Category: Uncategorized

Ibi babigarutseho kuri uyu wa Mbere tariki ya 11 Ugushyingo 2024, ubwo Ikigo gishinzwe Ubutaka ku bufatanye n'umuryango utegamiye kuri Leta wa Landesa batangaga amahugurwa.

Ubushakashatsi bwagaragaje ko mu Akarere ka Kayonza abaturage bishimira serivisi z'ubutaka ku kigero cya 67% mu gihe umwaka ushize byari 51%.

Bimwe mu bituma izi serivisi zitagenda neza harimo kuba abakora muri serivisi z'ubutaka bagira akazi kenshi bitewe nuko ngo usanga bashinzwe ubutaka, imiturire n'ibikorwaremezo kandi ari umuntu umwe.

Mutanganzwa Abdul Karim ushinzwe ubutaka mu Murenge wa Ndego, yavuze ko impamvu serivisi z'ubutaka abaturage bavuga ko ziri hasi bituruka ku nshingano nyinshi bagira zirimo kuba umukozi ushinzwe ubutaka, akaba anashinzwe ibikorwaremezo ndetse anashinzwe imiturire.

Ibi byose ngo usanga bikeneye umunsi wo kujya mu baturage n'undi munsi wo gukorera ku biro ku buryo ngo iyo yagiye mu baturage usanga abamubuze mu biro bavuga ko adahari agasaba ko bahabwa moto yabafasha mu ngendo.

Umukozi ushinzwe ubutaka, ibikorwaremezo n'imiturire mu Murenge wa Nyamirama, Nyirashakwe Aline, yavuze ko bakeneye moto bitewe n'uburyo bagira akazi kenshi karimo akabasaba nko kubanza kugenzura ibyangombwa bagiye gutanga ndetse n'indi mirimo irimo kugenzura imiturire mu Murenge wose.

Ati 'Hari igihe umuturage aza agasanga wagiye kureba ibijyanye n'imiturire cyangwa ibikorwaremezo akagenda avuga ko utari uhari ari nayo mpamvu dushyiraho iminsi nk'ibiri mu cyumweru indi minsi tukayiharira izindi serivisi. Kujya kuri 'terrain' biratugora serivisi nyinshi tuzitangira mu biro hazamo kujya kureba abaturage bikagorana turamutse tubonye nka moto byadufasha cyane.'

Umuyobozi w'umuryango Landesa uri gufatanya n'Ikigo cy'Igihugu gishinzwe ubutaka, Emmanuel Ngomiraronka, yavuze ko bazahugura abayobozi basaga 1200 barimo abo mu Karere, imirenge n'utugari mu kumenya itegeko rishinzwe ubutaka. Yavuze ko buri Kagari gafite komite ishinzwe ubutaka n'Abunzi kandi ko bose bazabahugura kugira ngo babashe gufasha abaturage.

Umuyobozi w'Akarere ka Kayonza, Nyemazi John Bosco, yavuze ko impamvu ituma serivisi z'ubutaka zidakora neza harimo na komite zimwe na zimwe zashyizweho zidakora bituma ku mirenge hagaragara ibibazo byinshi.

Yavuze ko guhugura izi komite bizabafasha mu korohereza abakozi bashinzwe serivisi z'ubutaka ku mirenge.

Ati 'Ntabwo zaba ari inshingano nyinshi ahubwo byaterwaga n'uko hari ibyiciro byabaga bitakoze inshingano zabyo, iyo bamwe batagaragaje amakuru y'ingenzi biragorana ariko ubu abantu nibamenya amategeko na za komite zikayamenya bizajya byoroha mu kurangiza ibibazo by'ubutaka mu mirenge. Ikindi turimo gutekereza mu buryo burambye uko Akarere kafasha bariya bakozi kubona moto bikabafasha gukora akazi neza, ubu hari ubundi buryo tubafashamo ari nabwo bakoresha mu gihe buriya buryo bwa moto ari uburyo burambye.'

Mu byo bari guhuguramo aba bayobozi harimo itegeko rigenga ubutaka ryasohotse mu 2021, bahugurwa kandi ku mategeko agenga umuryango kuko ubutaka akenshi ngo bukunze kuba ari ubw'umuryango bakamenya ibijyanye n'izungura, uko umuntu wasezeranye ivanga mutungo yahabwa ubutaka.

Bazanahugurwa uko bakemura impaka zishingiye ku butaka ku buryo bafasha abaturage mu gukemura ibibazo byabo bitagombereye kujya mu nkiko.

Umuyobozi w'Akarere ka Kayonza, Nyemazi John Bosco, yavuze ko bateganya guha aba bakozi moto nka bumwe mu buryo burambye bwo gukemura

Nyirashakwe yavuze ko bakeneye moto kugira ngo zibafashe mu kazi

Mutaganzwa ushinzwe serivisi z'ubutaka mu Murenge wa Ndego yasabye ubuyobozi kubaha moto zatuma bakora akazi neza

Ni gahunda y'imyaka itatu izakorerwa mu turere dutatu dutsindisha ki kigero kiri hasi ari two Gakenke, Rusizi, Gisagara, Karongi na Ngororero.

Iyo gahunda yatangiye gushyirwa mu bikorwa muri Nzeri uyu mwaka ariko yamurikiwe ku mugaragaro i Kigali ku itariki 11 Ugushyingo 2024 mu nama y'iminsi itatu ihurije hamwe ibihugu 39 bya Afurika biri kwiga ku kuzamura uburezi bw'ibanze.

Abarimu 150 bo mu turere iyi gahunda izakorerwamo bazahugurwa ku buryo bwo kwigisha abana bo mu mashuri abanza hifashishijwe ibikoresho bituma abana babasha kumva mu ngiro ibyo bigishwa mu masomo y'Imibare n'Icyongereza.

Abana 75.000 biga muri ibyo bigo byatoranyijwe ni bo bazafashwa n'iyo gahunda, aho mu mfashanyigisho basanganywe hazongerwamo ibikoresho ngiro nk'ibishushanyo by'inyuguti, iby'ibinyampande n'ibindi bitandukanye bibafasha kwiga ibintu babasha kubikoraho.

Abarimu bazahugurwa ku kwigishiriza kuri ibyo bikoresho no gufasha abana basigara inyuma kugira ngo na bo babanze bumve neza icyo bifasha mu myigire noneho babashe gufasha ba bana kwiga batsinde nk'abandi.

UNICEF igaragaza ko hari inyigo z'abahanga zerekanye ko umwana iyo yiga ibintu mu ngiro bimworohereza kubifata ndetse ikaba ari na gahunda Leta y'u Rwanda yatangiye kwitaho.

Ubwo iyo gahunda yamurikwaga ku mugaragaro, ubuyobozi bwa Hempel Foundation bwagaragaje ko buyitezeho kuzamura abana bagira intege nke mu mitsindire bitewe n'impamvu zinyuranye na bo bakabasha gutsinda nka bagenzi babo.

Umuyobozi Nshingwabikorwa wa Hempel Foundation, Anders Holm yagize ati 'Ubufatanye bwacu na UNICEF burashimangira umuhate dufite mu gukemura ikibazo cy'abana bato batsindwa mu ishuri kuko dushaka ko buri mwana hatitawe ku byo anyuramo abasha gufata neza ibyo yiga mu mashuri abanza. Iyi gahunda y'ingenzi igamije kunganira Leta y'u Rwanda muri gahunda nzahurabushobozi mu mashuri abanza aho amasaha atatu mu cyumweru aharirwa abana badatsinda nk'abandi'.

Umuyobozi wa UNICEF Rwanda, Julianna Lindsey we yavuze ko kwita ku burezi bw'ibanze bw'abana badatsinda neza binyuze mu bufatanye bigabanya ibyago byo kuba abo bana bata ishuri.

Ati 'Uburezi bw'ibanze ni rwo rufatiro rw'uburezi bw'ahazaza. Abanyeshuri batigishwa neza mu mashuri abanza usanga bahorana amanota make kandi ibyo bibongerera ibyango byo guta ishuri hakiri kare. Gahunda yo kubongerera ubushobozi yatangijwe mu Rwanda ifasha mu gukuraho izo mbogamizi. Kongerera abarimu ubushobozi, gukorana n'abaturage ndetse no gusangira ubumenyi ni zo nkingi z'iyi gahunda yo kuzamura uburezi bw'ibanze ku bana bato'.

Imibare y'umwaka w'amashuri wa 2022-2023 igaragaza ko mu Rwanda abana bagera kuri 94% bigaga mu mashuri abanza ndetse ari intambwe ishimishije, gusa nanone UNICEF ikagaragaza ko hakiri ikibazo ku ireme ry'uburezi bahabwa ndetse no ku kwimukira mu mashuri yisumbuye.

Hasobanuwe ibyo iyo gahunda izibandaho

Umuyobozi Nshingwabikorwa wa Hempel Foundation, Anders Holm yavuze ko iyo gahunda izazamura abana bagira intege nke mu mitsindire bitewe n'impamvu zinyuranye na bo bakabasha gutsinda nka bagenzi babo

Umuyobozi wa UNICEF Rwanda, Julianna Lindsey yavuze ko kwita ku burezi bw'ibanze bw'abana badatsinda neza binyuze mu bufatanye bigabanya ibyago byo kuba abo bana bata ishuri

Ubwo bufatanye buzamara imyaka itatu

Iyo gahunda yatangijwe ku mugaragaro i Kigali

Itsinda RWAFPU3-3 rigizwe n'abapolisi 180 bayobowe na SSP Thomas Kayonga, bahagurutse mu gitondo ku kibuga cy'indege Mpuzamahanga cya Kigali, berekeza mu Mujyi wa Bangassou, aho basimbuye bagenzi babo bagize itsinda RWAFPU3-2 ryari rimaze igihe kingana n'umwaka nabo bagarutse mu gihugu ku mugoroba.

Mu mwaka wa 2014 ni bwo u Rwanda rwatangiye kohereza abapolisi mu bikorwa bya MINUSCA.

U Rwanda rufite amatsinda ane y'abapolisi mu butumwa bw'Umuryango w'Abibumbye muri Repubulika ya Centrafrique (MINUSCA).

Ayo arimo RWAPSU ndetse na RWAFRU-1, amatsinda akorera mu Murwa Mukuru Bangui, aho buri tsinda rigizwe n'abapolisi 140.

Mu gihe RWAPSU icunga umutekano w'abayobozi bakuru muri Guverinoma ya Centrafrique ndetse n'abayobozi bakuru ba MINUSCA, RWAFPU-1 yo ifite inshingano zo kurinda abasivile, kurinda inyubako z'umuryango w'abibumbye no gucungira umutekano abacamanza b'urukiko mpanabyaha rwihariye (CPS).

Andi matsinda abiri arimo iryitwa RWAFPU-2 rikorera ahitwa Kaga Bandoro mu bilometero birenga 300 uvuye i Bangui n'irya RWAFPU-3 rigizwe n'abapolisi 180 rikorera ahitwa Bangassou mu bilometero 725 uvuye mu Murwa Mukuru.

Ikibazo cya Meya Mukanyirigira Judith uyobora Rulindo na Ndagijimana wari Gitifu w'Umurenge ni kimwe byagarutsweho cyane mu itangazamakuru no ku mbuga nkoranyambaga muri iyi minsi.

Byatewe ahanini no kuba umuyobozi w'akarere yarirukanye mu kazi Ndagijimana ariko undi agaragaza ko yarenganyijwe ndetse aranarenganurwa ubuyobozi bw'akarere busabwa kumusubiza mu kazi.

Ibyo byaje no gukorwa Ndagijimana asubizwa mu kazi ariko ahindurirwa inshingano noneho agirwa Umujyanana wa Meya w'Akarere ka Rulindo aho gusubira kuyobora umurenge.

Ibaruwa imusubiza mu kazi muri izo nshingano nshya yayihawe ku itariki 4 Ugushyingo 2024 ariko nyuma y'iminsi ibiri aza kwandikirwa indi na Meya abereye umujyanama amusaba ibisobanuro.

Iyo baruwa IGIHE ifitiye kopi yandikiwe Ndagijimana ku itariki 7 Ugushyingo 2024 ifite umutwe ugira uti 'Gusaba ibisobanuro mu nyandiko ku makosa y'imyitwarire akuvugwaho igihe wari Umunyamabanga Nshingwabikorwa w'Umurenge wa Mbogo'.

Meya Mukanyirigira atangira iyo baruwa agaragaza ko ayanditse ashingiye ku ngingo z'amategako harimo irigenga akarere ndetse n'ingingo yo muri sitati rusange igenga abakozi ba Leta.

Igika kigaragaza ibisabirwa ibisobanuro kigira iti 'Ndagusaba ibisobanuro ku ikosa ryo gukoresha nabi ububasha wahawe ugategeka umukozi witwa Uwimana Françoise, umukozi ushinzwe irangamimerere na notariya mu Murenge wa Mbogo guhindura amazina ya Musengayezu Sankara akitwa Usenga Thomas Sankara nta cyo ushingiyeho ubitewe gusa n'umubano wihariye wari ufitanye n'uwasabye serivisi ari we Usenga Thomas Sankara'.

Igika gukurikiraho cyaka Ndagijimana ibisobanuro kandi ku kuba yarakoresheje umwanya w'umurimo mu nyungu ze bwite agamije kunoza umubano wihariye yari afitanye na Usenga Thomas Sankara yashinjwe na Meya guhindurira amazina adakurikije ibiteganywa n'amategeko.

Ibaruwa isoza igira iti 'Urasabwa gutanga ibisobanuro mu nyandiko kuri ayo makosa mu gihe kitarenze iminsi itanu uhereye igihe uboneye iyi baruwa'.

Ibaruwa kandi bigaragarara ko ibirimo byamenyeshejwe Minisitiri w'Ubutegetsi bw'Igihugu, uw'Abakozi ba Leta n'Umurimo, abanyamabanga nshingwabikorwa harimo uwa Kamisiyo y'Abakozi ba Leta n'Umurimo n'uw'Akarere ka Rulindo, Guverineri w'Amajyaruguru, Perezida wa Njyanama ya Rulindo ndetse na ba visi meya bombi b'ako karere.

Ayo makosa Meya Mukanyirigira yasabagaho ibisobanuro yari yahawe umurongo na Komisiyo y'Abakozi ba Leta n'umurimo mu ibaruwa ya mbere kuri icyo kibazo yamwandikiye, aho yamusabaga gusubiza umukozi mu kazi, nyuma y'uko bigaragaye ko iryo kosa ryo guhindurira umuntu amazina mu buryo butari bwo atari we warikoze, nk'uko byemejwe n'Ikigo cy'Igihugu cy'Indangamuntu ku itariki ya 6 Ugushyingo 2023.

Ibyo ariko Meya Mukanyirigira asa n'utarabikozwaga kuko ku itariki 22 Ukwakira 2024, yandikiye ibaruwa Umunyamabanga Nshingwabikorwa wa Komisiyo y'Abakozi ba Leta n'Umurimo asaba ko bakongera gusesengura neza mu bushishozi bagaha agaciro impamvu zashingiweho kugira ngo Ndagijimana ahabwe igihano cyo kwirukanwa.

Iby'iki kibazo byaje kugera no muri Minisiteri y'Ubutegetsi bw'Igihugu, aho ku itariki 30 Ukwakira 2024 Dr. Mugenzi Patrice uyobora iyo minisiteri yavuze ko icyo kibazo bari kugishakira umuti kandi ko abantu badakwiye kugifata nka byacitse.

Ni ibikorwa bikomeje gushyirwamo imbaraga nyuma y'aho uyu mugezi umaze iminsi wibasirwa n'isuri n'inkangu zirimo n'iyabereye mu murenge wa Mururu w'Akarere ka Rusizi muri Werurwe 2024, icyo gihe amazi y'uyu mugezi yasandaye mu mirima y'abaturage yangiza imyaka y'abaturage.

Iyi nkangu yakurikiwe n'indi yabereye mu murenge wa Bugarama aho umusozi waridutse mu mpeshyi ugafunga umuhanda Kamembe-Bugarama ndetse ukanashyira mu manegeka imiryango irenga 60.

Minisitiri ushinzwe ibikorwa by'ubutabazi, Gen. Maj (Rtd) Albert Murasira, avuga ko bari gukora ubushakashatsi ngo hamenyekane igituma imisozi y'akarere ka Rusizi iriduka gusa ngo bakeka ko bifitanye isano no kuba ari ubutaka bwo mu gace k'ibirunga.

Umuyobozi w'Akarere ka Rusizi, Dr. Anicet Kibiliga, avuga ko aka karere gafite imisozi miremire n'ubutaka bukunze gutwarwa n'isuri ibujyana mu kiyaga cya Kivu, mu mugezi wa Rusizi no mu yindi migezi itandukanye.

Ati “Hari gahunda yo gutera ibiti birenga ibihumbi 300 no gukora imirwanyasuri kugira ngo ubutaka butaducika. Mu biti turi gutera dufatanyije n'abafatanyabikorwa batandukanye bita ku bidukikije harimo ibivangwa n'imyaka n'ibiti by'imbuto ziribwa'.

Umuyobozi wa ARCOS ushinzwe ubufatanye n'iterambere, Ntukamazina Jacqueline, avuga ko mu mpamvu zatumye bahitamo kubungabunga umugezi wa Rusizi n'ikiyaga cya Kivu ari uko umaze igihe wibasirwa n'isuri n'inkangu.

Ati “Iyo ubutaka bumaze kubamo bwinshi amazi arakama amafi ntabone aho yororokera, amazi akangirika n'ubutaka bwacu bukagenda uburumbuke bw'ubutaka bukagabanyuka kuko haba hagiye ubutaka burimo ifumbire”.

Binyuze mu mushinga Laressere uterwa inkunga n'ikigega Bezos Earth Fund, umuryango ARCOS n'abafatanyabikorwa bawo barateganya gusubiranya hegitari zirenga 4000 mu Rwanda, u Burundi na Repubulika Iharanira Demokarasi ya Congo.

Muri uyu mwaka w’ingengo y’imari, Akarere ka Rusizi gafatanyije n’abafatanyabikorwa bako karateganya gutera ibiti ibihumbi 300

Imisozi yo muri RDC na yo igiye gusubiranywa

Abaturage bishimiye ibiti biri guterwa mu mirima yabo bavuga ko bizarinda ubutaka bwabo isuri n’inkangu

Mu byangiza ibidukikije harimo n’ubuhinzi budakorwa kinyamwuga

Imisozi yo mu cyogogo cy’umugezi wa Rusizi yatengukaga ikaroha itaka muri uyu mugezi

Amatora yabaye ku Cyumweru tariki 10 Ugushyingo 2024, mu nama yahuje abagize uyu muryango urwanya ruswa n'akarengane, ukaba usanzwe ukorera mu bihugu bisaga 100 birimo n'u Rwanda.

Mu bandi bashya batorewe rimwe na Mupiganyi muri manda y'imyaka itatu, harimo umunya Trinidad Tobago witwa Dion Abdool ndetse na Christina Margaryan wo muri Armenia. Uyu Christina we akaba yinjiye muri komite ishinzwe kugenzura no gukurikirana abanyamuryango ndetse no kwemeza abashya.

Nyuma yo gutorwa, Mupiganyi yahamije ko ari iby'agaciro kuba yagiriwe icyizere cyo kuba mu bagize inama y'ubuyobozi y'uyu muryango kandi ko azakorana n'abandi mu bihugu bitandukanye mu kugera ku ntego.

Yagize ati 'Tuzubakira kuri byinshi umuryango wacu umaze kugeraho ariko by'umwihariko nzashyigikira ko uruhare rw'umuryango rukomeza kwiyongera mu guteza imbere ubwangamugayo no kurwanya ruswa n'akarengane. Aha harimo kurwanya ibyaha bishya nyambukiranyamupaka bishingiye kuri ruswa cyane cyane ibyo kunyereza umutungo wa rubanda n'iyezandonke, dore ko kubirwanya bisaba ubufatanye mpuzamahanga.'

Mbere yo gutorerwa izi nshingano, Mupiganyi yari umwe mu bagize inama y'abahanga 15 bagize uruhare mu gutegura gahunda n'icyerekezo 2030 uyu muryango ugenderaho guhera mu 2021. Kandi yari no muri komite ngishwanama ikurikirana ishyirwamubikorwa ry'iyo gahunda ya 2030.

Transparency International ni umuryango urwanya ruswa n'akarengane ku Isi yose aho ufite amashami asaga 100.

Binyuze mu bushakashatsi, ubukangurangaga ndetse n'ubuvugizi, uyu muryango uharanira ko abatuye Isi babaho ubuzima bwiza, abayobozi bakabazwa inshingano ndetse hakubakwa imiyoborere ishingiye ku muturage izira ruswa n'akarengane.

Abagize inama y'ubuyobozi y'uyu muryango baba bafite inshingano zitandukanye harimo no gushyiraho gahunda y'ibikorwa y'igihe kirekire (strategy), gukurikirana ko ishyirwa mu bikorwa ndetse ko intego z'umuryango zigerwaho muri rusange.

Mupiganyi yatorewe kuba umwe bagize inama y'ubuyobozi ya Transparency ku rwego rw'Isi.

Iyi Seri yatangiye gutambuka kuri ZACU TV muri Kanama 2024, igitekerezo cyayo gishingiye ku nkuru ya Seri 'Kareena Kareena' yatunganyijwe na Zee Entertainment, imwe mu nzu zikomeye za filime mu Buhinde. Nyuma y'ibiganiro na Zacu Entertainment yo mu Rwanda, Zee yemereye Zacu gutunganya iyi seri 100% mu Kinyarwanda.

Kaliza wa Kalisa ivuga ku mukobwa witwa Kaliza ukiri muto uturuka i Rusizi akajya gushaka akazi i Kigali, bikarangira akora mu kigo cyitwa Umusambi.

Gusa, kugira ngo abone ako kazi, bimusaba kwiyoberanya akigira uwashatse umugabo. Inkuru irushaho kuryoha nyuma y’uko uyu mukobwa abonye akandi kazi kuri radiyo, bikamuviramo kwamamara, aho asigara ahanganye no kubaho ubuzima bubiri.

Mu kiganiro na InyaRwanda, Wilson Misago, Umuyobozi wa Zacu Entertainment, yavuze ko yashimishijwe cyane no kuba iyi Seri yaratwaye igihembo cya Seri nziza mu Iserukiramuco rya Mashariki.Yagaragaje ko abantu bose barebye iyi seri bagiye bamuha ibitekerezo byiza, bigaragaza ko bayikunze cyane.

Ati: 'Kaliza wa Kalisa ni imwe muri Seri z'ingenzi tumaze gukora. Kugira ngo ibeho tubicyesha ubufatanye twagiranye na Zee Entertainment, ikatwemerera gukora imwe muri Seri zabo y'ibihe byose, ariko kuri iyi nshuro mu Kinyarwanda. Dushimishijwe kandi ko twemerewe gukora ibice byinshi by'iyi Seri, bityo abakunzi bayo ntago bazagira irungu.'

Yakomeje kandi ashimira abakinnyi n'abandi bakozi bayigizemo uruhare.

Kaliza wa Kalisa ikinamo Gatesi Divine Kayonga nk'umukinnyi w'imena, Antoinette Uwamahoro, Irunga Longin, Nshimirimana Yannick, Dusenge Clenia n'abandi banyuranye. Ni Seri kandi yayobowe na Niyoyita Roger, nawe uherutse kwegukana igihembo cy'umuyobozi mwiza wa filime (Best Director) mu bihembo bya Mashariki.

Ibice bishya bya Seri Kaliza wa Kalisa (S3 na S4) biri gutunganywa na Zacu Entertainment, bikazatangira kunyura kuri Zacu TV (shene ya 3 kuri CANAL+) mu mpera z'uyu mwaka, kuva ku wa 30 Ukuboza, bikazakomerezaho no muri 2025.

Kaliza wa Kalisa yegukanye igihembo mu iserukiramuco rya Mashariki

Yannick Nshimirimana akina yitwa Rwema muri filime ‘Kaliza wa Kalisa’ ikunzwe cyane muri iyi minsi

Amafoto agaragaza ifatwa ry’iyi filime iri mu zikunzwe cyane mu Rwanda

Gatesi Divine Kayonga ni umukinnyi w’imena muri iyi filime y’uruhererekane nziza kurusha izindi nk’uko byemerejwe muri Mashariki African Film Festival

Antoinette Uwamahoro ni umwe mu bakinnyi ba filime ‘Kaliza wa Kalisa’

Umuyobozi wa Zacu TV, Wilson Misago ni umwe mu bakurikiranira hafi ibikorwa bya Kaliza wa Kalisa

Niyoyita Roger wayoboye iyi filime hamwe na Wilson Misago uyobora Zacu TV

Gatesi Divine Kayonga ni umwe mu baryoshya cyane iyi filime ‘Kaliza wa Kalisa’