Category: Uncategorized

Ibi ni bimwe mu byatangajwe mu kwizihiza Umunsi Mpuzamahanga wo kurwanya indwara ya Diabète wabaye ku wa Gatanu, tariki 15 Ugushyingo 2024.

Ubu bushakashatsi bwakorewe ku baturage 5,676 bo mu ntara zose z'igihugu n'Umujyi wa Kigali, bari hagati y'imyaka 18 na 69.

Ibyavuye muri ubwo bushakashatsi byagaragaje uko abanywa itabi mu Rwanda bahagaze, aho Intara y'Amajyepfo iri ku mwanya wa mbere mu kugira abanywa itabi benshi n'ijanisha rya 9.8%, Intara y'Iburasirazuba kava iya kabiri ku kigero cya 8.8%.

Umujyi wa Kigali uri ku mwanya wa gatatu mu kugira abanywa itabi benshi, aho bari ku kigero cya 6.9%, Amajyaruguru ni 5%, mu gihe Intara y'Iburengerazuba ari yo ifite abantu bake banywa itabi mu Rwanda, aho bagera kuri 4.2%.

Icyakora ubu bushakashatsi bushya bwagaragaje ko abanywa itabi mu Rwanda bagabanyutse kuko kuva mu 2013 kugeza mu 2022 baganyutse ku kigero cya 5.8%. Ni ukuvuga ko mu 2013 bari 12.5%, mu gihe mu 2022 bari kuri 7.1%.

Iyi raporo kandi ikomeza igaragaza n'uko abanywa inzoga bahagaze mu Rwanda, aho Intara y'Amajyaruguru iri ku mwanya wa mbere mu kugira benshi ku kigero cya 56.6%.

Amajyepfo ari ku mwanya wa kabiri ku kigero cya 51.6%, Iburengerazuba ni 46.5%, Iburasirazuba ni 43.9%, mu gihe Umujyi wa Kigali uri ku mwanya wa gatanu na 42%.

Ubu bushakashatsi kandi bwanagaragaje ibijyanye no kugira umubyibuho ukabije bihagaze muri buri ntara, nk'imwe mu ntandaro y'indwara nyinshi zitandura.

Umuyobozi w'ishami rishinzwe kurwanya indwara zitandura mu kigo cy'igihugu cy'ubuzima, Dr. Uwinkindi François, yagaragaje ko Umujyi wa Kigali uri ku mwanya wa mbere mu kugira abafite umubyibuho ukabije, kuko ½ cy'abafite umubyibuho ukabije mu gihugu ari ho batuye kandi ukaba wiganje mu bagore.

Yagize ati 'Ubushakashatsi bwerekanye ko 50% by'abagore bo mu mujyi wa Kigali bafite umubyibuho ukabije, bafite ibilo byinshi ugereranyije n'uko bareshya'.

Yasoje ashishikariza abantu gukora siporo bihoraho mu rwego rwo kwirinda umubyibuho ukabije kuko ahanini ariwo uvamo izindi ndwara. Yasabye kandi abanyarwanda kugabanya inzoga n'itabi, abo bizashobokera bakabivaho burundu.

Umuyobozi w’ishami rishinzwe kurwanya indwara zitandura mu Kigo cy’Igihugu cy’Ubuzima, Dr. Uwinkindi François, yasabye Abanyarwanda kwitabira siporo no kureka inzoga n’itabi uko bishoboka

Yabigarutseho ubwo yatangizaga Ihuriro rya 17 rya Unity Club Intwararumuri, asaba abaryitabiriye bose kuzirikana ko Ubunyarwanda ari yo sano muzi ikwiye kuranga Abanyarwanda.

Ati 'Ni ngombwa gukomeza kuzirikana ko Ubunyarwanda ari yo sano muzi yacu, ubumwe bwacu bukaba ingabo ikingira icyo ari cyo cyose cyadutanya, tutazirara tukirengagiza ko uwabibye ingengabitekerezo ya Jenoside akanayishyira mu bikorwa yarekeye aho.'

Yashimangiye ko abifuriza u Rwanda inabi bagihari kandi barimo Abanyarwanda n'abanyamahanga bagifite imyumvire mibi yo kurusenya ariko ko ntawe bakwiye guhangayikisha.

Ati 'Abo ariko ntawe bakwiye guhangayikisha no guhungabanya kuko ibyo twagezeho byose bari bahari bavuga kandi bakora ibyashoboraga kutudindiza, ariko wa mutima w'u Rwanda watumye tudacika intege.'

Yakomoje kandi kuri imwe mu myitwarire ikigaragara muri bamwe ikagaragaza ubugome n'intekerezo mbi.

Ati 'Hari ingero nyinshi z'ibyo tukibona bigaragaza ubugome n'intekerezo mbi mu bantu, mujya mwumva amakuru y'abasenyerwa inzu, abohererezwa ubutumwa bw'iterabwoba, amatungo yicwa andi agakomeretswa, abakorerwa ihohoterwa n'ibindi bigamije kubarimbura burundu kubera abo ari bo.'

Yagaragaje ko hakwiye kwigishwa amasomo yihariye ku mateka haba mu Itorero ry'Igihugu, mu madini n'amatorero no mu mashuri.

Yasabye urubyiruko gusangiza abandi imitekerereze myiza kuko ishobora kugira abo ihindura.

Yasabye kandi abanyamadini kwirinda guteshuka ku nshingano nk'uko hari abo byagaragayeho mu mateka y'u Rwanda.

Ati 'None rero bashumba-bushyo bw'Imana n'u Rwanda nimuzirikane umuhamagaro wanyu ndetse n'icyizere gikomeye abayoboke banyu babafitiye, ibituma murushaho gushyira imbaraga mu gufasha abantu kwiyunga, komora ibikomere no kudaheranwa n'amateka mabi twanyuzemo.'

Yasabye Intwararumuri zose kandi kuba ku isonga mu kuganira ku bibazo byugarije igihugu no kwibukiranya impamvu yo gukomeza gukomera ku Bunyarwanda.

Ati 'Tumaze kubona twese ko abaturage bizera umuyobozi uvugisha ukuri kandi ushyira mu bikorwa ibyo yiyemeje, natwe bikwiye kuturanga. Ese nk'Intwararumuri ntibikwiye ko twajya dufata umwanya tugasubira iyo dukomoka tukaganira ku bibazo bitwugarije, tukibukiranya impamvu yo gukomeza guhuza umugambi wo gukomera ku Bunyarwanda n'ubumwe bwacu?'

Minisitiri w'Ubumwe bw'Abanyarwanda n'Inshingano Mboneragihugu, Dr. Bizimana Jean Damascene, yagaragaje ko bimwe mu bikibangamiye ubumwe bw'Abanyarwanda birimo kwigisha irondabwoko, gupfobya no guhakana Jenoside yakorewe Abatutsi, imbuga nkoranyambaga zabaye imiyoboro y'imvugo zo gupfobya Jenoside yakorewe Abatutsi, gusebanya, irondabwoko n'ibikorwa byibasira abarokotse Jenoside yakorewe Abatutsi n'ibindi.

Yagaragaje ko abacitse ku icumu rya Jenoside yakorewe Abatutsi bagikorerwa ihohoterwa kandi usanga ababigiramo uruhare ari abagize uruhare muri Jenoside yakorewe Abatutsi, barangije ibihano cyangwa abo mu miryango yabo.

Yagaragaje ko iyo hasuzumwe imiterere y'icyaha cy'ingengabitekerezo ya Jenoside n'ibifitanye isano na yo byakurikiranywe n'Urwego rw'Igihugu rw'Ubugenzacyaha, RIB, mu minsi yo kwibuka hagati ya 2020-2024, byagabanutseho 14%.

Yakomeje ati 'Ntibivuze ko ingengabitekerezo ya Jenoside yacitse, iriho ndetse no mu bato uyisangamo, ariko kugabanukaho 14% mu myaka ine ni igipimo gitanga icyizere cy'ejo hazaza heza h'imibanire y'Abanyarwanda.'

Dr. Bizimana yagaragaje ko hari abataracika ku myumvire y'irondabwoko.

Ati 'Iyi politiki ya gatanya yatotezaga bamwe mu Banyarwanda cyane cyane Abatutsi, igatonesha abandi bake bari ku butegetsi n'inshuti zabo, iracyaboshye abayivanagamo indonke. Hanavuzwe imyumvire yo gutinda kwakira impinduka zazanywe na FPR-Inkotanyi, kutagira umwete n'umurava byo gukora ibirenze ibisanzwe.'

Mu kiganiro kigaruka ku mateka n'Imiyoborere y'Igihugu cyatanzwe cyayobowe na Domitilla Mukantaganzwa, gitangwa n'abarimo Dr. Philbert Gakwenzire, Perezida w'Umuryango Uharanira Inyungu z'Abarokotse Jenoside (IBUKA), Umushakashatsi akaba n'umwarimu muri Kaminuza, Prof. Buhigiro Jean Léonard ndetse'Umwarimu muri Kaminuza akaba n'Umuyobozi wa CRHRD Rwanda, Dr. Eric Ndushabandi.

Perezida w'Umuryango Uharanira Inyungu z'Abarokotse Jenoside (IBUKA), Dr. Philbert Gakwenzire, yagaragaje ko Repubulika zabanje zari zishyize imbere irondabwoko, guheza abaturage ku byiza by'Igihugu ari na byo byakigejeje kuri Jenoside yakorewe Abatutsi.

Umwarimu muri Kaminuza akaba n'Umuyobozi wa CRHRD Rwanda, Dr. Eric Ndushabandi, yagaragaje ko Umuryango wa FPR Inkotanyi n'Ingabo za RPA, byahaye u Rwanda kongera kwitwa igihugu nyuma yo gusenyuka bikomeye.

Hakurikiyeho n'ikiganiro ku mikorere n'imitekerereze ikwiye gukomeza kubaka u Rwanda rwifuzwa cyatanzwe n'urubyiruko kiyoborwa na Delphine Umuhoza, abarimo Divin Uwayo, Samantha Teta na Ngabo Brave Olivier, bagarutse ku ruhare rw'urubyiruko mu gukomeza kubaka u Rwanda.

Divin Uwayo yashimye ko urubyiruko ruhabwa umwanya wo gutanga ibitekerezo no kugaragaza uruhare rwarwo mu rugamba rw'iterambere anasaba bagenzi be gukomeza gusigasira ayo mahirwe.

Teta Samantha yongeye kwibutsa urubyiruko ko ubuyobozi burutekereza, bityo ko rukwiye kwitegura neza amahirwe rufite binyuze mu guhora rwiyubaka kandi runiyungura ubumenyi.

Ku rundi ruhande, Ngabo Brave Olivier uyobora Inama y'Igihugu y'Urubyiruko, yasabye bagenzi be kubiba ibikorwa byiza mu bandi, bagahesha ishema ababyeyi ndetse bagaharanira kubaka igihugu.

Ubwo Madame Jeannette Kagame yageraga mu cyumba cya Kigali Convention Centre ahabereye iri huriro

Abagera kuri 200 ni bo bitabiriye ibiganiro by’uyu munsi

Iri huriro ryahurije hamwe abahoze muri Guverinoma mu bihe bitandukanye

Visi Chairperson wa Unity Club Intwararumuri, Marie Solange Kayisire, ageza ijambo ku bitabiriye iri huriro

Guverineri Wungirije wa Banki Nkuru y’u Rwanda, Soraya Munyana Hakuziyaremye, yagejeje ku bitabiriye ibyagezweho muri Gahunda ya Guverinoma y’Imyaka irindwi ishize n’ibiteganyijwe mu myaka itanu iri imbere bikubiye muri NST2

Minisitiri w'Ubumwe bw'Abanyarwanda n'Inshingano Mboneragihugu, Dr. Bizimana Jean Damascène, yagaragaje ko bimwe mu bikibangamiye ubumwe bw'Abanyarwanda birimo kwigisha irondabwoko

Abanyamuryango 19 bashya ba Unity Club Intwararumuri bakiririwe kuri uyu munsi. Barimo abaherutse kujya muri Guverinoma mu minsi ishize n’abo bashakanye

Ni ibirori byabereye mu Karere ka Huye, ku wa 15 Ugushyingo 2024, mu nyubako ya 'Intare Business Centre' iri mu Mujyi wa Huye.

Muri ibi birori, hagaragajwe ko mu mwaka wa 2023/2024, Intara y'Amajyepfo yinjije miliyari 63,31Frw angana na 89% y'imisoro y'ubutegetsi bwite bwa Leta yari yitezwe kuko hateganywaga kwakirwa miliyari 71,01Frw; ndetse na miliyari 11.5 Frw z'imisoro yeguriwe uturere bingana na 96% y'ayo bari biteze, kuko hari hitezwe miliyari 11.9 Frw.

Komiseri Mukuru Wungirije wa RRA, Dr. Murasi Innocente, yavuze ko umunsi nk'uyu wo gushimira abasora ari andi mahirwe yo kugaragaza ko RRA itabereyeho guhana gusa, ahubwo ijya inashima ibyiza bigerwaho n'abasora.

Yagize ati ''Ntabwo uyu munsi twaje kubabaza aho twahaye EBMs, ubutumwa nyamukuru bwa none ni ukuvuga ngo n'ibyiza twarabibonye; burya na ya ntego twabashije kugeraho ni mwebwe, kuko umusoro dukusanya ni mwe mwawutanze, twe turi ikiraro gusa, ibindi ni mwe mubikora.''

Umuyobozi w'Urugaga rw'Abikora (PSF) mu Ntara y'Amajyepfo, Dr. Kubumwe Celestin, yavuze ko urugaga rukomeje ubukangurambaga mu bikorera kugira ngo abantu bose bumve ibyiza bya EBM, kuko uretse no kuba ifasha mu gukusanya imisoro, inafasha mu ibaruramari ry'abacuruzi.

Ati “Abantu bakwiye kumva neza ko EBM atari umusoro ahubwo ari n'umuyoboro mwiza ugaragaza ibyinjira n'ibisohoka mu bubiko bw'umucuruzi, kuyikoresha neza bizazana inyungu irenze imwe.''

Dr. Kubumwe yakomeje asaba ko RRA yagena abayihagarariye muri santere zigaragara ko zikomeye mu bucuruzi mu Ntara y'Amajyepfo kugira bafashe abasora bose ku bijyanye n'amahugurwa ku ikoranabuhanga rya EBM n'ubundi bujyanama bwose bukenerwa n'abasora kuko byanatuma birinda ibihano.

Byanashimangiwe na Umutoniwase Jeannine uhagarariye Aziz Life Ltd wahembwe nk'usora neza mu Karere ka Ruhango.

Yavuze ko uretse kuba bishimira ko bahembwe nk'abasora beza mu Ruhango, nabo ubwabo banyuzwe n'ibyiza by'ikoranabuhanga rya EBM kuko rinabafasha mu ibaruramari mu kazi kabo ka buri munsi.

Ati “Ubu ikoranabuhanga rya EBM ryatubereye igisubizo kuko rinadufasha mu kugenzura ububiko bwacu, kuko iyo ibicuruzwa byatangiwe fagitire ya EBM, ubwo bihita biva no mu bubiko, bikazanafasha mu igenzura ry'ibyasohotse.''

Yakomeje asaba abadatanga fagitire zuzuye kubihindura kuko nabo bibavunisha mu bucuruzi bwabo.

Umuturage wo mu karere ka Nyamagabe wahembwe nk'umuguzi wahize abandi mu kwaka inyemezabwishyu(EBMs), Ngabonziza Emetteur, yavuze ko umuhate wo kwaka nyinshi awukomora mu kuba yarasobanukiwe neza ko kwaka fagitire yose ku cyo aguze ari umusanzu aba atanze ku gihugu.

Muri uyu muhango kandi, RRA yagaragaje impinduka zagiye zishyirwaho ngo byorohereze abasora zirimo gufungirwa TINs ku batagikora.

Habarurwa abasaga ibihumbi 40 bafungiwe TINs, kandi bigakorwa mu buryo bworoshye, ndetse n'abandi 5200 bari baratinze kumenyekanisha ibirarane byabo, bakabimenyekanisha, ibyatumye bakurirwaho amande y'ubukererwe.

Komiseri Mukuru wungirije wa RRA, Dr. Murasi Innocente ashyikiriza igihembo, Ingabire Emmnuel uyobora DDB Ltd yahembwe nk’umucuruzi wahize abandi mu Ntara mu gutanga EBMs neza

Komiseri Mukuru wungirije wa RRA, Dr. Murasi Innocente, yavuze ko umunsi nk’uyu utegurwa hagamijwe kugaragaza ko RRA ishima iby’abasora bageza ku gihugu, itagamije guhana gusa

Komiseri wungirije ushinzwe abasora n’itumanaho, Uwitonze Jean Paulin, yagaragaje ko RRA ikomeje gukora byinshi ngo irusheho korohereza abasora kuzuza inshingano zabo

Guverineri w’Intara y’Amajyepfo, Kayitesi Alice, yavuze ko gusora neza bidahombya nk’uko bamwe babitekereza, asaba abacuruzi bose kwitabira gusora

Abasora basabwe kwitabira ikoranabuhanga ryashyizweho na RRA, kugira ngo barusheho no korohererwa no gusora

Abahize abandi mu gusora neza mu turere twose tw’Intara y’Amajyepfo bashimiwe

Abasora neza mu Ntara y’Amajyepfo bashimiwe ko bagize uruhare mu kubaka u Rwanda binyuze mu misoro

Kuri uyu Wa Gatandatu taliki ya 16 Ugushingo 2024 ku cyicaro cy’Uruganda rwa Skol, mu Nzove habereye inama y’intekorusange y’Umuryango Rayon Sports yakorewemo ibintu bitandukanye.

Icyari gitegerejwe n’abenshi ni amatora yagombaga kuyiberamo gusa mbere yaho hakozwe ibintu bitandukanye birimo guhindura amategeko shingiro Umuryango Rayon Sports ugenderaho aho bamwe mu bahoze mu buyobozi bemerewe gutora, bituma biyongera ku bahagarariye Fan Clubs 46.

Hanatanzwe raporo ku ikipe y’abagabo niy’abagore ndetse hanamurikwa umushinga wabyarira inyungu Rayon Sports ndetse hanashyirwaho komite yagombaga kuyobora amatora yari igizwe na; Me Olivier Karangwa, Me Hilaire Nyirihirwe na Beatrice Uwera. 

Amatora nyirizina yatangiye Saa cyenda n’iminota 30 nkuko byari biteganyijwe. 

Muri aya matora Twagirayezu Thadee niwe watorewe kuyobora umuryango wa Rayon Sports , Prosper Muhirwa atorerwa kuba Visi Perezida wa mbere naho Aimable Ngoga Roger atorerwa kuba Visi Perezida wa kabiri.

Ni mu gihe Patrick Rukundo yatorewe kongera kuba umubitsi naho Gacinya Chance Deny we atorerwa kuba Umujyanama wa tekinike.

Hanatowe kandi abayobozi b’urwego rw’ikirenga rwashyiriweho muri iyi nteko rusange. 

Paul Muvunyi niwe watowe nk’umuyobozi warwo, Dr Emile Rwagacondo atorerwa kuba Visi Perezida naho Abdallah Murenzi atorerwa kuba umunyamabanga.

Ni mu gihe Paul Ruhamyambuga, Charles Ngarambe, Theogene Ntampaka , Sadate Munyakazi, Jean Fidele Uwayezu na Valens Munyabagisha batorewe kuba abajyanama muri uru rwego.

Komite nyobozi yatowe yasimbuwe n’iyari iyobowe na Uwayezu Jean Fidèle weguye habura iminsi 39 ngo manda ye irangire ku wa 24 Ukwakira 2024, kubera uburwayi. Amatora aheruka mu 2020, yari yakozwe n’abanyamuryango (abahagarariye Fan Clubs).

Batangajwe mu ijoro ryo kuri uyu wa Gatanu tariki 15 Ugushyingo 2024, mu birori bikomeye byabereye muri Kigali Universe, byahuje abantu mu ngeri zinyuranye.

Ni nyuma y’uko uruganda rwa Skol rwari rumaze kumurika ku mugaragaro isura nshya ya Skol Malt nk’imwe mu ntego bari bihaye kuva mu myaka 10 ishize.

Abagizwe ba ‘Brand Ambassadors’ ni: Riderman, Bull Dogg, Rusine Patrick, Anitha Pendo, Uwizeye Mark wamamaye nka Rock, Juno Kizigenza, ndetse na Aristide Mugabe wamamaye mu makipe arimo Patriots ndetse na APR BBC; yanabaye Kapiteni w’ikipe y’Igihugu.

Marie-Paule Niwemfura, ushinzwe imenyekanisha bikorwa mu ruganda rwa SKOL, yabwiye InyaRwanda, ko bahisemo ibi byamamare mu rwego rwo kubafasha kumenyekanisha isura nshya ya Skol Malt.

Ati “Twabahisemo ahanini tugendeye ku byo buri wese akora, n’uburyo badukunda. Twaravuze tuti ntakibazo, reka dukorane, kandi mwabonye ko baje kare, bakina n’abandi, bitabira igitaramo mbese banyuzwe n’ibirori bya Skol Malt, kandi bafite umubare munini w’abantu babakunda.”

Niwemfura yavuze ko biteze kuri ibi byamamare ‘gutuma abafana babo bisanga mu muryango mugari wa Skol’. Ati “Turabakunda, kandi twishimira gukorana n’abo”.

Niwemfura yavuze ko mu rwego rwo kumenyekanisha isura nshya ya Skol Malt, bazifashisha ba ‘Brand Ambassadors’ babo mu bitaramo binyuranye bizabera hirya no hino mu Ntara. 

Uru ruganda rusanganywe ku isoko ibinyobwa bitarimo umusemburo nka Skol Panaché n'ibirimo umusemburo nka Skol Pulse, Skol Lager, Skol Gatanu, Virunga Mist, Virunga Gold, Virunga Water, Skol Panache na Skol Select.

Uruganda rwenga ibinyobwa bisembuye n'ibidasembuye, SKOL Brewery Ltd rwatangaje ko rwashyizeho ba 'Brand Ambassadors' ba Skol Malt barimo: Aristide Mugabe, Anita Pendo, Rusine, Rocky, Juno, Bull Dogg na Riderman
 

Umuraperi Bull Dogg, Riderman, Rocky, Kimomo, Rusine mu bagize ba ‘Brand Ambassadors’ ba Skol Malt

Riderman, Rocky Kimomo baganira n’Umuyobozi w’Uruganda rukora inzoga rwa Skol ku Isi, Thibault Relecom nyuma y’uko bagizwe ba ‘Brand Ambassadors’ ba Skol

Umuyobozi Mukuru w’Uruganda rwa SKOL, Eric Gilson (Uwa kabiri uvuye ibumoso) ari kumwe n’Umuyobozi ushinzwe Ubucuruzi muri SKOL Brewery, Marie-Paule Niwemfura,

 

Ubuyobozi bwa Skol butangaza ko buzafatanya n’abagizwe ba ‘Brand Ambassadors’ mu kumenyekanisha Skol Malt

 

Umuyobozi Mukuru w’Uruganda rwa SKOL, Eric Gilson (Ubanza ibumoso) ari kumwe n’Umuyobozi w’Uruganda rukora inzoga rwa Skol ku Isi, Thibault Relecom

  

Kanda hano urebe amafoto yaranze kumurika isura nshya ya Skol Malt 

AMAFOTO: Serge Ngabo- InyaRwanda.com

Mu ntambwe abahanga bagaragaje ko zinyurwamo kugira ngo jenoside ibeho harimo igice cyo kuyitegura no kuyigerageza.

Minisitiri w'Ubutabera, Dr. Ugirashebuja Emmanuel, ubwo yari mu Nama Mpuzamahanga ya gatandatu kuri Jenoside igamije kwerekana ububi bwayo, yabereye muri Kaminuza ya 'Sacramento State' yo muri Leta California, yavuze ko umugambi wa Jenoside yakorewe Abatutsi watangiriye muri 'Manifesto y'Abahutu' yasohotse mu 1957.

Mu 1959 hasohotse amategeko 10 y'Abahutu yanditswe na Gitera, nyuma y'amezi abiri ashyizwe hanze Abatutsi barimo abana, abagore n'abagabo batangira kwicwa.

Yahamije ko muri Jenoside zose zabaye mu Isi, Umuryango Mpuzamahanga wagiye unanirwa gutabara abari mu kaga bawutabazaga.

By'umwihariko kuri Jenoside yakorewe Abatutsi, hari benshi batanze ubutumwa buburira ko hashobora kubaho Jenoside ariko burirengagizwa.

Nk'urugero, muri Kanama 1993, René Degni Segui wari Umukozi wa Loni yatanze raporo ku Komisiyo yayo Ishinzwe Uburenganzira bwa Muntu ko mu Rwanda hari gukorwa ubwicanyi busa n'ubuvugwa mu masezerano yo mu 1948 agamije gukumira Jenoside.

Gen Roméo Dallaire wari uyoboye Ingabo za Loni zari zishinzwe kubungabunga amahoro mu Rwanda (MINUAR) yaburiye kenshi Ishami rya Loni rishinzwe ibikorwa byo kubungabunga amahoro ko abahezanguni b'Abahutu bari gutegura kurimbura Abatutsi, ndetse mu rwandiko yanditse ku wa 11 Mutarama 1994, yasabye uburenganzira bwo gusaka no gufatira imihoro n'izindi ntwaro zari zajyanywe mu Rwanda ziguriwe Interahamwe, ariko Iqbal Riza wari Umunyamabanga Mukuru wungirije ushinzwe ibikorwa byo kugarura amahoro yamwimye uruhushya, amubwira ko ibyo bitari mu nshingano y'ingabo ayoboye.

Dr. Ugirashebuja ati '[Iqbal Riza] yategetse Dallaire gushyira ayo makuru Guverinoma y'u Rwanda kandi abenshi bari bayigize bari mu bacurabwenge ba Jenoside.'

Yahamije ko bitumvikana ukuntu amahanga yahawe ubutumwa bw'uko Abatutsi bagiye kwicwa ariko akica amatwi nk'aho nta cyabaye.

Ati 'Abanyarwanda ntabwo bazigera bumva impamvu impuruza zumvikana zatanzwe kare ariko zikirengagizwa. Byaba se ari uko ubuzima bw'abazize Jenoside yakorewe Abatutsi butari bukwiye kurokorwa? Iki kibazo gihora kizenguruka mu mitwe ya benshi.'

Yaberetse ko Ingabo za RPA zagize uruhare mu kuyihagarika ndetse nyuma abasirikare barenga 1500 bari mu Ngabo zatsinzwe binjizwa mu Ngabo z'Igihugu.

Nyuma ya Jenoside, abantu bagombaga kuburanishwa bari benshi. Inkiko Gacaca zifashishije mu guca imanza mu buryo bwihuse kandi buboneye.

Minisitiri Ugirashebuje yabwiye aba banyeshuri ko nyuma ya Jenoside yakorewe Abatutsi, ubuyobozi bwashyize imbere gahunda z'ubumwe n'ubwiyunge, iterambere ridaheza no guca umuco wo kudahana.

Yasabye ibihugu byose bigicumbikiye abakekwaho ibyaha bya Jenoside kubata muri yombi bakoherezwa mu Rwanda, cyangwa bikababuranisha mu nkiko zabyo.

Dr. Ugirashebuja kandi yagaragarije abarimu n'abanyeshuri ko Jenoside yakorewe Abatutsi yemejwe ku rwego mpuzamahanga ku buryo abantu badakwiye guha icyuho abayipfobya n'abayihakana banyuze muri za kaminuza, ku mbuga nkoranyambaga n'ahandi hahurira abantu benshi.

Yavuze ko kwibuka abazize Jenoside yakorewe Abatutsi ari igihango kizahererekanywa ibisekuruza bigaha ibindi kugira ngo Jenoside ntizongere kuba ahandi ku Isi.

Minisitiri Dr Ugirashebuja Emmanuel yhamije ko habaye impuruza nyinshi mbere y’uko Abatutsi bicwa ariko zikimwa amatwi n’umuryango mpuzamahanga