Author: webrwanda

Uru rubyiruko ruvuga ko rwatoranyijwe ngo rwigishwe imyuga itandukanye, rwabwirwaga ko ruzahabwa ibyemezo by'uko rwize ndetse n'ibikoresho ruzakoresha rubishyira mu bikorwa.

Nyuma ngo batunguwe n'uko bamaze kwiga bagategereza ibyo byombi bagaheba, ubu imyaka ikaba ishize ari itanu.

Umwe muri bo witwa Yandereye Délphine yagize ati 'Bari batubwiye ngo bazaduha ibikoresho kuva twarangiza kwiga mu 2020. Twarize, dukora n'imenyerezwa, yewe dukora ibizamini n'amanota arasohoka. Ariko kuva icyo gihe kugeza uyu munsi nta kintu twabonye.''

Nyiraminani Clarisse na we ati 'Twarirutse hose tubaza ariko birananirana, nkanjye wize kuboha, bambwiye ko batampa imashini iboha igura ibihumbi 300 Frw, kandi hari undi ukeneye iyo kudoda itarenge ibihumbi 100 Frw.''

Aba basore n'inkumi bahuriza ku gusaba ko byibura baba bahawe impamyabushobozi bakoreye, bakaba bagiye kuzisabisha akazi ahandi, mu gihe ibyo bikoresho byo bitaraboneka, kugira ngo badasigara inyuma mu iterambere.

Ntibavuga rumwe n'ubuyobozi bw'akarere

Umukozi ushinzwe Guteza Imbere Umurimo mu Karere ka Nyaruguru, Kigabo Théo Blaise, yavuze ko uru rubyiruko rwafashe ibintu uko bitari, ahubwo ibyabaye byakomotse ku masomo rwize yakemanzwe n'Urwego rushinzwe Amashuri y'Imyuga n'Ubumenyingiro.

Yabwiye IGIHE ko bagisozaga amasomo yabo, Ikigo cyitwaga WDA (cyaje kwitwa RTB) cyanenze ubuziranenge bwayo, kibasaba ko bongera gukora ibindi bizamini kugira ngo babone guhabwa impamyabushobozi zizewe.

Ngo icyo gihe ubuyobozi bwatumijeho abo bireba, maze bamwe barabura kuko bari baragiye za Kigali n'ahandi, ibyatumye hakora bamwe, bituma babura impapuro z'ibyo bize ari na bo bari gusaba kuzihabwa ubu ku bw'amakuru make.

Ati ''Abatarakoze icyo kizamini, nta bundi buryo babonamo impamyabumenyi uretse kujya kwigira ku murimo bagahabwa ikindi kizamini, cyangwa bakajya mu ishuri ribyigisha, bakahiga bushya bakazihabwa.''

Ku kijyanye no guhabwa ibikoresho, Kigabo yavuze ko aba basore n'inkumi bajya gutangira kwiga nta gahunda yo guhabwa ibikoresho yabagaho, ngo byaje mu 2023, gusa kuko ngo byagaragaye ko ari gahunda nziza iteza imbere ababihawe, n'aba na bo batekerejweho, bakazajya babihabwa uko ubushobozi buzajya buboneka.

Ati ''Gahunda yo kubaha ibikoresho irakomeje, no mu kwezi gutaha kwa Kamena hari abo tuzaha barimo n'abo ku Munini, barimo abize gutunganya imisatsi no gukora inkweto, abasigaye bakazategereza umwaka utaha.''

Uru rubyiruko rurimo abize ubwubatsi, ububoshyi, ubudozi no gutunganya imisatsi. Babyize babyitezeho kuzamura imibereho yabo, aho abafite ibi bibazo babarizwa mu mirenge ya Munini na Busanze.

Bamwe mu rubyiruko rwo ku Munini muri Nyaruguru rwize imyuga itandukanye mu kigo cy’urubyiruko, ruvuga ko ntacyo byabamariye kuko batabonye impamyabushobozi

Umukozi ushinzwe Guteza Imbere Umurimo mu Karere ka Nyaruguru, Kigabo Théoblaise, yavuze ko uru rubyiruko ruzakomeza gutekerezwaho uko ubushobozi buzajya buboneka

Akarere ka Nyaruguru kavuga ko kamaze gutanga inkunga y’ibikoresho ku rubyiruko rusaga 1000 mu gihe cy’imyaka itatu

Intambara y'iminsi ibiri yarangiye tariki 27 Mutarama, ubwo Umutwe wa M23 wafataga Umujyi wa Goma uwambuye Ingabo za Leta ya Congo, FARDC, n'abo bari bafatanyije barimo Ingabo za SADC, FDLR, Wazalendo ndetse n'abacanshuro.

Muri iyo mirwano, Ikibuga cy'Indege cya Goma nticyari kikiri nyabagendwa, umuvu w'amaraso wari hose mu nkengero zacyo. Abasirikare benshi ba FARDC barahaguye n'ingabo za SADC.

Iyo ugeze kuri iki kibuga, usanganirwa n'ibikoresho bya gisirikare bya FARDC byatwitswe muri iyo ntambara. Kuva ku mbunda, indege, imyenda n'ibindi, iki kibuga cyabaye amatongo.

Ibyiyongera kuri ibyo, inkengero z'aho indege zagwaga, habaye ibihugu byuzuyemo grenade n'ibindi biturika. Si ibyo gusa, hari n'amakuru avuga ko harimo n'umurambo w'umusirikare bivugwa ko ari uwa SADC, nubwo izo ngabo zavuze ko atari uwazo.

Ubwo M23 yarwanaga na FARDC, izi ngabo za Congo zarahindukiye zitangira kurasa mu Rwanda, ibisasu byazo nubwo byakumiriwe n'ubwirinzi bwa RDF, byahitanye abaturage 16 mu gihe abandi barenga 60 bakomeretse. Ibifaru FARDC yakoreshaga irasa mu Rwanda n'ubu biracyahari.

Amaherezo y'Ikibuga cy'Indege cya Goma azaba ayahe?

Kuva M23 yafata Goma, yokejwe igitutu isabwa kugira ngo ifungure iki kibuga. Gusa yo ivuga ko bisaba ko cyongera gutunganywa bundi bushya kuko ibintu byose byangiritse.

Umuvugizi wa M23, Lawrence Kanyuka ati 'Twagiranye inama na SADC, ndakeka warakurikiye iby'ibiganiro mbere y'uko Ingabo za SADC ziva mu mujyi wa Goma.'

'Twavuze ko tuzakorana na SADC mu gusana iki kibuga cy'indege. Rero nibyo turi gukoraho kugira ngo gisanwe. Nk'uko ubibona hari akazi kenshi ko gukora, tugomba gutangirira ku busa, nta kintu dufite muri iki kibuga cy'indege twavuga ko tuzatangiriraho.'

Kanyuka yavuze ko nta tariki ntarengwa yashyizweho y'igihe imirimo igomba kuba yatangiriye, gusa ko hari itsinda ribishinzwe riri gukora kuri ako kazi.

Ati 'Dutegereje ko impuguke zitubwira, hari itsinda riri kubikoraho.'

Usibye indege za gisirikare, hari n'izindi ndege za gisivile zapfiriye kuri iki kibuga zirimo inini zatwaraga imizigo n'ibindi.

Habarurwa imbunda ebyiri ku muturage

Goma ni umujyi utuwe n'abaturage barenga miliyoni ebyiri, ariko kubera imirwano n'imvururu zimaze igihe muri uyu mujyi, benshi batunze imbunda.

Byahumiye ku mirari ubwo ingabo za FARDC zahungaga zigata intwaro aho zibonye hose, abaturage bakazifata.

M23 isobanura ko nibura buri muturage abarirwa ko atunze imbunda ebyiri. Ikiri gukorwa, ni imikwabu igamije kuvana izo mbunda mu baturage kugira ngo umutekano udahungabana.

Kanyuka ati 'Hari gahunda dufite iri gushyirwa mu bikorwa muri iki gihe ijyanye no kwambura intwaro abasivile. Nk'uko mubizi, Tshisekedi yasize imbunda nyinshi muri uyu Mujyi wa Goma, nibura imbunda ebyiri kuri buri muturage wo muri uyu mujyi. Rero hari imbunda nyinshi hirya no hino.'

Banki ziracyari ikibazo

Kimwe mu bibazo by'ingutu abatuye Goma bafite ni amabanki. Kuva M23 yafata uyu mujyi, leta ya Kinshasa yahise iyafunga. Nta banki n'imwe ikora.

Abo twaganiriye batubwiye ko nk'abakozi iyo bahembwe, amafaranga ashyirwa kuri konti zabo, bakayabikuza bakoresheje telefoni kuko uburyo bw'ikoranabuhanga bwo bukora.

Abatabishoboye, baba bashobora kwambuka bakajya kubikuza mu Rwanda.

Nyuma y'amezi ane, Umujyi wa Goma uri mu maboko ya M23, ubuzima butandukanye na mbere. Ni umujyi utuje, utarangwamo umwanda, urimo urujya n'uruza mu bice byose.

Ibyo bituma abakora ubucuruzi, akazi bagakomeza nta nkomyi ku buryo uyu munsi umuntu agera muri Quartier Birere n'ahandi, agasanga ibintu ni nta makemwa.

Kanyuka ati 'Tshisekedi yafunze banki zose, ntizikora, afatira amafaranga yose y'abaturage bo muri Kivu ya Ruguru na Kivu y'Amajyepfo. Ayo mafaranga ni ay'abaturage, ntabwo ari aya M23 cyangwa se AFC ariko Tshisekedi yakoze ibyaha byibasira ikiremwamuntu afatira ayo mafaranga.'

'Gusa turi kubikoraho kugira ngo banki zigaruke, twatangije CADECO kugira ngo abaturage babashe kubona amafaranga, ubukungu bugende neza.'

Kanyuka asobanura ko nta banki n'imwe yigeze isahurwa kuva M23 yagera muri uyu mujyi. Ngo amafaranga y'abaturage acunzwe neza nta nkomyi.

Mu bindi bigaragara ku kibuga cya Goma, ni ibirindiro by'Ingabo za SADC. Hari imodoka zipakira ibikoresho n'igihe twari duhari, zari zitonze umurongo zitegereje guhabwa uruhushya rwo guhaguruka. Amakuru avuga ko nibura zitaha gatatu mu cyumweru.

Mu byo ingabo za SADC zitemerewe kuvana muri RDC, harimo ibikoresho bya FARDC n'amabuye y'agaciro.

Igice cyakoreshwaga mu kugenzura indege, cyakoreragamo Leta ya Congo ku bufatanye na Monusco

Bivugwa ko ibi bifaru aribyo byakoreshwaga mu kurasa ku butaka bw’u Rwanda

Zimwe mu ntwaro ziremereye zakoreshwaga na Sukhoi, imwe mu ndege y’intambara ya FARDC yarashwe

Abarwanyi ba M23 nibo bacunga iki kibuga

Iyi ndege yarashwe na M23 mu ntambara yari iyihanganishije na FARDC

Ibikoresho byose byabaga mu munara ugenzura indege, byarangiritse

Indege nini zitwara imizigo zarangiritse ku buryo bugaragara

Imodoka zakoreshwaga mu gutwara imizigo zarasiwe kuri iki kibuga nazo

Bivugwa ko mu byatsi biri mu nkengero z’iki kibuga, hari ibisasu byinshi byahatezwe na FARDC

M23 isobanura ko gusana iki kibuga bisaba gutangira bundi bushya kuko ibintu byose byangiritse

Hari ibice byakoreshwaga n’ingabo za Monusco, nabyo byahindutse amatongo

Mu bice bitandukanye byacyo hagaragara imbunda n’izindi ntwaro zakoreshwaga na leta ya Congo

Ikibuga cy’Indege cya Goma cyahindutse amatongo impande n’impande

Kajugujugu z’ingabo za FARDC zarasiwe ku kibuga cy’indege cya Goma ziracyahari

Amafoto na Video: Philbert Girinema

Ibi yabigarutseho mu gikorwa cyo Kwibuka Jenoside yakorewe Abatutsi ku nshuro ya 31, cyabereye muri iri shuri, kuri uyu wa gatanu tariki 23 Gicurasi 2025.

Yagize ati 'Turi ku ishuri rihurirwamo n'abantu b'urubyiruko, rihuza abanyabwenge hakabaye hava ibisubizo kuruta uko hava ibibazo, kuko uburezi ari inzira yo gutera imbere no guteza imbere Igihugu, iyo bubaye bubi dukwiriye kubwita uburozi, by'umwihariko hari benshi bagakumiriye Jenoside yakorewe Abatutsi bari barize ahubwo bayijanditsemo kubera uburezi bubi bari barahawe.'

Meya Mulindwa yakomeje avuga ko ibyiyongeraga kuri siyansi abanyeshuri bigaga birmo kuyigoreka ari byo byahindutse uburozi bigera ubwo umuntu afata umuhoro akayobora igitero ntatekereze ko umuntu ari nk'undi.

Yibukije uru rubyiruko ko ishuri rikwiye kubabera umwanya mwiza wo gukorera igihugu no kurinda abanyarwanda, ntiribabere inzira y'amacakubiri, bakita ku byiza bakirinda ikigare.

Perezida wa Ibuka mu Karere ka Rubavu, Mbarushimana Gerard, mu butumwa yahaye uru rubyiruko rw'abanyeshuri yarwibukije guhangana n'abagifite ingengabitekerezo ya Jenoside.

Ati 'Abapfobya bakanahakana Jenoside yakorewe Abatutsi barabeshya ndetse baranashinyagura, kuko harimo abitwaza ihanuka ry'indege kandi mu Gihugu cy'u Rwanda si ho honyine indege yaguye, n'ahandi ziragwa, birababaje kubona uruhinja rwicwa ngo ni uko indege yaguye kandi rutazi iby'ihanurwa ry'indege ya Habyarimana, nimwibaze umurwayi uri mu bitaro udafite imbaraga kwicwa ngo ni uko indege yaguye, rubyiruko rero ntimugashukwe, ahubwo muhangane n'abagifite ingengabitekerezo ya Jenoside.'

Yibukije kandi uru rubyiruko ko Jenoside yateguwe n'abarimo abarimu ba Kaminuza bishe bagenzi babo n'abanyeshuri bica bagenzi babo.

Ati 'Birababaje ko abahakana Jenoside bakanapfobya Jenoside harimo abize Kaminuza, bisa nk'aho Jenoside yakorewe Abatutsi nta somo yabasigiye. Ni ipfunwe rikomeye kubona intiti zize zirimo abagize uruhare muri Jenoside, muharanire gukumira ikibi cyose kiganisha ku ivangura n'ipforya rya Jenoside yakorewe Abatutsi.'

Yasabye uru rubyiruko guhangana n'abifuza gusubiza u Rwanda mu icuraburindi rya Jenoside bakiri mu mashyamba ya Congo, abasaba kunga ubumwe kugira Jenoside yakorewe abatutsi ntizasubire ukundi.

Umuyobozi w’Akarere ka Rubavu, Mulindwa Prosper avuga ko iyo Uburezi bubaye bubi buhinduka uburozi

Umuyobozi wa kaminuza ya Kigali ishami rya Gisenyi wungirije ushinzwe amasomo, Hagumimana Frank, muri iki gikorwa cyo Kwibuka

Abanyeshuri bo muri ULK Ishami rya Gisenyi bitabiriye igikorwa cyo Kwibuka ku nshuro ya 31

Abarimu ni abakozi muri iyi Kaminuza bitabiriye igikorwa cyo Kwibuka ku nshuro ya 31

Abayobozi batandukanye bitabiriye Kwibuka 31 muri ULK Ishami rya Gisenyi

Tete Loeper ukomoka mu Ntara y'Amajyepfo y'u Rwanda, Akarere ka Huye, mu Murenge wa Rukira avuga ko byamufashe byibuze imyaka ine, kugira ngo abe arangije kwandika icyo gitabo no kugishyira hanze.

Yabwiye IGIHE ko umwihariko w'igitabo cye mu kubara inkuru, ari uko yagerageje bishoboka kucyandika akoresheje ijwi ry'umwana muto.

Ati 'Uko imyaka ishira, dore ubu ibaye 30, ngenda nkura nsobanukirwa neza ibyabaye n'uko byagenze. Nyamara mu gihe Jenoside yakorewe Abatutsi yatangiraga nari umwana ntasobanukiwe impamvu twihisha. Ni na bwo bwa mbere natangiye kubona umuntu apfa.'

Muri icyo gitabo anavugamo uko yasubiye iwabo aho akomoka gushakisha uwaba yarasahuye iwabo, ngo arebe byibuze ko hari amafoto bafite yamwereka uko abavandimwe be yabuze basaga.

Inkuru yo muriki gitabo cyitwa 'Shut up and Hide' igaragaza uko uyu mwanditsi ndetse n'abana b'inshuti ze bakinaga, batuje, Jenoside yakorewe Abatutsi ikabagira imfubyi.

Yavuze ko impamvu yahisemo kwita icyo gitabo uko, ari amagambo amugaruka mu mutwe buri gihe, iyo yibutse inzira y'inzitane yanyuranyemo na nyina.

Ati 'Nari umwana ubaza cyane ku buryo nasobanuzaga Mama buri kantu kose kandi nyamara nta mwanya wo kunsobanurira wari uhari. Yakomeje ansubiriramo ko niba ntashaka ko Interahamwe zingira nk'abandi twabonye, icyo nkwiye gukora ari ukuziba ubundi nkihisha gusa. Ntiyambwiye guceceka, ndabyibuka neza, yambwiye kuziba. Nshobora kuba nari namutesheje umutwe.'

Iki gitabo cy'uyu mwanditsi utuye bu Budage, gikurikira ikindi yanditse mu myaka ibiri ishize cyitwa 'Barefoot in Germany'. Muri icyo gitabo yavugaga inkuru z'impunzi n'abimukira bajya mu Burayi gushaka imibereho.

Si ibyo gusa kandi kuko anaherutse kwandika filime mbarankuru yise 'The Face of Resilience' yakoranye na Mutiganda wa Nkunda na Eliane Umuhire. Muri iyo filime bagaragaza ubudaheranwa bw'Abanyarwandakazi nyuma y'imyaka 30 ishize Jenoside yakorewe Abatutsi ibaye.

Iki gitabo cye gishya kiboneka muri Akitabu no muri Librairie Ikirezi mu Mujyi wa Kigali.

Tete Loeper yashyize hanze igitabo kigaruka ku nzira y’inzitane yanyuzemo muri Jenoside

Shut Up And Hide ni igitabo cya kabiri cya Tete Loeper

Tete Loeper warokotse Jenoside yakorewe Abatutsi atuye mu Budage

Minisitiri w'Ubutabera, Shabana Mahmood, ubwo yagezaga ku Nteko Ishinga Amategeko ibyavuye mu isesengura ry'imikoreshereze y'ibihano, yavuze ko ibyo bizakorerwa muri magereza 20 mu gihugu.

Imiti izifashishwa mu kwirinda ko uwahamwe n'ibyaha yarekurwa akongera kubyijandikamo.

Iyo miti ikoreshwa mu buryo bwo kugabanya ubushake bwo gukora imibonano mpuzabitsina, igafasha kugabanya ibyaha bigendanye n'ihohotera rishingiye ku gitsina bikunze kugaragara muri iki gihugu.

Minisitiri Mahmood yavuze ko ubushakashatsi bwerekanye ko iyi miti igabanya ibi byaha ku kigero kigera kuri 60%.

Yagize ati: 'Nubwo hari abakoze ibyaha babiterwa no kugaragaza ko bakomeye no kugenzura abandi aho kuba irari, iyo miti iracyafite umumaro. Tuzifashisha n'uburyo bwo kwita ku mitekerereze turwanya icyo kibazo cy'abashaka kugenzura abandi.'

Ubu buryo busanzwe bukoreshwa mu Budage no muri Denmark ku bushake, no muri Pologne mu buryo bw'itegeko.

Nubwo iyo miti igabanya umusemburo wa 'testosterone' ugira uruhare mu kugabanya ubushake bwo gukora imibonano mpuzabitsina, iyo uhagaritswe gukoreshwa ubushake buragaruka

Minisitiri w’Ubutabera mu Bwongereza, Shabana Mahmood, yatangaje ko hagiye gukoreshwa imiti igabanya ubushake bw’imibonano ku bafungiye ihohotera

Ni ku nshuro ya 11 iyi nama igiye kuba ariko bukazaba ari ubwa mbere ibereye mu Rwanda, ikazaba kuva ku wa 26 kugeza 30 Gicurasi 2025, aho izahuza abarenga 1000 baturutse mu bihugu 24 byo muri Afurika n'ahandi.

Inama ya African Federation of Institutes of Internal Auditors (AFIIA) ifite insanganyamatsiko igira iti “Kubaka ubufatanye, bugamije impinduka” igamije gutanga amahugurwa yihariye mu bya tekiniki no gusangira ubunararibonye n'abandi bazobereye mu mwuga w'ubugenzuzi bw'imari mu bigo.

Byose kandi bigamije gushimangira imiyoborere myiza, kugenzura no kubahiriza amategeko ndetse no gutanga icyizere mu mikorere ya kinyamwuga ku mugabane wose wa Afurika.

Perezida w'Ikigo cy'Abagenzuzi b'Imari mu Bigo byo mu Rwanda, Fred Twagirayezu, yavuze ko u Rwanda rwishimiye kwakira iyi nama by'umwihariko, kuko IIA Rwanda imaze imyaka 10 ishinzwe, ibi bikagaraza iterambere muri uyu mwuga mu Rwanda.

Ati 'Indangagaciro zacu nk'igihugu ni ugucunga neza umutungo, gukorera mu mucyo no kugira ubunyangamugayo ni na zo zigenga umwuga w'igenzura ry'imbere mu bigo. Kwakira AFIIA 2025 bizaha bagenzi bacu baturutse hirya no hino ku mugabane amahirwe yo kubona n'amaso yabo ibimaze kugerwaho mu Rwanda.'

Umugenzuzi Mukuru w'Imari w'Imbere, Jules Cesar Hategekimana, yagaragaje ko iyi nama izafasha kongera ubumenyi no gusangira ubunararibonye ku bijyanye n'amahame mashya mpuzamahanga y'igenzura ry'imari mu bigo.

Ati 'Ibi bizatuma dushyira mu bikorwa gahunda y'igihugu yo guteza imbere ubukerarugendo bushingiye ku nama (MICE), tubona abashyitsi baturutse mu mahanga, ndetse tugashimangira ubufatanye bukenewe kugira ngo urwego rw'igenzura ry'imari n'imiyoborere rurusheho gukomera.'

Perezida wa AFIIA, Ruth Doreen Mutebe, yavuze ko iyi nama ari amahirwe akomeye ku banyamwuga kuko bizafasha mu kwitegura guhangana n'ibibazo by'ejo hazaza ari na ko izafasha mu rugendo rwo kubaka Afurika yifuzwa.

Kuri ubu, ibigo byose bya Leta bifite abagenzuzi b'imari. Ibi bikagaragaza ko uyu mwuga w'igenzura ry'imari wimakajwe. No mu bindi bigo uyu mwuga watangiye gushyirwa mu bikorwa nk'igikoresho gikomeye mu gufata ibyemezo biganisha ku iterambere.

Ku nshuro ya mbere Inama Mpuzamahanga y'Abagenzuzi b'Imari mu Bigo byo muri Afurika igiye kubera mu Rwanda, muri Gicurasi 2025

Ni igikorwa cyabereye mu Murwa Mukuru, Gaborone, cyitabirwa n'Abanyarwanda batuye muri icyo gihugu n'inshuti zabo zo mu bihugu bitandukanye birimo u Burundi, Zambia, Malawi na Tanzania, n'abaturege bo muri Botswana.

Witabiriwe n'abayobozi mu ngabo bo muri Kenya, Botswana, na Zambia bari mu mahugurwa ya gisirikare muri Botswana.

Ni umunsi waranzwe n'ibiganiro biganisha ku mateka yaranze u Rwanda ndetse hagaragazwa intambwe nziza igihugu cyateye, hashyirwa imbere na gahunda y'ubumwe n'ubudaheranwa cyane ko ari wo musingi w'iterambere.

Umuyobozi Mukuru w'Umuryango w'Abanyarwanda batuye muri Botswana, Sheikh Hassan Hategekimana yashimiye abitabiriye, atanga ubutumwa bujyanye no kwibuka, agaragaza amateka u Rwanda rwanyuzemo, ariko yerekana n'uburyo rumaze kuba intangarugero mu iterambere.

Maj Fred Ngabo uri mu butumwa bw'akazi akaba ari no kwiga muri Kaminuza ya Botswana yatanze ubutumwa burambuye ku mutekano w'u Rwanda ndetse anasaba buri wese gutanga umusanzu wo kurwanya abapfobya Jenoside yakorewe Abatutsi.

Ati 'Intambara y'amasasu yararangiye, Abanyarwanda bari ku rugamba rwo guhashya abaharabika igihugu kuko ni bo kibazo. Urugendo ruracyari rurerure nta mpanvu yo kwirara ahubwo imbaraga nyinshi zikenewe ubu kuko hari byinshi byo gukora ngo duteze imbere igihugu n'abagituye.'

Maj Ngabo yagaragaje uruhare u Rwanda rudahwema kugira mu kubungabunga umutekano mu Karere, Afurika ndetse n'ahandi ku Isi, ibiragaragaza ubuyobozi bwiza bw'igihugu.

Umwe mu bategura igikorwa cyo kwibuka, Dr Phocas Twagirayezu, yavuze ko kwibuka byomora ibikomere ndetse bikanafasha gutanga ubutumwa bubabarira, butanga icyizere cyo kwiyubaka, bigashimangira n'ubudaheranwa.

Ati 'Ntabwo twibuka kugira ngo Abanyamahanga batugirire impuhwe kubera ibyo twaciyemo ahubwo tuba dushaka kumenyekanisha ukuri ku byabaye kandi dutanga ubutumwa bw'uko kwibuka abacu ari inshingano zihoraho ndetse indahiro ari imwe y'uko ibyabaye bitazongera ukundi.'

Mugenzi we witwa Chantal Yadukijije na we uri mu bategura iki gikorwa, yashimiye abafabafashe mu mugongo mu bakifatanya mu kwibuka abishwe muri Jenoside yakorewe Abatutsi mu Rwanda mu 1994.

Abanyarwanda baba muri Botswana bibutse ku nshuro ya 31 Jenoside yakorewe Abatutsi

[email protected]

Ni imibare yagaragajwe mu nama yaguye yita ku burezi mu Ntara y'Amajyaruguru, yitabiriwe n'abarimo Umunyamabanga wa Leta muri Minisiteri y'Uburezi, Irere Claudette, Guverineri w'Intara y'Amajyaruguru, Mugabowagahunde Maurice n'abandi bafatanyabikorwa batandukanye.

Mu Karere ka Burera habarurwa abana bataye ishuri 510 mu gihe abamaze kugarurwa ari 409, mu Karere ka Musanze ho habarurwa abana bataye ishuri 2420, mu gihe abamaze kugarurwa ari 2033.

Akarere ka Rulindo gafite abana bataye ishuri 2073, abamaze kugarurwa ni 1193, ni mu gihe mu Karere ka Gakenke abana bataye ishuri ari 660 abamaze kurigarurwamo ari 520, naho mu Karere ka Gicumbi abana bataye ishuri ni 2197 abamaze kugarurwa ni 1371.

Irere yavuze ko ko Igihugu gihangayikishijwe n'ikibazo cy'abana bata ishuri, agaragaza ko atari umwihariko w'Intara y'Amajyaruguru ahubwo ari ikibazo gihangayikishije Igihugu.

Ati 'Bimeze uko kandi Leta yarakoze byose bifasha umwana ngo ajye kwiga. Bisaba ko buri wese abigira ibye, kuko uyu mubare ku rwego rw'Intara ni munini. Dukeneye ko uyu mubare ugabanyuka ku buryo bufatika.'

Minisitiri Irere yavuze ko uturere dukeneye kwicara tukareba impamvu abana bata ishuri, kuko abarita usanga bajya mu bikorwa by'urugomo.

Umwana abarwa nk'uwataye ishuri iyo amaze umwaka wose atiga, mu gihe ukundi kutaryitabira bakubara nko gusiba.

Muri iyo nama kandi hagaragajwe ko ubuyobozi bugiye gukurikirana ikibazo cy'ibigo by'amashuri bituma abana amafaranga y'umurengera yo kugura imyambaro y'ishuri kandi ikaza itujuje ubuziranenge.

Guverineri Mugabowagahunde yagaragaje ko abana b'u Rwanda bakwiriye kubona imyambaro y'ishuri yujuje ibisabwa kandi igiciro cyayo kitaremereye ababyeyi.

Ati 'Turacyafite ikibazo cy'ibigo by'amashuri bigituma abana amafaranga y'umurengera yo kugura imyambaro y'ishuri. Ni yo mpamvu icyo kibazo twakigarutseho mu nama yaguye y'uburezi, tureba uburyo abana bacu babona imyambaro myiza yujuje ibisabwa kandi ku giciro kitaremereye.'

Yavuze ko batangiye kwegera inganda bafite muri iyi ntara mu kwishakamo ibisubizo ndetse yemeza ko bagiye kujya bakorera iyo myambaro ku giciro kidahenze kandi zujuje ibisabwa.

Guverineri Mugabowagahunde yavuze ko mu nganda bari kuganira na zo harimo urw'icyitegererezo, Noguchi Holdings Limited, ndetse rwamaze kwemera gukora imyenda idahenze kugira ngo ababyeyi boroherwe n'igiciro, inujuje ubuziranenge.

Ni uruganda ruherereye mu Murenge wa Rugarama mu nyubako zahoze ari iz'agakiriro k'Akarere ka Burera, zaje kwegurirwa abashoramari na leta.

Umukozi ushinzwe gukurikirana ibikorwa by'Uruganda Noguchi Holdings Limited, Uwihoreye Samuel, avuga ko ku bufatanye n'intara bagiye gukorana n'uturere mu kwegereza ababyeyi imyambaro y'ishuri myiza ku giciro gito.

Ati 'Twerekanye imyambaro dukora, bayishimye badusaba kudashyiraho igiciro kiremereye ababyeyi kandi twabyemeye. Tugiye gutangira gukorana n'uturere dushyireho igiciro gito, dufashe abana bige bambaye neza kandi bibafashe gutsinda.'

Uwihoreye yavuze ko kuba Leta y'u Rwanda yarabakuriyeho imisoro ingana na 20% nk'abanyenganda, bizabafasha korohereza ababyeyi, bagabanya ibiciro.

Ikindi yavuze ko nta kibazo bazagira cyo guhaza isoko ry'Intara y'Amajyaruguru, kuko mu ruganda bafite abakozi 600, kandi bafite n'imashini ifite ubushobozi bwo gukata ibitambaro 1500 mu isaha.

Imibare igaragaza ko Intara y'Amajyaruguru ifite abanyeshuri 683,831, bose biga mu biga mu bigo by'Amashuri 787.

Umunyamabanga wa Leta muri Minisiteri y'Uburezi, Irere Claudette yasabye ko hakurikiranwa ikibazo cy’abana bataye ishuri mu maguru mashya

Minisitiri Irere yavuze ko byaba ari akarusho ibiciro by'imyambaro y’Uruganda rw Noguchi Holdings Limited, bitagiye hejuru y'ibisanzwe

Umukozi ushinzwe gukurikirana ibikorwa by'Uruganda Noguchi Holdings Limited, Uwihoreye Samuel, avuga ko ku bufatanye n'Intara y’Amakyaruguru bagiye gukorana n'uturere mu kwegereza ababyeyi imyambaro y'ishuri myiza ku giciro gito

Guverineri w'Intara y'Amajyaruguru, Mugabowagahunde Maurice avuga ko abana b'u Rwanda bakwiriye kubona imyambaro y'ishuri yujuje ibisabwa kandi igiciro cyayo kitaremereye ababyeyi

Ni amarushanwa yakozwe ku wa 22 Gicurasi 2025, agizwe n'impande ebyiri, harimo kugaragaza amafunguro agaburwa mu gihugu cya Turikiya nk'umufatanyabikorwa w'iyi kaminuza, n'amafunguro nyarwanda yateguwe n'abatetsi bafatanyije na bamwe mu banyeshuri biga ibijyanye n'amahoteli na restaurants muri iyi kaminuza.

Ambasaderi wa Turikiya mu Rwanda, Aslan Alper Yüksel, yashimiye kaminuza ya UTB ku mubano utajegajega ifitanye Turikiya ashimangira ko uzanakomeza.

Ati' Twishimiye umubano mwiza Ambasade ya Turikiya ifitanye na UTB kandi ndabizeza ko utazigera uhungabana, kuko uretse iyi gahunda ya 'Turkish Cuisine week' hari n'ibindi byinshi duteganya gukora.'

Umuyobozi Mukuru wa Kaminuza ya UTB, Ntahemuka John, yashimiye ambasade ya Turikiya mu Rwanda kubera umubano mwiza bafitanye, avuga ko iki gikorwa uretse kuba ari amarushanwa afasha kaminuza, kinagaragaza umuco w'ibihugu byombi.

Ati' Turashimira ambasade ya Turikiya kuba barahisemo kaminuza yacu kugirango hajye habera ibikorwa byabo bitandukanye, ntabwo bifasha abanyeshuri gusa ahubwo uyu ni n'umwanya mwiza wo kumenyekanisha kaminuza yacu ibyo ikora, inagaragaza ko ibyo ikora bitagarukira mu Rwanda ahubwo yagura bikanagera mu mahanga.'

Ntahemuka yavuze ko mu gutanga amanota hagendewe ku bintu bibiri harimo kumva uko amafunguro ameze (ni ukuvuga kurya bakumva uburyohe bwayo) ndetse no kureba uburyo biteguye ku isahani.

Umwe mu banyeshuri wabaye uwa mbere mu cyiciro cy'abarushanyijwe mu guteka amafunguro yo muri Turikiya, Ndashimye Joel, yashimiye kaminuza ya UTB yateguye iki gikorwa agaragaza ko mbere yumvaga ari ibintu bigoye ariko kubera kubikunda yabikoze neza agatsindira itike yo kujya mu gihugu cya Turikiya.

Ati' Byari ibintu numvaga bizaba bigoye ariko kubera kubikunda no gukora cyane nkakurikirana ibyo nigishijwe, nahawe igihembo cyo kujya gusura muri Turikiya nkareba n'ibikoni byaho,…nkunda guteka ni na byo nize ariko iki gihembo nkikesha kaminuza ya UTB yadushyiriyeho aya mahirwe kandi iharanira kuduha ibyiza.'

Karangwa Teta, watsinze mu cyiciro cy'abateguye amafunguro nyarwanda, na we yagaragaje ko uretse ibihembo bahawe, hari byinshi yungukiye mu marushanwa bizamufasha mu buzima busanzwe.

Ati' Byanshimishije kuba nabaye uwa mbere, gusa ntabwo navuga ngo nzi guteka iki kintu neza kuko uhora ugira icyo wongeraho, aha tuba twungukiyemo ubundi bumenyi butandukanye tuzajya twifashisha no hanze.'

Kaminuza ya UTB isanzwe ifitanye imikoranire na Ambasade ya Turikiya mu Rwanda harimo guha iyi kaminuza ibitabo, ndetse no kohereza abanyeshuri barangije muri iyi kaminuza kujya kwimenyereza umwuga muri icyo gihugu.

Abatetsi babizobereye bafatanyije na bamwe mu banyeshuri

Hateguwe amafunguro yo mu Rwanda na Turikiya

Zulfat Mukarubega washinze Kaminuza ya UTB aganira na Ambasaderi wa Turikiya mu Rwanda Aslan Alper Yüksel

Umuyobozi Mukuru wa UTB Ntahemuka John na Amabasaderi Aslan Alper Yüksel bategereje kureba igipimo cy’abanyeshuri babo

Umuco Nyarwanda wigaragazaga mu byo bateguye

Karangwa Teta hahize abo mu cyiciro cy'abateguye amafunguro nyarwanda