Category: Uncategorized

Ibirori byo kwizihiza #Kwibohora30 byabaye kuri uyu wa Kane tariki 4 Nyakanga 2024, muri Sitade Amahoro ivuguruye yakira abarenga ibihumbi 45.

Ni ibirori byitabiriwe n'abanyarwanda mu ngeri zinyuranye cyane cyane urubyiruko, ibyamamare n'abandi banyuranye bihereye ijisho akarasisi k'Ingabo z'u Rwanda ndetse na Polisi y’u Rwanda.

Mu ijambo rye, Perezida Kagame yavuze ko u Rwanda ruri mu mahoro kandi ko ruzaguma mu mahoro uko byagenda kose.

Umukuru w'Igihugu yavuze ko Guverinoma y'Ubumwe yubatse Leta ikorera bose nta vangura ndetse na 'politike ntigikoreshwa nk'igikoresho cyo guheza bamwe cyangwa kugirirana nabi'.

Perezida Kagame yabwiye urubyiruko ko ari bo bafite inshingano yo kugena ahazaza h'u Rwanda, ababwira gufata inshingano yo kugiteza imbere.

Yagize ati: 'Abakiri bato, cyane cyane abavutse mu myaka 30 ishize na mbere yayo ho gato, iki gihugu ni icyanyu ngo mukirinde, mugiteze imbere. Twe twatangiye ibyo mu myaka 30 ishize, twizeye mwebwe ikiragano cyo kwibohora ngo mutwakire…. mukomerezeho politike nziza twubatse.'

Urugamba rwo kubohora Igihugu rwaranzwe n'ubwitange bw'Ingabo zari iza RPA, uruhare rw'abanyarwanda bari mu mahanga, imbere mu gihugu n'ahandi kugeza ubwo Ingabo zibashije gutsinda urugamba.

Mu rugendo rw'urugamba, Ingabo za RPA zagiye zihimba indirimbo zabafashije mu kwishakamo 'Morale', ndetse amatorero nk'Isamaza, Indahemuka n'abandi babarizwaga mu Bubiligi bahimba indirimbo zabaye iz'ibihe byose.

Masamba ni umwe mu bahanzi bakoresheje inganzo mu rugamba rwo kubohora Igihugu. Yaririmbiye ahantu hatandukanye mu bitaramo zigata izazo, binjiza amafaranga atabarika harimo n'ibitaramo yafatanyaga n'Itorero Indahemuka. Buri wese yitangaga uko yari yifite, utari ufite amafaranga yatangaga inka n'ibindi.

Uyu muhanzi yakoreye igitaramo i Lugogo muri Kampala n'ahandi. Amafaranga yakoreraga mu gitaramo yahitaga ajya mu isanduku y'Ingabo zari iza RPA, akifashishwa ku rugamba, ku buryo nta mafaranga na macye yasigaranaga.

Mu nshingano yari afite harimo gukora ibyo bitaramo bizana amafaranga, ariko akanigisha abakiri bato Umuco no kuwusigasira, byanatumye agirwa Umutoza mu Itorero ry'Igihugu, Urukerereza.

Masamba yagiye ku rugamba kugira ngo afatanye n'abandi 'Gushaka Igihugu'. Byaturutse ku buzima bw'iheza yari abayemo mu Burundi, nk'ukuntu Abanyeshuri b'Abarundi bakoraga ikizamini cya Leta cy'amashuri ku manota 45% ariko Abanyamahanga barimo n'Abanyarwanda bagakorera ku manota 80%.

Binoyengeraho ku kuba yaragiye yibutswa n'Abarundi ko n’ubwo ari umusitari mu gihugu cyabo, ariko ari Umunyarwanda.

InyaRwanda yakoze urutonde rw'indirimbo 10 zumvikanamo ubutumwa bukomeye, zahaye 'Morale' ingabo zari iza RPA ubwo zari ku rugamba.

Indirimbo ni nyinshi zakozwe mu gihe cyo kubohora urugamba, ariko twahisemo indirimbo 10, ndetse hagarukwa ku butumwa bukubiyemo.

1. Demokarasi

Iyi ndirimbo yahimbwe n'Indahemuka, bavugaga ko abanyarwanda bagomba kuba umwe. Ko inkotanyi zizira umuze zigira intego na gahunda ihamye zanga umwanda zihorana umucyo.

Ko zitivuruguta mu bibi. Ni indirimbo yari iyo gukundisha abanyarwanda Inkotanyi; no kumva ko Demokarasi igomba kwimirizwa imbere.

Bati 'Reka twiririmbire Demokarasi. U Rwanda ni urwacu ntawe utuburanya agatsinda turi bene mugabo umwe.'

'Inzira ni ubumwe ibindi byose byaza ejo ikindi ni ukuri, kuko iyo ubeshye umara inka. Twijukire ibyo twasinyiraga Arusha hato tutazarimba nk’umwe w’inkoko kandi ururimo inda ntirukirimbanwa.'

KANDA HANO UBASHE KUMVA INDIRIMBO ‘DEMOKARASI’ Y’ITORERO INDAHEMUKA

    

2.Inzovu

Iyi ndirimbo ni iy'itorero Indahemuka. Gusa irazimije kumenya impamvu iyo nzovu, intare yayibonye ubundi abahungu bakayigota yabura aho ica bakayifata.

Umuhanzi Cyusa Ibrahim yabwiye InyaRwanda ko atekereza ko inzovu bavugaga ari umwanzi ufite ibikoresho n'ubuhangange ariko ko byarangiye afashwe.

Iyi ndirimbo isoza bahumuriza abanyarwanda bati 'Yemwe bana muhumure ntidusenya turubaka; turi bene mugabo umwe. Bivuga ko twese turi umwe.' 

KANDA HANO UBASHE KUMVA INDIRIMBO ‘INZOVU’

3. Fourteen

Iyi ndirimbo yahimbwe n'Inkotanyi bivuga ibigwi ko babise ingegera bakanabita inyangarwanda ariko babakubise umuriro babona ko bikomeye basaba imishyikirano.

Baririmba bavuga ko Ingabo za RPA zinjiye mu Rwanda zinyuze i Gatuna, Kagitumba, bati ‘ku Murindi turahata’. Bavuga ko bamaze gufata Kanombe, bobohoye Kigali.

Banagaruka ku duce turimo Gisenyi, Kibuye n’ahandi bari bari mu birindiro biteguye urugamba. Iyi ndirimbo mu myaka ine ishize yasubiwemo n’umuhanzi Massamba Intore. 

KANDA HANO WUMVE INDIRIMBO ‘FOURTEEN’

4. Dushengurukanye isheja

Iyi ndirimbo yahimbwe n'Itorero Indahemuka. Yavugaga yirata ibigwi n'intsinzi by'inkotanyi. Aho yavugaga iti 'Twarwaniye amahoro none turayatsindiye, muze tuyature hano iwacu i Rwanda.' Bavuga aho bagiye batsindira gutyo gutyo.

KANDA HANO WUMVE INDIRIMBO ‘DUSHENGURUKANYE ISHEJA’

5. Iya mbere Ukwakira (Iya 1 Ukwakira)

Iyi ndirimbo yahimbwe n'Inkotanyi bavuga ko iyo tariki ari bwo binjiye. Ubwo binjiye ingabo za Mouvoma (Ubwo bavugaga ingabo za kera) ko zababonye zigahunga; Habyarimana agahamagaza amahanga bakaza nabo bakabatsinda.

Muri rusange ni indirimbo yo kwirata ubutwari. Hari aho baririmba bati ‘Iya mbere Ukwakira ku wa 90, twarose inzozi nziza ko tugiye kwambuka, mu gitondo cya mbere twari dusesekaye ntawadukomeye imbere, oye Nkotanyi.

Bavugamo uduce bari bamaze gufata nka Ruhengeri, Kagitumba, Umutara, Gatuna, i Burunga n’ahandi. 

KANDA HANO WUMVE INDIRIMBO ‘IYA 1 UKWAKIRA’ MASSAMBA INTORE YASUBIYEMO

6. Girubuntu

Iyi ndirimbo 'Girubuntu' yahimbwe na Karigirwa Jeanne. Hari abavuga ko hafi 90% by'indirimbo z'Itorero Indahemuka zahimbwe na Karigirwa Jeanne.

Abandi bakavuga ko hafi 90% by'indirimbo z'Itorero Isamaza, zahimbwe na Nyiranyamibwa Suzane afatanyije na Karigirwa Jeanne.

Isamaza ryari Itorero rinini cyane mu Bubiligi bateraga inkunga Inkotanyi ku rugamba.

Mu ndirimbo 'Girubuntu', Isamaza bayihimbye kugira ngo basabe abantu kwitanga bababwira ko bagomba kwitangira urugamba.

Bati “Dore Rwigema yaritanze na Bayingana bajyana na Bunyenyezi”. Bati 'Ndabasanze imfura z'u Rwanda baritanze'.

Muri rusange yahimbwe hagamijwe gukusanya inkunga yo gufasha Inkotanyi zari ku rugamba. 

KANDA HANO UBASHE KUMVA INDIRIMBO ‘GIRUBUNTU’ Y’ITORERO ISAMAZA

7. Intsinzi

Iyi ndirimbo yahimbwe na Mariya Yohana ayihimba mbere y'uko Ingabo zari iza RPA zitsinda urugamba, ariko biyumvagamo intsinzi.

Gusa yifashishije 'melodie' (Ururirimbo) y'indirimbo ya gisirikare yo hambere. Ivuga ngo singe na matalala singee; singe na matalala singe. gusa yaririmbaga avuga ko abona intsinzi ahantu hose; yaraguza umutwe; yabaza Imana hose akahabona intsinzi.

Mariya Yohana yigeze kuvuga ku mvano y'iyi ndirimbo agira ati 'Indirimbo 'Intsinzi' nayihimbye ubwo abana bacu bajyaga ku rugamba, ngira ngo nibayumva ijye ibatera imbaraga bakomeze umurego aho barwanirira igihugu.

Ni byo koko bararwanye kandi baratsinda, ndetse naje kumenya ko hari n'Abanyarwanda bayumviraga hirya no hino aho bari bihishe bumvaga bagiye gutabarwa. Ubu barishima iyo bongeye kuyumva kuko bibuka ibihe bitoroshye banyuzemo n'uko batabawe.'

Iyi ndirimbo yifashishijwe cyane mu gihe cyo gukusanya inkunga yo gufasha ababaga bari ku rugamba, abababaye n'abandi. Yacuranzwe cyane mu kwishimira intsinzi ya Perezida Paul Kagame mu matora. 

KANDA HANO WUMVE INDIRIMBO ‘INTSINZI’ Y’UMUHANZIKAZI MARIYA YOHANA

8. RPF Turatashye

Yahimbwe n'Inkotanyi. Bavuga ko imyaka imaze igihe barabujijwe gutaha barabahejeje ishyanga.

Kandi ko umuzungu ari we wabibyemo Abanyarwanda amacakubiri abereka ko badahuje inkomoko, ko bamwe bavuye muri Tchad, abandi muri Ethiopia.

Inkotanyi zaririmbye ko ziteguye guhashya uwo wababujije gutaha, ko bashaka gukorera igihugu, bose hamwe ari umwe.

Iyi ndirimbo iherutse gusubirwamo n'umuhanzi Cyusa Ibrahim. Iri mu ndirimbo 14 yakubiye kuri Album ye ya mbere yise 'Muvumwamata'.

Cyusa aherutse kubwira InyaRwanda ati 'Iyi ndirimbo yibutsa abanyarwanda icyabatanyije, kikaba cyarabaviriyemo ikibi bitewe n'umuzungu. Nkayikundira ko igaragaza ukwibohora kwa nyako, igasoza ivuga ko tugomba twese kunga ubumwe nk'abanyarwanda.' 

KANDA HANO UREBE AMASHUSHO Y’INDIRIMBO ‘RPF TURATASHYE’ YASUBIWEMO NA CYUSA IBRAHIM

9.Indege Irahinda

Iyi ndirimbo yahimbwe n'Itorero Isamaza, yavugaga ko bagiye kuza gutabara igihugu; babwira abahungu bitegure bakere urugendo.

Ababyebyi babyaye bambarire impumbya, ubundi babahe impundu abo baje gutabara; babwira abasigaye ko n'ubwo batagiye ku rugamba nibura babahe impamba ibaherekeza ku rugamba.

Iyi ndirimbo 'Indege Irahinda' yahimbwe na Nyiranyamibwa Suzanne. Uyu mubyeyi arazwi cyane kandi mu ndirimbo nka 'Ese mbaze', ''Ndavunyisha', 'Nkumbuye iwacu', 'Nimuberwe bakobwa', 'Ituze', 'Telefone' n'izindi. 

KANDA HANO WUMVE INDIRIMBO ‘INDEGE IRAHINDA’ Y’ITORERO ISAMAZA

10.Turaje

Iyi ndirimbo yahimbwe n'itsinda ryabaga mu Bubiligi ririmo Nyiranyamibwa Suzane. Uyu muririmbyi waboneye izuba benshi, mu Ukuboza 2016 ni bwo yagarutse gutura mu Rwanda nyuma y'imyaka 40 yari ishize atuye mu Bubiligi.

Muri iyi ndirimbo 'Turaje', babwira abanyarwanda ko baje n'ibihumbi harimo ababyeyi, abasaza, abasore, abana, ko baje gutabara igihugu. 

KANDA HANO WUMVE INDIRIMBO ‘TURAJE’ Y’ITORERO ISAMAZA YAMAMAYE CYANE

Mu kwizihiza #Kwibohora30, Perezida Kagame yavuze ko agaciro kari mu banyarwanda ntawakabambura

Byari ibirori bikomeye kuri uyu wa Kane muri Stade Amahoro mu kwizihiza #Kwibohora30

Umutoza Ntirenganya Jean de Dieu wazamuye abakinnyi nka Manishimwe Djabel, Ruboneka Bosco n’abandi yitabye Imana azize uburwayi.

Ntirenganya yari amaze igihe arwaye aho yarwariye mu bitaro bya Kiziguro, avayo ajyanwa i Rwinkwavu, yitabye Imana ku mugoroba w’ejo hashize ku wa Kane tariki ya 4 Nyakanga 2024.

Ntirenganya Jean de Dieu wazamuye abakinnyi benshi, yari amaze iminsi arwaye Diyabeti ndetse n’Umuvuduko w’amaraso.

Uyu mutoza wari ufite irerero Kiramuruzi ryazamukiyemo abakinnyi benshi nka Ndayishimiye Celstin wakinnye igikombe cy’Isi cy’abatarengeje imyaka 17 muri 2011, yazamuye kandi abakinnyi nka Manishimwe Djabel wakiniye Rayon Sports na APR FC, Ruboneka Bosco ukinira APR FC, Uwizeye Djafar wakiniye amakipe nka Espoir FC na Gorilla FC, Hoziana Kennedy n’abandi.

Ntirenganya Jean de Dieu yitabye Imana

Manishimwe Djabel yazamukiye mu maboko ye

Na Ruboneka Bosco yazamukiye kwa Ntirenganya

Umuhanzi nyarwanda Kenny Sol yanze kuripfana maze avuga ko Producer Prince Kiiiz ari umuhanga ariko na none Element ari ntagereranywa.

Abinyujije kuri Instagram ye, Kenny Sol yasabye abakunzi be kumubaza ibibazo bashaka na we akabasubiza.

Umwe mu bakunzi be yamubajije ati “Prince Kiiz cyangwa Element? Kuri wowe ninde urenze undi.”

Keny Sol yavuze ko bose ari abahanzi beza ariko na none Producer Element atagereranywa amurenze.

Ati “Bose ni abahanga ariko Element ntabwo agereranywa.”

Uretse kuba Kenny Sol na Element bose babarizwa mu nzu imwe itunganya umuziki ya 1:55AM, kuva na mbere barakoranaga, indirimbo nyinshi za Kenny Sol ni Element wazikoze harimo na ‘Haso’ yakoze akiri muri Country Records yatumbagije izina ry’uyu muhanzi cyane.

Mu ntagiriro za 2023 ni bwo aba ba-producer bafatwa nk’abambere mu gihugu mu bijyanye no gutunganya indirimbo mu buryo bw’amajwi babisikanye, Element yaratunguranye atandukana na Country Records yamushyize ku itara yerekeza muri 1:55AM yari ivuyemo Prince Kiiiz wahise ujya kumusimbura Country Records.

Prince Kiiiz ni umwe mu batunganya indirimbo bagezweho mu Rwanda

Element yakoze indirimbo nyinshi kandi zakunzwe

Kenny Sol yavuze ko Element atagereranywa

Mu 1993 ikinyamakuru Kangura cyari icya Ngeze Hassan wari umuhezanguni wamunzwe n'ingengabitekerezo yo kwanga Abatutsi, muri No 46/93 yacyo hasohotsemo inyandiko ifite umutwe ugira uti 'Depite Rucagu yaratwandikiye.'

Iyi nyandiko ituka Abatutsi n'inkotanyi yakunze gukwirakwizwa ku mbuga nkoranyambaga, abantu bibaza uko Rucagu Boniface bazi mu buyobozi nyuma y'uko Jenoside yakorewe Abatutsi ihagarikwa yanditse iyo baruwa.

Gusa mu minsi ishize Minisitiri w'Ubumwe bw'Abanyarwanda n'Inshingano Mboneragihugu, Dr. Jean Damascène Bizimana yasomeye mu ruhame ibaruwa ifunguye Rucagu yanditse abeshyuza iyo nyandiko ya Kangura.

Ibaruwa ya Rucagu nditswe ku wa 21 Nyakanga, 1993 igenewe abasomyi ba Kangura, yari ikurikiye ikirego Depite Rucagu yari yarashyikirije ubutabera.

Hari aho Rugagu yanditse ati 'Ari mu baturage navutsemo, narerewemo, ntuyemo, ari mu baturage nategetse mu mpande zose z'igihugu ari mu baturage bose ba Ruhengeri bantora, sinigeze mvangura amoko n'uturere. Na none kandi ntabwo nasebya Inkotanyi kandi zarankoreye igikorwa zitigeze zikorera abandi. Icyo gikorwa ni uko zansubije imodoka nagenderagamo ubu nkaba nyifite. Ni nde wundi wakorewe bene icyo gikorwa? Nahera he nsebya Inkotanyi?'

Kuri uyu wa 3 Nyakanga 2024, umukambwe Rucagu Boniface abinyujije kuri konti ye ya X yashimiye Minisitiri Bizimana wakoze ubushakashatsi kugeza ubwo amuhanaguyeho igisebo.

Yagize ati 'Mpagurukijwe no gushimira Bwana Ministri w'Ubumwe bw'Anyarwanda n'Inshingano Mboneragihugu Dr Bizimana Jean Damascène kuba yarafashe umwanya wo kunkoraho ubushakashatsi kugira ngo amenye ukuri ku byahoraga bimvugwaho muri iyi myaka 30 ishize none akaba ankuyeho igisebo kuko yatahuye ukuri.'

Rucagu Boniface ahamya ko yatangiye kwitabira inama za L'UNAR za mbere mu 1959 ubwo yari afite imyaka 11, ndetse mu 1963 ahita yinjira mu butegetsi bwa Kayibanda Grégoire.

Mu 1973 ubwo Juvénal Habyarimana yahirikaga ubutegetsi bwa Kayibanda, Rucagu yari Sous-préfet wa Ruhengeri, nyuma aza kuba umudepite.

Yavuze ko muri icyo gihe cyose yabaye mu butegetsi atariye izo ngama yakoreye kuko abaziriye zabakuye amenyo abandi zikabahitana.

Rucagu Boniface yatangaje ko yishimiye kuba Minisitiri Bizimana yashyize ukuri ahagaragara kugakuraho igisebo yasizwe mu myaka 30 ishize

Bombi ubu ni abagore babarizwa mu Muryango Ndabaga ugizwe n'abagore ndetse n'abakobwa bagize uruhare mu kubohora Igihugu, Intore z'Umuryango FPR-Inkotanyi [Aba-Cadres], abasirikare bahoze ari aba RPA n'abahoze mu Ngabo zatsinzwe [EX-FAR].

Mu kiganiro bagiranye na IGIHE, Mukarugwiza na Mukantabana, bakomoje ku kuba baravukiye mu buhingiro kuko ababyeyi babo bari barameneshejwe mu 1959 ubwo hatwikwaga inzu z'Abatutsi bakanirukanwa mu gihugu.

Ibyo biri mu byabateye ishyaka ryo gufatanya na basaza babo bakabohora u Rwanda, kuko n'aho babaga mu mahanga batotezwaga ntibagire icyiza babonayo.

Mukarugwiza ati ''Natwe ubwacu twareba ubuzima bwo kuba mu buhunzi, n'ubwo twari twaravukiye mu mahanga ariko nta cyiza twahabonaga. N'ubundi twibutswaga iteka ko turi Abanyarwanda, ndetse bakabivuga mu mazina atari meza. […] ibyo rero byatumye ngira ishyaka ryo kurwanira igihugu, numva icyo nifuza kiruta byose ari uko naba mu gihugu cyanjye.''

Mukantabana we agira ati ''Buriya abantu bafite amateka anyuranye aho bahungiye, ariko icyo bahuriyeho ni uko nta gihugu cyakwemereraga ko uba umwenegihugu, wahoraga wibutswa ko uri Umunyarwanda. […] ababyeyi bacu ntabwo bigeze batakaza icyizere n'ubwo bumvaga ko bazacyurwa na Loni ntibikunde, bumvaga ko imbaraga z'abana babo ndetse na bo zishobora kuzabasubiza mu gihugu cyabo.''

Ubuzima bwari bugoye mu ntangiriro

Tariki ya 1 Ukwakira 1990, ingabo za RPA zatangiye urugamba rwo kubohora u Rwanda. Aline Mukantabana akomoza ku bihe yibuka byabateye kumva bihebye bari ku rugamba.

Ati ''Nka 1991 igitangira ntabwo byari byoroshye. Nakwibuka nk'abo twari kumwe hafi y'Akagera, wabonaga rwose umuntu apfuye ukumva nawe urihebye, ariko bikaguha n'imbaraga zo gukomeza. Ariko ibyo bihe byarabaye. Nyuma Afande amaze kuza (Paul Kagame) […] nibwo wabonye nk'aho ubuzima bugarutse.''

Yongeyeho ati “Bwaragarutse twese arongera aratwegeranya, bigitangira byasaga nk'aho bigiye kunanirana. Hamaze gupfa Intwari zimwe, ba Rwigema bamaze gupfa, wabonaga dusa nk'abatatanye. Ariko amaze kuza (Paul Kagame) turongera turasubirana, aratuyobora kandi birakunda.”

Nk'abakobwa, Urugamba ntirwari rworoshye

Betty Mukarugwiza na Aline Mukantabana bakomoje ku kuba mu rugamba rwo kubohora u Rwanda no guhagarika Jenoside yakorewe Abatutsi mu 1994, hari imbogamizi bagize z'umwihariko w'uko bari abakobwa, ariko ko batigeze bazigira urwitwazo ngo batererane basaza babo.

Aline Mukantabana ati ''N'ubuzima rero bw'umwihariko ku mukobwa ntabwo bwari bworoshye. Uri bujye mu mihango uzabigenza ute? […] ubuzima ntabwo bwari butworoheye! Icyo twakwibuka rero, ni uko mu mbogamizi zose twahuraga na zo nk'abakobwa, twabaga dufite umutima wo gukomeza kurwanira igihugu na basaza bacu.''

Betty Mukarugwiza we ati ''Mu by'ukuri murabizi ko abakobwa bagira umwihariko wabo mu miterere, ndetse hakabaho igiye bagira ibihe byo kuba ubundi bakwitabwaho mu buryo bw'umwihariko […] Ndabyibuka byarangoye cyane bwa mbere, nkibaza uko nakwifata, nkibaza n'uburyo umuntu aba arimo ababara, ariko ntabwo byigeze binca intege.''

Bagiye ku rugamba batararangiza kwiga

Mukarugwiza na Aline Mukantabana, bakomoje ku kuba baragiye ku rugamba bakiri bato ku buryo bacikirije amashuri, ariko bagashimira Leta y'Ubumwe bw'Abanyarwanda yabahaye umwanya na nyuma yo kubohora igihugu, bagakomeza inshingano zo kucyubaka ariko bakajya no gukomeza amashuri yabo.

Nyuma y'urugamba, Mukarugwiza yakomeje inshingano ze ari umusirikare, ariko ajya no kwiga ku buryo ubu afite Impamyabumenyi y'Icyiciro cya Kabiri cya Kaminuza (Bachelor's Degree) muri 'Logistics and transport management'.

Aline Mukantabana na we nyuma yaje gukora muri Minisiteri y'Uburinganire n'Iterambere ry'Umuryango (MIGEPROF), akora mu Mujyi wa Kigali, nyuma asubira kwiga muri Afurika y'Epfo imyaka ine, ahakura Impamyabumenyi y'Icyiciro cya Gatatu cya kaminuza (Masters degree) mu bijyanye n'Uburinganire n'Iterambere. Nyuma agarutse yabaye Umuyobozi ushinzwe Imiyoborere Myiza mu Ntara y'Uburasirazuba.

Mukantabana ayobora uruganda rudoda impuzankano za RDF

Aline Mukantabana avuga ko nyuma y'izo nshingano zose, atahagaritse ibikorwa byo kubaka u Rwanda ndetse ubu akaba ari Umuyobozi w'Uruganda 'Vision Garment', rudoda impuzankano y'inzego z'umutekano zose mu Rwanda zirimo iz' Ingabo z'u Rwanda (RDF), Abapolisi b'u Rwanda (RNP), n'Urwego rw'u Rwanda rushinzwe Igorora, RCS.

Ati ''Ubu rero ndacyari umukozi, ndi Umuyobozi w'Uruganda rwitwa 'Vision Garment' rukora imyenda y'abasirikare, inzego zose z'umutekano. Ndetse no muri ibi bihe byo kwiyamamaza hari ibyo twakoze byo kwambika Abanyarwanda.''

Igihugu ni wo mutima wacu

Mukarugwiza na Aline Mukantabana banakomoje ku kuba impamvu ziri mu zabateye kujya ku rugamba rwo kubohora u Rwanda ari uko ari rwo mutima wabo, basaba urubyiruko rwa none kutazatesha agaciro ibyagezweho, ahubwo ko na rwo rukwiye gushyira u Rwanda ku mutima rugakora ibikorwa byo kuruteza imbere.

Mukarugwiza “Ntabwo twahagarikiye aho ngo twabohoje igihugu gusa ngo birarangiye, tugomba no guhora iteka ryose turwanirira ko gitera imbere […] nabwira rero urubyiruko, ikintu cya mbere ni uko bamenya ko igihugu ari wo mutima wacu. Umutima wacu ni igihugu cyacu, kuko ni cyo kitugize kugira ngo tube abo turi bo.”

Aline Mukantabana na we ati “Niba twarabishoboye turi bato, kandi tuva hanze y'igihugu tudafite tutanazi, nta kuntu uwakivukiyemo atakomeza gusigasira ibyagezweho.”

Kuri ubu u Rwanda rwizihiza isabukuru y'imyaka 30 yo kwibohora kandi, Betty Mukarugwiza na Aline Mukantabana bibukije urubyiruko guhagurukira kujya mu nzego z'umutekano nk'igisirikare, kugira ngo batangire none bubaka uburyo bazasimbura ababohoye u Rwanda barimo abageze mu za bukuru.

Banashishikarije abakobwa by'umwihariko kwitabira kuko na bo babishobora, kuko n'iyo urebye umubare w'abagerageza kujya muri izo nzego usanga abakobwa bakiri bake ugereranyije na basaza babo.

Major (Rtd) Betty Mukarugwiza wahoze mu Ngabo za RPA yibukije urubyiruko rw’u Rwanda ko igihugu kigomba kuba umutima wabo

Mukantabana ni Umuyobozi w’Uruganda rukora impuzankano zirimo iz’Igisirikare cy’u Rwanda

Umuyobozi uhagarariye ibikorwa muri Carousel Ltd ifite mu nshingano Inzozi Lotto, Kaka Patrick yatangaje ko nyuma y'ubusabe bw'abakiriya bayo bazanye umukino mushya witwa 5-90.

Yagize ati 'Dufite undi mukino mushya witwa 5-90 aho hatsinda imibare itanu ugakinwa buri minota ine. Ukina atoranya imibare itanu ashaka hagati ya 5-90 iyo yahisemo hatsindamo ibiri, itatu cyangwa itanu agahembwa.'

Kaka yakomeje avuga ko Inzozi Lotto iteganya kuzana application izafasha abakiriya bayo gukina mu buryo bworoshye batiriwe bajya ku maduka cyangwa ku ba-agent.

Ati 'Dufite application turimo turategura izasangwamo imikino isanzwe ndetse n'indi utabona ku mashami cyangwa ku rubuga rwacu. Mu ntangiriro za Kanama izaba yagiye hanze rwose.'

Uwumunezero Karebo uheruka gutsindira miliyoni mu Igitego Lotto yatangaje ko yishimiye intsinzi kandi ko ayo mafaranga azamufasha gukomeza kwiteza imbere.

Ati 'Amafaranga natsindiye agiye kumbyarira andi menshi kandi azagenda anyungukira umunsi ku munsi. Icyo nabwira abantu ni uko bakwizera ko igihe cyawe kizagera nawe agatsinda.'

Abantu basaga 1135 bamaze gutsindira miliyoni itangwa buri munsi mu Inzozi Lotto.

Kugeza ubu kandi Inzozi Lotto ifite amaduka 12 mu gihugu hose ikaba iteganya gufungura andi i Nyagatare, Rusizi na Ngororero.

Kugeza ubu Inzozi Lotto ifite imikino icyenda itandukanye, irimo Impamo JackPot, Quick Lotto, Karaga, Watatu na Igitego Lotto.

By'umwihariko mu Igitego Lotto, ushobora gutsindira miliyoni 1 Frw itangwa buri munsi kuva ku wa Mbere kugeza ku wa Gatandatu.

Umushinga wa Inzozi Lotto washyizweho hagamijwe kwegeranya ubushobozi bwo guteza imbere siporo mu Rwanda. Mu mafaranga yakinwe, miliyari zirenga 2,6 Frw amaze gutangwa nk'ibihembo utabariyemo moto na telefoni, mu gihe cy'imyaka ibiri umaze utangiye mu Rwanda.

Buri wese wujuje imyaka 18 no hejuru yayo ashobora gukina anyuze ku ba-agents bari hirya no hino ku mihanda cyangwa agakoresha telefoni akanda *240#.

Umuyobozi uhagarariye ibikorwa muri Carousel Ltd ifite mu nshingano Inzozi Lotto, Kaka Patrick yatangaje ko bagiye kumurika applications ndetse no kwagura amashami

Uwumunezero Karebo uheruka gutsindira miliyoni mu Igitego Lotto yatangaje ko izamufasha kwiteza imbere

Sheikh Harerimana yavuze ko kuba u Rwanda rufite uwo mutekano 'Si uko abashaka ko twumva iryo sasu badahari, barahari ahubwo hari imbaraga zituma batinya ntibatinyuke gutuma turyumva', izo zikaba zituruka ku miyoborere myiza ishyira umuturage ku isonga.

Ubwo yari mu Kiganiro Waramutse Rwanda cya RBA, yatanze urugero rw'abo mu myaka ishize bashatse guhungabanya u Rwanda banyuze muri Parike ya Nyungwe bakica abantu ndetse ibikoresho byinshi bikangizwa, icyakora na bo bahabwa isomo.

Ati 'Ariko se ibyo barabikomeje? Ubundi se abo bantu baratashye? Baraje abenshi barahagwa ndetse abandi bari mu nkiko.'

Ygarutse ku mateka yamuranze ubwo yayoboraga Intara y'Iburasirazuba mu myaka ishize, icyo gihe ubukene bukaba bwaranumaga hirya no hino mu gihugu. Yagaragaje ko ubu ibintu byahindutse.

Nk'ubu Karongi y'ubu icumbikiye hoteli zigezweho zirimo Cleo Lake Kivu Hotel, Moriah Hill Resort, Kivu Lodge Hotel, Bethany Hotel, Golf Eden Rock Hotel, Delta Resort Hotel, Rwiza Village Resort, Home Saint Jean n'izindi.

Nko mu myaka irindwi ishize hasanwe ndetse hagurwa umuhanda wa Rubengera—Rambura ufite kilometero 15. Ibyo kandi byakozwe ku muhanda wo mu Mujyi wa Karongi ufite kilometero ebyiri.

Hubatswe imihanda ishamikiye ku minini hagamijwe koroshya ubucuruzi mu Karere ka Karongi, ibikorwa byatwaye ingengo y'imari irenga miliyari 4,7 Frw.

Ingo zifite amashanyarazi zikubye gatanu ziva ku 12.321 mu 2017 zigera ku 64.737 mu 2023 n'ibindi byinshi.

Sheikh Harerimana ati 'Iyo urebye Karongi y'icyo gihe n'iy'uyu munsi hoteli ziri kubakwa umunsi ku wundi, bituma tuvuga ko uku ari ko kwibohora kuzuye 100%.'

Uretse iterambere rya Karongi, uyu muyobozi w'Ishyaka Ntangarugero muri Demokarasi, PDI yanagarutse ku ry'agace ka Nyamirambo cyane cyane ahazwi nko mu Biryogo.

Yavuze uburyo mbere ya Jenoside yakorewe Abatutsi abaho bari bariyakiriye bumva ko ibintu nk'iby'ubuyobozi n'ibindi biteza imbere igihugu bitabarebaga.

Impamvu ni uko abo muri iki gice cyari gituwe n'Abayisilamu benshi bafatwaga nk'abanyamahanga bigizwemo uruhare n'ubutegetsi bwariho, bagafatwa nk'abatagira uruhare mu iterambere ry'igihugu.

Ati 'Badushyira aho. Nta mirimo muri Leta, nta mirimo mu gisirikare nta mashuri. Kwari ugukora akazi k'ubukanishi kari aho bisanzwe.'

Muri icyo gihe kandi Sheikh Harerimana yavuze ko habaga ikintu cy'imikwabu, ha handi 'Wabyukaga ugiye gusenga ugasanga inzu yagoswe bari kwinjira mu nzu ngo hari Inyenzi bahishemo. Ukazizwa ko wanateguye neza iwawe, ukabikubitirwa.'

Uyu munsi inkuru yarahindutse imihanda myinshi i Nyamirambo yarubatswe, inzu nyinshi zirazamurwa, ibindi bikorwaremezo biravugururwa, byose bigizwemo uruhare na Perezida Paul Kagame.

Ati 'Ubu twisanze mu buyobozi. Abantu baravugurura bijyanye n'icyizere bafite n'ubuyobozi bukabafasha kuko biriya by'amarangi ntabwo ari abaturage babitekereje. Umujyi wa Kigali warabegereye ku mpanuro z'Umukuru w'Igihugu. Ubu usanga abanyamahanga bahatembera.'

Sheikh Harerimana yavuze ko ibyo byose n'umutekano uhamye byagizwemo uruhare n'ubuyobozi bwakuyeho ubw'igitugu ndetse bigakorwa himakazwa imikorere ica akarengane, imirimo igakorerwa ku gihe, vuba kandi neza, bigashyira no gutegura ejo hazaza.

Perezida w’Ishyaka Ntangarugero muri Demokarasi, PDI, Sheikh Mussa Fazil Harerimana yagaragaje ko kuba u Rwanda rutaraswaho atari impuhwe z’abahora bashaka guhungabanya umutekano warwo