Author: webrwanda

Ubu bushakashatsi bwakozwe hifashishijwe ikoranabuhanga ripima ikirere n'ubutaka bwakorewe mu Karere ka Musanze mu mirima y'abaturage bibumbiye muri koperative Twizamure Cyuve, butanga umusaruro ku kigero kirenga 75% kandi Kaminuza iteganya gukomeza gufasha abahinzi kongera umusaruro ku buryo ibi bipimo buzagera kuri 90%.

Umwarimu akaba n'umushakashatsi wo muri Kaminuza y'u Rwanda, Dr. Martin Kuradusenge wari ukuriye itsinda ryakoze ubu bushakashatsi, yavuze ko ubu bushakashatsi buzafasha abahinzi kumenya amakuru nyayo ku bihingwa byabo, bityo bijye bibafasha kumenya n'ingano y'umusaruro uzaboneka.

Yagize ati “Twaje kugaragaza ibyavuye mu bushakashatsi tumaze imyaku itatu dukora ku bijyanye n'iteganyamusaruro dukoresheje ikoranabuhanga ripima uko ikirere giteye, ni ukuvuga ubushyuhe cyangwa ubukonje bwo mu kirere no mu butaka ku buryo umuhinzi ashobora kumenya uko umusaruro uzaba ungana mu gihembwe cy'ihinga, akaba yafata ingamba hakiri kare n'inzego z'ibanze zikabafasha kuko iyo umusaruro wagenze nabi niho haba hari ikibazo cyo kwitabwaho.”

Yakomeje avuga ko ubu bushakashatsi buzakomeza gukorwa kugira ngo amakuru butanga azabe yizewe ku gipimo kisumbuyeho.

Ati “Ntabwo byahura 100% kuko ni iteganyamusaruro ariko iyo ubushakashatsi butanze amakuru ari hejuru ya 70% buba bwaragenze neza, rero ibyo ikoranabuhanga ryatweretse na wa musaruro nyakuri watangaga amakuru ari hejuru ya 75% n'ubwo imibare ya buri gihembwe itanganaga, uko imyaka igenda ishira niko tugenda tuvugurura bitewe n'amakuru twabonye bikazagera hejuru ya 90% kuko ariyo ntego yacu.”

Umuyobozi wa Koperative Twizamure Cyuve, Uwamahoro Therese, we avuga ko ubu bushakashatsi buzababera igisubizo kuko bigiye kujya bahinga neza bashingiye ku makuru imirima yabo iri gutanga bikazabafasha kutongera kugwa mu bihombo.

Ati “Dufite amahirwe kuba dukorana n'abashakashatsi bo muri Kaminuza y'u Rwanda, bizadufasha kumenya amakuru y'ibihembwe by'izuba cyangwa imvura tumenye igihingwa tuzahinga kugira ngo umusaruro wacu wiyongere tugabanye ibihombo. Ubuhinzi ni umwuga kuko nabwo burimo ubucuruzi butanga inyungu tugatera imbere n'Igihugu kigatera imbere.”

Umunyeshuri muri Kaminuza y'u Rwanda, Umuhoza Charlene, yemeza ko muri ubu bushakashatsi yahungukiye ubumenyi buzatuma mu bushakashatsi nabo bazajya bakora bazaharanira gusubiza bimwe mu bibazo bikibangamiye abahinzi.

Ati “Hano mpungukiye byinshi kuko ikoranabuhanga mu buhinzi rizadufasha kumenya gukemura ibibazo abaturage bahuraga nabyo mu buhinzi, turebe ibyo tugomba kongeramo twifashishije ikoranabuhanga noneho umusaruro wiyongere bahaze amasoko.”

Iri koranabuhanga ryakoreshejwe muri ubu bushakashatsi bwamaze imyaka itatu, ryifashisha agasanduko kaba kubakiyemo ikoranabuhanga gashyirwa mu mirima kakabasha gutanga amakuru yose agendanye n'ikirere, ubuhehere bwo mu butaka, bigatuma abahinzi bamenya uko bakora ubuhinzi bunoze bitewe n'igikenewe.

---

Itegeko rya Perezida rishyiraho amabwiriza rusange agenga imihanda n'uburyo bwo kuyigendamo mu ngingo ya 48, rivuga ko Uretse iyo hari amategeko yihariye yerekanwa n'ibimenyetso, utuyira turi ku mpande z'umuhanda n'inkengero zigiye hejuru bihariwe abanyamaguru.

Umuvugizi w'Ishami rya Polisi rishinzwe umutekano wo mu muhanda, SP Emmanuel Kayigi, yavuze ko iyi ari gahunda y'ibikorwa bigamije kubungabunga umutekano wo mu muhanda no guca akajagari.

Ati 'Tumaze igihe kirekire muri gahunda ya Gerayo Amahoro, dukangurira abatwara ibinyabiziga cyane cyane amapikipiki, kwirinda imyitwarire yose ishobora kuba intandaro y'impanuka no guteza akajagari mu muhanda.'

'Usanga kenshi hari imyitwarire ibujijwe bamwe mu batwara moto bafata nk'aho ibyo bakora byemewe nko kunyura mu nzira z'abanyamaguru, mu nkengero z'umuhanda, kunyuraniraho iburyo, gusesera mu binyabiziga n'ibindi. Turabibutsa ko ibyo byose bitemewe kandi biri mu biteza impanuka.'

SP Kayigi yihanangirije abakomeje gukoresha nabi umuhanda nkana ko batazihanganirwa, bityo ko ibi ari ibikorwa bizakomeza hirya no hino abazabifatirwamo bakabihanirwa.

Eugene Sindikubwabo, uri mu bafatiwe moto, bamusanze agendera ku nkengero z'umuhanda, yavuze ko n'ubwo yabikoraga atari umuco mwiza asaba bagenzi be kwigenzura no kwisubiraho bagakosora amakosa abagaragaraho.

Ati 'Kugendera mu nkengero z'umuhanda ni ibintu mbere nanjye numvaga atari ikosa rikomeye, twabikoraga kenshi dushaka kwihuta ariko bakimara kumfata byatumye ntekereza. Mu by'ukuri uretse no kuba bikurura akajagari mu muhanda kunyura mu nkengero zawo biteza n'impanuka ugasanga iyo utagonganye na mugenzi wawe utwaye moto, ugonga umunyamaguru.'

Sindikubwabo yavuze ko nasubira mu muhanda azihatira kubahiriza amategeko y'umuhanda yirinda icyateza impanuka cyose, agira inama bagenzi be batarafatirwa muri iri kosa, kuricikaho kuko kwihutira kugera aho bajya byatuma batagerayo ntacyo bimaze.

---

Mu bihugu bimwe na bimwe byateye imbere, ingufu z'amashanyarazi zingana na 20% ni izikomoka ku nganda za nucléaire, mu gihe izisigaye zikomoka ku ngomero zifatiye ku mazi n'ubundi buryo bubyara amashanyarazi.

Kuri uyu wa 16 Ukuboza 2024 abaminisitiri b'ibihugu bitandukanye bashinzwe ingufu bateraniye mu Rwanda, bigira hamwe icyo ibihugu bya Afurika bisabwa ngo byihaze ku mashanyarazi akomoka ku ngufu za nucléaire.

Minisitiri w'Ibikorwa remezo, Dr. Jimmy Gasore yatangaje ko Afurika ifite intego yo kwihuta mu iterambere hifashishijwe amashanyarazi akomoka ku ngufu za nucléaire, bigasaba ishoramari riturutse mu bafatanyabikorwa n'amabanki.

Ati 'Ibihugu byinshi kugira ngo bitere imbere byakoresheje ingufu za nucléaire, natwe rero turi kuganira nk'Abanyafurika, tukaganira n'inzobere za Afurika y'Epfo zisanzwe zikoresha izo ngufu tuvuga ngo bisaba iki? Ese ingaruka ni izihe? Twazirinda gute? Ariko by'umwihariko tukanareba cyane ubushobozi bwo gukoresha izo mbaraga za nucléaire bwo buzaboneka gute?'

Minisitiri Dr. Gasore yahamije ko hari kwigwa uburyo mu myaka 30 iri imbere Afurika yazaba ifite amashanyarazi ahagije yafasha mu iterambere.

Yasobanuye ko kugira ngo bigerweho bisaba gutinyuka ukavuga ngo 'ibindi bihugu byateye imbere byinshi byakoresheje izi mbaraga za nucléaire, twebwe ntitwazikoresha tugatera imbere?'

Kubyaza amashanyarazi ingufu za nucléaire kandi bisaba ishoramari rifatika.

Ati 'Turi kwibaza ngo ese iyi miryango dufatanya mu iterambere, amabanki n'abandi bashobora gufasha muri urwo rugendo rwo guteza imbere Afurika dukoresheje ingufu za nucléaire?'

Mu bindi bisabwa harimo ubumenyi bwisumbuye ku baturage ba Afurika n'Abanyarwanda ariko bwo ahamya ko bushobora kuboneka kuko hari n'ibindi bihugu bya Afurika bisanzwe bikoresha ingufu z'amashanyarazi nk'izi birimo Misiri na Afurika y'Epfo.

Mu myaka yashize u Rwanda rwasinye amasezerano n'u Burusiya ajyanye no gutunganya amashanyarazi akomoka ku ngufu za nucléaire.

Minisitiri Dr. Gasore yasobanuye ko ibiganiro bigikomeje, kuko uyu ari umushinga w'igihe kirekire.

Kugeza ubu u Rwanda ruvuga ko rwihagije ku mashanyarazi akoreshwa mu gihugu ariko hahora hakenewe gukorwa andi kuko ubukungu bwiyongera umunsi ku wundi ari na ko ibiyakenera byiyongera.

Amafoto: Kwizera Herve

---

Aba Bofisiye bagomba kujya ku cyicaro cy'uru rwego giherereye mu mujyi wa Goma.

Abofisiye b'u Rwanda bagombaga kujya i Goma muri RDC mu gitondo cyo ku wa 9 Ukuboza 2024 kugira ngo batangire imirimo yabo, ariko umuyobozi w'uru rwego abasaba kuba baretse.

Amakuru yizewe IGIHE ifite ashimangira ko aba basirikare b'u Rwanda basabwe kuba baretse kujya muri RDC kubera impungenge ku mutekano wabo, bigendanye n'umwuka mubi uri hagati y'iki gihugu n'u Rwanda.

Kugeza ubu, amakuru ahari ni uko u Rwanda rwamaze kwandikirwa rwizezwa umutekano w'aba basirikare ku buryo mu minsi ya vuba bazoherezwa i Goma.

Uru rwego ruvuguruye rwatangijwe ku mugaragaro n'abaminisitiri b'ububanyi n'amahanga ba Angola, u Rwanda na RDC tariki ya 5 Ugushyingo 2024. Rugizwe n'abofisiye 18 bo muri Angola, batatu b'Abanyarwanda na batatu b'Abanye-Congo.

---

Umuyobozi w’uyu muryango, Steven Gakiga yabwiye InyaRwanda ko “Dukeneye ko Apôtre Gitwaza adusaba imbabazi cyangwa se agahindura imvugo.”  

Yavuze ko basabye kwigaragambya kugira ngo bagaragaze ukuri ku ‘mibereho n’imyemerere y’abarasita.”

Gakiga yavuze ko bandikiye ubuyobozi bw’Akarere ka Rubavu, ndetse bamenyesheje Polisi ikorera muri kariya Karere ariko ‘dutegereje ko tuzahabwa uburenganzira’.

Uyu muyobozi yavuze ko iyi Baruwa bayanditse kuri uyu wa Mbere tariki 16 Ukuboza 2024, aho bategereje igisubizo mu gihe kiri imbere.

Steven Gakiga yavuze ko Apôtre Gitwaza yibeshye cyane ku myemerere ya Rastafarian kandi ‘yari kuvuga ibyo mu idini rye gusa akareka ibijyanye na Rastafarian.’

Tariki 7 Ukuboza 2024, Intumwa y’Imana Gitwaza ari mu mujyi wa Queensland mu gihugu cya Australia, yavuze ko Rasitafari ari idini rya Satani.

Ni mu ruhererekane rw'ivugabutumwa yise 'Divine Provision'. Ni ibiterane byitabiriwe n'umubare munini w'urubyiruko, abayobozi b'amatorero anyuranye, abapasiteri, ba Bishop n'abandi bari banyotewe no kumva inyigisho z'Intumwa y'Imana. 

Mu gihe cy’amasaha abiri n’iminota 50′, Gitwaza yibanze cyane ku kubwira abashumba b’amatorero imyitwarire ikwiriye kubaranga; ndetse n’uburyo bakwiye gufasha Abakristu gusabana n’Imana binyuze mu bikorwa bitandukanye.

Ku munota wa 30′, atangira yumvikanisha ko bidakwiriye ko umukobwa wambaye ipantalo ahagaragara ku rubyiniro abwiriza cyangwa se aririmba; ni mu gihe ku munota wa 32′ ho yitsa cyane ku kuvuga ko nta mwana w’umuhungu wemerewe kujya ku ruhimbi afite amaherena, ndetse n’imisatsi y’amarasita ku mutwe.

Arakomeza ati “Nta mwana w’umuhungu wemerewe kuza aririmba aha afite amarasita, ya misatsi y’amarasita, Oya!”

Yavuze ko “Ariya marasita ni idini ryitwa Rasitafari. Rasitafari ni idini rya Sitani. Rero abana barabyambara batazi ibyo ari byo. Genda wiyogosheshe ugire umusatsi mwiza.”

Apotre Gitwaza yabwiye urubyiruko n’abandi bari mu materaniro ye bafite imisatsi y’amarasita kuyihindura hakiri kare ‘kuko ni ko umuco wanyu umeze’. Ati “Ni na ko Bibiliya idusaba.”

Akomeza agira ati “Ibi mbabwira mbivuga hose, kuko njye nzi ukuri kwabyo, nzi n’ibibyihishemo. Umwuka w’urumogi n’ubutinganyi bihera mu musatsi. N’iyo Imana igiye ku gukoresha ihera mu musatsi.”

Ibaruwa yanditswe y’abarasita b’i Rubavu basaba uburenganzira bwo kwigaragambya mu mahoro 

Apôtre Gitwaza aherutse gutangaza akomeje ko Rasitafarian ari idini rya Satani

Mu mugoroba wo kuri uyu wa Mbere taliki 16 Ukuboza 2024 mu gihugu cya Morocco, mu nyubako ya Palais des Congrès iherereye mu gace ka Marrakech, hatangiwe ibihembo by’abakinnyi b’Abanyafurika, abatoza n’amakipe bitwaye neza mu mwaka wa 2024.

Mu bakinnyi bakiri bato, Lamine Camara ukinira AS Monaco n’ikipe y’igihugu ya Senegal ni we wegukanye igihembo, ikipe y’igihugu nziza mu bagabo iba Cote d’Ivoire naho mu bagore iba Nigeria.

Ikipe nziza mu bagabo yabaye Al Ahly FC, mu bagore iba TP Mazembe, Ronwen Williams ukinira ikipe y’igihugu ya Afurika y’Epfo na Mamelodi Sundowns aba umunyezamu mwiza ndetse anaba umukinnyi mwiza ukina ku mugabane w’Afurika.

Umutoza mwiza kurusha abandi yagizwe Emerse Faé wafashije ikipe y’igihugu ya Cote d’Ivoire gutwara igikombe cy’Afurika ahigitse Hugo Broos utoza ikipe y’igihugu ya Afurika y’Epfo na Sébastien Desabre utoza DR Congo.

Uwegukanye igihembo cy’umukinnyi mwiza mu bagore ni Barbra Banda ukinira ikipe y’igihugu ya Zambia na Orlando Pride ahigitse Sanaâ Mssoudy ukinita ikipe y’igihugu na AS Far Rabat ndetse na Chiamaka Nnadozie ukinira ikipe y’igihugu ya Nigeria.

Mu bagabo uwegukanye igihembo cy’umukinnyi mwiza ni Ademola Lookman ukinira ikipe y’igihugu ya Nigeria na Atlanta yo mu Butaliyani yakoreyemo amateka yo gutsinda ibitego 3 ku mukino wa nyuma wa Europa League ahigitse Simon Adingra ukinira ikipe y’igihugu ya Cote D’Ivoire na Brighton,

Serhou Guirassy ukinira Guinea na Borussia Dortmund, Achraf Hakimi ukinira ikipe y’igihugu ya Morocco na Paris Saint-Germain na Ronwen Williams ukinira ikipe y’igihugu ya Afurika y’Epfo na Mamelodi Sundowns.

Samuel Eto'o na Yaya Touré ni bo bafite agahigo ko gutwara ibikombe byinshi by’umukinnyi mwiza w’Umunyafurika mu bagabo aho buri umwe yagitwaye inshuro enye mu gihe mu bagore ho gifitwe na Asisat Oshoala wagitwaye inshuro 6.

Ibirori byo gutanga ibihembo ku bakinnyi b’Abanyafurika, abatoza n’amakipe yitwaye neza byitibariwe n’abantu batandakanye barimo Perezida wa FIFA, Gianni Infantino, abakinnyi b’Abanyafurika bakanyujijeho barimo Victor Wanyama (Kenya), Mohamed Zidan (Egypt), Portia Modise (South Africa), Seydou Keita (Mali) na Obafemi Martins (Nigeria).

Ademola Lookman ni we wegukanye igihembo cy’umukinnyi mwiza muri Afurika 

Ni amakuru yatangajwe kuri uyu wa 16 Ukuboza 2024, mu nama ya 33 ya EASF izwi nka 'Policy Organs Meeting', igiye kumara icyumweru ibera mu Rwanda.

Izagaragarizwamo uko ibyari byemejwe kuzakorwa mu ngengo y'imari ya 2024 byagenze no kwemeza ibiteganyijwe kuzakorwa mu 2025.

EASF yatangiye mu 2004, iri mu bice bitatu birimo icy'ingabo, polisi n'abasivili buri gice kigahabwa amahugurwa bijyanye n'uruhare rwacyo mu kubungabunga umutekano.

Ni umwe mu mitwe itanu igize Ingabo za Afurika zihora ziteguye (African Standby Force/ASF) zigizwe n'abasirikare n'abapolisi n'abasivile.

Ibi byiciro byose bihora byiteguye kugira ngo bitabare byihuse mu gihe gikwiye, hagendewe ku mabwiriza agena gutabara aho rukomeye mu bikorwa byo gushyigikira amahoro mu karere.

Ibihugu binyamuryango bya EASF birimo u Rwanda u Burundi, Ibirwa bya Comores, Djibouti, Ethiopia, Kenya, Rwanda, Seychelles, Somalia, Sudani na Uganda.

EASF igira inzego zitandukanye, aho Inteko Rusange ari rwo rwego rukuru rugizwe n'abakuru b'ibihugu na za Guverinoma. Iyo Nteko Rusange igira Umuyobozi Mukuru uba ari Umukuru w'Igihugu kinyamuryango. Mu 2025 uwo muyobozi azaba aru Perezida Kagame.

Inteko rusange ikurikirwa n'Inama y'Abaminisitiri b'ingabo muri ibyo bihugu, na yo igakurikirwa na komite y'abagaba b'ingabo b'ibyo bihugu, urwego rwa kane rukaba ubunyamabanga bugira uruhare mu ishyirwa mu bikorwa ry'ibikorwa bya EASF.

Umuyobozi Mukuru wa EASF, Brig Gen (Rtd) Paul Kahuria Njema, ati 'U Rwanda ni rwo rugiye kuyobora EASF mu mwaka utaha. Chairman w'Inteko Rusange mu mwaka utaha ni Perezida Paul Kagame, no mu zindi nzego zose ni u Rwanda ruzaba ruziyoboye.'

Mu 2014 ni bwo EASF yabonye ubushobozi bwose butuma ijya gutanga umusanzu wose usabwa aho ikenewe mu buryo bwa nyabwo.

Brig Gen (Rtd) Paul Kahuria Njema, ashimira ibihugu binyamuryango bikomeje gutanga umusanzu mu kuwubaka, by'umwihariko u Rwanda.

Ati 'U Rwanda rwakomeje kuba inkingi ya mwamba mu iterambere rya EASF. Rwishyuye byose rusabwa kuko muri uyu muryango ubaho bigizwemo uruhare n'umusanzu wa buri gihugu utangwa buri mwaka. Nshimishijwe no kuvuga u Rwandako rutanga uwarwo neza, kuko kugeza ubu rwamaze kwishyura byose rusabwa. Ndashimira n'ibindi bihugu byabikoze, ngashishikariza ibitaratanga umusanzu wabyo kuwutanga.'

EASF kuva mu 2021 yahaye amahugurwa abasivile 455 n'abapolisi 888 bo muri ibyo bihugu.

Hahuguwe kandi abasilikare 788 mu buryo bwo kubaka igisirikare gishoboye ndetse gishobora gutabara aho rukomeye mu bihe bibaye ngombwa.

Brig Gen (Rtd) Paul Kahuria Njemaa ati 'Muri buri gihugu dufite abantu bashobora kudufasha gutabara. Uyu munsi dufite ingabo zirenga 8000 ziteguye gutanga umusanzu mu kugarura umutekano aho bishoboka.'

Uyu muyobozi yagaragaje ko uwo muryango ukomeje gutanga ubufasha bukenewe mu guhosha amakimbirane ari mu bihugu binyamuryango, agaruka cyane ku ntambara iri kubera muri Sudani aho bamaze gukora ibyo basabwa.

Umuvugizi Wungirije w'Ingabo z'u Rwanda, RDF, Lt Col Simon Kabera, yavuze ko mu myaka 20 ishize ingabo za EASF zubakiwe ubushobozi buzifasha gutabara aho zakwitabazwa.

Ati 'Ni imyitozo inafasha ingabo guhuza imikorere kuko ziba ziva mu bihugu bifite amahame atandukanye. Icyiza ni uko u Rwanda ruri muri EASF, tukaba twakwigira ku bindi bihugu ariko na byo bikatwigiraho kuko tugira uruhare mu kugarura amahoro mu bice bitandukanye. Kuba tugiye kuyobora EASF ni andi mahirwe yo kugaragaza ubushobozi bwacu mu gushyira mu bikorwa gahunda z'uwo muryango.'

EASF kandi igira uruhare mu gufasha urubyiruko kunguka ubumenyi bujyanye no kwimakaza amahoro aho kugeza ubu abarenga 1400 bo mu bihugu 10 binyamuryango bahawe ubwo bumenyi.

---

Hari benshi mu byamamare bafite amazina ahambaye mu myidagaduro y'u Rwanda 2024 igiye gusiga batakiri ingaramakirambi.

Ni umwaka wabereye bamwe uw'umugisha, usiga bahuye n'umunsi utazibagirana mu mateka yabo, bakora ibirori byasize bahanye isezerano n'abo bakunda bemeranya kubana akaramata.

InyaRwanda yakusanyije urutonde rw'ibyamamare uyu mwaka ugiye gusiga bitakiri mu ngaragu. Ni ibyamamare mu ngeri zitandukanye yaba sinema, amarushanwa y'ubwiza, umuziki, itangazamakuru n'izindi.

1.     Kimenyi na Muyango

Umukinnyi w'umupira w'amaguru wabigize umwuga, Kimenyi Yves, yasezeranye na Uwase Muyango Claudine wegukanye ikamba ry'umukobwa uberwa n'amafoto muri Miss Rwanda ya 2019, ku wa 6 Mutarama 2024.

Umuhango wo gusaba no gukwa wabereye mu Karere ka Gasabo mu Murenge Gisozi ahazwi nka Romantic Garden, waranzwe n'ubwitabire bw'abafite amazina azwi muri siporo no mu myidagaduro y'u Rwanda. Barimo Nimwiza Meghan wabaye Nyampinga w'u Rwanda mu 2019, Mariya Yahani wasohoye umugeni, Victor Rukotana uririmba gakondo ndetse na Jado Kabanda wabaye umujyanama wa Bruce Melodie akaba n'Umuyobozi mukuru wa Isibo TV Muyango Claudine akorera.

Umukundwa Cadette witabiriye Miss Rwanda ya 2019 ari mu bambariye Muyango Claudine. Umuhanzi Nkurunziza waririmbye indirimbo irata ubutwari bw'ingabo z'u Rwanda, Nkurunziza ni we wari umusaza wasabiye Kimenyi Yves.

Kimenyi Yves yaherekejwe n'abasore barimo abakinnyi nka Biramahire Abed ukina muri Mozambique, Nshuti Innocent wa APR FC, Nkinzingabo Fiston wa Mukura FC, Mugunga Yves ukinira Kiyovu FC na Zaba Missed Call w'umunyarwenya.

Muyango Claudine na Kimenyi Yves basezeranye imbere y'Imana mu muhango wabereye mu Busitani bwa Center Piece buri ku Gisozi mu ntera ngufi uvuye kuri Romantic Garden ahabereye uwo gusaba no gukwa. Basezeranyijwe na Bishop Karemera Emmanuel wo mu Itorero Living God Church, abasaba kubaka urugo rwiza rushingiye ku ijambo ry'Imana.

Kimenyi Yves yasezeranyije Muyango kuzamukunda iteka ryose naho Muyango Claudine amusezeranya kumubera umugore umwubaha.Bakimara gusezerana bakiriye abatumirwa mu Busitani bwa Romantic Garden.

2.     Killaman na Shemsa

Ku itariki 2 Werurwe 2024 muri Romantic Garden, Killaman yasabye anakwa Umuhoza Shemsa. Uhereye ku musatsi kugeza ku mano, abambariye Killaman na Umuhoza Shemsa bari bakoresheje imyambaro ihenze, isa neza kandi ibereye amafoto nk'uko n'ubundi ari ibyamamare.

Si ukwambara gusa, uninjiye imbere mu nyubako yabereyemo buriya bukwe yari yarimbishijwe n'imitako y'igiciro.

Umuhango wo gusaba no gukwa witabiriwe n'abasaga 1000 ku buryo imibare yose yari yakozwe bagendeye kuri uwo mubare nubwo barenze bitewe nuko ku mugoroba ubwo hari hagezweho kwiyakira no gutanga impano, imyanya yo kwicaramo yabaye mike bamwe bakurikira ibirori bahagaze.

Ni umuhango waranzwe n'ubwitabire ku bakinnyi ba filime bashyigikiye Killaman. Killaman yabwiye itangazamakuru ko ubu bukwe bwamusizemo imvune, aho yagize ati: 'Ubukwe bwose n'imyiteguro yabwo yantwaye miliyoni 60 Frw.'

Abamwambariye barimo Bamenya, Rocky Kimomo, Shaffy, Mitsutsu, Dr Nsabi, Umunyamakuru Fuadi, Bahati Makaca n'abandi. Ku ruhande rw'abakobwa, Killaman yambariwe n'abarimo Lynda, Nyambo Jessica, Inkindi Aisha n'abandi bazwi muri Sinema nyarwanda. Umugeni yasohowe na Masamba Intore wanakomerejeho agataramira abitabiriye ubukwe kugeza batangiye gutanga impano.

Ku itariki 8 Gashyantare 2024, Killaman yasezeranye mu mategeko na Umuhoza Shemsa mu muhango wabereye mu Murenge wa Nyarugenge mu Mujyi wa Kigali.

Killaman azwiho kuzamura impano muri Sinema nyarwanda dore ko abarimo Nyambo Jesca, Dr Nsabi, Mitsutsu na Solobo bari mu bo yafashije.

3.     Miss Aurore Kayibanda

Miss Kayibanda Aurore wambitswe ikamba rya Nyampinga w'u Rwanda mu 2012, yasezeranye imbere y'Imana na Gatera Jacques mu muhango wabereye Marie Auxiriatrice ku Kimihurura.

Uyu muhango wabaye ku wa 15 Kanama 2024 wakurikiye uwo gusaba no gukwa wabaye mu cyumweru gishize, uyu ukaba ari umuhango na wo wakurikiye uwo gusezerana imbere y'amategeko wabereye muri Leta Zunze Ubumwe za Amerika ku wa 22 Gashyantare 2024.

Ubukwe bwa Miss Kayibanda Aurore burasorezwa mu muhango wo kwakira abatumiwe uteganyijwe kubera mu Intare Arena ku mugoroba wo ku wa 15 Kanama 2024.

Muri Mutarama 2023 ni bwo Gatera yafashe icyemezo yambika impeta Miss Kayibanda amusaba ko bazabana akaramata undi na we yemera atazuyaje.

Miss Kayibanda na Gatera bari basanzwe batuye muri Leta Zunze Ubumwe za Amerika, ni na ho basezeraniye imbere y'amategeko mbere y'uko bemeranya gukorera ubukwe mu Rwanda ari na ho bazatura.

Miss Aurore Kayibanda yambitswe Ikamba rya Miss Rwanda mu 2012, mu 2015 aza kwerekeza muri Leta Zunze Ubumwe za Amerika aho yari agiye gukomereza amashuri.

4.     Kenny Sol

Nyuma y'uko abantu babonye Kenny Sol asezerana mu Murenge n'umugore we Kunda Alliance Yvette, benshi bari bagihanze amaso ubukwe nyirizina bw'uyu muhanzi, icyakora amakuru ahari ahamya ko bwamaze kuba mu ibanga rikomeye.

Amakuru InyaRwanda ifite ni uko ubwo abantu bari bahugiye mu nkuru z'amafoto y'uyu muhanzi asezerana n'umugore we mu Murenge, umuhango wabaye ku wa 5 Mutarama 2024, bwakeye asezerana imbere y'Imana.

Kenny Sol yasezeraniye mu rusengero rwitiriwe Mutagatifu Kizito ruherereye mu Nyakabanda ku wa 6 Mutarama 2024.

Ni umuhango Kenny Sol n'umugore we batumiyemo abantu batagera ku icumi biganjemo aba hafi mu miryango yabo, bemeranya ko ari amakuru atagomba kujya mu itangazamakuru cyangwa ku mbuga nkoranyambaga.

Amakuru avuga ko uyu muhango wo gusezerana imbere y'Imana kimwe n'uwo gusaba no gukwa wari warabaye mu mpera z'umwaka wa 2023, Kenny Sol n'umugore we bari bahisemo kuyigira ibanga rikomeye cyane ko batifuje ko ivugwa mu itangazamakuru.

Bitewe n'uko yifuzaga ko ubukwe bwe buba ubw'imiryango kuruta ubwo mu muziki, Kenny Sol n'umugore we bagerageje kubutegura mu ibanga bahera ku gutumira abantu bake nabo bagahabwa amabwiriza yo kubika ibanga.

Ni umugambi bari banogeje icyakora biza kwanga ubwo bajyaga ku Murenge gusezerana imbere y'amategeko kuko bisanze bigomba kubera mu ruhame ibanga ryaho riragorana.

Uretse kubigira ibanga, Kenny Sol n'umugore we ntibaranatangira gusohora amafoto y'ubukwe bwabo cyane ko ubwo twashakishaga irengero ryayo amakuru yadushyikiye ahamya ko yaba amafoto n'amashusho bikiri gutunganywa.

5.     B-Threy

Nyuma y'umwaka urenga B-Threy n'umugore we Keza Nailla bakoze ubukwe ndetse banibarutse imfura yabo, basezeraniye imbere y'amategeko mu Murenge wa Nyakabanda ku wa 7 Ugushyingo 2024.

Amakuru InyaRwanda yabonye ni uko B-Threy n'umugore we bakoze ubukwe atarageza imyaka yo gusezerana imbere y'amategeko, bahitamo gukora indi mihango, bategereza ko ageza imyaka bakabona gukora iri sezerano.

Nyuma y'uko yujuje imyaka 21 y'amavuko mu Ukwakira 2024, uyu muryango wafashe icyemezo cyo gusezerana imbere y'amategeko mu muhango wabereye mu Murenge wa Nyakabanda.

Muri Werurwe 2023 nibwo Muheto Bertrand [B.Threy] yasabye anakwa Keza Nailla bari bamaze igihe bakundana.

Imana yahise inaha umugisha uyu muryango wibarutse imfura yabo muri Nyakanga 2024, umwana wabo aba urubuto rw'urukundo bari bamaze igihe bakundana kugeza mu 2022 ubwo bafataga icyemezo cyo gutangira kugaragaza urwo bakundana.

B Threy ni umwe mu baraperi bamaze igihe bagezweho mu muziki w'u Rwanda. Uyu musore wamamariye mu itsinda rya Kinyatrap ni umwe mu bikorana umuziki ku giti cye ariko unahagaze bwuma.

Umwaka ushize ubwo yari amaze kwibaruka imfura ye, B Threy yakoze album ye nshya yise 'M2M' cyangwa 'Muheto 2 Mushya' ari nayo aherutse gusohora.

6.     Miss Musana Teta Hense

Miss Musana Teta Hense wegukanye Ikamba rya Nyampinga ufite umushinga urimo agashya muri Miss Rwanda 2021, yakoze ubukwe na Habimana Lewis bari bamaze igihe bakundana.

Miss Musana yakoreye ubukwe ahitwa Kareb Garden ku i Rebero ku wa 27 Nzeri 2024. Mu gitondo cy'uyu munsi w'ibirori habaye umuhango wo gusaba no gukwa, ku gicamunsi cyaho hakurikiraho umuhango wo gusezerana imbere y'Imana mu gihe ku mugoroba hategerejwe ibirori byo kwakira abatumiwe no kwishimana n'abageni.

Miss Musana afite inkuru yihariye kuko nyuma yo kwitabira irushanwa rya Miss Rwanda 2020 ntahirwe, yaje gufata icyemezo cyo gusubirayo kugira ngo arebe ko yabona amahirwe yo kwiga kaminuza kuko yari yabuze ubushobozi.

Uyu mukobwa wahiriwe n'iri rushanwa yinjiye muri 20 bagiye mu mwiherero, ahabwa amahirwe yo kwiga muri University of Kigali, ndetse anahabwa ikamba ry'uhiga abandi mu kugira umushinga mwiza.

Miss Musana wahize abandi mu kugira umushinga mwiza, yahawe igihembo cyo kuba 'Brand Ambassador' wa BK, akajya abihemberwa ibihumbi 500 Frw buri kwezi, ndetse iyi banki yiyemeza kumufasha gushyira mu bikorwa umushinga we.

Ku ikubitiro Banki ya Kigali yabanje gutegurira uyu mukobwa amahugurwa y'uburyo imishinga icungwa binyuze mu gikorwa iyi banki yise 'Urumuri'.

Uretse amahugurwa yamaze amezi atandatu, Banki ya Kigali yageneye Miss Musana inkunga ya miliyoni 24 Frw zo gutangiza umushinga we. Aya mafaranga yarimo ayo kugura imashini ikora ibi bikombe, kugura impapuro zo kubikoramo, gukodesha aho akorera ndetse no kwishyura abakozi.

7.     Miss Sangwa Odile 

Miss Uwase Sangwa Odile wabaye igisonga cya kabiri cya Miss Rwanda 2019, Nimwiza Meghan, ku wa 18 Kanama 2024 yakoze ubukwe na Shyaka Francis, usanzwe ari umuyobozi w'ikipe ya Tigers Basketball Club ikina shampiyona y'icyiciro cya mbere mu Rwanda.

Ubukwe bwa Uwase Sangwa Odile na Shyaka Francis bwabimburiwe n'umuhango wo gusaba no gukwa wabereye ahitwa Juru Park i Rebero ku wa 11 Kanama 2024.

Ku wa 18 Kanama 2024 abageni basezeranye imbere y'Imana mu cyumba cy'amasengesho cyo kuri IFAK Kimihurura, mu gihe ibirori byabo bisozwa no kwakira abatumiwe bikabera ku Intare Arena.

Aba bombi bamaze imyaka itari mike bakundana, amakuru yizewe InyaRwanda ifite agahamya ko Uwase yitabiriye irushanwa rya Miss Rwanda asanzwe akundana na Shyaka.

Nubwo bari basanzwe bakundana ariko ibijyanye n'urukundo rwabo bakunze kubigira ibanga, kugeza muri Gashyantare 2024 ku munsi wahariwe abakundanye ubwo berekaga Isi yose ko bakundana binyuze ku mbuga nkoranyambaga.

Mu mpera za Gashyantare 2024 nibwo Shyaka yafashe icyemezo yambika impeta uyu mukobwa amusaba ko yazamubera umugore undi abyemera atazuyaje bahita bafata icyemezo cyo kuzabana akaramata.

8.     Dc Clement na Aliane

Umunyamakuru Dc Clement ukora ku Isibo Fm yasabye, akwa, anasezerana imbere y'Imana na Manzi Aliane bagiye kubana nk'umugore n'umugabo.

Umuhango wo gusaba, gukwa no kwakira abatumiwe yabereye umunsi umwe ku tariki ya 01 Nyakanga 2024 i Kanombe mu Karere ka Kicukiro. Ni mu gihe gusezerana imbere y'Imana byabereye mu itorero rya EPR Kanombe.

ubu bukwe bwabaye nyuma y'uko ku gicamunsi cyo kuwa Kane tariki 27 Kamena 2024, aribwo hari habaye umuhango wo gusezerana mu mategeko hagati y'aba bombi. Wabereye mu Karere ka Gasabo, Umurenge wa Kimironko.

Ubukwe bwa Dc Clement bwitabiriwe n'abafite amazina azwi mu myidagaduro yo mu Rwanda barimo abahanzi; Chriss Eazy, Juno Kizigenza na Shemi baririmbiye abageni mu gihe cyo kwiyakira.

Mu bandi bitabiriye ubu bukwe, harimo Muyoboke Alex wabaye umujyanama w'abahanzi batandukanye, Jado Kabanda nyiri Isibo Fm na Isibo Tv na Isimbi Model uzwi ku mbuga nkoranyambaga, umuhanzi ubifatanya n'ishoramari ryo kugura no kugurisha amazu n'ibibanza Ujekuvuka Marchal, umuhanzikazi Bwiza, abanyamakuru nka Mutesi Scovia, Fatakumavuta bakorana mu kiganiro Isibo Radar na Fuadi uzwi mu itangazamakuru ry'imikino, umusizi Rumaga Junior, Bahavu Usanase Jeannette n'umugabo we, Benimana Ramadhan uzwi nka Bamenya, umunyarwenya Fally Merci wari no mu bamwambariye, ababyinnyi Jojo Breezy na Divine Uwa, ndetse n'abandi batandukanye.

9.     Rusine na Iyrn

Umunyarwenya Rusine Patrick ukora kuri Kiss FM, yasezeranye imbere y'amategeko n'umugore we banaherutse kubyarana imfura. Rusine n'umugore we Iyrn Uwase Nizra bamaze igihe banabana nk'uko amakuru InyaRwanda ifite abihamya. Basezeranye mu ibanga rikomeye mu gitondo cyo ku wa 12 Nzeri 2024 mu Murenge wa Kimihurura.

Guhera mu ntangiriro z'uyu mwaka nibwo Rusine na Uwase batangiye kugaragaza urukundo rwabo, icyakora icyo gihe amakuru yavugaga ko bari bamaranye igihe ndetse bari basigaye banabana mbere y'uko bibaruka imfura yabo.

Muri Kanama 2024 nibwo Rusine yambitse impeta Uwase bemeranya kubana akaramata, umuhango wabanjirije uwo gusezerana imbere y'amategeko kuri uyu wa 12 Nzeri 2024.

Rusine n'uyu mugore ni abantu batakunze ko inkuru z'urukundo rwabo zijya mu itangazamakuru, kugeza ubwo mu minsi ishize batangiye kujya bashyira hanze amwe mu makuru aberekeyeho.

Rusine wamamaye nk'umunyarwenya ni n'umukinnyi wa sinema ufite izina ritoroshye mu Rwanda cyane ko ari umwe mu nkingi za mwamba muri filime yitwa 'Umuturanyi' iri mu zikunzwe bikomeye.

Mu Ukwakira 2022 nibwo Rusine wari usanzwe ari umunyarwenya ukomeye mu Rwanda yinjiye kuri Kiss FM aho yabereye umunyamakuru w'ikimenyabose nyuma y'igihe atangiriye uyu mwuga kuri Power FM.

10.  Jado Sinza na Esther

Umuramyi akaba n’umukinnyi wa Filime za Gikristo, Sinzabyibagirwa Jean de Dieu uzwi nka Jado Sinza, yasezeranye kubana akaramata n’umukunzi we Esther Umulisa bamaze imyaka 8 bakundana.

Ku wa Kane tariki 05 Nzeri 2024, ni bwo Jado Sinza na Esther Umulisa bemerewe n’amategeko ya Leta y’u Rwanda kubana nk’umugabo n’umugore mu muhango wabereye mu Murenge wa Kimironko mu Mujyi wa Kigali. 

Icyo gihe, aba bombi bari bagaragiwe n’abarimo Bosco Nshuti, Josue Shimwa na Neema Marie Jeanne mukuru wa Esther Umulisa.

Nk’uko byari muri gahunda yabo, ku wa 21 Nzeri 2024 bakoze ubukwe bwo gusaba no gukwa ndetse banasezerana imbere y’Imana mu rusengero rwa ADEPR Remera.

Jado Sinza na Umulisa Esther bamaze imyaka 14 baziranye ndetse bakaba bakundanye mu gihe cy’imyaka 8 mbere y’uko bashyingiranwa kandi bagahurira ku mpano yo kuririmba.

Jado Sinza yakunzwe mu ndirimbo zirimo Amateka, Itorero, Goligotta, Ndi Imana yawe, Yesu Warakoze, Inkuru y'agakiza n'izindi. Muri sinema, azwi muri filime ye bwiye yitwa “Ndategereje”, akaba yarayitiriye indirimbo ye yakunzwe cyane nyo yitwa “Ndategereje”.

Mu bandi byitezwe ko bazasoza uyu mwaka batakiri ingaragu, harimo Nyampinga w'u Rwanda wa 2020, Nishimwe Naomie uzarushinga ku ya 29 Ukuboza 2024, Miss Irasubiza Alliance wegukanye ikamba rya Miss Popularity muri Miss Rwanda mu 2020, uzakora ubukwe ku wa 19 Ukuboza 2024 mu Mujyi wa Nampa ho muri Leta ya Idaho ho muri Leta Zunze Ubumwe za Amerika, n'abandi.