Author: webrwanda

CSP Kayumba Innocent yunganiwe na Me Ngirinshuti Jean Bosco ; Mutamaniwa Ephraim yunganiwe na Udahemuka Tharcise mu gihe SP Eric Ntakirutimana we yagaragaye mu rukiko nta mwunganizi afite.

Abaregwa bose bakurikiranyweho ibyaha birimo kwinjira mu makuru abitse muri mudasobwa n’icyaha cy’ubujura. Bose barahakana ndetse bagasaba urukiko kurekurwa bagasanga imiryango yabo kuko muri gereza ari habi.

Mu iburanisha rya none, Umucamanza yategetse ko humvwa inzitizi zatanzwe na Mutamaniwa Ephraim wasabye Urukiko rw’Ibanze rwa Nyarugenge kumurekura akaburana ari hanze.

Yavuze ko muri uru rubanza atakiri gatozi ahubwo asigaye ari umufatanyacyaha kuko hari uwiyemereye ubwe uko yibye umunyamahanga bari bafunganywe muri Gereza ya Nyarugenge.

Mutamaniwa yasabye kurekurwa by’agateganyo kuko ubwo yafatwaga bwa mbere no mu mabazwa yose yabajijwe nka gatozi muri uru rubanza.

Yagize ati 'Urubanza rugeze mu rukiko dutangiye kuburana mu mizi haboneka gatozi witwa Amani Olivier nk’uko yabyiyemereye ubwe mu rukiko atanga ubuhamya bw’uko yibye akoresheje ikoranabuhanga ; ko ariwe mucurabwenge mu bujura bwakorewe Kassem Ayman Mohamed ufungiye muri Gereza ya Nyarugenge wibwe miliyoni zisaga 9 Frw.”

Nyuma yo kwiyemerera ko yibye uwo munyamahanga, urukiko rwafashe icyemezo ko Amani Olivier abaye umuburanyi nk’abandi aho kuba umutangabuhamya w’Ubushinjacyaha.

Mutamaniwa wahoze ashinzwe Ubutasi muri Gereza ya Nyarugenge yabwiye urukiko ko yatunguwe no kubona muri dosiye yarabaye icyitso.

Ati 'Nyakubahwa mucamanza ndasaba ko narekurwa by’agateganyo, hariya hantu dufungiye ni habi cyane kandi ndanababaye.”

Me Udahemuka Tharcisse wunganira Mutamaniwa Ephraim yasabye urukiko gufungura umukiliya we agakurikiranwa ari hanze.

Yabwiye urukiko ko Mutamaniwa ariwe watanze amakuru bwa mbere ko muri Gereza hari gukorerwa ubujura bukoresheje ikoranabuhanga.

Yabibwiye Komiseri Mukuru wa RCS kandi icyo gihe abivuga byafashweho icyemezo. Ati 'Ayo makuru yatanzwe ku wa 14 Nzeri 2020.”

Yavuze ko uwo yunganira yateye akamo abayobozi be, ababwira ko CSP Kayumba Innocent afitanye imikoranire ya hafi na Amani Olivier yari igamije kwiba.

Yagize ati 'Ntabwo yari gutanga ayo makuru ngo agaruke akorane nabo. Nyakubahwa mucamanza, ndasaba ko Mutamaniwa yarekurwa by’agateganyo.”

Urukiko rwahaye umwanya Ubushinjacyaha ngo buvuge icyo butekereza ku busabe bwa Mutamaniwa, busaba ko yaguma gufungwa kugeza rufashe icyemezo ku rubanza akarekurwa cyangwa agakatirwa.

Nyuma y’impaka ndende zamaze amasaha abiri, Urukiko rwanzuye ko ubusabe bwo kurekuwa by’agateganyo kwa Mutamaniwa Ephraim bugiye gusuzumwa icyemezo kikazafatwa ku wa 21 Nzeri 2021.

Ingingo ya 97 mu gitabo cy’amategeko ahana y’u Rwanda ivuga ko iyo hatanzwe inzitizi mu rubanza runaka, inteko y’abacamanza iba isubitse iburanisha ikabanza gusuzumwa rugakomeza nyuma.

Umucamanza yavuze ko nyuma yo gusuzuma inzitizi za Mutamaniwa Ephraim iburanisha mu mizi rizakomeza ku wa 24 Nzeri 2021.

Umuhanzi Mico The Best yahakanye ko atigeze akubita umugore we ngo amukure ameyo.

Mu minsi ishize nibwo haje inkuru y’uko uyu muhanzi yafunzwe nyuma yo gukubita umugore we baheruka gusezerana imbere y’amategeko, Ngwinundebe Clarisse akamukura amenyo.

KIKAC Music uyu muhanzi abarizwamo ubwo yerekenaga umuhanzikazi mushya, Bwiza Emerence, Mico The Best yafashe akanya abwira abanyamakuru agahinda yatewe n’ibyatangajwe cyane ko byanaje mu gihe kibi.

Ati “Ibaze nawe uri kwitegura ubukwe mu cyumweru kimwe, warafashe irembo ugasezerana mu Murenge kwa Sobukwe bakumva ngo wakubise umukobwa wabo umukura amenyo? Urumva wabyakira gute?'

Mico The Best akaba yitegura gukora ubukwe na Clarisse mu mpera z’icyumweru gitaha, ni nyuma y’uko muri Kanama 2021 bari basezeranye imbere y’amategeko.

Mico The Best yahakanye ko atigeze akubita umugore we

Rwabuze gica hagati ya Minisiteri ya Siporo mu Rwanda(MINIPORTS), Federasiyo y’umukino wa Volleyball muri Afurika(CAVB) na Federasiyo mpuzamahanga ya Volleyball(FIVB) kubera icyemezo cyafatiwe u Rwanda cyo guhagarika ikipe y’igihugu n’abakinnyi bayo bivugwa ko bahawe ubwenegihugu mu buryo bunyuranyije n’amategeko.

Ku wa Kane nibwo u Rwanda rwagombaga gukina umukino usoza itsinda A mu gikombe cy’Afurika cya Volleyball mu bagore kirimo kubera mu Rwanda, wahagaritswe utabaye.

Nyuma nibwo haje ikirego cy’ikipe y’igihugu ya Nigeria yareze ivuga ko u Rwanda rwakinishije abakinnyi 4 (Aline Siqueira, Apolinario Caroline Taiana, Mariana Da Silva na Moreira Bianca Gomes) bashobora kuba barabonye ubwenegihugu mu buryo bunyuranyije n’amategeko.

Kuva icyo gihe kugeza uyu munsi nta kindi gisobanuro kigeze gitangwa ariko ibaruwa federasiyo mpuzamahanga(FIVB) yandikiye CAVB igaragaza yamaze gufata umwanzuro yo gusezerera u Rwanda ariko itabyumvikanaho na CAVB na MINISPORTS.

Ni ibaruwa yandikiwe perezida wa CAVB, Bouchra Hajij ni nyuma y’inama yahuje impande 3 ku munsi w’ejo hashize ku wa Gatanu tariki ya 17 Nzeri 2021.

Muri iyi baruwa yabanje kugaragaza ibitekerezo bya buri ruhande mu nama yahuje impande 3(MINISPORTS, CAVB na FIVB), FIVB yo yasabye ko irushanwa ryakomeza ariko FRVB igashyirwa ku ruhande.

Yagize iti 'MINISPORTS yiteguye gukomeza gutegura irushanwa ariko isaba FIVB ko ihita ikuraho ibihano by’agateganyo yafatiye abakinnyi b’u Rwanda n’ikipe y’igihugu y’u Rwanda kugira ngo bemererwe gukomeza gukina irushanwa. Yashimangiye ko ari ingenzi kureba ku cyifuzo cy’igihugu cyakiriye mu gihe hagiye gufatwa umwanzuro.'

'CAVB yasabye ibihano byafatiwe abakinnyi byakomeza ariko ikipe y’igihugu y’u Rwanda igakomeza gukina.'

'FIVB yo yagaragaje ko ibihano by’abakinnyi n’ikipe y’igihugu byakomeza ndetse n’imikino yose yakinnye yafatwa nka 'forfeit'(ikamburwa amanota) nk’uko biteganywa n’amabwiriza ya FIVB. Yasabye ko Minisiteri ya Siporo mu Rwanda na CAVB gukomeza gutegura irushanwa hatarimo ishyirahamwe ry’umukino wa Volleyball mu Rwanda (FRVB) kugira ngo irushanwa rirangire.'

Muri iyi baruwa kandi perezida wa FIVB yavuze ko batafata umwanzuro unyuranye n’amategeko n’amabwiriza ya FIVB, bivuze ko yafashe umwanzuro ko ibihano byafatiwe abakinnyi bigumaho ndetse n’ikipe y’igihugu y’u Rwanda ikavanwa mu irushanwa ndetse ikanamara imyaka 2 nta amrushanwa yitabira.

Andi makuru avuga ko u Rwanda rutiteguye gukomeza gutegura irushanwa mu gihe ikipe y’igihugu ivanywe mu irushanwa.

Abakinnyi 4 bakozeho u Rwanda

Moreira Gomes Bianca, ni mushya mu ikipe y’igihugu

Mariana Da Silva(6), akomoka muri Brazil

Apolonario Caroline(ugiye gutera umupira) na Mariana, bose bakomoka muri Brazil

Apolonario Caroline

Aline Squeira A.

Aba bantu uko ari batatu barimo kandi Iradukunda Pacifique w’imyaka 20, Kwizera Bienvenue w’imyaka 21 bafashwe tariki 16 Nzeri 2021. Moto yibwe ni iy’uwitwa Sibomana Athanase w’imyaka 34.

Umuvugizi wa Polisi mu Ntara y’Iburasirazuba, Chief Inspector of Police (CIP) Hamdun Twizeyimana yavuze ko Sibomana yibwe moto ku mugoroba wa tariki ya 15 Nzeri ahita atanga amakuru. Umuturage bariya bagiye kubitsaho moto yaje kubyumva ahita abimenyesha Polisi.

CIP Twizeyimana yagize ati 'Ku mugoroba w’iriya tariki Sibomana yagiye gusura umubyeyi we asiga moto ku muryango w’inzu, Iradukunda na Uwamahoro baranyonyombye buhoro binjira mu rugo basunika ya moto barayijyana. Bigiye imbere bajya aho Kwizera akorera bamwaka urufunguzo rw’urucurano batsa ya moto bajya kuyibitsa umuturage bayisiga aho barataha.'

CIP Twizeyimana yakomeje avuga ko umuturage babikijeho Moto mu gitondo yaje kumva amakuru ko hari umuntu urimo kurangisha moto yabuze, yahise yibuka ko Iradukunda na Uwamahoro baje kumubitsaho moto kandi asanzwe abazi neza ko nta moto bagira ndetse nta n’aho bayikura. Yihutiye gutanga amakuru hatangira gushakishwa bariya babiri, bamaze gufatwa bemeye ko aribo bayibye ndetse ko urufunguzo rwo kuyatsa baruhawe na Kwizera Bienvenu nawe yahise afatwa.

Umuvugizi wa Polisi mu Ntara y’Iburasirazuba yashimiye abaturage bihutiye guhanahana amakuru bigatuma abacyekwaho icyaha bafatwa ndetse na nyiri moto arayibona, yabasabye gukomeza ubwo bufatanye batangira amakuru ku gihe. Sibomana nawe yashimiye abaturage na Polisi kuba bahise bakora ibishoboka byose moto ye ikaboneka bidatinze.

Abafashwe uko ari 3 bashyikirijwe Urwego rushinzwe ubugenzacyaha (RIB) rukorera muri sitasiyo ya Polisi ya Rilima kugira ngo bakorerwe idosiye.

ICYO ITEGEKO RITEGANYA

Itegeko nº68/2018 ryo ku wa 30/08/2018 riteganya ibyaha n’ibihano muri rusange ingingo ya 166 ivuga ko Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2),ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Ingingo ya 167 ivuga ko ibihano ku cyaha cyo kwiba byikuba kabiri (2) iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira ; kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije ; kwiba byakozwe nijoro ; kwiba byakozwe n’abantu barenze umwe.

Kuri uyu wa Kane tariki ya 16 Nzeri ku mbugankoranyambaga hagaragaye amashusho ya bamwe mu bakora ubucuruzi butemewe bukorerwa mu mihanda yo mu Mujyi wa Kigali abazwi nk’abazunguzayi. Aba bagaragaye bahohotera bamwe mu banyerondo bashinzwe isuku mu Mujyi wa Kigali.

Ni igikorwa cyabereye mu Karere ka Nyarugenge, Umurenge wa Nyarugunge,Akagari ka Kiyovu ahazwi nko ku isoko rya Nyarugenge, hari ku isaha ya saa saba z’amanywa.

Abazunguzayi batangiriye kuri Ndayisenge bamuhohotera ubwo yarimo kubabuza gucururiza mu mihanda y’ahazwi nko ku isoko rya Nyarugenge, mu Karere ka Nyarugenge

Ndayisenga Theogene na Ntihigwa Alex ni bamwe mu banyerondo b’umwuga bahohotewe n’abo bazunguzayi kugeza ubu bataragaragara.

Ndayisenga yagize ati 'Twari turi mu kazi kacu ka buri munsi turimo kwigizayo bariya bazunguzayi tubabwira ko bava mu Mujyi ibyo bakora bitemewe. Aho kugenda batangiye kuturwanya ari nabyo byagaragaye mu mashusho bakubita hasi mugenzi wanjye.'

Ntihigwa Alex avuga ko yabonye batangiye gusagarira mugenzi we agenda nk’ugiye kubigizayo noneho nawe batangira kumurwanya.

Yagize ati 'Mugenzi wanjye Ndayisenga yabanje kubigizayo ariko bafite amahane badashaka kugenda, bageze imbere barahindukira mbona batangiye kumurwanya aribwo nagiye nk’ugiye kubigizayo ngo basigeho kurwana ahubwo baba barantangiye nanjye barandwanya aribwo mwabonye mu mashusho nikubita hasi.'

Aba banyerondo b’umwuga icyo bahurizaho ni uko umubare munini w’abazunguzayi baba mu Mujyi wa Kigali basanzwe basuzugura abanyerondo ko atari ku nshuro ya mbere bagaragaje imyitwarire mibi nk’iriya yo kubasuzugura no kubahohotera.

Umuvugizi wa Polisi y’u Rwanda wungirije, Chief Superintedent of Police (CSP) Africa Sendahangarwa Apollo yongeye kwibutsa abaturarwanda ko inzego z’ibanze zifite inshingano zo gushyira mu bikorwa gahunda za Leta. Ni muri urwo rwego hifashishwa abanyerondo b’umwuga nk’uko bitaganywa n’iteka rya Minisitiri w’ubutegetsi bw’Igihugu, yibukije abaturage ko bagomba kubaha izo nzego.

Yagize ati 'Ntibyemewe kubuza inzego za Leta gushyira mu bikorwa gahunda z’Igihugu, twavuga Abanyerondo b’umwuga n’ Urwego rw’umutekano rwunganira Akarere mu by’umutekano (DASSO). Abaturage bagomba kumenya ko izi nzego zishyirwaho n’inzego nkuru z’Igihugu ntibakazisuzugure ngo bazihohotere.'

CSP Sendahangarwa yakomeje agaragaza ko isuku n’umutekano bigaragara mu Mujyi wa Kigali bidapfa kwizana ko ahubwo bituruka ku ruhare rwa ziriya nzego z’umutekano. Yongeye kwibutsa abantu ko ubucuruzi bugira uko bukorwa ko ubucuruzi bwo mu muhanda bitemewe.

Ati 'Murabizi ko Umujyi wacu wa Kigali uri mu mijyi irangwa n’isuku n’umutekano, ntabwo bipfa kwikora ahubwo ni uruhare rwa bariya banyerondo bahora bagenzura ko harangwa n’isuku kandi ko nta bikorwa by’akajagari biwurangwamo. Abantu bose mu byiciro bitandukanye berekwa aho gucururiza nta rwitwazo uwo arirwo rwose rwo gukora ubucuruzi bw’akajagari. Uwaba afite ibibazo runaka ntibyaba urwitwazo rwo kurenga ku mabwiriza ahubwo wagana inzego zikagufasha.'

Yakomeje yibutsa abantu ko Polisi y’u Rwanda ikorana n’izindi nzego mu kubungabunga umutekano, iterambere n’ituze ry’Igihugu.