Category: Uncategorized

Koleji y'Ubugeni n'Ubumenyi Rusange ya Huye ikorera mu nyubako z'iyahoze ari Kaminuza Nkuru y'u Rwanda ziganjemo izubatswe mbere ya 1963.

Raporo y'Umugenzuzi Mukuru w'Imari ya Leta ya 2022/2023 igaragaza ko iri sakaro rikiriho kandi inyubako zishaje zose za Kaminuza y'u Rwanda zakabaye zaravuguruwe, zikabyazwa umusaruro.

Ubwo bagezaga ibisobanuro mu magambo kuri Komisiyo ishinzwe gukurikirana imikoreshereze y'Imari n'Umutungo by'Igihugu PAC, kuri uyu wa 10 Gicurasi 2024, Umuyobozi Mukuru wungirije ushinzwe Imari n'Imiyoborere muri Kaminuza y'u Rwanda, Françoise Kayitare Tengera, yagaragaje ko ubu hari kuvugururwa inyubako zishaje by'umwihariko muri Koleji ya Huye.

Ati 'Buri mwaka tuba dufite inzu tugomba gusana, ngira ngo abageze i Huye babonye ko twatangiye gusana gusa icyo navuga ni uko kubera ukuntu zishaje cyane, umusaruro ntabwo uhita ugaragara ngo ubone impinduka.'

Yagaragaje ko mu mwaka wa 2022/2023 ndetse na 2023/2024 mu mashami yose ya UR hamaze gusanwa inzu 46. Intebe zasanwe ni 8369, bitwara asaga 128 million Frw.

Tengera yanavuze ko muri uyu mwaka hari izindi nzu zizakomeza kuvugururwa harimo n'izikurwaho isakaro rya asbestos imirimo yo kuzivugurura igakomerezaho.

Ati 'Ikijyanye na asbestos twari tuzifite ku mashami hafi yose ariko uyu munsi aho tuzisigaranye ni i Huye, tukaba tumaze gukuraho asbestos zirenga 64%.'

Mu myaka itanu ishize inyubako z'i Huye zari zisakaje asbestos hariho ubuso bwa metero kare ibihumbi 110, ariko ubu hasigaye metero kare ibihumbi 48.

Umuyobozi Mukuru wa Kaminuza y'u Rwanda, Prof Muganga Kayihura Didas yatangaje ko Ikigo cy'Igihugu gishinzwe kunoza imiturire, RHA, cyemeye kugira isakaro rya asbestos rikurwaho mbere y'uko uyu mwaka wa 2023/2024 urangira.

Ati 'Iyo batwemereye bakagira aho bavanaho izo asbestos duhita tuvugurura, nk'ubu batwemereye ko mbere y'uko uyu mwaka w'ingengo y'imari usoza haraba hari ibyo bagiye kuvanaho ku nyubako z'i Huye nka 'Batiment Central', 'auditorium' n'ahandi[…]n'inyubako zo guturamo na hariya nibajya badufasha bakabikuraho bizajya bikurikirwa no kuzivugurura.'

UR igaragaza irindi sakaro rizakurwaho mwaka w'ingengo y'imari wa 2024/2025.

Biteganyijwe ko intebe zizasanwa mu mwaka w'ingengo y'imari wa 2024/2025 ari 5400 zo mu mashami atandukanye ya Kaminuza y'u Rwanda bikazatwarwa asaga miliyoni 97 Frw.

Umuyobozi Mukuru wa Kaminuza y’u Rwanda Prof Kayihura Muganga Didas yagaragaje ko ahavuye asbestos bahita bahasana

Inyubako nyinshi zubakwa muri Kaminuza y’u Rwanda ntizirangwaho asbestos

Babitangaje mu gikorwa cy'imirukabikorwa ry'iminsi itatu ryatangiye ku wa 07 kugeza ku wa 09 Gicurasi 2024, aho abagera kuri 70 baryitabiriye biganjemo abamurika ibikomoka ku buhinzi n'ubworozi.

Umuyobozi w'Ihuriro ry'abafatanyabikorwa JADF-Isangano mu Karere ka Ngororero, Padiri Rutakisha Jean Paul, yavuze ko umwaka ushize wa 2023, abafatanyabikorwa binjije mu Karere ka Ngororero miliyari 15Frw , ayo yose akaba arimo n'afasha Akarere mu kurandura igwingira ry'abana.

Ati' Igwingira n'imirire mibi si ikibazo tutashobora kurandura kuko ibyo kurya byo birahari, birasaba gusa kwigisha ababyeyi uburyo bwo gutegura indyo yuzuye. Ngororero irera, hari imboga, amagi, amafi n'ibindi byinshi bikomoka ku buhinzi. Tuzakomeza kwigisha abaturage guhindura imyumvire turandure burundu igwingira mu bana.'

Umuyobozi w'Akarere ka Ngororero, Nkusi Christophe, yavuze ko imurikabikorwa rifasha abaturage kugaragarizwa ibibakorerwa, kandi bagasabwa uruhare rwabo mu iterambere ry'Akarere.

Yavuze ko uruhare rw'abafatanyabikorwa mu kurwanya imirire mibi rwivugira haba mu gutanga amatungo magufi n'amaremare, ibiti byera imbuto ziribwa no kwigishwa imitegurire y'amafunguro ku bana bafite ibibazo n'ibindi.

Yavuze ko kubera ubwo bufatanye Akarere ka Ngororero kamanutse mu mibare y'abana bafite ikibazo cy'imirere mibi, kava kuri 50.5%, muri 2021, kagera kuri 47% muri 2022, naho umwaka wa 2023, kari gasigaranye abana 27% bafite imirire mibi, bivuze ko muri rusange kagabanyije igwingira cyane mu myaka ibiri gusa.

Yagize ati' Turi kugenda tumanuka, kandi byose biva ku nkunga ya Leta tugenerwa by'umwihariko mu guhangana n'igwingira, hakiyongeraho abafatanyabikorwa badufasha kurwanya igwingira mu bana bacu.'

Abaturage bitabiriye imurikabikorwa bavuga ko hari byinshi bahigiye birimo gutegura indyo yuzuye, kwisuzumisha indwara zitandura no kwihugura mu buhinzi bugezweho, no kumenya amakuru y'aho bakura imbuto nziza.

Mawanda Anastase wo mu Murenge wa Bwira yavuze ko iwabo nta mbuto zibanguriye bagiraga, yishimira kuba nabo bagiye kubona ibiti byera imbuto ziribwa.

Ati' Nk'ubu twebwe iwacu mu Murenge wa Bwira, ntabwo tugira ibiti by'imyembe bibanguriye. Gusa nungutse amakuru ko natwe bagiye kuzabitugezaho, abana bacu bakazabona imbuto tukarushaho kurwanya imirire mibi.'

Mugenzi we witwa Muhimpundu Anathalie ati' Jyewe nungutse inama mu buhinzi, nabonye igitoki kinini cy'umuhinzi wahawe amahugurwa yo kuvugurura urutoki urumva ko nanjye ngiye guhinga neza nkiteza imbere.'

Mu bindi bindi bizakomeza wkibandwaho mu rugamba rwo kurwanya igwingira, harimo kugariza abaturage ngo barusheho kugira ubumenyi mu kunoza ubuhinzi n'ubworozi hagamijwe kurwanya imiririe mibi n'igwingira mu bana harimo, ubworozi bw'amafi n'inkoko, no kuhira uturima tw'igikoni kugira ngo mu be by'izuba tugiye kujyamo imboga ntizikabure.

Abaturage bungukiye byinshi mu imurikabikorwa, kuko hari na serivisi z’ubuzima zari zabegerejwe baganaga bagafashwa

Abaturage basobanuriwe uko babona ibiti byera imbuto ziribwa

Umunyambanga uhoraho w’Intara y’Iburengerazuba Uwimpuhwe Florence, yashimiye uko abafatanyabikorwa bamurikiye abaturage ibibakorerwa

Padiri Rutakisha Jean Paul, uyobora JADF Ngororero, yavuze ko abafatanyabikorwa bagiye kurushaho kurwanya imirire mibi mu bana

Meya wa Ngororero, Nkusi Christophe, yavuze ko abafatanyabikorwa bafasha abaturage gusobanukirwa n’uko barwanya imirire mibi,bakanagaragara mu bikorwa byo kubona amafunguro akwiye

Abayobozi bitabiriye imurikabikorwa

Gitifu wa Ngamba atanga ikaze.

Rayon Sports yagaruye ikiganiro gitambukamo amakuru avuga kuri iyi kipe kizwi nka ‘Rayon Time’ cyari kimaze imyaka 4 cyarahagaze.

Muri Mata 2020, ni bwo iki kiganiro cyatambukaga kuri Radio Isango Star cyahagaze, bitewe n’uko imikino mu Rwanda yari yarahagaze kubera icyorezo cya COVID-19.

Ku bufutanye n’umuterankunga w’iyi kipe, Skol bamaze gufata umwanzuro wo kugarura iki kiganiro, kikaba kizatangira ku wa Mbere w’icyumweru gitaha tariki ya 13 Gicurasi 2024.

Nta cyahindutse n’ubundi kizongera kijye gitambuka kuri Radio Isango Star guhera saa 10h00′-11h00′.

Amakuru ISIMBI yamenye ni uko iki kiganiro kizajya gikorwa n’abanyamakuru babiri bayobowe na Ngabo Roben usanzwe ari umuvugizi wa Rayon Sports ndetse na Mihigo Sadam usanzwe ari umunyamakuru w’imikino ku Isango Star.

Muri iki kiganiro, kizajya kivugirwamo amakuru avugwa muri Rayon Sports y’abagabo n’abagore ndetse n’indi mishinga iyi kipe ifite mu rwego rwo kwiteza imbere.

#RayonTimeIsBack

Igihe cyo kumva amakuru avuye ku isoko azira gusesereza ahubwo asesengurwa n’impuguke cyageze!!!

Guhera kuwa Mbere tariki 13 Gicurasi 2024, uzajya ukurikirana 'RAYON TIME' guhera 10h00 kugera 11h00 kuri Radio @isangostar

Turi #Gikundiro pic.twitter.com/FihnOgW5Vs

— Rayon Sports Official (@rayon_sports) May 10, 2024

Rutahizamu wa Rayon Sports y’abagore, Mukandayisenga Jeannine benshi bakunda kwita Kaboy, yavuze ko ikintu cyamubabaje mu buzima ari uburyo nyina yafunzwe azira ubusa, umuryango we ukavuga ko ari we wamufungishije kuko bamufashe arimo amushakira ibyangombwa.

Mukandayisenga Jeannine yavutse tariki ya 2 Kamena 2004, avukira mu Ntara y’Iburasirazuba mu Karere ka Nyagatare. Avuka mu muryango w’abana 9 umwe akaba yaritabye Imana, basigaye ari abahungu 2 n’abakobwa 6. Ababyeyi bombi aracyabafite.

Mu kiganiro yagiranye n’ikinyamakuru ISIMBI, Kaboy yavuze ko we n’abavandimwe be batigeze babura ibibatunga kuko ababyeyi ba bo ari abahinzi borzoi, bababoneraga ibyo bashaka byose.

Ubwo yari ageze mu wa Kabiri w’amashuri yisumbuye yahise ayahagarika kuko ikipe yakiniraga y’Inyemera WFC, yabishyuriraga amafaranga y’ishuri yababwiye ko ubushobozi ntabwo itagishoboye kubarihirira ishuri.

Ati 'Njye kuko nari nzi gukina baravuze ngo ninjya mu rugo andi makipe azamfata anyishyurire, ni ko guhita bajya kunyishyurira imyuga. Nize ibijyanye no gukora imisatsi n’inzara.'

Yakunze umupira w’amaguru ubwo yari akiri umwana, akina mu muhanda akinana n’abahungu, yagize amahirwe ababyeyi be ntibabimubujije ahubwo bamusabaga kubanza gukora imirimo ye kare mbere yo kujya gukina.

Inyemera WFC yayigezemo muri 2022 ayikinira imyaka 2, ari nabwo Rayon Sports yahitaga iza kumuganiriza, ibintu yishimiye kuko ari ikipe yakundaga cyane.

Ati 'byahise bintera imbaraga kuko nari ngiye kujya mu ikipe nakuze nkunda, numvaga ko ngomba gukora cyane n’aho nkitwara neza tugashimisha abakunzi ba Rayon Sports.'

Yakomeje avuga ko ari ibintu byiza kuba yarabashije kwegukana ibikombe bibiri mu mwaka umwe, akanaba rutahizamu watsinze ibitego byinshi.

Ati 'ni ibintu byiza kuba ku mwaka wa mbere naratwaye ibikombe 2, shampiyona n’icy’Amahoro kandi ari byo bikombe bikinirwa mu Rwanda, nkabitwara kandi twarahuye n’andi makipe, navuga ko ari ibintu byiza cyane.'

Avugako intego ze mu mupira w’amaguru ari ukujya gukina hanze y’u Rwanda, akabikora nk’uwabigize umwuga bikaba byamufasha gutera imbere ndetse akaba yanateza imbere umuryango we.

Uyu rutahizamu, bahimbye Kaboy umuntu agenekereje mu kinyarwanda ni Gahungu, yavuze ko ari izina yakuye i Gicumbi aho yakiniraga Inyemera, byabanje kumubabaza ariko nyuma arabyakira.

Ati 'Iryo zina ryaturutse i Gumbi aho nakinaga, abakinyi twakinanaga ni bo babashije kurinyita kuko buri mukinnyi bitewe n’uko akina, imyitwarire ye cyangwa imiterere ye, bamwita akazina babona nyine kagendanye na we, rero barebye imiterere yanjye n’imikinire yanjye babona ndi Kaboy.'

'Nabanje kubabuza, nkababwira ngo nitwa Jeannine, nitwa Jeannine ariko barambwira ngo buri mukinnyi hano aba afite izina twamwise, narabyakiriye numva ko aho nzajya hose bazajya barinyita. Nta pfunwe bintera kubera ko ari izina ry’akabyiniriro, ubasha kurinyita nditaba n’unyise amazina yanjye nditaba.'

Yavuze ko ajya ahura n’abantu bamuca intege bamubwira ko ntaho azagera, rimwe bakamubwira ko bazamwirukana kuko ari umuhungu.

Ati 'Barahari, na n’ubu ndumva bagihari, gusa abo mba numva bashaka kunca intege mbagendera kure, nkareba abangira inama nzima, mu buzima ntabwo abaguca intege babura. Bamwe baba bambwira ngo ntuzagera kure, abandi ngo wowe uri umuhungu tuzakwirukana muri shamiyona, ariko na none ni abafana ntabwo wakita ku byo bavuga.'

Mu bwana bwe abana bagenzi be bakundaga kumuserereza ko ari umuhungu, gusa ntabwo yarwanaga na bo ahubwo yabagenderaga kure. Gusa ngo byaberaga hanze ariko yagera mu rugo akigira nk’aho ntacyabaye kuko atari no kubibwira ababyeyi be.

Ku ngingo yo kuba afite umukunzi, yavuze ko nta we ndetse nta n’uwo yigeze agira, gusa ngo arabiteganya nubwo atari vuba.

Ati 'Oya ntabwo nigeze nkundanaho. Muri iyi minsi ntabwo mbiteganya kuko ndacyarimo gushakisha ubuzima, ibyo bizaza nyuma.'

Agaruka ku musore w’inzozi ze, yagize ati 'Ni umusore mwiza, ushyitse ukunda ubuzima bwose kandi udakunda kwishyura hejuri, ukunda kwiyoroshya ahantu hose, wubaha.'

Yahishuye ko niyo yaboneka aka kanya atiteguye kujya mu rukundo kuko hari ibyo atarakora. Ati 'Biragoye kuko ubu mpugiye ku kazi kanjye, mpugiye ku hazaza hanjie.'

Kimwe mu bintu yakubitewe cyane akiri umwana, ni ukuzerera yagiye kureba umupira, yakundaga kujya kureba imikino ya Rayon Sports.

Yavuze ko ikintu cyamubabaje cyane mu buzima ari uburyo mama we yafunzwe azira ubusa kubera umuntu wamubeshyeye maze n’abo mu muryango we bakavuga ko ari we wamufungishije.

Ati 'hari akabazo kabayeho ariko batubeshyera, bajya bavuga ngo ntawuburana n’umuhamba, baje kutubeshyera bitewe n’ukuntu imiryango yo mu rugo twimereye, mama bashaka kumufata ngo bamufunge, mama aravuga ngo reka njye ahantu batambona kuko ntiyari kuburana n’umuntu umuyoboye, papa ari we uburana cyangwa uwo mwana wundi abe ari we uburana nzaza birangiye.'

'Ngiye kujya mu Inyemera, basaba ibyangombwa, indangamuntu kugira ngo bankorere icyangombwa kandi papa ntabwo yari mu rugo ngo yabimfashamo, mama yaremeye ava aho ari araza ngo aje kubimfashamo, tukigera ahantu mu buyobozi ku Kagari bamufatira aho baramutwara, kuva uwo munsi abantu bo mu muryango baravugaga ngo ninjye wamutanze, ngo ninjye ubiteye bikambabaza cyane.'

Ngo mama we afunguwe yatunguwe no gusanga yarakomeje gukina umupira kuko atumvaga ko yawukomeje aho yakekaga ko yahise abireka kubera bari bafunze nyina, ngo byaramushimishije cyane ndetse aterwa ishema aho umwana we ageze.

Ikintu kimushimisha mu buzima bwe ni uko agifite ababyeyi be bombi kandi bamushyigikira mu kazi ke ka buri munsi, bagaterwa ishema n’ibyo akora.

Yari afite intego yo kuba mu gihe atabashije gukina umupira w’amaguru ko yari kuba umusirikare akagira uruhare mu kurinda ubusugire bw’igihugu cye.

Kaboy avuga ko yamaze kwakira iri zina bamuhimba

Ashengurwa no kuba mama we yarafunzwe arengana n’umuryango we ukamushinja kumufungisha

Ni umukinnyi ufite intumbero zo kugera kure kandi akagera kuri byinshi abikesha ruhago

Rayon Sports nk’ikipe yakuze afana, yishimiye cyane kuba ayikinira

Ni rutahizamu ugora abakinnyi ba buri kipe bahuye

'Gukangisha gusakaza amafoto y'urukozasoni' ni kimwe mu byaha biri kwigaragaza cyane muri iki gihe! Ndetse, kuri uyu wa Kane tariki 9 Gicurasi 2024, Urwego rw’Igihugu rw’Ubugenzacyaha (RIB) rwataye muri yombi batandatu bakurikiranywehi gusakaza amafoto n’amashusho by’urukozasoni.

Bamwe muri bo Dosiye zabo zamaze gushyikirizwa ubushinjacyaha! Abatawe muri yombi ni Mukamana Francine w'imyaka 24, akaba akoresha shene ya YouTube izwi nka Fanny TV 250 na Iradukunda Themistocles uzwi nka T. Bless w'imyaka 27, akagira shene ya YouTube izwi nka Kigali Magazine.

Hafunzwe kandi Gasore Pacifique uzwi nka 'Yaka Mwana' w'imyaka 38, Uwase Natasha w'imyaka 20, Uwimana Jeannette uzwi nka Gaju w'imyaka 20 ndetse na Mugwaneza Christian w'imyaka 26, akaba afata amashusho anyuzwa kuri za shene ya YouTube. Abafashwe bafungiye kuri Sitasiyo ya RIB ya Nyamirambo.

Hari uwigeze gusaba amafoto y'ubwambure bwawe, byarangiye gute?

Umuvugizi w'Urwego rw'Igihugu rw'Ubugenzacyaha (RIB), Dr Murangira B. Thierry, avuga ko muri iki gihe hari kwaduka cyane icyaha cyo ‘gukangisha gushyira amafoto y’ubwambure bw’umuntu cyangwa se asambana akagira ibyo amutegeka’.

Mu mategeko byitwa ‘gukangisha gusebanya’ cyangwa se ‘Blackmail’. Abandi babizi nka 'Sextortion' aha hakoreshwa amafoto y’umuntu yambaye ubusa cyangwa se asambana, agakangishwa ko ashyirwa hanze mu gihe atemeye ibyo asabwa.

Dr. Murangira Thierry avuga ko iki cyaha cyinganje cyane mu rubyiruko ariko ‘bigenda bigaragara no mu bakuze. Ati “Ni ugufatirana umuntu mu ntege nke ukumukangisha kumusebya bashyira hanze amafoto ye yambaye ubusa cyangwa se asambana. Impamvu mvuga asambana ntabwo ibyo bintu biba hagati y’abantu bashakanye, biba hagati y’abantu nyine badafitanye isezerano, basambana.”

Dr.Murangira yavuze ko hari igihe umwe afata icyemezo cyo gusakaza amafoto n’amashusho ya mugenzi we agamije kumwihimuraho cyangwa se akabikora agamije kugira icyo amusaba cyane cyane amafaranga.

Ubwo yari mu kiganiro na Kiss Fm, Murangira yifashishije urugero rw’umusore w’i Kigali ushobora kuba akundana n’umukobwa wo mu muhanga akajya anyuzamo akamwoherereza amafoto n’amashusho y’ubwambure bwe, igihe cyagera akamwanga, maze umukobwa agahagurukira kumusebya.

Bishobora kugera aho uwo mukobwa asaba umusore ko basubirana cyangwa se atabyemera akamuteguza ko ashyira hanze amafoto n’amashusho yamuhaye agaragaza ubwambure.

Dr.Murangira yavuze ko ibi ari bimwe mu byaha bakira muri RIB, kandi imibare igenda izamuka. Yavuze ko mu myaka itanu ishize (kuva mu 2019 kugeza mu 2023) bamaze kwakira ibirego/Dosiye 46.

Mu 2019 bakiriye ibirego 3, mu 2020 bakiriye ibirego 8, mu 2021 bakiriye ibirego 12, mu 2022 bakiriye ibirego 8 naho mu 2023 15. Ati “Ibyo byose ni ibijyanye n’amafoto (Ibyaha). Ni ukuvuga ngo ni wa muntu wakundanaga na Kanaka akajya amukangisha ibyo ngibyo.”

Ameyeri mu gukangisha gushyira hanze amafoto y'urukozasoni

Murangira Thierry yavuze ko mu byo babonye ari uko ufite amafoto y’urukozasoni akangisha mugenzi we kuyashyira hanze, akamusaba ko amuha amafaranga menshi kugirango atabikora.

Anabusaba ko bakongera gusubukura umubano kugirango bakomeze gukora ibikorwa by’ubusambanyi cyangwa se akamusaba ko amuha andi mafoto, cyangwa se akamusaba ko hari ikindi kintu akora mu rwego rwo kurengera ko ibye bitajya hanze.

Ku mbuga nkoranyambaga bitangira gute?

Dr.Murangira avuga ko bitangira umuntu agukurikira nko kuri Instagram, ubundi agatangira kukwandikira akubwira ko yakunze amafoto yawe, agamije ku kwereka ko ibintu ukora hari abantu babyemera. 

Ngo hariho n’utangira kukubwira ko ibintu ukora mwabibyaza umusaruro, kandi agakora uko ashoboye akakubikamo icyizere. Ati “Iyo umaze kumwizera ko ari umuntu muvugana noneho usanga kenshi, hari uwo aba yamuteye imitoma bitewe n’iki n’ubuzima bwawe, aragenda akiga, akamenya ubuzima ubuyeho.”

Murangira avuga ko usanga ubuzima bwa benshi buri ku mbuga nkoranyambaga, kuko usanga hari umuntu wishima akandika ku mbuga nkoranyambaga ze, yarakara akandika, yaba agiye’ muri Restaurant akandika. Ati “Nta buzima bw’ibanga bukibaho muri iki gihe, sinzi icyabateye.”

Abantu batandatu barimo 'Yaka Mwana'[Uwa kabiri ivuye ibumoso] wamamaye ku mbuga nkoranyambaga bafunzwe bakurikiranyweho 'gukwirakwiza amashusho y'ibiterasoni'

Yavuze ko ushaka gutsindira icyizere cy’umuntu akoresha amagambo aryoheye amatwi kugeza ubwo n’iyo agusabye ifoto igaragaza ubwambure bwawe ari ibintu wumva cyane.

Avuga ko uretse kuba ibi bintu biba hagati y’abantu bahuzwa n’irari ry’umubiri, binagaragara cyane hagati y’abantu bakundana. Ati “Ngo ndagukumbuye nyoherereza ifoto akayimwoherereza koko! Ngo nyoherereza ifoto yawe ugiye kuryama wambaye uko ujya wambara ugiye kuryama, undi nawe akayimwoherereza. Aho ngaho aba amaze ku kurangiza.”

Dr.Murangira yavuze ko uretse abantu bashobora guhura imbona nkubone, ibi byaha binagera ku bantu bavugana cyangwa se bakundana bari kure.

Yavuze ko bijya bibaho ko abantu bashobora guhura bagiye gusambana”, umwe muri bo yateguye icyumba kirimo Camera, ku buryo ibibera muri icyo cyumba byose abifata. Nyuma akazabikoresha mu gukanga mugenzi we.

Ubyitwaramo gute iyo ukangishijwe amafoto y’ubwambure bwawe!

Dr.Murangira yavuze ko ikosa rya mbere ari ukwemera ibyo wategetswe n’umuntu ugusaba kumuha amafaranga cyangwa se kongera gusubirana nawe kugirango adasakaza amafoto n’amashusho byawe.

Avuga ko igihe bigenze uko utagomba kwemera ibyo agutegeka. Ati “Niba ari amafaranga agusabye ntuyamuhaye. Niba agusabye ngo wongera umwoherereze andi mafoto ntubyemere.”

Akomeza avuga ko  irindi kosa rikorwa n’abantu benshi, ari uko bagaragaza ko batewe impungenge kandi bahangayikishijwe nuko amafoto yabo ashobora kujya hanze. Ati “Ibyo ngibyo ntugomba kubimwereka.”

Yavuze ko udakwiriye kwicira urubanza, kuko bituma ‘udatekereza cyane’. Avuga ko buri wese akwiye kwibuka ko ari ugukorerwa icyaha cyo gusebanya, akibuka ko arengana, kandi akibuka ko Urwego rw’Igihugu rw’Ubugenzacyaha ruhari.

Dr.Murangira yavuze ko abagenzacyaha ba RIB barahiriye kurinda ibanga, bityo ntawe ukwiriye kudatanga ikirego yumva ko ibye bizamenyakana.

Yavuze ko hari abanga gutanga ikirego kuri RIB, ugasanga bahisemo gukomeza gutanga amafaranga kugirango amafoto n’amashusho byabo bitajya hanze. Avuga ko hari abatanze ibihumbi 20 by’amadorali kugirango amafoto yabo atajya hanze.

Dr.Murangira yavuze ko ibi byaha bihanwa hagati y’imyaka 1 n’imyaka 5, ndetse hakiyongeraho n’amande ari hagati ya Miliyoni 1 na Miliyoni 2 Frw.

Muri Gashyantare 2024, Intebe y'Inteko y'Umuco, Ambasaderi Robert Masozera, yabwiye KT ko mu rwego rwo gukomeza gukumira ibi byaha, Inteko y'Umuco ikomeje ubukangurambaga cyane cyane mu rubyiruko.

Ati 'Inteko y'Umuco ikora ubukangurambaga bwo kudatakaza umuco n'indangagagaciro zawo mu rubyiruko n'abakuze. Mu rubyiruko hakorwa ibikorwa bitandukanye byaba iby'ubuhanzi bigamije gusesengura no gucengerwa n'indangagaciro z'umuco w'u Rwanda, amarushanwa mu mashuri ku muco, umurage n'indangagaciro n'ibindi.'

Akomeza ati'Abakora ibyo bikorwa baba bateshutse ku ndangagaciro n'imyifatire myiza biranga abantu batuye Igihugu cyacu. Indangagaciro y'ubupfura idutoza imyitwarire myiza nk'ubwangamugayo, ubudahemuka, kwiyubaha no kubaha abandi, kwicisha bugufi, kuba umwizerwa n'umunyakuri.

Icyo amategeko avuga kuri iki cyaha

Itegeko No 60/2018 ryo ku wa 22/8/2018 ryerekeye gukumira no guhana ibyaha bikoreshejwe ikoranabuhanga.

Ingingo ya 34 ivuga ko gushyira ahagaragara amashusho yerekeranye n'imikoreshereze y'ibitsina, hakoreshejwe mudasobwa cyangwa urusobe rwa mudasobwa, aba akoze icyaha.

Umuntu wese, iyo atangaje cyangwa atumye hatangazwa amashusho cyangwa amajwi yerekeranye n'imikoreshereze y'ibitsina, binyuze ku rusobe rwa mudasobwa cyangwa ubundi buryo bw'ikoranabuhanga n'itumanaho; usaba, utoza cyangwa uhamagarira umwana, abinyujije muri mudasobwa cyangwa urusobe rwa mudasobwa cyangwa umuyoboro uwo ari wo wose, hagamijwe kumukoresha imibonano mpuzabitsina, aba akoze icyaha.

Iyo abihamijwe n'Urukiko, ahanishwa igifungo kitari munsi y'imyaka itatu ariko kitarenze imyaka itanu, n'ihazabu y'Amafaranga y'u Rwanda atari munsi ya 1,000,000 ariko atarenze Miliyoni 3.000.000Frw.

Ingingo ya 38 ivuga ko umuntu wese, utangaza, wohereza cyangwa utuma hatangazwa ubutumwa ubwo ari bwo bwose bw'urukozasoni akoresheje mudasobwa, cyangwa urusobe rwa mudasobwa, aba akoze icyaha. Iyo abihamijwe n'urukiko, ahanishwa igifungo kitari munsi y'amezi atandatu ariko kitarenze imyaka ibiri, n'ihazabu y'Amafaranga y'u Rwanda atari munsi ya 2,000,0000Frw.

Iyo ubutumwa bw'urukozasoni buvugwa mu gika cya mbere cy'iyi ngingo budahuye n'ukuri cyangwa bureba umwana, uwahamwe n'icyaha ahanishwa igifungo kitari munsi y'imyaka itatu ariko kitarenze imyaka itanu, n'ihazabu y'Amafaranga y'u Rwanda atari munsi ya 1,000,000Frw, ariko atarenze 3,000.0000Frw.

Umuvugizi w'Urwego rw'Igihugu rw'Ubugenzacyaha (RIB) Dr Murangira B. Thierry yavuze ko nta muntu ukwiye kwemera gutanga amafaranga cyangwa ikindi kintu nk'ingurane yo kugirango amafoto/amashusho y'ubwambure bwe adasakazwa

Nyuma yo gutangirana ikipe z’abahungu bakiri bato, irerero rya PSG mu Rwanda rigiye kwitabira imikino y’igikombe cy’Isi gihuza amarerero y’iyi kipe ku Isi rifite ikipe y’abakobwa.

Kuri uyu wa 5 tariki 10 Gicurasi, ni bwo irerero ry’ikipe ya Paris Saint Germain mu Rwanda riribwurire indege berekeza mu gihugu cy’u Bufaransa, mu irushanwa ry’igikombe cy’Isi gihuza amarerero y’iyi kipe aho ari hose ku Isi.

Kuri iyi nshuro, u Rwanda rugiye gutwara amakipe 3 arimo ikipe y’abahungu batarengeje imyaka 11 abahungu batarengeje imyaka 13 ndetse n’abakobwa batarengeje imyaka 15. Iri rushanwa rizatangira tariki 11 risozwe tariki 16 Gicurasi, rikazabera mu Bufaransa nk’ibisanzwe.

Umwaka ushize ubwo u Rwanda rwari rwitabiriye iri rushanwa ku nshuro ya kabiri, rwegukanye ibikombe 2 mu batarengeje imyaka 11 ndetse na 13.

Amatsinda amakipe y’u Rwanda yisanzemo

Mu batarengeje imyaka 13, u Rwanda ruri mu itsinda C aho ruri kumwe na Misiri, Kuwait, Karea na UAE. Mu batarengeje imyaka 11, u Rwanda ruri nabwo mu itsinda C aho ruri kumwe n’u Bufaransa, UAE ndetse n’a Amerika y’Iburasirazuba. 

Mu bakobwa batarengeje imyaka 15 ni itsinda rimwe ririmo u Rwanda, Antilles, Brazil, Canada, u Bufaransa, Amerika y’Iburasirazuba ndetse n’iy’Iburengerazuba.

Aba bana bakunze kwitwara neza muri iyi mikino by’umwihariko mu mwaka ushize kuko begukanye ibikombe 2 

Kuwa Kabiri no kuwa Gatatu w’iki Cyumweru ni bwo hakinwaga imikino yo kwishyura ya 1/2 cya UEFA Champions League kugira ngo hamenyekane amakipe akomeza ku mukino wa nyuma.

Byarangiye ikipe ya Borussia Dortmund igeze ku mukino wa nyuma isezereye Paris Saint-Germain nyuma yo kuyitsinda igitego 1-0 mu mukino ubanza wabereye mu Budage no mu wo kwishyura wabereye mu Bufaransa bikagenda gutyo.

Indi kipe yageze ku mukino wa nyuma ni Real Madrid nyuma yuko mu mukino ubanza wabereye mu Budage inganyije na FC Bayern Munich ibitego 2-2 ariko mu wo kwishyura ikayitsindira mu rugo kuri Santiago Bernabeu ibitego 2-1.

Bivuze ko taliki ya mbere z’ukwezi gutaha ubwo hazaba hakinwa umukino wa nyuma wa UEFA Champions League kuri Wembley Stadium mu Bwongereza ari Real Madrid na Borussia Dortmund zizaba zirwanira igikombe.

Borussia Dortmund yo mu Budage mu gihe yakwegukana igikombe yahabwa Miliyari 25 z’amafaranga y’u Rwanda basanzwe baha ikipe yacyegukanye, ariko no mu gihe itanacyegukana yahabwa Miliyari 6 z’amafaranga y’u Rwanda na Real Madrid kubera umukinnyi wayo yabagurishije ari we Jude Bellingham.

Ubwo uyu mukinnyi yagurwaga mu masezerano bagiranye harimo ko naramuka abafashije kwegukana igikombe cya UEFA Champions League, Borussia Dortmund izahabwa izi miliyari 6 Frw.

Harimo kandi ko naramuka agiye mu ikipe y’umwaka ya Champions League nabwo izahabwa Miliyari 2 ndetse no kuba yarabafashihe kwegukana igikombe cya shampiyona no kubona itike yo gukina Champions League mu mwaka utaha nabyo hari amafaranga bizatangirwa.

Jude Bellingham wagiye muri Real Madrid aguzwe Miliyoni 88 z’Amayero mu mpeshyi y’umwaka ushize, kuri ubu amaze gutsinda ibitego 18 muri shampiyona na 4 muri UEFA Champions League.

Mu gihe Real Madrid yatsinda Borussia Dortmund ku mukino wa nyuma wa UEFA Champions League, Florentino Perez arasabwa kuzayiha Miliyari 6 z’amafaranga y’u Rwanda 

Jude Bellingham naramuka afashije Real Madrid kwegukana igikombe cya UEFA Champions League bizatuma na Borussia Dortmund yavuyemo igira icyo ibona

Real Madrid izacakirana na Borussia Dortmund ku mukino wa nyuma