Category: Uncategorized

Ni umwanya yahawe n’Inama y’Abaminisitiri yateranye kuri uyu wa Kane tariki 25 Mutarama 2024, yanashyize mu myanya abandi bayobozi batandukanye.

Uretse Uwacu Julienne wagizwe Umuyobozi Mukuru w’Itorero muri MINIBUMWE, Inama y’Abaminisitiri yanasabiye Emmanuel Bugingo kuba Ambasaderi w’u Rwanda muri Zambia.

Ni mu gihe James Ngango yagizwe Ambasaderi w’u Rwanda mu Busuwisi ndetse izi nshingano akazanazifatanya no guhagararira u Rwanda mu Muryango w’Abibumbye i Geneva.

Naho Bob Gakire wari usanzwe ari Umuyobozi ushinzwe imiyoborere no kwegereza ubuyobozi n’ubushobozi abaturage muri Minisiteri y’Ubutegetsi bw’Igihugu, we yagizwe Umunyamabanga Uhoraho muri iyi Minisiteri.

Bob Gakire yahawe izi nshingano asimbura Samuel Dusengiyumva uherutse gutorerwa kuba Umuyobozi w’Umujyi wa Kigali.

ABANDI BASHYIZWE MU MYANYA

UKWEZI.RW

Iyegura ry’uyu wari umuyobozi ryamenyekanye kuri uyu wa Kane tariki 25 Mutarama 2024, ubwo abari bagiye guhabwa isezerano ryo gushyingirwa bajyaga gusezerana bagasanga zahinduye imirishyo.

Bageze ku Biro by’Umurenge basanga Ubuyobozi bw’Akarere bwohereje undi ubasezeranya, bo batari bazi, bahita bamenyeshwa ko Nteziryayo Justin wari Umunyamabanga Nshingwabikorwa w’Umurenge wa Remera amaze iminsi micye yareguye.

Isezera ry’uyu Muyobozi, ryemejwe n’Umuyobozi w’Akarere ka Musanze, Nsengimana Claudien, wavuze ko uriya wa Gitifu yeguye ku ya 22 Mutarama 2024 ku mpamvu z’uburwayi kugira ngo ajye kwivuza.

Yagize ati 'Nk’umunyamabanga Nshingwabikorwa aba afite inshingano nyinshi, atabibangikanya no kwivuza, akaba yaranditse asezera. Yarabyemerewe ndetse twamaze gusaba ushinzwe imibereho myiza ko aba ari we ufata inshingano by’agateganyo mu gihe hagitegurwa ko hazaboneka undi.'

Ubu uyu Murenge wa Remera uri kuyoborwa by’agateganyo na Barihuta Assiel usanzwe ari Umuyobozi ushinzwe imiyoborere myiza y’abaturage muri uyu Murenge.

Gusa itegeko ntiriha ububasha uri mu nshingano by’agateganyo kuba yasezeranya, ari na yo mpamvu aba bageni basezeranyijwe n’uwoherejwe n’Akarere.

Umuyobozi w’Akarere yizeje abaturage b’uyu Murenge wa Remera ko isezera ry’Umuyobozi wabo ritazatuma babura serivisi bemererwa n’itegeko, ahubwo ko hazakorwa uburyo bwose bakazibona.

UKWEZI.RW

Uruzinduko rwa Perezida wa Mozambique Filipe Nyusi mu Rwanda, rwatangajwe n’Ibiro by’Umukuru w’Igihugu mu butumwa bwatambutse kuri X [Twitter].

Ubutumwa bwa Perezidansi y’u Rwanda bugira buti 'Ku mugoro washize muri Kigali, Perezida Kagame yakiriye Perezida Filipe Nyusi wa Mozambique bagirana ikiganiro cyibanze ku gukomeza kongerera ingufu imikoranire itanga umusaruro mu nzego zitandukanye.'

Ni mu gihe kandi kuri uyu wa Kane tariki 25 Mutarama 2024, u Rwanda rwanasuwe na Perezida w’Inzibacyuho wa Guinée-Conakry, Lt Gen Mamady Doumbouya.

Gen Mamady Doumbouya wageze mu Rwanda ku mugoroba wo kuri uyu wa Kane, yakiriwe na Perezida Kagame ku Kibuga cy’Indege Mpuzamahanga cya Kigali.

UKWEZI.RW

Umutoza wungirije w’ikipe y’igihugu Amavubi, Jimmy Mulisa yagaragaje ko yababajwe cyane n’abantu bavuze ko yatse Nshuti Innocent amafaranga kugira ngo ahamagarwe mu ikipe y’igihugu Amavubi akanamukinisha.

Mu Gushyingo 2023 u Rwanda rwari rufite imikino yo gushaka itike y’igikombe cy’Isi cya 2026, yombi yabereye i Huye uwo rwanganyijemo na Zimbabwe 0-0 ndetse n’uwo rwatsinze Afurika y’Epfo 2-0.

Ku ikipe yari yahamagawe, hagiye havugwa byinshi hibazwa ukuntu umukinnyi nka Nshuti Innocent utabona umwanya wo gukina muri APR FC ahamagarwa ndetse akanakina, dore ko ari na we watsinze igitego cya mbere ku mukino wa Afurika y’Epfo.

Aha ni ho hagiye havugwa inkuru zitandukanye ko yahamagawe na Jimmy Mulisa ndetse hari n’amafaranga yamwatse.

Mu kiganiro n’itangazamakuru cyabaye ejo hashize, Jimmy Mulisa yavuze ko we Yves Rwasamanzi ari abajyanama b’umutoza mukuru, bamugira inama ariko akaba ari we wifatira umwanzuro nta bushobozi bwo kumuvuguruza bafite.

Ati “nakiriye ubutumwa bwinshi kuri twitter, numvise amaradiyo amwe n’amwe, ni byiza bigutera imbaraga kandi na none byose ni umupira ariko nk’uko umutoza yabivuze ni we mutoza mukuru, twe turi abajyanama, twe tumugira inama ibyaba byose ni umutoza mukuru, ibyo tumugiramo inama byose akuramo ibintu bike.”

“Yasobanuye iby’ikipe yahamagawe yikoreye ubushakashatsi bwe, akaza akatubaza Jimmy, Yves ni iki mutekereza kuri uyu mukinnyi? Ntabwo ari Jimmy, ntabwo ari Yves ni umutoza mukuru. “

Yakomeje avuga ko yababajwe cyane no kumva abantu bavuga ko yariye amafaranga ya Nshuti Innocent kugira ngo akine.

Ati “mwumvise ibya Nshuti, ntabwo byanshimishije kuko bimeze nk’aho muba mushaka kwangiza izina ry’umuntu, niba umuntu atangiye kuvuga ngo waka abakinnyi amafaranga, ni gute nakwaka umukinnyi amafaranga, njyewe?”

“Ngo Nshuti ni umwana wawe aguha amafaranga kugira ngo akine, Nshuti yakinaga ku bw’abatoza babiri babanje, si we mutoza wa mbere ukinishije Nshuti, yabisobanuye wenda Nshuti ni we wumva ibyo aba amusaba.”

Nshuti Innocent yakuriye mu ishuri ryigisha umupira rya APR FC muri 2016 aza kuzamurwa mu ikipe nkuru ari Jimmy Mulisa umuhaye umwanya kuko yari umutoza mukuru.

Jimmy Mulisa yakunze kugaragaza ko uyu rutahizamu ari umwe mu bakinnyi beza bahari ariko na none yaje kuvuga ko yamutengushye, amahirwe yabonye atayakoresheje neza.

Jimmy Mulisa yababajwe n’ibyavuzwe ko yariye amafaranga ya Nshuti Innocent

Guhamagarwa kwa Nshuti Innocent mu Mavubi ntibyavuzweho rumwe

Ossama Masut Khalid ubusanzwe niyo mazina ye ariko yamamaye nka Okkama mu ndirimbo zitandukanye zirimo “Toto’ ‘Lotto’ yakoranye na Kenny Sol, ‘Puculi’ ‘Iyallah’ “Tsaper ‘ n’izindi kugeza kuri ‘Wallah’ aherutse gushyira hanze.

Uyu musore urugendo rwe rwa muzika mu buryo bweruye rwatangiye mu 2020 ubwo yashyiraga hanze indirimbo “Loto” acyiga ku ishuri ryugisha umuziki rya Nyundo, inzuzi  ze ntizatinze kwera kuko yamenyekanye akiri ku ntebe y’ishuri.

Uyu muhanzi yahishuye aho yamenyaniye n’umugore we wamubyariye imfura.

Mu kiganiro Meet me tonight cya Gen Z Comedy Show, yabajijwe icyiza cyo kuba uwamubyariye atazwi, avuga ko ari byiza kuko bituma umuryango utinjirirwa cyane.

Mu mwaka ushize wa 2023 nibwo Okkama yibarutse imfura y’umukobwa, kuri ubu yahishuye ko mama w’umwana we bahuriye kuri murandasi 

Okkama yashimishije abitabiriye Gen Z Comedy Show 

Umwana wa Okkama afite amezi arindwi y’amavuko 

Rutahizamu w’ikipe y’igihugu Amavubi na Marines FC, Gitego Arthur yerekeje muri Kenya gusinyira ikipe ya AFC Leopards.

Uyu rutahizamu akaba yafashe rutemikerere mu ijoro ryakeye ryo ku wa Kane tariki ya 24 Mutarama 2024 yerekeza Nairobi aho iyi kipe ibarizwa.

Biteganyijwe ko kuri uyu wa Gatanu tariki ya 26 Mutarama 2024 ari bwo Gitego Arthur agomba gushyira umukono ku masezerano y’imyaka 2 akinira AFC Leopards.

Ni nyuma y’ibiganiro by’amakipe yombi byagenze neza maze Marines FC ikemera kumurekura ngo ajye kugerageza amahirwe ahandi.

Gitego Arthur w’imyaka 22 wavukiye mu Gatenga muri Kicukiro mu Mujyi wa Kigali, yakiniye ikipe y’igihugu y’abatarengeje imyaka 23 ndetse agira amahirwe yo gukinira n’ikipe nkuru.

Gitego Arthur yerekeje muri Kenya mu ikipe ya AFC Leopards

Minisitiri w’Urubyiruko ndetse n’iterambere ry’Ubuhanzi, Utumatwishima yabimenyesheje Inama y’Abaminisitiri yateranye kuri uyu wa Kane tariki 25 Mutarama 2024, iyobowe na Perezida Kagame muri Village Urugwiro.

Iri serukiramuco rizaba tariki 16 Gashyantare 2024 kugeza tariki 25 Gashyantare 2024. Rizaba mu gihe cy'iminsi icyenda, hibanzwe ku kwerekana ubuhanzi ndetse n'ibiganiro bizasensengura ku ruhare rw'ubuhanzi mu iterambere n'ubukungu.

Rizarangwa no kugaragaza ibikorwa by'ubuhanzi 60 mu byiciro 10 by'ubuhanzi. Rizabera kandi mu bice bitandukanye byo mu Mujyi wa Kigali nko muri KCEV ahazwi nka Camp Kigali, BK Arena, kwa Mayaka i Nyamirambo ndetse no kuri Canal Olympia ku i Rebero.

Iri serukiramuco riri gutegurwa na Rwanda Arts Initiative (RAI), Umujyi wa Kigali kubufatanye na Minisiteri y'Urubyiruko n'Iterambere ry'Ubuhanzi.

Rizatsa cyane ku ngeri z'ubuhanzi burimo nk’ikinamico, umuziki, Cinema, kumurika imideli, ubuhanzi bwisunga ikoranabuhanga, ubuvanganzo, imbyino gakondo, gushushanya n'ibindi bizabera mu mutima wa Kigali.

Byitezwe ko rizitabirwa kandi n'abakora mu bigo Mpuzamahanga nka Youtube, Spotify n'ibindi mu murongo wo kurebera hamwe uko ubuhanzi bwakomeza gushyigikirwa.

Kuva mu 2012, Rwanda Arts initiative biyemeje gushyira imbaraga mu kugaragaza uburyo ubuhanzi nyarwanda bwagera ku isoko mpuzamahanga.

Amaserukiramuco ni kimwe mu bikorwa bikomeye mu muziki bihuza abahanga mu muziki, abantu bagatarama bigatinda! Kenshi, usanga ashobora kumara mu gihe kirenze iminsi itatu, mu gihe igitaramo kiba umunsi umwe nabwo amasaha macye.

Ibikorwa by’iserukiramuco bigira uruhare rukomeye mu iterambere ry’ubukungu bw’igihugu, rigahuza abafite imico inyuranye kandi bigateza imbere abari mu Inganda Ndangamuco, utibagiwe n'iyaguka ryazo.

Minisitiri Utumatwishima yamenyesheje inama y’Abaminisitiri Iserukiramuco rya ‘Kigali Triennial’ rigiye kubera mu Rwanda ku nshuro ya mbere

Ibi byabaye mu kiganiro n'itangazamakuru cyabaye kuri uyu wa Kane kibereye i Remera ku biro bya FERWAFA ahazwi nko ku inzu y'isonga. Iki kiganiro, cyari kiyobowe n'umutoza w'ikipe y'igihugu “Amavubi”, Frank ndetse n'umutoza wungirije Jimmy Mulisa. 

Umutoza yatangiye abwira itangazamakuru intego z'ikiganiro, aho yavuze ko ashaka kugaruka ku byo itangazamakuru ryagarutseho ubwo bari gushaka itike y'igikombe cy'Isi. Ndetse avuga ko mu gusoza ari bwakire ibibazo ndetse n'inyunganizi.

Abanyamakuru bari bagerageje kwitabira dore ko bitari bisanzwe ko umutoza w’ikipe y’igihugu abatumaho atagiye guhamagara abakinnyi 

Umutoza w'ikipe y'igihugu, yakomeje yivuga ndetse yerekana ibyaranze umwuga we harimo aho yavukiye, amakipe yatoje, ndetse n'amakuru ajyanye n'umuryango we.

Ikibazo cya mbere uyu mutoza avuga ko yahuye nacyo, ni abanyamakuru bavugaga ko adafite uburambe bwo gutoza ikipe y'igihugu.

Umutoza w'ikipe y'igihugu yagisubije agira ati: 'Impamvu ni iyi, njye ntangira gutoza nagiye mu bihugu navuga ko byari bifite umwihariko. Nigiriye mu bihugu bigikeneye iterambere. Mu 1999, ishyirahamwe ry’umupira w’amaguru mu Budage ryansabye ibihugu najya gukoreramo, mvuga ko najya muri Nepal na Yemen”.  

Ikibazo cya kabiri cyari uburyo yahamagaye ikipe y'igihugu bwa mbere. Umutiza w'ikipe y'igihugu yagize ati: 'Muribuka ko naje iminsi yagiye. Nasabye abatoza banyungirije nibura ko buri mutoza ampa abakinnyi 3 kuri buri mwanya.'

Ku mpamvu atahamagaye Hakizimana Muhadjri

Yagize ati: 'Ni umukinnyi mwiza buri mutoza afite ibyo aba akeneye mu kibuga. Muhadjri azi gucenga, ni umukinnyi ushobora kubona ari iburyo, ukamubona ibumoso mu kibuga hagati, ndetse n'inyuma. 

Aba bakinnyi rero babaho ntabwo ari umukinnyi wabwira ngo akine aha bikunde kuko aba atabimenyereye, kandi kiriya gihe nashakaga umukinnyi uhita wumva ibintu mubwira. 

Abakinnyi nka ba Muhadjiri iyo ushatse kumukoresha bisaba ko umwubakiraho ikipe cyangwa se ushaka abakinnyi bamukikije kandi icyo gihe twari dufite igihe gito, gusa kuri ubu ndamuzi, nzi ibyiza bye ubutaha tuzicarana turebe.'

Ikibazo cya gatatu, cyari ku byavuzwe nyuma y'umukino wa mbere

Umutoza yagize ati: 'Umukino wa mbere njye waranshimishije. Ni umukino naboneyemo abakinnyi banjye uko bakina umukino w’irushanwa, kandi byamfashije kwitwara neza kuri Afurika y’Epfo.

Nasanze abakinnyi bakina umupira umwe, ibiri, uwa gatatu bakawohereza imbere kandi ibyo ntabwo byatuma utsinda. Ubu ngeze ku rwego rwo gutunga ikipe ikina neza kandi byarakunze mu gice cya mbere kuri Afurika y’Epfo.' 

Ikibazo cya kane cyari ibyavuzwe ku bakinnyi bivugwa ko bahamagawe n'abatoza bungirije

Jimmy Mulisa niwe wafashe ijambo ati: “Kuri iyi ngingo, nakiriye ubutumwa bwinshi ndetse ubundi mbwumva kuri Radio. Ibyabaye byose twari abungiriza b’umutoza niwe wari ufite ijambo rya nyuma. 

Mwavuze kuri Nshuti Innocent ntabwo byanshimishije kuko byarambabaje harimo no kwica izina ryanjye. Ubu nafata amafaranga kugira ngo Nshuti Innocent akine? Nshuti Innocent yakoranye n’abatoza barenze umwe mbere, ni umukinnyi mukuru uzi gukora.'

Umutoza wungirije Jimmy Mulisa, yanyuzagamo akunganira umutoza mukuru dore ko nawe yari afite bimwe mu bibazo bimureba 

Frank umutoza mukuru nawe yavuze ko 'umwe mu bakinnyi beza nabonye mu myitozo ni Gitego Arthur. Yari umukinnyi wumva ugerageza kugira ibyo akora, kandi njye ibyo ni byo nashakaga. Namuhaye amahirwe kuko nabonaga hari ubutumwa yatanga. 

Nshuti Innocent murebye uko akoresha umubiri we murebye uko yatsinze igitego cya mbere, uko yakiriye umupira, mwabonye ko byari byiza. Afite igihagararo cyiza wenda icyo mpora mubwira ni ukugabanya ibiro.”

Ikibazo cya 5 cyagarukaga ku bakinnyi basezerewe mu mwiherero rugikubita

Umutoza yagisubije agira ati: 'Hari abakinnyi bavuye mu mwiherero kuko bari bakiri bato mu mutwe n’ubwo bari bafite impano. Hari abakinnyi wasangaga buri gihe bafite ibyo bataka, barenganya abandi. Iyo mba ndi umutoza w’ikipe itari iy’igihugu, nari kubihanganira kuko bari kugenda bahinduka ariko icyo gihe umwanya wari muto.

Iyo urebye nka Tatou ni umwana ukora ibintu ku mupira bitangaje mbese azi gukina. Narebye mu byangombwa bye mbona afite imyaka 17 ariko wamureba mu maso ukagira ngo afite abana 2. 

Ntabwo icyo ari ikibazo, ahubwo ikibazo cyabaye, najyaga mubwira ibyo akora ntabikurikize rero nahisemo we na mugenzi we kubasezerera kuko abakinnyi bakina hanze bari baje, kandi ntabwo nari gukoresha imyitozo abakinnyi 40.

Ngabo Roben umuvugizi wa Rayon Sports, agerageza kumvisha umutoza Frank ko ahantu hose ku Isi iyo ikipe y’igihugu yahamagawe, itangazamakuru riyigarukaho 

Umutoza Frank yakomeje avuga ko 'Iradukunda Elie Tatou mbere yo kumusezerera, nashatse kumuganiriza kugira ngo mubwire ibyo yahindura nk'uko nari nabikoze kuri mugenzi Mugunga, gusa naramubuze mutumaho umuntu aranga afata ibikapu aritahira. Umuntu iyo yakoze ikosa ashobora gusaba imbabazi, namwemereye ko nabishaka azaza akansaba imbabazi gusa na n’ubu ntabwo araza.'

Ikibazo cya 6 ni ukuntu itangazamakuru ritishimiye ijambo akunda kuvuga ryo kubaka ikipe

Yagize ati: “Njye nasanze hari abakinnyi batazi no gucenga ahubwo ugasanga nka rutahizamu azi gufunga umupira ubundi akagishota imbere akiruka ari wowe wari gukora iki ukibona abo bakinnyi? Ntabwo ndenganya abakinnyi ahubwo narenganya abatoza babatoje mbere.

Niba rutahizamu atazi guca kuri myugariro, myugariro akaba atazi kwiyambura rutahizamu, nari guhera he niba abakinnyi badafite n’ubumenyi bw’ibanze?

Ikibazo cyasoje kwari ukugaruka ku cyo yakora kugira ngo afashe u Rwanda kubona abakinnyi bakina hanze

Yagize ati: 'Turi gushaka abakinnyi bashobora kuza kudufasha. Gukina mu bakinnyi 11 hafi 1/2 bakina imbere mu gihugu, biragoye cyane. Tugomba kwicara na FERWAFA tukareba abakinnyi bari ku rwego rwo gukinira u Rwanda kandi tubirimo kubikoraho kuko ubu dufite abakinnyi basaga 45 kuri kuganira.' 

Umuntu wese wabaga afite ijambo byasabaga ko aba afite mu ntoki umupira wo gukina

Umutoza w’ikipe y’igihugu yemeje ko imikino ikurikira bazaba bameze neza kurushaho ndetse akaba yizera ko bazaba bafite abakinnyi bajyanye n’imikinire yifuriza Amavubi 

KANDA HANO UREBE AMAFOTO MENSHI 

AMAFOTO: Ngabo Serge