Category: Uncategorized

Ni ubujura bwiganje mu mirenge ya Muganza, Gikundamvura, Kamembe, Nzahaha na Gitambi aho usanga hari abiyita abakozi ba REG bagaha abaturage amashanyarazi ku kiguzi gihanitse kandi ubusanzwe iyi serivisi itishyuzwa, abandi ni abayobya insinga z'amashanyarazi bagakoresha umuriro utanyuze muri mubazi n'abiba ibikoresho by'amashanyarazi.

Iyi migirire yose igira ingaruka ku muturage mu buryo buziguye kuko serivisi REG itanga ari serivise za Leta.

Mu mezi arindwi ashize ni bwo ubuyobozi bw'Ikigo cy'Igihugu gishinzwe ingufu, REG, bufatanyije n'ubuyobozi mu nzego z'ibanze n'inzego z'umutekano bongereye imbaraga mu gushakisha abajura biba ibikoresho by'amashanyarazi n'abanyuza insinga hanze ya mubazi bagakoresha umuriro w'amashanyarazi batawishyura.

Umuyobozi wa REG Ishami rya Rusizi, Nzayinambaho Tuyizere Jacques, yabwiye IGIHE ko mu mezi arindwi ashize bamaze gufata abantu 10, ndetse ko uwo bafashe wese bahita bakora dosiye bakayishyikiriza Urwego rw'igihugu rw'ubugenzacyaha, RIB.

Ati 'Mu bantu 10 tumaze gufatira mu bujura bw'amashanyarazi n'ibikoresho byayo harimo umugore umwe n'umwarimu wo muri rimwe mu mashuri abanza yo mu murenge wa Nzahaha, wuriraga amapoto akarahurira abaturage, imirimo ubusanzwe ikorwa n'abakozi ba REG gusa'.

Uyu mwarimu wize ibijyanye n'amashanyarazi yatangiwe amakuru na bamwe mu baturage yari yarahaye amashanyarazi mu buryo budakurikije amategeko.

Uretse uyu mwarimu mu bafashwe harimo n'abaturage bayobeje insinga z'amashanyarazi bakajya bacana umuriro utanyuze muri mubazi.

Nzamurambaho Tuyizere avuga ko umuntu ufatiwe muri iki cyaha acibwa miliyoni 1 Frw y'amande igihe uwo muriro yawukoreshaga mu rugo, naho yaba yarawukoreshaga mu ruganda ruto agacibwa miliyoni 3 Frw na miliyoni 10Frw mu gihe yawukoreshaga mu ruganda runini.

REG isaba abaturage ko igihe bakeneye serivisi z'umuriro w'amashanyarazi bajya biyambaza ubuyobozi bubegereye, cyangwa bakagana ishami rya REG ribegereye kimwe n'uko bashobora guhamagara nomero itishyurwa 2727.

Ubuyobozi bwa REG bugira inama umuntu uziko akoresha umuriro atishyura ko yakwijyana ku buyobozi bwayo akigaragaza kuko byatuma agabanyirizwa igihano.

Abantu 10 barimo n'umwarimu bakurikiranyweho kwiba amashanyarazi

Miss Vanessa yabwiye InyaRwanda kuri uyu wa Kane tariki 24 Ukwakira 2024, ko bashyize hanze 'Save the Date' mu rwego rwo guteguza inshuti, abavandimwe n'imiryango kuzabashyigikira kuri uyu munsi udasanzwe mu rugendo rw'abo rw'urukundo.

Uyu mukobwa yavuze ko we yemeranyije n'umukunzi we kuzakora ubukwe, ku wa 6 Kanama 2025 ndetse no ku wa 14 Kanama 2025, bukaba buzabera mu Mujyi wa Kigali.

Atangaje itariki y'ubukwe nyuma y'uko ku wa 27 Nzeri 2024, yatunguwe n'umukunzi we amwambika impeta y'urukundo mu birori byabereye muri Kigali.

Yambitswe iyi mpeta hashize imyaka itanu atandukanye na Putin bakundanye igihe kirekire, kandi yari yaramwambitse impeta, ariko bahitamo gushyira akadomo ku mubano wabo.

Ku wa Gatandatu tariki 24 Kanama 2024, Vanessa n'umukunzi we bahisemo gukurikira Yesu nk'umwami n'umukiza babatizwa mu mazi menshi mu itorero Zion Temple mu muhango wabereye i Gahanga kuri Sanitari.

Yavuze ko yahisemo kubatizwa 'kubera ko ari ibintu nari maze igihe nshaka, kuko nashakaga kwiyegurira Yesu nk'umwami n'umukiza'. Uwase avuga ko kubatizwa ari kimwe mu byemezo byiza yafashe mu buzima bwe.

Yavuze ko agira igitekerezo cyo kubatizwa, yabiganiriyeho n'umukunzi we Dylan R. Ngenzi batangira urugendo rwo kwigira kubatizwa. Ati 'Twabiganiriyeho, dutangira urugendo.'

Miss Uwase yitabiriye irushanwa rya Miss Rwanda mu 2015, yegukanye ikamba ry'Igisonga cya mbere cya Miss Kundwa Doriane wegukanye ikamba uwo mwaka.

Kuva ubwo ntiyasibye mu itangazamakuru cyane cyane mu nkuru z'urukundo. Aherutse kwinjira mu bushabitsi bushamikiye ku birungo by'ubwiza ashinga sosiyete yise 'Her Majesty'. 

Mu kwamamaza ibikorwa bye, yifashisha cyane Nishimwe Naomie wabaye Miss Rwanda 2020, Nshuti Divine Muheto wabaye Miss Rwanda 2022, Kayumba Darina wabaye igisonga cya Kabiri cya Miss Rwanda 2022 n'abandi.

Uwase Vanessa yatangaje ko muri Kamena 2025 azakora ubukwe n'umukunzi we Dylan
Ku wa 27 Nzeri 2024, nibwo Dylan yatunguye Uwase Vanessa amwambika impeta y'urukundo

Dylan amaze igihe ari mu munyenga w'urukundo na Miss Uwase Vanessa yagejeje ku kwiyemeza kurushinga

Uyu muhanzikazi umaze umwaka umwe mu muziki wo kuramya no guhimbaza Imana, ni umwe mu bize mu ishuri rya muzika rya Nyundo, aho yasoreje mu 2019 atangira gucuranga mu itsinda ryitwaga Sebeya Band yari ahuriyemo n'abo biganye.

Nyuma y'imyaka ibiri akorana n'abo biganye ku Nyundo, Peace Hoziyana umaze kumenyekana nka Peace Hozy yaje kwitabira amarushanwa ya East Africa Got Talent icyakora ntiyabasha kuritwara kuko yaviriyemo muri ½.

Nyuma yo kwitabira aya marushanwa, Peace Hozy yaje kubengukwa na Israel Mbonyi bari bamaze imyaka hafi itatu bakorana mbere y'uko yiyemeza gutangira urugendo rwe mu muziki.

Mu kiganiro yagiranye na InyaRwanda, Peace Hozy umaze igihe kirenga umwaka atangiye urugendo rwo gukora umuziki ku giti cye, yatangaje ko kuri ubu umutima we wuzuye amashimwe kuko yamushoboje akaba amaze gukora indirimbo enye wenyine n’izindi ebyiri yahuriyemo n’abandi bahanzi.

Yagize ati: 'Kuva nawutangira kugeza ubungubu, nukuri ndashima Imana cyane ko iri kugenda inshoboza. Kuva natangira, maze gukora indirimbo enye ndetse n'izindi ebyiri nakoranye n'abandi bahanzi, ubwo zose hamwe zikaba esheshatu. Urumva ko aho bigeze bimeze neza, Imana igenda inshyigikira ikagenda impa amaboko mu buryo bumwe cyangwa ubundi.”

Peace Hozy yavuze ko icyo yishimira muri uru rugendo ari uko abantu bakomeje kwishimira ibikorwa bye, akumva ubuhamya bw’uko byubaka ubuzima bwa benshi, atanga urugero ku ndirimbo ye yise ‘Ruhuka.’

Ikindi yishimira ni uko Imana ikomeza kumuba hafi ikamushoboza gukora umuziki usaba byinshi bigoye birimo ubushobozi bw’ibifatika ndetse n’ubw’ibitekerezo. 

Akomoza ku ndirimbo nshya yashyize ahagaragara yise ‘Hozana,’ yatangaje ko ari indirimbo yamusabye igihe kirekire ku bw’impamvu zinyuranye zabayemo, kuko hari hashize amezi 10 asa nk’ucecetse.

Mu munsi umwe amaze ayishyize hanze, iyi ndirimbo y’iminota itatu n’amasegonda 41, imaze kurebwa n’abasaga ibihumbi icumi ku rubuga rwa YouTube.

Ati: “Nagiye mpuriramo n’ibintu byinshi bitandukanye, byatumye habamo kudindira cyane bigatuma indirimbo isohoka bisa nk’aho bitinze. Haciyemo agahe mu by’ukuri, ariko icyo nshima ni uko buriya Imana iba izi impamvu, iba izi n’igihe cya nyacyo igihangano Iba yarashyize ku mutima kigomba gusohokera.”

Yahishuye ko iyi ndirimbo yayikoze mu bihe bitari bimworoheye, ‘gusa hari igihe uca mu bintu bikomeye, mu mutima wawe ukumva hari kuzamukamo amashimwe. Aho kugira ngo ubabare cyangwa umutima wawe ujye kure, wihebe, wumve ko ibintu byabaye bibi cyane, ahubwo ukumva muri wowe hazamutsemo amashimwe.’

Yatangaje ko nyuma ya ‘Hozana’ atagiye kugenda ngo aterere agati mu ryinyo, ahubwo ko ibikorwa bikomeje ndetse nta gahunda afite yo gucika intege cyangwa gusubira inyuma.

Ati: “Ibikorwa bihari ni byinshi, ndi guteganya gukora n’izindi, hari n’indi ndirimbo ubu mfite muri studio na yo igomba gusohoka vuba rwose bidatinze. Hari n’ibindi bikorwa birimo gutegura ibitaramo n’ibindi byinshi biri imbere nzagenda nkora bivuye muri ibi bihangano byanjye.”

Mu ndirimbo za Peace Hozy zamenyekanye cyane, harimo iyo yise ‘Ruhuka,’ ‘Uganze,’ ndetse n’Itabaza. 

Umuhanzikazi Peace Hozy yashyize hanze indirimbo nshya yanditse ari mu bihe bitamworoheye

Yavuze ko mu gihe n’umwaka urenga akora umuziki we ku giti cye ashima Imana imushoboza ikamuha amaboko

Nyuma y’indirimbo enye amaze gukora wenyine, afite n’indi mishinga ateganya gukora mu gihe kizaza

“>Reba hano indirimbo ‘Hozana’ ya Peace Hozy

“>

Izi modoka ebyiri bazihawe ku wa Gatatu tariki ya 23 Ukwakira 2024, bakaba bazihawe nk'urwunguko ruva mu bikorwa by'ubukerarugendo biba byarakozwe muri Pariki y'Akagera baturiye. Abahawe izi modoka ni koperative ebyiri zirimo iya GAFCO na KAFCO ziherereye mu mirenge ya Gahini na Mwili mu tugari twa Kahi na Kageyo.

Umuyobozi wa Koperative KAFCO yo mu Murenge wa Mwili, Murindabigwi Martin, yavuze ko gukura amata muri uyu Murenge bayageza ku ruganda rw'Inyange, inshuro imwe imodoka yabacaga ibihumbi 125 Frw bikaba byari imbogamizi mu gutwara amata yabo.

Ati 'Iyi modoka ije gukuraho ikibazo cy'uko twaburaga imodoka amata akaba yarara ubu rero ayo twatangaga mu gukodesha imodoka tuzajya tuyashyira kuri konte turebe ko twazanagura indi. Ubu rero ubuyobozi turabugabira gucunga umutekano neza wa Pariki ku buryo nta rushimusi uzibeshya ngo adduce mu rihumye ayangize.'

Umuyobozi wa Koperative GAFCO yo mu Murenge wa Gahini, Nzaramba Kamugisha Jimmy, yavuze ko imodoka yabatwariraga amata yabacaga ibihumbi 140 Frw inshuro imwe, wakuba n'iminsi 30 ngo ugasanga ni amafaranga menshi. Yijeje Pariki y'Akagera ko bazakomeza gushyira imbaraga mu kurwanya icyayihungabanya kuko ngo ubu batarngiye kubona ko ibafitiye umumaro.

Umworozi witwa Rutembesa Moses yavuze ko imodoka bahawe bayishimiye cyane kuko ngo hari ubwo amata yabo yajyaga abura imodoka iyatwara akarara agahita apfa. Yavuze ko ubu bagiye kongera umukamo ku buryo buri mworozi yorora inka zitanga umukamo mwinshi kuko bizeye ko amata yabo azajya agera ku ruganda.

Umuyobozi wa Pariki y'Akagera wungirije ushinzwe guhuza Pariki n'abayituriye, Ishimwe Fiston, yavuze ko gusaranganya 10% umutungo wabonetse mu bukerarugendo ku baturage aribyo bituma abaturage benshi bibonamo iyi Pariki bakanagira uruhare mu kuyibungabunga.

Ati 'Iyo abaturage bayibungabunze inyamaswa ziratekana, gutekana kw'inyamaswa bisobanuye ko abazisura bazibona, uko bazibona niko hinjira amafaranga menshi hanyuma 10% akabagarukira. Urwi ruhererekane rero nirwo rutuma Pariki ibungabungwa mu buryo burambye, ubuhigi bukagabanuka kuko abantu bafite ubundi buryo bwo kubaho, gushyigikira ibikorwa by'ubworozi rero bituma ayo binjiza yiyongera bikanatuma badahiga inyamaswa.'

Umuyobozi w'Akarere ka Kayonza, Nyemazi John Bosco, yavuze ko aborozi bahawe imodoka kugira ngo zibafashe gukuraho ikiguzi kinini batangaga ngo bageze amata yabo ku ruganda rw'Inyange. Yavuze ko hari n'indi mishinga bari gukorera mu mirenge itandatu yose ikora kuri Pariki y'Akagera irimo kubaka amasoko, ubuhunikiro n'ubwanikiro, hari ahazatangwa amashanyarazi n'ibindi bikorwa byinshi byitezweho guhindura iterambere ryabo.

Izi modoka ebyiri zaguzwe miliyoni zirenga 90 Frw buri imwe ikaba ifite ubushobozi bwo gutwara litiro 5000 z'amata. Mu mwaka ushize uturere dutatu two mu Ntara y'Iburasirazuba twagabanyijwe urwunguko rwa miliyoni 800 Frw Akarere ka Kayonza akaba ariko kahawe menshi arenga miliyoni 560 Frw kuko ariko gafite imirenge myinshi ikora kuri Pariki.

Umuyobozi w'Akarere ka Kayonza, Nyemazi John Bosco, yasabye aborozi gukoresha neza izi modoka

Imodoka bahawe buri imwe ifite agaciro ka miliyoni 45 Frw ikaba ifite ubushobozi bwo gutwara litiro 5000 z'amata

Byabereye mu Mudugudu wa Nyakabanda, Akagari ka Bugarura Umurenge wa Nkombo.

Uyu mukobwa bivugwa ko yafashwe n'ibise ari mu rugo wenyine ababyeyi be bagiye mu kazi, abyara umwana akamuta mu bwiherero.

Abaturanyi be bavuga ko bumvise uruhinja rurize akanya gato ruhita ruceceka, bagiye kureba basanga uwo mukobwa aryamye mu bwiherero yananiwe kuhivana ndetse banahabona amaraso.

Abo baturanyi bahise bamuterura bajya kumuryamisha mu gikoni, bagerageza gukura uruhinja mu bwiherero ntibabishobora kuko bwari bwije, baza kurukuramo rwapfuye.

Umunyamabanga Nshingwabikorwa w'Umurenge wa Nkombo, Ndagijimana Damien, yabwiye IGIHE ko uwo mukobwa yoherejwe ku bitaro bya Gihundwe kugira ngo hakorwe isuzuma ryo kumenya niba koko uwo mwana ari we.

Nyuma y'isuzuma nibwo uyu mukobwa yatawe muri yombi ashyikirizwa RIB sitasiyo ya Kamembe naho uruhinja rujya gushyingurwa ku Nkombo.

Umukobwa wo mu karere ka Rusizi akurikiranyweho guta uruhinja mu bwiherero

Perezida Kagame na Marape bahuriye mu Murwa Mukuru wa Samoa, Apia, aho bitabiriye Inama y'Abakuru b'Ibihugu na za Guverinoma ya Commonwealth, CHOGM, iteganyijwe kuri uyu wa 25 Ukwakira 2024.

Ibiro by'Umukuru w'Igihugu, Village Urugwiro, byanditse biti 'Perezida Kagame yahuye na Minisitiri w'Intebe akaba na Minisitiri w'Ububanyi n'Amahanga n'umutungo wa Papouasie-Nouvelle-Guinée, James Marape uri muri Apia ku bwa CHOGM2024. Baganiriye ku buryo bwo kongerera imbaraga umubano hagati y'ibihugu byombi.'

Perezida Kagame na Minisitiri w’Intebe wa Papouasie-Nouvelle-Guinée, James Marape, bahuriye muri Samoa

Perezida Kagame yari kumwe n'abandi bayobozi barimo Minisitiri w'Ububanyi n'Amahanga, Olivier Nduhungirehe na Ambasaderi w'u Rwanda mu Bwongereza, Johnston Busingye

Baganiriye ku kongerera imbaraga umubano w’u Rwanda na Papouasie-Nouvelle-Guinée