Webrwanda Backend

Author: webrwanda

  • BNR yihanangirije ‘Health People Group’ ishinja kwitwara nk’aho icuruza ubwishingizi –

    Mu itangazo BNR yashyize hanze ku wa 3 Werurwe, yavuze ko iyi sosiyete icuruza izi serivisi ku bantu ku giti cyabo n’ibigo ibinyujije mu bufatanye igirana n’abafatanyabikorwa batanga serivisi z’ubuvuzi.

    Muri iri tangazo BNR ikomeza ivuga ko ibi byose HPG ibikora nta burenganzira yabiherewe.

    Iti “Health People Group (HPG) ntiyigeze ihabwa uruhushya rwo gukora umurimo w’ubwishingizi na BNR kandi ari umurimo igenzura nk’uko biteganywa n’itegeko […] ryerekeye imitunganyirize y’umurimo w’ubwishingizi ribuza uwo ariwe wese gukorera umurimo w’ubwishingizi cyangwa ibindi bikorwa bifitanye isano nabwo kwirengera ingaruka zabyo.”

    “Ishingiye ku mategeko ndetse n’ibikorwa byavuzwe haruguru, BNR iramenyesha abantu bose ko Health People Group (HPG) atari ikigo cy’ubwishingizi cyemewe kuko nta ruhushya cyabiherewe.”

    Yakomeje iburira abakorana n’iyi sosiyete ko bakwiye kuzirengera ingaruka zaturuka ku masezerano bagirana.

    Ku murongo wa telephone, IGIHE yagerageje kuvugisha ubuyobozi bwa Health People Group (HPG), ariko umukozi wo muri iki kigo avuga ko batarabona iryo tangazo.

    Ku mbuga zitandukanye z’iyi sosiyete igaragaza ko itanga ubwishingizi

  • Abadepite basabye impinduka muri “Army Shop” –

    Ibyo byasabwe ubwo iyo nteko yari iteranye ku wa Gatatu tariki 3 Werurwe 2021 hifashishijwe ikoranabuhanga, nyuma yo kugezwaho raporo ya Komisiyo y’Ububanyi n’Amahanga, Ubutwererane n’Umutekano igaruka ku isuzumwa ry’imicungire ya Army Shop.

    Inteko yemeje iyo raporo ndetse ishima ibiyikubiyemo, ariko isaba ko amashami ya Army Shop 15 ahari kugeza ubu yakongerwa.

    Mu butumwa Inteko Ishinga Amategeko, Umutwe w’Abadepite, yashyize kuri Twitwer, yagize iti “Inteko Rusange yemeje raporo ya Komisiyo y’Ububanyi n’Amahanga, Ubutwererane n’Umutekano ku isuzumwa ry’imicungire y’Ihahiro ry’Ingabo na Polisi by’u Rwanda, ishima ibimaze gukorwa, isaba ko ryakongera amashami.”

    Army shop yashyizweho n’iteka rya Minisiriri w’Intebe ku wa 8 Nzeri 2011, hagamijwe korohereza Ingabo, Abapolisi, Abacungagereza, n’imiryango yabo [abo bashakanye cyangwa abana] kugura ibikoresho by’ibanze n’ibiribwa mu buryo bworoshye kandi bibahendukiye. Mu 2018 abacungagereza nabo bongewe ku barebwa n’iryo hahiro.

    Umuyobozi wa Komisiyo y’Ububanyi n’Amahanga, Ubutwererane n’Umutekano, Rwigamba Fidèle, aherutse kubwira The New Times ko abakora mu nzego zirebwa n’iryo hahiro bahembwa amafaranga atari menshi kandi ugasanga bakunze kuba kure y’imiryango yabo, bityo rikaba ryitezweho gufasha imiryango yabo ntiyicwe n’inzara.

    Army shop kugeza ubu igurirwamo ibikoresho by’isuku, ibyo mu gikoni n’ibiribwa bica mu nganda nk’umuceri, amavuta, ifu, amata, imitobe n’ibindi.

    Ibiciro byabyo biba biri hasi ugereranyije no ku isoko risanzwe. Umwe mu barihahiramo yavuze ko nk’ikintu kigurishwa ikilo 1000 Frw, “ho usanga kigura 600-650 Frw”.

    Army shop ihahirwamo n’Abasirikare, Abapolisi n’abacungagereza / Ifoto: AFOS

  • LIVE : Rusesabagina yatanze inzitizi yo gushimutwa, abo bareganwa bamutunga agatoki gutinza urubanza #rwanda #RwOT

    Muri uru rubanza ruburanishwa n’Urugereko rw’Urukiko Rukuru ruburanisha ibyaha mpuzamahanga n’ibyambukiranya imipaka, Urukiko rwatangiye ruvuga ko uyu munsi humvwa ibisobanuro ku nzitizi za Paul Rusesabagina wavuze ko afite indi nzitizi.

    Urukiko kandi rwasuye aho Rusesabagina afungiye ndetse ruganira na we, abunganizi be ndetse n’ubuyobozi bwa gereza busanga hari ibikwiye gukosorwa bimufasha kwitegura urubanza.

    Umwe mu bunganira Paul Rusesabagina ari we Me Gatera Gashabana, ntiyagaragaye mu rukiko kuko yanditse arumenyesha ko yitabiriye urubanza ari kuburana i Arusha muri Tanzania.

    Rusesabagina wahise ahabwa umwanya ngo avuge ku nzitizi yari yasabiye igihe cyo kuzitegura mu nyandiko, yavuze ko ari mu Rwanda mu buryo bunyuranyije n’amategeko kuko yashimuswe.

    Yagize ati 'Narashimuswe. Ndashaka kubanza gusubizwa uburenganzira bwanjye, mfungurwe.'

    Me Jean Felix Rudakemwa yahise abaza impamvu Ubushinjacyaha butigeze busubiza kuri iyi nzitizi uruhande rw’uregwa rwashyize muri System, Ubushinjacyaha buvuga ko ikosa ryakozwe na Rusesabagina ndetse n’abamwunganira kuko batinze gushyira imyanzuro ya ziriya nzitizi muri system.

    Uyu munyamategeko yavuze ko budashobora kuburana mu gihe batigeze babona imyanzuro y’Ubushinjacyaha isubiza iyabo kuri iriya nzitizi.

    Ubushinjacyaha bwavugaga ko imyanzuro bwayibonye muri iki gitondo bityo ko butari kubona uko buyisubiza, gusa buvuga ko bwo budakeneye umwanya wo kwitegura ahubwo ko bwiteguye kuburana.

    Umushinjacyaha ati 'Nitwe twagomye gusaba igihe cyo kwitegura ku nzitizi kugira ngo tureshye imbere y’amategeko. Iyi nzitizi ntaho itaniye n’ibyavuzwe mbere, ibyaje ari inzitizi ku munsi wa mbere, igihe cyo kubisobanura byavuzwe ko ari amakuru.'

    Me Jean Felix Rudakemwa wavugaga ko badashobora kuburana kuri izi nzitizi kuko byaba ari nk’umutego batezwe n’Ubushinjacyaha kuko butigeze busubiza ku myanzuro yabo.

    Abaregwa hamwe na Rusesabagina kimwe n’abaregera indishyi, ntibishimiye iyi myitwarire ya Rusesabagina bise ko igamije gutinza nkana urubanza, bahise baka ijambo bavuga akabari ku mutima.

    Nsabimana Callixte alias Sankara yavuze ko abaregwa bose bareshya imbere y’amategeko bityo ko umuburanyi umwe atagomba kuburizamo uburenganzira bw’abandi.

    Sankara yagize ati 'Rusesabagina n’abamwunganira bameze nka ba banyeshuri batinya ibizamini. Buri gihe hari interrogation bavuga bati muyimure, muyimure.

    Me Nkundabarashi Moïse wunganira Sankara na we yagarutse ku kuba hamaze kuba amaburanisha atatu ariko humvwa Paul Rusesabagina.

    Uyu munyamategeko wavugaga ko uru rubanza rushobora kurangira muri 2024 mu gihe byaba bikomeje uku, yasabye Urukiko gushyiraho ingengabihe y’uburyo uru rubanza rugomba kuburanishwa.

    Abanyamategeko baburanira abaregera indishyi muri uru rubanza na bo batse ijambo, bavuga ko iyi myitwarire ya Rusesabagina igamije gutinza urubanza kandi atari we wenyine uregwa muri uru rubanza.

    Umwe muri aba banyamategeko yavuze ko Itegeko ryerekeye imiburanishirize y’imanza z’inshinjabyaha, itegenaya ko inzitizi zitangwa mu rubanza rwo mu mizi, zitagomba gusubikwa inshuro zirenze ebyiri.

    Ati 'Niba zibaye eshatu, mu mizi zizaba zingahe ?'

    Undi munyamategeko muri aba bunganira abaregera indishyi, yavuze ko kuba umwe mu baburanyi yatanga inzitizi ari uburenganzira bwe ariko ko uburenganzira bwe butagomba kujya hejuru y’ubwa bagenzi be baburanira hamwe.

    Yagize ati 'Ni uburenganzira bwe, ariko se uburenganzira bwe bwakandamiza ubw’abandi ?'

    Nyuma y’izi mpaka ndende, Urukiko rwahise rufata umwanya wo kwiherera ngo rufate umwanzuro kuri buriya busabe bwa Rusesabagina ndetse n’ibyifuzo by’abandi baburanyi muri uru rubanza.

    Photo : The New Times

    UKWEZI.RW

    Source : http://www.ukwezi.rw/mu-rwanda/3/article/LIVE-Rusesabagina-yatanze-inzitizi-yo-gushimutwa-abo-bareganwa-bamutunga-agatoki-gutinza-urubanza

  • Byinshi byahindutse ageze ku buyobozi biramutungura, perezida wa Rayon Sports yavuze uwo yasabye uruhushya rwo kwiyamamaza(VIDEO) #rwanda #RwOT

    Perezida w’ikipe ya Rayon Sports, Uwayezu Jean Fidele avuga ko yaje kwiyamamariza kuyobora iyi kipe abizi neza ko irimo ibibazo ariko nyuma yo kujya ku buyobozi yatunguwe no gusanga harimo ibindi bibazo byinshi atari azi.

    Ni mu kiganiro kirambuye yagiranye n’ikinyamakuru ISIMBI kibanze ku bibazo bivugwa muri Rayon Sports muri iyi minsi.

    Ku giti cye avuga ko afata umwanzuro wo kwiyamamariza kuyobora Rayon Sports yabitewe n’ibibazo yabonaga ifite akumva ko hari icyo yakora, gusa ngo nta muntu wigeze amushuka ngo ajye kwiyamamaza nk’uko byavuzwe.

    Ati'Imyaka mfite ndakeka nta muntu wanshuka, ari imyaka mfite n’uko nteye ntwanshuka. Rayon Sports nk’umuryango nkunda wari ufite ibibazo, ibibazo rero biravuka ariko abantu barabikemura, ninjye wizanye, nari nziko hari ibibazo nabonaga bibabaje, biteye agahinda, ndavuga ngo ariko nshobora kugira icyo nakora.'

    Akomeza avuga ko umuntu yagishije inama akanasaba uruhushya kuko ntacyo yakora atamubwiye ari umufasha we.

    Ati'Naravuze nti imbaraga zanjye uko niyizi nta musanzu natanga hariya hantu? Uwo nagishije inama nasabye uruhushya ni uwo nashatse, ntacyo nakora ntamubwiye.'

    Akomeza avuga ko yagishije inama abantu batandukanye ariko bakamuca intege bamubwira ko atazayishobora kuko ari ikipe y’akavuyo, ariko we akumva ko hari icyakorwa ngo gashire.

    Ati'ariko nagishije n’inama, abantu hafi ya bose bancaga intege, bati biriya bintu ntibizashoboka, Rayon Sports y’akavuyo, kuki se akavuyo katavamo? Ndaza ndiyamamaza, bagenzi banjye ntabwo twari tuziranye, bariyamamaza, turatorwa.'

    Akimara gutorerwa kuyobora iyi kipe, yasanzemo ibindi bibazo atari azi ariko aho kubihunga ngo ate ikipe yiyemeje guhangana nabyo.

    Ati'birumvikana ko nagezemo nkasangamo ibindi bibazo ntari nzi, ariko nemera ko mu buzima ntabwo ubuzima ari igitanda gishashe nk’uko ipusi iza igasanga gishashe ikaryama, ubuzima ni ibibazo. Ntabwo wahunga ibibazo cyangwa ngo ubirekere abandi iyo uri umugabo uba ugomba gutanga umuganda aha n’aha, urugamba rwa Rayon Sports si urugamba rukomeye kurusha izindi ngamba abantu barwana mu buzima.'

    'Naremeye ndaza ibibazo ndabibona, nsanga bikomeye, nsanga hari ibyo ntari nzi ariko ndavuga ngo niba amateka yarashatse ko nzaba ndi hano, ngomba kugira icyo nkora nk’uko n’abandi kuva mu 1965 ishingwa, habaye abaperezida batandukanye bagiye bagira icyo bakora, ayo mateka yose tuvuga dushima hari abayobozi kandi bahuraga n’ibibazo, bakabivamo.'

    Yavuze ko kandi abakeka ko azegura bidashoboka ko ahubwo we na komite ye bagomba gukorera abakunzi ba Rayon Sports icyo babatoreye ari cyo kubaka Rayon Sports.

    Ati'abantu bati azegura, ntibishoboka! Ntibishoboka! Ntabwo bishoboka! Imana nintiza ubuzima njyewe na komite yanjye uko tubyumva, twaje nta gahato, twaje tubishaka tuzakorera Rayon Sports kugeza ku munota wa nyuma wo gutora abazadusimbura.'

    Akurikije amezi 4 bamaze ku buyobozi bwa Rayon Sports n’ibyo bamaze gukora yizera ko hari aho bazaba bagejeje Rayon Sports hashimishije.

    Perezida wa Rayon Sports, Uwizeye Jean Fidele na komite ye batorewe kuyobora Rayon Sports tariki ya 24 Ukwakira 2020 ubwo bari basimbuye komite y’inzibacyuho ya Murenzi Abdallah.

    Perezida wa Rayon Sports, Uwayezu Jean Fidele ngo umuntu yasabye uruhushya rwo kwiyamamaza ni umufasha we kuko ntacyo yakora atamubwiye

    Ibibazo yasanze muri Rayon Sports birenze ibyo yari azi

    Ngo nta mugabo uhunga ibibazo ahubwo ahangana nabyo

    Source : http://isimbi.rw/siporo/article/byinshi-byahindutse-ageze-ku-buyobozi-biramutungura-perezida-wa-rayon-sports-yavuze-uwo-yasabye-uruhushya-rwo-kwiyamamaza-video

  • Niwibonaho imico nk'iyi uzamenye ko uri mu rukundo rudafite icyerekezo|Byaba byiza ubivuyemo hakiri kare. – YEGOB #rwanda #RwOT

    Ikigaragaza urukundo rudafatika ni uko uyu munsi ruba rushyushye ariko umunsi ukurikiyeho ugasanga byahinduye isura ndetse rusa n'uratarigeze kubaho. Urukundo rudafatika kandi ni rwarundi rutabasha kwihanganira ibigeragezo. Ikindi kiruranga ni uko nta gitekerezo cyo gushinga urugo umusore n'inkumi bakundana baba bafite.

    Ibimenyetso biranga urukundo rudafatika :

    1.Nawe ubwawe ntuzi niba ukunda umukunzi wawe

    Hari igihe bibaho ko umusore cyangwa umukobwa yibaza niba amarangamutima agaragariza mugenzi we niba ari urukundo cyangwa ari agahararo bikamuyobera. Niba rero nawe ubwawe utazi ibyo urimo ni uko urukundo mukundana rudafatika.

    2.Ntiwizera umukunzi wawe/Ntumwiyumvamo

    Icyizere no kwiyumvanamo hagati y'abakundana n'ibintu by'ingenzi cyane mu rukundo. Kuba rero utazi neza niba umukunzi wawe agukunda by'ukuri, kuba utazi neza uko agufata, kuba ushidikanya niba ari wowe wenyine akunda, n'ibindi bisa nabyo bishobora kukwereka ko urukundo mukundana rudafashije.

    3.Kuvugana gake/kubonana inshuro nke zishoboka

    Mu bintu biranga urukundo nyarukundo, kuvugana no kumenya uko mugenzi wawe ameze n'ingenzi. Mu ndimi z'amahanga nibyo bita communication. Niba rero mutagira igihe gihoraho cyo kuganira no kumenya amakuru ya buri umwe, urukundo rwanyu tangira urugireho amakenga. Ntiwambwira uburyo bwakwira cyangwa igihe runaka kigashira utazi amakuru n'uko umukunzi wawe amerewe ngo nurangiza unyemeze uburyo icyo murimo ari urukundo.

    Hambere iterambere ritaraza nibwo byagoranaga ariko nabwo abakundana bohererezanyaga amabaruwa cyangwa bagasurana uko babishobojwe. Kuri ubu communication yaroroshye kuburyo bitagoranye kurara umenye uko umukunzi yiriwe yemwe mukaba mwagirana n'ikiganiro n'ubwo mutandukanyijwe n'intera ndende. Niba biba rimwe na rimwe, harimo ikibazo.

    4.Ntahazaza

    Urukundo rufatika rugira icyerekezo n'intego. Abantu bakundana urukundo nyarukundo bagaragarizanya amarangamurima nta mbereka, hejuru y'uko bakundana, baba bafitanye ubushuti bufatika,…Mugihe mu rukundo rudafatika abakundana bagaragarizanya amarangamutima gake gashoboka , nta hazaza, nta ntego bafite cyangwa icyerekezo cy'urukundo rwabo.

    5.Guhora mushwana

    Kutumvikana mu rukundo cyangwa mu mubano ni ibintu bibaho kandi ntakabuza bigomba kubaho kuko ntabwo iteka abantu bahuza byose. Ikigaragaza ko muri mu rukundo nyarukundo ni uko iyo hari icyo mutumvikanyeho cyangwa hari aho mugonganye, mugira uko mukemura ibibazo vuba kandi mu mutuzo. Ariko niba wowe n'umukunzi wawe muhora mushwana bihoraho kandi bikagorana kwiyunga ni uko urukundo rwanyu rudafatika.

    Niba ufite umusore cyangwa umukobwa mukundana, uyu munsi urukundo rukaba rushyushye ariko ejo rukazima kandi iteka mugapfa udukosa duto , menya ko urukundo rwanyu ntaho rugana. Binabayeho mukabana, urugo rwanyu ntirwazamara kabiri cyangwa mukajya muhora mu ntonganya.

    6.Nta bihe byiza mugirana

    Biragoye ko abantu bakundana urukundo rudafatika bagirana ibihe byiza . Aha ndashaka gusobanura byabihe bitibagirana, wicara ukibuka ukumva uhise ukumbura umukunzi wawe, byabihe bituma urukundo rwanyu rurushaho kugira ingufu.

    Niba ushaka umukunzi kanda kuri iyi link ukurikize ibisabwa :http://yegob.rw/dating

    Like this:

    Like Loading…

    Source : https://yegob.rw/niwibonaho-imico-nkiyi-uzamenye-ko-uri-mu-rukundo-rudafite-icyerekezobyaba-byiza-ubivuyemo-hakiri-kare/

  • Mucyo Philbert umuyobozi mu ikipe ya UTB yasezeranye n’umukunzi we ukinira RRA(AMAFOTO) #rwanda #RwOT

    Mucyo Philbert ushinzwe ibikorwa by’ikipe ya UTB VC, yasezeranye imbere y’amategeko n’umukinnyi w’ikipe y’igihugu ya Volleyball na RRA, Niyomukesha Euphrance.

    Uretse kuba Philbert azwi muri Volleyball nka Team Manager wa UTB VC ni umwe mu bafasha umukinnyi wa ruhago, Danny Usengimana kubona amakipe (agent), we na Niyomukesha Euphrance bakaba basezeranye nyuma y’igihe kinini bakundana.

    Ku munsi w’ejo hashize ku wa Kane nibwo aba bombi basezeranye imbere y’amategeko mu Murenge wa Niboye mu karere ka Kicukiro.

    Nyuma y’uko bamaze gusezerana kubana akaramata aho bazatandukanywa n’urupfu, indi mihango y’ubukwe harimo gusezerana imbere y’Imana izaba ku wa Gatanu tariki ya 12 Werurwe 2021.

    Muri Kanama 2020, nibwo Mucyo Philbert yaciye bugufi asaba Niyomukesha Euphrance ko yamwemerera akazamubera umugore maze iminsi asigaje ku Isi akajya abyuka amubona iruhande, undi na we ntiyazuyaje yateze ikiganza bamwambika impeta ya fiançailles.

    Niyomukesha Euphrance yarahiriye kubana na Mucyo mu byiza n’ibibi

    Ati”Njyewe Mucyo Philbert, nemeye ko Niyomukesha Euphrance ambera umugore nkamubera umugabo”

    Mucyo Philbert yahise asinyira ko yemeye kubana akaramata na Niyomukesha

    Na Niyomukesha yabisinyiye…

    Ngo iyo umwe arebye undi amwibonamo

    Niyamukesha areba Mucyo mu maso ati”ni wowe amaso adahaga kureba mukunzi!”

    Mucyo na Niyomukesha bari baberewe

    Imihango isigaye izaba mu cyumweru gitaha

    Source : http://isimbi.rw/siporo/article/mucyo-philbert-umuyobozi-mu-ikipe-ya-utb-yasezeranye-n-umukunzi-we-ukinira-rra-amafoto

  • Dr Nsanzabaganwa yashyize akadomo ku nshingano yari amazemo imyaka 10 muri BNR –

    Ku wa 6 Gashyantare 2021 ni bwo Dr Nsanzabaganwa yatorewe kuba Umuyobozi wungirije wa Komisiyo ya Afurika yunze Ubumwe, aba uwa mbere w’igitsina gore ubigezeho kuva uyu muryango washingwa.

    Ihererekanya ry’imirimo yari ashinzwe muri BNR kuva mu 2011 ryabaye kuri uyu wa Gatatu, tariki 3 Werurwe 2021.

    Uyu mugore w’imyaka 50 y’amavuko yarahiriye ishingano nshya muri Komisiyo ya Afurika yunze Ubumwe ku wa 7 Gashyantare uyu mwaka, nyuma y’umunsi umwe atowe.

    Yavuze ko ari umwanya mwiza k’u Rwanda kandi ajyanye imigabo n’imigambi ifitanye isano n’inshingano zirimo ibijyanye n’ubukungu, gucunga umutungo, gucunga imiyoborere n’imikorere, kugarura imikorere myiza kandi inyuze mu mucyo inafite intego, kubazwa inshingano no kwihutisha impinduka cyane ko biri mubyo yatorewe.

    Umuyobozi uzamusimbura kuri uyu mwanya yari afite muri BNR ntaramenyekana kugeza ubu, kuko agomba gushyirwaho n’Iteka rya Perezida wa Repubulika.

    Dr Nsanzabaganwa Monique yamurikiye Guverineri wa BNR, John Rwangombwa uko asize inshingano yari afite zihagaze

    Dr Monique Nsanzabaganwa ari kwitegura gutangira inshingano nshya aherutse gutorerwa muri Komisiyo ya AU

    Amafoto: BNR

  • Urukiko rwanzuye ko babiri mu bareganwa na Rusesabagina barimo n’uwashyiriweho ibihano na Loni bakomeza gufungwa –

    Nsanzubukire Félicien na Munyaneza Anastase bahurijwe mu rubanza rumwe na Rusesabagina Paul, Nsabimana Callixte alias Sankara, Nsengimana Herman n’abandi 16 baregwa ibyaha bifitanye isano n’ibikorwa by’iterabwoba.

    Mu iburanisha ryo ku wa 26 Gashyantare 2021 ni bwo aba bombi basabye kuburana badafunze kuko batagoye inzego zibishinzwe mu mabazwa yose.

    Nsanzubukire na Munyaneza bahoze muri FDLR FOCA aho bari bafite ipeti rya Jenerali. Nyuma y’uko uyu mutwe ushyizwe mu y’iterabwoba hagiye havuka indi irimo na CNRD Ubwiyunge ari nayo babarizwagamo mbere yo gufatwa.

    Ubushinjacyaha bwagaragaje ko bakurikiranyweho ibyaha by’indengakamere ku buryo bashobora kurekurwa bagatoroka, bagasubira kwifatanya n’imitwe ishaka guhungabanya umutekano w’u Rwanda.

    Nyuma yo gusuzuma ubusabe bwabo n’ibiteganywa n’amategeko n’impamvu zatanzwe n’ubushinjacyaha, Urukiko ‘rwanzuye ko ubusabe bwa Nsanzubukire Félicien na Munyaneza Anastase bwo kurekurwa bakaburana bari hanze nta shingiro bufite’.

    Twajamahoro Herman wunganira Nsanzubukire Félicien alias Irakiza Fred na Munyaneza Anastase alias Job Kuramba yari yasabiye abakiliya be gufungurwa by’agateganyo.

    Yavuze ko impamvu ashingiraho asaba ko barekurwa ari uko batagoranye mu gihe cyo kubazwa.

    Ati “Basobanuye neza ibyo babajijwe ndetse banatanga ku neza andi makuru asumbije ayari afitwe n’iperereza. Nta rindi perereza rikibakeneweho ku buryo baribangamira, basobanura ko bemera kuba mu mutwe w’ingabo utemewe kandi bakanasaba imbabazi mu buryo budashidikanywaho.’’

    Umwavoka wa Nsanzubukire yanavuze ko ubuzima bw’umukiliya we butameze neza [Agorwa no guhagarara igihe kirekire] ndetse akeneye kwitabwaho byihariye.

    Ati “Ubuzima bwe buturuka ku burwayi bukomeye muganga yamusanzemo, na mbere yo kurwara yari afite ibilo 80, uko mwamubonye sinzi ko n’ibilo 40 abifite. Kuba atameze neza ni byo byakwitabwaho n’urukiko akaburana urubanza mu mizi ari hanze.’’

    Yasabye urukiko gutegeka ko yitabwaho byihariye kuko ‘apfuye atumviswe n’urukiko byaba ari igihombo ku butabera, ku baregera indishyi no kuri we n’umuryango we.’

    Ubushinjacyaha bwavuze ko kuba Nsanzubukire arwaye nta cyemezo cyo kwa muganga kibyerekana uretse ibigaragarira inyuma. Bwagaragaje ko itegeko riteganya ko ahabwa ubuvuzi kandi mu gihe hari impamvu zifatika afungwa akitabwaho ari mu bitaro.

    Nsanzubukire Félicien yanashyizwe ku rutonde rw’abafatiwe ibihano n’Akanama gashinzwe Umutekano ka Loni mu 2014. We n’abandi bayobozi bakuru ba FDLR bahowe ibyaha bakoreye muri RDC.

    Loni itangaza ko by’umwihariko Nsanzubukire yari ahagarariye, anahuza ibikorwa by’icuruzwa ry’intwaro zavanwaga muri Tanzania zinyujijwe mu Kiyaga cya Tanganyika zigahabwa abarwanyi ba FDLR mu duce twa Uvira na Fizi muri Kivu y’Amajyepfo mu Ugushyingo 2008 na Mata 2009.

    Ubushinjacyaha bwavuze ko busanga abaregwa badakwiye kurekurwa kuko ibyaha bakurikiranyweho bifite ubukana kuko birimo kuba mu mutwe w’ingabo utemewe no kuba mu w’iterabwoba kuko ikomeje imigambi yayo yo kugaba ibitero ku Rwanda.

    Munyaneza yavuze ko ibyo Ubushinjacyaha bwavuze ko barekuwe basubira mu mitwe bahozemo atari impamo.

    Ati “Numva ko ibishingirwaho n’Ubushinjacyaha ko kuba tutarizanye twasubira mu mitwe yitwaje intwaro, sibyo. Hari abandi twazanye, bajyanwa mu buzima busanzwe kandi banyuze mu mahugurwa. Nta mpamvu igaragara ivuga ko twahita dusubira muri iyo mitwe.’’

    Nsanzubukire na Munyaneza bize mu Ishuri rikuru rya Gisirikare mu Rwanda, bajyana n’ingabo z’u Rwanda zatsinzwe. Bageze muri Congo bajya Centrafrique mbere yo gukorera ingabo za FARDC.

    Nsazubukire yaboneye izuba mu yahoze ari Komini Rubungo, ubu ni mu Karere ka Gasabo, mu 1967. Munyaneza Anastase we yavukiye mu Murenge wa Nyamiyaga mu Karere ka Kamonyi. Babaye muri CNRD, yaje kwihuza n’indi mitwe bikora Impuzamashyaka ya MRCD yashinzwe na Paul Rusesabagina, ikagira Umutwe w’Abarwanyi witwa FLN.

    Aba bombi bari mu magana y’abafashwe n’Ingabo za FARDC mu rugamba rwo guhashya imitwe y’iterabwoba ikorera ku butaka bwa RDC, boherezwa mu Rwanda.

    Urubanza baregwamo biteganyijwe ko ruzasubukurwa ku wa Gatanu, tariki ya 5 Werurwe 2021, humvwa inzitizi zatanzwe na Rusesabagina Paul.

    Inkuru bifitanye isano: Urukiko rwanzuye ko rufite ububasha bwo kuburanisha Rusesabagina, na we ati “Ndajuriye’’ (Amafoto na Video)

    Urukiko rwategetse ko Nsanzubukire Félicien (ugenda yicumbye inkoni) na Munyaneza Anastase baburana bafunze/ Ifoto: TNT

  • Rwamagana: Akanyamuneza ku borozi nyuma yo kwigishwa no kwerekwa uburyo bwo kongera umukamo –

    Mu myaka itatu ishize umukamo w’amata mu nka zo mu Karere ka Rwamagana wari litiro 30 000 ku munsi ariko kuri ubu umukamo umaze kugera kuri litiro 38 000 ku munsi nyuma yaho aborozi bigishijwe uburyo bajya bagaburira inka ubwatsi buzongerera umukamo.

    Aba borozi bigishijwe binyuze mu Kigo cy’Igihugu gishinzwe Ubuhinzi n’Ubworozi (RAB) ku bufatanye n’umushinga ugamije guteza imbere ubworozi (RDDP) hakaba harashyizweho ishuri ry’aborozi mu murima, mu kiraro no mu rwuri.

    Muri iri shuri haba harimo abafashamyumvire baba barahuguwe, ubundi bagakora amatsinda abumbiyemo aborozi bo mu midugudu no mu tugari dutandukanye, bakigishwa uburyo bita ku nka zabo.

    Muri aya matsinda bahugurwa ku gufata neza inka ku buryo yongera umukamo, bigishwa uburyo bakurikirana ubuzima bw’inka, uburyo bahingamo ubwatsi butandukanye bugamije kongera umukamo n’ibindi byinshi bituma inka yitabwaho ikongera umukamo.

    Nzirasanaho Jean Claude uturuka mu Murenge wa Karenge mu Kagari ka Byimana avuga ko ataratangira kwigishwa ku kuntu yakwita ku nka ze ngo yiyororeraga ibimasa yumva ko arizo nka zamuha umusaruro kuruta izamuha amata.

    Ati “Nyuma yo kwigishwa nafashe inka imwe nakamagamo litiro imwe n’igice ku munsi nyitaho neza nyiteza intanga none ubu nyikuramo litiro zirindwi mbikesha ubumenyi naherewe mu mahugurwa.”

    Yakomeje agira ati “Ubu umuryango wanjye ubona amata ahagije kandi no ku isoko nkajyanayo, mfata litiro eshatu tukazikoresha mu rugo, izindi litiro enye zikajya ku isoko nibura urumva ko ku nka imwe ku munsi nyibonaho 800 Frw.”

    Kampirwa Jeannette uturuka mu Murenge wa Rubona mu Kagari ka Karambi we yavuze ko atarahabwa amahugurwa ku kongera umukamo ngo yavuye kuri litiro imwe agera kuri litiro eshanu.

    Ati “Nari mfite inka ebyiri, imwe ikamwa litiro imwe none ubu ngeze kuri litiro eshanu kandi ndacyakomeza kongera umukamo ari nako nkangurira na bagenzi banjye kwita kun ka zabo.”

    Umukozi uhagarariye Umushinga ugamije guteza imbere Ubworozi bw’inka zitanga Umukamo witwa Rwanda Dairy Development Project (RDDP) mu Karere ka Rwamagana, Tuyishime Vestine, avuga ko kimwe mu byo bishimira harimo no kuba barigishije aborozi bakanabaha ubwatsi bwongera umukamo, yavuze ko kuri ubu aborozi bamenye neza ko kugira ngo inka iguhe umukamo uyitaho nk’umuntu.

    Ati “Ubundi muri rusange abantu bari bamenyereye kugaburira inka mu buryo budatanga umusaruro bazigaburira imitungo none ubu bamenye ko inka bayivangira ibinyamusogwe, mu matsinda bari barimo twabahaga imbuto z’ubwatsi bwongera umukamo bakabuhinga ndetse bakanaha bagenzi babo imbuto.”

    Tuyishime yavuze ko abenshi mu borozi umukamo wabo wiyongereye bakava ku gukama amata yo kunywera mu muryango bakagera ku kugurisha ku isoko ari nako iwe mu rugo haboneka amata menshi anafasha umuryango mu kurwanya imirire mibi.

    Umuyobozi w’Akarere ka Rwamagana, Mbonyumuvunyi Radjab, yashimye uburyo uyu mushinga wa RDDP wafashije abahinzi mu kubona imbuto nyinshi z’ubwatsi bwiza butanga umusaruro.

    Yavuze ko uretse ubwatsi, aborozi banashyikirizwa imiti mu buryo bworoshye ndetse asaba abataribumbira mu matsinda kwegera bagenzi babo bagafatanya kongera umukamo.

    Kuri ubu amatsinda atanu yagaragaje gukora neza akongera umukamo mu buryo bugaragara yahawe ibihembo birimo ingorofani, amasanduku yifashishwa mu gufunga ubwatsi bwumye kugira ngo bubikwe neza, bote, imyambaro, ibikoresho byifashishwa mu gupima ifumbi, gupima umuriro, gupima ibilo by’inka n’ibyifashishwa mu gukurikirana ubuzima bw’inka ihaka.

    Umuyobozi w’Akarere ka Rwamagana, Mbonyumuvunyi Radjab, yashimiye umushinga RDDP ku nkunga umaze gutera aborozi

    Tuyishime Vestine uyobora RDDP mu Karere ka Rwamagana yavuze ko mu byo bishimira harimo kuba barafashije aborozi gutera ubwatsi bwongera umukamo

    Aborozi b’indashyikirwa bashimiwe

  • Gicumbi: Ubuyobozi bwashyizwe mu majwi ku inyerezwa ry’amafaranga yavuye mu ngurube z’abaturage –

    Mu 2019, ni bwo Akarere ka Gicumbi kahaye Koperative “Imbere heza” igizwe n’abagore 10, ingurube 10 zo kubafasha kwiteza imbere nyuma bazibangurira bakabona zitabwegeka, bagashinja ubuyobozi kubaha ingurube z’ibinure, zitabyara.

    Bamwe mu bagize iyi koperative babwiye TV1 ko nyuma yo kubona ko izo ngurube zitabyara babimenyesheje ubuyobozi maze Umurenge wa Kageyo bubagishamo eshanu, bugurisha inyama zavuyemo ariko ibyo byose bikorwa nta munyamuryango n’umwe urimo ku buryo byatumye batamenya amafaranga yavuyemo.

    Bavuga ko baje gutungurwa n’uburyo ubuyobozi bwagurishije ingurube zabo eshanu ariko bukaza kubazanira imwe ngo abe ariyo borora, bubizeza ko ariyo izabageza ku iterambere mu buryo bwihuse.

    Umwe yagize ati “Ntabwo nshobora kubyumva, ntabwo nakumva ko ingurube eshanu zabyara ingurube imwe, ntabwo havamo amafaranga yagura ingurube imwe ni ko mbyumva, ni ko mbibona.”

    Undi yagize ati “Nyine kumva ko ingurube eshanu zavuyemo ingurube imwe kandi ikindi cyiyongeyeho ni uko bazigurishije komite nta yari ihari, twibaza uburyo izo ngurube zabazwe nta komite irimo bikadushobera.”

    Mu kiganiro IGIHE yagiranye na Meya w’Akarere ka Gicumbi, Ndayambaje Félix, we yavuze ko iyi koperative yahawe ingurube nini itanga umusaruro mu buryo bwihuse ku buryo imaze kubwagura ibibwana 16.

    Ati “Ntabwo zagurishijwe [ingurube] ahubwo byagaragaye ko bazimaranye igihe bigaragara ko zitabwegeka, niba ariko nabivuga; noneho abanyamuryango ba koperative bajya inama bafata icyemezo ziratangwa noneho babazanira indi nini itanga umusaruro ku buryo ubu yanamaze kubwagura ibibwana 16. Izo bari bahawe zari ntoya cyane ariko iyo bafite ubu nini kandi itanga umusaruro ugaragara.”

    Yavuze ko nta muyobozi wagurishije ingurube za koperative, ashimangira ko ahubwo ko bamwe mu bayigize bari bafitanye utubazo dutandukanye.

    Ikiraro ingurube za Koperative “Imbere heza” zororerwa

    Ubuyobozi bw’Akarere ka Gicumbi buvuga ko bwahaye abaturage ingurube ifite icyororo