Category: Uncategorized

Ubwo The Ben aheruka gukorera igitaramo muri BK Arena, byari mu bihe bitoroshye ihangana rikomeye, hagati y'uyu muhanzi n'uwitwa Coach Gael.

Icyo gihe yari yatumiwe muri 'Rwanda Rebirth Celebration Concert', nyamara ariko mu minsi ya nyuma cyegereje hateguwe ibindi birori n'ibitaramo mu bice bitandukanye bya Kigali.

Amakuru ahari kimwe n'ibyabereye mu Burundi abahanganye na we bakaba bari bagamije kumuhombya, uyu muhanzi n'abateguraga iki gitaramo byabasabye kwiga amayeri atandukanye.Yanatumye inkoni zari nyinshi barimo bakubitwa zitabarwaza nubwo bitari bukunde ko yisanga wenyine mu nyubako ariko umubare wari kuba uri hasi.

Kuri ubu The Ben yitegura kumurika  Album ya Gatatu mu gitaramo byitezwe ko kizabera muri BK Arena tariki ya 01 Mutarama 2024, ikazaba ari Album ikurikira 'Amahirwe ya Nyuma' na 'Ko Nahindutse'.

Hagiye havugwa ibikorwa byategurwaga na Coach Gael agamije gusenya ibitaramo bya The Ben muri iyi minsi bateye intambwe iganisha kubwiyunge

Nubwo ariko The Ben yitegura gushyira hanze Album, Bruce Melodie na we amaze iminsi ateguza indi, hari na gahunda y'ibitaramo iteganijwe by'uyu mugabo bishamikiye ku kuyimurikira abakunzi be.

Tutinjiye mu mubare w'abafana buri umwe afite n'amayeri akoresha mu byo akoramo ibyo akora, kuko bose bigeze kumvikanaho inkuru zo kwinjiriza abantu ubuntu mu bitaramo byabo bagamije ifoto nziza.

Ibintu ariko abantu batumva neza na byo ariko bifasha mu bucuruzi kuko byinshi mu bitaramo bijya kuba ababitegura bamaze kwinjiza n'inyungu yabonetse binyuze mu baterankunga n'abafatanyabikorwa, ava mu matike akaza ari inyongera.

Kandi umuterankunga na we icyo abakeneye ni ukubona umubare wabo wamubwiye wahageze, kandi burya si buri umwe wafungura imiryango y'inyubako yabereyemo igitaramo cye, ngo abashe kubona abemera no kuyinjiriramo ubuntu.

Reka twinjire ku ntwaro z'ibikorwa bibarengera bafite kugeza ubu nubwo Album bitegura gukora nayo izazana n'izindi mbaraga, bafite ibigwi bibemerera kuba kompanyi yose bakomangira ngo ibatere inkunga byagorana kuba yabasubiza inyuma.

Bruce Melodie amaze iminsi akora kuri Album nshya yitegura gushyira hanze

Bakagira n'ikintu kindi batandukaniyeho kuba The Ben afite ibihangano byisangwamo n'ibyiciro byose by'abantu, Bruce Melodie ugasanga yibanda ku bikundwa cyane n'urubyiruko.

Umuhanzi iyo ategura igitaramo usanga hari abantu bamufasha ku cyamamaza yaba mu gihugu no hanze yacyo ugendeye aho Isi igeze, abahanzi, abanyapolitiki, abakinnyi n'abandi bifata amashusho bavuga ko bazaba bahari cyangwa basaba abantu kuzazitabira.

Iyi ngingo biragoye kuba wavuga ko bose batayifiteho imbaraga ariko ibyo badahuje iyo bigeze ku bahanzi katurebe abo bagiye bakorana indirimbo baturuka mu bindi bihugu.

Uhereye kuri The Ben afitanye indirimbo n'abahanzi bo hanze batandukanye barimo Otile Brown [Kenya], Bensoul [Kenya], Rema Namakula [Uganda], Sheebah Karungi [Uganda], B2C [Uganda] na Diamond Platnumz [Tanzania].

Ku ruhande rwa Bruce Melodie yakoranye na Nadia Mukami [Kenya], Pallaso [Uganda], DJ Neptunez [Nigeria], John Frogs [South Sudan], Sheebah Karungi [Uganda], Khaligraphy Jones [Kenya], B2 C [Uganda], Eddy Kenzo [Uganda], Innos B [RDC], Harmonize [Tanzania] na Shaggy [Jamaica/USA].

Bibaye ngombwa ko muri aba hari abo bazana cyangwa babafashe byeruye mu kwamamaza ibyo bakora zaba ari imbaraga ziyongera ku bandi bahanzi b'abanyarwanda yagiye akorana nabo.

Amakuru ahari ni uko The Ben yamaze gufata BK Arena ubwo Bruce Melodie byamusaba gushakira mu zindi nyubako, izishoboka yaba Camp Kigali, Kigali Convention Center gusa aha hose ni hato amahitamo yaba Stade Amahoro.

Ese byakunda ko buri umwe abasha kubona byibuze abantu basaga ibihumbi 10 mu mujyi umwe gusa amahirwe yo kuba ibi byaba arashoboka kuko ihangana ryabo mu buryo bw'akazi riri ku rwego rwo hejuru kandi biri no mu bakunzi b'umuziki nyarwanda.

The Ben aritegura kwinjiza abakunzi b’umuziki nyarwanda mu mwaka wa 2025 mu gitaramo azakorera muri BK Arena

Nk’uko kandi twabihereyeho haruguru hari ubwo The Ben yigeze gutegura igitaramo aba barizwa mu itsinda rireberera inyungu Bruce Melodie birangira nk’uko byavuzwe bashatse kucyangiza bategura ibindi ‘no mu Burundi byaravuzwe’.

Kandi ntabwo byaba ari bishya hari ibitaramo byinshi byagiye bitegurwa muri ubu buryo gusa bikaba bigamije ubucuruzi no guhangana bijyana n'uwo mujyo.

Kuri uyu wa Gatanu The Ben azashyira hanze indirimbo nshya yise ‘Plenty’ ugenecyereje bivuga ‘Birenze’

Mu Rwanda hagiye kubera igiterane gikomeye cyo gushima Imana ku bwa byinshi yakoreye u Rwanda. Iki giterane kizaba ku Cyumweru tariki 29 Nzeri 2024 kuva Saa Munani z’amanywa kuri Stade Amahoro. Imiryango izaba ifunguye kuva Saa Tanu za mu gitondo.

Umuhuzabikorwa w’igiterane “Rwanda Shima Imana” Amb. Dr Charles Murigande, yavuze ko witegereje neza aho u Rwanda rwari ruri mu 1994, nta byiringiro na bike byari bihari by’uko igihugu cyakongera kugira amahoro hashingiwe ku mpamvu nyinshi cyane zakomokaga ku mahano yakozwe mu Rwanda.

Ati: “Twakabaye twaraheze aho twari turi cyangwa tugasubira inyuma ariko Imana yaradufashije tuva hariya tugeze aho tugeze, hari intambwe nini twagenze nubwo tutari twagera aho umuntu wese yakwifuza.”

Yagarutse ku ruhare rwa Perezida Kagame mu mpinduka nziza igihugu kimaze kugeraho.

Ati”Iyo tutagira umuyobozi nka Nyakubahwa Perezida wa Repubulika, umuyobozi ukunda abanyarwanda, njyewe nagize amahirwe yo gukorana nawe, nabaye Minisitiri, […] Ni umuyobozi udatinya guhangana n’ibibazo. Iyo ibibazo bije, ntiyihisha ahangana na byo. Kandi ni umuyobozi muri we, ikintu cyitwa ngo ntibishoboka ntikibaho. Ahantu twari turi hari habi cyane twari dukeneye umuyobozi nk’uwo”.

Amb. Murigande yakomeje avuga ko u Rwanda rwagize amahirwe yo kugira umuyobozi mwiza nka Perezida Kagame ukunda abaturage, witeguye kurwanirira igihugu no kugipfira, ureba kure kandi ukora ibishoboka byose kugira ngo abanyarwanda babe umwe.

Yagize ati”Rero mu byo dushima Imana twashima ko yaduhaye umuyobozi uteye utyo. Ndabivuga nk’umuntu wakoranye nawe, naramubonye mu bihe bikomeye.” 

Amb. Dr. Murigande uri mu kiruhuko cy'izabukuru yakoze imirimo itandukanye irimo nko kuba Umunyamabanga Mukuru w'Umuryango wa FPR-Inkotanyi, guhagararira u Rwanda mu bindi bihugu no kuyobora za Minisiteri zitandukanye.

Rwanda Shima Imana Festival ni igikorwa gikomeye gifite agaciro kadasanzwe kuko izaba ikurikiye amatora ya Perezida wa Repubulika yabaye mu mahoro no mu bwisanzure, ashimangira indi ntambwe u Rwanda ruteye mu rugendo rwo kwiyubaka.

Iki giterane kigiye kuba nyuma y’imyaka 5 kitaba, ni umwanya ukomeye ku Banyarwanda wo guteranira hamwe bagashimira Imana “ku bintu byinshi byiza igihugu cyacu cyagezeho mu myaka 30 ishize nyuma ya Jenoside yakorewe Abatutsi mu 1994”.

Iki gikorwa kizahuriza hamwe abayobozi mu nzego za leta, abikorera n'imyemerere kimwe n'abaturage b'ingeri zose, mu gushimira Imana ku mahoro, umutekano n'iterambere ry'ubukungu igihugu cyacu gifite muri iki gihe.

Abayobozi b'amatorero ya Gikristo ndetse n'abahanzi b'abaramyi b'ibyamamare bazayobora iki gikorwa mu kuramya no gushimira Imana bivuye ku mutima.

Mu bahanzi bamaze kumenyekana bazaririmba muri iki giterane harimo Israel Mbonyi na Gaby Kamanzi.

PEACE PLAN RWANDA yateguye iki giterane benshi bafitiye amatsiko menshi ni Umuryango wa Gikristo uhuriza hamwe amatorero ya Gikristo. Yagaragaje ko yateguye iki giterane cy’uyu mwaka mu kwishimira ibyiza Imana yakoreye Abanyarwanda kuko “Uyu mwaka wa 2024 uruzuza imyaka 30 y'amahoro n'iterambere ridasanzwe mu Rwanda”.

Nyiricyubahiro Arikiyepisikopi Dr. Laurent Mbanda, Umuyobozi wa THE PEACE PLAN Rwanda, yakomeje ati “Ni umwaka u Rwanda rwagizemo amatora ya Perezida n'ay'Abadepite yabaye mu mahoro no mu byishimo birenze urugero. Ni muri urwo rwego, dufite impamvu nyinshi zo gushimira Imana.”

Ubuyobozi bwa Rwanda Shima Imana kandi buratumira buri wese kwitabira iki gikorwa cyo gushimira Imana ku rwego rw'igihugu. Kwinjira ahazabera iki gikorwa bizaba ari ubuntu, kandi “turashishikariza abaturage bose kwitabira kugira ngo bazafatanye natwe muri iki gikorwa gifite agaciro gakomeye”.

Rwanda Shima Imana 2024 yateguwe ku bufatanye bwa PEACE PLAN na Rwanda Leaders Fellowship. Amb. Dr. Charles Murigande niwe Muhuzabikorwa wayo. PEACE PLAN RWANDA itegura iki giterane, yashinzwe n’abarimo inshuti y’u Rwanda, Pastor Rick Warren uyoboye itorero Saddleback ryo muri Leta Zunze Ubumwe za Amerika.

Amb. Dr Charles Murigande yagaragaje Perezida Kagame nk’impamvu ikomeye Abanyarwanda bakwiriye gushimira Imana 

Perezida Kagame aherutse gutorerwa kongera kuyobora u Rwanda mu myaka itanu iri imbere

Ubworozi bugezweho kandi bugamije inyungu bukorwa himakazwa ikoranabuhanga, ndetse ku matungo maremare ibikorwa byo kubangurira ku mpfizi bisa n'ibyamaze kwibagirana hakoreshwa intanga zitunganywa zigaterwa inka.

Gusa hari aborozi bo mu Murenge wa Karangazi mu Karere ka Nyagatare babwiye Flash FM ko ibyo guteza intanga babigendamo gake kuko hari ubwo bisaba gutera inka intanga inshuro zirenga eshatu zaranze gufata.

Umwe yagize ati 'Bitera igihombo kinini cyane, aho umuntu yatezaga inka 20 hagafatamo imwe cyangwa zose ntizifate, ejo yabyongera ari ko atanga amafaranga, ugasanga umworozi ahombye amafaranga agera mu bihumbi 300 Frw.”

Undi ubu ufite inka eshanu zihaka, yavuze ko zafashe baziteye intanga ku nshuro ya kane.

Ati 'Izihaka ubu nateje inka eshanu ariko naziteje inshuro eshatu nikurikiranya ubwa kane ni bwo zafashe. Ni ukubera abaganga b'amatungo bataziraga igihe wamuhamagara niba aturuka kure inka ikaba yarindutse agapfa kuyitera akwikuraho ngo agutwarire amafaranga.'

Hari n'uwavuze ko nyuma yo kubona abaganga b'amatungo babahamagara bakavuga ko bagiye kubageraho ariko ntibubahirize ibyo bavuze yahisemo kubireka.

Ati 'Njye nanakurijeho kubireka kuko wahamagaraga umuganga w'amatungo akakubwira ati ndaje, inka ikarinduka.'

Umuyobozi w'Ikigo cy'Igihugu Gishinzwe Ubuhinzi n'Ubworozi Ishami rya Nyagatare na Kayonza, Kayumba John, yavuze ko mu bituma inka ziterwa intanga ntizifate harimo uburangare bw'aborozi n'abavuzi b'amatungo.

Ati 'Igituma intanga idafata ni uko inka yaba idafite ubuzima bwiza, yaba irwaye 'infections' yarazivanye ku mpfizi zirwaye amakore, ugasanga inka yarwaye amakore muri nyababyeyi yayo ushobora kuyitera intanga ntizifate cyangwa se iyo ishonje ibyo byose byatuma idafata, cyangwa se bakayitera yarindutse, nabyo birashoboka. Umworozi iyo ahari amenya ko inka yarinze agahamagara umuganga w'amatungo akayitera intanga ariko bayiteye yarindutse ntabwo yafata.'

Umuyobozi w'Akarere Wungirije ushinzwe Iterambere ry'Ubukungu, Matsiko Gonzague yagaragaje ko ikibazo cyari abaganga bake b'amatungo ariko ubu bongerewe.

Ati 'Twari dufite ikibazo cy'abavuzi b'amatungo bake aho wasangaga umurenge wa Karangazi ndetse n'indi mirenge ifite umuganga umwe w'amatungo ariko ubwo babaye benshi ndetse hari na gahunda ya Leta y'uko ubu ibikorwa by'ubuvuzi bw'amatungo bigiye kujya bikorwa n'abaganga b'amatungo bigenga, ubwo rero twabonye abahagije ibibazo by'ubuvuzi bw'amatungo bigiye kubonerwa igisubizo.'

Matsiko avuga ko abavuzi b'amatungo biyongereye bagezwa no ku rwego rw'akagari kugira ngo aho umworozi abakenereye ahite ababona.

Imirenge umunani muri Nyagatare ni yo yiganjemo ubworozi bw'inka ndetse ibyavuye mu ibarura rusange rya 2022 bigaragaza ko mu Ntara y'Iburasirazuba, Akarere ka Nyagatare ari ko gafite inka nyinshi, zirenga ibihumbi 122.

Bamwe mu borozi bavuga ko bazinutse guteza inka zabo intanga, kuko babikora kenshi ntizifate

Ababyeyi benshi mu Rwanda biyuha akuya bashakira abana babo uko babona uburezi bufite ireme kuko ari wo murage ukomeye uzabafasha kwibeshaho mu gihe kiri imbere.

Muri gahunda yo guteza imbere ubukungu bushingiye ku bumenyi igihugu cyihaye, harimo ko nibura 60% by'abanyeshuri basoza amashuri y'icyiciro rusange bazajya bajya kwiga mu mashami y'imyuga n'ubumenyi ngiro.

Gusa mu bihe bya mbere aya mashuri yabanje kuba mu bice bimwe by'igihugu, hashyirwaho gahunda y'uko imirenge yose igomba kuba irimo nibura ishuri rimwe ry'imyuga n'ubumenyi ngiro.

Umuyobozi Mukuru wa RTB, Eng Paul Umukunzi, yabwiye IGIHE ko amashuri y'imyuga n'ubumenyi ngiro mu mirenge yose ubu ahari kandi ubu bari kuyiramo.

Ati 'Amashuri yose ubu bayigiramo, uwo muhigo wagezweho.'

Eng Umukunzi yavuze ko mu mwaka w'amashuri wa 2023/2024 amashuri y'imyuga yari afite abanyeshuri bagera kuri 43%, ubu hakaba hataraboneka imibare nyakuri kuko abanyeshuri basabye guhindurirwa bagishakirwa imyanya.

Ati 'Haracyari kare kumenya umubare w'uko duhagaze kubera ko abana baracyajya ku mashuri amwe bajya ku yandi kubera ko umwaka ari bwo ugitangira kandi twemeza abahageze.'

Imibare igaragaza ko amashuri y'imyuga n'ubumenyi ngiro yasohotse ku rutonde rw'afite amasomo yemerewe kwigisha mu mwaka w'amashuri wa 2024/2025 ari 562 arimo aya Leta n'ayigenga.

Mbere y'uko aya mashuri agera mu mirenge yose hari hasigaye imirenge 24 itagira amashuri y'imyuga n'ubumenyi ngiro.

Ubwo Minisitiri w'Intebe yagezaga ku Nteko Ishinga Amategeko imitwe yombi gahunda ya Guverinoma y'imyaka itanu, ku wa 9 Nzeri 2024 yagaragaje ko Leta izakomeza guteza imbere amashuri y'imyuga na tekinike, ayigisha amasomo y'igihe gito akagezwa muri buri kagali.

Ati 'Hazashyirwa ishuri ryigisha imyuga mu gihe gito (VTCs) muri buri Kagali, aho umuntu wese ashobora kwiga mu gihe gito umwuga yifuza, hadashingiwe ku byo yize mbere.'

Kugeza mu 2029 kandi mu turere twose 'hazashyirwayo byibura ikigo cy'icyitegererezo mu myuga n'ubumenyi ngiro (TSS Centers of Excellence).'

RTB igaragaza ko 86% by'abasoza amasomo mu mashuri y'imyuga n'ubumenyi ngiro babona akazi nibura nyuma y'amezi atandatu basoje amasomo.

Raporo ya Banki y'Isi yasohotse muri Nzeri 2024 igaragaza ko abakoresha barenga 60% banyuzwe n'ubumenyi abavuye mu mashuri ya TVET bajyana ku isoko ry'umurimo.

Abasifuzi b’umupira w’amaguru bagira uruhare rukomeye ku mukino kuko ni bamwe baba bafite inshingano zo gusnyira mu bikorwa amategeko y’umukino, muri ibi bihe abasifuzikazi bamwe na bamwe bagiye bakururura benshi bitewe n’imiterere yabo.

Muri iyi nkuru twifashishije inkuru z’ibinyamakuru bitandukanye, tugiye kugaruka ku basifuzi n’abahoze ari bo 7 bakurura abagabo cyane kurusha abandi.

Fernanda Colombo Uliana — Brazil

Fernanda Colombo Uliana w’imyaka 33, yari umusifuzi wo ku ruhande (bamwe b’ibitambaro), asifura mu cyiciro cya mbere muri Brazil (Campeonato Brasileiro Série A).

Imiterere nk’iy’abanyamideli bituma agaruka mu mitwe ya benshi ndetse binatuma akurura abagabo cyane, si ibyo gusa kuko ni n’umuhanga mu byo akora, inzozi ze kwari ugusifura kugera ku rwego rwo hejuru muri Brazil.

Sian Massey — U Bwongereza

Sian Massey ni umusifuzikazi w’umwongereza wo ku ruhande w’imyaka 38, asifura mu cyiciro cya mbere mu Bwongereza (Premier League). Ni umusifuzi wagiye usifura imikino ikomeye irimo UEFA Women’s Champions League ndetse n’imikino yo gushaka itike y’igikombe cy’Isi.

Yatangiye kugaruka cyane mu itangazamakuru muri 2013 ubwo yatumaga myugariro wa Manchester, Rafael ahabwa ikarita itukura kubera ikosa yari akoreye David Luiz wa Chelsea.

Elena Tambani — Italy

Ni umunyamideli akaba n’umusifuzi w’umutaliyani, ni umwe mu basifuzi barangaza benshi iyo ari mu kibuga akora akazi ke. Abakunzi benshi ba ruhago bamufata nk’umusifuzi mwiza ku Isi.

Lucy Oliver — U Bwongereza

Lucy Oliver ni umwongerezakazi w’umusifuzi w’imyaka 33 wanabayeho umwalimu, na we ari ku rutonde rw’abasifuzi bakurura abagabo. Azwi cyane muri 2020 ubwo yatangazaga ko hari uwagerageje kumutera ubwoba binyuze kuri Twitter bigatuma ahindura imirere y’urukuta rwa Twitter ye (setting) ku buryo azajya yakira ubutumwa bw’abantu akurikira gusa.

Claudia Umpierrez — Urguay

Nubwo akuze, afite imyaka 40 ariko burya koko imyaka ni imibare, na we ari ku rutonde rw’abasifuzi bakurura abagabo. Ni umugore uzwiho kwita ku mubiri we aho afata siporo nk’ikintu cy’ingenzi kuri we, yashatse n’umutoza yishyura ku kwezi ubimufashamo ku buryo umubiri we udatana.

Kattie Patterson – Australia

Afite imyaka 27 y’amavuko, isura ye n’ubwiza bwe bimushyira kuri uru rutonde rw’abasifuzikazi bakurura igitsina gabo.

Si ibyo gusa kuko ni umuhanga mu kazi ke akora kuko ni we musifuzi wa mbere w’umugore wanditse amateka yo gusifura umukino w’icyiciro cya mbere mu bagabo muri shampiyona ya Australia.

Claudia Rimani – Italy

Yahoze ari umusifuzikazi, ubu afite imyaka 41 ukomoka mu Butaliyani, yasifuye imikino itandukanye yaba muri Seria A na Serie B. Ni ubwiza bwe n’imiterere ye byatumye mu bihe bitandukanye agenda agaruka mu mitwe y’inkuru mu binyamakuru bitandukanye.

Mu 2006, yaje kugaragara ku rutonde rw’abakobwa cyangwa abagore 100 bakurura abagabo kuruhusha abandi ku Isi rwashyizwe hanze na GQ, Maxim, na Playboy.

Ni ibihe bikomeye ku muraperi akaba n’umushoramari Sean Combs wamenyekanye ku mazina menshi nka Diddy, Puffy Daddy, Puffy, P.Diddy, Love n’andi menshi dore ko mu bihe bitandukanye yaranzwe no guhindura amazina ye mu myidagaduro.

Mu cyumweru gishize nibwo ibintu byahinduye isura ubwo FBI ifatanyije n’abashinzwe umutekano w’imbere mu gihugu ba Homeland Security basanze P.Diddy mu cyumba cya Hoteli yarimobagahita bamuta muri yombi.

Ubwo yagezwaga mu rukiko, umwunganizi we mu mategeko Marc Agnifilo yavuze ko P.Diddy yiteguye gutanga Miliyoni 50 z’Amadolari akarekurwa akaburana afunguye. Aya mafaranga nubwo ari menshi ariko urukiko rwarayanze inshuro 2 zose.

Damien Williams uhagarariye ubushinjacyaha bwa leta zo mu Majyepfo zirimo n’umujyi wa New York. yabwiye itangazamakuru ko banze ko uyu muraperi aburana afunguye kuko ibyaha ashinjwa bikomeye ndetse ko hari impungenge ko yahita acika ubutabera akava ku butaka bw’Amerika.

Mu byaha P.Diddy ashinjwa harimo gufata ku ngufu abakobwa 6 batandukanye, gucuruza abakobwa, kwambutsa abakobwa acuruza akabajyana mu busambanyi mu bindi bihugu, gutunga imbunda bitemewe n’amategeko, gukubita no gukomeretsa, gutwara ibiyobyabwenge bitemewe, gukoresha ibirori mu rugo rwe akazanamo abagabo bagasambanya abakobwa ku gahato.

Ibi byaha uko bitandukanye ni nako bifite ibihano bitandukanye, ahamwe n’icyaha cyo gufata ku ngufu yafungwa burundu, ahamwe n’icyaha cyo gucuruza abakobwa yakatirwa igifungo cy’imyaka 15 mu gihe ahamwe n’icyaha cyo kwambutsa imipaka abakobwa acuruza yafungwa imyaka 20.

Kugeza magingo aya P.Diddy w’imyaka 54 usa naho ibigwi bye n’izina rikomeye yari afite mu muziki byacitse amazi, afungiye muri gereza yitwa ‘The Metropolitan Detention Center Brooklyn’ iherereye mu mujyi wa New York.

*Amateka y’iyi Gereza ifungiyemo P.Diddy 

Iyi gereza ‘The Metropolitan Detention Center Brooklyn’ yubatse muri karitsiye ya South Park i Brooklyn mu mujyi wa New York. Yubatswe mu 1990, igenewe kwakira imfungwa 1000 zitegereje kuburana, gusa uko imyaka yagiye yicuma ni nako umubare wabayifungirwamo wiyongera.

Ntabwo ifungirwamo ababonetse bose ahubwo ifungirwamo abantu bakurikiranyweho ibyaha bikomeye bifite aho bihuriye n’ihohotera rishingiye ku gitsina, ubucuruzi bw’abantu, gucuruza abakobwa, abimukira binjiye muri Amerika mu buryo butemewe. Ikindi kandi abafungirwamo bose ni abantu bakurikiranywe na FBI.

Mu 2002 ubwo George W.Bush yari akiri Perezida wa USA, yasabwe inshuro 8 ko iyi gereza yahindurirwa imiyoborere ndetse ikanahindura amabwira ashaririye abahafungiye babayemo arimo kuba bambara ibirenge, bashobora kumara icyumweru batageze hanze ngo barebe uko hasa, imirire mibi byumwihariko basabaga ko yasanwa kubera gusaza.

Andi mategeko y’iyi gereza akomeye arimo kuba abahafungiye bose batemerewe gusohoka ngo bakore siporo nk’uko izindi gereza zibikora, bakarabira kandi baniherera mu kumba gato bararamo ndetse ntabwo bemerewe gusurwa igihe cyose batarakatirwa.

Iyi gereza yubatse mu buryo bw’amagorofa ku buryo inyuma isa neza gusa ngo imbere irashaje bitewe n’uko kuva mu 1988 itarongera kuvugururwa

Associate Press ivuga ko iyi gereza P.Diddy afungiyemo iri muri gereza za mbere zubatse neza muri Amerika iyo umuntu arebeye inyuma kuko yubatse mu magorofa atondekanyije, nyamara ngo mu imbere yaho irashaje dore ko kuva yakubakwa mu 1988 itigeze yongera kuvugururwa.

Iyi gereza izwiho urugomo rwinshi rw’imfungwa zirwana zikoresheje ibyuma. Mu 2023 gusa hapfuye imfungwa 36 zose zizize guterwa ibyuma. Ni mu gihe kuva aho uyu mwaka watangira imfungwa 18 arizo zimaze gupfiramo. 

Mu gihe Isi yose yari yarembejwe n’icyorezo cya Covid-19, iyi gereza nayo yakozweho n’iki cyorezo ku buryo buri hejuru aho imfungwa 50% zari zafashwe na Covid-19. 

Ikindi kidasanzwe iyi gereza izwiho ni uko abarinzi baho nabo usanga ari abanyabyaha bafatanya n’imfungwa mu kubinjiriza ibintu bitemewe. Mu myaka 5 ishize abacunga gereza n’abandi bakozi bayo bagera kuri 22 barirukanwe abandi barafungwa bazira guhabwa ruswa n’imfungwa mu kubinjiriza ibiyobyabwenge hamwe n’ibindi bitemewe.

Magingo aya iyi gereza ifungiwemo abagera kuri 1,712 barimo na P.Diddy aho bose bakurikiranywe na FBI. Umuyobozi wayo mukuru witwa Heriberto Tellez watangiye kuyiyobora mu 2017 aherutse kubwira itangazamakuru ko P.Diddy yakiriwe nk’indi mfungwa yose kandi ko atigeze ahabwa ibindi cyangwa ngo afatwe nk’icyamamare ahubwo ko yakiriwe nk’uko izindi mfungwa zose zakirwa hatitawe ku izina afite.

-Iyi gereza yagiye ifungirwamo ibyamamare bindi birimo na R.Kelly hamwe na Juan Orlando wari Perezida

R.Kelly wahoze aca ibintu mu muziki, yafungiwe muri iyi gereza nyuma yo guhabwa igihano cy’imyaka 30 azira gufata ku ngufu

Icyamamare mu muziki, Sylvester Robert Kelly uzwi cyane nka R.Kelly nawe wahamwe n’ibyaha byo gufata ku ngufu, yafungiwe muri iyi gereza mu 2016 ubwo yatabwaga muri yombi. Yayimazemo imyaka 2 abona kujyanwa muri gereza ya Chicago.

Uyu yahoze ari Perezida w’igihugu ya Honduras muri manda 2 zikurikiranye. Yafunzwe azira gucuruza ibiyobyabwenge birimo na Cocaine muri Amerika afatanyije na mushiki we witwa Hilda Alvarado

Juan Orlando Hernandez Alvarado wahoze ari Perezida w’igihugu cya Honduras kuva mu 2014 kugeza mu 2022 ubwo yatabwaga muri yombi. Yakatiwe imyaka 25 ahamwe n’icyaha cyo gucururiza Cocaine ku butaka bwa Amerika.

Gerano Garcia Luna wahoze ari umunyamabanga mukuru w’igihugu cya Mexico, afungiye muri iyi gereza aho ategereje kuburana ku byaha ashinjwa birimo gukorana n’abacuruzi b’ibiyobyabwenge bazwi ku izina ry’aba ‘Sinaloa Cartel’.

Umwiyahuzi Sayfullo Saipov wateze igisasu mu modoka rusange kigahitana ubuzima bw’abantu 8 mu 2017 nawe afungiye muri iyi gereza irimo P.Diddy.

Umuraperi Daniel Hernandez uzwi nka 6ix9ine cyangwa Tekashi69 nawe yafungiwe muri iyi gereza mu gihe cy’umwaka azira gufatanwa imbunda zitemewe.

Ja Rule umuraperi wakunzwe mu myaka ya kera nawe yafungiwe muri iyi gereza azira kutishyura imisoro aho yayimazemo amezi 28. Undi muraperi wayifungiwemo ni Fetty Wap wakatiwe igifungo cy’amezi 72 azira gukubita agakomeretsa n’ibiyobyabwenge.

Ghislaine Noella Maxwell ari mu bindi byamamare byafungiwe muri iyi gereza nyuma yo guhamwa n’ibyaha byo gucuruza abakobwa agakatirwa imyaka 20. Uyu yahoze ari mu bategura ibitaramo mu Bwongereza ndetse yakoranaga bya hafi na Prince Andrew wirukanwe i Bwami nyuma yo gushinjwa gufata ku ngufu n’umwe mu bana b’abakobwa bacuruzwaga n’uyu Ghislaine Maxwell.

Madame Ghislaine Maxwell wari uzwiho gutegura ibirori bikomeye by’ibyamamare mu Bwongereza, afungiwe muri iyi gereza nyuma yo gukatirwa imyaka 20 azira gucuruza abakobwa

Abahanzi bakunzwe cyane mu ndirimbo zo kuramya no guhimbaza Imana bakaba ari umugabo n'umugore bakora nk'itsinda, René na Tracy nyuma y'amezi arenga arindwi batumvikana mu ndirimbo nshya, baherutse gushyira hanze iyo bise “Imirimo Yawe (Irivugira)”.

Iyi ndirimbo yakiriwe neza n'abakurikira ibikorwa by'aba bahanzi ndetse n'abakunda indirimbo zamamaza ubutumwa bwiza muri rusange, yasohotse tariki 13 Nzeri 2024, ikaba yaragiye ahagaragara nyuma y'iyitwa ‘Niryubahwe’ yasohotse ku wa 1 Gashyantare uyu mwaka.

Muri iyi ndirimbo bagaruka ku bikorwa Imana ikorera abantu ku manywa n’ijoro, kandi abenshi bemeranyije n'aba bahanzi na bo batanga ubuhamya bwabo ahatangirwa ibitekerezo kuri iyi Ndirimbo Imirimo Yawe (Irivugira).

Agaruka ku nkomoko y'inganzo y'iyi ndirimbo, Tracy yabwiye InyaRwanda ko 'iyi ndirimbo ivuga uburyo icyo Imana ikora mu buzima bwa muntu kiba kidakeneye ubusobanuro ahubwo umuntu iyo abyitegereje abona neza ko ari umurimo wakozwe n’Imana ubwayo nta ruhare rw’umuntu kugira ngo uwirata wese yirate Kristo wenyine nk’uko ijambo ry’Imana ribivuga mu Bakorinto ba mbere 1:31.'

Yakomeje avuga ko idashingiye ku buhamya bwabo nk’umuryango gusa ahubwo ikubiyemo ubuhamya bw'umuntu wese uriho. Tracy kandi, yaboneyeho no guhishura ko bahishiye byinshi byiza abakunzi babo birimo n'indirimbo nshya.

Ati: 'Haracyari izindi ndirimbo zigiye gusohoka vuba haba izacu twembi gusa ariko n’iyo twakoranye n’undi mukozi w’Imana tuzabatangariza vuba aha.'

Yavuze ko bishimira urukundo bakomeje kwerekwa n’abantu batandukanye, atangaza ko babishimira Imana cyane kuko ariyo soko y’ibyiza byose.

Ati'Urukundo n’ubuhamya twumva bw’abantu bidutera imbaraga zo gukomeza gutanga icyo Imana idushyira ku mutima cyose nayo ikadushoboza kudatandukira kuko ariyo soko yonyine tuvomamo byose.'

Mu buryo bw’amajwi, iyi ndirimbo yatunganyijwe n'uwitwa Sammy Pro afatanije na Nic Pro, mu gihe amashusho yayo yatunganyijwe na Musinga usanzwe ubatunganyiriza amashusho y'indirimbo zitandukanye.

Mu ndirimbo bakoze bari kumwe zigakundwa cyane harimo iyo bise ‘Jehovah’ yasohotse tariki 2 Nzeri 2023, ikaba ariyo  yahinduye amateka y'umuziki wabo igatuma barushaho kumenyekana, kuko ari yo imaze kurebwa cyane ku muyoboro wabo wa YouTube kugeza ubu.

Itsinda rya Rene na Tracy riherutse gushyira hanze indirimbo ishingiye ku buhamya

Baritegura gushyira hanze izindi ndirimbo zirimo n’iyo bakoranye n’undi muramyi utaramenyekana

“>Kanda hano urebe indirimbo ‘Imirimo yawe (irivugira)” ya Rene na Tracy

“>
  

Imiryango ibihumbi yahunze ingo zayo, ndetse Igisirikare cya Israel cyavuze ko cyagabye ibitero ku birindiro 1600 bya Hezbollah mu bitero byari bigamije gusenya ibikorwa remezo by'uyu mutwe, byubatswe guhera mu 2006.

Ibihugu bikomeye byo mu mpande zose z'Isi bikomeje gusaba ko iyi ntambara yahosha kuko ikomeje gufata indi ntera umunsi ku wundi.

Agace ka Kfar Rouman kari mu twibasiwe cyane n’ibi bitero

Agace ka Marjayoun kari mu Majyepfo ya Lebanon kari kahindutse umwotsi kubera ibi bitero

Kuri uyu wa Mbere, Indege y’Igisirikare ya Israel, yagaragaye mu gace ka Haifa yerekeza muri Lebanon

Ni ibintu bimenyerewe ko amashuri yo mu Rwanda agira amacumbi yaba amashuri abanza, ayisumbuye ndetse n'amashuri makuru kuko abahiga harimo n'abaturuka kure.

Muri aya mashuri hari ategeka abanyeshuri bayo bose kwiga baba mu macumbi y'ikigo cyane cyane mu mashuri abanza cyangwa se amashuri yisumbuye.

Ku mashuri makuru ho ntabwo ariko bigenda kuko abanyeshuri bose ntabwo baba bategetswe kuba mu macumbi y'ikigo, usanga bamwe babamo abandi bagakodesha hanze y'ikigo cyangwa se abiga hafi y'iwabo bagataha

Abanyenyeshuri bose nabwo ari ko baba bifuza gukodesha amazu hanze y'ikigo, hari abajyayo kuko amacumbi y'ikigo yashize bikaba ngombwa ko bajya gucumbika hanze y'ikigo rimwe na rimwe bikanabagora kubona icumbi ryegereye ikigo.

Umuvugizi wa Kaminuza y'u Rwanda Kabagambe Ignatius, yabwiye The New Times ko Kaminuza y'u Rwanda iri ku kigero cya 23% mu guha amacumbi abanyeshuri.

Mu gihe cyo gutanga amacumbi yavuze ko bahera ku babana n'ubumuga, abatangiye umwaka wa mbere cyane cyane abakobwa bagakurikizaho abo mu yindi myaka ariko nabwo hibandwa ku bakobwa.

Kabagambe yavuze ko gahunda yo kongera amacumbi ari ukugira ngo Kaminuza yongere ubushobozi bwo guha amacumbi abanyeshuri kuko abenshi bakunze gucumbika hanze y'ikigo.

Yagize ati 'Turifuza kongera amacumbi y'abanyeshuri ku buryo 60% y'abanyeshuri bazajya babona icumbi kuri buri shami mu myaka itanu iri imbere. Muri uyu mwaka ishami rya Nyarugenge rizongerwamo ibyumba 900 bikaba bizorohereza abanyeshuri kubona amacumbi.'

Kugeza ubu Kaminuza y'u Rwanda ifite abanyeshuri barenze 30,000 mu babarizwa mu ma shami yayo icyenda, ikaba initegura guha impamyabumenyi abayeshuri ibihumbi umunani ku nshuro ya 10 mu Kwakira 2024.

Amwe mu macumbi y’abanyeshuri biga mu ishami rya Kaminuza y’u Rwanda i Huye