Author: webrwanda

Aya masezerano yasinywe, ntaho ataniye n'ayo ku nshuro nyinshi RDC yagiye yanga gusinya mu biganiro binyuranye byagiye bihuza impande zombi. Gusa azanamo imirongo mishya nk'imikoranire mu by'ubukungu ku mishinga irimo nk'uw'amashanyarazi wa Ruzizi III, ibijyanye na Gaz Methane mu Kivu n'ibindi byari byaremejwe mu myaka yabanje ariko bikadindira.

Ubwo Umujyanama wa Trump mu bibazo bya Afurika, Massad Boulos, yasomaga ingingo ku yindi igomba kubahirizwa muri aya masezerano, yagarutse ku mahame ya gahunda y'ibikorwa ihuriweho mu kurandura umutwe wa FDLR no gukuraho ingamba z'ubwirinzi.

Ayo mahame yari yaremejwe ku wa 31 Ukwakira 2024 n'inzego z'ubutasi z'impande zombi, ni ukuvuga hagati y'u Rwanda na RDC. Usesenguye ni yo pfundo muzi y'amasezerano yasinyiwe muri Amerika.

Ubwo yemezwaga bwa mbere, RDC yanze kuyasinya, kuri iyi nshuro, yayasinye, icyibazwa ni ishyirwa mu bikorwa ryayo.

Icyo gihe byari byemejwe ko u Rwanda na RDC hari ibyo bisabwa kugira ngo amahoro agerweho ku mpande zombi.

Ku ruhande rwa RDC, rwasabwaga gusenya umutwe wa FDLR, gufasha mu gucyura abagize FDLR bakoherezwa mu Rwanda kandi RDC igahanira ko amahoro n'ituze biboneka mu Karere k'Ibiyaga bigari.

RDC kandi yasabwe ko igomba guharanira ko impunzi n'abavuye mu byabo bongera gutahuka.

Muri ayo mahame, u Rwanda rusabwa gukuraho ingamba z'ubwirinzi rwashyizeho ku mipaka no gusubiza mu buzima busanzwe abahoze ari abarwanyi ba FDLR, ibintu rumaze imyaka irenga 25 rukora.

Minisitiri w'Ububanyi n'Amahanga, Olivier Nduhungirehe, mbere yo gusinya yagarutse kuri ayo mahame, asobanura ko ari yo agomba kubanza yashyirwa mu bikorwa muri aya masezerano.

Ati 'Icy'ibanze kigomba gukorwa ni ugutangira gushyira mu bikorwa amahame agenga ibikorwa yo kurandura FDLR, bigakurikirwa no gukuraho ingamba z'ubwirinzi u Rwanda rwari rwarafashe.'

RDC yasinye ibyo idakunda

Mu bindi byasinywe, harimo ko RDC igomba kwita ku biganiro biri gukorwa hagati ya RDC na AFC/M23, biri kuba bigizwemo uruhare n'umuhuza ari we Leta ya Qatar, kandi ko impande zombi [u Rwanda na RDC] zigomba gushyigikira ko bigera ku musozo bigatanga n'umusaruro witezwe.

Inshuro nyinshi, ubutegetsi bwa Tshisekedi bwavuze ko nta na rimwe buzigera bugirana ibiganiro n'umutwe wa M23, gusa kera kabaye, ibiganiro birarimbanyije muri Qatar.

Yasabwe kandi kugira uruhare mu gucyura mu mutuzo kandi ku bushake no mu buryo buhesha icyubahiro impunzi, zigasubira mu bihugu by'inkomoko. Ni ingingo imaze igihe kinini itemerwa na Leta ya RDC cyane ko ivuga ko abaturage bayo bahungiye mu Rwanda, atari Abanye-Congo ba nyabo.

Mu Rwanda habarirwa impunzi zirenga ibihumbi 80 z'Abanye-Congo. Mu bihe bitandukanye, hagiye hasinywa amasezerano yo kuzicyura hagati y'u Rwanda, RDC na HCR ariko leta ya Kinshasa ntiyubahirize.

Bwa mbere yasinywe ni mu 2010 aho yashyiriweho umukono i Goma n'i Kigali. Yari akubiyemo ko impunzi zigomba gucyurwa ku bushake bw'ibihugu byombi mu gushyiraho ibituma zitaha ku bushake no kuzakira nta mbogamizi.

Yarimo kandi ko 'nta ugomba gucyurwa ku ngufu ajyanwa aho umutekano n'ubuzima bwe bishobora kujya mu kaga'.

Kuba RDC yasinye iyi ngingo isanzwe idakozwa, bifite byinshi bivuze cyane ko bizanamo n'umutwe wa M23 umaze imyaka myinshi urwana uharanira uburenganzira bw'abaturage b'Abanye-Congo bavuga Ikinyarwanda, by'umwihariko bameneshejwe imyaka myinshi bitwa ko ari Abanyarwanda.

Donald Trump ubwo yakiraga ba Minisitiri b'Ububanyi n'Amahanga b'ibihugu byombi, yasabye ko amasezerano ya Washington Accord yashyirwa mu bikorwa, bidakozwe gutyo ingaruka zabyo ari nyinshi.

Ati 'Byaba byiza mukoze ibiri mu masezerano kuko kutabikora, hari ibintu bibi biba. Ndakeka ko mu myaka 30 ishize, mwembi mwaravuze muti twabonye byinshi, ibi birahagije.'

Perezida Donald Trump yasabye ko aya masezerano ashyirwa mu bikorwa mu buryo bukwiriye

Byagarutsweho ku wa 27 Kamena 2025, ubwo Minisiteri y'Uburezi yisobanuraga ku bibazo byagaragaye muri raporo y'Umugenzuzi Mukuru w'Imari ya Leta y'umwaka warangiye muri Kamena 2024, birimo n'amashuri yahawe internet ariko ikagarukira ku byumba bimwe na bimwe.

Iki kibazo cyagaragaye mu mashuri ya GS Rwamagana, GS Nyarusange, TTC Nyamata n'andi.

Ni amashuri 1500 yahawe internet binyuze mu mushinga Smart Education, harimo amashuri abanza, amashuri makuru na za kaminuza ndetse n'ibindi bigo by'ubushakashatsi.

Umuyobozi Mukuru ushinzwe Ikoranabuhanga muri Minisiteri y'Uburezi, Bella Rwigamba, yavuze ko internet yatangwaga binyuze mu gushyira mu ishuri ibikoresho bitanga internet ishobora kugera ahantu hatandukanye.

Ati 'Ukuntu uyu mushinga uteye mu mashuri mato, ni ukuvuga abanza, ayisumbuye na TVET yo hasi, twagombaga gushyirayo internet dukoresheje icyitwa 'Access Point' enye zigashyirwa ku mashuri ahantu tubona hakenewe internet kurusha ahandi, hakabamo icyumba cya mwarimu, icy'ubuyobozi na smart classroom, ariko bitewe n'uko amashuri aba ateye hari amashuri aba ari magari cyane bigatuma hagati y'icyumba cy'umuyobozi cyangwa se icyumba cya mwarimu n'aho dushyira imashini hari intera ndende cyane, bigatera imbogamizi ko ibyo byuma bitanga internet bidashobora kugera kure akaba ari byo mwabonye bakora igenzura ugasanga icyo gikoresho kiri mu cyumba kimwe ikindi cyakagombye kuba kibona murandasi ariko kiri kure.'

Rwigamba yavuze ko mbere yo gutanga icyemezo cy'uko rwiyemezamirimo yakoze neza habanza gukorwa igenzura ry'ibyakozwe niba bisa n'uko yabisabwe.

Ati 'Muri ayo mashuri by'umwihariko koko ni byo ikibazo cyarabonetse ariko uko tugenda dukora igenzura tureba igishoboka, niba hazamo kongeramo ibindi, ariko uko umushinga wari umeze wari urimo ibikoresho bike ugereranyije n'uko ishuri ringana. Ushobora kuba uri mu ishuri rimwe ukenera ibikoresho nka bibiri, ariko wajya mu rindi ukeneye nk'umunani ibyo rero iyo turimo gukora buri shuri riba rifite umwihariko.'

Perezida wa PAC, Depite Muhakwa Valens yavuze ko bitumvikana uko bashyize internet mu mashuri batazi aho izagarukira nyamara ari ibintu bishobora kwigaragaza.

Ati 'Ibi bikoresho bitanga internet bine mu ishuri rimwe muri TTC Nyamata ni ko mwari mwabiteganyije ku buryo zidaha andi mashuri? Ubu ntabwo mwari kuvuga ngo kimwe kirajya aha ikindi aha ishuri ryose rihabwe internet? Na Dihiro ni kimwe, n'iri ryitwa Nelson Mandela ni kimwe, wanakomeza ugasanga GS Rwamagana na GS Nyarusange, ni ko mwari mwabiteganyije ko muha internet ku gice kimwe mu kigo hanyuma ibindi bigasigara bidafite internet?'

Rwigamba yavuze ko iyi internet yashyizwe mu mashuri ari iyihariye yayo gusa badasangiye n'ibindi bigo by'ubucuruzi cyangwa abaturage.

Uyu mushinga washowemo miliyoni 30$ yatanzwe na Exim Bank China, watangiye gushyirwa mu bikorwa kuva mu 2023 kugeza mu 2024.

Ufasha amashuri kubona internet ifite umuvuduko wa Mbps 15, akishyura ibihumbi 130 Frw ku mwaka mu gihe hari andi mashuri yishyuraga ari hejuru y'ibihumbi 300 Frw kandi ahabwa internet ifite umuvuduko wa Mbps 10 gusa.

Abadepite bagize PAC basabye ko amashuri ahabwa internet igera mu kigo cyose

MINEDUC yasobanuye ko uburyo baha amashuri internet bizanozwa

Ku wa 27 Kamena 2026, nibwo ku Rwibutso rwa Jenoside yakorewe Abatutsi rwa Bisesero habereye igikorwa cyo kwibuka ku nshuro ya 31 Jenoside yakorewe.

Ni igikorwa cyahuriranye no gushyingura mu cyubahiro imibiri 65 yabonetse mu misozi, hatunganywa imirima yo guteraho icyayi.

Sebiroro Antoine watanze ubuhamya yagaragaje ko Abatutsi bo mu Bisesero birwanyeho imbere y'abicanyi, bayobowe na Birara Aminadab wabigishije kwivanga no kwiroha mu bicanyi, byabafashije gukumira ibitero mu gihe cy'amezi atatu, nyuma Leta izana abicanyi.

Uku kwirwanaho kwatumye Abatutsi bagiye barokoka ibitero mu turere twa Nyamasheke na Karongi bahahungira ari Benshi, gusa bicirwa mu misozi ya Bisesero nyuma yo gutereranwa n'ingabo z'Abafaransa.

Nzabamwita Alex wavuze mu izina ry'abafite ababo bashyinguwe mu cyubahiro yashimye abantu batanga amakuru y'ahari imibiri y'Abatutsi itarashyingurwa mu cyubahiro, anenga abagihisha aya makuru.

Ati “Uyu munsi wa none turacyaterwa impungenge n'uko hari imibiri y'abacu tutarabona ngo ishyingurwe mu cyubahiro. Ntabwo tugaya abaduhisha amakuru gusa turanagaya abagifite ingengabitekerezo ya Jenoside n'abayipfobya”.

Visi Perezida wa Mbere wa Ibuka ku rwego rw'Igihugu, Christine Muhongayire, yashimye inkotanyi zahagaritse Jenoside yakorewe Abatutsi byananiye ingabo z'Abafaransa.

Guverineri w'Intara y'Iburengerazuba, Ntibitura Jean Bosco yagaragaje ko mu mateka y'Abanyarwanda ntaho bigaragaza ko higeze haba intambara yabo bapfa ibyaje kwitwa amoko, bityo ko kuba Jenoside yakorewe Abatutsi yarabaye byatewe n'ubuyobozi bubi.

Ati “Birumvikana ntawagarura abacu twabuze ariko kuba hafi y'abayirokotse ni inshingano kuri twese. Dukomeze kugira uruhare mu ngamba Leta yafashe zo kurwanya Jenoside n'ingengabitekerezo yayo”.

Urwibutso rwa Jenoside rwa Bisesero rwashyinguwemo iyi mibiri 65 rusanzwe rushyinguyemo abarenga ibihumbi 50.

Nzabamwita Alex yasabye abafite amakuru y’ahari imibiri itarashyingurwa kuyatanga kuko biruhura abarokotse Jenoside

Imibiri 65 y’Abatutsi bishwe muri Jenoside yashyinguwe mu cyubahiro mu Rwibutso rwa Jenoside rwa Bisesero

Bamwe mu bayobozi bifatanyije n’ab’i Karongi kwibuka Abatutsi bo mu Bisesero bishwe muri Jenoside

Ibuka yashimye ingabo z’Inkotanyi zahagaritse Jenoside byananiye ingabo z’Abafaransa

Guverineri Ntibitura yasabye abaturage kunga ubumwe

Ni amasezerano yashyizweho umukono kuri uyu wa Gatanu tariki 27 Kamena 2025 i Washington D.C muri Leta Zunze Ubumwe za Amerika.

Uruhande rw'u Rwanda rwari ruhagarariwe na Minisitiri w'Ububanyi n'Amahanga w'u Rwanda, Olivier Nduhungirehe mu gihe RDC yari ihagarariwe na mugenzi we, Thérèse Kayikwamba Wagner.

Ni umuhango kandi wayobowe n'Umunyamabanga wa Leta Zunze Ubumwe za Amerika ushinzwe Ububanyi n'Amahanga, Marco Rubio.

Umujyanama wa Trump mu bibazo bya Afurika, Massad Boulos, wagize uruhare mu biganiro byagejeje kuri aya mahoro, yavuze ko ari 'amasezerano y'amateka' kandi ko bitari gushoboka ko agerwaho 'bitagizwemo uruhare na Perezida Trump'.

Marco Rubio yavuze ko hakiri 'akazi ko gukorwa mu bijyanye n'ishyirwa mu bikorwa' ndetse ko intambwe yatewe uyu munsi itari kugerwaho iyo bitagirwamo uruhare na Leta ya Qatar ndetse n'Umuryango wa Afurika yunze Ubumwe.

Minisitiri Nduhungirehe yavuze ko amasezerano yasinywe ashingiye ku biganiro byagizwemo uruhare n'abahuza ku ruhande rwa Afurika by'umwihariko Perezida wa Togo, Faure Gnassingbé.

Ati 'Ipfundo ry'aya masezerano ni umwanzuro wo gushyiraho ingamba z'umutekano zihuriweho n'ibihugu byombi, Joint Security Coordination Mechanism, hagati ya RDC n'u Rwanda. Ikintu cya mbere kizakorwa ni ugutangira gushyira mu bikorwa ibijyanye no gusenya umutwe wa FDLR bigakurikirwa no gukuraho ingamba z'ubwirinzi zashyizweho n'u Rwanda.'

'Ibi bishingiye ku bushake bwagaragajwe hano bw'icyemezo gishingiye ku bimenyetso cyo guhagarika gufasha FDLR n'indi mitwe yitwaje intwaro. Uwo ni wo musingi w'umutekano n'amahoro mu karere kacu.'

Iyi ngingo u Rwanda rwari rwarakunze kuyigarukaho mu biganiro byose rwagize biganisha ku gukemura ikibazo cy'umutekano muke mu Karere ndetse iri no mu myanzuro y'ibiganiro bya Luanda.

Icyo gihe hari hemejwe ibikorwa bihuriweho n'impande zombi bijyanye no gushyiraho ingamba z'umutekano zihuriweho n'ibihugu byombi.

Nduhungirehe yavuze ko FDLR atari umutwe usanzwe, ahubwo ugizwe n'abakoze Jenoside yakorewe Abatutsi yasize abarenga miliyoni imwe bishwe. Yavuze ko mu gihe uyu mutwe uzaba wasenywe, bizatuma u Rwanda rubasha kugira uruhare mu bikorwa bigamije gucyura impunzi.

Yavuze ko kandi u Rwanda rwiteguye kugira uruhare mu bikorwa by'ubucuruzi rufatanyije n'abashoramari hamwe na sosiyete z'Abanyamerika.

Ati 'Tugomba kwemera ko hari ugushidikanya gukomeye mu karere kacu no hanze yako kuko amasezerano yabanje menshi atagiye ashyirwa mu bikorwa, nta gushidikanya ko urugendo ruri imbere rutazoroha ariko ku bufasha bukomeje bwa Amerika n'abandi bafatanyabikorwa, twizera ko tugeze ahantu hadufasha guhindura ibintu.'

'U Rwanda rwiteguye gukorana na RDC kugira ngo rushyire mu bikorwa ibyo twiyemeje.'

Minisitiri w'Ububanyi n'Amahanga wa RDC, Thérèse Kayikwamba Wagner, yavuze ko aya masezerano 'ari intambwe nshya itewe', ishimangira ko amahoro ari 'amahitamo n'inshingano'.

Ati 'Abagezweho n'ingaruka cyane bari kutureba, biteze ko aya masezerano ashyirwa mu bikorwa kandi ntitwabatenguha.'

Yavuze ko mu gihe azashyirwa mu bikorwa, biha amahirwe Akarere k'Ibiyaga bigari ko gufata umurongo mushya 'bitari mu magambo gusa ahubwo mu bikorwa', gusa ashimangira ko 'ibikomere bimwe bizomorwa ariko ko bitazasibangana'.

Yakomeje agira ati 'Ku ruhande rwa RDC, twizeye kandi tuzaharanira ko aya masezerano yubahirizwa bitari mu magambo yacu ahubwo mu bikorwa byacu. Uyu munsi twahisemo amahoro, igikenewe ni uko tuyabungabunga, kandi tukereka abaturage bacu n'Isi ko no mu karere karanzwe n'inkovu, agaciro n'ubufatanye bishobora kuganza. Ubu rero, akazi kacu karatangiye.'

Amasezerano yasinywe arimo ingingo zigaruka ku kubaha ubusugire bwa buri gihugu no gukumira amakimbirane. Arimo kandi guhagarika imirwano, kwambura intwaro no gushyira mu buzima busanzwe imitwe itari iya leta yitwaje intwaro.

Arimo gushyiraho itsinda rihuriweho rigenzura ibijyanye n'umutekano, gufasha mu gucyura impunzi, gushyigikira ubutumwa bw'Ingabo za Loni ziri muri RDC [Monusco] no gushyiraho uburyo bw'imikoranire mu by'ubukungu mu karere.

Aya masezerano kandi arimo inyandiko igaragaza ibikorwa bihuriweho mu gusenya umutwe wa FDLR.

Aya masezerano yasinywe nyuma y’ibiganiro bimaze amezi hagati y’impande zombi

Aya masezerano arimo ingingo yihariye ijyanye n’ibikorwa byo gusenya umutwe wa FDLR

Marco Rubio yashimye impande zombi ziyemeje gushyira imbere amahoro muri ibi biganiro

Amerika ivuga ko kugira ngo iyi ntambwe ibe yatewe, byagizwemo uruhare na Trump ushyize imbere amahoro

Marco Rubio yashimye impande zombi ziyemeje gushyira imbere amahoro muri ibi biganiro

Panafrican Lawyers Union (PALU) ni ihuriro rigizwe n'ingaga eshanu zo mu bice bitandukanye bya Afurika, ingaga 54 z'abanyamategeko ku rwego rw'ibihugu ndetse n'abanyamategeko ku giti cyabo barenga 1000.

Kuva ku wa 25-27 Kamena 2025, abagize PALU bateraniye mu Nteko Rusange ya 15 i Abidjan muri Côte d'Ivoire.

Muri iyi nteko rusange niho Me Nkundabarashi Moïse yatorewe kuba Visi Perezida ushinzwe akarere ka Afurika y'Ibirasirazuba, muri manda izageza mu 2028, ihereye muri uyu mwaka.

Ku mwanya wa Perezida wa PALU hatowe Umunya-Ethiopia, Tewodros Getachew. Uyu mugabo yigeze no kuba Visi Perezida w'Akarere ka Afurika y'Iburasirazuba.

Me Nkundabarashi asanzwe ari Umuyobozi w'Urugaga rw'Abavoka mu Rwanda. Muri Mutarama 2025 nibwo yatorewe manda ya kabiri izarangira mu 2028.

Uyu mugabo yize amategeko muri Kaminuza y'u Rwanda, asoza icyiciro cya kabiri cya Kaminuza mu 2008.

Yaburaniye abantu batandukanye ku manza zirimo iz'inshinjabyaha, iz'umurimo, umuryango ndetse n'ubucuruzi.

Muri Nyakanga 2014 yatangiye gukorana na Trust Law Chambers, imwe muri 'cabinet' y'abanyamategeko ikomeye mu gihugu.

Ari mu bagize Urugaga rw'Abavoka mu Rwanda ndetse abarizwa no mu rwo muri Afurika y'Iburasirazuba.

Ihuriro ry'Abanyamategeko 'PALU' ryatangijwe mu 2002, bigizwemo uruhare n'abayobozi b'inganga z'abanyamategeko muri Afurika. Rifite intego yo guteza imbere iyubahirizwa ry'amategeko, umwuga w'amategeko, imiyoborere myiza n'uburenganzira mu ngeri zitandukanye ku Mugabane wa Afurika.

Me Nkundabarashi (uwa kabiri uturutse iburyo) hamwe na bagenzi be batorewe inshingano zitandukanye muri 'PALU'

Raporo y'Umugenzuzi Mukuru w'Imari ya Leta y'umwaka warangiye muri Kamena 2024, igaragaza ko hari amafaranga arenga miliyari 3 Frw inzego zirimo WASAC, MINICOM, RHA, RTDA, RURA na REB, zagaruje.

Ubwo ubuyobozi bwa RHA, bwisobanuraga imbere ya Komisiyo ishinzwe gukurikirana Imikoreshereze y'Imari n'Umutungo by'Igihugu (PAC), ku wa 26 Kamena 2025, bwagaragaje ko hari ayamaze kugaruzwa binyuze mu kuyakata ku mafaranga atarishyurwa.

Rukaburandekwe yavuze ko nibura 79% by'amafaranga yari yarishyuwe bitari ngombwa yagarujwe.

Ati 'Mu mishinga itandukanye batugaragarije miliyari 2,32 Frw tugomba kugaruza, muri ayo mafaranga tumaze kugaruza agera kuri miliyari 1,83 Frw bingana na 79%.'

Yasobanuye ko ari 'gahunda twiyemeje kugira ngo dukurikize amategeko, ayo mafaranga na yo asigaye twaganiriye na ba rwiyemezamirimo dufatanya, hasigaye gahunda yo kugira ngo na yo agaruke. Muri ayo asigaye ageze kuri miliyoni 487 Frw harimo miliyoni 346,5 Frw yarenze ku bwishyu bw'ubwishingizi.'
Rukaburandekwe yagaragaje ko baganiriye na rwiyemezamirimo, amafaranga akazagaruzwa ku yo 'tutari twamwishyura.'

Harimo kandi amafaranga agera kuri miliyoni 2,5Frw yagaragaye ku bintu byanditswe kabiri mu mu gukurikirana umushinga w'i Huye na yo azakatwa ku bwishyu buzatangwa nyuma.

Ati 'Andi agera kuri miliyoni 7,6 Frw y'imirimo yishyuwe itarakozwe ku Bitaro bya Nyabikenke na yo azakatwa ku cyiciro cya nyuma cyo kwishyura.'

Andi mafaranga miliyoni 100,8 Frw y'imirimo yishyuwe ku biciro birenze ibiteganyijwe gusa RHA ivuga ko azagaruzwa na rwiyemezamirimo kuko babiganiriyeho.

Ati 'Navuga ko ntabwo turagera heza cyane kuko hasigaye ayo angana na 21% tugomba kugaruza kandi twiyemeje ko tugomba kuyakurikirana kugira ngo agaruzwe.'

Perezida wa PAC, Depite Muhakwa Valens yavuze bitagakwiye kugera aho amafaranga ajya kugaruzwa yaramaze gutangwa kuko haba hari abakozi babishinzwe.

Ati 'Mufite abakozi bari babibonye cyangwa batari babizi, byagenze bite? Kuko iyo umugenzuzi w'imari ataza ubwo aya mafaranga yari kugenda.'

Rukaburandekwe yavuze ko mu bikorwa by'ubwubatsi iyo umushinga utari warangira burundu biba ari ibisanzwe kubona amafaranga yagenda ari menshi.

Ati 'Mu kubara ibikenewe hari ubwo abashinzwe kubibara ashobora gushyiramo ingano nyinshi kugira ngo tutazagaruka tuvuga ngo ariko ibyo twabaze ntibyagenze neza. Kuri iyi mishinga ntabwo navuga ko abakozi bagize uburangare ahubwo ni ukuvuga ngo uko twishyura tuba tugenda kubibika mu kubara bwa nyuma dusubirayo tukareba ngo ibyakozwe n'ibyishyuwe birahura?'

Umuyobozi Mukuru wa RHA, Rukaburandekwe Alphonse yavuze ko bageze kure bagaruza amafaranga yishyuwe bitari ngombwa

Abadepite bagize PAC banenze uburyo bwo gushyira ku rutonde rw’ibikenewe ibintu byinshi kuko atari ukuzigamira Leta

Ni igikorwa cyabereye kuri ibyo bitaro cyitabirwa n'abahakora na bamwe mu bari kuhavurirwa, ubuyobozi bw'Umuryango IBUKA ku rwego rw'Igihugu n'ubw'inzego z'ibanze.

Umuyobozi w'Ibitaro bya Kacyiru, CP (Rtd) Dr. Nyamwasa Daniel yagararaje ubugome ndengakamere bwaranze Jenoside yakorewe Abatutsi mu Rwanda ugereranyije n'ahandi hose habaye Jenoside ku Isi.

Yasobanuye ko bigoye kubyiyumvisha uburyo Umuyarwanda yishe undi amuziza ko ari Umututsi, aho wasangaga umugabo cyangwa umugore yica uwo bashakanye, umubyeyi akihekura n'umwalimu akica abo yigishaga.

Yakomeje agaragaza ko ikindi kigayitse ari uburyo n'abaganga bari bashinzwe kuramira abandi ngo ubuzima butazima batatinye kwicana ubwabo bica n'abarwayi bari bashinzwe kuvura bose bazira ko ari Abatutsi.

Yagaragagaje ko ayo mateka ashariye gutyo u Rwanda rutayisanzemo nk'impanuka ahubwo ari urwango rwabibwe kuva mu gihe cy'Ubukoloni ndetse rukomereza nyuma y'Ubwigenge bigeze mu 1994 iba nka karundura y'ibyari bimaze igihe byubakwa.

Ati 'Umuvuduko wo kwica wari ku rwego rwo hejuru kuko hicwaga nibura ibihumbi icumi ku munsi kandi ubutabazi bwari bugoye kuko abari batabaye bari baturutse kure. Ni mu gihe abicaga bari abaturanyi, ababanaga cyangwa abashakanye.'

CP (Rtd) Dr. Nyamwasa nk'umwe mu bagize uruhare mu kubohora u Rwanda yashimiye Umukuru w'Igihugu Perezida Paul Kagame wari uri ku ruhembe.

Yamushimiye by'umwihariko uburyo ibyo yabirenze yimakaza umuco w'ubumwe n'ubwiyunge, n'umutima w'imbabazi bituma uwishe yungwa n'abo yiciye bongera kubana ari byo umusingi w'iterambere Igihugu kigezeho uyu munsi .

Perezida wa IBUKA, Dr. Gakwenzire Philbert yashimangiye impamvu kwibuka Jenoside yakorewe Abatutsi ari igikorwa ngarukamwaka, agaragaza ko biri mu rwego rwo guhererekana mateka yayo ku bato no gukumira icyo ari cyo cyose cyatuma yongera kubaho.

Yasabye abitabiriye icyo gikorwa kwimakaza umuco w'amahoro ndetse no kurwanya ingengabitekerezo ya Jenoside n'ibikorwa biyiganishaho.

Yaboneyeho no gushimira abakozi b'Ibitaro bya Kacyiru uruhare bagira mu kwita ku barokotse Jenoside yakorewe Abatutsi batishoboye aho batoranya abo boroza inka 10 buri mwaka.

Kuva batangira icyo gikorwa abakora mu Bitaro bya Kacyiru bamaze koroza inka 90 abarokotse Jenoside bo mu turere twa Gasabo, Kicukiro, Rwamagana, Nyaruguru, Huye, Karongi na Bugesera mu rwego rwo kubafasha kongera kwiyubaka.

Muri uyu mwaka abo bakozi bateganya koroza inka abarokotse Jenoside bo mu Karere ka Nyanza ndetse bikaba biri no mu mujyo wo gushyigikira gahunda ya Gira Inka.

Umwe mu bari baturiye Ibitaro bya Kacyiru muri Jenoside akanaharokokera witwa Karangwa, yagarutse ku bugome ndetse n'ubwicanyi bwabereye mu Murenge wa Kacyiru hafi y'ibyo bitaro aboneraho gushimira abahagaritse Jenoside.

Igikorwa cyo kwibuka ku nshuro ya 31 Jenoside yakorewe Abatutsi cyabereye ku bitaro bya Kacyiru

Iki gikorwa cyitabiriwe n’ab’ingeri zinyuranye

Perezida wa IBUKA, Dr. Gakwenzire Philbert yashimangiye impamvu yo kwibuka Jenoside yakorewe Abatutsi

Bacanye urumuri rw’icyizere

Umuyobozi w'Ibitaro bya Kacyiru, CP (Rtd) Dr. Nyamwasa Daniel, yagaragaje ubugome ndengakamere bwaranze Jenoside yakorewe Abatutsi mu Rwanda ugereranyije n'ahandi hose habaye Jenoside ku Isi

Iki kirombe cyagwiriye abaturage kuwa Kane tariki ya 26 Kamena 2025 mu Mudugudu wa Kiruhura mu Kagari ka Kagarama mu Murenge wa Musha.

Agace aba baturage bari bagiye gucukuramo gasanzwe gahingwamo na koperative y'abaturage 700.

Mu bapfuye harimo umugabo n'umugore wasize uruhinja rw'amezi ane nk'uko bivugwa n'abaturanyi be, bavuze ko bari barababujije kujya muri iki gice kuko hasanzwe hari ubutaka bworoshye cyane.

Umunyamabanga Nshingwabikorwa w'Umurenge wa Musha, Rwagasana Jean Claude, yavuze ko abaturage bapfiriye mu kirombe ari abagiye gucukura amabuye y'agaciro mu buryo butemewe.

Ati 'Hari ahantu kompanyi icukura amabuye y'agaciro ya Trinity idakoresha ariko mu butaka bwayo, ihaha abaturage rero bakahingira imyaka ubu harimo ibigori, hari abihisha muri ibi bigori bakajya gucukura mu buryo butemewe. Bagiyeyo rero mu gitondo bagezemo bari gucukura kuko batanabifiteho ubumenyi, igitaka cyabagwiriye babiri twabakuyemo bapfuye umwe aba ariwe uba muzima.''

Gitifu Rwagasana yavuze bafatanyije n'inzego z'umutekano baganirije abaturage babagira inama ko nta muntu ukwiriye kujya mu bucukuzi mu buryo butemewe kuko bishyira ubuzima bwabo mu kaga.

Yavuze ko kompanyi isanzwe icukura mu buryo bwemewe ya Trinity Metals iha abaturage babishaka akazi buri munsi ku buryo ubikeneye yajya ajyayo akaka akazi akabikora kinyamwuga kurusha kubikora biyibye.

Kuri ubu imirambo y'abaturage bitabye Imana yajyanywe ku bitaro bya Rwamagana kugira ngo ikorerwe isuzuma mbere y'uko babashyingura.

Uyu mwarimukazi yishwe aciwe ijosi mu rukerera rwo kuri uyu wa Gatanu tariki ya 27 Kamena 2025. Yari atuye mu Mudugudu wa Bacyoro mu Kagari Sibagire mu Murenge wa Kigabiro.

Umunyambanga Nshingwabikorwa w'Umurenge wa Kigabiro, Rushimisha Mark, yabwiye IGIHE ko inzego z'umutekano zatangiye iperereza ngo hamenyekane uwishe uyu mubyeyi, ariko ko mu bakekwa cyane harimo n'umugabo we bari bafitanye ibibazo by'amakimbirane.

Yagize ati 'Yari amaze iminsi afitanye amakimbirane n'umugabo we ku buryo uwo mugabo yari amaze amezi atatu afunze. Twamenye amakuru ko umugabo we yari yarafunguwe ariko ntiyatashye mu rugo, iri joro rero uwo mubyeyi yahamagawe n'abantu babiri baramubwira ngo nakingure, abo bantu bahise bamwicira ku rubaraza.''

Gitifu Rushimisha yakomeje avuga ko bakibimenya bagiyeyo hatangira iperereza.

Ati 'Ubutumwa duha abaturage ni ukwirinda kwihanira, Leta yashyizeho inzego kugeza ku Isibo, ku Mudugudu dufite abayobozi, ku Kagari dufite abayobozi ntabwo izo nzego zose zakurangarana abantu nibareke kwihanira. Umuntu ufite ikibazo nagana ubuyobozi.''

Umuvugizi wa Polisi mu Ntara y'Iburasirazuba, SP Twizeyimana Hamduni we aganira na IGIHE yagize ati 'Twamenye ko hari abantu batari bamenyekana batemye uriya mubyeyi ijosi, ubu iperereza ryatangiye ngo hamenyekane abo bagizi ba nabi kandi babihanirwe.''

Umurambo wa nyakwigendera wabonywe n'umwe mu bana be mu rukerera wahise utabaza inzego z'umutekano. Umugore witabye Imana yari asanzwe afite abana bane yabyaranye n'umugabo we bari bamaze iminsi bafitanye amakimbirane.