Category: Uncategorized

Ni ku nshuro ya Kabiri iki gitaramo kigiye kuba. Kizaba ku wa 3 Ugushyingo 2024 guhera saa kumi n'ebyiri (18H00) z'umugoroba kuri Lemigo Hotel.

Chorale Christus Regnat yasobanuye ko imaze amezi asaga 6 itegura iki igitaramo aho icy'uyu mwaka kizaba kirimo indirimbo zinyuranye zikubiye mu ndimi zitandukanye zituma abazacyitabira batazicwa n'irungu kuva mu ntangiriro kugera ku musozo.

Aha twavuga ururimi kavukire rw'Ikinyarwanda kuko benshi mu bakunzi b'iyi korali ari abanyarwanda ariko ntibibagiwe n'abatumva Ikinyarwanda nabo babakunda byatumye bategura indirimbo zizaririmbwa harimo n’izikubiye mu ndimi z'amahanga nka: Icyongereza, Igifaransa, Ikiratini n'izindi.

Nyuma y'uko indirimbo zizaririmbwa muri iki gitaramo zizaba zikubiye mu ndimi zinyuranye ndetse zizaba ziri no mu njyana ndengamipaka bituma ntawe uzipfumbata muri icyo gitaramo kuko abakunda amajwi agera mu gisenge (Classical Music) bazayumva kandi abaryohere.

Abakunda gucinya umudiho mu njyana Nyarwanda cyangwa se Gakondo nabo, batekerejweho ndetse n'abakunda kwidagadura mu zindi njyana nabo barahishiwe.

Chorale Christu Regnat bati 'Niyo mpamvu rero dushishikariza abakunzi bacu, abakunzi ba Muzika iririmbye neza muri rusange kugura amatike hakiri kare kugira ngo imyanya itazabashirana hakiri kare.'

Kugura amatike birakorerwa ku rubuga: www.event.christusregnat.rw hanyuma ugakurikiza amabwiriza aho amatike yashyizwe mu byiciro 2. Itike ya 20,000 frw ndetse n'itike ya 10,000 frw.

Chorale Christus Regnat iteguye iki gitaramo mu gihe ikomeje kubakira ku ntego yo gukomeza gusigasira no guteza imbere Muzika iririmbye neza; gufasha abantu kuruhuka no gusabana.

Intego yisumbuye muri iki gitaramo cyo kuri iyi nshuro izaba ari ugufasha abana bava mu miryango itishoboye kubonera ifunguro rya saa sita ku ishuri hamwe n'abandi.

Chorale Christus Regnat yamamaye mu ndirimbo zirimo nka 'Kuzwa Iteka', 'Twarakuyobotse', 'Igipimo cy'Urukundo', 'Mama Shenge' n'izindi. Christus Regnat Choir igiye gukora iki gitaramo yatangiye umurimo w'Imana mu 2006, itangijwe n’abantu barimo abari basanzwe ari abaririmbyi.

Iyi korali yavukiye muri Christus Center. Byarakomeje biva ku kuririmba indirimbo zo mu gitabo zitanditse ku manota, bagenda babigisha n’izifite amanota bakuraga hirya no hino mu y'andi makorali cyane cyane ayaririmbaga mu rurimi rw’igifaransa.

Muri iki gihe, Chorale Christus Regnat irizihiza imyaka 18 ishize ishinzwe, bakaba bafite imishinga itandukanye mu rwego rwo kwishimira ibyo Imana yabashoboje kugeraho muri iyi myaka bamaze basingiza Imana binyuze mu ndirimbo.

Chorale Christus Regnat yatangaje ko igiye gukora ku nshuro ya kabiri igitaramo bise “i Bweranganzo” 

Iki gitaramo kizaba ku wa 3 Ugushyingo 2024, kuri Lemigo Hotel mu rwego rwo gufasha abakunzi b'iyi korali kumva umuziki w'umwimerere

 

Iki gitaramo cyaherukaga kuba mu 2023, kirangwa n’indirimbo zisingiza Imana mu ndimi zinyuranye 

Umuyobozi Wungurije Ushinzwe ibya tekinike n’imyitwarire muri iyi korali, Bizimana Jeremie ubwo yari ayoboye abaririmbyi mu gitaramo bakoreye muri Camp Kigali, mu Ukuboza 2023

 

Umuhanzi mu njyana gakondo, Josh Ishimwe yataramanye na Chorale Christus Regnat mu gitaramo cyabo ‘i Bweranganzo’ cyabaye mu 2023 muri Camp Kigali 

Andy Bumuntu yataramanye na Chorale Christus Regnat mu gitaramo ‘i Bweranganzo’

REBA HANO UBWO ANDY BUMUNTU YAHUZAGA IMBARAGA NA CHORALE CHRISTUS REGNAT BAKARIRIMBANA INDIRIMBO BAKORANYE

“>

Impera z’icyumweru abantu bose amaso ubu bayahanze i Rubavu, iwaabo aw’ibirori hakaba ku gicumbi cya ruhago.

Ni nyuma y’uko ubu impera z’iki cyumweru amakipe abiri akunzwe mu Rwanda azaba yamanutseyo gukinirayo imikino y’umunsi wa 5 wa shampiyona.

Ni ibintu bidakunze kubaho ko Rayon Sports na APR FC zose weekend imwe zakwisanga muri uyu mujyi w’abakunda kuryoshya zagiye kuhakinira.

Bizatangira ku wa Gatandatu tariki ya 28 Nzeri 2024 Rutsiro FC yakiriye Rayon Sports bikomeze ku Cyumweru, Etincelles FC yakira APR FC.

Benshi mu bakunda umupira batangiye kwitegura aho ab’inkwakuzi bazamanuka ejo ku wa Gatanu bagiye gutegura ikibuga neza.

Ni imikino abantu benshi bafite gahunda yo kuzareba, aho ubu intero ari “ndinde wo kuhabura”.

Uretse kuba Rubavu ari Umujyi w’abanyabirori, hasohokerwa n’abakunda kuryoshya, na none hafatwa nko ku gicumbi cya ruhago bitewe n’abakinnyi bahavuye, benshi bayita Brazil.

Uwavuga ko Rubavu iyi weekend ari ho hantu ho gusohokera ntabwo yaba abeshye.

Gahunda y’umunsi wa 5 wa shampiyona

Ku wa Gatanu tariki ya 27 Nzeri 2024

Gorilla FC vs Mukura VS
Bugesera FC vs Gasogi United

Ku wa Gatandatu tariki ya 28 Nzeri 2024

Muhazi United vs AS Kigali
Rutsiro FC vs Rayon Sports
Musanze FC vs Marines

Ku Cyumweru tariki ya 29 Nzeri 2024

Kiyovu Sports vs Amagaju FC
Vision FC vs Police FC
Etincelles FC vs APR FC

APR FC izaba yasuye Rutsiro FC

Iyi gahunda yatekerejweho mbere na mbere mu rwego rwo guhindura imibereho y’abaturage, ari na ko hitabwa ku mibereho y’ingagi zo mu birunga.

Mu kiganiro n’itangazamakuru kuri uyu wa Gatatu tariki 21 Nzeri 2024, cyabereye muri Kigali Convention Center, Umuyobozi w’Ishami ry’Ubukerarugendo no Kubungabunga Pariki z’Igihugu muri RDB, Ariella Kageruka yasobanuye ko hatekerejwe kwagura Pariki y’Ibirunga mu rwego rwo kurusha kubungabunga ubuzima bw’ingagi n'izindi nyamaswa.

Yavuze ko hari inkigo yakozwe yagaragaje ko hari ubucukice muri Pariki y’Ibirunga, ku buryo hatagize igikorwa umubare w’ingagi wagabanyuka.

Kageruka ati “Habayeho inkigo zigaragaza ko hari ubucukice mu bice bya Pariki y’Ibirunga, bigaragaza ko mu gihe kiri imbere ibyo tuvuga ngo ingagi ziriyongera, ziratanga amadevize ahubwo zizagenda zisubira inyuma zigakendera tugasubira aho twahoze mu myaka irenga 30 ishize.”

Ariella Kageruka yavuze ko kubungabunga ibidukikije bitanga umusaruro mu bukungu bw’Igihugu, mu bukungu bw’aho Pariki ziba ziherereye ndetse no mu buzima bwa buri munsi bw’umuturage uturiye Parike.

Yavuze ko iyi gahunda yo kwagura Pariki y’Ibirunga izamara imyaka icumi, ndetse ikorwa habanje kuganirizwa abaturage baturiye parike. Ariella Kageruka yavuze ko hazakoreshwa agaciro kagereranyije k’amafaranga Miliyoni 300 z’amadorali mu kwagura iyi Parike azagenda azashyirwa mu bikorwa bitandukanye.

Harimo kwagura Pariki, kuzahura urusobe rw’ibinyabuzima rwo muri biriya bice. Akomeza aati “Nk’uko byumvikana ahantu hari hasanzwe hakorwa ibikorwa by’iterambere, hagomba gusubizwa uko hahoze. 

Turavuga ingagi, ariko ntabwo ari ingagi gusa [hari] n’izindi nyamaswa zisangwa muri Parike y’Ibirunga, ariko uko tubikora, twongera amashyamba ni nako tugabanya ingaruka zituruka ku mihandagurikire y’ikirere nabyo kugirango dukomeze turwanya izo ngaruka.”   

Yavuze ko hari abantu bazimurwa ahagomba kwimurirwa Parike y’Igihugu nk’uko igishushanyo mbonera cyabigaragaje. Ariko kandi mbere y’uko bari baturage bimurwa, bazabanza kubakirwa kugirango babone aho kujya, ndetse bazahabwa n’ibikorwa by’iterambere bibafasha kubaho buri munsi.

Kageruka yavuze ko mu kwagura iyi Pariki y’Igihugu y’Iburunga bakorana n’ibigo bitandukanye muri Guverinoma y’u Rwanda, harimo kandi abafanyabikorwa nka Banki y’Isi. Muri uyu mwaka nibwo hazagaragazwa igice cya mbere (Phase I) cyo kwagura Pariki y’ibirunga.

RDB igaragaza ko umushinga wo kwagura iyi Parike y'Ibirunga uzasiga ubutaka bwayo wiyongereyeho kilometero kare 3720, bingana na 23% by'ubuso. Isanzwe ifite hegitari 16,000. Imibare igaragaza ko ibi bizatuma umubare w'ingagi wiyongera ku kigero kiri hagati ya 15% na 20%.

Bizatuma kandi impfu z'ingagi zigabanyuka ku kigero cya 50%. Ni mu gihe mu busanzwe, umuryango w'ingagi wiyongeraho 26% buri myaka itanu.

Umuyobozi w'Ishami ry'Ubukerarugendo no kurengera Ibidukikije muri RDB, Ariella Kageruka yatangaje ko kwagura Pariki y'Igihugu y'Ibirunga bizatwara Miliyoni 300$, kandi bizahindura isura y'iyi Pariki 

Muri Nyakanga 2023, Guverinoma yatangaje ko hamaze kuboneka amafaranga arenga miliyari 50 Frw muri Miliyoni 300 z'amadorali akenewe mu bikorwa byatangiye byo kwagura Pariki y'Ibirunga

Tshisekedi yavuze ko 'RDC ishishikajwe n'ibikorwa biganisha ku mahoro arambye mu Burasirazuba bwayo' no kugeza iterambere mu bukungu ku baturage bo muri aka gace kamaze igihe karabaye isibaniro.

Ati 'Ntabwo [RDC] ifunze imiryango iyo ari yose yayigeza ku mahoro n'ubusugire bwayo […] ku bw'ibyo, [RDC] yiteguye gushyira mu bikorwa imyanzuro yafatiwe mu biganiro bya Luanda.'

Uyu mukuru w'Igihugu yavuze ko iyo myanzuro igaruka no ku biganiro hagati y'u Rwanda n'igihugu cye, mu kugarura icyizere hagati y'impande zombi.

Ibyo Tshisekedi yavugiye muri Loni bitandukanye kure n'ibyo amaze iminsi yemera, kuko mu minsi ishize, mu biganiro bya Luanda, Minisitiri w'Ububanyi n'Amahanga w'Igihugu cye, yatesheje agaciro raporo yakozwe n'impuguke zirimo izo mu gihugu cye.

Nubwo avuga ko azubahiriza imyanzuro ya Luanda, amaze imyaka myinshi u Rwanda n'umuhuza, Angola, amusaba kwitandukanya n'umutwe wa FDLR, ugizwe n'abagize uruhare muri Jenoside yakorewe Abatutsi, ariko yanze kuva ku izima.

Aho gukora ibyo ibiganiro bya Luanda bisaba, yahisemo guha abarwanyi ba FDLR intwaro n'ibindi bikenewe, binjira mu gisirikare cye batangira kurwanya umutwe wa M23, banahungabanya umutekano w'u Rwanda bya hato na hato.

Tshisekedi kandi wanasabye ko ibindi bihugu byashyiraho inzira z'ibiganiro, ni we watesheje agaciro ibiganiro bya Nairobi nyuma y'iminsi bitangiye.

Perezida Tshisekedi yagaragaje ko RDC itazagera ku ntego z’icyerekezo cya 2030 kubera umutekano muke

Iri jambo yarivugiye mu Nteko Rusange ya Loni i New York

Igiterane cya Rwanda Shima Imana kizaba ku wa 29 Nzeri 2024 muri Stade Amahoro i Remera. Ni igiterane kizaba hizihizwa imyaka 30 ishize u Rwanda ruvuye muri Jenoside yakorewe Abatutsi mu 1994 ndetse hanishimirwa urugendo igihugu kimaze gukora mu iterambere.

Umuhuzabikorwa w'Igiterane cya Rwanda Shima Imana 2024, Amb. Dr Charles Murigande yemeza ko Abanyarwanda mu matorero yose bakwiriye gushimira Imana ko yabanye nabo mu myaka 30 ishize u Rwanda rwibohoye, ubu igihugu kikaba gifite amahoro.

Yagize ati: 'Imana yadukoreye ibintu bitangaje, yaduhaye amahoro. Kera iyo wavaga mu Rwanda ukajya ahantu abantu baragutinyaga, ariko ubu iyo uvuze ko uri Umunyarwanda abantu barakwegera, bagashaka kukubaza u Rwanda. Igihugu cyacu ni igitangaza.'

Yagarutse ku ruhare rwa Perezida Kagame mu mpinduka nziza igihugu kimaze kugeraho. Ati: “Iyo tutagira umuyobozi nka Nyakubahwa Perezida wa Repubulika, umuyobozi ukunda abanyarwanda, njyewe nagize amahirwe yo gukorana nawe, nabaye Minisitiri, […] 

Ni umuyobozi udatinya guhangana n’ibibazo. Iyo ibibazo bije, ntiyihisha ahangana na byo. Kandi ni umuyobozi muri we, ikintu cyitwa ngo ‘ntibishoboka’, ntikibaho. Ahantu twari turi hari habi cyane twari dukeneye umuyobozi nk’uwo”.

Amb. Murigande yakomeje avuga ko u Rwanda rwagize amahirwe yo kugira umuyobozi mwiza nka Perezida Kagame ukunda abaturage, witeguye kurwanirira igihugu no kugipfira, ureba kure kandi ukora ibishoboka byose kugira ngo abanyarwanda babe umwe.

Umushumba Mukuru wa Noble Family Church na Women Foundation Ministries, Apostle Mignonne Kabera, yagize ati: 'Nongeye kugira umugisha wo kubatumira muri Rwanda Shima Imana 2024. Ni kuri Stade Amahoro, kandi imiryango izaba ifunguye kuva saa tanu z'amanywa, twese tuhahurire. Nimuze dufatanye gushima Imana.'

Umushumba Mukuru wa Restoration Church ku Isi, Apostle Joshua N. Masasu aragira ati: “Tuzahahurire tuzamura ibiganza dushima Imana kuko turemera ko hari ibyo yakoze. Yewe n'ibyo itarakora tuyishimire ko izabisohoza. Muze tuhateranire dukure ubwatsi kuko turemera ko rwose yakoze ibikomeye”.

Umushumba Mukuru wa Omega Church, Pastor Liliose Tayi Kaligirwa, yibukije Abanyarwanda ko hari ibintu byinshi byo gushima Imana nyuma y’imyaka 30 u Rwanda ruvuye muri Jenoside yakorewe Abatutsi mu 1994.

Yavuze ko “kuba uyu munsi abantu babana, kuba uyu munsi abantu badushakaho ko twagasubiranyemo, bamwe bakibutse ibyo aba bakoze na bariya ariko Abanyarwanda bakaba babanye neza, hari uruhare rw'Imana yakoze mu mitima yubaka, imitima yigisha ukuri, imitima yigisha kubana, yigisha kubabarira utabitegetswe”.

Yakomeje ati: “Kubabarirana no kwakirana ibyo ni ibintu bikomeye cyane byabaye mu Banyarwanda usobanurira umuntu wo hanze ntabyumve. Icyitwa imbabazi ntabwo bakizi ariko Imana yakoze ikintu muri uru Rwanda, kubabarirana, kwakirana, kubana abantu bakabana Leta ikatugirira neza, ikaducungira umutekano wo hanze ari ko ugendana n’uw'imbere. 

Umutekano wo mu mutima ni ikintu ngombwa ni inkingi ikomeye, kumva utekanye kumva utuje mu mubiri wawe kumva ureba ejo ukumva hari ibyiringiro. Ibyiringiro Abanyarwanda bafite uyu munsi rero ni ibintu byo gushaka Imana.”

Umwigisha w’ijambo ry’Imana akaba n'Umushumba Mukuru wa Believers Worship Centre, Pastor Hortense Mazimpaka, yavuze ko hari impamvu nyinshi zo gushima Imana, akaba ariyo mpamvu atumira buri munyarwanda wese kuzitabira igiterane Rwanda Shima Imana.

Ati “Ni umwanya wacu twese wo gushima Imana. Umwihariko w’uyu mwaka wa 2024 ni uko tumaze imyaka 30 dufite amahoro. Dufite impamvu nyinshi zo gushima Imana. Abakuru muri twebwe twabonye n’amaso yacu aho igihugu cyacu cyavuye, namwe abatoya mwariyumviye uburyo igihugu cyacu cyacuye mu rupfu”.

Uyu mushumba yakomeje agira ati “Dufite impamvu zo gushima Imana. Turashimira Imana yakoresheje abayobozi bacu, tukaba dufite amahoro duhagazemo uyu munsi. Turashimira Imana ku bw’umunyarwanda wese ukunda igihugu, wagize uruhare mu kugira ngo tugire ibyiza duhagazemo uyu munsi.

Umuhuzabikorwa wa Rwanda Shima Imana, Amb. Dr Charles Murigande 

Apôtre Dr Paul Gitwaza uyobora Umuryango Authentic Word Ministries akaba Umushumba Mukuru w'amatorero ya Zion Temple Celebration Center ku Isi, yagize ati: 'Ngwino uzifatanye n'abandi bera bose gushima Imana yawe. Warakijijwe, uyu munsi urakora akazi kubera Imana, uriho kubera Imana, rero ni igihe cyiza cyo gushima Imana'.

Apotre Serukiza Sosthène uyobora “Eglise Messianique pour la Guerison des ames au Rwanda” nawe aragira ati: 'Imyaka 30 irarangiye turi mu mahoro, turyama tugasinzira, tugenda ijoro n'amanywa, dufite ibyiza bitavugwa; iterambere, amahoro, ubutumwa bwiza buravugwa. 

Niyo mpamvu twitegereje ibyo byose Imana yakoze, amatorero yose mu gihugu n'abakozi b'Imana batandukanye, bishimiye kugira ngo bongere badutegurire igihe cyiza cya Rwanda Shima Imana.'

Umushumba Mukuru wa ADEPR, Rev. Isaie Ndayizeye yagize ati: 'Tuzahurireyo kugira ngo twese hamwe nk'abanyarwanda, dushyire hejuru izina ry'imana tuyishimire ibyo yakoze. Kandi uko tuyishima, ni ubundi buryo bwo kwakira imigisha y'ibyo Imana igiye kudukorera mu gihe kiri imbere.'

Pastor Barbara Umuhoza wanditse igitabo 'Shaped' aragira ati: 'Imana yirirwa ahandi hose igataha mu Rwanda’, ni ko bajyaga bavuga. Ariko twebwe nk’abanyarwanda tuzi ko Imana yibera hano.”  

Israel Mbonyi yaragize ati “Nyuma y’imyaka 30 yo kwibohora, Abanyarwanda twese dufite amashimwe adasanzwe. […] Ndabatumiye mwese muzaze duhimbaze Imana tubwire Imana ko tuyishimye ku mirimo myiza yakoze nyuma y’imyaka 30 yose.

Kandi tunayiragize n’imyaka yose iri imbere. Nzaba mpari, n’abandi baramyi badasanzwe n’abakozi b’Imana hirya no hino. Muzaze mwese, abanyarwanda tuzaterana nk’umuntu umwe, tuvuge kugira neza kw’Imana hanyuma tunasengere n’igihugu cyacu”.

Gaby Kamanzi ati: “Dufite impamvu nyinshi nk’abanyarwanda zo gushima Imana. Imana yakoze ibintu byinshi kandi bikomeye mu gihugu cyacu. Turi amahoro kandi tumeze neza, twabonye iterambere. Hari impamvu nyinshi nk’abanyarwanda tugomba guhurira hamwe tugashima Imana, cyane cyane nyuma y’imyaka 30. Nzaba mpari n’abandi baramyi”.

Ni mu gihe Aline Gahongayire agira ati: 'Ndanyuzwe kuko Imana yangize umunyarwandakazi.'

Pastor Serugo Benjamin [Ben] wo mu itsinda Ben & Chance rikunzwe cyane mu ndirimbo 'Zaburi Yanjye,' nawe yagize ati: 'Twese dufite impamvu zirenze 100 zikwiye gutuma dushima, turi mu gihugu gifite amahoro, dufite ubumwe bw'abanyarwanda, dufite ubuyobozi bwiza, iterambere mu gihugu, turagenda tukishyira tukizana, ubu ngubu ni amahoro.'

Umuramyi René Patrick yagize ati: 'Ni koko imirimo y'Imana irivugira mu gihugu cyacu yakoze muri iyi myaka 30, turabona byinshi bigaragaza yuko Imana yabanye natwe. Ni muri ubwo buryo tubatumiye abanyarwanda bose kugira ngo tuzifatanye kuramya Imana no kuyihimbaza kubera imirimo yayo yakoze kubona umunsi ku wundi.

Chryso Ndasingwa uri mu baramyi bagezweho muri iki gihe nawe aragira ati: 'Nyuma y'imyaka 30 yo kwibohora, dusubije amaso inyuma nk'abanyarwanda, dufite impamvu nyinshi zo gushima Imana.'

Pamela Mudakikwa yibukije Abanyarwanda impamvu zo gushima Imana. Ati “Imyaka 30 irashize u Rwanda rwibohoye. Uyu munsi dufite byinshi tumaze kugeraho ariko by’umwihariko dufite icyizere cy’ejo hazaza.”

Umutaramyi Ngenzi y’Intore [Yvan Ngenzi] nawe yagize ati: 'Imyaka 30 irashize twwibohoye nk'abanyarwanda, ntabwo twakwibagirwa ibyiza Imana yadukoreye n'uko yadushoboje kwibohora.'

Imiryango ya Stade Amahoro izaba ifunguye guhera saa tanu z'amanywa, naho igikorwa kizatangira saa cyenda z'amanywa.

Kwinjira muri iki giterane kuri buri wese ni ubuntu. Kizaririmbamo abahanzi batandukanye bakomeye barimo Israel Mbonyi, Aime Uwimana, Gaby Kamanzi, James & Daniella, Ben & Chance, Tonzi, Prosper Nkomezi, Bosco Nshuti n'abandi batandukanye.

Hazaba hari amakorali atandukanye akomeye nka Chorale de Kigali, Jehovah Jileh n'ayandi.

Igiterane cya 'Rwanda Ishima Imana' cyatangiye mu 2012 kigamije guha umwanya Abanyarwanda bagashima Imana ku byo yabakoreye. Gitegurwa na PEACE Plan Rwanda.

Harabura iminsi 4 gusa ngo Abanyarwanda bose berekeze kuri Stade Amahoro gushimira Imana ku byo Imana yabakoreye mu myaka 30 ishize

AMB. DR CHARLES MURIGANDE UBWO YAGANIRAGA N’ABANYAMAKURU

 

REV DR CHARLES MUGISHA AVUGA KO HARI IMPAMVU NYINSHI ZO GUSHIMA IMANA

REBA INDIRIMBO “TURAJE” YAHURIWEMO N’ABAHANZI B’IBYAMAMARE MURI GOSPEL

Uyu muyobozi yabigarutseho kuri uyu wa Gatatu tariki 25 Nzeri 2024, mu kiganiro n’itangazamakuru cyabereye muri Kigali Convention Center. Cyagarutse ku muhango wo Kwita Izina uzaba ku wa 18 Ukwakira 2024, aho abana 22 ari bo bazahabwa amazina.

Iyo unyujije amaso mu bantu bita amazina abana b'ingagi usanga ari abubatse amazina mu ngeri zinyuranye, yaba abo mu Rwanda ndetse no mu mahanga.

Mu 2023, abise amazina barimo: Kevin Hart (umunyarwenya), Larry Green (umukuru w'inama y'ubutegetsi ya Africa Wildlife Foundation), Dr Özlem Türeci na Dr Sierk Poetting (bo muri BioNTech Group); 

Queen Kalimpinya (umunyarwandakazi wa mbere ukina isiganwa ry'imodoka), Idris Elba na Sabrina Elba (Umukinnyi wa cinema n'umugore we w'umunyamideri), Joachim Noah na Lais Ribeiro (Uwari umukinnyi muri NBA, n'umugore we umunyamideri) n'abandi.

Mu 2022 abise amazina abana b'ingagi barimo: Igikomangoma Charles cy'u Bwongereza, Didier Drogba wahoze akinira Chelsea FC, Laurene Powell Jobs washinze ikigo Emerson Collective akaba n'umugore wa nyakwigendera Steve Jobs;

Louise Mushikiwabo Umunyamabanga Mukuru (OIF), Youssou N'Dour icyamamare muri muzika wo muri Senegal, Naomi Schiff icyamamare mu masiganwa y'imodoka wo mu Bubiligi, Sauti Sol itsinda ry'abanyamuziki ryo muri Kenya, Moses Turahirwa umunyamideli washinze inzu y'imideri ya Moshions n'abandi.

Rugwizangoga Michaella yasobanuye ko guhitamo abita izina abana b'ingagi bashingira ku muntu wagaragaje umuhate mu kurengera urusobe rw’ibinyabuzima, abafatanyabikorwa b’Ikigo cy’Igihugu cy’Iterambere (RDB) mu kubungabunga Ingagi zo mu Birunga n’abandi. 

Yasobanuye ko banareba no mu gice cy’abantu bari mu ruganda rw’imyidagaduro yaba abakinnyi ba filime, abaririmbyi, abubatse ibigwi mu mupira w’amaguru, abari mu makipe akorana n’u Rwanda binyuze muri gahunda ya Visit Rwanda nk’abo muri Arsenal, PSG n’izindi.

Ati “Iyo twicaye kenshi turareba tukibaza ni inde ushobora kwita Izina. Kenshi baba bari hagati ya 20 na 25. Ni iby’icyubahiro gushyirwa mu bita izina. Rero, ni abantu baba bafite ibyo bagezeho cyangwa se bubatse ibigwi mu ngeri zinyuranye.”

Rugwizangoga yavuze kandi ko bita cyane ku muntu ushobora gutwara neza ubutumwa bw’ibyo yabonye mu muhango wo Kwita Izina akabusakaza kure bitewe n’igice cy’ubuzima abarizwamo.

Yatanze urugero rw’abarimo umunyamideli Naomi Campbell wamamaye ku Isi, umukinnyi wa filime Idris Elba, Wiston Duke wakinnye muri ‘Black Panter’ n’abandi batumiwe mu bihe bitandukanye. Ati “Abo ni abantu bashobora gutwara ubutumwa neza.”

Mu bashyitsi bategerejwe kuri iyi nshuro ya 20 harimo bamwe mu bise amazina abana b’ingagi mu myaka ishize, abafatanyabikorwa batandukanye yaba ari abashya cyangwa se abasanzwe, harimo n’ibyamamare ku Isi mu bikorwa bitandukanye yaba muri Cinema, mu muziki, muri Siporo n’ahandi.

Kwita Izina ni igikorwa gishingiye ku muco Nyarwanda, ari nayo mpamvu nta muntu uhezwa.

Mu bikorwa by’imyidagaduro kandi kuri iyi nshuro hari abahanzi bo mu Rwanda no mu mahanga bazaririmba, ndetse hari n’abahanzi bo mu Karere ka Musanze bazaririmba.

Hari n’umukino uzahuza abakozi b’Akarere ka Musanze n’abakozi b’Ikigo cy’Igihugu Gishinzwe Iterambere (RDB), uzaba ku wa 6 Nzeri 2024.

Umuyobozi w’Ishami ry’Ubukerarugendo mu Rwego rw’Igihugu rw’Iterambere, RDB, Rugwizangoga Michaella, yatangaje ko bahitamo abita izina abana b’ingagi bashingiye ku bafite ibikorwa by’indashyikirwa mu byiciro bitandukanye by’ubuzima babarizwamo

Rugwizangoga yavuze ko abashyirwa ku rutonde rw’abantu bita izina abana b’ingagi baba ari abantu bafite ijwi rigera kure, ku buryo babasha gusakaza hirya no hino uko u Rwanda rwitaye ku ngagi zo mu Birunga

Amafoto ya bamwe mubise amazina abana b'ingagi mu 2023 ndetse n'amazina batanze

Ineza Grace (impirimbanyi yo kurengera ibidukikije) — Bigwi

Dr Özlem Türeci na Dr Sierk Poetting (bo muri BioNTech Group) – Intiganda

Audrey Azoulay (umukuru wa UNESCO) – Ikirango

Bernard Lama (wahoze ari umunyezamu wa PSG) — Ramba

Bukola Elemide 'Asa' (umunyamuziki) — Inganzo

Queen Kalimpinya (umunyarwandakazi wa mbere ukina isiganwa ry'imodoka) — Impundu

Jonathan Ledgard (umwanditsi w'ibitabo nka 'Giraffe') — Gisubizo

Wilson Duke (umukinnyi wa filimi nka Black Panther ukina nka M’Baku) – Intarumikwa

Idris Elba na Sabrina Elba (Umukinnyi wa cinema n'umugore we w'umunyamideri) – Narame

Joachim Noah na Lais Ribeiro (Uwari umukinnyi muri NBA, n'umugore we umunyamideri) – Turumwe

Cyrille Bolloré (umukuru wa kompanyi ya Bolloré) — Mugisha

Joe Schoendorf (Umwe mu batangije Silicon Valley) — Uburinganire

WIFR yashyizweho kugira ngo uhuze ibigo bafatanyirize hamwe kongerera ubushobozi abagore bakora mu rwego rw'imari binyuze mu mahugurwa atandukanye azagenda atangwa no kungurana ibitekerezo.

Kuri uyu wa 24 Nzeri 2024, ubwo WIFR yakiraga iyi Koperative,Umuyobozi Mukuru wa Umwalimu SACCO, Laurence Uwambaje, yavuze ko binyuze mu bufatanye bw'impande zombi, iyi koperative izakomeza kubahiriza ihame ry'uburinganire mu nzego zose haharanirwa ahazaza hafite inyungu.

Ati 'Tuzakomeza kandi gutanga amahirwe angana, no guharanira ko abakozi bose bafatwa neza kandi kimwe, hatitawe ku gitsina cyangwa uko umuntu agaragara.'

Umwalimu SACCO yashinzwe mu mwaka wa 2006, Banki Nkuru y'Igihugu [BNR] iyiha icyangombwa cyo gukora nk'ikigo cy'imari mu Rwanda ku itariki ya 22 Gashyantare 2008. Kugeza ubu ifite abanyamuryango barenga 120,000 n'amashami arenga 30 mu gihugu.

Umwe mu batangije WIFR akaba n'Umuyobozi Mukuru wa Copedu Plc, Raissa Muyango, yagaragaje ko ubu bufatanye bwitezweho gutanga umusanzu mu kwihutisha intego y'u Rwanda yo kuba igicumbi cya serivisi z'imari muri Afurika.

Ati 'Tunejejwe no kwakira Umwalimu SaCCO, ifatiye runini urwego rw'uburezi aho yorohereje kandi ikegereza serivisi z'imari abarimu bacu.'

Binyuze muri gahunda yo gushyigikira abagore, abakozi batatu ba Umwalimu SaCCO, bahawe buruse zo kwiyungura ubumenyi mu bijyanye n'imari mu Kigo cyo mu Bwongereza gitanga ubumenyi muri uru rwego [Chartered Institute for Securities & Investment- CISI].

Aya mahugurwa azaba yuzuzanya cyane na gahunda ya Guverinoma binyize mu Igicumbi mpuzamahanga cya serivisi z'imari n'amabanki cya Kigali, KIFC, aho intego ari uguhindura u Rwanda icyicaro cy'ishoramari ku Mugabane wa Afurika.

Niwebasa Clarisse yavuze ko 'iyi buruse yanyuze, ni ibintu bizampindura mu buzima bwite n'ikigo nkorera ni amahirwe aba aje kandi iyo aje urayakira, hari urundi rwego bizanshyiraho.'

Suku Clemance, na we ukorera Umwalimu SACCO ishami rya Rubavu, yagaragaje ko 'Hari ubumenyi ngiye kwiyongera irakamaro njye, ikigo nkorera n'igihugu. Ndabyishimiye nk'umugore kuko kera yabaga ari umuntu usigwa inyuma ariko ubu byarahindutse ubu iterambere turifitemo uruhare, iyo ugize amahirwe nk'aya ntuyapfusha ubusa.'

Niyibikora Chantal na we yahawe buruse, akaba akorera mu Umwalimu SACCO ishami rya Nyamagabe. Yavuze ko iyi buruse izamufasha kongera ubumenyi mu bijyanye n'imari ku buryo ubushobozi bwe buziyongerana n'umusaruro we kandi agatanga serivisi zirushijeho kunoga.

WIFR yashyizweho nyuma yo kubona ko abagore bakora mu bijyanye n'imari bakeneye umwanya wo kungurana ibitekerezo cyane ko nta mwanya wo kuba hamwe babonaga ngo bafatanye kubaka ubushobozi ndetse no kwishimira aho abagore bageze mu bijyanye n'imari.

Kuva WIFR yatarangira mu 2023, abagore barenga 50 bo muri za banki n'ibigo biciriritse ni bo bamaze gushyikirizwa izi buruse zo kwigira muri CISI.

Umuyobozi Mukuru wa Umwalimu SACCO, Laurence Uwambaje, yashimiye uruhare rwa WIFR mu guharanira iterambere ry’umugore

Umwe mu batangije WIFR akaba n'Umuyobozi Mukuru wa Copedu Plc, Raissa Muyango, yagaragaje ko ubu bufatanye bwitezweho gutanga umusanzu mu kwihutisha intego y’u Rwanda yo kuba igicumbi cya serivisi z’imari

Suku Clemance, na we ni umwe mu bahawe buruse

Niyibikora Chantal na we yahawe buruse avuga ko izamufasha kongera ubumenyi mu bijyanye n'imari ku buryo ubushobozi bwe buziyongerana n'umusaruro we

Niwebasa Clarisse, yahawe buruse yo kwihugura mu bijyanye n’imari

Koperative yo Kubitsa no Kugurizanya, Umwalimu SACCO, yabaye kimwe mu bigo bigize Umuryango utegamiye kuri Leta uharanira iterambere ry'abagore bakorera mu rwego rw'imari mu Rwanda [Women in Finance Rwanda- WIFR]

Binyuze muri gahunda yo gushyigikira abagore, abakozi batatu ba Umwalimu SaCCO, bahawe buruse zo kwiyungura ubumenyi mu bijyanye n'imari mu Kigo cyo mu Bwongereza gitanga ubumenyi muri uru rwego [CISI]

Hafashwe ifoto y’urwibutso

Ni ingingo yagarutseho kuri uyu wa Gatatu tariki ya 25 Nzeri 2024, ubwo yatangizaga ku mugaragaro Inama Mpuzamahanga ya AFSA2024, yahurije hamwe abahanga mu rwego rw'ibimenyetso bya gihanga bikoreshwa mu butabera n'abandi bafite aho bahurira na rwo bo hirya no hino muri Afurika no ku Isi, kugira ngo baganire ku iterambere ry'uru rwego muri Afurika.

Minisitiri Ugirashebuja yavuze ko u Rwanda rwahisemo gushyira imbere ubutabera, rubihamirisha ishyirwaho ry'Ikigo cy'Ibimenyetso bishingiye ku Bumenyi n'Ubuhanga bikoreshwa mu Butabera, RFI.

Ati 'Mbere y'uko RFI iba igice cy'urwego rw'ubutabera mu Rwanda, guca imanza zimwe na zimwe zasabaga ibimenyetso bya gihanga bishingiye ku bumenyi byari bimeze nko gutera inzuzi. Ariko ubu dufite ibimenyetso bishingiye ku bumenyi bishobora kujyanwa mu rukiko, ibituma ubutabera bukora neza kurushaho.'

Yagaragaje ko ubu bushobozi bw'u Rwanda busigaye bunabyarira umumaro ibihugu by'amahanga.

Ati 'Uretse gutanga ibimenyetso bya gihanga bishingiye ku bumenyi bigatanga ubutabera mu Rwanda, ubu RFI irimo gutanga umusanzu no mu Karere.'

RFI ikomeje kwesa imihigo mu gutanga serivisi zishingiye ku buhanga kuko kuva nko mu mwaka w'ingengo y'imari wa 2028/2019 kugera mu mwaka wa 2022/2023, yafashije gukemura ibibazo bishingiye kuri ibyo bimenyetso bigera ku 37,363.

RFI ifite laboratwari 12 zitanga uruhurirane rwa serivisi zirimo gupima uturemangingo ndangasano [ADN], guhangana n'ibyakwangiza umubiri, gutahura ibisasu, gusuzuma amajwi n'inyandiko n'izindi.

Umuyobozi Mukuru wa RFI, Dr. Charles Karangwa, yavuze ko iyi nama iri kubera i Kigali hazarebwa ingorane zigikoma mu nkokora uru rwego n'uko zabonerwa umuti.

Ati 'Ibyaha bigenda bihindura isura bijyanye n'iterambere, iki ni cyo gihe ngo Umugabane uhagurukire hamwe turebe uburyo twakemura ibibazo bijyanye no gukora ibyaha.'

Umwaka ushize u Rwanda rwahawe kwakira Ikigo Nyafurika cya AFSA [African Forensic Science Academy], kubera urwego rwari rumaze kugeraho mu gutanga izi serivisi. Iki kigo gihuriweho n'ibihugu bya Afurika byose.

Umuyobozi Mukuru wa AFSA, Dr. Antonel Olckers, yavuze ko 'AFSA yiyemeje gufasha abahanga mu bya siyansi, guteza imbere uru rwego himakazwa gufasha abakorewe ibyaha n'ababishinjijwe kubona ubutabera bukwiriye, no gufasha inzego z'ubutabera kubona ibimenyetso bihagije bishyigikira iperereza.'

Biteganyijwe ko igikorwa cya nyuma cy'iyi nama ari ugutera ibiti bya gakondo 100 muri Pariki y'Ubukerarugendo bubungabunga Ibidukikije ya Nyandungu [Nyandungu Eco Park-NEP], kikazakorwa n'abakomeye baturutse mu bice binyuranye bayitabiriye.

Minisitiri Ugirashebuja, yagaragaje u Rwanda rumaze kugera ku rwego rwiza mu gutanga serivisi zijyanye no kugaragaza ibimenyetso bishingiye ku bumenyi n'ubuhanga bikoreshwa mu butabera

Umuyobozi Mukuru wa RFI, Dr Charles Karangwa, yavuze ko iyi nama iri kubera i Kigali hazarebwa ingorane zigikoma mu nkokora uru rwego n'uko zabonerwa umuti

Umuyobozi Mukuru wa AFSA, Dr Antonel Olckers, yavuze ko AFSA yiyemeje gufasha abahanga mu bya siyansi no guteza imbere uru rwego himakazwa gufasha abakorewe ibyaha n'ababishinjijwe kubona ubutabera bukwiriye

Inama ya AFSA2024 ni bwo bwa mbere yari ibaye

Aba ni bamwe mu bakozi ba RIB bari bitabiriye iyi nama

Iyi nama yaberewe muri Kigali Convention Centre, KCC

Iyi nama yari yitabiriwe n’abo mu nzego zitandukanye

AFSA2024 yahurije hamwe abahanga mu rwego rw'ibimenyetso bya gihanga bikoreshwa mu butabera n'abandi bafite aho bahurira na rwo bo hirya no hino muri Afurika n'Isi

Amafoto: Shumbusho Djasiri