Webrwanda Backend

Author: webrwanda

  • Uruhare rw’u Bufaransa muri Jenoside, uko FPR yayihagaritse, Jenoside ebyiri… Ibisubizo bya Nicolas Sarkozy –

    Nicolas Sarkozy yabigarutseho mu kiganiro yagiranye na Le Point, cyagarutse ahanini kuri Politiki y’u Bufaransa muri Afurika, uruhare rwabwo mu mateka ashaririye y’uyu mugabane, avuga ku mateka n’u Rwanda, Algerie, Tchad n’ahandi.

    Sarkozy wahoze ayobora u Bufaransa yavuze ko ibyabaye mu Rwanda muri Mata 1994 ari Jenoside yakorewe Abatutsi ya nyuma mu kinyejana cya 20, ikwiye guhabwa inyito yayo ntigabanyirizwe uburemere, ayisobanura “nk’umushinga wa politiki igendera ku ivangura ry’intagondwa z’abahutu zashakaga kumaraho Abatutsi”.

    Aya magambo ya Sarkozy ayavuze nyuma y’ukwezi hasohotse Raporo ya Komisiyo ya Duclert ivuga ku ruhare rw’u Bufaransa muri Jenoside yakorewe Abatutsi. Uyu mugabo yashimye iyi raporo, avuga ko ishimangira urugendo yagiriye mu Rwanda mu myaka 11 ishize, ari narwo rwonyine rwakozwe na Perezida w’u Bufaransa i Kigali nyuma ya Jenoside yakorewe Abatutsi.

    Ati “Icyo gihe navuze “amakosa” [yakozwe], amakosa ya politiki no kwica amaso kugera ku rwego rwo hejuru mu gihugu. Mu by’ukuri, ku rwego rwo hejuru rw’igihugu nk’uko raporo ibigaragaza. Ariko iteka ntekereza ko u Bufaransa butagize ubufatanyacyaha muri ubwo bunyamaswa, ibyemezwa na Raporo ya Duclert n’iya Muse yakozwe ku busabe bw’ubuyobozi bw’u Rwanda”.

    Sarkozy yavuze ko Jenoside yakorewe Abatutsi, yirengagijwe n’Umuryango Mpuzamahanga by’umwihariko u Bufaransa, agaragaza ko kuba bwakwemera uburemere bw’amakosa bwakoze, ari ibintu bidashobora kwirengagizwa, ko kurwemera ahubwo ari ko kuri.

    Ati “Ubwo nabaga Perezida, niyumvishaga neza ko ibyabaye byarenze imbibi […] miliyoni imwe y’impfu mu mezi atatu, Kigali, umurwa mukuru watakaje kimwe cya kane cy’abaturage muri iyo minsi, ni ikibazo kigaragara. Ni ngombwa kwibuka ko Jenoside yakozwe hagati y’abavandimwe, rimwe na rimwe hagati mu muryango. Hafi icya kabiri cy’abishwe bari abagore cyangwa abana. Ibyo biguha igitekerezo cy’ikigero cy’urwango rwari rwarabibwe.”

    Yavuze ko ibyo byose byabaye umuryango mpuzamahanga uhari, urebera, ntugire icyo ukora, ndetse na Opération Turquoise isobanurwa n’u Bufaransa nk’iyari igamije gukiza Abatutsi, igakorwa bikererewe kugeza ubwo FPR Inkotanyi, ifata izo nshingano.

    Ati “Ukuri kuntegeka kuvuga ko ari FPR, binyuze mu ntsinzi yayo ya gisirikare, atari umuryango mpuzamahanga wahagaritse Jenoside.”

    Sarkozy yavuze ko ubutegetsi bwa François Mitterrand bwari bwaraburiwe kuva kera, byaba bikozwe n’abari mu nzego za Dipolomasi, Igisirikare n’Ubutasi, bumenyeshwa ko ibiri kubera mu Rwanda ari Jenoside yakorerwaga Abatutsi, ariko ntibwagira icyo bukora.

    Ati “Benshi bari bazi ibiri kuba, ni ubuhumyi budasanzwe, ni igikorwa cy’itsinda rito ryari mu buyobozi bwo hejuru mu gihugu: Umugaba Mukuru w’Ingabo by’umwihariko, ishami ryari rishinzwe Afurika na Perezida Mitterrand ubwe.”

    Sarkozy yavuze ko nta wavuga ko u Bufaransa bwagize ubufatanyacyaha muri Jenoside yakorewe Abatutsi, ku buryo habaho kwemeza ko ingabo z’u Bufaransa zakoze ubwicanyi, ati ariko “habayeho amakosa akomeye, ubuhumyi buhanirwa.”

    Uyu mugabo yakomeje avuga ko kuba umuryango mpuzamahanga warirengagije ibyabaye, nabyo ubwabyo ari amakosa akomeye.

    Ati “Muri Jenoside, gufunga amaso, ntabwo ari amahitamo. Ntabwo hakenewe operasiyo yo guharanira ko amategeko yubahirizwa cyangwa yo kubaha ibyavuye mu gasanduku k’itora, ni iguhagarika ubwicanyi.”

    “Jenoside ebyiri ni ikinyoma”

    Sarkozy yabajijwe icyo atekereza kuri Jenoside ebyiri zivugwa, avuga ko ari ikinyoma kidakwiriye kwemerwa cyane ko abanyamateka bamaze kubifataho umwanzuro.

    Ati “Ni ikinyoma kidakwiriye kwemerwa. Abanyamateka batanze umwanzuro wabo […] Icyabaye mu 1994, ntabwo ari intambara isanzwe hagati y’ubwoko. Ni umugambi wa Jenoside, wari ushyigikiwe n’ubushake bwo gutsemba burundu igice cy’abantu. Hanyuma kuri Jenoside, nta yindi usibye iyakorewe Abatutsi. Uko ni ko kuri. Uyu munsi mu Rwanda, ni byiza ko ibijyanye n’amoko byavanyweho, hari ubushake bwo kurenga ayo mateka mabi.”

    Kuva mu 1994, u Bufaransa nibwo bwabaye ku isonga mu gukwiza ko mu Rwanda habaye Jenoside ebyiri, ko usibye Abatutsi bishwe hari n’Abahutu bishwe. Ibyo byakorwaga mu guhunga uruhare rwabwo, gupfobya ibyabaye no gukomeza umugambi bwari bwaratangiye wo gutera ingabo mu bitugu Guverinoma yateguye umugambi wo gutsemba Abatutsi.]

    Nicolas Sarkozy wahoze ari Perezida w’u Bufaransa yashimangiye ko kuvuga ko mu Rwanda habaye Jenoside ebyiri ari ikinyoma cyambaye ubusa]

  • LIVE: Urubanza rw’abareganwa na Rusesabagina rwakomeje; hari kumvwa Col Nizeyimana (Amafoto na Video) –

    Usibye Paul Rusesabagina nk’uko byagiye bigenda mu yandi maburanisha utaragaragaye mu rukiko, abandi bose bitabiriye.

    Mu iburanisha riheruka, hireguye Nizeyimana Marc ushinjwa ibyaha icyenda. Yari yunganiwe na Me Murekatete Henriette. Uyu mugabo wavutse mu atuye mu Karere ka Kalehe mu Ntara ya Kivu y’Amajyepfo muri Repubulika Iharanira Demokarasi ya Congo. Yashakanye na Uwambajimana Donatille, bafitanye abana batanu.

    Mu bwiregure bwe, yavuze ko nta bitero yigeze ategura ngo bigabwe k’u Rwanda, ndetse ko nta n’ibikorwa by’iterabwoba yigeze akorera mu Rwanda.

    Mu 1994 ni bwo yahungiye muri Zaïre. Yafatiwe mu ngabo za FLN afite ipeti rya Colonel. Yavuze ko yarwanye intambara nyinshi muri Congo, akiga muri kugeza mu 2002 ubwo igisirikare cya FAC cyabirukanaga bakajya muri FDLR.

    Yavuze ko yemera ko yagiye mu Mutwe w’Ingabo utemewe wa FDLR-FOCA.

    Col Nizeyimana Marc yavuze ko atabaye mu buyobozi bukuru bwa FDLR-FOCA. Ati “Umurimo munini nakoze ni ukuba Commander muri Sous Secteur ya Reserve. Yari nka batayo yari ishinzwe

    KURIKIRA UKO IBURANISHA RIRI KUGENDA

    09:50: Ku cyaha cyo gutwikira undi ku bushake, Me Murekatete yavuze ko mu nyandiko itanga ikirego cy’ubushinjacyaha, buvuga ko MRCD/FLN yakoze ibikorwa byo gutwikira undi ku bushake inyubako, imodoka na moto mu Murenge wa Nyabimata mu Karere ka Nyaruguru, no mu wa Kitabi mu Karere ka Nyamagabe ndetse no mu Karere ka Rusizi.

    Bwavuze ko ubwo ibyo bikorwa byabaga, Col Nizeyimana yari mu batozaga abasirikare.

    Me Murekatete yavuze ko uwo yunganira adakwiriye kubibazwa kuko atari we wohereje abarwanyi gutwika, ndetse ko n’ababigizemo uruhare bose nta n’umwe wigeze amushinja cyangwa ngo agaragaze ko hari ubundi bufasha ubwo aribwo bwose yatanze.

    We ngo icyo yakoze ni uko yarwanaga muri Congo aho bari bari.

    09:31: Me Murekatete yavuze ko Col Nizeyimana atari mu bantu bibye abaturage, ndetse ko nta n’umuntu n’umwe mu bo bareganwa wigeze amuhamya kuba yarageze mu Rwanda agabye igitero. Yavuze ko adakwiriye gukurikiranwaho icyaha cyo kwiba hakoreshejwe intwaro nk’igikorwa cy’iterabwoba.

    9:10: Me Murekatete yavuze ko we n’umwunganizi we bari kwiregura bakurikije amategeko ubushinjacyaha bwahereyeho hatitawe ku kuba mbere hari andi mategeko. Me Murekatete yavuze ko urega ariwe ufite inshingano zikomeye zo gutanga icyo ashingiraho arega umuntu, bityo ”ibyo ubushinjacyaha bwaduhaye burega nibyo tugarukiraho twiregura”.

    -  “Nta tegeko nta cyaha”

    9:10:Me Murekatete Henriette wunganira Col Nizeyimana Marc, abwiye urukiko ko amategeko ubushinjacyaha bwishinjikiriza mu kurega uwo yunganira, yashyizweho muri Kanama 2018, kandi ngo ibyaha aregwa byabaye mbere y’icyo gihe.

    Yavuze ko amahame agena ko “nta tegeko nta cyaha”, bivuze ko hashingiwe kuri aya mategeko ubushinjacyaha bwatanze, nta cyaha cyari kiriho kuko nta tegeko ryateganywaga bitewe n’igihe ibyaha byabereye.

    Me Murekatete Henriette wunganira Col Nizeyimana Marc

    Perezida w’Inteko Iburanisha, Muhima Antoine

    8:50: Ku cyaha cy’itwarwa ry’umuntu ritemewe n’amategeko nk’igikorwa cy’iterabwoba, Me Murekatete yavuze ko bishingiye ku gihe ibikorwa byabereye n’igihe amategeko yasohokeye, nta buryozwacyaha bukwiriye kubazwa umukiliya we.

    Yavuze ko Ubushinjacyaha bushinja uwo yunganira ko FLN yakoze ibikorwa byo gutwara abantu mu buryo butemewe n’amategeko mu Murenge wa Nyabimata. Ngo icyo gihe yari Komanda wa Segiteri y’Amajyaruguru ari nayo yavagamo abarwanyi bagabye ibitero mu Rwanda ndetse akaba yari ashinzwe kubategura.

    Me Murekatete yavuze ko Col Nizeyimana atigeze agaba ibitero mu Rwanda, ko ahubwo we yarwanaga muri Congo n’ingabo za Mai Mai, FARDC, Nyatura n’indi mitwe.

    Ku bitero byagabwe muri Nyabimata, yavuze ko atazi igihe byateguriwe ahubwo ko ngo yabibonye mu itangazamakuru, ati “bigombye kuba byarateguwe mu bwiru bwinshi”. Yavuze ko nubwo yari yungirije Komanda w’agace k’Amajyaruguru, Gen Geva, ngo ntiyari abizi kuko ngo ababikoze bose bavuka i Cyangugu kandi ngo nawe ni ho [Geva] avuka.

    Me Murekatete yavuze ko iki cyaha uwo yunganira atagakwiriye kukibazwa, kuko nta musirikare yigeze ategura, ndetse ko atigeze amenya igihe ibitero byateguriwe.

    8:45: Umwunganizi wa Col Nizeyimana, Me Murekatete Henriette, niwe wahawe umwanya n’urukiko kugira ngo asobanure icyo amategeko avuga ku bijyanye n’ibyo umukiliya we ashinjwa.

    Yavuze ko hashingiwe ku mategeko ubushinjacyaha buregesha n’igihe ibikorwa aregwa byabereye, asanga ingingo zishingirwaho mu kumurega ibyaha zidakwiriye kuko igihe ibikorwa byabereye n’igihe amategeko yashyiriweho bitajyanye.

    Urutonde rw’abaregwa muri uru rubanza

    1. Nsabimana Callixte alias Sankara

    2. Nsengimana Herman

    3. Rusesabagina Paul

    4. Nizeyimana Marc

    5. Bizimana Cassien, alias BIZIMANA Patience, alias Passy, alias Selemani

    6. Matakamba Jean Berchmans

    7. Shabani Emmanuel

    8. Ntibiramira Innocent

    9. Byukusenge Jean Claude

    10. Nikuze Simeon

    11. Ntabanganyimana Joseph alias Combe Barume Matata

    12. Nsanzubukire Félicien alias Irakiza Fred

    13. Munyaneza Anastase alias Job Kuramba

    14. Iyamuremye Emmanuel alias Engambe Iyamusumba

    15. Niyirora Marcel alias BAMA Nicholas

    16. Nshimiyimana Emmanuel

    17. Kwitonda André

    18. Hakizimana Théogène

    19. Ndagijimana Jean Chrétien

    20. Mukandutiye Angelina

    21. Nsabimana Jean Damascène alias Motard

    Reba uko iburanisha riheruka ryagenze: Nsengimana na Col Nizeyimana bavuze ko bamenye ko FLN ari umutwe w’iterabwoba bageze mu Rwanda (Amafoto na Video)

    Amafoto: Muhizi Serge

  • Perezida Kagame yakiriye mu biro bye murumuna wa Perezida w'inzibacyuho wa Tchad #rwanda #RwOT

    Nta makuru arambuye yatangajwe ku biganiro bagiranye ku mugoroba wo ku wa gatatu.

    Perezida Kagame azwi nk'umwe mu bari bafitanye umubano mwiza no kumvikana ku ngingo rusange zireba Africa n'uwari Perezida wa Tchad Idriss Déby Itno.

    Ubutegetsi bwa gisirikare muri Tchad ubu bwugarijwe n'igitutu cy'imiryango mpuzamahanga n'ubumwe bwa Africa bisaba abasirikare gusubiza ubutegetsi abasivile.

    Inama ya gisirikare ikuriye Tchad iri kandi mu ntambara n'imitwe y'inyeshyamba, urugamba rwarasiweho uwari Perezida Idriss Déby Itno mu kwezi gushize agapfa.

    Perezida Kagame yakiriye intumwa za Tchad ari kumwe na Minisitiri w'ububanyi n'amahanga Vincent Biruta hamwe na Major Gen Joseph Nzabamwita ukuriye urwego rushinzwe ubutasi n'umutekano (NISS).

    Ku mbuga nkoranyambaga, bamwe bavuze ko kuba Abdelkerim Idriss Déby yagaragaye ari intumwa y'ubutegetsi bwa mukuru we Gen Mahamat Idriss Déby ari ikimenyetso ko “umuryango wa Déby uri kujya neza ku butegetsi”.

    Mbere na nyuma y'urupfu rwa Déby mukuru, havuzwe amakimbirane n'imyiryane mu bahungu be ku bijyanye no kumusimbura.

    Abdelkerim Idriss Déby, w'imyaka 29, mu 2015 yarangije mu ishuri rya gisirikare rya United States Military Academy (USMA) i West Point.

    Mu 2019 yagizwe umuyobozi wungirije w'ibiro bya perezida wa Tchad.

    Mu 2020, yayoboye intumwa za Tchad zoherejwe guhura na Minisitiri w'intebe wa Israel Benjamin Netanyahu ngo baganire ku “kuba bafungura” ambasade ya Chad i Yerusalemu.

    BBC

    Source : http://umuryango.rw/amakuru/mu-rwanda/politiki/article/perezida-kagame-yakiriye-mu-biro-bye-murumuna-wa-perezida-w-inzibacyuho-wa

  • CP John Bosco yaburiye abajura #rwanda #RwOT

    Umuvugizi wa Polisi y'u Rwanda, CP John Bosco Kabera yaburiye abiba ko utarafatwa ari gihe cye kitaragera akangurira abaturage kujya bihutira gutanga amakuru ku gihe.

    Ibi Umuvugizi wa Polisi y'u Rwanda, CP John Bosco Kabera yabitangaje , mu gitondo cyo kuri uyu wa Gatatu tariki ya 5 Gicurasi , ku kicaro cya Polisi mu mujyi wa Kigali mu Karere ka Gasabo, aho polisi yerekaga itangazamakuru abantu 9 bacyekwaho kwiba za televiziyo, mudosabwa n'amatelefoni.

    Muri aba bantu icyenda, batanu nibo bacyekwaho kuba bajyaga mu ngo bakiba bakabizanira abandi bane bakabigura, hafashwe televiziyo 7, telefoni 6 na mudasobwa imwe.

    Gatera Anastase ariyemerera ko we na mugenzi we Nsengimana Donat  bamaze umwaka urenga biba mu ngo z'abaturage mu bice bitandukanye mu Mujyi wa Kigali, avuga ko bari bamaze kwiba televiziyo nini 5(flats).

    Ati' Twabanzaga kunyura ku ngo z'aho turibwibe tukarebera mu idirishya televisiyo batunze, nijoro nka saa cyenda twaragarukaga tukica urugi cyangwa idirishya dukoresheje ibyuma, ntabwo twacukuraga inzu. Nabikoranaga na Nsengimana Donat noneho we agashaka abantu baza kuzigura, twari dufite abakiriya bagera kuri batanu abo nzi ni babiri abandi ni  Nsengimana ubazi.'

    Akomeza avuga ko muri iryo joro  iyo bamaraga kwiba hari umumotari mugenzi wabo bahitaga bahamagara akaza kubatwara n'ibyo bamaze kwiba.

    Gatera avuga ko iyo bamaraga kwiba izo televiziyo bajyaga kuzigurisha uwitwa Kiboge(uyu nawe yamaze gufatwa) izindi bazigurishaga undi ukirimo gushakishwa n'inzego z'umutekano. Gatera avuga ko Televiziyo imwe nini  bayigurishaga guhera ku mafaranga y'u Rwanda ibihumbi 150.

    Akomeza  avuga ko tariki ya 02 Gicurasi yari yibereye mu Karere ka Nyarugenge mu gitondo saa yine abona abantu baje kumufata baramujyana. Aravuga ko yicuza ibyo yakoze asaba abandi bantu biba gukura amaboko mu mifuka bagakora kuko kwiba si byiza.

    Muhoza Vedaste niwe Gatera yita Kiboge, uyu akurikiranyweho kuba ariwe waguze ebyiri muri televiziyo 5 zibwe na Gatera na Nsengimana Danot. Muhoza aremera ko koko izo televiziyo yaziguze ariko azigura atazi ko ari izo bibye, aremera ko hari  umumotari wamuhamagaye amubwira ko hari umuntu ufite televiziyo agurisha.

    Ati'Hari umumotari w'inshuti yanjye wampamagaye ambwira ko hari umuntu ufite akabiri kahombye akaba ashaka kugurisha televiziyo nini(Flats) yakoreshaga muri ako kabari. Naragiye ndazigura mu Karere ka Nyarugenge nzisanga ahantu hari akabari nyuma ziza kuba ibibazo ko ari inyibano none nafashwe.'

    Muhoza avuga ko izo televiziyo yaziguze amafaranga y'u Rwanda ibihumbi 410, imwe yari mu bwoko bwa Sumusung ifite Puse 55 indi yari mu bwoko bwa bwa Sony ifite Puse 43.

    Kamali Patrick ni umuturage wo mu Karere ka Nyarugenge Umurenge wa Nyarugenge mu Kagari ka Kiyovu, avuga  ko nawe yibwe televiziyo nini ifite puse 55 ndetse akaba yayibonye mu zibwe zigafatwa. Yashimiye Polisi y'u Rwanda ku ruhare rwayo mu gukurikirana abacyekwaho kwiba  bakaba bafashwe. Kamali avuga hashize ukwezi abantu bishe idirishya ryo mu cyumba cy'uruganiriro iwe batwara televiziyo yari irimo ndetse na mudasobwa imwe ariko yo ntiraboneka. Avuga ko akimara kwibwa yahise atanga ikirego anabimenyesha Polisi aribwo hatangiye iperereza.

    Umuvugizi wa Polisi y'u Rwanda, Commissioner of Police(CP) John Bosco Kabera yavuze ko bariya bantu 9 bose hari hashize hafi ukwezi bakurikiranwa, byari biturutse ku makuru yatanzwe n'abaturage mu Mujyi wa Kigali bamenyesha Polisi ko bibwe. Yashimiye abaturage batanze amakuru aboneraho no gukangurira abandi kujya bihutira gutanga amakuru kugira ngo hatangire gushakishwa abibye. Yaburiye abagifite ingeso yo kwiba ko utarafatwa nawe ni igihe cye kitaragera.

    CP Kabera ati' Iyo abaturage batanze amakuru turayakurikirana, aba bantu 9 harimo 5 bicyekwa ko bibaga, 4 baracyekwaho kugura ibyo babaga bamaze kwiba. Byumvikane ko utafashwe uyu munsi n'ejo yafatwa,  ni ikibazo cy'igihe gusa, icyo tuba dukeneye ni amakuru. Hibwe nde? yibwe iki? atuye hehe? bamwibye iki? Yibwe ryari? Icyo Polisi ikora ihita ikurikirana abo bajura ikabafata kandi ni kenshi twerekana abafashwe bacyekwaho ubujura ndetse bakabyiyemerera.'

    CP Kabera yongeye kwibutsa abantu biba cyangwa n'undi wese wabitekerezaga ko yabireka kuko nta kintu kiza bazunguka usibye gufatwa bagafungwa. Yavuze ko  ku bufatanye n'abaturage ndetse n'izindi nzego abanyabyaha bose bazajya bafatwa bashyikirizwe ubutabera.

    Source : https://impanuro.rw/2021/05/06/cp-john-bosco-yaburiye-abajura/

  • Inama z’umunsi za Shaddyboo zo gukabya inzozi #rwanda #RwOT

    Shaddyboo ufatwa nk’umwamikazi w’imbuga Nkoranyambaga mu Rwanda, inshuro nyinshi atambutsa ubutumwa kuri izi mbuga nkoranyambaga.

    Bumwe mu butumwa atambutsa buba burimo ubutumwa bwagirira akamaro rubanda ariko hakaba n’ubundi bamwe bafata nk’ubudafite umumaro.

    Mu gitondo cyo kuri uyu wa Kane tariki 06 Gicurasi 2021, Shaddyboo yifashishije Twitter ye, yagiriye inama abantu abibutsa gukora cyane.

    Yagize ati 'Mwese ndabareba mwese hano mufite inzozi, Icyo musabwa ni ugukora cyane kugira ngo mubigereho, kandi muzabigeraho kuko murakaze, kandi ndabashimira kuko munyubaka.'

    Uyu mugore ufite abana babiri, akunze kuvugwaho cyane kubera uburyo akoresha imbuga nkoranyambaga ndetse bamwe bakamutwama gusa we avuga ko azi icyo agamije kandi ko ibyo akora bimubeshejeho.

    Shaddyboo ubu wamamariza Kompanyi z’ubucuruzi zikomeye mu Rwanda, aherutse gusinya amasezerano ya miliyoni 54 Frw yo kwamamaza imwe muri kompanyi y’ubucuruzi kugira ngo ajye ayamamariza.

    UKWEZI.RW

    Source : http://www.ukwezi.rw/Imyidagaduro/article/Inama-z-umunsi-za-Shaddyboo-zo-gukabya-inzozi

  • Perezida Kagame yakiriye umuhungu wa Idriss Deby uherutse kugwa ku rugamba #rwanda #RwOT

    Uyu Abdelkerim Deby Itno umuhungu wa nyakwigendera Idriss Deby Itno, yaje kubonana na Perezida Kagame nk’Intumwa Yihariye n’Umuyobozi w’Ibiro bya Perezida w’Inama y’Igisirikare y’Inzibacyuho muri Chad.

    Ibiro by’Umukuru w’Igihugu bitangaza ko Abdelkerim Deby Itno yakiriwe na Perezida Paul Kagame ku mugoroba wo kuri uyu wa Gatatu tariki 05 Gicurasi 2021.

    Muri Chad bari mu bihe bidasanzwe nyuma y’urupfu rwa Idriss Deby Itno wayiboraga, wapfuye arashwe nyuma y’igihe hamaze gutangazwa ko yatsinze amatora y’Umukuru w’Igihugu muri manda ya gatandatu.

    Nyuma y’urupfu rwe, hahise hashyirwaho akanama k’inzibacyuho ka gisirikare kayobowe Gen Mahamat Idriss Déby akaba umuhungu wa nyakwigendera Idriss Deby Itno.

    Aka kanama k’Abasirikare gaherutse gushyiraho Guverinoma irimo n’abatavuga rumwe n’ubutegetsi muri Chad barimo Acheick Ibn Oumar wahoze ari umukuru w’inyeshyamba wahawe kuyobora Minisiteri y’Ubwiyunge ikaba ari na nshya muri kiriya gihugu.

    Benshi mu batavuga rumwe n’ubutegetsi muri kiriya gihugu bakunze kuvuga ko Igisirikare cya kiriya gihugu cyahonyoye amategeko, bashimye iriya Guverinoma iherutse gushyirwaho kuko ihuriwemo impande zose.

    UKWEZI.RW

    Source : http://www.ukwezi.rw/mu-rwanda/3/article/Perezida-Kagame-yakiriye-umuhungu-wa-Idriss-Deby-uherutse-kugwa-ku-rugamba

  • Chelsea yasezereye Real Madrid, amakipe yo mu Bwongereza ku mukino wa nyuma wa Champions League #rwanda #RwOT

    Ikipe ya Chelsea yaraye isezereye Real Madrid yo muri Espagne muri 1/2 cya Champions League yisanga ku mukino wa nyuma aho izahura na Manchester City nayo yo mu Bwongereza yasezereye Paris Saint Germain.

    Wari umukino Chelsea FC yaraye yakiriye Real Madrid kuri Stamford Bridge, nyuma yo kunganyiriza muri Espagne 1-1, ntabwo yari ifite akazi gakomeye.

    Umutoza Zinedine Zidane wasabwaga gutsinda akagera ku mukino wa nyuma, ntabwo byaje kumworohera kuko uwasabwaga igitego 1 byaje kuba bibi kurushaho ku munota wa 28 ubwo Timo Werner yatsindiraga Chelsea igitego cya mbere ku mupira yari ahawe na Havertz.

    Real Madrid yasatiriye cyane ubona ikina nk’aho ntacyo iramira, ariko ubwugarizi bwa Chelsea n’umunyezamu Mendy babyitwaramo neza, icyizere cya Real Madrid cyayoyotse ku munota wa 85 ubwo Mason Maunt yatsindiraga Chelsea igitego cya kabiri ku mupirabmwiza yari ahawe na Pulisic. Umukino warangiye ari 2-0, Chelsea isezerera Real Madrid ku giteranyo cy’ibitego 3-1.

    Chelsea yakatishije itike yo ku mukino wa nyuma wa Champions League, izahura na Manchester City yasezereye Paris Saint Germain yo mu Bufaransa ku giteranyo cy’ibitego 4-1, umukino wa nyuma uzaba tariki ya 29 Gicurasi 2021.

    Byari ibyishimo kuri Chelsea

    Real Madrid ntiyahiriwe n’uyu mukino

    Source : http://isimbi.rw/siporo/article/chelsea-yasezereye-real-madrid-amakipe-yo-mu-bwongereza-ku-mukino-wa-nyuma-wa-champions-league

  • Inama y'Abaminisitiri yemeje ko ingendo zibujijwe guhera i saa yine z'ijoro #rwanda #RwOT

    Itangazo ry'ibyemezo by'Inama y'Abaminisitiri yateranye kuri uyu wa 05 Gicurasi 2021, ku buryo bw'ikoranabuhanga hubahirijwe amabwiriza yo kwirinda Covid-19, inama ya yobowe na Perezida wa Repubulika, yanzuye ko ingendo zigomba guhagarara ku i saa yine z'ijoro. Iyi nama yanafashe ibindi byemezo bitandukanye.

    Munyaneza Theogene / intyoza.com

    Source : https://www.intyoza.com/inama-yabaminisitiri-yemeje-ko-ingendo-zibujijwe-guhera-i-saa-yine-zijoro/

  • Nyarugenge: Davis D na bagenzi be bitabye urukiko ku nshuro ya mbere urubanza rurasubikwa #rwanda #RwOT

    Umuhanzi Icyishaka David (Uzwi nka Davis D) we ubushinjacyaha bumukurikiranyeho icyaha cyo kuba icyitso mucyaha cyo gusambanya umwana utarageza imyaka y'ubukure Davis D ntabwo yagiye gusuzumwa kuko atasambanye nuwo mwana.

    Me. Esperance Mukamukiga yavuze ko atiteguye kuburana kuko yatinze kubona Dossier ya Icyishaka David yunganira mu mategeko

    Ngabo Richard na Habimana Thierry nabo basabye kutabura kuko abunganizi babo batagaragaye mu rukiko.Ubushinjacyaha buti “kuburana bunganiwe ni uburenganzira bwabo”.

    Inteko y'umucamanza umwe n'umwanditsi w'urukiko niyo yaburanishije uru rubanza yatangiye kuruburanisha Saa sita zuzuye kuko habanje kuburanishwa imanza zaburanishwaga kuri Skype mu rwego rwo kwirinda Covid-19.

    Umucamanza yasabye abaregwa bose guhaguruka bakaza kuburana yahise atangira gusoma imyirondoro yabo.

    Umucamanza yahereye k'uwitwa Ngabo Richard umwirondoro we ugaragaza ko atuye mu kagali ka Kinunga mu murenge wa Gikondo mu karere ka Kicukiro Umujyi wa Kigali.

    Icyishaka David (Alias Davis D) umwirondoro we ugaragaza ko atuye mu kagali ka Muyange umurenge wa Kagarama mu karere ka Kicukiro,Umujyi wa Kigali.

    Habimana Thierry umwirondoro we ugaragaza ko atuye mukagali ka Agatare umurenge wa Nyarugenege akarere ka Nyarugenge umujyi wa Kigali.

    Umucamanza yabajije abaregwa bose niba biteguye kuburana bose bamanikira amaboko rimwe ko batiteguye kuburana umucamanza yahise ababwira ko atabuvumva bose icyarimwe abasaba kuyamanura agenda yumva umwe umwe yahereye kuri Icyishaka David ( Davis D).

    Me Esperance Mukamukiga umwunganira mu mategeko ati “mureke mvuge impamvu tutaburana.”

    Uyu munyamategeko yabwiye umucamanza ko ataburana urubanza atarasoma Dossier neza.Yabwiye urukiko ko ubushinjacyaha bwatinze kumuha Dossier yibyo uwo yunganira aregwa.

    Me Esperance Mukamukiga yanabwiye urukiko ko yamenye ko ari buburane uru rubanza ku mugoroba wo kuri uyu wa 04 gicurasi 2021 ati “murumva ko tutaburana urubanza natwe tutararusoma neza ngo turwumve”.

    Habimana Thierry nawe umucamanza yamuhaye umwanya ngo asobanure impamvu atari burubane mu magambo macye yabwiye umucamanza ko ataburana adafite umwunganira mu mategeko.

    Ngabo Richard nawe niyo mpamvu yahise aha umucamanza ko ataburana adafite umuhagarariye mu rwego rw'amategeko.

    Ubushinjacyaha bwahawe ijambo ngo bugire icyo buvuga ku byari bimaze gusabwa n'abanuranyi ndetse n'ubusobanuro bwatanzwe na Me Esperance Mukamukiga

    Ubushinjacyaha bwahise bubwira urukiko ko ibyo abaregwa bavuze bose basabye babyemererwa n'abamategeko.

    Ubushinjacyaha buvuga ko kuburana bunganiwe biri mu burenganzira bw'abaregwa cyakora busaba urukiko ko urubanza rwakwimurwa nkuko abaregwa babyifuza ariko busaba ko uru rubanza rwashyirwa hafi hashoboka kuko abafunze batari kuburana mu mizi ahubwo bari kuburana ifunga n'ifungurwa ry'agateganyo.

    Umucamanza yahise apfundikira iburanisha avuaga ko uru rubanza ruzasubukurwa kuwa 12 Gicurasi Saambiri za mugitongo kurukiko rwibanze rwa Nyarugenge

    impaka zazamuwe na Habimana Thierry wasabye urukiko ko atafatwa amashusho n'abanyamakuru

    Ubwo abanyamakuru batangiraga gufotora abaregwa uwutwa Habimana Thierry ureganwa na bagenzi be yasabye urukiko ko rwabuza abanyamakuru kumufotora umucamanza ati “wemerewe gufotorwa kuko abari kugufotora urukiko rwabibahereye uburenganzira kandi babyemererwa n'itegeko nshinga iyo banditse basaba gufotora umuburanyi runaka”.

    Umucamanza yahise abwira ababuranyi ko atari umwihariko wabo wo gufotorwa ko ahubwo iyo Ikinyamakuru cyandikiye Perezida w'urukiko gisaba gufotora umuburanyi,ntakabuza umucamanza atanga ubwo burengazira.

    Icyishaka David (Alias Davis D) usanzwe ari umuhanzi ukunzwe hano mu Rwanda, ubushinjacyaha bumukekaho icyaha cyo kuba icyitso mu cyaha cyo gusambanya umwana.Iki cyaha gihanishwa ingingo ya 133 mu gitabo cy'amategeko ahana y'u Rwanda mu itegeko ritaganya ibyaha n'ibihano muri rusange.

    Ngabo Richard we ubushinjacyaha bumukekaho icyaha cyo gusambanya umwana icyi cyaha gihanishwa ingingo yi 133 mugutabo cy'amategeko ahana y'u Rwanda mu itegeko ritegenya ibyaha n'ibihano muri rusange

    Habimana Thierry nawe ubushinjacyaha bumukurikiranyeho icyaha cyo gusambaya umwana.Icyi cyaha gihanishwa ingingo ya 133 mu gitabo cy'amategeko ahana y'u Rwanda mu itegeko riteganya ibyaha n'ibihano muri rusange.

    Icyishaka David ( Davis D) we na bagenzi batawe muri yombi tariki ya 21 na 24 Mata 2021 bamaze iminsi 14 bafungiwe kuri Station ya Police ya Rwezamenyo mu mujyi wa Kigali.

    Umuryango uzakurikirana uru rubanza kugeza umucamanza arufasheho icyemezo cya nyuma….

    Source : http://umuryango.rw/amakuru/mu-rwanda/ubutabera/article/nyarugenge-davis-d-na-bagenzi-be-bitabye-urukiko-ku-inshuro-ya-mbere-urubanza

  • Isaha yo kugera mu rugo yagizwe Saa Yine mu g… – #rwanda #RwOT

    Imyanzuro yafatiwe muri iyi nama iratangira gushyirwa mu bikorwa kuri uyu wa Kane tariki 06 Gicurasi 2021 kugeza ku ya 31 Gicurasi 2021. Mu myanzuro yafashwe harimo ingingo ivuga ko isaha yo kugera mu rugo ari saa Yine z’ijoro. Iyo ngingo iragira iti “Ingendo zirabujijwe guhera saa yine z’ijoro kugeza saa kumi za mu gitondo. Ibikorwa byose byemerewe gukomeza bizajya bifunga saa tatu z’ijoro. Ingendo zibujijwe guhera saa Moya z’ijoro kugeza saa kumi za mu gitondo mu turere tw’Intara y’Amajyepfo twa Ruhango, Nyanza, Huye, Gisagara, Nyaruguru na Nyamagabe”.

    Inama y’abaminisitiri yemeje kandi ko ingendo hagati y’Umujyi wa Kigali n’Intara ndetse no hagati y’uturere dutandukanye tw’igihugu, zizakomeza. Imyanzuro myinshi ku bikorwa byemerewe gukomeza gukora no gutanga serivisi n’uburyo bigomba gukorwamo bihuye n’ibyemejwe mu nama y’ubushize. Abaturarwanda basabwe gukomeza kwirinda Covid-19 bubahiriza amabwiriza yo kwirinda iki cyorezo harimo: gusiga intera hagati y’umuntu n’undi, kwambara agapfukamunwa no gukaraba intoki. Bibukijwe ko “Abatazabyubahiriza bazafatirwa ibihano”.

    Imyanzuro y’inama y’Abaminisitiri yo kuri uyu wa Gatatu 

    Source : https://inyarwanda.com/inkuru/105362/isaha-yo-kugera-mu-rugo-yagizwe-saa-yine-mu-gihugu-hose-uretse-mu-turere-6-twamajyepfo-men-105362.html