Author: webrwanda

Ibi IGP Felix Namuhoranye yabigarutseho ku wa Mbere tariki 17 Gashyantare 2025, ubwo yakiraga ku cyicaro gikuru cya Polisi ku Kacyiru, itsinda rya ba Ofisiye bakuru biga mu ishuri rikuru rya Polisi (NPC) mu Karere ka Musanze.

Ni muri gahunda y'urugendoshuri batangiye ruzamara icyumweru imbere mu gihugu, rukubiye mu masomo y'umwaka umwe bamara biga muri iryo shuri.

Uru rugendoshuri bazarukorera mu turere dutandukanye two mu Ntara zose z'u Rwanda hagamijwe guhuza amasomo bigira mu ishuri n'akazi gakorerwa mu nzego n'ibigo bitandukanye bazasura.

Rwitabiriwe n'abanyeshuri bagera kuri 45 bakomoka mu bihugu 9 by'Afurika birimo n'u Rwanda rwabakiriye, bakurikirana amasomo y'icyiciro cya 13 yerekeranye n'ubuyobozi (Police Senior Command and Staff Course).

Rwateguwe ku nsanganyamatsiko igira iti 'Gucunga umutekano bishingiye ku mibereho y'abaturage; Uburyo buboneye bwo gukumira ibyaha'.

Hazibandwa ku gusuzuma uburyo ingamba z'imikoranire zishobora gutanga umusanzu ku mutekano n'imibereho myiza y'abaturage binyuze mu bikorwa bitandukanye by'ubufatanye bugamije kubumbatira umutekano.

Mu kiganiro bagiranye; IGP Namuhoranye yabifurije kuzungukira byinshi muri uru rugendoshuri kugira ngo bizabafashe kubihuriza hamwe n'ubumenyi bigiye mu ishuri.

Yababwiye ko ubufatanye bwa Polisi n'abaturage ari ishingiro ry'umutekano, ashimangira akamaro ko gukorana nabo bya hafi mu gukumira ibyaha no gutahura ababikora.

Yagize ati 'Imikoranire ya Polisi n'abaturage mu gucunga umutekano bugereranywa n'urutirigongo mu mubiri w'umuntu. Abaturage nibo shingiro ry'umutekano, iyo ushaka gukumira no kurwanya ibyaha ugomba gukorana n'abaturage kuko abakora ibyaha baba bavuye muri sosiyete, ari nayo basanzwe babamo kandi bamara no kubikora bakongera bagasubira muri ya sosiyete. Kugira ngo rero ubashe kumenya ababikora bisaba ko ukorana bya hafi n'abaturage.'

Yakomeje avuga ko ” Kubera kandi ko umutekano ari wo shingiro rya byose, twahisemo gukorana n'abaturage binyuze mu ngeri zitandukanye zirimo; urubyiruko rw'abakorerabushake mu gukumira ibyaha, Komite z'abaturage mu kwicungira umutekano (CPCs), imboni z'impinduka, amatsinda (clubs) atandukanye yo gukumira no kurwanya ibyaha n'ibiyobyabwenge, ndetse n'abandi batandukanye bidufasha kubona amakuru y'ahakorerwa ibyaha bityo bikorohereza Polisi n'izindi nzego zishinzwe umutekano guhangana nabyo.”

IGP Namuhoranye yagaragaje kandi ko ari ngombwa ko imikoranire yarushaho kuba mu buryo bw'ikoranabuhanga kugira ngo byihutishe guhuza abantu, gukorera mu mucyo no gukora neza mu kurushaho kubumbatira umutekano.

Umuyobozi w'Ishuri rikuru rya Polisi, CP Rafiki Mujiji, yavuze ko muri uru rugendoshuri rw'icyumweru, abanyeshuri bazasura ahantu hatandukanye mu rwego rwo guhuza ibyo biga n'ibikorerwa hanze bityo bibafashe kwiyungura ubumenyi n'ubunararibonye no kugaragaza uruhare rwabo mu gukumira ibyaha no kurinda umutekano w'abantu n'ibyabo muri rusange.

Mu gihe cy'umwaka umwe bamara biga, ba ofisiye bakuru mu nzego zishinzwe iyubahirizwa ry'amategeko, bahabwa amasomo akubiye mu bice bitandukanye birimo amasomo y'icyiciro cya gatatu cya Kaminuza (Masters) mu bijyanye n'amahoro no gukemura amakimbirane, ubumenyi ku miyoborere, n'ayerekeranye n'ibikorwa byo kubungabunga amahoro.

CG Felix Namuhoranye yagiranye ikiganiro n'itsinda rya ba Ofisiye bakuru biga mu ishuri rikuru rya Polisi (NPC) mu Karere ka Musanze

Umuyobozi Mukuru wa Polisi y'u Rwanda (IGP), CG Felix Namuhoranye, yagaragaje ko mu ari ingenzi ko polisi ikorana n'abaturage mu bikorwa byo gucunga umutekano

Shyaka watawe muri yombi ku wa 14 Gashyantare 2025, bikekwa ko yatse ndetse akakira indonke y'ibihumbi 100 Frw, ayihawe n'umuturage kugira ngo azamufashe gukemura ikibazo cy'imbibi z'ubutaka uyu muturage yari afitanye n'abaturanyi be.

Ibyo bikorwa bikekwa ko byakorewe mu Karere ka Kamonyi, Umurenge wa Runda, Akagari ka Muganza mu Mudugudu wa Kigabiro.

Uwafashwe afungiye kuri Station ya RIB ya Runda ndetse dosiye ye yarakozwe. Iyo dosiye yohererejwe Ubushinjacyaha ku wa 17 Gashyantare 2025.

Icyaha Shyaka akekwaho cyo kwakira cyangwa gutanga indonke giteganywa n'ingingo ya kane y'itegeko nimero 54/2018 ryo ku wa 13 Kanama 2018 ryerekeye kurwanya ruswa.

Ugihamijwe ahanishwa igifungo kirenze imyaka itanu ariko kitarenze imyaka irindwi n'ihazabu y'Amafaranga y'u Rwanda yikubye inshuro kuva kuri eshatu kugeza kuri eshanu z'agaciro k'indonke yatse cyangwa yakiriye.

RIB yashimiye Abanyarwanda bakomeje gutanga amakuru nyuma yo gusobanukirwa ububi bwa ruswa, ikanihanangiriza abakomeje kwishora mu bikorwa bya ruswa bitwaje umwuga bakora, ikemeza ko uzabifatirwamo azabihanirwa.

RIB irashishikariza Abaturarwanda gutanga amakuru y'aho bakeka ruswa mu gukomeza urugamba rwo kuyirwanya mu gihugu.

Urwego rw'Ubugenzacyaha kandi rwibukije ko ruswa ari icyaha kidasaza kuko igihe cyose ibimenyetso byabonekera, uyiketsweho wese nta kabuza aba agomba gukurikiranwa nk'uko amategeko abiteganya.

Gukurikiza amategeko ni ingenzi kugira ngo umuntu agire ejo hazaza heza. Hari abibwira ko gereza ari iya bamwe, abandi wenda itabareba hashingiwe ku kuba ari ibyamamare, ariko ibi ntaho bihuriye n'ukuri kuko aho ariho hose ku Isi ukoze ibikorwa bihabanye n'amategeko uko yaba ameze kose arahanwa.

Ku wa Kabiri tariki ya 29 Ukwakira 2024, ni bwo Polisi y'u Rwanda yanyujije ubutumwa ku mbuga nkoranyambaga zayo, itangaza ko hashize iminsi itaye muri yombi Muheto Nshuti Divine wabaye Miss Rwanda 2022, kubera gutwara ikinyabiziga yanyoye ibisindisha birengeje igipimo, kandi nta ruhushya rwo gutwara ibinyabiziga,kugonga no kwangiza ibikorwa remezo, hamwe no guhunga nyuma yo kugonga.

Mu itangazo ryashyizwe hanze Polisi yagize iti: 'Polisi iramenyesha ko Miss Muheto Divine yafashwe kubera gutwara ikinyabiziga yanyoye ibisindisha birengeje igipimo, kandi nta ruhushya rwo gutwara ibinyabiziga agira, kugonga no kwangiza ibikorwa remezo, hamwe no guhunga nyuma yo kugonga.'

Icyo gihe Polisi yongeyeho ko ibyo byaha atari ubwa mbere yari abikoze.

Iyi ni imwe mu nkuru benshi bagaragaje nk'amahano ndetse benshi bamutera imijugujugu ku mbuga nkoranyambaga bavuga ko ntaho byabaye gusimbuza ikamba amapingu.

Gusa igitangaje ni uko burya ibi bitabaye kuri Muheto gusa, kuko mu mateka y'imyidagaduro, hari ba nyampinga batandukanye bagiye bagira ibibazo bibagoganisha n'amategeko, bikabaviramo gufungwa. Bamwe bagiye batabwa muri yombi kubera ibyaha by'ubucuruzi bw'ibiyobyabwenge, uburiganya, cyangwa ibyaha bijyanye n'ubwicanyi.

Dore bamwe mu banyampinga bagiye bafungwa, barimo n'Abanyarwanda ndetse n'Abanyafurika.

Aba banyampinga bagaragaza ko nubwo umuntu yaba icyamamare, ibibazo bijyanye n'amategeko bishobora kugera kuri buri wese. Gukurikiza amategeko ni ingenzi kugira ngo umuntu agire ejo hazaza heza.

1.     Melissa Mikosz

Melissa wabaye Miss Swimsuit UK 2019, yahamwe n'icyaha cyo gucuruza cocaine no gukora ubucuruzi bw'amafaranga butemewe. Mu mwaka wa 2024, yakatiwe gufungwa imyaka irindwi.

2.     Lindsay Shiver

Yahoze ari nyampinga muri Alabama, muri Leta Zunze Ubumwe za Amerika. Yafatiwe muri Bahamas mu mwaka wa 2024, akekwaho gucura umugambi wo kwica umugabo we.

3.     Glenis Zapata

Uyu mugore wabaye Miss Indiana Latina mu 2011, yatawe muri yombi mu mwaka wa 2024 azira gukorana n'itsinda ry'amabandi acuruza ibiyobyabwenge muri Mexique.

4.     Divine Muheto

Divine Nshuti Muheto wabaye Miss Rwanda 2022, yatawe muri yombi mu mwaka wa 2024 azira gutwara imodoka yanyweye ibisindisha kandi adafite uruhushya rwo gutwara.

5. Leona Gage 

Leona Gage wabaye Miss USA 1957, yambuwe ikamba nyuma y’uko bivumbuwe ko ari umugore ndetse akaba umubyeyi w’abana babiri, kuko ibi bitari byemewe mu mategeko y’irushanwa. Nyuma yaho yagiye afungwa incuro nyinshi kubera ibibazo by’imyitwarire.

6.     Alicia Guastaferro  

Alicia wamamaye mu marushanwa y’aba nyampinga bakiri bato muri Leta Zunze Ubumwe za Amerika, yatawe muri yombi mu mwaka wa 2012, ashinjwa ubusambanyi bwishyuwe no gutunga ibiyobyabwenge.

7.     Iradukunda Elsa

Nyampinga w’u Rwanda wa 2017, na we yigeze gutabwa muri yombi akurikiranyweho gukoresha inyandiko mpimbano.

        8. Priscila Guevara

Guevara, Nyampinga ukomoka muri Mexique, we n’umukunzi we bakatiwe igifungo cy’imyaka ine muri Werurwe 2023 bazize kwiba divayi zifite agaciro ka miliyoni 1.7$ muri resitora yo muri Espagne

9.     Maria Susana Flores Gámez

Uyu wabaye nyampinga muri Mexique watawe muri yombi mu 2012, akekwaho gukorana n'amatsinda y'amabandi acuruza ibiyobyabwenge. Maria yaje kwitaba Imana muri uyu mwaka arashwe.

10. Agnes Gerald (Masogange)

Agnes Gerald wamenyekanye nka Masogange wamenyekanye cyane muri Tanzania nk'umunyamideli ndetse n'umwe mu bitabiriye amarushanwa y'ubwiza. Na we yatawe muri yombi mu 2018, ashinjwa ibyaha bijyanye n'ibiyobyabwenge, aza kwitaba Imana muri uwo mwaka.

 

Yabikomojeho ku wa 16 Gashyantare 2025, mu mwiherero wahuje abayobozi bose b'Akarere ka Karongi kuva ku buyobozi bw'akagari kugera ku bw'akarere.

Ni umwiherero ubaye mu gihe u Rwanda ruhanganye no kugabanya umubare w'abana bagwingirira kuko kugeza ubu bari kuri 33%, mu gihe intego ya gahunda ya kabiri ya guverinoma yo kwihutisha iterambere, iyo mibare igomba kugabanywa byibuze ikagera kuri 15%.

Akarere ka Karongi kari mu turere 10 twa mbere dufite abana benshi bagwingiye. Utwo turere ni Ngororero ifite 50,5%, Nyabihu 46,7%, Rutsiro 44,4%, Rubavu 40,2%, Gakenke 39,3%, Nyaruguru 39,1%, Ruhango 38,5%, Nyamagabe 33,6%, Karongi 32,4%, Rusizi 30,2%, Huye 29,2%, Kayonza 28,3% na Bugesera yari ifite 26,1%.

Kayisire avuga ko nubwo Guverinoma yihaye intego yo kugabanya abana bagwingira bakagera kuri 15% bitarenze 2029, ikigambiriwe ari uko nta mwana n'umwe ukwiye kugwingira.

Ati 'Umuntu wagwingiye ntacyo amarira igihugu, cyangwa se arakimara ariko bitari mu bushobozi bwe bwose. Tugomba gukora uko dushoboye. Abana bose bavuka muri Karongi bakagera ku bushobozi bwabo bwose. Ni cyo dushinzwe nk'abayobozi twese twicaye hano.'

Umuyobozi w'agateganyo w'Akarere ka Karongi, Muzungu Gerald, yavuze ko bateguye uyu mwiherero nk'umwanya wo kuganira ku bibazo biri mu karere kugira ngo babifatire ingamba.

Ati 'Nta mukozi mutoya, nta mukozi munini twese turi abakozi b'Akarere. Buri wese iyo akoze neza bitanga umusanzu, kandi iyo akoze na bi bigira icyo byica. Uyu mwiherero uba ari umwanya wo kugira ngo twisuzume dufate ingamba, ibigaragara nabi bihinduke'.

Uretse igwingira ibyo bibazo byagombaga kwigwaho birimo n'icy'ingengabitekerezo ya jenoside imaze iminsi igaragara mu turere dutandukanye na Karongi irimo n'icy'imitangire mibi ya serivisi, aho Karongi iri mu turere twasubiye inyuma mu mitangire ya serivisi.

Raporo iheruka y'Urwego rw'Igihugu rw'Imiyoborere, RGB, ku ishusho y'imiyoborere n'imitangire ya serivisi igaragaza ko Akarere ka Karongi katakaje amanota ava 76,87% agera kuri 73,53%.

Ni mu gihe intego ya guverinoma yo kwihutisha iterambere mu myaka irindwi ishize yari uko ikigeroccy'abaturage banyurwana serivisi kikagera kuri 90% bitarenze 2024.

Minisitiri Kayisire Marie Solange yasabye abayobozi ba Karongi guharanira ko nta mwana n’umwe ugwingira

Meya Muzungu avuga ko umwiherero wari umwanya wo kwisuzuma no gufatira hamwe ingamba zo gukosora ibitagenda neza

Umwiherero witabiriwe n’abayobozi bose kuva ku Kagari kugera ku rwego rw’Akarere ka Karongi

Mu mwiherero wahuje abakozi b’Akarere ka Karongi habayemo umwanya wo guhemba abayobozi babaye indashyikirwa

Abaturage baturiye muri ako gace, bavuga ko ubwo umutwe wa M23 winjiraga mu Mujyi wa Bukavu, batangiye gucunaguzwa, bagahura b'ibibazo, bahitamo guhungira mu Rwanda.

Abagera kuri 400 binjiye ku mupaka wa Bugarama, bahisemo gutaha iwabo kuri uyu wa Mbere mu masaha ya nyuma ya Saa Sita nyuma yo kumva ko ibintu bimeze neza i Bukavu.

Inzego z'ibanze mu Rwanda zabafashije, zibashakira imodoka zibageza ku mupaka, binjira ku mupaka wa Rusizi I bajya i Bukavu. Usibye abambukiye ku wa Rusizi I, hari abandi banyuze ku mupaka wa Rubavu bataha.

Abandi 25 bahisemo kuguma mu Rwanda, bacumbikirwa mu nkambi ya Nyarushishi mu gihe bategereje kuzataha mu minsi iri imbere.

Umwe mu Banyekongo basubiye iwabo yagize ati ' Uyu munsi batubwiye ngo abashaka gutaha batahe ni yo mpamvu uri kubona buri wese asubira iwe. Umutekano wifashe neza'.

Adrien Mutaba, yavuze ko yageze Uvira agasanga hari intambara, akomeza yerekeza ku mupaka wa Kamanyola ahinguka mu Rwanda baramwakira.

Ati 'Batwakiriye neza baduha amazi yo kunywa. Kugeza ubu twari tukiri mu mujyi wo Rwanda, ndashaka kwambuka ngasubira muri Congo. Kamanyola ntabwo M23 irahagera.'

'Abasirikare ba FARDC bari kurasa amasasu buri kanya, nta mwanzi babonye, ahubwo bari kwambura abantu amatelefone, bakambura amafaranga… M23 ntabwo irahagera ku bw'Imana irahagera kubera ko bafite imbaraga'.

Mutaba yavuze ko akorera ahitwa Kalemi bityo ko agiye kwinjira mu mujyi wa Bukavu akaharara kubera ko yumvise ko hatekanye, akazakomeza nyuma.

Undi mugenzi we yagize ati 'Maze iminsi itatu ndi muri hoteli Kamanyola, uyu munsi nibwo twambutse tunyura mu Rwanda. Iwacu ni Banjia muri Bukavu.'

Amakuru avuga ko ubwo abarwanyi ba M23 bari bageze mu Mujyi wa Bukavu, bakomereje urugendo rwabo mu Majyepfo yawo, bagera mu bice bya Walungu. Ako ni agace kegeranye na Kamanyola hafi y'Umupaka w'u Burundi na RDC.

Bivugwa ko hari abasirikare benshi ba FARDC bahunze bava i Bukavu, bakanyura Kamanyola binjira mu Ntara ya Cibitoke mu Burundi.

U Burundi bwihuje na Repubulika Iharanira Demokarasi ya Congo muri iyi ntambara ndetse bukomeje kongera ingabo muri uru rugamba. Hari impungenge ko ibintu bishobora gufata indi ntera mu gihe Ingabo za M23 zaba zigeze hafi n'umupaka w'u Burundi.

Amafoto: Herve Kwizera
Video: Muneza Pacifique

Bikubiye mu itangangazo ryashyizwe hanze ku mugoroba wo kuri uyu wa 17 Gashyantare 2025 n'Umuvugizi wa AFC/M23 mu rwego rwa politiki, Lawrence Kanyuka.

Ni itangazo rishyizwe hanze nyuma y'umunsi umwe iri huriro ritangaje ko ryatabaye byuzuye abaturage bo mu Mujyi wa Bukavu bari baratereranywe n'ubutegetsi bwa Kinshasa.

Ni nyuma kandi y'ibikorwa byo kubohora abaturage bo mu bice bitandukanye by'Intara ya Kivu y'Amajyepfo n'iy'Amajyaruguru, by'umwihariko mu Mijyi ya Goma na Bukavu bifatwa nk'imirwa mikuru y'izo ntara, uyu munsi muri ibyo bice amahoro akaba ahinda.

Mu itangazo AFC/M23 yakomeje iti 'Ubuyobozi bubi, igitugu, ruswa, gutonesha bamwe, kwiharira umutungo w'igihugu bikozwe n'umuryango umwe, ibyaha bitizwa umurindi n'ubutegetsi buriho, ibyibasira inyoko muntu n'amacakubiri no guheza abanegihugu bamwe, ni zimwe mu mbogamizi zibangamiye amahoro n'umutekano, ubumwe bw'abaturage n'iterambere ry'igihugu.'

Ibyo bibazo bike muri byinshi byamunze ubutegetsi burangajwe imbere na Félix Tshisekedi, biri mu byatumye AFC/M23 yimwe uburenganzira mu gihugu, yegura intwaro nyuma y'uko inzira y'ibiganiro inaniranye, bikaba ari na byo biri gutuma ihamagarira indi mitwe y'Abanye-Congo ifite intumbero nk'iyayo kubiyungaho bagasenyera umugozi umwe.

Iri huriro rirakomeza riti 'Turahamagarira imitwe y'ingenzi mu gihugu kutwiyungaho mu rugendo rukomeje ndetse rugamije kubohora abaturage tukabakura mu menyo y'ubutegetsi bwimitse ikibi, burangwa n'iterabwoba kugira ngo hashyirweho ubuyobozi bwita ku baturage butabogamye, ari na ko hanazahurwa igihugu.'

AFC/M23 kandi yanasabye abanyepolitiki, abaharanira imibereho myiza y'abaturage, abahunze ubutegetsi bubi bwa Congo, n'Abanye-Congo baba mu mahanga kudatera umugongo igihugu cyababyaye, ahubwo ko bakwiriye kuza, bakunga ubumwe mu kubohora igihugu, hagamijwe kongera kucyubaka.

Iri huriro kandi risaba Abanye-Congo kwirinda ibihuha bisakazwa n'ubutegetsi bwa Kinshasa busigariye hagati y'umupfu n'umupfumu.

Kugeza ubu ibice AFC/M23 yamaze kubohora ibyinshi yabishyizemo abayobozi bayo bashya, barajwe ishinga no kwimakaza umutekano n'iterambere ry'abaturage.

Iri huriro rigaragaza ko rirajwe ishinga no kuganira na RDC ku gukemura ibibazo by'umutekano muke muri iki gihugu, bitakunda rikemeza rizatuza ari uko rigeze i Kinshasa rikabohora abaturage.

M23 yarahiriye kubohora Abanye-Congo mu gihe Kinshasa yakwinangira ku kugarura amahoro hisunzwe ibiganiro

Umujyi wa Goma ho ibintu byamaze gusubira mu buryo, amashuri n’ibindi bikorwa birasubukurwa

Umujyi wa Bukavu watangiye kugarukamo ituze nyuma y’uko AFC/M23 itabaye abawutuye bari baratereranywe n’ubutegatsi bwa Kinshasa

Iyi mirimo yatangiye mu 2022, itangirira ku gutunganya inkengero z'igishanga ku misozi igikikije ku mpande zombi, ahakozwe amaterasi y'indinganire kuri hegitari 100.

Haciwe imirwanyasuri kuri hegitari 300, haterwa ibiti by'amashyamba kuri hegitari 100, n'ibindi byera imbuto ziribwa ku buso bwa hegitari 200.

Ibi biziyongeraho kandi itunganywa ry'igishanga nyir'izina cya Nyiramageni gifite ubuso bwa hegitari zisaga 600.

Imirimo yo kugitunganya izasiga iki gishanga gikikijwe n'imiyoboro y'amazi ya kilometero 19 iri gucibwa kuri ubu, ikazafasha mu gukamura iki gishanga cyibasirwaga n'imyuzure mu gihe cy'imvura nyinshi, ariko kandi inagire uruhare mu kuhira mu bihe by'izuba.

Ni imirimo iri gukorwa mu mushinga uzwi nka 'Umushinga uzwi nka 'Sustainable Agricultural Productivity and Market linkage Project: SAPMP' ugamije guteza imbere umusaruro w'ubuhinzi no gushaka amasoko.

Umuyobozi w'Akarere ka Nyanza wungurije ushinzwe iterambere ry'ubukungu, Kajyambere Patrick, yagaragaje ko imirimo yakorewe ku nkengero za Nyiramageni yahaye abaturage imirimo myinshi binazamura ibipimo by'akarere ku itangwa ry'imirimo.

Ati 'SAPMP yashyigikiye iyi mirimo, yafashije mu guca amaterasi, guca imirwanyasuri n'ibindi kandi byasabaga abakozi. Abaturage bacu barenga 2200 babonyemo akazi kabinjiriza amafaranga.'

Kajyambere yakomeje avuga ko iyi gahunda yatumye intego yo guhanga akazi mu Karere ka Nyanza izamuka, ku kigero cya 28% ikava ku 5000 yari iteganijwe mu 2023/2024, ikagera kuri 6200 bigizwemo n'uyu mushinga.

Abihuriraho n'Umuyobozi w'Akarere ka Gisagara, Rutaburingoga Jérome, wabwiye IGIHE ko umushinga wa SAPMP wahaye abaturage 4000 b'i Gisagara akazi gatandukanye.

Yavuze ko umushinga watanze akazi mu nguni nyinshi, harimo abafundi bubatse ubuhunikiro n'ubwakiniro bw'ibigori n'umuceri, hari abakoze mu buhumbikiro bw'ingemwe z'ibiti byatewe n'ibindi.

Ati 'Habonetse akazi ku bantu barenga 4000, ku buryo abo bose batunzwe n'iyo mirimo ndetse bateye imbere bakora n'indi mishinga ivuye muri ayo mafaranga babonye.'

Niyigaba Philémon, wo mu Karere ka Nyanza, Umurenge wa Ntyazo, Akagari ka Katarara, avuga ko mu myaka itatu ishize uyu mushinga ugeze iwabo, akazi yabonyemo n'amasomo yo kwiga guhinga neza yahawe byatumye atera imbere.

Ati 'Nongereye ubutaka buva ku gice cya hegitari bugera kuri hegitari n'igice, nguramo moto ntemberaho nyuma yo kwiga kuyitwara, byose kubera guhinga ibigori mu buryo bugezweho.'

Umushinga SAPMP watewe inkunga n'Ikigega cya Koreya y'Epfo gishinzwe iterambere (KOICA), ku bufatanye na Leta y'u Rwanda, ukaba uzatwara asaga miliyari 16Frw mu gihe cy'imyaka itanu uzamara kugeza mu 2026.

Imiriro yo gutunganya Igishanga cya Nyiramageni n’inkengero zacyo izatwara asaga miliyari 16Frw

Abaca imirwanyasuri bakanatera n’ibiti baranabihemberwa bakiteza imbere

Umushinga wa SAPMP uzafasha mu gukora ibilometero 19 by’imiyoboro y’amazi ku nkengero z’Igishanga cya Nyiramageni

Imirimo yo kubaka ubwanikiro na yo yatanze akazi. Aha ni mu Kagari ka Gakoma, Umurenge wa Mamba mu Karere ka Gisagara

Ubuhunikiro bwo mu Murenge Mamba na bwo ni umusaruro w’ibyakozwe mu mushinga wa SAPMP

Meya wa Gisagara, Rutaburingoga Jérome, avuga ko nta muntu utarungukiye muri SAPMP kuko n’uwari ufite ingemwe z’imbuto yarazigurishije

Imirimo yo gutunganya Igishanga cya Nyiramageni irarimbanyije

Niyigaba Philémon wo mu Murenge wa Ntyazo avuga ko uyu mushinga wamuteje imbere ubu akaba abarizwa mu batunze moto

'Autisme' ni ihinduka ridindiza imikurire n'imikorere y'ubwonko n'imyakura bya muntu bikamuviramo ubumuga bwo mu mutwe, ku buryo uyifite bimugiraho ingaruka zirimo kugira imyitwarire idasanzwe ndetse agakora ibinyuranye n'iby'abandi kuko aba atumva impamvu yabyo.

Uyifite akenshi arangwa n'ibirimo kurobanura cyane ibyo arya, kugorwa no kugenzura amarangamutima ye, kuba yananirwa kumenya uko yitwara mu bandi akaba yanaceceka nk'aho atari kumva, n'ibindi.

Abafite 'Autisme' ntibakunda impinduka mu buzima bwabo busanzwe, ibishobora no kubatera umujinya udasanzwe mu gihe ibyo bubatse basanze byahinduwe mu bundi buryo, cyangwa se bakisanga mu bintu batamenyereye, ibibatera guhindagurika kudasanzwe mu marangamutima yabo.

Umuyobozi Mukuru wa REB, Dr. Mbarushimana Nelson yabwiye The New Times ko mu rwego rwo kubaka uburezi budaheza abana bafite 'autisme' n'abafite indi myitwarire idasanzwe bagomba gushyirirwaho integanyanyigisho n'ibigo by'amashuri byihariye aho hazubakwa kimwe muri buri ntara.

Yagize ati 'Uburezi bwacu bugomba kudaheza mu buryo bwuzuye. Abana bafite 'autisme' bagomba gushyirirwaho integanyanyigisho yihariye. Bazubakirwa kandi amashuri, kuva mu kiburamwaka, azatuma babasha kubona ibyo bakeneye byihariye mu burezi. Leta iri guteganya kubaka ayo mashuri mu rwego rwo gufasha abo bana.'

Kugeza ubu abana bafite 'autisme' mu Rwanda bitabwaho n'ikigo rukumbi cyitwa Autisme Rwanda giherereye mu Mujyi wa Kigali.

Biteganyijwe ko abana bafite ubumuga butandukanye biga mu mashuri abanza bazikuba kabiri bakava ku 40.324 bakagera ku 80.323 bitarenze mu 2029.

Ni muri urwo rwego muri iyi myaka itanu iri imbere Leta iteganya kongera umubare w'abiga mu mashuri y'ikiburamwaka bakava ku ijanisha rya 39% bakagera kuri 65%.

Mu gukemura ikibazo cy'ubucucike mu mashuri muri rusange kandi Leta izubaka ibyumba by'amashuri bishya bigera ku 11.240 bitarenze mu 2029.

Abana bafite ‘autisme’ mu Rwanda bagiye kubakirwa ibigo by’amashuri byihariye muri buri ntara