo imihango y'ubukwe yaganaga ku musozo, Iradukunda Elsa yasezeye ku bakobwa b'inshuti ze babyirukanye maze yifashishije ururabo ahitamo ugomba kuzatera ikirenge mu cye.

Iradukunda Elsa yabashije gusimbuka asumba bagenzi be aba ariwe wakira ururabo, ariko bisa n'aho rwaciye mu ntoki Nimwiza Meghan wabaye Miss Rwanda 2019.

Muri aba bakobwa kandi bahanganiraga kuvamo umwe uzatera ikirenga mu cya Miss Elsa, harimo Martina Albera ukorera Ikigo cy'Igihugu cy'Itangazamakuru (RBA), abavandimwe ba Miss Elsa, inshuti ze n'abandi bamaze igihe baziranye.

Miss Iradukunda Liliane akimara kwakira ururabo yasanganiye umukunzi we witwa Imfura Kennya barahoberana by'akanya kanini, ndetse umusore yabaye nk'utera ubuse ameze nk'ushaka kwambika impeta umukunzi we yihebeye, ariko ntibyabaye.

5.Amarira ya Prince Kid yakoze ku mutima Massamba Intore

Umuhanzi wagwije ibigwi mu muziki w'u Rwanda, Massamba Intore ari mu batashye ubu bukwe, ndetse yaririmbye asohora umugeni 'Miss Elsa'.

Uyu muhanzi wakunzwe mu ndirimbo zinyuranye yinjiriye mu ndirimbo zubakiye ku bihozo agaruka ku mugeni ateguza umuryango agiyemo kumwakirana yombi.

Massamba yaririmbye yitegura gufata indege akajya kuririmba mu bukwe bwabereye mu Mujyi wa Dar es Salaam mu gihugu cya Tanzania.

Uyu muhanzi yageze muri ubu bukwe ibintu birahinduka, kugeza ubwo anaririmbiye ababyeyi ba Miss Iradukunda Elsa abashimira ko bareze neza.

Ubwo yaririmbaga Prince Kid yafashwe n'amarangamutima amarira azenga mu maso kwihangana biranga yitegereza umugeni we yakunze igihe kinini.

Massamba yavuze ko ibyo yabonye atigeze abibona ahandi, agira ati 'Nasohoye abageni benshi, naririmbye henshi ariko ni ubwa mbere mbonye umusore urira amarira agashoka neza.'

Nyuma yo gushyigikirza umugeni umusore, yakorewe mu ngata n'itorero ry'abakobwa bo mu muryango wa Elsa basurutsa abantu mu mbyino gakondo mu rwego rwo kugaragaza ko babumbatiye umuco nyarwanda.

6.'Parrain' na 'Marraine'- Urufatiro ku buzima bwa Prince Kid nyuma yo gupfusha ababyeyi be

Hari umuvandimwe wa Prince Kid utabashije kuboneka muri ubukwe ubarizwa muri Leta Zunze Ubumwe za Amerika. Yifashe amajwi akoresheje telefoni ye maze abari muri ubu bukwe barayumvishwa.

Mu ijambo rye, yagarutse ku rugendo rw'ubuzima bw'umuvandimwe we Prince Kid, avuga uburyo yagiye amushishikariza gukunda ishuri.

Anagaruka ku mukazana w'abo, amushimira ko yabakundiye umuhungu atizigamye, kandi akaba akunda umuryango w'abo- Yamwijeje ko azitabwaho.

Agana ku musozo w'ijambo rye, uyu musore yavuze ko atabona amagambo asobanura uburyo Mushyoma Joseph [Boubou] yabaye urufatiro rw'ubuzima bw'abo.

Yavuze ko ubwo Nyina yari akimara kwitaba Imana, 'Boubou' n'umugore we babitayeho nk'abana be. Ati 'Sinabona amagambo nakoresha nkushimira.'

Uyu musore yanashimye kandi Mukuru w'abo witwa Peter- Yavuze ko yabitangiye kugeza aho yemera gucikiriza 'amashuri kugirango atwiteho'.

'Boubou' niwe wabaye Parrain wa Prince Kid, ni mu gihe umugore we ari we wabaye 'Marraine' wa Iradukunda Elsa.

 

7.Imiryango yabaremeye

Sebukwe wa Prince Kid yamubwiye ko amuhaye umwanya we wose, kandi yiteguye kuzabaha inama igihe cyose bazamukenera. Ati 'Mbahaye umutima wanjye. Mbahaye n'inama zanjye.'

Yabifurije kubyara hungu na kobwa, ariko cyane cyane abakobwa 'kuko nanjye mfite abakobwa benshi. Ati 'Abakobwa ntibazabure.'

Uyu mubyeyi yabifurije guhorana amata ku ruhimbi n'urugo rugendwa. Avuga ko abagabiye inka y'imbyeyi n'iyayo. Hari undi muryango nawe wahaye inka urugo rwa Prince Kid na Miss Elsa.

Yanashimye buri wese wabashyigikiye mu bukwe, imiryango yombi, abanyamakuru n'abandi batumye ubukwe bw'abana babo bugenda neza.

8.Bemerewe gukorera 'Honey Moon' mu Burundi no mu Bugereki

Hon. Nsabimana Yves yavuze ko yiteguye kuzishyura ikiguzi cyose bizasaba kugira ngo Prince Kid na Miss Elsa bakorera ukwezi kwa buki mu gihugu cy'u Burundi.

Yababwiye ko igihe bazabonera umwanya, kandi baramaze kugura mu nzira ibibazitira, yiteguye kuzabafasha kugirira ibihe byiza muri kiriya gihugu.

Umuvandimwe wa Prince Kid uri muri Amerika, we yavuze ko bagerageje kumenya ahantu Miss Elsa akunda basanga ari mu Mujyi wa Anthene mu Bugereki.

Avuga ko afatanyije na bagenzi be biyemeza gufasha Prince Kid na Miss Elsa gutemberera muri uriya mujyi w'ubukerarugendo.

 

9.Yatunguye umukozi we wo mu rugo amuha impano ndetse na Me Nyambo

Prince Kid yatanze impano ku bantu benshi bagiye batungurana, bigaragaza ko uyu mugabo yamenye igisobanuro cyo kubana.

Umukozi we wo mu rugo yamuhaye impano bitungura benshi. Uyu mugabo yageze imbere ya Prince Kid arapfukama ararira, abura uko yifata.

Kugeza ubwo gufatana ifoto na 'boss' we byabaye ikibazo. Byageze aho abanza kuva aho yagombaga guhagarara ajya mu bantu yabuze uko yifata. Yagaragazaga ibyishimo byo kuba ashimiwe imyaka ishize yita ku buzima bwa Prince Kid.

Me. Nyembo, umunyamategeko umaze igihe kinini afasha Prince Kid kuburana urubanza rushingiye ku byaha byihohoterwa yashinjwaga ko yakoreye abakobwa bitabiriye Miss Rwanda, nawe yahawe impano yihariye.

Uyu mubyeyi ubwo yari ageze imbere atera intambwe, abantu bavugije akaruru k'ibyishimo bamushimira umuhate yashyize muri ubu rubanza.

10.Prince Kid yabaye 'Dj' mu bukwe, kandi avuga ijambo rikomeye

Prince Kid yamenyekanye cyane mu marushanwa y'ubwiza ya Miss Rwanda, ariko yabanje kuba umuhanzi mbere y'uko ategura iri rushanwa ryahagaritswe muri iki gihe.

Hari indirimbo yakoranye na Tom Close. Dj Ira niwe wacuranze mu bukwe bwe, yaba mu gusaba no gukwa kugeza mu gihe cyo gusezerana imbere y'Imana no kwakira abitabiriye ubukwe.

Mu gihe cy'iminota irenga 10', Prince Kid yagiye ku byuma Dj Ira yakoreshaga maze acuranga indirimbo zinyuranye ubwo umugeni we yinjiraga muri 'Salle' amusanganira.

Ni ibintu byashimishije abantu benshi, babona ko uyu mugabo yifitemo impano nyinshi zitari zizwi.

Mu bukwe hagati, Prince Kid kandi yafashe ijambo avuga ko mu myaka amaze ku Isi ubuzima 'bwanyigishije kwishimira buri segonda ry'ubuzima.'

Mu bandi yahaye impano harimo Eric washinze Ian Boutique, iduka ryambitse igihe kinini abakobwa bitabiriye Miss Rwanda, kompanyi ya Bisa Décor yagiye irimbisha ahantu hanyuranye haberaga irushanwa rya Miss Rwanda n'ahandi.

KANDA HANO UREBE UKO UBUKWE BWA PRINCE KID NA ELSA BWAGENZE

Nk’uko bisanzwe muri uwo muhango wo kwita izina habamo n’igice cy’imyidagaduro aho abahanzi batoranyijwe bagataramira abitabiriye uwo muhango. Kwita izina ku nshuro ya 19 nabwo RDB itegura uwo muhango yari yatoranyije abahanzi bazatatamira abitabiriye. 

Abo bahanzi bi Danny Vumbi, Senderi, Riderman, Bwiza, Ariel Wayz na Bull Dogg ndetse n’uvanga imiziki (DJ) kuri iyi nshuro bifashishije DJ Bisoso n’undi utazwi wakoraga igihe abahanzi bari ku rubyiniro. Muri icyo gitaramo habayemo udushya dutandukanye.

Ibintu bitanu byaranze icyo gitaramo

1. Gukoresha uvanga indirimbo ‘DJ’ utenguha abahanzi

Nk’uko bizwi ko akenshi iyo abahanzi bari gutaramira abantu hari ubafasha mu buryo bwo kubakinira indirimbo bagiye kuririmba, nabwo niko byagenze rwose yari ahari gusa uwari uhari icyagaragaraga yarabatengushye asa nk'uwakoraga ibyo batumvikanye bitewe nuko hari igihe yashyigaramo indirimbo umuhanzi agahita asa nkutunguwe cyangwa se yaba igitangira agahita ayikuramo. 

Byahumiye ku mirari ubwo Riderman yarimo kuririmba uyu mu DJ yashyizemo indirimbo ye “igitangaza” mu gihe Riderman atangiye kuririmba ndetse yewe ubona ko abantu bayishimiye aba ayivanyemo, arongera ashyiramo “Simbuka” Riderman ayifatanya n’abantu barayiririmba.

Hashize akanya gato yahise ayikuramo, bibabaza Riderman kugeza ubwo yongorera Karigomba usanzwe umufasha kuririmba ku rubyiniro 'back up singer'. Byerekanaga ko atabyishimiye. Ibyo ntibyabaye kuri Riderman gusa, byabaye no kuri Bull Dogg, Ariel Wayz na Bwiza, usibye ko Riderman ariwe byabayeho ndetse akenerekana amarangamutima ko atabyishimiye.

2. Kongera gutungurana kwa Danny vumbi

Nyuma yo kugirirwa icyizere agatoranywa mu bazataramira abitabiriye umuhango wo Kwita izina nawe ntabwo yabatengushye yagaragaje ko ari umuhanzi ukunzwe. Ari ku rubyiniro, Danny Vumbi yaririmbye indirimbo nyinshi zitandukanye ze harimo: Baragowe,Nidanje n’izindi…,gusa ageze kuri Ni Danjer ni bwo yongeye kugaragaza ko ari umuhanzi ufite izina.

Abitabiriye bamweretse ko bamukunda kandi ko n’iyo ndirimbo bayikunda cyane dore ko yacishagamo akareka kuririmba abantu bakayiririmba kandi ukabona ko bayizi, bituma Danny vumbi yongera no kugarurwa ku rubyiniro nyuma yuko avuyeho. Ni ukuvuga ko yagaruwe inshuro 2.

3. Riderman yongeye kwerekana bidasubirwaho ko ari umuhanzi ukunzwe n’ingeri zose

Nk’ibisanzwe ko Riderman aho ataramiye hakunda gusigara uruntu runtu niko byagenze yongeye kwerekana ko ari umuhanzi ukunzwe n’ingeri zose abasaza,abakecuru, urubyiruko n’abandi yewe harimo n’abanyacyubaho, ibyo byagaragaye ubwo yageraga ku rubyiniro agahera ku ndirimbo yafatanyije na Urban Boyz “Ntakibazo” aho abantu bagaragaje ko bayizi.

Yakomeje kuririmba, ariko ageze kuri “Abanyabirori” ni bwo yerekanye ko akunzwe cyane, dore ko aririmba iyo ndirimbo abari aho bose bamanitse amaboko, yatera ngo “Pipilili pipi” mu rusaku rwinshi, abari aho bakikiriza bati: “Ehee”. Iyo warebaga no mu banyacyubahiro wabonaga ko bizihiwe rwose, ibyo bikaba byarerekanye ko Riderman akunzwe cyane yewe ntiwanatinya no kuvuga ko ari we wishimiwe n’abantu kurusha abandi bahanzi bari bahari.

4. Imyambarire ya Bwiza

Usibye gutaramira abantu bakishima, Bwiza n’imyambarire ye yari itangaje. Usibye ko abantu bavugaga ko yambaye neza, Bwiza yaje mu rubyiniro yambaye imyenda iri mu ibara ry’icyatsi gisa nk’ikijimwe, iyo myenda yari ishati n’ipantaro, ariko ipantaro itangaje cyane.

Iyo pantaro yari igabanyijemo kabiri hejuru ari ikabutura hasi ari ipantaro, ni ukuvuga ngo kuva ku rukenyerero kugera ku matako yari ikabutura noneho hepfo gato hakaza ikindi gice ari cyo ipantaro kuko ntibyari bifatanye.

Iyo myambarire yatunguye abantu ariko ukumva bavuga ko bimubereye yambaye neza. Bwiza ku rubyiniro yarateraga, ibihumbi birenga 30 bikikiriza. Ibi byerekanye ko ibihangano bye bimaze kugera mu mpande zose z'igihugu mu ngeri zose uhereye ku bato n'abakuru.

5. Ariel Wayz kuririmba asa nkutishimye

Ariel Wayz ni umuhanzi ukunzwe n’indirimbo ze ubona ko zizwi cyane kuko ubwo yari ku rubyiniro yaririmbye “You should know”, “Away” na “Shayo”, ubona ko abantu bazizi ndetse bakanaziririmba. Ku ruhande rwa Ariel Wayz wabonaga atishimye nk’ibisanzwe kuko akunda kwizihirwa cyane. Ubwo uyu muhango wri urangiye, aho yabaga ari hose wabonaga ko atishimye kandi akari ku mutima gasesekara ku mubiri. 

Ikindi kandi abahanzi nka Senderi na Bull Dogg batanze ibyishimo bidacagase, berekana ko ari abanyabigwi. Nubwo bahawe umwanya muto ku rubyiniro, ariko Senderi asanzwe azi amayeri yo guhagurutsa abafana akoresheje indirimbo zirimo gahunda za Leta usanga buri wese azi ijambo ku rindi.

Bull Dogg yaratambutse abafana bamusaba amafoto. Yari yishimye cyane bigaragara ku maso