Author: webrwanda

The Ben yujuje ibikenewe ku muhanzi wese wakwigarurira imitima y'abato n'abakuru, inkumi n'abakecuru ndetse n'abatumva ikinyarwanda dore ko umuziki ubwawo ari ururimi buri wese yumva bitagombye umusemuzi. Ni umusore ushinguye, ufite imiterere ishamaje ndetse yifuzwa na buri wese ushaka kwigwizaho abafana dore ko ari muri bamwe mu bahanzi nyarwanda bahogoje abakobwa n’ubwo abahanzi benshi batita ku miterere y'umubiri ariko iri mu bikurura abakunzi benshi.

The Ben mu 2020 uwavuga ko yaburiye umubyizi mu kwe ntiyaba abeshye n’ubwo nta ko atagize. Dukoreshe imibare dore ko itabeshya. Indirimbo ‘Kola’ yo mu kwezi kwa munani mu 2020 imaze kurebwa n'abasaga ibihumbi 255. Ni amezi ane ashize nyamara iyo aherutse guhuriramo na ‘Rema Namakula’ nta minsi ishize igiye hanze ariko imaze guca cyane kuri ‘Kola’ imaze amezi ane. 

‘This is love’ yarebwe n'abasaga ibihumbi 300 mu minsi ine yonyine. Yarongeye akorana na Igor Mabano iyitwa ‘For real’ imaze kurebwa n'ibihumbi 244 mu gihe cy'ukwezi isohotse, ntiyasoreje aho kuko yakoranya na Muchoma iyitwa ‘Umutoso’ imaze kurebwa n'ibihumbi 144 mu gihe cy'ukwezi kumwe. Iyi ni ishuho nziza y'umuziki The Ben akwiriye gukora mu 2021 niba ashaka kuzongera guhagarara ku rubyiniro rwa The East African Party ari umuhanzi mukuru mu gitaramo.

The Ben abahanzi bo muri Uganda bashobora kuba bamubera umugisha

Mu 2017 yakoranye na Sheebah Karungi indirimbo ‘Binkolera’ irakundwa cyane ndetse imuhesha amahirwe yo kuririmba mu bitaramo bitandukanye ku bw'igikundiro yamuhundagajeho. Abatunganya indirimbo mu buryo bw'amajwi mbere yo guhitamo uwo bakorana The Ben akwiye kujya abanza akitonda akareba niba uwo muproducer yabasha kumukorera igihangano cyarenga umupaka. 

Nessim ni urugero rwiza rw'umuproducer The Ben akwiriye gukorana na we cyane mu 2021 bitavuze ko n'abandi bakorana ariko akareba uri ku rwego rw'umuziki we dore ko hari abo ajya kureba ngo bakorane bakaba bamutinya ntibamukosore bitewe n'uko baba barakuze bamufana bakaba bisanze bari kumukorera indirimbo bakaba bamusondeka. Nessim Mukiza wamamaye nka Nessim Pan Production ubu ari ku isonga mu batunganya indirimbo i Kampala akaba ari we wakoze indirimbo The Ben yahuriyemo na Sheebah Kalungi ndetse n'iheruka ya yahuriyemo na Namakula Rema.

Ese mu 2020 The Ben yaba yarahuye n'ikibazo cyo kubura umutunganyiriza neza indirimbo?

Iki kibazo kiragoye kukibonera igisubizo kuko we yaburiye aho abandi baronkeye. Yakorewe n'umusore icyo gihe wari ugezweho ariko nyamara indirimbo yamukoreye ntiyakunzwe na gato n’ubu imibare y'abayirebye irabigaragaza dore ko utatwika inzu ngo uhishe imyotsi.

Mu Rwanda dufite abahanga mu gutunganya indirimbo bari ku rwego mpuzamahanga dore ko Bob Pro yakoreye Sauti Sol indirimbo yitwa ‘Suzana’ ikaza kwamamara muri Afurika hose ndetse ikanaza ku rutonde rw'indirimbo zakunzwe muri Afurika mu 2020. Rero The Ben akwiriye gukorana n'abafite ubuhanga mu gukorera ibyamamare biri ku rwego rwe cyangwa se bimurenze. 

Sibyiza kwirukira buri mu producer kandi na mbere yari azi ko gukorana n'umuntu umumenyereye byongera byinshi ku buryohe bw'indirimbo. Bob Pro ari ku rwego rwo gukorera abahanzi mpuzamahanga ku buryo The Ben akwiriye guhitamo bamwe mu baproducers bafite ubunararibonye akirinda kujarajara muri studio zitandukanye. 

Uku kutajarajara muzabibona kuri Diamond Platnumz ukorana na Lizer Classic kugeza n'iyo agiye i Mahanga barajyana kuko aramuzi, azi intege nke ze n'intege nyinshi ze. Rimwe Bob Pro yigeze kuvuga ko abahanzi bakuru bakwiriye gukorana bya hafi n'abaproducer baba barakoranye cyane dore ko baba bafite byinshi baziranyeho byaba intege nke n'ibyiza byabo.

Aba batunganya imiziki bashobora gukorana na The Ben bakamugarura mu kibuga atabikora agakomeza gutera agahinda abamukunda.

1.Lick Lick: Uyu mugabo azi neza The Ben ku buryo asobanukiwe imiririmbire n'imyandikire ye. Kuva mu 2007 kugeza bari muri Amerika ni we akesha indirimbo zakomeje kumushyira ku isonga kugeza akuyeho agahigo ko kuririmba muri The East Afircan Party ya 2018 no mu 2020, ibintu byari byarabuze undi muhanzi nyarwanda wabigeraho ariko yahise aharurira inzira abandi barimo Meddy wenda n'abandi tuzagenda tubona mu myaka iri imbere. Lick Lick ni we wakoze indirimbo ‘Can't get enough’ ya The Ben yahuriyemo na Otile Brown, iri mu zakunzwe cyane na nubu iracyakunzwe.

2. Bob Pro wakoreye Sauti Sol Suzana ikaza mu ndirimbo 10 zakunzwe muri Afurika mu 2020 afite ubunararibonye mu gukorana n'abahanzi bafite amazina kandi ubuhanga afite mu kuyungurura indirimbo hano mu Rwanda bumwemerera gukorana na buri muhanzi yaba afite izina cyangwa se akizamuka.

3. Nessim Mukiza wamamaye nka Nessim Pan Production ni we wakoze ‘Binkorela’ ya The Ben na Sheebah Karungi ndetse mu minsi mike ishize yashyize ibiganza kuri ‘This is love’ ya Namakula bafatanyije yongeye kugarura The Ben mu kibuga nyuma y'umwaka yibazwaho.

4. Chris Alvin Sunday wamamaye nka KrizBeatz the drummer Boy mu 2016 yari ku rutonde rw'abaproducer batanu ba mbere muri Nigeria. Ni we wabaye ikiraro cya Tecno abikesha indirimbo Pana. Ni we wakoze indirimbo nyinshi za Yemi Alade. Krizbeatz amenyeranye na The Ben cyane kandi koko indirimbo yamukoreye zarakunzwe na n’ubu. 

Urugero ‘Fine Girl’ yo mu kwezi kwa 12 mu 2018 iri mu zakunzwe na n’ubu iracyakunzwe ndetse yaranarebwe ku rugero rushimishije. Indi ni ‘Suko’ nayo wumva ko ikoze mu buryo bugezweho yanagaragayemo icyamamare mu kubyinira abahanzi Sherie Silver. The Ben niba ashaka kongera kwigarurira imitima y'abakunzi b'umuziki hano mu Rwand n' i mahanga akwiriye gutekereza cyane ku baproducers bakorana mu 2021. Iyi nkuru ishingiye ku bitekerezo by’umunyamakuru.

REBA HANO INDIRIMBO ‘THIS IS LOVE’ YA THE BEN FT REMA

Ndahiro Emmanuel cyangwa Taikun Ndahiro yavutse taliki ya 17/08/2000, avuka mu muryango w’abana batanu, we akaba umwana wa kabiri. Yize amashuri ye abanza mu karere ka Ngoma mu Ntara y’Iburasirazuba, akomeza amashuriye yisumbuye mu karere ka Ngoma n’ubundi,ahereye ku ishuri ryitwa ASPEK nyuma yimukira ku ishuri rizwi nka ‘Leshillondere’ mu mwaka we wa kabiri.

Nyuma yaje kuhava ajya kwiga muri Agape mu mwaka wa gatatu, arangije atangira umwaka wa kane mu karere ka Kayonza ahazwi nka Nyamirama ari naho yarangirije amashuriye yisumbuye. Amashuri ye ya kaminuza yahise ajya kuyiga mu gihugu cya Tanzania ahitwa Saint Augustine University of Tanzania iherereye mu mujyi wa Mwanza, ubu akaba ageze mu mwaka wa kabiri wa kaminuza aho yiga ‘Pubulic relations and advertising’ akaba azarangiza amashuri ye mu mwaka wa 2022.

Mu kiganiro Taikun Ndahira yagiranye na InyaRwanda.com yagize ati: “Natangiye gukora comedy kuva mu wa 3 segonderi, gusa nabigiyemo biri officialmu 2019 mu kwa 03, gusa kubera nahise nza Tanzania kwiga nabaye nk’uhagaritse ho ntangira kubikora nanone mu 2020 mukwa 03”.

Ubwo yabazwaga niba akora comedy nk’umwuga yagize ati: “Yego mbikora nk’umwuga, ningaruka mu Rwanda ni na kimwe mu bintu nzashyiramo imbaraga cyane, no kongera imbaraga mu bikorwabyanjye nitabira ibitaramo mu gihe CoronaVirusyaba yarangiye.

Nk’umwe mu basore bamaze kuba ibyamamare mu Rwanda, twashatse kumenya niba yaba afite umukunzi atubwira ko ntawe ndetse ko ahugiye cyane mu masomo, ibyo gukundana atabibonera umwanya. Yabajijwe niba hari ikintu cyaba cyaramugoye muri comedy cyangwa ikintu yaba yarayikuyemo maze asubiza ati: “Ntacyangoye muri comedy kuko abantu bakunze ibyo nkora nkibitangira, ikintu kiza nakuye muri comedy ni ukumenyekana ikindi ni uko ngira uruhare mu byishimo by’abantu kubera ibyo nkora”. Ati “Mu gihe abantu benshi akazi kari kahagaze muri corona njye naboneyeho mfata imitima ya benshi mbinyujije kuri comedy nyuza kuri social media”.

Uyu musore ari mu banyarwenya b’abanyarwanda bakorera uyu mwuga hanze y’igihugu kandi akaba akunzwe cyane dore ko bigoye kubona umuntu udatunze amashusho ye muri terefone.

Ikindi ni uko ariwe munyarwenya uzwiho gukora amashusho mato cyane ariko agakundwa n’abatari bake hano mu Rwanda nk’uko bigenda bigaragara ku byo abantu banyuranye bakunze gushyira ku mbuga nkoranyambaga.

Twamusabye kutubwira abantu abona bakora comedy neza, maze ashyira ku mwanya wa mbere Arthur Nkusi, ku mwanya wa 2 ahashyira Patrick Rusine, ku mwanya wa 3 ahashyira Fally Meric, ku mwanya wa 4 ahashyira Zabba Missed call, naho ku mwanya wa gatanu ahashyira Joshua. Mu bahanzi akunda cyane yavuze ko ari Bruce Melodie, Riderman, Bill Ruzima ndetse na Sean Brizz.

REBA IKIGANIRO TWAGIRANYE NA PATRICK RUSINE

Kimwe mu bibazo bikomereye u Rwanda by'umwihariko Umujyi wa Kigali, ni ukubona inzu zihendutse zijyanye n'igihe zikwiriye abaturage barenga miliyoni 1.5 bawutuyemo ndetse n'abandi bari mu nkengero zawo.

Iki kibazo gihora kigarukwaho inshuro nyinshi ndetse mu nama zigamije iterambere ry'umujyi kiganirwaho. Ikigaragaza uburyo giteye inkeke, utuye i Kigali wese ukoze ku mafaranga agera kuri miliyoni, ahita atekereza kugura ikibanza, cyaba mu nkengero za Kigali cyangwa mu bice by'icyaro.

Ikibanza cyabaye nka zahabu, abifite babihinduye ubucuruzi kuko uko iminsi yicuma birushaho guhenda uko ababikeneye barushaho kwiyongera. Ibi kandi ni nako bimeze kuko kucyubakamo inyubako ijyanye n'igihe bisaba kwiyuha akuya.

Guverinoma y'u Rwanda yatekereje ku mishanga itandukanye yitezweho gufasha abenegihugu kubona uburyo bw'imiturire kandi byoroshye.

Usibye Leta n'abikorera nabo batanga umusanzu wabo muri uru rugendo. Muri bo harimo n'abasore batatu b'Abanyarwanda bo mu Mujyi wa Kigali bakora umwuga w'ubwubatsi mu bice bitandukanye by'igihugu.

Aba basore uko ari batatu bafite imyaka 26 y'amavuko bashoye 1,500,000 Frw ariko bamaze kwagura ibikorwa byabo babigeza ku rundi rwego.

Bakora inzu zifite agaciro ka miliyoni 18 z'amafaranga y'u Rwanda n'izigerekeranye ziri hagati ya miliyoni 30 na 35Frw. Binjiye mu bwubatsi mu 2018 ubwo bari bagitangira umwaka wa mbere wa kaminuza.

Icyabasunikiye gukunda uyu mwuga ni ugufasha Abanyarwanda bagorwaga no kubona inzu nziza kandi zihendutse.

Inzu aba basore bubaka ziba zikoze mu matafari ari mu buryo bw'ikoranabuhanga akorwa mu gitaka n'umucanga hifashishijwe imashini yabugenewe.

Habimana Richard yabwiye IGIHE ko bafite intego y'uko mu mwaka wa 2050 inzu zikodeshwa byitwa ko zihendutse zazava kuri 30% zikagera kuri 70%.

Yagize ati 'Turifuza ko byibuze mu 2050 ibiciro by'inzu zihendutse zazava kuri 30% zikagera kuri 70% ndetse n'inzu zikodeshwa zikazava ku madolari 500 na 700 zikagera ku madolari 50 cyangwa 150.'

Yavuze ko imbogamizi bahura nazo mu mwuga wabo ari izijyanye no kutabona amasoko n'abashoramari bahagije.

Ati 'Ingorane zo ni nyinshi tugihura nazo, hari izo kutabona amasoko ya Leta kuko nk'urubyiriko hari byinshi badusaba ntitubibone birimo ingwate no kutabona abashoramari benshi batugana.'

Yongeyeho ko bifuza ko Leta yajya ibafasha kubona imashini bifashisha kugira ngo barusheho kubaka inzu nshinshi mu gihe gito no kunoza akazi kabo kuko imashini bakoresha zihenda cyane.

Habimana yavuze ko COVID-19 yabakomye mu nkokora cyane ko hari imishinga yabo bari bafite itarashyizwe mu bikorwa.

Uretse kubaka inzu zigendanye n'igihe kandi ziciriritse, aba basore banakora n'ibishushanyo mbonera by'inzu bakanashakira abantu ibyangombwa byo kubaka mu rwego rwo korohereza ababagana.

Urwego rw'ubwubatsi rusanzwe rutanga imirimo myinshi ndetse ruri mu zatekerejweho mu bikorwa bikeneye kuzahurwa kubera ingaruka za COVID-19. Rwashyiriweho gahunda yihariye, aho imishinga minini y'ubwubatsi izajya isonerwa umusoro nyongereragaciro ku bikoresho byaguze mu Rwanda mu gihe cy'imyaka itatu.

Ibi byitezweho kuzamura ingano y'ibikoresho bigurirwa inganda z'ubwubatsi zo mu Rwanda, bityo zigatera imbere mu buryo bworoshye ari na ko hagabanuka icyuho cy'ibitumizwa mu mahanga, aho ibikoresho by'ubwubatsi biri mu bigize ingano nini y'ibituruka hanze.

Mu Rwanda hari inzu zo guturamo miliyoni 2.8 mu gihe hakenewe inzu miliyoni 5.5 zizahaza miliyoni zisaga 22 zizaba zituye igihugu mu 2050. Ibyo bituma hakenewe kubakwa nibura inzu 150 000 buri mwaka kugira ngo habe icyizere cy'uko Abanyarwanda bose bizagera mu 2050 nta kibazo cy'aho kuba bafite.

Habimana Richard yavuze ko COVID-19 yabakomye mu nkokora cyane ko hari imishinga yabo bari bafite itarashyizwe mu bikorwa

Imwe mu nzu aba basore bamaze kubaka

Bakora amatafari bifashishije ibirimo umucanga

Aba basore muri iki gihe bari kubaka iyi nzu

Kimwe mu bishushanyo mbonera cy’inzu bagiye kubaka

Muri ubu butumwa yamwandikiye, Harmonize yagize agira ati “Ndabivuga mbikuye ku mutima, ndagukunda Bro, uyu ni umwaka mushya wa 2021. Warakoze kumpindurira ubuzima'. Yakomeje avuga ko yabonye zahabu akayikura mu mucanga no mu mwijima w'icuraburindi yari yihishemo. Yongeyeho ko ubu muri Africa by'umuhariko mu Burasirazuba bishimira ko ahari. Yongeye ku mushimagiza avuga ko nawe ibyo yakoze mu gihe bamaranye yabikoze kugira ngo amuheshe agaciro.

Ubutumwa burebure Harmonize yandikiye Diamond

Uyu muhanzi wabaye mu biganza bya Diamond igihe kitari gito yamwise umunyabigwi avuga ko ikipe yose ya kondeboy umwifurije kugira umwaka mushya. Nta kintu Diamond yigeze avuga kuri ubu butumwa bugaragara kuri konte ya Instagram ya Harmonize icyakoze ibindi byamamare n'abakunzi be babutanzeho ibitekerezo bitandukanye.

Urugero Wema Sepetu wabaye Miss Tanzania ndetse wanakundanye na Diamond yagaragaje ko yishimiye ishyaka Harmonize yagize ryo gushima Diamond. Mu Ijambo rimwe yagize ati 'Awwwwwwww'. Nyuma y'ubu butumwa yashyizeho akamenyetso k'umutima. N'ubwo havuzwe umwuka mubi nyuma y’uko Hormonize asezeye muri Wasafi abatari bake bashyize ibitekerezo byabo kuri ubu butumwa bagaragaje ko babyishimiye ndetse bereka aba bahanzi ko bombi ko babashyigikiye. 

Wasafi iyoborwa na Diamond yafashije Hormonize kuva mu 2015. Mu gihe bamaranye yaramamaye karahava abenshi batangira kuvuga ko arusha ijwi sebuja nyuma aza gutangaza ko asezeye ashinga inzu ye bwite ifasha abahanzi yise 'Konde Music Worldwide'. Nyuma yo gutangaza ko azezeye muri Wasafi havuzwe amagambo menshi ndetse uyu muhanzi atangira gutakaza abafana be batari bake. 

N’ubwo nta makuru yamenyekanye yatumye Harmonize asezera muri Wasafi, byavuzwe ko uyu muhanzi hari abo atahuzaga nabo muri iyi nzu barimo na Diamond wayishoyemo imari n'ibindi byinshi. Mu bihe byashize Hormonize yigeze gutangaza ko Diamond ariwe watumye atandukana na Jacquelline Wolper bigeze gukundana. Icyakora ubu butumwa bwatumye benshi bashima Harmonize bavuga ko yahaye agaciro uwamuvanye kure.

Harmonize nk’umuhanzi wa mbere wasinye muri Wasafi yagiranye ibihe byiza na Boss we Diamond

Wema Sepetu yagaragaje ko yishimiye ibyo Harmonize yakoze