Category: Uncategorized

Iri rushanwa ryateguwe na iDebate Rwanda riterwa inkunga na BK Foundation.

Aba banyeshuri ba Stella Matutina begukanye igihembo cy'ibihumbi 900 Frw, aho uko ari batatu babigabanye buri umwe ahabwa ibihumbi 300Frw.

Bakurikiwe na bagenzi babo bane biga muri College Saint Marie Reine de Kabgayi begukanye igihembo cy'ibihumbi 450Frw.

Aya Marushanwa yitabiriwe n'ibigo by'amashuri yisumbuye icyenda, birimo Stella Matutina, Lycée Notre-Dame de Cîteaux, College Saint Marie Reine de Kabgayi, Riviera High School, Maranyundo Girls School, Agahozo Shaloom, Glory Academy, Kagarama Secondary School ndetse na Hope Haven.

Ni amarushanwa agamije gutegura no gufasha abakiri bato by'umwihariko abanyeshuri bo mu mashuri yisumbuye kugira ubumenyi ku micungire y'ifaranga no guhanga umurimo, bityo bagategurwa hakiri kare banatozwa kuba abayobozi beza b'ejo b'igihugu cyacu.

Umuyobozi Ushinzwe Ibikorwa muri iDebate Rwanda, Keza Ketsia, yagaragaje ko ayo marushanwa yateguwe hibandwa mu kubaka ubumenyi bufasha urubyiruko, by'umwihariko urwo mumashuri yisumbuye gusobanukirwa n'imicungire y'ifaranga ndetse no guhanga umurimo.

Abanyeshuri bo muri Stella Matutina bari bafite umushinga wo gutunganya ibisigazwa by'ibisheke byafatwaga nk'imyanda bakayibyaza umusaruro bakuramo ibikoresho bitandukanye bya purasitike zitangiza ibidukikije (Biodegradable Plastics).

Umwamikazi Aristarline wiga muri Stella Matituna, yagaragaje ko ayo marushanwa abasigiye byinshi ku bumenyi bushingiye ku mari kandi ko n'umushinga bagaragaje biteguye gukomeza kuwushyira mu bikorwa ugatanga umusaruro ku gihugu.

Umuyobozi Mukura wa BK Group Plc, Beata Habyarimana, yagaragaje ko urubyiruko rukeneye kugira ubumenyi ku bijyanye n'imari hakiri kare.

Ati 'Urubyiruko rufite ibitekerezo bitandukanye, rufite kwitegereza ibikenewe ku buryo twaje gusanga ari ngombwa kubashyigikira ngo bagaragaze ubumenyi bwabo. Aya marushanwa atuma bagaragaza ubushobozi bwabo kandi tukamenya aho tugomba guhera tubafasha mu kumenya ibijyanye n'imari.'

Yakomeje avuga ko 'Twaje gusanga ko duciye muri BK Foundation nk'ikigo cya BK Group giharanira imibereho myiza y'abaturage, ndetse dushingiye ku bunararibonye ndetse n'ibyo duhura nabyo buri munsi, ari igikorwa cy'indashikirwa gushyigikira abakiri bato by'umwihariko mu gusobanukirwa imicungire y'ifaranga no guhanga umurimo bikaba akarusho kubikora hakiri kare'

Usibye abanyeshuri begukanye iri rushanwa, ku mwanya wa mbere n'uwa kabiri, buri munyeshuri witabiriye ayo marushanwa yagenewe ishimwe ry'ibihumbi 50Frw, agomba kujya kuri konti ye yo kwizigamira muri Banki ya Kigali nko gutoza abakiri bato umuco wo kuzigama.

Itsinda ry’abo muri Stella Matutina nyuma yo gutsinda

Abanyeshuri bo muri Stella Matutina bishimiye intsinzi babonye

Abanyeshuri bo muri Saint Marie Reine de Kabgayi babaye aba kabiri

Abari bagize akanama nkemurampaka muri aya marushanwa bafashe ifoto hamwe na Beata Habyarimana uyobora BK Group

Abanyeshuri bo muri Lycée Notre-Dame de Cîteaux nyuma yo gusoza amarushanwa bafashe ifoto

Abanyeshuri bo muri Glory Academy ntibahiriwe

Abo muri Riviera High School ntibabashije kwegukana intsinzi

Kagarama Secondary School nayo yari ihagarariwe

Keza Ketsia yagaragaje ko kwigisha abato ibirebana n’amafaranga bituma barushaho kunguka ubumenyi

Umuyobozi Mukuru wa BK Group, Beata Habyarimana yagaragaje ko abato bakwiye kwigishwa ubumenyi mu bijyanye n’imari hakiri kare

Urubyiruko rwasabwe gukoresha ubumenyi rwahawe binyuze muri ayo marushanwa

Umuyobozi wa iDebate Rwanda, Jean Michel Habineza, yashimye ibigo by’amashuri byitabiriye aya marushanwa

Yvonne Makolo yabwiye Financial Times ko ibiganiro by'ubu bugure hagati ya RwandAir na Qatar Airways byari bimaze imyaka itanu, ariko yizeza ko bigiye kugera ku musozo.

Ati 'Bimaze igihe biba, tumaze imyaka igera kuri itanu tubiganiro, ariko ubu tugeze ku musozo.'

Makolo yakomeje avuga ko ishyirwa mu bikorwa ry'aya masezerano y'ubugure rizatangira gushyirwa mu bikorwa mu ntangiriro z'ukwezi kwa Nyakanga mu 2024.

Yavuze ko iyi gahunda izafasha RwandAir kwagura ibikorwa byayo, haba mu mubare w'indege itunze ndetse n'ibyerekezo ijyamo ndetse no kongerera ubumenyi abakozi bayo.

Bizafasha kandi Qatar Airways kongera umubare w'ingendo ikorera ku Mugabane wa Afurika.

Uyu muyobozi yatangaje ko Qatar Airways iri mu myiteguro ya nyuma yo gushora imari muri sosiyete ikorera mu karere ka Afurika y'amajyepfo, izuzuza ibikorwa bya RwandAir, hagamijwe gukomeza kuziba ibyuho muri iyi serivisi.

Umuyobozi Mukuru wa Qatar Airways, Badr Mohammed Al-Meer aherutse kuvuga ko 'RwandAir izadufasha kugeza abantu mu bindi bice bya Afurika, tubageze hirya no hino ku Isi. Turi mu myiteguro ya nyuma yo gushora muri sosiyete yo muri Afurika y'amajyepfo, izuzuza ibikorwa bya RwandAir nka sosiyete ihuza uburengerazuba, uburasirazuba n'amajyaruguru ya Afurika.'

Uyu mushinga wa Qatar Airways wo kugura imigabane muri RwandAir watangiye kuvugwa cyane muri Gashyantare mu 2020, ubwo Umuyobozi Mukuru wa Qatar Airways, Akbar Al Baker, yavugaga ko ibiganiro bigeze kure nubwo amasezerano atarasinywa.

Muri uwo mwaka Umuyobobozi Mukuru wa Qatar Airways yari yatangaje ko hamaze gusinywa amasezerano y'imikoranire igisigaye ari uko ayemeza igurwa ry'imigabane ashyirwaho umukono kandi ko nabyo bizarangira 'mbere y'uko icya kabiri cy'uyu mwaka kirangira'.

Mu 2022 impande zombi zavugaga ko mu minsi mike ubu bugure buzaba bwamaze gushyirwa mu bikorwa, kuko ibiganiro bigeze kure, hasesengurwa ibijyanye n'amategeko ndetse n'ibijyanye n'igishoro, amadeni n'imitungo hagamijwe kubaka ishoramari rirambye.

Uyu mwaka waje kurangira nta kindi gitangajwe kuri uyu mushinga ndetse bamwe batangira kwibaza icyaba cyarawudindije.

Ubwo yari mu Nteko Rusange ya 79 y'Ikigo Mpuzamahanga gishinzwe ingendo zo mu Kirere (IATA) yabereye i Istanbul muri Turikiya, Yvonne Makolo, yavuze ko uyu mushinga wagiye udindizwa n'impamvu zitandukanye zirimo icyorezo cya COVID-19 ndetse n'imyiteguro Qatar yahise ijyamo yo kwakira Igikombe cy'Isi cy'Umupira w'Amaguru.

Yvonne Makolo yatangaje ko ukwezi kwa Nyakanga mu 2024 kuzarangira Qatar Airways yegukanye imigabane 49% muri RwandAir

Ibi byagarutsweho ku wa 15 Kamena 2024, mu gikorwa cyo kwibuka ku nshuro ya 30 abari abakozi b'uruganda rw'icyayi rwa Mata.

Mu buhamya bwa Uramukiwe Jean Damascene ukomoka aha i Mata, yakomoje ku wari umuyobozi w'uruganda rw'icyayi rwa Mata witwaga Ndabarinze Juvenal waje kuruyobora avuye i Byumba, akagira uruhare muri Jenoside.

Uyu Ndabarinze yaje kuyobora uruganda ari kumwe n'itsinda ry'insoresore zamurindaga, gusa ngo iryo tsinda byarangiye rihindutse umutwe w'Interahamwe zikomeye zanatoje abandi aha i Mata bica benshi.

Uramukiwe yavuze uko abakozi b'uruganda bishe bagenzi b'Abatutsi bakanatanga inkunga y'ibikoresho mu kujya kwica n'ahandi.

Ati 'Abagereje guhungira i Kibeho na Karama (mu yahoze ari Perefegitura ya Butare) imodoka z'amakamyo na Daihatsu z'uruganda rwa Mata, izaturutse ku rwa Kitabi no ku rundi ruganda rwa Gisovu zaje zipakira Interahamwe zo hirya no hino zidusanga i Karama zirica, byose bitijwe umurindi n'ubuyobozi bw'uruganda rwa Mata.''

Perezida wa Ibuka mu Karere ka Nyaruguru, Habimana Syldio yavuze ko abayoboraga uru ruganda mu gihe cya Jenoside batije umurindi iyicwa ry'Abatutsi muri aka gace.

Ati 'Uru ruganda ni rwo rwatangaga imodoka zo gukwirakwiza abicanyi i Kibeho n'i Karama, ariko ikibabaje abenshi ntibaburanishijwe kuko bavaga kure; bakimara gukora jenoside baritahiye.''

Umuyobozi w'uruganda rw'icyayi rwa Mata, Barayagwiza Joseph, yavuze ko bakomeje kuziba icyuho cy'ubuyobozi bwabanje, binyuze mu kwigisha abakozi b'uruganda umuco w'amahoro cyane ko abagera kuri 60% muri bo ari urubyiruko.

Umuyobozi w'Akarere ka Nyaruguru, Dr Murwanashyaka Emmanuel, yavuze ko u Rwanda rwagize akaga n'idindira rikomeye mu majyambere aho abakabaye bakora ibyubaka bataye igihe mu nzangano no gusenya.

Yavuze uburyo ibikorwa by'uru ruganda byageraga mu mirenge mike gusa, ariko iby'ubwicanyi bikarenga bikagera no muri Huye, ibishimangira imbaraga nyinshi zashyizwe muri Jenoside.

Ati 'Twagize ibyago, aho abakoraga akazi bakaretse bahugira mu kubiba urwango,kwica ndetse bakica bagenzi babo. Ndasaba abayobozi bose gufata iya mbere mu kurwanya ikibi, bimakaza ubumwe, bigisha abo bayobora iby'iterambere gusa.''

Yakomeje asaba urubyiruko kongera imbaraga mu bikorwa by'iterambere no kurinda ibyagezweho.

Kugeza ubu, ku ruganda rw'icyayi rwa Mata hibukwa abari abakozi b'uruganda ndetse n'abahinzi barugemuriraga icyayi 381 bishwe muri Jenoside, hakaba hagishakishwa n'abandi.

Urwibutso rwa Jenoside rw’uruganda rw’icyayi rwa Mata, ruruhukiyemo abari abakozi barwo 381, mu gihe hagishakishwa indi mibiri itaraboneka ngo ishyingurwe mu cyubahiro

Bamwe mu bari baje kwibuka ababo bakoraga mu ruganda rw’icyayi rwa Mata

Perezida wa Ibuka mu Karere ka Nyaruguru, Habimana Syldio yerekanye uburyo uruganda rw'icyayi rwa Mata rwabaye umuterankunga ukomeye wa jenoside yakorewe henshi muri Nyaruguru no mu nkengero zaho

Umuyobozi Mukuru w’uruganda rw’icyayi rwa Mata, yavuze ko bashyize imbere kwigisha urubyiruko umuco w’amahoro cyane cyane ko mu bahakora 60% ari urubyiruko.

Meya wa Nyaruguru, Dr Murwanashyaka Emmanuel, yavuze ko u Rwanda rwagize akaga n'idindira rikomeye mu majyambere aho abakabaye bakora ibyubaka bataye igihe mu nzangano no gusenya, asaba abayobozi kwigisha ibyiza

Kuri ubu, uruganda rw’icyayi rwa Mata rufite abakozi basaga 7000, bakaba bose bagenerwa inyigisho z’amahoro no kubana neza kugira ngo bazibe icyuho cy’abahemutse muri Jenoside

Kuri iyi nshuro naho rworoje abarokotse batatu inka

Iyi nyubako yitwaga ‘cantine’, ngo ni yo yaberagamo inama zateguraga jenoside yahitanye benshi i Mata

Uramukiwe Jean Damascene watanze ubuhamya, yavuze ko ubu yongeye kwiyubaka abikesha guhinga icyayi, akaba akomeje urugendo rw’iterambere ndetse afite n’umugambi wo kugura imodoka

Uruganda rwa Mata rumaze kuremera abarokotse Jenoside inka zisaga 30 mu bihe bitandukanye mu rwego rwo kubafata mu mugongo

Aya madosiye yakozweho iperereza kuva mu 2019 kugeza mu 2024, amadosiye 35 yari ay'abatunze gerenade, andi 34 bari batunze amasasu, amadosiye 12 bari batunze ububiko bw'amasasu (magazine), na ho amadosiye 10 yerekeye abari bafite imbunda.

Umuvugizi wa RIB Dr Murangira B. Thierry ubwo yari mu kiganiro Dusangire Ijambo cya RBA, yagaragaje ko izo mbunda wasangaga ari izo bihambiriyeho 'ugasanga zimwe zishaje'

Ati 'Nk'abo baba bagitunze amasasu bakurikiranyweho ibyaha harimo ababa bagifite ya myumvire ngo yo gutunga isasu cyangwa se kurigendana bitanga ubwirinzi, iby'imyuka mibi […] hariho n'utambuka hariya wamusaka ugasanga afite isasu rimwe, wamubaza ngo iri sasu uritungiye iki? Ngo oya ni ubwirinzi mu by'imyuka mibi ngo nta myuka mibi yantera kuko mfite isasu, rivamo umuriro, ukumva ni imyumvire abantu bari bakwiye kureka bagasubiza izo ntwaro.'

RIB igaragaza ko intwaro ziboneka mu gihugu zifitanye isano n'urugamba rwo kubohora igihugu n'intambara y'abacengezi yakurikiyeho mu 1997 kugeza mu 2000.

Hari intwaro zirimo imbunda, amasanduku y'amasasu, gerenade n'imbunda ziganjemo AK 47 zitahurwa aho zitabye.

Umuvugizi wa Polisi y'u Rwanda, ACP Boniface Rutikanga yatangaje ko umuntu ugifite intwaro mu buryo butemewe n'amategeko n'uzi aho ziri yazimenyekanisha ku bushake, byaba ari ibiturika akamenyesha inzego z'umutekano zikaza kubihakura bitagize ubuzima bwangiza.

Yavuze ko iyo intwaro itanzwe ku bushake hakorwa iperereza hakarebwa niba iyo ntwaro nta byaha yakoreshejwe, byaba bihari bikaryozwa nyirayo.

Kuva mu 2019 kugeza mu 2024 nta cyaha cyifashishijwe intwaro nk'ubujura n'ubwicanyi byagaragaye mu Rwanda.

Umubare w'Abaturarwanda ugizwe n'abarenga 65,3% bari mu cyiciro cy'urubyiruko by'umwihariko abari munsi y'imyaka 30, benshi barubonamo icyizere cyo gukomeza intambwe y'iterambere igihugu kigezeho.

Ibi nibyo Umunyamabanga Mukuru w'Umuryango FPR-Inkotanyi, Gasamagera Wellars, ashingiraho agaragaza ko rukomeje gushyigikirwa rwageza igihugu ku iterambere.

Mu butumwa bwanyujijwe ku mbuga nkoranyambaga za FPR -Inkotanyi, yavuze ko 'urubyiruko rw'u Rwanda muri rusange rufite umusanzu ukomeye cyane mu iterambere ry'Igihugu. Icya mbere ni wa mubare munini wabo, dukwiye kuwushingiraho kugira ngo rurusheho koko gutanga wa musanzu.'

'Si ukugira umubare munini gusa, ni ukuwugira kandi ushoboye. Ubwo rero igice cy'Abanyarwanda tubatezeho byinshi, cyane cyane ubwabo kuko barabyumva […]. Izi mbaraga zose n'ubushobozi zikwiye gushyirwa imbere kandi bagira icyo bagezaho igihugu kurenza abakuru kuko turagenda tuvamo.'

Muri Mutarama uyu mwaka nibwo Minisiteri y'Urubyiruko n'Iterambere ry'Ubuhanzi yagaragaje ko yifuza ko mu guhangana n'ikibazo cy'ubushomeri, hakwiye kubaho imishinga iha umwanya urubyiruko binyuze muri za Minisiteri.

Mu gutegura urubyiruko kandi hashyirwa imbaraga mu kuzamura umubare w'abanyeshuri biga amashuri y'imyuga n'ubumenyingiro.

Binyuze muri izo gahunda zitandukanye zagenewe urubyiruko harimo no guhanga udushya, kuva mu 2018 hahanzwe imirimo 1.374.214.

Umunyamabanga Mukuru w'Umuryango FPR-Inkotanyi, Gasamagera Wellars, asanga urubyiruko rushyigikiwe rwashingirwaho iterambere ry’igihugu

Byagarutsweho ubwo uwo muryango wibukaga ku nshuro ya 30 Jenoside yakorewe Abatutsi ndetse bakanunamira abayizize bashyinguwe mu Rwibutso rwa Jenoside rwa Kigali.

Umuyobozi uhagarariye Rabagirana Ministries ku rwego rw'Igihugu, Mukunzi Louange yagaragaje ko amadini akwiye kwigisha abato amateka yagejeje kuri jenoside yakorewe Abatutsi ndetse bakajya banafashwa gusura inzibutso zibitse ayo mateka.

Ati 'Icyo nasaba amadini ni ukureba ku rubyiruko kuko ari rwo Rwanda rw'ejo. Ese bafite ayahe makuru? Babwirwe ukuri, basure inzibutso nk'uko twabikoze. Mu bikorwa byose by'igihugu dushyiremo urubyiruko.'

Yagaragaje ko ari ngombwa gusura inzibutso abantu bakamenya amakuru y'ukuri atandukanye n'ibyo babwirwa mu miryango n'abashaka kugoreka amateka nkana.

Ati 'Icyo tuba dushaka ni ukumenya ukuri, kuko abantu bagiye babwirwa amateka mu makuru arimo ibikomere noneho bakabogama. Iyo baje hano barasobanukirwa bakabasha kumva amakuru y'ukuri kw'amateka y'u Rwanda kandi n'umwanya wo kwereka rwa rubyiruko ayo mateka mu buryo bugaragara.'

Ku bijyanye no gufasha abarokotse Jenoside yakorewe Abatutsi n'abatishoboye muri rusange, uyu muryango wasabye ko amadini n'amatorero yajya abikora mu buryo burambye hitabwa cyane ku gukemura ikibazo burundu.

Ati 'Ni ukongera gutekereza ku mishinga yaba mito cyangwa minini ishobora gufasha abo bantu kwiteza imbere. Ni ukureba uburyo bwiza bwo gufasha burambye. Aho kugurira umuntu umufuka w'umuceri, watangiza uburyo bwo kumufasha kuba yakiga ubudozi cyangwa gukora inkweto. Icyo dusaba ni uburyo bwiza bwo gufasha mu buryo burambye.'

Kugeza ubu binyuze mu matsinda y'ubumwe n'ubwiyunge yashyizweho na Rabagirana Ministries, abaturage babasha kwibonera ibikenerwa by'ibanze batarinze gutega amaboko.

Umwe mu batuye mu mudugudu w'ubumwe wa Rusheshe wo mu Murenge wa Masaka, Uwamahoro Francine, yagaragaje ko mbere yabagaho mu bwigunge ariko nyuma yo gutera intambwe yo kwinjira muri ayo matsinda yungutse byinshi.

Ati 'Nabonye ari umuryango mwiza waduhuje, turaganira bakatuganiriza gukundana, kubana neza kandi tugira n'ibikorwa by'iterambere kuko ubu tugira ibyo twigezaho.'

Umurerwa Claudine na we yavuze ko Jenoside yakorewe Abatutsi yasize bafite imitima yuzuye ibikomere ariko nyuma yo kujya mu nyigisho z'isanamitima byogenye kumwomora ibyo bikomere.

Ati 'Njyewe nafashijwe n'isomo ryo kubabarira. Ukababarira uwakwiciye ntabwo byari byoroshye ariko twize ayo masomo birancengera cyane mpita mbona agaciro ko kubabarira uwaguhemukiye.'

Niyikiza Jean Pierre yagaragaje ko nk'urubyiruko bakeneye kumenya amateka kurushaho kugira ngo babashe guhangana n'abagihakana bakanapfobya Jenoside yakorewe Abatutsi.

Rabagirana yasabye abakuru kujya baganiriza abana bato ku mateka

Ubwo bashyiraga indabo ku mva rusange

Abagize amatsinda yubumwe n’ubwiyunge ya Rabagirana Ministries bibutse abazize jenoside yakorewe Abatutsi