Category: Uncategorized

Abakora umwuga wo kumurika imideli b'abanyarwanda bakomeje gushimangira ubuhanga n'ubushobozi bwabo muri uyu mwuga haba mu Rwanda no ku rwego mpuzamahnga.

Mu minsi ishize, nibwo bamwe mu bakora uyu mwuga bacanye umucyo mu Cyumweru cyahariwe imideli i Paris kizwi nka 'Paris Fashion Week.' Muri abo harimo Munezero Christine, Mushikiwabo Denyse, Umutoni Ornella, Niyirera Esther ndetse na Umufite Anipha.

Iyi, ntabwo ari inshuro ya mbere aba banyamideli batanu bigaragaza kuri 'stage' mpuzamahanga zikomeye cyane ku Isi, kuko mu 2023 Munezero nabwo yitabiriye Paris Fashion Week ndetse na New York Fashion Show, naho Umutoni hamwe n'abandi bamaze kwandika izina mu kumurika imideli ku rwego mpuzamahanga bagirana imikoranire na Prada, Elie Saab, Erdem, The Row, Officine Générale, Namacheko, n’abandi.

1.     Munezero Christine

Umunyamideli Munezero Christine ni umwe mu bakobwa b’abahanga mu bijyanye no kumurika imideli. Ubuhanga bwe yabushimangiye ubwo yaserukiraga u Rwanda i Burayi mu 2021 agahesha igihugu ishema muri Paris Fashion Week, aho yaje ku mwanya wa mbere muri 92. Mu ntangiro za 2022, nabwo Munezero yahagarariye igihugu i Paris muri ‘The Haute Couture & Fall Winter Clothing.’

Mu 2023, uyu mukobwa yaserukanye umucyo mu birori bya Paris Fashion Week. Mu rugendo rwe amaze imyaka itanu, Christine amaze gukorana n’ibigo nka Maison Valentino, Maison Malgiela, Chroe, Dior, Versace, Maxmara, Gucci, Giambattiste Vali, akorana na Moshions n’abandi. Mu bindi birori yitabiriye harimo Milan Fashion Week, Ney York Fashion Week na London Fashion Week.

2.     Mushikiwabo Denyse

Mushikiwabo Denyse ni umwe mu bamurika  imideli b’abanyarwanda bagaragaye mu birori by’imideli bitandukanye byabereye ku mugabane w’u  Burayi. Umwaka ushize, yagaragaje ko ari mu bihe bye byiza ubwo yagaragaraga ku byapa i New York ari kwamamaza imyambaro ya Polo, igikorwa cyashimangiye ko amaze kugera ku rwego rwo hejuru.

Denyse yahesheje igihugu ishema mu birori bitandukanye by’imideli birimo New York Fashion Week, Milan Fashion Week aho yamurikaga imyambaro ya Diesel, Paris Fashion Week, London Fashion Week aho yakoranye n’ibigo nka Balmain, David Koma, Ulla Johnson n’ibindi

3.     Umutoni Ornella

Umunyarwandakazi Umutoni Ornella ari mu baserutse neza mu birori bya New York Fashion Week byabaye mu ntangiriro z’uyu mwaka aturutse muri Elite Model Mangement. Nyuma yaho gato, Ornella yitabiriye Paris Fashion Week.

4.     Niyirera Esther

Niyirera Esther, umwe mu banyarwandakazi bamaze kwandika izina mu bijyanye no kumurika imideli, amaze guserukira igihugu mu birori bitandukanye birimo Paris Fashion Week, n’ibindi.

5.     Umufite Anipha

Umufite Anipha wabaye igisonga cya Miss Supranational Rwanda 2019, afite amateka akomeye mu byo kumurika imideli ku rwego mpuzamahanga, aho amaze kwitabira ibirori birimo London Fashion Week, Milan Fashion Week, Paris Fashion Week n’ibindi.

6.     Umuhoza Linda

Umunyamideli Umuhoza Linda wiyeguriye umutima w’umuraperi Logan Joe, yamamaye cyane binyuze mu gukorana n’inzu zikomeye z’imideli birimo Moshions, Maison Munezero, Rwanda Clothing, Sonia Mugabo, Inzuki, Uzi Collection n’izindi.

Umwaka ushize, abifashijwemo na Issi Model Africa, Umuhoza yitabiriye ibirori bya Paris Fashion Week aho yerekanye imyambaro ya Alessandra Rich n’ibya Milan Fashion Week aho yamuritse imyambaro ya Blimarine n’ibindi.

7.     Isheja Morella

Isheja Morella umaze kuba umwamikazi wa Gucci na Dior, ni umwe mu bakomeje guhagararira neza igihugu mu mideli ku ruhando mpuzamahanga.

Mu 2022, Isheja wanyuze muri Miss Rwanda 2021 yitabiriye ibirori byo kumurika imideli bya ‘Dior Fall 2022’ byabereye muri Korea ku Mugabane wa Aziya, yitabira ibindi nka Paris Fashion Week n’ibindi.

8. Mushimiyimana Anitha

Mushimiyimana Anitha yaserukiye u Rwanda mu birori byo kumurika imideli bizwi nka ‘The Fashion Factor’ bibera i Dubai, anatsindira kuba ‘The Look of The Year’ mu marushanwa ya Rwanda Global Top Model Competition.’

9. Diane Ngabonziza

Diane Ngabonziza uri mu begukanye irushanwa rya Rwanda Global Top Model yahagarariye u Rwanda mu Buhinde mu marushanwa ya Supermodel Worldwide 2023. Aha, yitwaye neza kuko yabashije kwegukna igihembo cy’uwahize abandi mu bwiza. 

10.  Mwiza Amelia

Umwaka ushize, Mwiza Amelia hamwe na mugenzi we Munyana Peace Kenson bagiye guhagararira u Rwanda i Dubai mu birori byo kumurika imideli bya ‘Fashion Factor Dubai.’

Icyo gihe Amalia na Kenson baherekejwe na Diane Ngabonziza ndetse na Paulette Ndekwe utegura igikorwa cya Rwanda Globl Top Model.  

Umuhanzikazi w’indirimbo zo kuramya no guhimbaza Imana, Aline Gahongayire yafashwe n’ikiniga ubwo yavugaga uburyo mugenzi we Tonzi yabanye na we mu bihe bigoye kugeza n’uyu munsi.

Ni mu kiganiro abahanzikazi b’indirimbo zo kuramya no guhimbaza Imana bibumbuye muri ‘The Sisters’ ari bo Gaby Kamanzi, Phanny, Tonzi na Aline Gahongayire bagiranye n’ikinyamakuru ISIMBI cyagarukaga ku gitaramo Tonzi afite azaririmbiramo indirimbo zigize Album ye ya 9 aheruka gushyira hanze.

Aline Gahongayire ubwo yagarukaga kuri Tonzi, yavuze ko yamubereye nk’umuyobozi kuko yashatse ahumye ariko undi amubera inshuti aramufasha ku buryo atazigera abyibagirwa.

Ati “Kumenya Tonzi kwanjye ni imbaraga, sinzibagirwa ibihe nanyuzemo n’iyo twaba tumaze imyaka itatu tutavugana ariko urwibutso rw’ibyiza bya Tonzi byasigaye muri njye nzarinda nsaza bitarava mu mutwe wanjye.'

'Narongowe mpumye ntazi ibyo ndimo ariko Tonzi yambereye umuyobozi mwiza muri urwo rugendo, yambereye igitangaza, ndabyibuka nakoze ubukwe amaze iminsi itatu avuye muri Amerika araza anyambarira neza ahagararana nanjye , nkumva ari mushiki wanjye birenze kuba turirimbana.'

Uyu muhanzikazi wavuganaga ikiniga cyinshi, yavuze ko atazibagirwa ubwo yabyaraga umwana we agahita apfa ko yari kumwe na Tonzi, wamubaye hafi cyane ko umugabo we atari yabashije kuboneka.

Ati 'Ndabyibuka igihe naringiye kubyara ndi mu bitaro ngiye kubagwa, nari ku gitanda ntabwo nzabyibagirwa, warakoze cyane, ndabyara umwana arapfa, Tonzi ahagararana nanjye arambwira ngo humura mfite urwandiko rw’uru rugendo.'

'Sinzabyibagirwa yabanye nanjye, aramfubika ambera inshuti , arantambagiza muri uru rugendo narindi gucamo kugeza ubwo yambwiraga uko nambara , uko nitwara, ntacyabuze iwanjye anyakirira abashyitsi , ndabyibuka tujya gutaha yarwaniye fagiture arayishyura, ishusho nabonyeho umwana wanjye yari ampagaze inyuma amfashe mu bitugu. Byari gushoboka ko Imana ihashyira undi muntu ariko Tonzi ni we wari uhari ntacyatuma umutima wanjye utamwubaha.'

The Sisters ni bamwe mu bazaba bari mu gitaramo cya Tonzi kizaba tariki ya 31 Werurwe 2024 azamurikiramo Album ye ya 9 iriho indirimbo 15.

Gahongayire yafashwe n’ikiniga ubwo yavugaga kuri Tonzi

Sosiyete y'Itumanaho ya MTN Rwanda ubwo yatangazaga ibyagezweho mu mwaka ushize n'ingamba za 2024, yakomoje no ku bigiye gukorwa mu kurushaho guhangana n'ikibazo cy'amarezo acikagurika na interineti igenda nabi gikunze kugarukwaho n'abakiliya b'iyi sosiyete.

Umuyobozi ushinzwe tekinike muri MTN Rwanda, Eugene Gakwerere yasobanuye ko ahanini mu mwaka ushize bahuye n'imbogamizi y'izamuka ry'agaciro k'idolari ndetse n'intarambara ziri hirya no hino ku isi, ariko atanga icyizere ko muri uyu mwaka haricyo bakomeje kubikoraho

Yagize ati: 'Ubu nk'umwaka ushize twatanze miliyari 44 kugira ngo dushobore kwagura umuyoboro wacu wa 'network,' ariko kubera ibibazo bya politiki n'ihindagurika ry'agaciro k'idolari byabaye ngombwa ko ayo twateganije gushyiramo adakora ibyo twari twateganije. Icya kabiri, ni amafaranga dutanga kugira ngo dushobore gutuma iminara yacu ikomeza gukora, abanyarwanda babone serivisi. 

Idorali iyo rihindutse bigira ingaruka na none ku buryo dukodesha iminara mubona dukoresha ndetse na serivisi twishyura rimwe na rimwe ziba hanze kubera amasezerano tuba dufite ari mu madolari. Ariko nibyo turimo turakoraho, kugira ngo turebe ko ayo masezerano yose twayashyira mu ifaranga ryacu kugira ngo ye gukomeza kugira ingaruka muri serivisi dutanga.'

Yavuze ko mu bintu bitatu by'ibanze bagiye kwibandaho muri uyu mwaka, harimo kuvugurura ibikorwaremezo bari basanganwe kugira ngo abanyarwanda/abafatabuguzi ba MTN barusheho kubona serivisi zigezweho zirimo na interineti yihuta.

Kugeza ubu, mu iminara igera ku 1,300 MTN Rwanda ifite, imaze kuvugurura iminara 57 mu minara 440 igize Umujyi wa Kigali mu gikorwa biteganijwe ko kigomba gusozanya na Gicurasi uyu mwaka hamwe n'Intara y'Iburengerzaba.

Ku bijyanye n'ikibazo abo mu Ntara y'Iburengerazuba baturiye imipaka bakunze kugaragaza cyo kubura amarezo bitewe n'abo mu guhugu cy'abaturanyi, Eugene yatangaje ko bakomeje kugikoraho cyane kugira ngo bamenye neza ko nta mufatabuguzi wabo 'uzongera kugira ikibazo cy'iminara ibateza akaduruvayo iba iri hakurya y'igihugu.'

Asobanura ikibazo cy'abo ku mipaka uyu muyobozi yagize ati: 'Buriya biterwa n'impamvu eshatu zirimo kuba koko nta munara uhari ku buryo abo hakurya bashobora kuba bafite umunara uri hafi y'imbibi zacu, hari ingamba twashyizeho tugenda tuganira n'ibihugu duturanye kugira ngo turebe uburyo dushobora gukoresha ingufu ziri hafi y'imipaka, ariko kubera ibibazo biri muri Afurika, hari aho bikora n'aho bidakora. 

Ariko rwose ku baturanyi twari twagerageje kubahiriza ibyo twemeranije mu nama twafashijwemo n'Ikigo Ngenzuramikorere, RURA, tukumvikana ibyo tugomba gukora twe nk'u Rwanda tukabikora bo ntibabikore rimwe na rimwe rero bigateza akaduruvayo abafatabuguzi bacu, ariko ni ibintu dukurikirana buri munsi tubifashijwemo n'abayobozi ndetse na RURA. Mu byo twateganyaga bigenze neza nabyo mbere y'uko twinjira mu bihe bikomeye by'amatora mu kwezi kwa 7 bigomba kuba byakemutse.'

Si ukuvugurura gusa, kuko MTN Rwanda igiye no kugura indi minara mishya igera kuri 215 muri uyu mwaka wa 2024. Muri uyu mwaka kandi, MTN irateganya gushyiraho iminara yo kongerera ubushobozi ikoranabuhanga rya 5G aho bizaba bikenewe, ibifashijwemo n'abafatanyabikorwa bayo.

Umuyobozi ushinzwe tekinike  muri MTN Rwanda, Gakwerere Eugene yatangaje ibiri gukorwaho mu guhangana n’amarezo acikagurika na interineti ikora nabi

Ni umukino wa wari witabiriwe n’abantu benshi kuko ari umwe mu mikino ikomeye muri Basketball y’u Rwanda. Ku i saha ya saa moya n'iminota 5 nibwo umusifuzi yatangije uyu  mukino, wagiye kuba amatike yamaze gushira burundu.

Iminota ya mbere y'agace ka mbere Patriots BBC yari hejuru cyane umusore nka Hagumintwari Steven yari hejuru cyane, mu gihe abakinnyi ba APR BBC batinze kujya mu mukino bahuzagurika cyane dore ko kumena urukuta rwa Patriots BBC byari byabananiye.

Nshobozwabyose agerageza kuzamura amanota ya APR BBC ariko bigoye

Agace ka kabiri APR BBC yagatangiranye impinduka aho umutoza wayo yinjijemo umusore Ntore Habimana batangirana imbaraga nyinshi cyane atangira abafasha gukuramo ikinyuranyo aho yaje agahirwa cyane n'amanota 3. 

Ikipe ya APR BBC muri aka gace wabonaga ko iri mu mukino cyane yashyuhanye ikipe ya Patriots BBC igatuma batakaza imipira  myinshi cyane.

Amakipe yakomeje  guhangana cyane ariko abakinnyi nka Ndayisaba Dieudonne na Ntore Habimana bagakora ikinyuranyo ku mpande zombi ariko ubona ko umusore Ntore afatiye runini ikipe ya APR BBC. Aka gace kaje kurangira APR  BBC ikayoboye n'amanota  29-28 ya Patriots BBC.

Nk’uko basoje agace ka kabiri  APR BBC yaje mu gace ka gatatu ishaka gufatiraho ngo yongere ikinyuranyo, abakinnyi nka Ntore, Hunt na Wamukota birabakundira bagumisha ikipe ya APR BBC mu mukino.

Ndizeye Ndayisaba Dieudonné wa Patriots BBC yazonze cyane ikipe ya APR BBC ku mwihariko we asanzwe amenyereweho wo gutsinda amanota atatu cyane byaje no gukomeza kumuhira muri aka gace. 

Patriots BBC yaje kongera gukanguka iyobora APR BBC aka gace kaza kurangira Patriots BBC iyoboye n'amanota 54 kuri 47 ya APR BBC. 

Amakipe yombi yagarutse mu gace ka nyuma ubona ko yakaniranye  cyane ariko Patriots BBC igakomeza kuzamura ikinyuranyo. William Perry niwe wakomeje kuba ikinyuranyo muri uyu mukino ubona ko abasore b'ikipe ya APR BBC bamuburiye igisubizo burundu. 

Muri aka gace wabonaga ko APR BBC yikosoye mu bwugarizi ibifashijwemo na Hunt ariko imbaraga ze ari umwe zikaba nke imbere y'abasore ba Patriots BBC. 

Iminota 3 ya nyuma y'umukino yaje kuba inzozi mbi ku bakinnyi ba APR BBC, Patriots BBC yaje kubarusha cyane ku buryo budasanzwe, William Perry na Steven Hagumintwari baba ikinyuranyo. 

Umukino urangira APR BBC itsinzwe na Patriots BBC amanota 59 kuri 73.

Umunya-Saduni ukinira ikipe ya APR FC, Sharaf Eldin Shiboub Ali Abdelrahman yatowe nk’umukinnyi w’ukwezi kwa Gashyantare ni mu gihe umutoza we, Thierry Froger yabaye umutoza w’ukwezi.

Mu ijoro ryo kuri uyu wa Gatatu tariki ya 20 Werurwe 2024 ni bwo Rwanda Premier League ndetse na sosiyete y’imikino y’amahirwe ya Gorilla Games bahembye abakinnyi bitwaye neza muri shampiyona y’icyiciro cya mbere mu Rwanda mu kwezi kwa Gashyantare 2024.

Nk’ibisanzwe hahembwe ibyiciro bine, aho umunyezamu wakuyemo umupira ukomeye ‘save’ yabaye Nzeyurwanda Jimmy Djihad wa Kiyovu Sports ku mukino wa Gorilla FC.

Uyu munyezamu wegukanye iki gihembo ku nshuro ya kabiri, yahigitse Habineza Fils François wa Etoile del’Est na Muhawenayo Gad wa Musanze FC ibyo bakoze ku mukino wa Rayon Sports ndetse Pavelh Ndzila wa APR FC ku mukino wa Bugesera FC.

Igitego cy’ukwezi cyegukanywe na Ani Elijah wa Bugesera, ni igitego yatsinze Gasogi United. Yahigitse icya Destin Malanda w’Amagaju FC ku mukino wa Gasogi United, icya Shiboub wa APR FC ku mukino wa Sunrise FC ndetse n’icya Niyibizi Ramadhan wa APR FC ku mukino wa Mukura VS.

Igihembo cy’umutoza w’ukwezi cyari gihataniwe n’abatoza Guy Bukasa wa AS Kigali, Julien Mette wa Rayon Sports, Habimana Sosthene wa Musanze FC ndetse na Thierry Froger wa APR FC waje kucyegukana abikesha ko mu mikino 5 yatsinzemo 4 anganya umwe.

Igihembo cy’umukinnyi w’ukwezi cyahawe umunya-Sudani ukinira APR FC, Sharaf Eldin Shiboub Ali Abdelrahman utari uhari aho ari mu ikipe y’igihugu, igihembo yagifatiwe n’umutoza we.

Uyu mukinnyi watsinze ibitego 4 mu mikino 4, yahigitse Shabani Hussein Tchabalala wa AS Kigali, Destin Malanda w’Amagaju FC na Samuel Mpipong wa Mukura VS.

Nzeyurwanda Jimmy Djihad wa Kiyovu Sports ni we wegukanye igihembo cya Save y’ukwezi

Igihembo cy’igitego cy’ukwezi cyegukanywe na Ani Elijah wa Bugesera FC

Igihembo yagishyikirijwe na Eric Nshimiyimana

Igihembo yagishyikirijwe na Eric Nshimiyimana

Abegukanye ibihembo, haraburamo Shiboub uri mu ikipe y’igihugu ya Sudan

Umunyamakuru Kwizigira Jean Claude ni we wayoboye uyu muhango

Ephrem Kayiranga wa Radio&TV1 ubwo yaganiraga na Mugenzi Faustin wa Isibo Radio wakiraga abanyamakuru

Mu mukino wa shampiyona y’icyiciro cya mbere muri Basketball mu bagabo umunsi wa 18, APR BBC yatsinzwe irushwa na Patriots BBC 73-59 mu mukino utari woroshye.

Ni umukino wabaye ku mugoroba wo kuri uyu wa Gatatu tariki ya 20 Werurwe 2024 muri LDK aho Gymnase yari yakubise yuzuye.

Patriots BBC yazanye umujinya wo kuba APR BBC yari yarayisezereye muri Playoffs z’umwaka ushize ikanegukana igikombe, ubu yari inafite umukinnyi nka Dixon wavuye muri Patriots BBC.

APR yagowe n’agace ka mbere k’umukino, byatumye abakinnyi nka Hagumintwari Steve na Kenneth Gasana bafasha Patriots kukegukana ku manota 19 ku 9 ya APR BBC.

APR yagarutse ku yagarutse mu gace ka kabiri ishaka kuguramo aya manota 9 yarushwaga mu gace ka mbere ndetse ibifashijwe n’abakinnyi nka Nshobozwabyosenumukiza, Adonis Filer, Dixon ndetse na Ntore Habimana watsinze amanota 3 ishuro 3 muri aka gace, byafashije iyi kipe y’ingabo z’igihugu kwegukana aka gace ku manota 20-9 ndetse bahita bajya kuruhuka ari 29 ya APR BBC kuri 28 ya Patriots BBC.

Agace ka gatatu, Patriots BBC yagarukanye APR BBC ibifashijwemo na Perry William na Ndizeye Dieudonne bari mu mukino, bayifashije kugatsinda 26-18.

Agace ka nyuma k’umukino wabonaga APR BBC yacitse intege, Patriots BBC yakomerejeho igatsinda amanota 19-12. Umukino warangiye ari amanota 73 ya Patriots BBC kuri 59 ya APR BBC.

APR BBC yatsinzwe Patriots BBC iyirusha