Category: Uncategorized

Mu myaka yabanje ibihangano bye byumvikanaga cyane kuri Radio Muhabura na ORINFOR yaje guhinduka icyo cy'Igihugu cy'Itangazamakuru (RBA).

Nyuma ya Jenoside yakorewe Abatutsi, amaraso mashya mu bahanzi yatangiye kwigaragaza akora ibihangano byinshi byatangiye kumvikana cyane kuri Radio zigenga zavukaga, bijyana n'uko izo Radio zatangiye gucuranga indirimbo za Kayirebwa.

Mu myaka ya za 2010, ibihangano by'abahanzi Nyarwanda byumvikanaga mu bitangazamakuru by'imbere mu gihugu byari ku kigero cya 20%, kuko umuziki w'abahanzi bo mu Karere k'Afurika y'Iburasirazuba (EAC) wari wariganje cyane mu Rwanda.

Bamwe mu baraperi banyuze mu itsinda rya Tuff Gangz mu ndirimbo zirenze imwe bakunze kugaragaza ukuntu bahibikaniye iterambere ry'umuziki w'u Rwanda, mu gihe batangiye imbere mu gihugu humvikana indirimbo z'abarimo Jose Chameleone, Saida Karoli n'abandi.

Amatsinda nka KGB, abahanzi nka Miss Jojo, Rafiki, Kitoko n'abandi nibwo batangiye urugendo rw'umuziki, imbere mu gihugu hatangira kuboneka umuziki w'abanyarwanda.

Umwunganizi mu mategeko wa Kayirebwa, yavugaga ko uyu muhanzikazi yatanze ikirego mu nkiko kubera igikombo yatewe n'ikoreshwa ry'ibihangano bye mu bitangazamakuru kandi nta burenganzira yabitangiye, bityo agatakaza isoko mu kwagura inganzo ye.

Rudastimburwa Albert washinze Contact FM iri muri Radio zajyanywe mu nkiko na Kayirebwa, yumvikanishaga ko Kayirebwa atakabaye arega ibitangazamakuru, kuko icyo bakoze ari ukumenyekanisha ibihangano bye.

Mu gitekerezo yigeze kunkuza muri Igihe, yavuze ati 'Itangazamakuru ryagize uruhare mu kuzamura umwuga we nta wari ufite umugambi wo kumusenya.'

'Ikibabaje ni uko kutumvikana mu itangazamakuru bizamubera igihombo gikabije, ahazaza h'umuziki no kubakunzi b'ibihangano bye. Jye ndumva atariko byakagombye kumera.'

Mu kiganiro n'itangazamakuru kuri uyu wa Kabiri tariki 21 Ugushyingo 2023, Kayirebwa yavuze ko yareze ibitangazamakuru byakoreshaga indirimbo ze mu buryo bunyuranyije n'amategeko kubera ko 'nashakaga ko hano mu gihugu haba sosiyete cyangwa 'association des droits d’auteur' ku buryo umuntu wese adashobora gukoresha ibihangano by'umuntu uko ashaka.'

Uyu muhanzikazi wamamaye mu ndirimbo zirimo 'Umunezero', yumvikanisha ko umuhanzi yirya akimara kugirango indirimbo ibashe gusohoka. Bityo ko nta muntu ukwiye gukinira ku mbaraga n'umuhate aba ashyizemo kugirango ibihangano bye bijye hanze.

Yavuze ko mu byo yamenye ari uko umuhanzi akora igihangano, hanyuma akacyandikisha muri 'asscoation' ari nabo bakurikirana inyungu zivamo kandi zikagera ku muhanzi n'ubwo zitaba ari nini nk'uko umuntu yaba abyiteze. Ati 'Kuko umuntu ntabwo aba yarabitoraguye ku muhanda (Ibihangano).'

Kayirebwa yavuze ko nyuma y'ikirego yatanze mu nkiko abona ikoreshwa ry'ibihangano ry'abahanzi nta burenganzira bufitiwe 'byaragabanutse'.

Kandi avuga ko muri iki gihe ibihangano bye wabibona unyuze muri Caritas, Ikirezi n'ahandi.

Yatanze urugero avuga ko kurengera ibihangano by'abahanzi bigifite icyuko, kuko hari igihe yigeze guhura n'umuntu mu muhanda amusaba kumugurira ibihangano yari afite asanga ni indirimbo ze.

Ati 'Ni ukuri kw'Imana, nagiye kubona mbona anzaniye 'Cassette' yanjye aranyereka ngo ngure, noneho ngira ntya ndamureba, aravuga ngo 'ayiwe' mbona arirukanse.'

Uyu muhanzikazi avuga ko muri iki gihe hamwe n'iterambere ry'ikoranabuhanga, havutse imbuga zirimo na Youtube zitanga amafaranga ku bahanzi n'ubwo atari menshi.

Akomeza ati 'Bibaho koko? […] Ikintu cyakuvuye mu mutwe no mu mutima no mu nda koko umuntu agapfa gutwara gusa warageretseho no kugihimba, ukajya muri studio, ugatanga amafaranga atagira ingano, icyakubwira ingendo umuntu aba yarakoze gusa, maze umuntu akaza akabitwara akabicuruza… ntabwo byemera rwose.'

Ubwo yari mu biganiro 'Meet the President' mu Intare Conference Arena, Perezida Kagame yasabye Ikigo cy'Igihugu cy'Iterambere (RDB), gufasha abahanzi gutungwa n'ibyo bakora. Icyo gihe yatangaga umurongo ku kibazo cyari kibajijwe n'umuhanzi Igor Mabano.

Perezida Kagame ati 'Muzamwegere! Muzabegere, mubafashe, kuko bariya ba 'Rwandan Society of Authors (RSAU) wavugaga ntabwo bazi gukora amafaranga […] Ni byo nyine irabahuza (urubuga) bose, ariko barashaka izindi mbaraga zivuye hanze y'ukuntu ibyo byabyazwa umusaruro w'amafaranga.'

Akomeza ati 'Naho barahura (guhura), bagakora umuziki mwiza, bagakora ibindi by'ubuhanzi byiza ariko kubihinduramo ikintu cyibyara amafaranga ntabwo babizobereyemo. Niyo mpamvu nshaka ko RDB yabafasha, mukabegera mukabikemura.'

Umwe mu bakoresha urubuga rwa Twitter witwa Justin usanzwe ari n'umuhanzi, tariki 3 Werurwe 2023, yashyize kuri konti ye ya Twitter ubutumwa buherekejwe n'amashusho, abaza RDB aho igeze ishyira mu bikorwa ibyo Perezida Kagame yasabye gukorera abahanzi.

Yagize ati 'Kuko u Rwanda rukwiye ibyiza! Perezida wacu bwite yadusabiye ko mudusanga kugeza na n’ubu turacyabategereje cyangwa mwaraje ntitwabimenya? Hari igihe azongera akadukorera 'surprise' akatugarukaho wenda muzatureba”.

Mu batanze ibitekerezo harimo n'Umuyobozi w'Urugaga rw'Abahanzi, Intore Tuyisenge, watangiye ubutumwa ashima Perezida Kagame ku bw' 'itegeko rirengera umutungo bwite mu by'ubwenge No50/2018 ryo ku wa 13 Kanama 2018'.

Yabwiye Perezida Kagame ko n'ubwo iri tegeko ryatowe 'ntiryubahirizwa'. Avuga ko ibi biri mu bigikoma mu nkokora abahanzi. Akomeza ati 'Gusa n'ubwo hari ibitagenda neza ariko hari n'ibyakozwe.'

Nyuma y'ibibazo binyuranye n'ibitekerezo, Ikigo cy'Igihugu Gishinzwe Iterambere (RDB), cyasubije ko 'Ku bufatanye n'inzego zitandukanye zirimo RDB, Minisiteri y'Urubyiruko n'Umuco, Ikigo cy’Igihugu gishinzwe imirimo imwe n’imwe ifitiye igihugu akamaro (RURA) n'abandi, hari ibikorwa byakozwe n'ibindi bikiri gukorwa kugira ngo abahanzi babone umusaruro uturuka ku bihangano byabo ndetse n'ibikorwa byabo bikomeze gutera imbere.'

RDB yavuze ko mu byakozwe harimo 'Ubukangurambaga n'amahugurwa byahawe abakoresha ibihangano barimo ba nyiri ibitangazamakuru n'abandi aho basobanuriwe icyo itegeko riteganya ku burenganzira bw'umuhanzi banibutswa kubahiriza itegeko rirengera umutungo bwite mu by'ubwenge.'

Mu butumwa bwo kuri Twitter, RDB yakomeje ivuga ko Urugaga rw'abahanzi (RSAU) rukomeje 'igikorwa cyo gukusanya amafaranga yishyurwa ku ikoreshwa ry'ibihangano ndetse guhera mu mwaka wa 2019 ikaba iyasaranganya abahanzi biyandikikishije muri icyo kigo.'

Kuko u Rwanda Rukwiye Ibyiza HE @PaulKagame Perezida wacu bwite yadusabiye ko mudusanga @RDBrwanda kugeza nanubu turacyabategereje?cg mwaraje nti twabimenya?harigihe azongera akadukorera #suprise akatugarukaho Wenda muzatureba🇷🇼🎸🎸👇👇🇷🇼 @cakamanzi @RMbabazi @SadateMunyakazi pic.twitter.com/EOgbCgRjIo

— 🚨JUSTIN W’I KINGOGO@NGORORERO🚨 (@JUSTIN_NSENGIMA) March 3, 2023

 

Kayirebwa yavuze ko yajyanye mu nkiko ibitangazamakuru agamije kurengera ibihangano bye n'iby'abandi

Kayirebwa yavuze ko kurengera ibihangano by'abahanzi Nyarwanda bitaragera ku kigero cyifuzwa 

KANDA HANO UREBE KAYIREBWA ASOBANURA IMPAMVU YIGEZE KUREGA IBITANGAZAMAKURU

“>

Kuri uyu wa Kabiri tariki 21 Ugushyingo 2023, wabaye umunsi w’amateka ku ikipe y’igihugu “Amavubi” ndetse n’abakunzi b’umupira w’amaguru mu Rwanda, nyuma yaho Amavubi atsinze ikipe y’igihugu ya Afurika y’Epfo ibitego 2-0.

Amavubi yahise afata umwanya wa mbere mu itsinda C mu gushaka itike y’igikombe cy’Isi kizabera muri Leta Zunze Ubumwe za Amerika, Mexico na Canada mu mwaka wa 2026.

Wari umukino w’imbaraga nyinshi, ubwitange bwinshi ku ruhande rw’Amavubi, mu gihe Afurika y’Epfo batakaga bavuga ko ikibuga kitababaniye.

Tugiye kureba hamwe amanota y’abakinnyi b’ikipe y’igihugu “Amavubi” bigendanye n’uko bitwaye kuri uyu mukino. Kwitwara neza cyane bihwanye n’amanota 10/10.

Niyonzima Olivier (9)

Niyonzima Olivier Saif ukina mu kibuga hagati mu ikipe ya Kiyovu Sports twavuga ko yabaye umukinnyi w’umukino kuri uyu mugoroba. Yaranzwe n’ubwitange, gufasha ba myugariro, gukina ikibuga cyose ndetse no gukuraho imipira ku buryo bwiza bigendanye n’uko ikibuga cyari kimeze.

Bizimana Djihad (8.5)

Kapiteni w’ikipe y’igihugu “Amavubi”, Bizimana Djihad yongeye kwiyereka abantu ko ari umukinnyi mwiza wo gutekerezwaho nka mbere. Byatangiye yitwara neza ku mukino wa Zimbabwe, ariko kuri uyu mugoroba yaje kubishimangira ubwo yagenzuraga umukino mu kibuga hagati.

Nshuti Innocent na Muhire Kevin (8)

Aba basore bagaragaje imbaraga nyinshi ndetse no gukora ibyari byaragoranye. Muhire Kevin yatangiye umukino agerageza kugeza imipira imbere, byatumaga ikipe ya Afurika y’Epfo itazamuka uko yiboneye. 

Nshuti Innocent, gusatira izamu kujya muri ba myugariro babiri ba Afurika y’Epfo akabatesha umutwe, ndetse n’igitego yatsinze cya mbere, byari ibikorwa bihambaye ugereranyije n’uko yari yakinnye kuri Zimbabwe.

Ntwari Fiacre Mutsinzi Ange na Manzi Thierry (7.5)

Ntwari Fiacre yagaragaje ubukure buhambaye ndetse no guturisha umukino aho byari ngombwa, birangira atinjijwe igitego. Manzi Thierry na Mutsinzi Ange bongeye kwerekana ko imikoranire yabo ntawuyishidikanyaho ndetse wasangaga mu gihe umwe yigiye imbere, mugenzi we ahita aziba icyuho.

Mugisha Gilbert (7)

Uyu musore wongeye kwerekana umuvuduko no kutagira ubwoba asatira ba myugariro ba Afurika y’Epfo, byaje gutuma yinjira mu rubuga rw’amahina, ndetse ahita atsinda igitego cya kabiri, cyashimangiye amanota 3 y’u Rwanda.

Byiringiro Lague na Imanishimwe Emmanuel (6.5)

Byiringiro Lague ntabwo yagiye kure y’uko yakinnye ku mukino wa Zimbabwe, ndetse n’iminota yabonye irangana n’iyo yakinnye kuri Zimbabwe. Yageragezaga kwinjira ariko umuvuduko ukanga, gusa yaje gutanga umupira wavuyemo igitego cya mbere.

Emmanuel Imanishimwe yakinnye neza ugereranyije n’uko yari ameze kuri Zimbabwe, ni umukinnyi wagaragaje gukanira ndetse akaba yafashe Percy Muzi Tau iminota yose, uyu mukinnyi akaba ari we wari ugoye u Rwanda cyane.

Omborenga Fitina (6)

Ntabwo yagaragaje ibikorwa bihambaye cyane mu kibuga, gusa nawe umwanya we yawuhagazemo neza.

Abasimbura

Hakim Sahabo (7)

Iminota igera kuri 30 yakinnye, yafashije u Rwanda kugumana umupira, gukanga Afurika y’Epfo ndetse no kuyishakaho amakosa.

Mugenzi Bienvenue na Niyomugabo Claude (6)

Patrick Sibomana (5)

Umukinnyi w’Amavubi ukinira Lille y’abato, Hakim Sahabo yavuze ko ari ibyishimo bikomeye kubasha gutsindira Afurika y’Epfo mu Rwanda imbere y’abanyarwanda.

Ejo hashize ku wa Kabiri tariki ya 21 Ugushyingo 2023 u Rwanda rwari rwakiriye Afurika y’Epfo mu mukino w’umunsi wa kabiri w’itsinda C mu gushaka itike y’igikombe cy’Isi cya 2026.

Umukino warangiye Amavubi abashije gutsinda ibitego 2 ku busa, byatsinzwe na Nshuti Innocent na Mugisha Gilbert.

Hakim Sahabo winjiye mu kibuga asimbura Muhire Kevin yavuze ko wari umukino mwiza kandi ko ari intsinzi y’abanyarwanda bose.

Ati “Wari umukino mwiza cyane, twakinnye nk’ikipe, ni intsinzi y’abanyarwanda bose.”

Yakomeje avuga ko iyi ntsinzi isobanuye byinshi kandi ko bifuza gukomerezaho.

Ati “Bisobanuye byinshi kubera ko dutsindiye mu rugo kandi tuzakomeza kugerageza gukomerezaho.”

Nyuma yo gutsinda Afurika y’Epfo u Rwanda ubu ruyoboye itsinda C n’amanota 4, Afurika y’Epfo 3, Nigeria, Zimbabwe na Benin zifite 2 n’aho Lesotho ikagira 1.

Indirimbo gakondo ziri mu bigize umuco nyarwanda, kuko ariwo mwihariko w'abanyarwanda. Nubwo usanga hari abamaze gutwarwa umutima n'umuco w'ahandi ntibibuke guteza imbere uw'iwabo, hari n'abandi bacyifashisha indirimbo za kera zagenewe imisango y'ubukwe bwa Kinyarwanda.

Akenshi, izi ndirimbo usanga zifashishwa mu muhango wo gusaba no gukwa, mu bijyanye no gusohora umugeni, gutanga ikamba ry'uburere bwiza ku bareze neza, gutwikurura n'ibindi.

Muri izo ndirimbo, harimo izahimbwe kera cyane ku buryo na bamwe mu bazihimbye bitabye Imana. Ariko ibihangano byabo byumvikana nk'aho ari bishya mu birori byumwihariko ubukwe nyarwanda.

InyaRwanda yagutoranyirije indirimbo 20 zikoreshwa cyane mu misango y’ubukwe nyarwanda yaba uyu munsi wa none no mu bihe byashize. Ni z’ibihe byose! Ni indirimbo ziganjemo iza Kagambage Alexandre n’iza Massamba Intore.

1.     Urabeho ya Minani Rwema

2.     Araje Araje ya Masamba Intore

3.  Mama Shenge ya Massamba Intore

“>

4.  Bemeye kurushinga y’Abatangampundu

5.     Zigama icyanzu ya Kagambage Alexandre

6.     Laurette ya Kamaliza

7.     Umutesi ya Kagambage Alexandre

8.  Ari hehe ya Massamba Intore

9.     Nk'umwamikazi ya Kagambage Alexandre

10. Ngabire wanjye ya Kagambage Alexandre

11. Umutoni wanjye ya Kagambage Alexandre

“>

12. Rubera ya Minani Rwema

13. Malayika Ange ya Minani Rwema

14. Umusore ukwizihiye ya Kagambage Alexandre

15. Igendere y'Abatangampundu

16. Ubumanzi ya Cecile Kayirebwa

17. “Mama wambyaye nzakwitura iki” ya Kabengera Gabriel

18. Kanjogera ya Massamba Intore

19. Marebe ya Cecile Kayirebwa

“>

20. Ubukwe Bwiza ya Niyomugabo Philemon

Kizaba ku Cyumweru tariki 26 Ugushyingo 2023 mu nyubako y'imyidagaduro ya BK Arena guhera saa kumi z'umugoroba.

Ni igitaramo gifite umwihariko, kuko kizaririmbamo abahanzi bazwi cyane mu muziki wa gakondo barimo Cécile Kayirebwa, Cyusa Ibrahim, Ruti Joel, Itorero Ibihame by'Imana, Muyango Jean Marie ndetse n'umukirigitananga Nzayisenga Sophia.

Mu kiganiro n'itangazamakuru kuri uyu wa Kabiri tariki 21 Ugushyingo 2023, Umuyobozi wa East African Promoters (EAP), Mushyoma Joseph, yagaragaje ko hari byinshi bashingiyeho mu guhitamo ko aba bahanzi ari bo bazaririmba muri iki gitaramo.

Yavuze ko byari akazi katoroshye mu guhitamo buri umwe, ariko bashingiye ku buhanga ndetse n'uburambe buri umwe afite mu muziki gakondo.

Asubiza ikibazo cy'umunyamakuru wa InyaRwanda, Mushyoma yagize ati 'Dufite abahanzi benshi bakora gakondo twarebaga abakuze, abakiri bato, tukareba n'umunsi wo ku gitegura kuko bizaba ari ku Cyumweru, tugerageza kureba uko twagitegura, kuba twarabahisemo ntakindi ni ubushobozi bw'abo, ni ubuhanga bw'abo, ni amateka y'abo atandukanye byatumye tubahitamo ariko dufite umuryango mugari w'abahanzi ba gakondo […]'

Uyu muyobozi yavuze ko aba bahanzi bakoranye muri uyu mwaka bashobora no kuzakorana umwaka utaha, cyangwa se bakongeramo abandi bitewe na gahunda bazaba bafite.

Umuyobozi Ushinzwe Imenyekanishabikorwa muri MTN, Kwizera Moses, agaragaza ko gutera inkunga ibi bitaramo byazamuye uburyo basanzwe bagera ku bakiriya, kandi ni urugendo bazakomeza kugendana n'ibi bitaramo mu gihe cy'imyaka itanu iri imbere.

Yanavuze ko ibi bitaramo byatanze ibyishimo ku bihumbi by'Abanyarwanda, kandi nabo bibafasha kwizihiza byihariye imyaka 25 ishize bakorera mu Rwanda.

Yavuze ati 'Umuziki ni imwe mu nkingi dufite muri gahunda z'imyaka itanu iri imbere, rero ni ibintu dukora dupangira igihe kirekire. Dushingiye kubyo twabonye navuga ko dufatanya na East African Promoters (EAP) twagize amahirwe kuko byahuriranye n'uko twarimo twizihiza imyaka 25 tumaze mu Rwanda.'

Akomeza ati 'Icyo nabonye ni uko abantu bari bafite inyota y'ibitaramo, ubwitabire, …abantu bari bizihiwe pe! Kandi natwe bidushishikariza gukomeza gutera inkunga ibikorwa nk'ibi bituma abantu bishima kuko biri muri gahunda zacu ziri imbere…'

Amashimwe ni yose ku bahanzi bazaririmba muri MTN Iwacu Muzika Festival

Umunyamuziki Muyango Jean Marie avuga ko yari amaze igihe kinini yifashisha Televiziyo akareba uburyo ibi bitaramo bigenda, rimwe na rimwe agatekereza ko bigenewe abahanzi bakiri urubyiruko, ku buryo muri we atigeze atekereza ko hari umunsi azatumirwa kubiririmbamo.

Ni ubwa mbere uyu muhanzi agiye kuririmba muri ibi bitaramo. Yavuze ko afite ishimwe kuri Mushyoma Joseph wamushyize ku rutonde rw'abazaririmba.

Muyango ati 'Iki gitaramo ndakizi kimaze imyaka ariko twakibonagamo urubyiruko tutibwira ko abantu bakuze natwe twagira ijambo none yanyongeye ijambo mumfashe kumushimira, ahasigaye tubataramira, tubazaba ibyo dusigaje.'

Uyu muhanzi yavuze ko yiteguye gukora iyo bwabaga agatanga ibyishimo muri iki gitaramo, yisunze cyane ibyo avoma mu nganzo n'ibindi yahanze nk'umunyamuziki.

Umucuranzi w'inanga w'umugore, Sophia Nzayisenga yumvikanisha ko ari amahirwe adasanzwe abonye yo gutamira muri BK Arena acuranga inanga.

Aravuga ibi mu gihe aherutse kuba uwa mbere mu iserukiramuco ryo mu Buholande, yahuriyemo n'abahanzi barenga ibihumbi bibiri bo mu bihugu bitandukanye byo ku Isi.

Kuri we, ibyishimo yahaye abazungu mu iserukiramuco kubiha abanyarwanda ni nk'umunyuzo. Yavuze ati 'Ndirimba indirimbo gakondo ngirango murabizi nkoresheje inanga yanjye ya Kinyarwanda gakondo […] Nishimiye rero kuboneka muri MTN Iwacu Muzika Festival kandi nk'uko nasusurukije abo mu Buholandi ari nako ntazabura gususurutsa Abanyarwanda birushijeho.'

Umuhanzikazi wagwije ibigwi mu muziki w'u Rwanda, Cecile Kayirebwa ni ubwa mbere agiye gutaramira mu nyubako y'imyidagaduro ya BK Arena.

Asobanura ko biteye 'ishema' 'n'ibyishimo bikomeye cyane' kuri we kuba agiye kongera gutaramira Abanyarwanda bahuje ururimi, umuco n'amateka.

Akavuga ko gutaramira mu mahanga bidafite uburyohe nko 'gutaramira iwanyu'. Ati 'Icyo gihe cyose tugafata umwanya wo kubanza kuvuga u Rwanda, ubwiza bwarwo n'umuco warwo. Ibyo rero ni ishema, turabikora, tubikorana umurava rwose cyane… Nta kiruta kugaruka iwanyu ukongera ukahataramira, ugataramana n'abaho, ugataramana n'abumva neza ibyo uvuga.'

Umuhanzi Ruti Joel uzaririmba muri iki gitaramo, yumvikanishije ko ari amahirwe adasanzwe mu buzima bwe agize yo kuzaririmba muri iki gitaramo azahuriramo n'abahanzi afatiraho ikitegererezo mu rugendo rwe rw'umuziki.

Ni ibintu ahuje na Cyusa Ibrahim uvuga ko umuziki we ufatiye kuri Cecile Kayirebwa na Muyango Jean Marie, kuko bamufasha cyane mu kwandika indirimbo.

Ati 'Muyango ni umubyeyi wanjye anyigisha indirimbo nyinshi, haba izo hambere, izo ndirimbo zo hambere zikantera imbaraga zituma mpimba izanjye ari nayo mpamvu nanjye nabyirutse nkora gakondo, iyi gakondo mpumbonana ni ukubera aba babyeyi…'

Muyango Jean Marie yumvikanishije ko zari inzozi kuzaririmba muri MTN Iwacu Muzika Festival

Mushyoma Joseph [Boubou] avuga ko bahisemo aba bahanzi bashingiye ku nganzo ya buri umwe n'uburambe afite

Nzayisenga Sophia yavuze ko yisunze inanga ye azasendereza ibyishimo ku bazitabira iki gitaramo

Umuyobozi Ushinzwe Imenyekanishabikorwa muri MTN, Kwizera yavuze ko ibi bitaramo byabaye umwanya mwiza wo kwizihiza imyaka 25 bamaze bakorera mu Rwanda no kwegera abakiriya

Ruti Joel agaragaza ko ari urwibutso rudasaza kuri we, kuba azahurira ku rubyiniro 'n'ababyeyi be mu muziki'

Umwe mu baririmba mu Itorero Ibihame by'Imana, yavuze ko biteguye kugaragaza ubukungu buri mu muco w'u Rwanda

Kayirebwa yavuze ko nta buryohe bwaruta gutaramira 'iwanyu' mu rurimi uhuje n'abavandimwe

Cyusa Ibrahim wamamaye mu ndirimbo zirimo 'Marebe' avuga ko umuziki we wa gakondo ufatiye ku rugendo rw'umuziki wa Kayirebwa na Muyango

Abahanzi bazaririmba muri MTN Iwacu Muzika Festival 'Gakondo' bagiranye ikiganiro n'itangazamakuru kuri uyu wa Kabiri tariki 21 Ugushyingo 2023

Kwinjira muri iki gitaramo ni 20,000 Frw mu myanya ya 'Premium', 15,000 Frw mu myanya ya 'Platinum' na 10,000 Frw mu myanya ya 'Gold' 

KANDA HANO UREBE ICYO BURI MUHANZI YATANGAJE MBERE Y’IGITARAMO

“>