Category: Uncategorized

Ibi yabigarutseho ku wa 23 Mata 2024, ubwo hibukwaga ku nshuro ya 30 Jenoside yakorewe Abatutsi ku rwibutso rwa Jenoside rwa Kabuye, mu Murenge wa Ndora, Akarere ka Gisagara, byanahuriranye n'igikorwa cyo gushyingura mu cyubahiro imibiri 108 irimo iyimuwe n'indi yagiye iboneka.

Guverineri Kayitesi yihanganishije ababuze ababo muri Jenoside yakorewe Abatutsi mu 1994, abasaba kwiyubakamo ubudaheranwa kuko ari byo bizagamburuza uwo ariwe wese wifuzaga ko bazima.

Ati “Nimukomere, mukomeze kwihangana no kwiyubakamo ubudaheranwa kuko ari byo bizagamburuza uwo ariwe wese wifuzaga ko mwazima'.

Yakomeje avuga ko abishwe muri Jenoside ari igihombo gikomeye igihugu cyagize, kandi ikibabaje bikaba byarakozwe n'ubuyobozi bubi bwayiteguye bukayishyira no mu bikorwa.

Yagize ati' Aba bashyinguye muri uru rwibutso rwa Kabuye hamwe n'abandi bose, ni amaboko u Rwanda rwavukijwe n'abari bashinzwe kubarengera barimo uwari Perezida Sindikubwabo Theodore n'abandi bayobozi bafatanyije harimo abasirikare ba FAR, abajandarume n'Interahamwe n'abaturage kandi ntibyari bikwiye.''

Yavuze ko kwibuka bitanga imbaraga zo kurwanya abapfobya bakanahakana Jenoside yakorewe Abatutsi, asaba buri wese ko igihe abonye ugaragara mu bikorwa bipfobya, akwiye gutanga amakuru kugira ngo uwo munyabyaha ahanwe n'amategeko.

Abarokotse Jenoside yakorewe Abatutsi batuye mu Karere ka Gisagara nabo babwiye IGIHE ko n'ubwo amateka ya Jenoside yabakorewe asharira, ariko bataheranwe n'agahinda, bakaba bariyubatse mu mitima kandi ngo bakomeje urugendo rw'iterambere baharanira kudaheranwa n'ayo mateka.

Umwe muri bo yagize ati 'Twaratesetse, ariko twakomeje gutwaza. Tuzi neza ko kwiteza imbere ari byo byonyine byahesha ishema abacu aho baruhukiye, ni yo mpamvu tudacika intege mu rugamba rwo kwiteza imbere, kandi turabibona ko n'ubuyobozi bwacu budushyigikiye.''

Kuva ku itariki ya 20 Mata 1994, ni bwo Jenoside yakajije umurego mu cyahoze ari Perefegitura ya Butare na Gisagara yabarizwagamo. Ibi bikaba byarashobotse nyuma y'iyicwa ry'uwari Perefe wayo Habyarimana Jean Baptiste, ndetse n'ijambo ry'uwari Perezida wa Guverinoma yiyise iy'Abatabazi Dr Theodore Sindikubwabo.

Amatariki y'ubwicanyi yibukwa cyane muri Gisagara ni iya 21 Mata, i Gishubi na Mugombwa, iya 22 Mata i Kibirizi, Kansi, Kigembe na Nyanza. Kuwa 23 Mata, ni i Kabuye muri Ndora, kuwa 24 Mata ni Mamba, mu gihe ubwicanyi bwakomeje i Save, Musha na Gikonko mu matariki ya 27 Mata 1994.

Kugeza ubu, muri uru rwibutso rwa Kabuye hamaze gushyingurwa imibiri 47.214, irimo 108 yahashyinguwe ku wa 23 Mata 2024. Muri yo, harimo imibiri mishya 12 yabonetse mu Murenge wa Ndora; ndetse n'indi 96 yimuwe aho yari ishyinguye mu ngo izanwa mu rwibutso.

Guverineri Kayitesi Alice, yavuze ko u Rwanda rwaburiye amaboko menshi muri Jenoside yakorewe Abatutsi yari kurwubaka rugatera imbere kurushaho.

Gen (Rtd) Ibingira na we yifatanyije n’Abanya-Gisagara kwibuka Jenoside yakorewe Abatutsi i Kabuye

Abayobozi batandukanye bari bitabiriye iki gikorwa cyo kwibuka i Kabuye mu Murenge wa Ndora

Hanashyiguwe mu cyubahiro imibiri 108 irimo iyabonetse n’indi yimuriwe muri uru rwibutso

Senateri Umuhire Adrie ubwo yashyiraga indabo ku mva ziruhukiyemo Abatutsi bishwe muri Jenoside

Mu rwego rwo guherekeza neza ukwezi kwa Mata ari na ko abantu bitegura kwinjira muri Gicurasi, abahanzi nyarwanda bagiye bakora mu nganzo bagashyira hanze ibihangano byiza kandi binogeye amatwi.

Mu ndirimbo nshya zagiye hanze muri iki cyumweru harimo:

1.Inkomoko – Chryso Ndasingwa

Kuri uyu wa Gatandatu, umuhanzi mu muziki wo kuramya no guhimbaza Imana, Chryso Ndasingwa, yashyize hanze indirimbo nshya “Inkomoko” yakoreye i Nyamirambo. Uyu musore wamamaye mu ndirimbo “Wahozeho”, asohoye iyi ndirimbo mu gihe yitegura gukora igitaramo gikomeye “Wahozeho Live Concert” kizabera muri BK Arena tariki 5 Gicurasi 2024.

2. 2 in 1 — Kenny Sol

Rusanganwa Norbert [Kenny Sol] yamaze gushyira hanze indirimbo y’amashusho ‘2 in 1’ yifashishijemo umugore we unamutwitiye imfura , Kunda Alliance Yvette, ikaba ari iya mbere akoze kuva yakwinjira muri 1:55AM.

3. Dans Le Bon — Gabiro Guitar

Nyuma yo gukora ku muzingo yise 'Gishyaka' n'uruhurirane rw'indirimbo yise 'Criminal Love', Gabiro Guitar uri gukora ku giti cye kuva yakwemera guhara imigabane yari afite muri Evolve Music, yagarukanye indirimbo nshya.

Ni indirimbo ifite amashusho yakorewe mu Burundi yayise 'Dans Le Bon'. Mu kiganiro yagiranye na inyaRwanda, Gabiro yavuze ko aya ari amagambo akoreshwa n'abakundana mu gihe baryohewe n'umunyenga w'urukundo barimo.

4. Isengesho — Cyusa Ibrahim

Umuhanzi mu njyana gakondo, Cyusa Ibrahim, yashyize hanze amashusho y’indirimbo ye nshya yise ‘Isengesho’ yakoze nyuma y’imijugujugu yatewe n’abantu mu bihe bitandukanye, cyane cyane binyuze mu bikorwa bye bishamikiye mu myidagaduro.

5. Ambutiyaje — Riderman

Umuraperi Riderman aherutse gutangariza InyaRwanda ko yitegura gushyira hanze Extended Play (EP) iriho indirimbo esheshatu yakoranye n’umuraperi mugenzi we Bull Dogg. Imwe muri izi ni iyo yise ‘Ambutiyaje’ yamaze no gushyira hanze mu buryo bw’amajwi.

6. Rwamakombe – Dr Nganji ft Zeo Trap

Ngabonziza Dominique wamamaye nka Dr Nganji muri muzika yamaze gushyira hanze indirimbo yise “Rwamakombe” yakoranye n’umuraperi uri mu bagezweho muri iyi minsi, Zeo Trap.

7. Idage – QD

Nyuma y’amezi abiri ashyize hanze iyo yise “Teta” igakundwa n’abatari bacye, umuhanzi QD yashyize hanze indi ndirimbo yise ‘Idage.’

8. Respect & Usifiwe za Tonzi

Umuramyi Tonzi yamaze gushyira hanze amashusho y’indirimbo ‘Repect’ yitiriye album ye ya cyenda aherutse kumurika, akaba ari amashusho yafatiwe mu gitaramo aherutse gukora. Mu ijoro ryacyeye nabwo yashyize hanze andi mashusho y’indirimbo “Asifiwe”.

9. Kiganjani – Ben & Chance

Bamwe mu baramyi bakunzwe hano mu Rwanda, Ben na Chance, bahaye abakunzi b’ibihangano byabo indi ndirimbo bise “Kiganjani.” Ni indirimbo bashyize hanze mu gihe bari kubarizwa muri Canada mu ivugabutumwa batumiwemo na Ev. Willy Gakunzi.

10. Zikana — Yampano ft Fireman

Umuhanzi Yampano nyuma ya za ‘Bucura’ n’izindi ndirimbo yakoze zikamuzanira igikundiro, yisunze Fireman bakora “Zikana.”

11. Suku – Kenny Edwin ft Fireman

Umuhanzi Kenny Edwin yahuje imbaraga n’umuraperi Fireman bakora indirimbo bise “Suku.”

12. Ifoto – Yee Fanta ft Teco

Producer ukiri muto ukomeje kuzamuka neza mu muziki nyarwanda no kuzamura igikundiro, Fanta yahuriye mu ndirimbo ‘Ifoto’ na Teco.

13. Muzehe Wacu — Mark The Chris

Umuhanzi w’umunyarwanda Mark The Chris ukorera umuziki mu Bufaransa, yashyize ahagaragara indirimbo “Muzehe Wacu” yanditswe na Producer Iyso mu rwego rwo kugaragaza ibyiza Perezida Kagame amaze kugeza ku Rwanda n’abanyarwanda mu myaka 30 ishize arubereye ku isonga.

14. Together – Kellia

Nyuma y’uko ahuriye na Alyn Sano mu ndirimbo bise “Ndabizi,” umuhanzikazi Tuyizere Kellia [Kellia] yashyize hanze indi nshya yise “Together” yanditswe na Niyo Bosco.

15. Calvary – David Kega

Umuramyi David Kega uri gukorana imbaraga muri iyi minsi, yazirikanye ibyo Kristo yakoze ku musaraba, ashyira hanze indirimbo yise ‘Calvary.’

Chryso Ndasingwa yazegurutse imihanda ya Nyamirambo avuga inkuru nziza ya Yesu Kristo yanyujije mu ndirimbo ye nshya yise “Inkomoko” yasohokanye n’amashusho yayo, akaba aririmbamo ko “Nkomoka kuri Data, ndi icyaremwe gishya. Navutse ubwa kabiri, nagabiwe ya migisha yose, nababariwe ku bw'amaraso ya Yesu.

Nogejwe ku bw'amaraso ya Yesu, nkomoka kuri Christo, ndi icyaremwe gishya, navutse ubwa kabiri, nagabiwe ya migisha yose nababariwe ku bw'amaraso ya Yesu. Nogejwe ku bw'amaraso ya Yesu, ndi umugisha ku bw'amaraso ya Yesu”.

Ni indirimbo yagiye hanze mu gitondo cy’uyu wa Gatandatu tariki 27 Mata 2024. Agaragara ari mu mihanda ya Nyamirambo agaragiwe n’inshuti ze, aririmba urukundo rutangaje rwa Yesu Kristo wamugize icyaremwe gishya ku bw’amaraso ya Yesu wamupfiriye ku musaraba. Ati “Nababariwe ku bw’amaraso ya Yesu”.

Chryso agaragara ari i Nyamirambu kuri 40, akongera kugaragara ari mu marange ndetse agafata n’icyo kurya [ubanza akunda akaboga], akerekeza no mu Mujyi muri Car Free Zone hafi n’aho inyaRwanda ikorera. Aha hose aba ari kuhagenda n’amaguru arimo kuririmba “Inkomoko”, gusa hari aho n’aho agaragara atega moto i Nyamirambo.

Chryso Ndasingwa wiyegereje abaturage bo mu gace ka Nyamirambo akomokamo ndetse atuyemo, yabwiye inyaRwanda ko yanditse iyi ndirimbo “Inkomoko” agamije gutanga “ubutumwa bw'ukuntu Imana yiyunze natwe muri Kristo ku musaraba.” Amajwi yayo yakozwe na Boris, naho amashusho akorwa ndetse atunganywa na Oskados & Richard.

Chryso Ndasingwa ari kwitegura kumurika Album ye ya mbere mu gitaramo cy’amateka yise “Wahozeho Album Launch” kizabera muri BK Arena tariki 05.05.2024. Yacyitiriye indirimbo ye yabaye intero n’inyikirizo ku bakunzi benshi b’umuziki wa Gospel, iyo akaba ari iyitwa “Wahozeho”.

Mu kiganiro na InyaRwanda, Chryso Ndasingwa yabajijwe uko yiyumva kuba agiye gukorera muri BK Arena igitaramo cye cya mbere, asubiza ko ari inzozi ze zibaye impamo. Yagize ati “Ndumva nezerewe cyane kuko cyari icyifuzo maranye iminsi myinshi, none ndashima Imana ko yaduciriye inzira”.

Album ye ya mbere agiye kumurika igizwe n’indirimbo 18 zikubiyemo ubutumwa bw’amashimwe menshi ku Mana nk’uko umwanditsi wazo abisobanura ati: “[Album] Isobanuye ikoraniro y'abantu batabarika bazanye intego imwe yo kuramya uwahozeho kandi uzahoraho”.

Muri iki gitaramo Chryso Ndasingwa azaba ari kumwe n’abaramyi basizwe amavuta y’Imana barimo Aime Uwimana, Josh Ishimwe, Papi Clever na Dorcas, True Promises Ministries, Asaph Music International na Himbaza Club. Imiryango izaba ikinguye kuva saa kumi z’umugoroba.

Amatike yo kwinjira muri uyu mugoroba w’amashimwe uzayoborwa na Tracy Agasaro, yamaze kugera hanze, akaba aboneka kuri www.ticqet.rw. Ushobora no guhamagara nimero zikurikira bakagufasha kubona itike byoroshye; 0784237492; 0788838879; 0788622852.

Abari kugura amatike mbere y’uko igitaramo kiba bari kubyungukiramo cyane kuko ibiciro biri hasi. Itike ya Silver [mu myanya isanzwe] iragura 5,000 Frw mu gihe ku munsi w’igitaramo izaba igura 10,000 Frw. Itike ya Premium iragura 10,000 Frw mu gihe ku ku muryango izaba igura 15,000 Frw.

Itike ya Gold iragura 12,000 Frw mu gihe ku munsi w’igitaramo izaba igura 17,000 Frw. Platinum iragura 15,000 Frw mu gihe izaba igura 20,000 Frw ku munsi w’igitaramo. Itike ya Diomond wagereranya na VVIP iragura 20,000 Frw mu gihe ku munsi w’igitaramo izaba igura 25,000 Frw.

Chryso Ndasingwa umaze imyaka 3 gusa mu muziki agiye gukora igitaramo cy’amateka

Chryso Ndasingwa agiye gukora igitaramo cy’amateka muri BK Arena

Himbaza Club nabo bazifatanya na Chryso Ndasingwa muri ‘Wahozeho Album Launch’

Amafoto agaragaza Chryso Ndasingwa mu ndirimbo ye nshya “Inkomoko”

Misiri yihariye imidali muri shampiyona ya Afurika ya ‘Gymnastique rythmique’ imaze iminsi ibera i Kigali, ni mu gihe u Rwanda bitagenze neza.

Ejo hashize ku wa Gatanu tariki ya 26 Mata 2024 ni bwo iyi shampiyona ya ‘Gymnastique rythmique’ yaberaga mu Rwanda muri Kigali Arena yasojwe.

Iyi shampiyona yahurije hamwe ibihugu 13 birimo u Rwanda aho intego ari ugushaka itike y’imikino Olimpike izabera i Paris mu Bufaransa mu mpeshyi y’uyu mwaka wa 2024.

Hakinwe ibyiciro bine mu bakiri bato n’abakuru birimo 'Ribbon, Hoop, Clubs na Balls' aho abakinnyi bakinaga ku giti cya bo ndetse bakanakinira mu makipe.

Ni irushanwa ikipe y’igihugu y’u Rwanda itahiriwe aho nubwo intego yari umudali ariko yaje kuvamo ku ikubitiro nta mudali ibonye.

Muri rusange Misiri ni yo yakusanyije imidali myinshi, aho yegukanye imidali 16, harimo 9 ya Zahabu, 4 y’Ifeza ndetse 3 y’Umuringa.

Angola yegukanye imidali 6, harimo umwe wa Zahabu, 2 y’Ifezi n’itatu y’Umuringa.

Afurika y’Epfo yegukanye imidali 5, 4 y’Ifeza n’umwe w’Umuringa. Tunisia yegukanye imidali 3 y’Umuringa.

Mu cyiciro cy’abakuru, mu gukina hakoreshejwe agapira 'ball', umunya-Misiri, Aliaa Saleh ni we wabaye uwa mbere yegukana umudali wa Zahabu, yakurikiwe na mugenzi we wo mu Misiri, Habiba Marzouk wabaye uwa kabiri ahabwa umudali w’ifeza, ni mu gihe uw’umurunga wegukanywe na Luana Gomez ukomoka muri Angola.

Mu gukoresha uruziga cyangwa 'Hoop', umudali wa Zahabu watashye mu Misiri aho wegukanywe na Aliaa Saleh, umudali w’Ifeza utaha muri Angola wegukanywe na Luana Gomez ni mu gihe Habiba Marzouk ukomoka mu Misiri ari we wegukanye umudali w’Umuringa.

Mu gukina hakoreshejwe umugozi 'Ribbon', Mariem Seliem ukomoka mu Misiri ni we wahize abandi yegukana umudali wa Zahabu, mugezi we Aliaa Saleh yegukana uw’Ifezi ni mu gihe Luana Gomez ukomoka muri Angola yabaye uwa 3 yegukana umudali w’Umuringa.

Mu cyiciro cya 'Clubs’ umunya-Angola, Luana Gomez yahigitse abanya-Misiri bari bamuzengereje aba ari we wegukana umudali wa Zahabu, Habiba Zarmouk ukomoka mu Misiri yegukanye umudali w’Ifeza ni mu gihe Aliaa Saleh yegukanye umudali w’Umuringa.

Buri umwe wese yerekanaga icyo ashoboye

Muri Hoop, Aliaa Saleh yabaye uwa mbere, Luana Gomez aba uwa kabiri, Habiba Marzouk aba uwa 3, bahembwe na perezida wa Gymnastic ku Isi, Morinari Watanabe na Rwemarika

Muri Ball, Aliaa Saleh yabaye uwa mbere, Habiba Marzouk aba uwa kabiri, Luana Gomez aba uwa 3

Muri Clubs, Luana Gomez yabaye uwa mbere, Habiba Marzouk aba uwa kabiri ni mu gihe Aliaa Saleh yabaye uwa gatatu

Muri Ribbon, Mariem Seliem yabaye uwa mbere, Aliaa Saleh aba uwa kabiri, Luana Gomez aba uwa gatatu

Ishyirahamwe ry’umukino wa Basketball mu Rwanda, FERWABA, rigiye gutangiza irushanwa rya Rwanda Cup aho ikipe izajya iryegukana izajya ihagararira u Rwanda muri Zone 5.

Ni irushanwa ryateguwe mu rwego rwo gufasha abakinnyi kongera umubare w’imikino, kongera ihangana muri uyu mukino no kuzamura impano z’abakinnyi bakiri bato hirya no hino mu gihugu cyane ko rizahuza amakipe yo mu cyiciro cya mbere n’icya kabiri.

Rwanda Cup ikaba izajya iba mu byiciro byombi, abagabo n’abagore, gusa mu cyiciro cy’abagabo amakipe 4 yasoje shampiyona ari imbere azajya yinjiramo irushanwa rigeze muri 1/4, nk’uko visi perezida wa FERWABA, Nyirishema Richard yabisobanuye.

Ati “niba irushanwa rizazamo amakipe yo mu cyiciro cya kabiri, urebye urwego rwa yo n’ayo makipe akomeye biratandukanye cyane, ni yo mpamvu twafashe umwanzuro ko amakipe 4 ya mbere muri shampiyona azajya yinjiramo irushanwa rigeze muri 1/4.”

“Mu bakobwa ho kubera ko amakipe yiyandikishije ari make twasanze byagorana dufata APR WBBC yabaye iya mbere iyobora itsinda na REG yabaye iya kabiri iyobora irindi tsinda.”

Yakomeje avuga ko mu rwego rwo kuriha imbaraga, amakipe akajya aryitabira yumva ko hari icyo arwanira, ikipe izajya iritwara izajya ihagarararira u Rwanda muri Zone 5.

Ati “kuryitabira ni ubushake, ariko twaricaye turareba mu rwego rwo kuriha imbaraga kugira ngo n’amakipe ajye aryitabira yumva hari icyo arwanira, tuvuga ko ikipe izajya iryegukana izajya ihagararira u Rwanda mu mikino y’amakipe y’akarere ka 5 (Zone V).”

“Mu bakobwa ho izajya iritwara izajya ihabwa amahirwe yo gukina ijonjora rya Africa Women Basketball League.”

Mu gihe ikipe yabyegukana byombi (shampiyona na Rwanda Cup), iyo byahuye ku mukino wa nyuma, ni ukuvuga iya kabiri muri Rwanda Cup ni yo izajya ikina amarushanwa yavuzwe haruguru.

Mu bagabo uretse amakipe 4 ari yo; APR BBC, REG BBC, Patriots BBC na Espoir BBBC azajyamo irushanwa rigeze muri 1/4, amakipe 17 ni yo yiyandikishije akaba agabanyije mu matsinda 4, itsinda A ririmo K Titans, Kepler, Flame, RP IPRC Musanze na EAUR BBC, itsinda B ririmo Tigers BBC, The Hoops, Rebero Academy na Greater Virunga.

Itsinda C ririmo UGB, Intare, Black Thunders na Igihozo Ste Peter. Itsinda D ririmo Inspired Generation, Azomo, UR Kigali na Its Kigali.

Mu bagore amakipe ni 7 ari mu matsinda 2, itsinda A ririmo APR WBBC, RP IPRC Huye na EAUR. Itsinda B ririmo REG WBBC, The Hoops, UR Kigali na Kepler.

Iri rushanwa rizaba ku bufatanye na Forrzza, biteganyijwe ko umukino wa nyuma uzakinwa tariki ya 9 Kanama 2024.

Nyirishema Richard, visi perezida wa FERWABA yavuze kuri gahunda zose zijyanye n’irushanwa rya Rwanda Cup

Thierry Shema wa Forzza na we yari mu kiganiro n’itangazamakuru cyasobanuriwemo byinshi bijyanye n’iri rushanwa

N’abayobozi b’amakipe bishimiye iri rushanwa

Umunyamideli Moïse Turahirwa wanashinze inzu y’imideli ya Moshions, yongeye kurikoroza avuga ko ari umukobwa.

Ni mu butumwa yanyujije ku rukuta rwa Twitter, aho yagaragaje ko agiye muri Kenya asaba abatuye iki gihugu kuza kugura ibicuruzwa bye kuko ari mushiki wa bo (mushiki w’umuntu aba ari umukobwa ubundi).

Ati 'Nairobi, umwenda w’umukiro Imandwa yawubazaniye. Muze muri benshi, mubwire n’abarwayi baze mbakize. Munzanire ayo mafaranga nka mushiki wanyu nimanukire!”

Ubu butumwa bwatumye benshi bamwibazaho, bamwe bagenda bagaragaza ko ashobora kuba afite ikibazo cy’uburwayi.

Uyu munyamideli ukunda kugaruka mu mitwe ya benshi, yashyize hanze ubu butumwa nyuma y’ubundi yari yashyize kuri Twitter ejo hashize ku wa gatanu tariki ya 26 Mata 2024 agaragaza ko yasohowe mu ndege kubera ko imbwa zarimo zihumuriza igikapu cye kikamoka.

icyo gihe yagize ati “Ngo imbwa igeze ku gikapu cyanjye iramoka iramoka baza kunkura ku ndege, ngereyo nsanga ikibuga cyose cyuzuye inzego zumutekano.”

Yakomeje asaba RwandAir ko igikapu cye kitagomba gusigara i Kigali, ati 'Ndabasabye icyo gikapu ntigisigare, nigisigara turisiba'.

RwandAir yasubije Turahirwa, imumenyesha ko igikapu cye nta kibazo gifite. Turahirwa na we yasubije ubu butumwa agaragaza ko yanyuzwe n’uburyo RwandAir yakemuye ikibazo cye, ati “Muri aba mbere, igikapu cyangezeho.”

Ibo byose byaje bikurikira amafoto ye yambaye ubusa buri buri yashyize hanze mu kwezi gushize kwa Werurwe 2024 na bwo agateza impagarara ku mbuga nkoranyambaga.

Dear @FlyRwandAir Ndabasabye iyo bag ntisigare, wallah nisigara turisibaaaa… https://t.co/0bcbr01bVp

— Moïse Turahirwa (@MosesTurahirwa) April 26, 2024

Nairobi,🇰🇪 umwenda wumukiro Imandwa yawubaziniye,… muze muri benshi, mubwire nabarwayi baze mbakize. Munkozemo Izo Mpesa Nka mushiki wanyu nimanukire! pic.twitter.com/ZzRKX6j7f0

— Moïse Turahirwa (@MosesTurahirwa) April 27, 2024

Moses yavuze ko ari umukobwa

Abantu bamaze igihe bishimiye uru rukomatane rw'injyana zo muri Nigeria zahinduwe mu buryo bugezweho na Fela Kuti bikabyara Afrobeat iri gutigisa isi.

Gusa injyana za Afro zamamaye cyane mu 1940 na 1950 muri Amerika y'Amajyepfo igizwe n'ibihugu bituwe n'abaturage biganjemo abakomoka ku bacakara bajyanwe bunyago kujya gukorayo mu mirima y'ibyayi n'isukari.

Mu busanzwe, Afurika ifite injyana yihariye zamaze kunyura benshi mu ruhando mpuzamahanga nka Amapiano, Juju, Fuji, Rumba, Bongo Flava, Ndombolo, Makosa, Kizomba na Afrobeat.

Kubera kwamamara k'uyu mudiho wa Afrobeat, nyinshi mu njyana zirimo n’izabazungu zagiye zongerwaho Afro nka Afro Pop, Afro R&B n'izindi bagerageza kuzihuza n'isi ya Afrobeat.

Afro-Gako y'i Rwanda, Producer Pakkage amaze iminsi asa n’ukoramo indirimbo zinyuranye, nayo umuntu yavuga ko iri muri uwo mujyo wo guhuza injyana zihariye nyarwanda nk'Ikinimba, Umushayayo n'izindi n'umurishyo wa Afrobeat.

Uyu munsi tugiye kugaruka kuri iyi njyana ikomeje gutigisa isi, uburyo Fela Kuti yagiye kwiga mu Bwongereza akavayo akunda Jazz bikaza kurangira atangije Afrobeat bitewe n'amateka yakuye muri Amerika ubwo yajyagayo. Afrobeat yakoreshwaga mu kuvuganira abaturage mu buryo bwa politike.

Afrobeat yavukiye muri Nigeria mu myaka ya za 1960, izanywe na Fela Anikulapo Kuti ndetse n'umuhanga mu kuvuza ingoma Tony Allen, bayijyanishije n'ibihe bigezweho.

Iyi njyana ikaba ari uruhurirane rw'indi midiho gakondo ya Highlife, Fuji na Juju hamwe n'ijwi ryo mu kirimi cy’iki Yoruba, injyana n'ibicurangisho byo muri iyi mico.

Muri za 1950, ni bwo Kuti yavuye muri Lagos ajya kwiga mu ishuri ry'umuziki rya London mu Bwongereza aho yigiye ibicurangisho by'umuziki nka piano anatangira gukunda Jazz. Yaje gusubira muri Lagos atangira kuvanga injyana ya Jazz n’iza gakondo zabo. 

Muri 1969 yajyanye n'itsinda ry'abacuranzi be n'abaririmbyi muri Leta Zunze Ubumwe z'Amerika, bahura n'umugore w'umuririmbyi n'impirimbanyi y'abirabura, Sandra Smith [Sandra Izsadore] waje guhuza Kuti n'abanditsi bakomeje nka Martin Luther Jr, Angela Davis, Jesse Jackson kimwe na Malcolm X.

Kuko Kuti yari afite inyota ikomeye yo kumenya amateka ya politike y'Abanyamerika bafite inkomoko muri Afurika, Smith yabimufashijemo kuko bamaranye iminsi itari micye.

Aha ni ho Kuti yahereye atangira kunozamo umuziki we atangira no kwibanda ku buryo bwo gukoramo umuziki nyafurika n'ubutumwa yatangaga burahinduka.

Kuti ubwo yasubiraga muri Nigeria yari yaramaze guhindura izina ry'itsinda bakoranaga umuziki, arigira Africa 70, ryabaye igishyitsi cya Afrobeat mu buryo bukomeye.

Iyi njyana yatangiye kubona amaboko ya Ray Stephen Oche wo muri Nigeria wakoze ibitaramo bizenguruka Paris mu Bufaransa afatanije n'itsinda ry'abacuranzi n'ababyinnyi be.

Izina rya Afrobeat ryazamutse gutyo bashaka kugira ngo bahe umwihariko umuziki Fela Kuti bawutandukanye n'ibikorwa ahandi hose ku yindi migabane.

Imvano ya Afrobeat kandi ifitanye isano yimbitse na politike y'impinduramatwa aho Kuti yayifashishaga atanga ubutumwa ku bikwiriye guhinduka.

Ubwo iyi njyana yavukaga, ibihugu byinshi byo muri Afurika byarimo binyura mu bihe bitoroshye bya ruswa itari yoroshye binava mu mu bukolini byinjira mu kubaho byigenga.

Amatsinda menshi y'umuziki yatangiye kwifashisha injyana ya Afrobeat bituma itangira no kwiganwa mu bihugu binyuranye by'isi.

Abakora injyana ya Jazz batangiye kumva cyane Afrobeat, ibintu byanatumye abakora izi njyana batangira guhuza amaboko mu mishinga itandukanye yanagiye ivamo n'imizingo.

Abatunganya umuziki batangiye kwinjira byimbitse mu gukora ibihangano byinshi by'iyi njyana nka Brian Eno na David Byrne bavuze ko mu byo bakora bafatira urugero kuri Fela Kuti baje gutunganya umuzingo Talking Heads watigishije imyaka ya 1980.

Ubwo abantu binjiraga muri 2000, ibihangano byinshi bya Kuti byatangiye gusubirwamo umusubirizo kuko injyana ya Afrobeat yari imaze gufata imitima ya benshi cyane abo mu kiragano cy’iyo myaka.'

Afrobeat yatangiye kugemurwa mu bindi bihugu, havuka injyana zihujwe nka Afropop. Muri New York muri Leta Zunze Ubumwe z'Amerika na ho iyi njyana yari itangiye gufata, havuka amatsina ayikora.

Muri 2008 mu Bwongereza naho iyi njyana yafashe imitima ya benshi bigizwemo uruhare runini n'itsinda ry'umuziki ryaho ryitwaga Foals na Antibalas.

Muri 2020 mu bihembo bya Grammy, iri tsinda rya Antibalas ryanaje no guhatana. Abahanzi bakora iyi njyana batangiye kuboneka ku bwinshi, bakaba barabonaga Fela Kuti nk'umwami, bamwe bakamwiyitirira nka Femi Kuti na Seun Kuti.

Guhera mu myaka ya 2009 ni bwo iyi njyana yatangiye gutigisa bikomeye isi, hanakorwa ibyegeranyo bitandukanye kuri Fela Kuti harimo n’ibyagiye bitunganywa bigizwemo uruhare n'ibyamamare nka Jay Z, Will Smith, Jada Pinkett.

Ibyamamare bikomeye byagiye byitabira umuhango wo guha icyubahiro Fela Kuti nka Koffi Annan, Michelle Obama binyuze muri ibyo byegeranyo biri ku rwego mpuzamahanga byagiye bikorwa kuri uyu mugabo.

Umuziki wa Fela Kuti kandi wagiye witabazwa n'abarimo Missy Elliott, J.Cole, Kaney West na Beyonce.

Hatangijwe n'amaserukiramuco akomeye agamije kurushaho guha umurindi Afrobeat nka 'Festival de Afrobeat Independiente' ribera muri Buenos Aires.

Ibigwi bya Fela Kuti witabye Imana muri 1997 afite imyaka 58 n’ubu biracyavugwa binakoraPakkage amaze igihe ashyira hanze ibihangano avuga ko bikoze mu njyana ya Afro-GakoElement Eleeeh avuga ko hari ibyo agikora ku njyana ya Afro Gako yifuje gusangiza abanyarwanda nubwo Country Records ivuga ko ari iyayo