Webrwanda Backend

Author: webrwanda

  • Kicukiro: Polisi yongeye gufatira abantu muri ‘Sauna’ #Rwanda #RwOT via @kigalitoday #rwanda #RwOT

    Bafatiwe muri souna na massage bitemewe
    Bafatiwe muri souna na massage bitemewe

    Ubwo itangazamakuru ryageraga mu rugo rwa Gasana, ryasanze muri urwo rugo harimo abantu 5 na Gasana wa Gatandatu ari na we nyiri urugo. Uwo mugabo yagerageje kuvuga ko bariya bantu batari muri Sauna ko ahubwo bari baje kumusura, gusa yemereye itangazamakuru ko mu rugo rwe hari abantu benshi ndetse bamwe bikanze abapolisi basimbuka urugo baracika.

    Yagize ati “Aba bantu bari baje hano kunsura ndetse bamwe bikanze abapolisi bagira ubwoba bariruka basimbuka urugo. Ni byo abapolisi baje hano bansanga muri Sauna nyirimo njyenyine”.

    Ubwo itangazamakuru ryageraga mu nzu ibamo iyo Sauna yo mu rugo rwa Gasana, byagaragaye ko harimo ibyumba birimo ibitanda bitoya abantu baryamaho barimo no gukorerwa Massage, binagaragara ko hari abantu bari bavuye muri iyo nzu nk’uko byatangajwe ku rubuga rwa Internet rwa Polisi y’u Rwanda.

    Gasana yavuze ko asanzwe abizi ko Sauna zitemewe muri ibi bihe byo kurwanya icyorezo cya Covid-19, yakanguriye n’abandi baturarwanda kubahiriza amabwiriza birinda icyo cyorezo kuko kirimo guhitana ubuzima bw’abantu benshi.

    Umuvugizi wa Polisi y’u Rwanda, CP John Bosco Kabera, yavuze ko bariya bantu bafashwe ku makuru yatanzwe n’abaturage, hanyuma Gasana abonye ko afashwe agerageza kwiregura by’amatakirangoyi avuga ko bariya bantu batari baje muri iyo Sauna.

    Yagize ati “Twahawe amakuru n’abaturage ko mu rugo rwa Gasana harimo Sauna ndetse ko harimo abantu baje muri iyo Sauna, bamwe bikanze Polisi basimbuka urugo bariruka bariya birabananira Polisi irabafata. Gasana ibyo avuga ni amatakirangoyi arimo gushakisha impamvu yatuma bimworohera kuko nta n’ubwo abasha gusobanura impamvu bariya bantu bose bari iwe ndetse nta nasobanura impamvu hari ababonye abapolisi bakiruka bagacika”.

    CP Kabera yongeye gukangurira abantu kwirinda kurenga ku mabwiriza yo kurwanya icyorezo cya Covid-19, abibutsa ko igihe cyose bazajya babona bafatiwe mu makosa bazajya birinda kubeshya ahubwo bavugishe ukuri.

    Yagaragaje ko bamwe mu bantu barimo gufatwa barenze ku mabwiriza yo kwirinda Covid-19 ari bo barimo gutuma imibare y’abandura iki cyorezo irushaho kwiyongera ndetse abandi bakaba barimo guhitanwa na cyo.

    Ati “Ibikorwa bitemewe bagomba kubyirinda, hagiye hafatwa abantu benshi barenze ku mabwiriza yo kwirinda Covid-19 kandi n’ubu baracyafatwa ariko banze kubicikaho. Ubutumwa twabaha nibirinde ibikorwa bitemewe. Nibabirengaho Polisi izakomeza ibafate, aba batubahiriza amabwiriza ni bo barimo gutuma imibare y’ubwandu ikomeza kwiyongera ndetse n’abafatwa n’iki cyorezo bagakomeza kwiyongera”.

    Ahakorerwa massage muri urwo rugo
    Ahakorerwa massage muri urwo rugo

    Abafashwe bahise bashyikirizwa inzego zishinzwe guca amande abarenze ku mabwiriza yo kurwanya icyorezo cya Covid-19. Inzego z’ibanze zikaba zahise zifunga inyubako yakorerwagamo Sauna na Massage.

    Abafashwe kuri iyo tariki ya 27 Kamena baje bakurikira abandi 13 bafashwe ku wa Gatandatu tariki ya 26 Kamena 2021, na none bafitiwe mu Karere ka Kicukiro mu Murenge wa Nyarugunga.


  • COVID yishe abantu 9 barimo uruhinja rw’iminsi 5 #rwanda #RwOT

    Ni we muntu muto iki cyorezo gihitanye mu Rwanda kuva cyahagera gusa mu minsi ishize cyari giherutse no kwica uruhinja rw’amezi abiri.

    Uretse uru ruhinja rw’iminsi itanu rw’i Rubavu, COVID-19 yahitanye abagore batatu b’imyaka 81, 64, 61 b’i Kigali, abagore babiri b’imyaka 67 na 55 b’i Huye n’abagabo batatu b’imyaka 82, 59 na 49 b’i Kigali.

    Imibare yatangajwe na Minisiteri y’Ubuzima igaragaza kandi ko kuri iki Cyumweru abantu 741 basanzwemo iki cyorezo cya COVID-19 bituma umubare w’abamaze kucyanduro bose ugera ku 36 627.

    Abamaze gukira ni 27 090 mu gihe abakirwa ari 9 117 barimo 26 barembye cyane naho abo kimaze guhitana kuva cyagera mu Rwanda baka ari 420.

    Imibare ya COVID-19 ikomeje gutumbagira mu Rwanda, icyumweru gishize kikaba ari cyo cyabonetsemo abarwayi benshi cyane kuva iki cyorezo cyagera mu Rwanda.

    Ibi byanatumye Guverinoma y’u Rwanda ishyiraho ingamba zisumbuye ku zari zisanzweho aho kuva mu cyumweru gishize ubu hariho gahunda ya Guma mu Karere ndetse n’amasaha yo kugera mu rugo akaba yarigijwe imbere.

    UKWEZI.RW

    Source : http://www.ukwezi.rw/mu-rwanda/Ubuzima/article/COVID-yishe-abantu-9-barimo-uruhinja-rw-iminsi-5

  • Musanze : Padiri ari mu bafashwe barenze ku mabwiriza bavanwa muri Kiliziya bajyanwa kuri Stade #rwanda #RwOT

    Bari mu gitambo cya misa cy’isakaramentu ryatangiye saa munani zuzuye ariko riza gukomwa mu nkokora n’inzego z’ubuyobozi bw’Umurenge wa Muko na Polisi y’u Rwanda ikorera muri uyu Murenge.

    Ubwo Polisi yageraga kuri Santarari Gatolika ya Muko ibyari isakaramentu byahinduye isura kuko Abakiristu ndetse n’abaturage bahagurukiye rimwe bitambika Polisi na yo ikizwa n’amaguru hitabazwa Abasirikare maze bahosha ibyasaga n’imyigaragambyo.

    Abaturage banze kuva iruhande rwa Santarari mpaka barekuye abaturage bose bari muri Kiliziya.

    Habayeho ubwumvikane ku mpande zombi maze Abayobozi ba Kiliziya Gatolika 7 bari muri uwo muhango barimo na Padiri waturutse kuri (Cathedrale ya Ruhengeri) n’umuyobozi wa Santarari ya Muko burizwa imodoka bajyanwa muri Stade Ubworoherane mu Mujyi wa Musanze.

    Aba bayobozi batwawe hitabajwe inzego za Gisirikare kuko Polisi n’ubuyobozi bw’Umurenge wa Muko bwasaga n’ubwananiwe iyi Operasiyo yitambitswe n’abaturage.

    Umunyamabanga Nshingwabikorwa w’Umurenge wa Muko, Murekatete Triphase yavuze ko ibyabaye bitari imyigaragambyo nk’uko byafashwe na benshi ahubwo ari abaturage bashatse gutambamira inzego z’umutekano n’ubuyobozi bw’Umurenge ariko byahise bikemurwa.

    Nyuma bariya bantu baje kurekurwa ari uko batanze amande y’ibihumbi 11 Frw kuri buri muntu naho santarari ya Muko icibwa 150 000 Frw.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Musanze-Padiri-ari-mu-bafashwe-barenze-ku-mabwiriza-bavanwa-muri-Kiliziya-bajyanwa-kuri-Stade

  • Musanze: Padiri n’abandi bantu 5 bafashwe barenze ku mabwiriza yo kwirinda Covid-19 – #rwanda #RwOT

    Abafashwe bahise bajyanwa muri Stade Ubworoherane y’i Musanze, bahabwa inyigisho zibibutsa kwitwararika ku mabwiriza ya COVID-19, banacibwa amande.

    Muri iki gikorwa, Polisi yari yahawe amakuru n’ubuyobozi bw’Umurenge wa Muko ko kuri Centrale ya Saint Esprit Muko, abitabiriye misa zahabereye batari kubahiriza ishyirwa mu bikorwa ry’amabwiriza yagenwe n’inzego z’ubuzima.

    Ubwo Polisi n’izindi nzego zahageraga, zasanze abari muri iyo Kiliziya barengeje umubare wabo igomba kwakira kuko ku bantu 300 bayijyamo harenzeho 42; ubukarabiro rusange nta mazi yaherukagamo ku buryo abinjiye mu Kiliziya batakarabye ndetse banicaye begeranye hari umubyigano kuko iyo misa ya gatatu yari kuberamo n’umuhango wo Gukomezwa ku bana 24.

    Umunyamabanga Nshingwabikorwa w’Umurenge wa Muko, Murekatete Triphose, yasabye abaturage gukomeza kwitwararika bubahiriza amabwiriza yatanzwe cyane muri ibi bihe icyorezo cyakajije umurego.

    Yagize ati “Turasaba abantu bose kubahiriza amabwiriza yo kwirinda Covid-19 kuko icyorezo kiri kwiyongera cyane kandi cyo ntikigira imbabazi. Buri wese umusanzu we urakenewe kugira ngo twirinde, turinde n’abandi. Ntabe ari njyewe biturukaho gukwirakwiza Covid-19.’’

    Umuhuzabikorwa w’Ibikorwa bya Polisi n’Abaturage mu Ntara y’Amajyaruguru, CIP Alex Ndayisenga, yavuze ko ibyakozwe muri Centrale ya Muko bidakwiye mu gihe igihugu cyugarijwe n’icyorezo.

    Yagize ati “Polisi irasaba abahagarariye amadini n’amatorero ubufatanye mu kurwanya Covid-19 bubahiriza amabwiriza mu nsengero, birinda gukorera ku jisho kuko kutubahiriza amabwiriza kwabo byashyira mu kaga abakiristu babagana nk’ahantu bizeye kuvana umugisha bakaba bahakura icyorezo.”

    Abafashwe barimo Padiri wari uyoboye igitambo cya Misa n’abamufashaga batanu. Bahise bajyanwa muri Stade Ubworoherane barigishwa banacibwa amande.

    Kiliziya basengeragamo yo izakomeza gufungwa iminsi 30 ifungurwe hatanzwe amande y’amafaranga y’u Rwanda ibihumbi 100.

    Imibare ya Minisiteri y’Ubuzima irerekana ko kuva ku wa 21 kugeza ku wa 26 Kamena 2021, COVID-19 yahitanye Abaturarwanda 29, mu gihe muri iyo minsi habonetse abarwayi bashya barenga ibihumbi bitanu ibintu Leta ikomeza gushyiramo imbaraga ngo idakomeza kwiyongera hagafatwa ingamba zirimo kugabanya amasaha wasangaga umuntu yemerewe kuba ari mu mirimo ye bwite na Guma mu karere no guhagarika zimwe muri serivisi zitihutirwa cyane.

    Padiri n’abandi bantu batanu bafashwe barenze ku mabwiriza yo kwirinda Covid-19 aho bari barengeje umubare w’abantu binjira mu Kiliziya ndetse nta hantu ho gukarabira hashyizweho

  • Gisagara VC na Rwanda Revenue begukanye irushanwa ryo Kwibuka abasportifs bazize Jenoside yakorewe Abatutsi #Rwanda #RwOT via @kigalitoday #rwanda #RwOT

    Guhera ku wa Gatanu tariki 25/06/2021, Ishyirahamwe ry’umukino wa Volleyball mu Rwanda (FRVB) ryateguye irushanwa rigamije kwibuka abahoze ari abakinnyi, abakunzi ndetse n’abandi bose babarizwaga mu muryango wa Volleyball bazize Jenoside yakorewe Abatutsi mu mwaka wa 1994.

    Ni irushanwa ryari ryitabiriwe n’amakipe asanzwe akina mu cyiciro cya mbere mu Rwanda, ndetse hazamo n’amakipe yo muri Kenya arimo Kenya Ports Authority (mu bagabo), mu gihe mu bagore hari hajemo ikipe ya Nairobi Water.

    Mu bagore Rwanda Revenue ni yegukanye igikombe
    Mu bagore Rwanda Revenue ni yegukanye igikombe

    Mu bagore, ikipe ya Rwanda Revenue ndetse na APR VC ni zo zaje guhurira ku mukino wa nyuma, umukino waje kurangira ikipe ya Rwanda Revenue ari yo yegukanye igikombe, naho umwanya wa gatatu utwarwa na Nairobi Water itsinze UTB WVC amaseti 3-2.

    Gisagara VC ni yo yegukanye igikombe itsinze REG VC
    Gisagara VC ni yo yegukanye igikombe itsinze REG VC

    Mu bagabo ikipe ya Gisagara VC nyuma yo gutsinda ikipe ya UTB muri ½ mu mukino wari ugoranye ku maseti 3-2, yaje guhurira ku mukino wa nyuma na REG VC yari yasezereye APR VC.

    Gisagara VC yageze ku mukino wa nyuma isezereye UTB
    Gisagara VC yageze ku mukino wa nyuma isezereye UTB

    Umukino waje kurangira ikipe ya Gisagara VC ari yo yegukanye igikombe itsinze REG amaseti 3-1, iza no guhabwa sheki ya Miliyoni 2 Frws, kimwe na Rwanda Revenue nayo yahawe ayo mafaranga angana gutyo, mu gihe iza kabiri zahawe Miliyoni 1 Frws, naho iza gatatu zihabwa ibihumbi 500 Frws.

    Hon. Bernard Makuza wahoze ayobora Sena y
    Hon. Bernard Makuza wahoze ayobora Sena y’u Rwanda, yari yitabiriye iyi mikino
    Yari kumwe na Honorable Amb. Uyisenga Charles
    Yari kumwe na Honorable Amb. Uyisenga Charles
    UTB VC yari isanzwe ifite iki gikombe yasoreje ku mwanya wa gatatu
    UTB VC yari isanzwe ifite iki gikombe yasoreje ku mwanya wa gatatu


  • Yannick n’ikipe ye basoje icyumweru batanga isomo rya ruhago, uretse Ally Niyonzima nta wundi munyarwanda watsinzwe #rwanda #RwOT

    Zari impera z’icyumweru nziza ku bakinnyi benshi b’abanyarwanda bakina hanze yarwo, Azam FC ya Ally Niyonzima niyo kipe ikinamo umunyarwanda yatakaje amanota 3 yose, ni mu gihe Yannick Mukunzi yari mu kibuga ikipe ye itanga isomo rya ruhago.

    Muri Tanzania ntabwo bakinnye shampiyona ahubwo hakinwaga ½ cy’igikombe cy’igihugu(Azam Sports Federation Cup) aho ikipe ya Yanga ikinamo Haruna Niyonzima yakinnye na Biashara United ku wa Gatanu w’icyumweru gishize.

    Yanga ikaba yaraje kubyitwaramo neza itsinda Biashara United 1-0 cya Yacouba Songné, rutahizamu ukomoka muri Burkina Faso. Ni umukino Haruna Niyonzima atari muri 18 bakoreshejwe.

    Undi mukino wa ½ wahuje Simba SC ya Kagere na Azam FC ya Ally Niyonzima. Ally Niyonzima ntiyari mu bakinnyi ba Azam FC bakoreshejwe. Meddie Kagere yinjiye mu kibuga mu gice cya kabiri ndetse ikipe iza gutsinda ku munota 84 igitego cya Jose Louis Miquissone. Bivuze ko umukino wa nyuma uzahuza Yanga ya Simba SC zose zikinwamo n’abanyarwanda.

    Kagere yinjiye mu kibuga asimbura ikipe ye itsinda Azam FC

    Muri Kenya, ku wa Gatatu w’icyumweru gishize, Tusker FC ya Emery Mvuyekure utarimo gukina muri iyi minsi kubera ikibazo cy’imvune y’urutugu, yatsinze Western Stima 2-1.

    Ku wa Gatanu tariki ya 25 Kamena, Bandari FC y’umutoza Cassa Mbungo Andre yanyagiye Kariobangi FC 4-1. Iyi shampiyona iyobowe na Tusker ifite amanota 44, Bandari FC ni iya 5 n’amanota 31.

    Zanaco FC ya Nizeyimana Mirafa, yasoje shampiyona ku munsi w’ejo hashize ku Cyumweru ikina na Red Arrows aho Mirafa yari yabanje ku ntebe y’abasimbura, umukino warangiye ari 0-0. Iyi kipe yasoje ku mwanya wa 2 n’amanota 51, inyuma ya Zesco United ya mbere yegukanye igikombe ifite amanota 71.

    Wari umukino wa mbere kuri Nizeyimana Mirafa

    Mu cyiciro cya kabiri mu Misiri, Pharco FC ya Iranzi Jean Claude ku wa Gatanu yatsinze Bilaya ibitego 2-0 ihita ifata umwanya wa mbere ku rutonde rwa shampiyona n’amanota 61 inganya na Haras El Hodood, ikaba igomba gusoza shampiyona tariki ya 1 Nyakanga ikina Ben Ebeid.

    Strommen IF y’umunyezamu Buhake Clement mu cyiciro cya kabiri muri Norway, ejo hashize ku Cyumweru yari yasuye Sogndal mu mukino w’umunsi wa 8 wa shampiyona, warangiye ari 1-1, Buhake Clement akaba yari ku ntebe y’abasimbura.

    Mu cyiciro cya gatatu muri Sweden, Yannick Mukunzi yari mu kibuga ubwo ikipe ye ya Sandvikens IF ku munsi w’ejo yatsindaga Taby 4-1 ndetse ikomeza kuguma ku mwanya wa 2 n’amanota 29 ku rutonde ruyobowe na Brommapojkarna ifite amanota 33.

    Yannick Mukunzi yari mu kibuga ikipe ye inyagira Taby

    Source : http://isimbi.rw/siporo/article/yannick-n-ikipe-ye-basoje-icyumweru-batanga-isomo-rya-ruhago-uretse-ally-niyonzima-nta-wundi-munyarwanda-watsinzwe

  • 🔴 LIVE: Conference y’Abasore n’Abakobwa: Sex Management #rwanda #RwOT

    Source : https://agakiza.org/????-LIVE-Conference-y-Abasore-n-Abakobwa-Sex-Management-8077-8077.html

  • Yaka Mwana mwakunze afashwe arimo gusomana n'umukobwa| Yamuteretaga anamutera imitoma itabaho (amafoto) – YEGOB #rwanda #RwOT

    Yaka Mwana wamenyekanye cyane mu mafilime atandukanye hano mu Rwanda yahuye n'umukobwa w'amabuno ubwo we na bagenzi be bari barimo gufata amashusho y'imwe mu mafilime barimo gutegura. Nkuko amashusho dukesha BigTown Tv abigaragaza, Yaka yabanje kurebera kure uyu mukobwa nyuma aza kumwegera atangira kumutereta.

    Kimwe nk'undi musore wese, Yaka yakoresheje amagambo aryohereye kugirango akurure ibyiyumviro ndetse anazamure amarangamutima y'uyu mukobwa ari nako yamubwiraga ko nta mukobwa ku isi umurusha ubwiza. Yaka yabwiye uyu mukobwa kandi ko yifuza no kuba yamugira umugore we.

    Umukobwa ku gusabwa n'akanyamuneza yanyuzagamo agaseka bigaragarira buri wese ko injuga za Yaka zari zamufashe ndetse byanagezaho asomana na Yaka imbere ya camera.

    Source : https://yegob.rw/yaka-mwana-mwakunze-afashwe-arimo-gusomana-numukobwa-yamuteretaga-anamutera-imitoma-itabaho-amafoto/

  • U Rwanda na RDC byahuje imbaraga mu kurwanya ubucuruzi bwa zahabu bukorwa n’imitwe yitwaje intwaro – #rwanda #RwOT

    Aya masezerano y’ubufatanye yashyizweho umukono ku wa 26 Kamena 2021, ubwo Perezida Kagame yasozaga uruzinduko rw’umunsi umwe yagiriraga mu Mujyi wa Goma muri RDC.

    Ni uruzinduko rwaje rukurikirana urundi mugenzi we wa Congo, Félix Antoine Tshisekedi yagiriye mu Rwanda ku munsi wari wabanje.

    Amakuru dukesha Radio-Canada, avuga ko ku ruhande rwa Repubulika Iharanira Demokarasi ya Congo amasezerano ku kunoza ubucuruzi bwa zahabu yashyizweho umukono na Société Aurifère du Kivu et du Maniema (Sakima S.A), mu gihe uruhande rw’u Rwanda rwari ruhagarariwe na Dither Ltd.

    Umuvugizi w’Ibiro bya Perezida wa RDC yabwiye Ibiro Ntaramakuru by’Abafaransa ko aya masezerano agena ko hazabaho ubufatanye mu bijyanye no gushyiraho uburyo bwo gucukura no gucuruza Zahabu binyuze mu mucyo.

    Ati ”Hazabaho ugufatanya hagati y’ibi bigo bibiri, aho bizagenzura urugendo rwose kuva mu gucukura bizakorwa na Sakima kugeza mu gutunganya bizakorwa na Dither SA.”

    Yakomeje avuga ko aya masezerano y’ubufatanye kandi azakumira imitwe yitwaje intwaro yagaragaraga muri ubu bucuruzi bwa Zahabu.

    Ati “Imitwe yitwaje intwaro yakoreshaga Zahabu mu kubona amafaranga ayifasha mu ntambara ntabwo izaba ikibashije gucukura cyangwa ngo igurishe ku masoko mpuzamahanga.”

    Raporo yakozwe kuri Repubulika Iharanira Demokarasi ya Congo mu 2020, igashyikirizwa Perezida w’Akanama k’Umuryango w’Abibumbye gashinzwe Umutekano, yagaragaje ko kimwe mu bibazo bituma umutekano muri icyo gihugu utaboneka, ari imitwe y’iterabwoba n’inyeshyamba zikorera mu Burasirazuba bwa Congo, kandi zose zigatungwa n’amabuye y’agaciro zicuruza mu bihugu by’amahanga.

    Bibarwa ko Uburasirazuba bwa Congo bukoreramo imitwe y’inyeshyamba irenga 130, yose ivuga ko ifite impamvu z’intambara imbere muri RDC ndetse no mu bihugu icyenda bihana imbibi nayo.

    Ubucukuzi bwa Zahabu no kuyitunganya ni rumwe mu rwego ruri gutera imbere cyane mu Rwanda, aho imibare yo mu Ugushyingo 2020 ya Banki Nkuru y’u Rwanda, BNR, yagaragaje ko umusaruro wavuye muri zahabu, wazamutseho 754,6%.

    Imibare y’Ikigo cy’u Budage gishinzwe Umutungo Kamere yerekana ko buri mwaka RDC itanga umusaruro wa Zahabu ubarirwa hagati ya toni 14 na 20 ku mwaka, zifite agaciro kari hagati ya miliyoni 543$ na miliyoni 812$. Nubwo bimeze gutya ariko ubucukuzi bwa Zahabu n’andi mabuye y’agaciro muri iki gihugu bwakunze kurangwa n’akavuyo ahanini biturutse ku bibazo by’umutekano muke.

    Raporo y’Ikigo IMPACT gikora mu bucuruzi bwa zahabu mu Karere, iheruka kugaragaza ko u Rwanda mu 2014 rwatangaje ko rwavanye miliyoni 8,1$ mu “yandi mabuye y’agaciro” yoherejwe mu mahanga arimo na zahabu, yaje kugera kuri miliyoni 80,06$ mu 2016.

    Igenzura ryakozwe n’Ikigo cy’Abanyamerika ku musaruro wa zahabu mu Rwanda ryagaragaje ko wari 160 kg mu 2014 na 319 kg mu 2015. Naho itsinda ry’impuguke z’Umuryango w’Abibumbye ziheruka kuvuga ko u Rwanda rwohereje mu mahanga 2163 kg bya zahabu mu 2018.

    Iterambere ry’ubucuruzi bwa Zahabu ryatangiye kugaragara cyane mu 2019 ubwo mu Rwanda hatangizwaga uruganda rutunganya zahabu ruzwi nka Aldango Ltd., rugaragaza ko rufite ubushobozi bwo gutunganya 220 kg ku munsi na toni esheshatu ku kwezi.

    U Rwanda na RDC byahuje imbaraga mu kurwanya ubucuruzi bwa zahabu bukorwa n’imitwe yitwaje intwaro

  • Muhanga: Imibiri 1093 y’Abatutsi bishwe muri Jenoside iherutse kuboneka yashyinguwe mu cyubahiro – #rwanda #RwOT

    Yabigarutseho kuri uyu wa Gatandatu, tariki 26 Kamena 2021, mu muhango wo gushyingura mu cyubahiro, imibiri 1093 y’Abatutsi bishwe muri Jenoside yabonetse i Kabgayi mu Karere ka Muhanga.

    Kabanda Ildephonse wari ifite imyaka 25 muri Jenoside, avuga ko hari amazina yibuka ya bamwe mu bihayimana bicishije Abatutsi, barimo Musenyeri Nsengiyumva Thaddée wayoboraga Diyosezi ya Kabgayi na Musenyeri Nsengiyumva Vincent wari Archèveque wa Kigali.

    Mu buhamya bwe yavuze ko abo bihayimana bajyaga gusoma Misa bakabwira Interahamwe n’abasirikare ko batagomba kwicira Abatutsi mu nyubako za diyosezi kuko zishobora gusenyuka cyangwa zikangirika.

    Yakomeje ati “Ndagaya abahakana bakanapfobya Jenoside yakorewe Abatutsi, ndabagereranya n’abayikoze’.”

    Umunyamabanga Nshingwabikorwa wa Komisiyo y’Igihugu yo kurwanya Jenoside, CNLG, Dr Bizimana Jean Damascène, yavuze ko n’ubwo hari intambwe yatewe yo kwemera ko Jenoside yakorewe Abatutsi mu 1994, yabaye, ubu ikibazo gihari ari bamwe bayihakana bakanayipfobya.

    Avuga ko i Kabgayi hiciwe umubare munini w’Abatutsi, kandi bakaba barahahungiye bazi neza ko bahabonera ubuhungiro kuko hari mu bihayimana.

    Dr Bizimana avuga ko uretse abanyamadini, hari na bamwe mu baganga, abaforomo n’abaforomokazi bishe abo bari bashinzwe kuvura kandi bamwe muri abo bakaba bakomeje kugira uruhare mu guhakana no gupfobya Jenoside.

    Yagize ati “Hari abapadiri 29 bo mu bwoko bw’Abahutu bandikiye Papa bahakana ko nta Jenoside yakorewe Abatutsi yabayeho, ahubwo bakavuga ko icyabaye ari ugusubiranamo hagati y’amoko.”

    Guverineri w’Intara y’Amajyepfo, Kayitesi Alice, yavuze ko inzira igana ku bumwe n’ubwiyunge isaba urugendo rurerure kandi ko kubigeraho ari umusanzu wa buri wese cyane ugamije gutanga amakuru y’aho imibiri iri ndetse n’abagize uruhare muri Jenoside.

    Yagize ati “Gutanga amakuru y’aho imibiri iri ntabwo ari ikintu kiruhije, kuko uyafite yayatanga no mu ibanga yanditse ibaruwa, icy’ingenzi ni uko ayo makuru atangwa.”

    Iyi mibiri 1.093 yashyinguwe yabonetse ahantu hatandukanye, harimo na 985 yabonetse ku butaka bugiye kubakwaho Maternité mu Bitaro bya Kabgayi.

    Imibiri yashyinguwe mu cyubahiro, ahasanzwe haruhukiye indi 11.014 mu Rwibutso rwa Jenoside yakorewe Abatutsi rwa Kabgayi

    Abayobozi mu nzego zitandukanye bitabiriye umuhango wo gushyingura mu cyubahiro imibiri 1093 y’Abatutsi iherutse kuboneka i Kabgayi

    Abayobozi mu nzego zitandukanye bitabiriye umuhango wo gushyingura mu cyubahiro imibiri 1093 y’Abatutsi bishwe muri Jenoside

    Uhereye ibumoso: Umunyamabanga Nshingwabikorwa wa Komisiyo y’Igihugu yo kurwanya Jenoside, CNLG, Dr Bizimana Jean Damascène; Guverineri w’Intara y’Amajyepfo, Kayitesi Alice n’Umuyobozi w’Akarere ka Muhanga, Kayitare Jacqueline bitabiriye igikorwa cyo gushyingura mu cyubahiro imibiri yAbatutsi iherutse kuboneka

    Dr Bizimana yavuze ko mu bakoze Jenoside bagaragara mu byiciro byose birimo n’abihayimana

    Guverineri Kayitesi yavuze ko mu bikibangamiye urugendo rw’ubumwe n’ubwiyunge harimo abakomeje kwinangira ntibatange amakuru y’ahari imibiri y’abishwe muri Jenoside yakorewe Abatutsi

    Kabanda Ildephonse warokokeye i Kabgayi avuga ko abihayimana bari ku isonga mu bashishikarije Abahutu kwica Abatutsi