Author: webrwanda

Bamwe mu baganiriye na IGIHE, bemeza ko muri aka karere ka Musanze hari abagabo bafite abagore barenze umwe kandi ko ari kimwe mu biteza amakimbirane yo mu miryango akigaragara muri aka karere.

Uwamahoro Claudine w’abana barindwi yagize ati “Nk’ubu njye twabyaranye abana barindwi mu myaka 15 tumaranye ariko tutarasezeranye. Ntiyari kunta ngo ajye gushaka uwo wundi na we bamaze kubyarana abana barindwi ngo yibagirwe kujya anahahira abana be ngo ni uko tutasezeranye. None se nabona icyo kubagaburira nkanabona amafaranga y’ishuri ryabo?”

Mukamana Florence w’abana batanu we avuga ko abana be n’aba mukeba we bahora bashyamiranye kubera imitungo.

Ati “ Umugabo yaramparitse tumaranye imyaka 20 ajya gushaka undi kandi dufitanye abana icyenda. Ubu rero ikibazo gihari ni uko bahora bapfa imitungo umwe ngo hano ni mu kwanjye n’undi ngo ni mu kwanjye. Aba avuga ngo agiye gushaka undi, ubu se murabona atari ikibazo?”

Mukamana Nadège w’imyaka 56 ufite abana umunani. Ahamya ko kuva umugabo we yamuharika hari nshingano nyinshi yirengagije atacyuzuza kandi zimureba.

Ati “None se wavuga ko ubayeho neza umugabo ataguhahira ari wowe wirirwa ujya guhigira abana icyo barya? Umugabo yashatse undi ubu amaze kumubyarira abana batandatu, wenda ibyo simbyanze ariko ikibazo ni uko atajya yibuka ko nanjye namubyariye ngo abahahire. Ni ukuza aje gutongana gusa.”

Meya w’Akarere ka Musanze, Nuwumuremyi Jeannine, na we yemeza ko iki kibazo cy’abantu bamaze igihe babana n’abagabo batasezeranye gihari, kandi ko gihangayikishije.

Ati “ Icyo kibazo kirahari ariko abenshi batasezeranye baje no guharikwa ni abakuze baba barasezeranye mbere bakabyarana hari n’imitungo bashakanye. Abo nibo turi kugenda dufasha kugira ngo basezerane n’ubwo baba bakuze, tubabwira ko bagomba gushaka umugore umwe kandi bagasezerana kugira ngo tutazagwa muri ibyo bibazo abakuze bari kugaragaza.”

Meya Nuwumuremyi yasabye abaturage ko umugabo aba agomba kugira umugore umwe n’umugore na we agashaka umugabo umwe kandi bagasezerana kubera ko iyo bashaje batarasezeranye biba ikibazo kuri bo no ku bana babo, no ku gihugu muri rusange.

Abagore baharitswe muri Musanze bagaragaje ko bibagiraho ingaruka zirimo no kurera abana bonyine

Mu itangazo Ambasade ya Amerika mu Rwanda yashyize ahagaragara kuri uyu wa 21 Gicurasi 202, yavuze ko iyo mashini igendanwa ifite agaciro ka miliyoni 44 Frw, izatanga ubufasha bwihuse mu kongera ubushobozi bw’ibitaro bwo gusuzuma no kuvura abarwayi ba COVID-19, muri ibi bihe Akarere ka Karongi gakomeje guhangana n’icyorezo.

Ambasaderi wa Leta zunze Ubumwe za Amerika mu Rwanda, Peter H. Vrooman, wari uyoboye itsinda ryajyanye iyo mashini i Karongi yavuze ko ubufatanye bw’icyo gihugu n’u Rwanda bukiza ubuzima bwa benshi.

Yagize ati “Amerika n’u Rwanda bifite ubufatanye bukomeye mu bikorwa bijyanye n’ubuzima rusange kandi bufasha mu gukiza ubuzima bwa benshi; tukaba twizera ko iyi mashini igezweho izifashishwa aho ikenewe cyane hose.”

Byitezwe ko iyo mashini izafasha Ishami rishinzwe abarwayi b’indembe (ICU) kuri ibyo bitaro.

Umuyobozi w’Akarere ka Karongi, Mukankusi Vestine, yavuze ko iyo mashini izafasha kurushaho mu kunoza serivisi z’ubuzima ku batuye mu Ntara y’Uburengerazuba bose.

Ati “Twishimiye cyane kwakira iyi mashine ya X-ray ivuye muri Ambasade ya Amerika. Izafasha ibitaro bya Kibuye gutanga serivisi z’ubuzima zinoze kurushaho ku barwayi bo mu Ntara y’Uburengerazuba bose.”

Usibye gufasha gusuzuma abarwayi ba COVID-19, X-ray izanafasha mu gusuzuma izindi ndwara z’ubuhumekero no kugeza ubufasha ku barwayi barembye mu gihe gikwiriye.

Hatangajwe ko ari iya mbere ije ikaba izakurikirwa n’izindi zizahabwa ibitaro bitandukanye mu Rwanda ku nkunga ya Minisiteri y’Ingabo ya Amerika, binyujijwe mu Kigo cya Gisirikare cya Amerika gikorera muri Afrika (AFRICOM), ku bufatanye n’Ikigo cya Leta Zunze Ubumwe za Amerika gishinzwe Ubutabazi (US OHDACA).

Nyuma yo gutanga imashini Ambasaderi Vrooman yanajyanye n’abahagarariye ibigo nderabuzima n’ubuyobozi bw’ibanze gusura inyubako nshya yakiririrwamo indembe ku bitaro bya Kibuye.

Uretse iyi mashini yatanzwe, Ikigo cya Amerika gishinzwe Iterambere Mpuzamahanga (USAID) cyateye inkunga ibitaro bya Rwamagana, Kibungo na Nyagatare mu kurwanya COVID-19 kinatanga imashini zongerera abarwayi umwuka ku bitaro bya Kibuye.

Ni ibikorwa byose biva mu nkunga yatanzwe umwaka ushize ya miliyari imwe y’amafaranga y’u Rwanda.

Imashini yatanzwe uyu munsi ni imwe mu nkunga Leta ya Amerika yahaye u Rwanda irenga miliyari 17 Frw yashowe mu bikorwa byo kurwanya COVID-19 mu Rwanda kuva muri Werurwe 2020.

Iyi nkunga yafashije kandi kubaka ubukarabiro bw’intoki hirya no hino mu gihugu, ifasha mu itumanaho rusange rikangurira abaturage kwirinda COVID-19, guhugura abakozi, gukurikirana abarwayi, ibikoresho byo muri laboratwari; imashini zongerera abarwayi umwuka, izifashishwa mu gukurikirana abarwayi, ibitanda by’abarwayi, kubaka ibyumba bifasha indembe, ibikoresho bifasha mu kwirinda indwara zandura, imiti, amasabune n’ibikoresho birinda abaganga n’abaforomo kwandura.

Imashini yatanzwe ifite agaciro ka miliyoni 44 Frw

Ambasaderi wa Leta Zunze Ubumwe za Amerika mu Rwanda, Peter H. Vrooman, yavuze ko ubufatanye bw’icyo gihugu n’u Rwanda bukiza ubuzima bwa benshi

Nk’uko bisanzwe ko Polisi igenzura iyubahirizwa ry’amabwiriza yo kwirinda Covid-19, ku gicamunsi cyo kuri uyu wa Gatanu tariki 21 Gicurasi 2021 guhera saa munani kugeza saa kumi n’imwe, mu Mujyi wa Musanze hari hamaze gufatwa abantu 50 barimo abatambaye agapfukamunwa n’abakambaye nabi, bajyanwa muri Stade kwigishwa no gucibwa amande.

Umuyobozi w’Akarere ka Musanze, Nuwumuremyi Jeannine, yasabye abaturage kutirara na gato kuko byashyira ubuzima bwabo mu kaga ndetse bigasubiza inyuma intambwe yari imaze guterwa mu kwirinda iki cyorezo.

Ati “Ingamba zo kwirinda Covid-19, zirakomeje kuko yo iracyahari kandi ihitana n’ubuzima bw’abantu murabibona, turasaba abaturage kutirara na gato bubahirize amabwiriza yatanzwe kuko iyo bitubahirijwe dushiguka icyorezo cyakwirakwiye bigatwara imbaraga nyinshi mu kukirwanya ndetse kigatwara n’ubuzima bw’abaturage.”

“Ntabwo tuzemera ko dutsindwa kubera uburangare bwagaragara, ingamba zirazwi uzirenzeho turamwigisha ariko tukanabahana kuko abenshi barabizi ni uko haba habayeho kudohoka kandi ntawe tuzemerera ko adusubiza inyuma ku ntambwe zo kwirinda twari tugezeho.”

Mu mpera za 2020 no mu ntangiriro z’uyu mwaka, Akarere ka Musanze kari mu bihe bidasanzwe kubera ubwiyongere bw’ubwandu.

Mu Mujyi wa Musanze haracyagaragara abantu batambaye udupfukamunwa