Author: webrwanda

Yabitangaje ku wa Gatanu tariki ya 18 Kamena 2021, mu ruzinduko rw’umunsi umwe yagiriye muri Kaminuza y’u Rwanda ishami rya Nyagatare akagirana ibiganiro n’abahagarariye abanyeshuri ndetse n’abarezi kugira ngo amenye ibibazo bihari.

Baganiriye na Minisitiri w’Uburezi uburyo bwo gukemura ibibazo byugarije iyi Kaminuza

Uwamahoro Dorcas, umunyeshuri mu mwaka wa kabiri mu ishami ry’Ubumenyi bw’Isi, Ubukungu n’Uburezi avuga ko ubuke bwa mudasobwa butuma batsindwa amasomo kuko amasomo menshi bayiga mu buryo bw’ikoranabuhanga.

Ati “Kuva twaza mu mwaka wa mbere, nta mudasobwa twigeze tubona kandi amasomo menshi tuyiga mu buryo bwa E-learning bidusaba gukoresha mudasobwa cyane, bituma dutsindwa amwe mu masomo.”

Ikindi ni uko ngo no kubona internet ari ikibazo kuko itari mu mashuri yose y’iyi kaminuza.

Dukeshimana Patient, umunyeshuri mu mwaka wa gatatu mu buvuzi bw’amatungo, avuga ko mudasobwa z’ishuri ari nkeya ugereranyije n’umubare w’abanyeshuri baba bazikeneye.

Ikindi ngo ni ikibazo cy’ibyumba by’amashuri ku buryo abanyeshuri biga mu byiciro bibiri.

Agira ati “Ibyumba by’amashuri ni bikeya, umubare munini w’abanyeshuri uhari ntuhura n’ibyumba bihari ku buryo abanyeshuri biga mu byiciro bibiri, bamwe igitondo abandi ikigoroba.”

Minisitiri w’Uburezi Dr. Valentine Uwamariya avuga ko bizejwe n’ubuyobozi bwa Kaminuza ko isoko ryo kugeza Internet mu mashuri atayifite ryatanzwe bityo mu minsi ya vuba kiba cyakemutse.

Naho ku kibazo cya mudasobwa ngo Minisiteri irimo kuvugana na BRD ku buryo ikibazo cyakemuka vuba.

Ku bijyanye n’inyubako, Minisitiri w’Uburezi Dr. Valentine Uwamariya yavuze ko na cyo barimo kuvugana na Kaminuza uburyo cyakemuka.

Ati “Bavuzemo inzu y’ibitabo ikeneye kongerwa buriya si na yo gusa kuko n’ibitabo bijyanye n’amasomo atangirwa hano na byo birakenewe, ahanini ku banyeshuri biga uburezi baza hano benshi, hari igikoni, byose bigomba gushyirwa muri gahunda ya Kaminuza y’u Rwanda nk’ibyihutirwa.”

Akomeza agira ati “Ikibazo cya Internet kigomba kwihutishwa kigakemurwa kuko niba tuvuga kwiga dukoresheje ikoranabuhanga, iyo internet na mudasobwa bidahari n’ubundi ntacyo twaba turi gukora.”

Kuri iki Cyumweru mu mujyi wa Kigali habereye isiganwa mpuzamahanga ryitiriwe amahoro rizwi nka “Kigali International Peace Marathon”, aho abanyarwanda babonye imidali mu gice cya Marathon (Half Marathon).

Kubera icyorezo cya COVID-19 umubare w’abitabiriye wari muto ugereranyije n’ibihe byashize

Mu bagabo basiganwe igice cya Marathon kireshya n’ibilometero 21, Nimubona Yves mu ikipe ya APR Athletics Club ni we wegukanye umwanya wa mbere, aho yakoresheje isaha imwe, iminota itatu n’amasegonda 38.

Nimubona Yves yegukanye umudali wa zahabu

Abanya-Kenya bakunda kwiharira ibihembo muri iri rushanwa, nib o bakurikiye Nimubona Yves, aho ku mwanya wa kabiri haje Kimining Shadrack Korir naho ku mwanya wa gatatu haza mugenzi we Joel Mwangi Maina.

Muhitira Félicien wahabwaga amahirwe nawe yo kuba yakwegukana iri siganwa, yaje ku mwanya wa kane. Umunyarwanda Kajuga Robert we yaje ku mwanya wa gatandatu, Mutabazi Emmanuel aba uwa karindwi, Sebahire Eric aba uwa munani, naho Nsabimana Jean Claude za ku mwanya wa 10.

Mu cyiciro cy’abagore nabo basiganwe igice cya Marathon, Yankurije Marthe ukinira APR AC, ni we waje ku mwanya wa mbere akoresheje isaha imwe, iminota 15 n’amasegonda arindwi.

Yankurije Marthe wabaye uwa mbere mu bagore

Ku mwanya wa kabiri haje Musabyeyezu Adeline wakoresheje isaha imwe, iminota 16 n’amasegonda 28, ku mwanya wa gatatu haza umunya-Kenya Edna Jorono Kimitei.

Minisitiri wa Siporo Munyangaju Aurore Mimosa yatangije isiganwa ndetse aranaryitabira

Muri Marathon yuzuye (Full Marathon) ya Kilometero 42, ku mwanya wa mbere mu bagabo haje umunya-Ethiopia Kindie Dersehwakoresheje amasaha abiri, iminota 23 n’amasegonda 29.

Ku mwanya wa kabiri haje umunya-Eritrea Berhane Hidru wakoresheje amasaha abiri, iminota 23 n’amasegonda 31, naho ku mwanya wa gatatu haza umunya-Ethiopia Meseret Dekebo wakoresheje amasaha abiri, iminota 23 n’amasegonda 33.

Utu turere dufite umwihariko wo kuba abadutuye boroherwa no gukora ubucuruzi bwambukiranya imipaka no kubyaza umusaruro Ikiyaga cya Kivu binyuze mu musaruro w’ibinyabuzima bikirimo cyangwa ubukerarugendo bugishingiyeho kubera abagisura.

Rusizi na Rubavu kandi binasangiye kuba biri mu mijyi itandatu iri kubakwamo ibikorwa remezo biyifasha kunganira Kigali. Utu turere twiyongera kuri Muhanga, Huye, Musanze na Nyagatare

Gahunda yo kubaka imijyi yunganira uwa Kigali yashyizweho mu Mwiherero w’Abayobozi wo mu 2010, igamije gufasha abaturarwanda kubona serivisi z’ingenzi bakenera bitabasabye kuzishakira mu Murwa Mukuru w’Igihugu.

Umujyi wa Rusizi uri mu imaze guhindurwa ndetse washyizemo ibikorwa remezo by’ibanze bifasha abawutuye n’abawugenda kubona ibyo bakeneye.

Binyuze mu mushinga wo guteza imbere Imiturire igezweho mu gihugu (Rwanda Urban Development Project-RUDP), watewe inkunga na Guverinoma na Banki y’Isi, Rusizi yatangiye gusirimuka.

Kuva mu 2016 kugeza mu 2021, hubatswe imihanda na ruhurura zitandukanye hagamijwe koroshya ubuhahirane bw’abagenda i Rusizi. Mu cyiciro cya mbere cy’uyu mushinga cyasojwe mu 2018, aka karere kubatswemo imihanda ya kaburimbo ya kilometero 5.09 ifite agaciro ka miliyari 5 na miliyoni 444 Frw mu gihe ruhurura zo zireshya na kilometero 1.854 zatanzweho asaga miliyoni 139 n’ibihumbi 958 Frw.

Mu cyiciro cya kabiri kizasozwa muri Nyakanga 2021, i Rusizi hubatswe imihanda ya kilometero 5,7 yashowemo asaga miliyari 6 na miliyoni 529 Frw na ruhurura za kilometero 1,168 zatanzweho asaga miliyoni 344 n’ibihumbi 776 Frw.

Imihanda yubatswe yiganje mu duce dutuyemo abantu benshi, iduhuza n’umujyi ndetse n’ahari ishoramari ritandukanye ririmo n’irishingiye ku bukerarugendo.

Asuma Sauda ucururiza butike ku Ryakabiri muri Cité mu Mujyi wa Kamembe, yavuze ko umuhanda wubatswe muri aka gace wazanye impinduka mu bushabitsi bwe.

Ati “Habaye heza cyane. Twarishimye, nubwo imihanda yatinze ariko igihe cyarageze iruzura. Mbere imvura yaragwaga ntidusohoke. Hano hari hameze nabi cyane.’’

Yavuze ko nyuma y’iyubakwa ry’imihanda mishya no kuyicanira, abagana aka gace bitinyutse birushijeho.

Muri Cité ho mu Mujyi wa Kamembe harasirimutse. Aka gace gatuwe n’umubare munini w’Abayisilamu kagenewe gukorerwamo ubucuruzi nk’uko biteganywa n’igishushanyo mbonera cya Rusizi

Umuyobozi wa Centre Pastorale Inshuti, Padiri Bapfakurera Benjamin, yavuze ko uko imyaka yashize iterambere rya serivisi za hoteli ryazamutse.

Yagize ati “Hoteli yatangiye gukora mu 2012, nta bikorwa remezo byari bihari. Kuhagera byari bigoye. Nyuma yo kubona umuhanda, iterambere rigenda riza kandi abakiliya bakabyishimira.’’

Nyuma yo kubakirwa umuhanda mu 2018 hongerewe umubare w’ibyumba by’abakirwa muri iyi hoteli y’inyenyeri eshatu kuko mbere hakirwaga abantu nka 15 mu ijoro ariko ubu bazamutse bagera kuri 60.

Umuyobozi wungirije ushinzwe Ubukungu mu Karere ka Rusizi, Kankindi Leoncie, yavuze ko ibikorwa remezo by’imihanda bikenewe.

Ati “Ibi birafasha umujyi gukura kandi neza. Aho imihanda inyuze biha agaciro ubutaka kandi umujyi ukagenda ukura. Bituma tubona abashoramari kuko haragendeka, hanasa neza.’’

Rusizi ifite amahirwe yo gukora ku mipaka ibiri irimo uw’u Burundi na RDC, amahirwe y’ubukerarugendo bunyuze muri Nyungwe, aho Umwami Musinga yaciriwe i Kamembe, Ikiyaga cya Kivu n’ibindi byakurura abakerarugendo.

Imihanda mishya yubatswe mu Karere ka Rusizi iteye amabengeza. Uyu uva kuri Centre Pastorale Inshuti werekeza ku Mupaka wa Rusizi uhuza u Rwanda na RDC

  Rubavu imaze kugwiza amahirwe y’ishoramari

Rubavu ibitse amahirwe atabarika y’ishoramari rishingiye ku buhahirane n’ubucuruzi bwambukiranya imipaka ya Gisenyi na Goma yo muri Repubulika Iharanira Demokarasi ya Congo ndetse n’ubukerarugendo.

Aya mahirwe yarushijeho kugira icyerekezo kizima bitewe n’ibikorwa byegerejwe abaturiye aka karere.

Mu bikorwa remezo byubatswe muri Rubavu, mu cyiciro cya mbere, hakozwe imihanda ya kilometero 3.894 yatwaye 3.736.444.165 Frw na ruhurura za metero 851 zatwaye miliyoni 528.625.476 Frw. Mu cya kabiri ho hubatswe imihanda ya kilometero 5.89 na ruhurura za kilometero 5.87 zatanzweho 6.080.011.085 Frw.

Abacururiza mu Mudugudu w’Ihumure, Akagari ka Mbugangari mu Murenge wa Gisenyi, bavuga ko borohewe kuko ingendo zihuza uduce dutandukanye ndetse binihutisha ubwikorezi bw’abantu n’ibintu.

Byukusenge Philémon w’imyaka 24 yavuze ko mbere washoboraga gutwara kawunga utanze 100 Frw ariko ubu igiciro cyabaye 50 Frw.

Yagize ati “Amafaranga yari ahari. Imbogamizi zihari ni ibihe turimo [byo guhangana na Coronavirus]. Washoboraga gucuruza nk’ibihumbi 500 Frw, mu gihe gito ukaba ubonye miliyoni 1 Frw. ’’

Mbarushimana Vianney umaze imyaka umunani ari umusuderi, yavuze ko ahageze umuhanda agaciro kaho kiyongera. Ati “Abubaka baba benshi natwe tukabona ibiraka byo gusudira ibikoresho.’’

Imijyi ya Rubavu na Rusizi umunsi ku wundi izamurwamo inyubako zigezweho zirimo iz’ubucuruzi n’amahoteli afasha abayigana kuryoherwa n’igihe bahamara.

Umushinga wo kubaka ibikorwa remezo mu mijyi yunganira Kigali watangiye muri Kamena 2016, mu cyiciro cyawo cya mbere hagati ya Nyakanga 2016 n’Ugushyingo 2018, hubatswe imihanda ya kilometero 28,3 na ruhurura zireshya na kilometero 13.3; yatwaye miliyoni 28$. Icya kabiri cyubatswemo imihanda ya kilometero 43.69 na ruhurura za kilometero 12.015, cyatangiye mu Ukuboza 2018, kizasozwa muri Nyakanga 2021.

Rusizi ifite amahirwe menshi y’ishoramari

Aho imihanda igeze n’irindi terambere riranyaruka. Rusizi iri mu turere twatangiye guhinduka neza

Umuhanda uva ku Karere ka Rusizi ugana mu byerekezo bitandukanye birimo ahari ikigo cya gisirikare [unyuze ibumoso] n’undi werekeza kuri Stade ya Rusizi [yahoze yitwa Kamarampaka] na Gereza Nkuru ya Rusizi

Kivu Marina Bay ni yo hoteli ifite inyenyeri nyinshi [enye] mu Karere ka Rusizi

Centre Pastorale Inshuti ni hoteli y’inyenyeri eshatu iherereye ahazwi nko ku Kacyangugu

Imihanda mishya yubatswe mu Karere ka Rusizi iteye amabengeza. Uyu uva kuri Centre Pastorale Inshuti werekeza ku Mupaka wa Rusizi uhuza u Rwanda na RDC

Umuyobozi wa Centre Pastorale Inshuti, Padiri Bapfakurera Benjamin, yavuze ko iterambere rya serivisi za hoteli ryazamutse nyuma yo kwegerezwa ibikorwa remezo by’imihanda n’amashanyarazi

Uri muri Centre Pastorale Inshuti aba yitegeye ubwiza bw’Ikiyaga cya Kivu, anumva amahumbezi agiturukamo

Umuhanda uva mu Gatandara ugana ku Mupaka wa Rusizi I watunganyijwe neza, ushyirwamo kaburimbo. Aka gace gakorerwamo ubucuruzi bwiganjemo ubwambukiranya umupaka

Vive Hotel and Apartments ifite inyenyeri ebyiri ibarizwa mu Karere ka Rusizi hafi y’Ikiyaga cya Kivu ahazwi nko mu Budiki

Asuma Sauda ucururiza butike ku Ryakabiri yavuze ko nyuma yo kubakirwa imihanda mishya, ubuzima bwarushijeho koroha

Isoko rya kijyambere rya Kamembe ryubatse mu mujyi rwagati

Mu Mujyi wa Kamembe hazamurwa inyubako zitandukanye zijyanye n’iterambere ryifuzwa

Imihanda yakozwe ku bwinshi. Aha ni imbere y’Umurenge wa Gihundwe ahazwi nko ku Gatolika ku muhanda uva ku Cyapa, ukanyura ku Bitaro bya Gihundwe no ku Badive

Umuyobozi wungirije ushinzwe Ubukungu mu Karere ka Rusizi, Kankindi Leoncie, yavuze ko ibikorwa remezo by’imihanda bifasha mu kureshya abashoramari

Rubavu ni umujyi ubereye ubucuruzi n’ubukerarugendo

Nishimwe Marie Jeanne ukorera ubucuruzi ahazwi nka Mbugangari yavuze ko ubwikorezi bw’ibicuruzwa bworoshye kuko imodoka zisigaye zibageraho bwangu

Mbarushimana Vianney w’imyaka 52 akaba amaze umunani ari umusuderi yavuze ko ahageze umuhanda agaciro kaho kiyongera ndetse n’akazi kakaboneka

Byukusenge Philémon w’imyaka 24 yavuze ko mbere yo kwaduka kwa Coronavirus, imikorere yari myiza ariko iza kudindizwa n’iki cyorezo

Mu Karere ka Rubavu hakomejwe kubakwa ibikorwa remezo by’imihanda ifasha mu buhahirane

Ahazwi nka Byahi muri Rubavu hamaze guhinduka agasantere kihagazeho nyuma yo guhabwa umuhanda wa kaburimbo

Imihanda yo mu Karere ka Rubavu yangijwe n’imitingito yakurikiye iruka ry’Ikirunga cya Nyiragongo igiye gutangira gusanwa

Abakoresha ibinyabiziga batangiye gukoresha imihanda yubatswe mu mijyi yunganira uwa Kigali

Amafoto: Niyonzima Moïse

Ibi bikorwa biri mu cyerekezo cyo guhanga imirimo mishya idashamikiye ku buhinzi no kugabanya abashakira ubuzima mu Mujyi wa Kigali.

Muri gahunda y’Igihugu y’Iterambere [NST1], u Rwanda rwihaye intego ko mu 2024, Abanyarwanda 30% bazaba batujwe mu mijyi.

Mu gutegura iyi mijyi hubatswe ibikorwa remezo byiganjemo imihanda, izafasha mu kunoza ubwikorezi bw’abantu n’ibintu nk’iby’ibanze mu kuzamura ubukungu.

Imijyi yunganira uwa Kigali irimo Muhanga, Huye, Rusizi, Rubavu, Musanze na Nyagatare. Yashowemo miliyoni 100$ hubakwa imihanda na ruhurura zitandukanye.

Muri uyu mushinga watangiye muri Kamena 2016, mu cyiciro cyawo cya mbere hagati ya Nyakanga 2016 na Ugushyingo 2018, hubatswe imihanda y’ibilometero 28,3 na ruhurura zireshya n’ibilometero 13.3; yatwaye miliyoni 28$. Icya kabiri cyubatswemo imihanda ireshya na kilometero 43.69 na ruhurura za kilometero 12.015, cyatangiye mu Ukuboza 2018, kizasozwa muri Nyakanga 2021.

Byiyongeraho ibyo kuvugurura utujagari two mu Mujyi wa Kigali mu duce twa Biryogo ahazwi nko mu Agatare ahangana na hegitari 12,46, Kiyovu kuri hegitari 20,1 na Rwampara kuri hegitari 26,42.

Ibi bikorwa byatangiye kubyazwa umusaruro mu gukomeza gufasha abaturage koroherwa no kubona izo serivisi bakenera mu buzima bwa buri munsi.

Ni gahunda itari iy’ubwikorezi gusa ahubwo igamije guteza imbere umujyi mu ngeri zose cyane ko aho umuhanda ugeze ubuzima buhinduka, amazi akahagera n’amashanyarazi akaba hafi aho.

Nyuma y’ibyiciro bibiri byakozwe muri uyu mushinga wo guteza imbere Imiturire igezweho mu gihugu (Rwanda Urban Development Project-RUDP), hagiye gutangizwa icya gatatu n’icya kane bizibanda ku kubaka imihanda mu mijyi yunganira Kigali.

Uyu mushinga wose washyizwemo arenga miliyari 160 Frw, azakoreshwa mu kuvugurura no gushyiraho ibikorwa remezo bibereye imijyi itandatu no kuvugurura utujagari two muri Kigali hashyirwaho ibikorwa remezo binyuranye byiganjemo imihanda na ruhurura bigezweho.

Muri uyu mushinga uri gukorerwa inyigo ya nyuma hanarebwa ahazanyuzwa ibyo bikorwa remezo, hazubakwa imihanda, gukora inzira z’abanyamaguru na za ruhurura no gucanira imihanda.

  Kigali yahaye umwihariko utujagari no kubungabunga ibishanga

Muri Kigali biteganyijwe ko hazubakwa umuhanda n’ibindi bikorwa hafi na Mpazi iherereye mu Mirenge ya Gitega, Kimisagara na Rwezamenyo yo muri Nyarugenge ndetse hanashyirwe ibikorwa remezo bigamije guca intege utujagari two mu Gatenga muri Kicukiro, Nyabisindu mu Murenge wa Remera na Nyagatovu mu wa Kimironko mu Karere ka Gasabo.

Ahantu hazatunganywa kuri Mpazi hangana na hegitari 137, Gatenga [171ha], Nyabisindu [36.5ha] na Nyagatovu [40ha].

Muri miliyari 160 z’amafaranga y’u Rwanda, Umujyi wa Kigali wagenewe miliyoni 40.2$, mu bikorwa bizatangira mu mwaka w’ingengo y’imari ya 2021-2022.

Mu bindi bizakorwa harimo no gutunganya neza Igishanga cya Gikondo cyahoze ari Icyanya cy’Inganda n’utundi duce twibasirwa n’imyuzure turimo Kinamba, Rugunga, Rwandex-Majerwa, Mulindi, Masaka na Gacuriro.

Ibikorwa byo gusazura igishanga cya Gikondo n’icya Kibumba bifite agaciro ka miliyoni 12.43$. Muri Kigali gusa ubuso buriho ibishanga bungana na kilometero kare 77.

Minisitiri w’Ibikorwa Remezo, Amb. Gatete Claver, yabwiye itangazamakuru ko kugenzura imyuzure ari ingenzi kuko bifasha kubungabunga ibirimo imihanda yubatswe.

Ati “Nta bidukikije, imihanda yacu yahita yangirika, tekereza nk’imvura iguye, amazi yose ava Mont Kigali, Jali, Rebero, uko agera hasi, niba ntacyo ukoze iyo mihanda izangirika. Niba amazi ava Magerwa i Gikondo, iyo utayahaye inzira ku buryo ashobora kugenda bizateza umwuzure.’’

Yavuze ko u Rwanda nk’igihugu cy’imisozi, kigomba kugira ingamba zo kubungabunga amazi kuko bidakozwe yakwangiza ibikorwa remezo.

Ati “Ni yo mpamvu muri iki cyiciro hazatunganywa Gikondo Industrial Park nk’ahahurira amazi menshi. Tugomba guhera ku musozi tuyaha icyerekezo kizima ku buryo imvura ni yo yagwa bitahungabanya ibindi bikorwa remezo.’’

Minisitiri Gatete yavuze ko kubaka imihanda mu duce tw’utujagari bitagamije kwimura abaturage ahubwo ari uburyo bwo kubegereza ibikorwa remezo by’ingenzi.

Ati “Ntidushaka kuvana abantu mu mijyi ngo twubake imihanda. Icyo dushaka ni uguha agaciro ibyo bakoraga. Mwabonye ko muri Kigali twashyizemo imihanda [Biryogo] ariko abantu bakomeza kuguma aho bari batuye. Bariya bantu barakenewe mu mujyi, bakora akazi kanyuranye.”

Icyiciro cya kabiri cy’uyu mushinga (RUDP II) kizashyirwa mu bikorwa hagati ya Nyakanga 2021 na 2025. Kugeza ubu hatangiye kubarurwa imitungo ishobora kwangizwa n’imirimo iteganyijwe gukorwa.

Minisitiri w’Ibikorwa Remezo, Amb. Gatete Claver, yashimangiye ko Leta ishaka kuzamura agaciro k’ibikorwa remezo no guteza imbere abaturage

Abatuye mu Rwabuye mu Karere ka Huye mu mwaka utaha w’ingengo y’imari na bo bazaba bagendera ku muhanda w’umukara. Aka gahanda kanyura ni ko kazashyirwamo kaburimbo guhera muri Nzeri 2021

Imihanda ya Rwampara mu Mujyi wa Kigali yatangiye guhindura isura y’aka gace karimo akajagari. Bamwe batangiye guhabwa ibyangombwa byo kuvugurura inyubako zabo

Mu Mudugudu wa Kiberinka mu Kagari ka Mumena hari kubakwa umuhanda mushya. Abatuye aka gace bishimira ko bawegerejwe wari ukenewe cyane

Mu mishinga iteganyijwe mu cyiciro cya gatatu, muri Nyagatare hazubakwa imihanda irimo uwa Kinihira uzaba ureshya n’ibilometero bine na metero 500. Mu karere hose hazubakwa imihanda ya 6,7 Km

Umuhanda unyura ku Murenge wa Rugerero ugahinguka mu Mujyi wa Rubavu uri mu izashyirwamo kaburimbo

Aka gasantere ka Buhuru muri Rugerero mu minsi ya vuba kazaba kashyizwemo kaburimbo

Uyu muhanda uri ahazwi nk’i Gihundwe ugana i Murangi uri mu izakorwa mu Karere ka Rusizi

Uyu muhanda uzanyura neza kuri ADEPR Gihundwe, aho iri torero ryavukiye

Abatuye muri Nyabisindu mu Karere ka Gasabo mu minsi iri imbere bazaba bafite kaburimbo hafi yabo

Nyabisindu iri mu cude twatoranyijwe mu tuzashyirwamo kaburimbo kugira ngo abahatuye bafashwe kwiteza imbere

Iki kiraro gihuza Nyabisindu na Nyagatovu kiri mu bizatunganywa neza mu kurushaho koroshya imigenderanire n’ubuhahirane

Amafoto: Niyonzima Moïse

Junior Chamber International ni umuryango mpuzamahanga ukorera mu bihugu bisaga 115. Mu Rwanda watangiye muri 2005 ndetse urubyiruko rugera kuri 200 nirwo rubarizwamo kugeza ubu.

Mu ruzinduko rw’iminsi itanu mu Rwanda, Umuyobozi wungirije ku rwego rwa Afurika no muri Aziya, Zandile Makhoba yasuye urwibutso rwa Jenoside rwa Kigali ku Gisozi asaba urubyiruko ko ibyabaye byagejeje kuri Jenoside bitazongera kubaho.

Yagize ati “Nyuma yo gusura uru rwibutso wumva umubabaro, nk’uko nahoze ndeba ubutumwa bw’abarokotse n’amafoto agaragaza ibyabaye bitari ibya kimuntu. Birumvikana bisaba inzira ndende kongera gufasha uwakomerekejwe n’ayo mateka, n’ubwo ibyo bikomere, akababaro n’agahinda gashobora gutera u Rwanda gukora neza, kugirirana neza no kwereka buri wese ko umukeneye. Abanyarwanda bakwiye gushingira ibyiringiro byabo mu kwigira, bakumva ko nta n’umwe uzigera abubakira ejo hazaza uretse bo ubwabo.”

Yakomeje agira ati “Buri wese akwiye kubigira nk’inshingano guharanira ko bitazongera, bidashingiye aho duturuka by’umwihariko Abanyafurika nitwe dukwiye gufata iya mbere mu kwirinda. Mbere yo kugira icyo dukora birakwiye ko tubanza gutekereza ku ngaruka zacyo kandi nk’uko intego y’uyu mwaka ari ukwibuka twiyubaka dukeneye kumva koko ko twiyubatse. Urubyiruko rwo rukwiye kwigira kuri aya mateka kandi rufite inshingano zo kubaka u Rwanda rwiza rw’ahazaza.”

Umuyobozi wa JCI mu Rwanda, Origene Igiraneza, yasabye urubyiruko rugenzi rwe kurushaho guharanira ubumwe no gusenyera umugozi umwe.

Ati “Nk’Abanyarwanda kwibuka ni inshingano yacu kubera ko tuba twibuka abacu bazize Jenoside yakorewe Abatutsi akaba ari n’umwanya mwiza cyane nkatwe urubyiruko wo kongera kwitekerezaho no kwisuzuma, kudatandukira inshingano zacu no guharanira ibyiza.”

“Icyo bitwigisha ni ukugira ngo twebwe nk’abato dushyire imbaraga cyane mu gukora ibyiza, guharanira amahoro ndetse no kurwanya ingengabitekerezo ya Jenoside hano mu Rwanda ndetse n’ahandi ku Isi. Kugira ngo igihugu gitere imbere n’uko twese dusenyera umugozi umwe, tugafashanya, tukubaka igihugu twese dukunze kitarangwamo intambara.”

Umuyobozi JCI Kigali Youth, Cyuzuzo Pacifique na we yavuze ko ibikorwa byo kwibuka byongera kubigisha ko bakwiye gukorera mu bumwe nk’urubyiruko mu rwego rwo guharanira imiyoborere myiza kandi yimakaza uburenganzira bwa muntu ari nayo miyoborere yari yarabuze.

Ibikorwa byo kwibuka byakomereje ku ikoranabuhanga mu rwego rwo kwirinda ikwirakwira ry’icyoroze cya Covid-19 baganirizwa ku buryo bwo gufasha urubyiruko kurwanya ingengabitekerezo ya Jenoside no gufasha abahuye n’ibibazo by’ihungabana mu bihe byo kwibuka.

Hari hitabiriye bake mu rwego rwo kubahiriza amabwiriza yo kwirinda Covid 19

Ubwo bahabwaga amabwiriza bari bugendereho mu gusura urwibutso

Umuyobozi JCI Kigali Youth (uwa mbere uhereye iburyo) Cyuzuzo Pacifique yavuze ko ibikorwa byo kwibuka byongera kubigisha ko bakwiye gukorera mu bumwe

Bakurikiranye ubuhamya bw’abarokotse Jenoside biyemeza kurandura ingengabitekerezo yayo

Bafashe umunota wo kwibuka no guha icyubahiro abazize Jenoside yakorewe abatutsi

Umuyobozi wa JCI mu Rwanda Origene Igiraneza yasabye urubyiruko rugenzi rwe kurushaho guharanira ubumwe no gusenyera umugozi umwe

Zandile Makhoba yavuze ko abanyarwanda bakwiye guharanira kwiyubaka ubwabo

Abitabiriye ni abahagarariye abandi muri uyu muryango

Urwibutso rwa Jenoside rwa Kigali ni rumwe mu bibitse amateka ya Jenoside yakorewe Abatutsi muri Mata 1994 (Ifoto: Kigali Genocide Memorial)

Amafoto: Yuhi Augustin

Tariki ya 17 Kamena abantu bane bafatanwe ibiro 450 naho kuri uyu wa Gatandatu tariki ya 19 hafashwe ibiro 100 abari bayikoreye babashije gucika inzego z’umutekano.

Umuyobozi wa Polisi mu Karere ka Burera, Superintendent of Police(SP) Aphrodise Nkundineza yavuze ko abafashwe tariki ya 17 Kamena bavuze ko iyo fumbire bari bayihawe n’umuhinzi umwe ngo bayimujyanire mu gihugu cya Uganda bafatirwa mu nzira ari nijoro bataragerayo. Wuo muhinzi aracyarimo gushakishwa kugira ngo hamenyekane neza aho akura iyo fumbire.

SP Nkundineza yagize ati “Hari ku mugoroba wa tariki ya 17 Kamena saa tatu umuturage wo mu Murenge wa Cyanika mu Kagari ka Kamanyana , Umudugudu wa Kabira aduha amakuru avuga ko hari abantu abonye bikoreye ibintu berekeza i Bugande. Twahise dukorana n’izindi nzego z’umutekano dufata abasore bane bikoreye imifuka turebye dusanga n’amafumbire arimo, bafatiwe mu Mudugudu n’akagari twavuze haruguru.”

SP Nkundineza yakomeje avuga ko abo basore bamaze gufatwa bavuze ko ari akazi bari bahawe n’umwe mu bahinzi ngo bayimwambukirize bayijyane mu gihugu cya Uganda ajye kuyigurisha.

Bavuze ko batazi aho akura iyo fumbire. Buri muntu yari yamwemereye igihembo cy’amafaranga y’u Rwanda igihumbi bamaze kuyigezayo.

Kuri uyu wa Gatandatu tariki ya 19 Kamena abapolisi nanone bafashe ibiro 100 by’iyo fumbire ya nkunganire nayo yari ijyanywe mu gihugu cya Uganda ariko abari bayikoreye bikanze abapolisi bayikubita hasi bariruka.

Umuyobozi wa Polisi mu Karere ka Burera yagaye abantu bafite ingeso mbi yo gusahura ibyo Leta igenera abaturage ngo biteze imbere mu buhizi ahubwo bakajya guteza imbere ikindi gihugu ikibabaje kurushaho ni uko bagarukana ibiyobyabwenge biza kwangiza ubuzima bw’abantu.

Yavuze ko iriya fumbire ari iyo Leta igenera abaturage b’abahinzi kugira ngo bongere umusaruro w’ibikomoka ku buhinzi. Yabibukije ko bagomba kwirinda kujya muri kiriya gihugu cya Uganda kubera icyorezo cya COVID-19 kiriyo.

Ati”Ikintu cya mbere dukangurira abaturage ni ukwirinda kujya muri kiriya gihugu kuko twese tuzi ibihe barimo kubera ubukana bw’icyorezo COVID-19 kiriyo. Bashobora kunyura mu nzira za rwihishwa bakajyayo bagahura n’abaturage baho bakagarukana kiriya cyorezo, babyirinde birinde gukururira akaga abaturarwanda.”

Abafashwe bahise bapimwa icyorezo cya COVID-19 nyuma bakazashyirwa mu kato mbere y’uko bashyikirizwa Urwego rw’Igihugu rushinzwe ubugenzacyaha(RIB) rukorera muri Sitasiyo ya Polisi ya Cyanika kugira ngo hatangire iperereza.

Itegeko nº68/2018 ryo ku wa 30/08/2018 riteganya ibyaha n’ibihano muri rusange Ingingo ya 166 ivuga ko Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2) ,ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Bamwe mu bafashwe bikoreye ifumbire ya Nkunganire bayijyanye muri Uganda

Umubano w’u Rwanda n’u Bufaransa wazambye kubera amateka y’ibihugu byombi, agaragaza ko u Bufaransa bwabaniye cyane Leta ya Perezida Habyarimana wayoboye u Rwanda kugera mu 1994, Leta ye ikaba yari mu mugambi wo gutegura Jenoside yakorewe Abatutsi mu 1994.

Mu 1991, ubwo umugambi wo gutegura Jenoside wari urimbanyije, Antoine Anfré yakoraga mu Ishami rishinzwe Ibikorwa bya Afurika na Malgaches [ikirwa cya Madagascar] ryitwaga DAM rikaba ryarakoreraga i Quai d’Orsay muri Minisiteri y’Ububanyi n’Amahanga.

Icyo gihe, uyu mugabo wari ukiri muto, yagaragaje ko u Bufaransa bukwiye kwitondera imikoranire na Leta ya Habyarimana, kuko yarimo gukora ubwicanyi bwanaje kuvamo Jenoside yakorewe Abatutsi mu 1994.

Bitewe n’uko abari muri Leta y’u Bufaransa bari bashyigikiye Perezida Habyarimana, babonye Antoine Anfré nk’umutwaro, biza kurangira bamwikijije, bamukura muri izo nshingano.

Si ibyo gusa kuko no mu 2015, uyu mugabo yahagaritswe mu nshingano ze nka Ambasaderi w’u Bufaransa muri Niger, nyuma y’uko Mahamadou Issoufou wari Perezida w’icyo gihugu amureze kuri Perezida François Hollande nawe wari Perezida w’u Bufaransa icyo gihe.

Icyo Perezida Issoufou atishimiye kuri Antoine Anfré, ni uburyo uyu mugabo yatumiraga abatavuga rumwe n’ubutegetsi, no gusaba ko amatora ya Perezida yo mu 2016 akwiriye kuba mu mucyo ku buryo Perezida Hollande yanze kurakaza Issoufou nubwo mu by’ukuri nta kibazo kidasanzwe cyari gihari.

Anfré niwe ambasaderi w’u Bufaransa wakuwe ku mirimo ye muri Niger atamaze imyaka itatu nkuko byajyaga bigenda ku bandi.

Ambasaderi Antoine Anfré w’imyaka 58, azaba afite icyicaro i Kigali mu Rwanda, aho byitezwe ko azakoresha ubunararibonye afite ku Mugabane wa Afurika mu guteza imbere umubano w’ibihugu byombi nyuma,wahinduye washimangiwe n’uruzinduko rwa Perezida Emmanuel Macron mu Rwanda kuwa 27 Gicurasi uyu mwaka.

Ambasaderi Antoine Anfré azahagararira u Bufaransa mu Rwanda