Author: webrwanda

Ubusanzwe igituntu ni indwara iterwa n’agakoko kitwa 'basille de Koch’, kikaba cyandurira mu mwuka ariko kigafata igice icyo ari cyo cyose cy’uburi n’uruhu rurimo nubwo bidakunze kubaho.

Igituntu cy’uruhu cyandurwa nk’uko icy’ibindi bice by’umubiri byandurwa, ariko kigera aho hose cyanduriwe mu mwuka nk’uko abahanga mu buvuzi bw’iyo ndwara babivuga.

Umukozi wa Minisiteri y’Ubuzima ushinzwe kwita no gukurikirana abarwayi b’igituntu mu gihugu, Dr Innocent Habiyambere, asobanura uko igituntu cy’uruhu cyandura ndetse n’uko kivurwa.

Agira ati 'Umuntu kugira ngo yandure igituntu cy’uruhu, ni uko aba yahumetse umwuka urimo za mikorobe za basille de Koch, akaba anafite ubudahangarwa buke bw’umubiri. Izo mikorobe zinyura mu miyoboro y’amaraso zerekeza mu bice bitandukanye by’umubiri'.

Ati 'Nubwo biba gake, hari mikorobe zishobora kwerekeza ku ruhu, icyo gihe aho zigeze hahita hacika igisebe ku ruhu inyuma. Icyo gisebe kwa muganga barakivura bakoresheje imiti isanzwe y’ibisebe ntigikire, nyuma bagakoresha 'antibiotiques’ na bwo bikanga ntigikire'.

Dr Habiyambere yongeraho ko icyo gihe umuganga atangira kugira amakenga kubera icyo gisebe kidakira akareba ikindi cyakorwa.

Ati 'Icyo gihe ikiba gisigaye ni ibizamini byimbitse, aho bafata akanyama gato ko kuri cya gisebe bakakajyana muri Laboratwari nkuru ry’igihugu bakagapima, hanyuma niba koko ari igituntu uwo muntu arwaye hagahita hagaragara udukoko tugitera.

Bahita bamushyira ku miti y’igituntu yo mu rwego rwa mbere, mu byumweru bibiri cya gisebe kiba gikize ariko uwo muntu akomeza gufata imiti mu gihe cy’amezi atandatu'.

Avuga kandi ko igituntu cy’uruhu kitagaragara cyane mu Rwanda kuko kuva mu 1990 kugeza uyu munsi cyagaragaye ku bantu batatu gusa, icyakora abaturage ngo ntibakwirara kuko icyo gituntu n’ubu gihari mu gihugu.

Udukoko dutera igituntu ngo tuba tugendagenda mu mwuka abantu bahumeka bitewe n’abasanzwe bakirwaye bakorora, bitsamura cyangwa baseka bityo utwo dukoko tugasohoka, uhumetse uwo mwuka rero arandura gusa ngo abantu bose ntibahita bandura nk’uko Dr Habiyambere abisobanura.

Ati 'Abafite ibyago byo guhita bandura igituntu iyo bahumetse uwo mwuka ni abafite ubudahangarwa bw’ububiri buri hasi nk’abafite virusi itera SIDA, abafite imirire mibi, abarwaye diyabete n’abandi. Umuntu ufite ubudahangarwa bukomeye bw’umubiri ahumeka twa dukoko akabana na two ariko ntagaragaze uburwayi'.

Arongera ati 'Hari ubushakashatsi bwakozwe kuri iyo ndwara, bwerekana ko mu bihugu byose byo munsi y’ubutayu bwa Sahara n’u Rwanda rurimo, abantu bose babana n’utwo dukoko dutera igituntu, ari yo mpamvu urukingo rwacyo ruhabwa umwana ukivuka.

Ibice by’umubiri igituntu gikunda kwibasira ni ibihaha ari ho gifata ku kigero cya 80%, hari igifata ubwonko, inturugunyu z’umubiri, umwijima, amara, umutima, amagufa, impyiko n’ibindi ariko aho hose ngo kihagera cyabanje mu bihaha.

Ibimeneyetso biranga igituntu ni inkorora igeze cyangwa irengeje ubyumweru bibiri, kugira umunaniro uhoraho, kugira umuriro, kubira ibyuya kenshi cyane cyane iyo umuntu aryamye ku buryo usanga amashuka yatose, kugira ikizibakanwa, gutakaza ibiro umuntu akananuka bikabije no kubabara mu gatuza kubera gukorora cyane.

Ibyo ni ibimenyetso bya rusange, ariko kuri buri gice cy’umubiri cyafashwe n’iyo ndwara hari ibindi bimenyetso bigaraga.

Dr Habiyambere ati 'Urugero nk’ufite igituntu cyibasiye ubwonko, aribwa umutwe, akagira umuriro mwinshi, akananirwa kuvuga, ntagire icyo abasha kumira, akagagara ibikanu, nko ku mwana muto igihorihori kikabyimba. No ku bindi bice haboneka ibimenyetso byihariye'.

Agakoko gatera igituntu kavumbuwe n’Umudage Dr Heinrich Hermann Robert Koch mu 1882, ari bwo hatangijwe uburyo bwo kugisuzuma, kukivura ndetse no kugikingira abantu.

source: kigalitoday.com

[email protected]

Nubwo hashyizweho amabwiriza agenga kogerwa muri piscine ariko Minisiteri ya Siporo yatangaje ko kogera mu mazi magari arimo ibiyaga n’imigezi bitemewe.

Siporo yo Koga iri mu zasigaye ubwo Minisiteri ya Siporo yaherukaga gukomorera icyiciro kirimo imikino myinshi ku wa 28 Nzeri 2020.

Inama y’Abaminisitiri yateraniye muri Village Urugwiro iyobowe na Perezida Kagame ku wa 27 Ugushyingo 2020, yemeje ko 'imyitozo ngororamubiri ikorerwa mu nyubako z’imyidagaduro no kogera muri pisine bizasubukurwa hubahirizwa ingamba zo kwirinda Coronavirus.'

Mu mabwiriza agomba gukurikizwa yashyizwe hanze na Minisiteri ya Siporo ku wa 1 Ukuboza harimo areba ba nyiri za pisine basabwe 'kugaragaza umubare ntarengwa wabemerewe kogera muri pisine.'

Hari kandi kugaragaza uburyo pisine ikorerwa isuku hakoreshejwe imiti ya Chlorine na Bromine n’uburyo amazi ahindurwa, gupima amazi yayo mbere na nyuma y’uko ikoreshwa ndetse no guteganya ahakarabirwa mbere yo kwinjira muri pisine.

Umuntu ugaragaza ibimenyetso birimo umuriro, inkorora, umutwe n’ibicurane, ntiyemerewe kujya kuri pisine no kuyogeramo.

Minisiteri ya Siporo yibukije ko 'Koga mu byanya by’amazi bigari (ibiyaga, ibyuzi n’imiyaga) ntibyemewe keretse ku makipe yabigize umwuga mu gihe cyo gukora imyitozo yabanje kandi kubisabira uruhushya no kuruhabwa.'

Kimwe n’indi mikino yose, Siporo yo Koga yahagaritswe ku wa 15 Werurwe 2020, umunsi umwe nyuma y’uko Minisiteri y’Ubuzima itangaje ko mu Rwanda habonetse umurwayi wa mbere wa Coronavirus.

Yayoboraga itsinda ryo kuramya no guhimbaza nyamara muri we atarakira agakiza. Ni gute uyu muramyi Imana yamwiyeretse, akabona guhinduka agakizwa?

Serge Iyamuremye wavutse mu 1990, yavukiye mu Karere ka Nyarugenge azwi mu ndirimbo 'Arampagije, 'Mfata unkomeze’, 'Biramvura’ ari nayo ibumbatiye ubuhamya bwe mu rugendo rw’agakiza. Ni umwana wa gatandatu mu muryango w’abana barindwi, akaba yaratangiye umuziki kuva mu bwana bwe ariko atangira urugendo rwe rwa muzika mu 2006.

Ubwo uyu muhanzi yaganiraga n’ikinyamakuru Isimbi.rw yatangaje ko yahawe inshingano zo kuba umuyobozi w’itsinda ryo kuramya mu rusengero, ariko akaba yarikoreraga nk’iby’abandi bose batarakizwa bakoraga, ngo bamutoreye izo nshingano bitewe n’uko babonaga ari umwana w’itonda. Uretse ubu buhamya bwe kandi, muri iyi nkuru muraza gusobanukirwa byinshi mwibaza bijyanye n’ubuzima bwe.

Indirimbo biramvura niyo gisobanuro cy’ubuhamya bwa Serge

Yagize ati' Ntarakizwa nayoboye 'Worshipteam’, cyangwa se Korari. Bantoreye iki rero ngo mbe umuyobozi ariko ntakijijwe? ni ukubera ko babonye, Serge ni umuntu utuje, mbere nabaga ncecetse cyane. Nigaga muri APE Rugunga, icyo gihe bantorera kuyobora Worshipteam nacurangaga na gitari, babona yuko nujuje ibyangombwa by’uko naba umuyobozi ariko ntabwo nari nkijijwe.

Kuvuga ngo ntabwo nari nkijijwe, ni uko nakoraga nk’iby’abandi bose batizera Kristo. Kubwanjye numvaga umutima wanjye umpamiriza ko ntari nkijijwe. Ubwo ntangira kuyobora Worshipteam, ariko nabikoraga nshaka kugira ngo ngaragare: nabikoraga kugira ngo abantu barebe uburyo nshobora kuririmba neza, uburyo nshobora gucuranga gitari neza.

Nyuma umuntu umwe uririmba secure uyu munsi ariko wari pasiteri wanjye, yaranyoboraga arangije arambwira ati' Serge rero aho kugira ngo ukomeze uririmbe byarutwa nuko wacuranga gitari. Arambwira ati 'ubereke kuko ntacyo bitumariye’ urabikora kugira ngo abantu bakubone, aho kugira ngo bidufashe.

Ubwo njyewe rero mu mutima wanjye naravuze nti 'uyu muntu ashatse kunsuzugura’. Icyo gihe naratashye ngeze mu rugo ndeba mu kabati ngira ngo wenda nirebere firime nsangamo Bibiliya. Mubyukuri mu cyumba cyanjye ntabwo habagamo Bibiliya, sinzi n’ukuntu yageze aho mu kabati. Mfungura Bibiliya mbona muri Matayo , handitse ngo 'nimukora ibyiza byanyu imbere y’abantu, ibyo nibyo muzagororerwa na so wo mu i Juru.'

'Nimusenga ntimukamere nk’indyarya, kuko bakunda gusenga bahagaze mu masinagogi no mu nzira ngo abantu babarebe. Ndababwira ukuri yuko bamaze kugororerwa ingororano zabo' Matayo 6: 5.

Serge akomeza uhamya bwe ati' Ako kantu katumye nitekerezaho. Mu rugo barasengaga ariko njye ntabwo nari nkijijwe, ubwo mbona yuko ubuzima bwanjye burangiriye ahangaha. Ndangije icyo gihe narapfukamye ndasenga ndavuga nti 'Se Mana wambabarira?’ se ntiwandimbura?, kuko ntabwo nari nzi iby’ijambo ry’Imana, ariko Imana ntabwo yaturemye kugira ngo iturimbure, yaturemye kugira ngo itugirire imbabazi.

Ndapfukama nsaba imbabazi cyane, numva hari ibintu birimo birahinduka mu buzima bwanjye. Ubwo hari ku wa mbere, ku wa gatatu wa mupasiteri wanjye, wampagaritse arambwira ati’ Noneho watuyobora?’, ariko numva umutima wanjye utarimo kubyakira. Bigera ku wa gatanu nanone arongere araza ambwira ko nayobora, mbonye nyine ntakundi nyobora itsinda ryo kuramya no guhimbaza.

Aho rero niho natangiye kubona yuko inzira nari ndimo zitari zo, ntangira kubona Kristo, ntangira kubona akora mu buzima bwanjye. Ni uko nahindutse'

Inkomoko y’indirimbo 'Biramvura’

Serge ati' Impamvu rero nakoze iriya ndirimbo biramvura, ifite amagambo avuga ngo, ' Nkiri mu nda cya gihe ntaravuka bwa kabiri, ntaramenya Ubuntu bwawe numvaga bakuramya simbimenye' , Numvaga abantu bari iruhande rwanjye baramya Imana ariko simenye ibyo ari byo'. ‘Nasobanukiwe neza yuko ibyo naremewe ari ukukuramya', ni ukuvuga ngo navukiye kuramya Imana.

Ni yo mpamvu naririmbye ngo 'ibimvamo biramvura’ Umwuka Wera utuye muri njyewe we wenyene abanza kumvura, yamara kumvura umutima wanjye ukavura n’abandi.

Reba indirimbo ‘Biramvura’ ishingiye ku buhamya bwa Serge Iyamuremye

Byinshi ku buzima bwa Serge Iyamuremye

Mu mwaka wa 2015 ikinyamakuru Igihe.com cyegereye uyu muhanzi, agaruka kuri bimwe mu bigize ubuzima bwe abantu batari bazi. Hari n’inama yatanze by’umwihariko ku rubyiruko.

Yakuranye inzozi zo kuba umucuranzi

Abifashijwemo no kuba yaravukiye mu muryango wa gikristo umutoza gusenga no gukorera Imana, Serge yakuranye inzozi zo kuzaba umucuranzi w’ibyuma bya muzika bikomeye gusa ntiyari aziko yavamo umuhanzi.

Ati,'Nakundaga gucuranga cyane, nza no kujya kubyigishwa n’umuzungu witwa Marlene ni we waje kumbwira ko nshobora no kuririmba nanjye niremamo icyizere kuva ubwo'.

Mu mabyiruka ye yari umunyarwenya

Serge Iyamuremye yavuze ko yagiraga umwihariko wo gusetsa abavandimwe be ku buryo wasangaga aho ari nta rungu rihabarizwa.

Yagize ati 'Ndibuka ko najyaga nsetsa cyane abavandimwe banjye, iyo kenshi twabaga dutaramye narabasetsaga nkagira n’ibiganiro bitebya cyane'.

Umuntu ukomeye yifuza guhura na we

Mu buzima bwe yifuza guhura na Jonathan Mc Reynolds kuko amubonamo amavuta y’Imana ndetse n’ubuhanga mu byo akora.

Ati 'Jonathan mufata nk’icyitegererezo gikomeye kuri njye, ni umuhanga mu bintu byose akora kandi afite n’amavuta y’Imana kuri we nifuza guhura nawe mu buzima'.

Indirimbo ye akunda cyane

Ati 'Indirimbo zanjye zose ndazikunda ariko indirimbo y’ibihe byose kuri njyewe ni 'Ntawundi nambaza’ kuko insubizamo imbaraga cyane'.

Umurongo wa bibiliya umufasha

Nk’umukozi w’Imana ndetse unavoma inganzo mu byanditswe byera muri Bibiliya, Serge yavuze ko umurongo umufasha ari Abaroma 8-1

Hagira hati, 'Nuko rero noneho abari muri Kristo Yesu nta teka bazacirirwaho'

Mu biribwa akunda..

Ni gake cyane ashobora kwihishira ko akunda kurya ibijumba ndetse nta cyumweru gishobora gushira atabiriye

Icyamubabaje kurusha ibindi mu buzima

Mu buzima bwe, Serge yababajwe n’urupfu rwa se umubyara.

Icyamushimishije mu buzima

Ati, 'Nashimishijwe no kwakira Yesu nk’umwami n’umukiza wanjye kuko nahise numva hari ubundi buzima bushya nakiriye muri njyewe'.

Inama ku rubyiruko

Nk’umuhanzi muto kandi wifuza gufatanya urugendo rwe n’abandi, yifuza ko urubyiruko rurushaho kwigarurira Imana ndetse bagakoresha ingufu zabo mu gukora imirimo myiza bazasiga ku Isi.

Ati 'Inama naha urungano nabakangurira gukorera Imana hakiri kare iminsi mibi itaraza kandi ntibumve ko gukizwa bisaba guhora mu rusengero, cyangwa mu cyumba cy’amasengesho gukorera Imana kwa mbere ni mu mutima'.

Source: Isimbi.rw / Igihe.com

[email protected]