Webrwanda Backend

Author: webrwanda

  • Abakobwa bo muri Afurika begukanye ikamba rya… – #rwanda #RwOT

    Imyaka ibaye mirongo 70 irushanwa ry'ubwiza rya Nyampinga w'isi ritangiye kubaho, akaba ari inshuro ya gatanu u Rwanda rwitabiriye iri rushanwa. Abakobwa bo muri Afrika bamaze kwegukana iri kamba ni batanu gusa, muri bo batatu ni abo muri Afrika y’Epfo. Miss Grace Ingabire uhagarariye u Rwanda muri Miss World 2021 aramutse aryegukanye yaba yanditse amateka akomeye.

    Kuva tariki 18 Ukuboza 2021 Nyampinga w'u Rwanda, Ingabire Grace yatangiye urugendo mu irushanwa rya Nyampinga w'isi aho yashyikirijwe ibendera ry'igihugu anahabwa impanuro nk'umukobwa mwiza ugiye guhagararira abeza b'u Rwanda. Ni impanuro yahawe n’Umunyamabanga wa Leta muri Minisiteri y’Urubyirukp n’Umuco, Bamporiki Edouard. Kuwa 19 Ukuboza 2021 ni bwo Ingabire Grace yafashe urugendo yerekeza muri Puerto Rico ku mugabane wa Amerika aho iri rushanwa riri kubera.

    Mu gihe u Rwanda rukomeje guhatanira intsinzi muri aya marushanwa mpuzamahanga, INYARWANDA yabateguriye ubuzima bw'abakobwa begukanye ikamba rya Nyampinga w'isi bakomoka mu bihugu byo ku mugabane wa Africa. Icyakora twibanze hagati ya 2000 na 2019 ubwo iri rushanwa riheruka kuba, aho rimaze kwegukanwa n’Abanyafurikakazi 5 bakomoka mu bihugu 3 ari byo; Afrika y’Epfo, Nigeria na Misiri.

    Miss Ingabire Grace ni we uhagarariye u Rwanda muri Miss World 2021 aho yitezweho kurugeza ku intsinzi

    Umukobwa ukomoka mu gihugu cya Nigeria benshi bazi nka Darego ni we wambaye ikamba nyuma y’umwaka wa 2000 akomoka muri Afrika muri babiri bamaze guca aka gahigo. Agbani Darego yabonye izuba kuwa 22 Ukuboza 1982 muri Lagos, Nigeria. 

    Ni umunyamideli n'umwamikazi w'ubwiza wambaye ikamba rya Nyampinga w'isi mu mwaka wa 2001. Avuka mu muryango w'abana umunani akaba uwa gatandatu. Yoherejwe kwiga aba mu kigo afite imyaka 10 mu gihe nyina umubyara yarimo ahangana n'ibibazo bya kanseri y'ibere yaje no kumuhitana. Nyuma y'imyaka ibiri Agbani yinjiye mu kigo aho yigaga abamo.

    Darego ni we wabaye Miss World mu 2001 aba uwa kane ukomoka ku mugabane wa Africa n’uwa mbere ukomoka muri Nigeria

    Darego yasobanuye ukuntu kubura umubyeyi byatumye anyura mu bihe bikomeye mu bwangavu bwe. Yinjiye mu bijyanye no kwerekana imideli, ibintu atari ashyigikiwemo na se yari asigaranye nk'umubyeyi umwe ari na ko akomeza kwiga amashuri yasoreje muri kaminuza ya Port Harcourt aho yize ibijyanye na siyansi ishingiye kuri mudasobwa n'imibare.

    Ibijyanye no kwerekana imideli by'umwuga yaje kubigira umwuga aho yagiye ayerekana afashijwe na Naomi Campbell mu bihugu birimo Spain mu gace kazwi nka Barcelona. Nyuma yayimuritse no muri Leta Zunze Ubumwe z'Amerika. Amaze kwegukana ikamba rya Nyampinga w'isi, umwuga we waje kwaguka atangira kugenda akorana na kompanyi zikomeye ku isi.

    Yagiye kandi ayobora utunama nyempurampaka mu marushanwa y'ubwiza n’ayo kwerekana imideli arimo Nyampinga w'isi 2014, Nyampinga w’u Bwongereza, amarushanwa akomeye y'imideli mu gihugu cye cya Nigeria ya 'Elite Model Look' 2012 na 2014. Darego ni umushabitsi akaba afite kompanyi zinyuranye zicuruza imyenda n'ibindi bikoresho by'ubwiza.

    Undi mukobwa waciye agahigo ko kwegukana aya marushanwa y'ubwiza ya Nyampinga w'isi hagati ya 2000 na 2019 ubwo riheruka, ni Rolene Strauss wavutse kuwa 22 Mata 1992 mu gihugu cya Africa y’Epfo. Yambaye ikamba rya Nyampinga wa Africa y’Epfo mu mwaka wa 2014 aza no kwegukana ikamba rya Nyampinga w'isi muri uwo mwaka.

    Yahise aba umukobwa wa gatatu ukomoka muri Africa y’Epfo wegukanye ikamba rya Nyampinga w'isi nyuma ya Peneloppe Anne Coelen waryambaye mu mwaka wa 1958 na Anneline Kriel waryambaye mu mwaka wa 1974. Strauss kuri ubu ayoboye umuryango udaharanira inyungu wa 'The Strauss Fundation'. Yize amasomo ajyanye n'ubuvuzi muri kaminuza ya Free State dore ko n'ababyeyi be ari byo bize aho nyina ari umuforomokazi se akaba dogiteri.

    Miss Roselene Strauss ni we uheruka kwambara ikamba rya Miss World mu bakomoka muri Africa aho yabaye uwa gatanu muri Afrika n’uwa gatatu mu bakomoka muri Africa y’Epfo

    Strauss yashyingiranwe na D'Niel kuwa 06 Gashyantare 2016 nyuma y'imyaka ibiri bakundana baje kwibaruka umwana wabo wa mbere muri Mutarama 2017, banibaruka ubuheta muri Gashyantare 2020, bose bakaba ari abana b'abahungu.

    Bwa mbere Strauss yinjira mu marushanwa y'ubwiza akanayegukuna yari afite imyaka 15. Icyo gihe hari mu 2007 akaba yari yitabiriye ibijyanye no kwerekana imideli. Yaje kwitabira amarushanwa y'ubwiza ya Nyampinga w'igihugu cya Africa y’Epfo mu mwaka wa 2011, asoreza mu bakobwa 5 bitwaye neza ariko ntiyabasha kuryegukana.

    Nyuma y'imyaka 3 ni bwo yongeye gusubiramo aza kuryegukana, hari mu mwaka wa 2014. Byari byitezwe ko yagombaga guhagararira iki gihugu mu marushanwa akomeye arimo Nyampinga w'isi [Miss World] na Nyampinga w'isanzure [Miss Universe].

    Ubwo yitabiraga irushanwa rya Nyampinga w'isi mu 2014 mu murwa mukuru w’u Bwongereza, London ikibazo cya nyuma yabajijwe cyari  iki: 'Ni iki gituma wumva waba Nyampinga w'isi ukurikira?” Strauss asubiza agira ati:'Nizera ko inkuru y'igitabo cyanjye isobanutse kurenza urupapuro rwacyo rubanza.'

    Akomeza agira ati: 'Ntewe ishema no kuba umunyafurika y’Epfo, ncigatiye inararibonye y'igisonanuro cy’icyo ubumwe, kubahana no kubabarina ari cyo kandi iyo ni indangagaciro y'amarushanwa ya Nyampinga w'isi. Byaba ari iby'agaciro guhagararira umuryango w'icyizere cy'isi.'

    Nyuma yo kwegukana ikamba byahise biha amahirwe Igisonga cya mbere cye Ziphozakhe Zokufa yo guhagararira igihugu muri Nyampinga w'isanzure [Miss Universe] Strauss. Kuva yakegukana ikamba yagiye azenguruka mu bihugu binyuranye mu gusohoza inshingano yahawe.

    Mu mwaka wa 2018 yaciye agahigo ko kuba ariwe Nyampinga wa nyuma ya 2010 wari uhawe inshingano zikomeye zo kuba umwe mu bagize akanama nyempurampaka ka Nyampinga w'isi, hari mu mwaka wa 2018. 

    U Rwanda ruhanze amaso Miss Ingabire Grace

    Mu irushanwa rya Miss World 2021, Miss Ingabire Grace wabaye Miss Rwanda 2021 ni e uhagarariye igihugu cy’u Rwanda. Aramutse yegukanye ikamba rya Nyampinga w’Isi, yaba abaye umukobwa wa gatandatu mu mateka ya Africa uciye aka gahigo nyuma ya batatu bo muri Africa y’Epfo babashije guca aka gahigo barimo Penelope Coelen waryegukanye mu 1958, Aneline Kriel wa 1974 na Rosele Strauss 2014, ndetse n’umunya-Nigeria waryegukanye mu 2001, na Antigonde Costanda wo muri Misiri waryegukanye mu 1954.

      

    Antagonde Costanda wabaye umunyafurikakazi wa mbere wambaye ikamba rya Miss World, kuri ubu afite imyaka 87

    Penelope Coelen wambaye ikamba rya Nyampinga w’isi mu mwaka 1958

    Anneline Kriel wambaye ikamba rya Nyampinga w’isi mu mwaka wa 1974 

    Miss Grace Ingabire (hagati) hamwe n’abakobwa bambitswe ikamba rya Miss World mu 2018 na 2019

    U Rwanda ruhanze amaso Miss Grace Ingabire muri Miss World 2021

    Miss Grace yashyizwe mu itsinda rya 13 hamwe na bagenzi be bo muri Ireland, Columbia, Curacao na Finland

    Source : https://inyarwanda.com/inkuru/111833/abakobwa-bo-muri-afurika-begukanye-ikamba-rya-nyampinga-wisi-u-rwanda-ruhanze-amaso-miss-i-111833.html

  • Umuntu wari ukuze kurusha abandi ku isi yitab… – #rwanda #RwOT

    Ni inkuru y'akababaro mu gihugu cya Philippines nyuma y'urupfu rw'umukecuru witwa Francisca Susano wari ukuze kurusha abandi muri iki gihugu ndetse n'isi yose muri rusange. Uyu mukecuru ukomoka mu gihugu cya Philippines yavutse kuwa 11 Nzeri, 1897 akaba yaritabye Imana ahagana saa kumi n'ebyiri n'iminota mirongo ine n'itanu z'umugoroba, kuwa mbere w'icyi cyumweru.

    Ikinyamakuru Daily Star cyatangaje ko Francisca Susano yitabye Imana ku myaka 124 y'amavuko iwe mu rugo ruri mu mujyi wa Kabankalan mu ntara ya Negros Occidental, muri Philippines.




    Francisca Susano yavutse mu kinyejana cya 19

    Nk’uko byatangajwe n'ikinyamakuru Dailymail, mbere yo guca aka gahigo ku muntu ukuze kurusha abandi ku isi, Guiness World Records yabanje gukora ubushakashatsi mu rwego rwo kumenya imyaka y'uyu mukecuru. Nyuma yaho muri Nzeri uyu mwaka, aza kwandikwa mu gitabo cy'abantu baciye uduhigo ku isi nk'umuntu ukuze kurusha abandi ku isi.

    Amakuru avuga ko hataramenyekana icyo uyu mukecuru wari ukuze kurusha abandi ku isi yazize, gusa bivugwa ko nta kimenyetso na kimwe cya COVID-19 yagaragazaga.

    Francisca, kugera kuri uyu wa Mbere ni we muntu rukumbi wavutse mu kinyejana cya 19 wari ukiri kuri iyi si. Yavutse mu gihe igihugu cya Philippines cyari kikiyoborwa n’ab'Abanya-Espagne ndetse no mu gihe umwamikazi Victoria yari ku ntebe y'ubwami bw'Abongereza.

    Nyuma yo kubura uyu mukecuru wari ukuze kurusha abandi ku isi, ubuyobozi bw'umujyi wa Kabankalan bwatangaje ko bubabajwe cyane no kubura uyu mukecuru kandi ko azahorana icyubahiro ndetse azahora ari icyitegererezo kuri bo.

    Guiness World Records iherutse nabwo gutangaza urupfu rw'umugabo wari ukuze kurusha abandi kw'isi witwaga Don Emilio witabye Imana ku myaka 113, akaba yaritabye Imana nyuma y'iminsi ine gusa akoze isabukuru y'imyaka 113 y'amavuko.

    Urupfu rw’uyu mugabo rwabaye hadashije igihe kinini atangajwe nk'umuntu ukuze kurusha abandi ku isi, kuko yaciye aka gahigo kuwa 30 Kamena, 2021. Urupfu rwe rwababaje abantu benshi ku isi nkuko babigaragaje ku mbuga nkoranyambaga zitandukanye. 

    Source : https://inyarwanda.com/inkuru/111849/umuntu-wari-ukuze-kurusha-abandi-ku-isi-yitabye-imana-ku-myaka-124-yamavuko-111849.html

  • Pasiteri w'imyaka 63 yakoze agashya ashyingiranwa n'umukobwa w'imyaka 18 uririmba muri korali #rwanda #RwOT

    Apotre Peter Tom Udofia, Umugenzuzi Mukuru w'Itorero “Way of Salvation Church of Jesus Christ” ahitwa Calabar, muri Nigeria,yashakanye n'umukobwa w'imyaka 18 uririmba muri imwe mu ma chorale y'itorero rye nk'umugore wa kabiri.

    Udofia w'imyaka 63, yashakanye na Blessing Jeremiah Esu ahitw Ikot Akpang Ikpong, mu gace ka Akwa Ibom muri Nigeria

    Ibin birori byabaye ku ya 18 Ukwakira 2021.




    Source : https://umuryango.rw/ubuzima-115/udushya/article/pasiteri-w-imyaka-63-yakoze-agashya-ashyingiranwa-n-umukobwa-w-imyaka-18

  • M23 yashinjwe kubura imirwano mu Karere ka Bunagana yatumye abaturage magana bahunga #rwanda #RwOT

    Muri Republika ya Demokarasiya Kongo hubuye imirwano ikaze hagati y'ingabo za leta n'inyeshyamba. Abaturage bakomeje guhunga aho iyo imirwano ibera mu karere ka Bunagana bakajya ahandi mu gihugu abandi bakajya muri Uganda.

    Iyo mirwano yatangiye ku Cyumweru nijoro ndetse ubu irakomeje aho yaeze hafi ya Pariki ya Virunga hicwa abarinzi bayo 2.Leta ya RDC ivuga ko byakozwe na M23.

    Aba barwanyi biravugwa ko bigaruriye uturere dutandukanye hagati ya Rutshuru n'umujyi wa Goma mu birometero 40 gusa.

    Amakuru aravuga ko abantu bari guhungira mu gihugu hagati abandi bakajya muri Uganda kuko amagana y'abaturage yinjiye muri iki gihugu aciye Kisoro bakakirirwa ahitwa Nyakabande.

    Umutwe wa gisirikare Armee Nationale Congolaise w' umutwe wa politiki w'inyeshyamaba za M23, uravuga ko nta ruhare wagize mu iyicwa ry'abarinzi babiri ba pariki ya Virunga nkuko bivugwa na leta ya Kongo.

    Mu itangazo ryashyizweko umukono n'Umuvugizi w'igisirikare cya M23, Major Willy Ngoma,ngo baratashye kandi bategereje ko leta ya Kongo ishyira mu bikorwa amasezerano bagiranye gusa ngo bafite umutwe wa gisirikare uyobowe na Gen.Sultan Makenga.Bavuze ko bamaze gutandukanya igisirikare na Politike.

    Abarwanyi ba M23 bavuga ko bamaze imyaka 4 bavuye muri Uganda basubira muri RDC ndetse ngo bafite ibirindiro hafi na Rutshuru bategereje ko Perezida Tshisekedi azashyira mu bikorwa amasezerano bashyizeho umukono ku ngoma ya Kabila.

    Bahakanye ko batari kurwana kuko bategereje amasezerano ko ashyirwa mu bikorwa.

    IJWI RY'AMERIKA

    Source : https://umuryango.rw/amakuru/mu-mahanga/umutekano/article/m23-yashinjwe-kubura-imirwano-mu-mu-karere-ka-bunagana-yatumye-abaturage-magana

  • Etoile de l'Est yabonye amanota ya mbere muri shampiyona,Marines FC ihagama AS Kigali #rwanda #RwOT

    Uyu munsi hakomeje imikino ya shampiyona y'icyiciro cya mbere mu Rwanda igeze ku munsi wa 4 aho ikipe ya Etoile de l'Est yanyagiye Etincelles FC ibitego 4-1 hanyuma AS Kigali ihagamwa na Marines FC banganya ibitego 2-2.

    AS Kigali yaguze abanyamahanga benshi ndetse ikagura n'abanyarwanda bafite amazina akomeye,yari imaze imikino 8 itinjizwa igitego ariko uyu munsi Marines yayinjije ibitego 2.

    AS Kigali yatsinze ibitego 2 byikurikiranya bya Ramadhan Niyibizi ku munota wa 30' na 33 ariko igice cya kabiri yaje iri ku rwego rwo hasi barayishyura.

    Marines yishyuye ibi bitego ibifashijwemo na Ramadhan Ndayisaba ku munota wa 53 mu gihe Ishimwe Fiston yinjije igitego cyo kwishyura ku munota wa 90.

    Kunganya kwa AS Kigali, bigaragaza ko ifite akazi kenshi mu gushaka igikombe kuko itakaje amanota y'ingenzi yakiriye Marines FC.Ibi bitumye akazi koroha kuri APR FC, kuko nitsinda Etincelles izayobora urutonde.

    AS Kigali izacakira na Police FC kuwa Gatandatu,umukino ushobora kutayorohera na busa.

    Ku rundi ruhande,Etoile de l'Est yari imaze gutsindwa inshuro 3 yikurikiranya na Police FC,Gicumbi FC na Musanze FC,uyu munsi yabonye amanota ya mbere muri shampiyona ubwo yanyagiraga Etincelles FC ibitego 4-1.

    Ibitego by'iyi kipe yo mu karere ka Ngoma byatsinzwe na Peter ukomoka muri Ghana Nwusu Samuel watsinze 2 na Kamoso.Iyi kipe izakira Rayon Sports mu mukino ukurikira.

    Ku rutonde rusange,AS Kigali niyo ya mbere n'amanota 10 inganya na Gasogi United mu gihe APR FC ari iya 3 n'amanota 9 ndetse inazigamye umukino umwe itarakina.Rayon Sports n'iya 4 n'amanota 7.

    Gutsinda kwa Etoile de l'Est byayikuye ku mwanya wa nyuma biyizana kuwa 10.

    Uko imikino y'uyu munsi yagenze:

    AS KIGALI 2-2 MARINES FC
    ETOILE DE L'EST 4-1 ETINCELLES FC
    MUSANZE 0-0 ESPOIR FC

    Source : https://umuryango.rw/imyidagaduro/imikino/article/etoile-de-l-est-yabonye-amanota-ya-mbere-muri-shampiyona-marines-fc-ihagama-as

  • Ubushinjacyaha bwasabiye abari abarwanyi ba P5 igifungo cya burundu #rwanda #RwOT

    Mu bahoze ari abarwanyi 37 n’umwe watorotse ubutabera bari kuburanishwa mu Rukiko Rukuru rwa Gisirikare, harimo abanyamahanga 10 bari mu mitwe y’iterabwoba yakoreraga mu mashyamba yo muri Repubulika Iharanira Demokarasi ya Congo igamije gutera u Rwanda.
    Aba banyamahanga barimo Abarundi umunani, Umunye-congo ndetse n’Umugande.
    Kuri uyu wa Gatatu, tariki ya 24 Ugushyingo 2021 ni bwo Ubushinjacyaha bwatangiye gusabira ibihano abahoze ari abarwanyi b’iyo mitwe ya P5 na RUD Urunana ikorera muri Repubulika Iharanira Demokarasi ya Congo bafashwe mu bihe bitandukanye nyuma yo kugaba ibitero ku butaka bw’u Rwanda byangije byinshi.
    Uyu munsi w’iburanisha waranzwe no gusabira ibihano abaregwa nabo bahabwa umwanya basaba urukiko kubagabanyiriza ibihano.
    Uyu munsi w’iburanisha wahariwe ubushinjacyaha, aho bushingiye ku byaha bakekwaho ndetse n’ibimenyetso bibishimangira, bagiye basabirwa ibihano buri wese ku ruhare yagiye agira mu byaha ashinjwa.

    Mu bihano ubushinjacyaha bwasabiye abaregwa ibyinshi byiganjemo gufungwa burundu kubera uburemere bwa buri cyaha, hakaba n’ibyaha bagiye asabirwaho gufungwa imyaka 25, 20 n’10.

    Ku ruhande rw’ubwunganizi ndetse n’abaregwa ubwabo, bahakana icyaha cyo kugirana umubano na leta z’amahanga hagamijwe gushoza intambara, bagasaba urukiko guca inkoni izamba kubera impamvu nyoroshyacyaha bakomeje kugaragariza urukiko.

    Muri izo mpamvu nyoroshyacyaha bavuga ko bisanze mu mitwe y’ingabo zitemewe nka P5 na RUD Urunana kandi mbere batarapangaga kuyijyamo, ahubwo ko ari ibishuko bahuye na byo.

    Uru rubanza rwari rwasubukuwe kuri uyu wa 2, nyuma y’aho rusubitswe mu kwezi gushize bitewe n’icyemezo cy’urukiko cyo kuruhuza n’urw’uwitwa Mbarushimana Aimé Erneste,na we wari mu mutwe wa P5, bimaze gusuzumwa ko bashinjwa ibyaha bijya gusa kandi byakorewe ahantu hamwe.

    Uyu Mbarushimana akaba atari afite umwunganira mu mategeko, urukiko rugasaba ko abanza kumushakirwa.

    Mbarushimana, kuri uyu wa 2 ubwo yahabwaga ijambo mu rukiko, yavuze ko yavuye mu Rwanda asanzwe ari umuyoboke w’ishyaka FDU-Inkingi ajyanywe n’inama yagombaga kubera mu Burundi, agezeyo bamubwira ko inama itakibaye, akomereza mu bice bya Minembwe muri Congo ari na bwo yinjiraga mu mutwe wa P5.

    Nyuma yaho ni bwo abarwanyi b’uwo mutwe baje kujya mu ntara ya Kivu y’Amajyaruguru bihuza n’umutwe wa RUD Urunana, baza kurwana n’ingabo za FARDC bamwe bararaswa abandi batabwa muri yombi, ndetse bamwe muri bo akaba ari bo bagabye ibitero mu Kinigi, mu karere ka Musanze tariki ya 4 Ukwakira 2019.

    Aba bose uko ari 38 bagizwe n’Abanyarwanda, Abarundi n’abanyaUganda.

    Bashinjwa kurema umutwe w’ingabo zitemewe no kuwujyamo, kugirana umubano na leta y’amahanga bigiriwe gushoza intambara, gushyiraho umutwe w’abagizi ba nabi no kuwujyamo, kugirira nabi ubutegetsi buriho, icyaha cy’iterabwoba, ubufatanyacyaha mu bwicanyi, ubufatanyacyaha mu kwiba hakoreshejwe intwaro n’ubufatanyacyaha mu gukomeretsa ku bushake.

    Source : https://imirasire.com/?Ubushinjacyaha-bwasabiye-abari-abarwanyi-ba-P5-igifungo-cya-burundu

  • Polisi yerekanye umugabo wihaye ipeti rya 'Lt Col'kugira ngo atire imodoka mu ruganda #rwanda #RwOT

    Uyu musore ukurikiranyweho icyaha cyo kwiyitirira urwego rw'umwuga wemewe n'ubutegetsi, kuri uyu wa Gatatu, tariki ya 24 Ugushyingo 2021, ni bwo yeretswe itangazamakuru.

    Polisi yavuze ko yiyise umusirikare ufite ipeti rya Lt Col asaba Uruganda rwa Volkswagen imodoka ndetse anatera ubwoba ababishinzwe ko nibatayimuha ari bubafunge ku buryo byabaye ngombwa ko bayimusangisha aho akorera.

    Ngango Alain ushinzwe gukodesha imodoka muri Volkswagen wahamagawe n'uyu musore yagize ati 'Nahamagawe na Lt Col ambwira ko akora akazi ka gisirikare, ko imodoka y'akazi imupfiriyeho ko yari akeneye imodoka byihuta kandi bwangu; ko dutinze yanadufunga ndetse akeneye ko twayimutiza.'

    Yakomeje avuga ko bahise bayimushyira arayikodesha ndetse aranabishyura.

    Ati 'Haje kugera igihe amara ukwezi atatwishyura tubibwira ababishinzwe bo mu kazi kugira ngo bamwishyuze. Bakoranye na RIB na polisi kugira ngo bamukurirane barebe ko yakwishyura ni bwo basanze ari umusivili nkatwe twese.''

    Umuvugizi wa Polisi, CP John Bosco Kabera, yasabye Abanyarwanda kwirinda gukora ibyaha byo kwiyitirira umwuga w'abandi kuko iyo bafashwe babihanirwa.

    Yagize ati 'Ikibazo cye ni nk'icy'abandi tujya tubereka buri gihe bigaragara ko bahitamo nabi, bahitamo gukora ibyaha, bahitamo guhemuka no kwiteza ikibazo. Umuntu nk'uriya kwiyita umusirikare akiha ipeti adafite akajya gukodesha imodoka yagera aho akambura abo yayikodesheje birumvikana ko ingaruka ziba zikomeye.'

    Yasabye abakora ibikorwa nk'ibi kubireka kuko iyo bafashwe inzego zibishinzwe zibakurikirana bagahanwa.

    Ingingo ya 281 yo mu gitabo cy'amategeko ahana ibyaha mu Rwanda iteganya ko umuntu wiyitirira urwego rw'umwuga wemewe n'ubutegetsi, impamyabushobozi, impamyabumenyi zitangwa n'urwego rubifitiye ububasha cyangwa ubushobozi buhabwa umuntu wujuje ibyangombwa bashyizweho n'urwego rubitiye ububasha, aba akoze icyaha.

    Iyo abihamijwe n'urukiko, ahanishwa igifungo kitari munsi y'ukwezi kumwe ariko kitageze ku mezi atandatu n'ihazabu y'amafaranga y'u Rwanda atari munsi y'ibihumbi 500 Frw ariko atarenze miliyoni 1 Frw cyangwa kimwe gusa muri ibyo bihano.

    Source: IGIHE

    Source : https://umuryango.rw/amakuru/mu-rwanda/umutekano/article/polisi-yerekanye-umugabo-wihaye-ipeti-rya-lt-col-kugira-ngo-atire-imodoka-mu

  • Lt Gen Mubarakh Muganga yavuze ko APR FC izakomeza gukinisha Abanyarwanda gusa #rwanda #RwOT

    Ibi Lt Gen Mubarakh Muganga yabigarutseho ku wa 23 Ugushyingo 2021, nyuma y’umukino wahuje APR FC na Rayon Sports, bikaza kurangira iyi Kipe y’Ingabo itsinze 2-1.

    Ibitego bibiri bya APR FC byabonetse muri uyu mukino, byatsinzwe na Manishimwe Djabel ku munota wa 39 ndetse na Ruboneka Jean Bosco wagitsinze ku munota wa 43′. Igitego rukumbi cya Rayon Sports cyatsinzwe ku munota wa 19 na Essombe Willy Onana.

    Nyuma y’uyu mukino, Umuyobozi wa APR FC, Lt Gen Mubarakh Muganga yabajijwe uko yakiriye Intsinzi y’ikipe ye, mu gusubiza agira ati 'Mu izina ry’Ubuyobozi, abakunzi n’abafana ba APR FC ndatangira nshimira byimazeyo abakinnyi n’ abatoza b’ikipe yacu ku intsinzi baduhaye turishimye.'

    Yakomeje avuga ko ari ishema kubona intsinzi kuri Rayon Sports ngo 'nubwo idakunze kubyemera.’

    Ati 'Ndashima n’ikipe twakiriye n’ubwo tubatsinda kenshi ni gake bemera ko batsinzwe ariko bongeye kwemera ko batsinzwe ku mugaragaro ndetse bavuga ko twimwe na penaliti yari gutuma dutahana ibitego birenze bibiri.'

    Yakomeje avuga ko iyi kipe igitsimbara ku cyemezo cyo gukinisha abakinnyi b’Abanyarwanda kandi ko bitababuza gutsinda.

    Ati: “N’ubwo bisaba kwihangana ariko umusaruro ugaragaza ko kiriya cyerekezo ari inyamibwa cyane. Ubu tuvugana ku mukino wa gatatu w’iyi Shampiyona ikipe twahuye nazo zose zakinishije abanyamahanga babo b’abahashyi ariko ntibitubuza kubatsinda.”

    Yakomeje asabira amakipe bahanganye kuba yakwemererwa gukinisha abanyamahanga 11.

    Ati: “Ku bayobozi bagenzi bacu b’ikipe zindi, Abanyarwanda barashoboye nimubahe amahirwe, ariko aka wa mugani ntemera cyane ngo nyamwanga kumva ntiyanze kubona ku bifuza gukomeza gukinisha abo bahashyi ndabasabira kwongererwa umubare wabo ukava kuri 5 bakaba 7 cyangwa 11 kugira ngo abasore bacu bajye babona aho bipimira. Nyamara ibitangwa kuri bariya biyambazwa bihawe abasore bacu bakora byiza kurushaho ubwo nibwo budasa bwacu.”

    Komite Nyobozi y’Ishyirahamwe ry’Umupira w’Amaguru, FERWAFA, yateranye ku wa 2 Kanama 2021 yemeje ko amakipe yo mu Cyiciro cya Mbere mu bagabo yemerewe gushyira ku rupapuro rw’umukino “Feuille de match” ndetse no mu kibuga abakinnyi b’abanyamahanga batanu aho kuba batatu nk’uko byari bisanzwe.

    Uwo mwanzuro uvuga ko umukinnyi w’umunyamahanga winjiye mu gihugu aturutse hanze yacyo, agomba kuba atarengeje imyaka 30 y’amavuko.

    Ikomeza iti: “Umukinnyi w’umunyamahanga uturuka hanze y’Igihugu kandi akaba arengeje imyaka 30 kugira ngo yemererwe gukina mu marushanwa ategurwa na FERWAFA agomba kuba yarakiniye Ikipe Nkuru y’Igihugu cye nibura mu myaka itatu iheruka.”

    Ubusanzwe, kuva mu 2013, mu marushanwa y’imbere mu gihugu, buri kipe yo mu Cyiciro cya Mbere yabaga yemerewe abakinnyi batatu b’abanyamahanga muri 18 bitabazwa ku mukino.

    Ni itegeko amakipe menshi yifuje ko ryahinduka kuva mu 2015, ariko ntahurize kuri ubwo busabe. Mu Nteko Rusange ya FERWAFA yabaye ku wa 17 Ukuboza 2020, iyi ngingo ntiyagarutsweho, aho byavuzwe ko Rayon Sports yabisabye igihe cyararenze.

    Source : https://imirasire.com/?Lt-Gen-Mubarakh-Muganga-yavuze-ko-APR-FC-izakomeza-gukinisha-Abanyarwanda-gusa

  • Perezida Kagame yahaye Inteko Zishinga Amategeko umukoro wo guhangana n’ibibazo by’ubuvuzi muri Afrika #rwanda #RwOT

    Iyi nama iteraniye mu Mujyi wa Kigali, yitabiriwe n’abantu batandukanye barimo abayobozi mu nzego za Leta, abahagarariye ibihugu byabo mu Rwanda n’abandi.

    Yibanze ku biganiro biganisha ku kwimakaza ikoranabuhanga mu mikorere y’Inteko zishinga Amategeko no kuvugurura uburyo bw’imikorere ikwiye by’umwihariko nyuma y’ingaruka zasizwe na COVID-19.

    Perezida Kagame yashimye ko abagize Inteko zishinga Amategeko bagize uruhare mu guhangana n’icyorezo cya COVID-19.

    Yagize ati: “Mu gihe tugikeneye kuva mu ngaruka twatewe n’icyorezo, Inteko ziracyakeneye kuba ku isonga mu kubaka ubudahangarwa bwa Afurika by’umwihariko mu rwego rw’ubuzima n’ibindi byahungabanya abaturage.”

    Umukuru w’Igihugu yavuze ko kugera kuri iyi ntambwe hari ingingo enye zikeneye kwitabwaho n’abagize Inteko Zishinga Amategeko mu iterambere rya Afurika.

    Ati: “Icya mbere ndahamagarira Inteko zose gusinya amasezerano yemeza ishyirwaho ry’Ikigo Nyafurika cyita ku Miti (African Medicines Agency- AMA) cyatangiye gukora.”

    Amasezerano yashyizweho umukono hagamijwe gufasha Afurika gukorera imiti n’inkingo byujuje ubuziranenge imbere ku Mugabane.

    Mu 2019 ni bwo Inteko y’Umuryango wa Afurika Yunze Ubumwe yatangije umushinga wo gushyiraho AMA nk’uburyo bwo gufasha umugabane kuzamura ubuziranenge bw’imiti iwukorerwamo.

    Kugeza ubu ibihugu 28 byiganjemo ibyo muri Afurika y’Uburengerazuba ni byo bimaze gushyira umukono kuri aya masezerano. Muri byo 10 ntibirayemeza ndetse bitatu ntibiratanga inyandiko zabyo muri AU.

    Umukuru w’Igihugu yavuze ko abagize Inteko Zishinga Amategeko bakwiye no kugira uruhare mu ishyirwa mu bikorwa ry’amasezerano y’Isoko Rusange rya Afurika (AFCTA).

    Yagize ati: “Bafite uruhare mu ishyirwa mu bikorwa ry’Isoko Rusange rya Afurika ndetse n’amasezerano ya Paris ajyanye no kubungabungabu ibidukikije. Byombi bikeneye kugirwamo uruhare n’abagize inteko.”

    Izindi ngingo Perezida Kagame yagaragaje nk’izikeneye ubwihutirwe zirimo kwihutisha imikoreshereze y’ikoranabuhanga no kugena uko ingengo y’imari ikoreshwa.

    Yakomeje agira ati: “Bigomba kujyana n’ishyirwa mu bikorwa ry’intego z’iterambere rirambye ndetse n’Icyerekezo 2063. Ni umwihariko mu rwego rw’ubuzima rusa n’aho rugihanze amaso inkunga z’amahanga. Dukeneye gukorana ngo twongere kugaruka ku ntego yo gukora ibyihutirwa. Dukeneye gukomeza gusangizanya ubunararibonye, ubumenyi n’ubushobozi. Mu bufatanye ni ho imbaraga zacu ziziyongera.”

    Umuyobozi w’Inteko Ishinga Amategeko y’u Rwanda, Donatille Mukabalisa, yasobanuye ko iyi nama ari umwanya wo gutanga umusanzu mu gukemura ibibazo byugarije umugabane n’Isi.

    Yagize ati: “Intego y’inama y’uyu mwaka igamije kongera gusaba inteko kongera kwisuzuma no gutanga umusanzu wazo mu kuganira ku bibazo bihari, n’ibyakorwa mu kuzana impinduka mu mibereho myiza n’ubukungu bw’abaturage.”

    Iyi nama yitabiriwe n’abagera kuri 800 muri Kigali Convention Centre mu gihe abandi bari kuyikurikirana bifashishije ikoranabuhanga.

    Ibihugu byayitabiriye birimo Botswana, Cameroun, Ghana, Kenya, Mozambique, Namibia, Nigeria, Sierra Leone, Afurika y’Epfo, Tanzania, Uganda n’u Rwanda rwayakiriye.

    Source : https://imirasire.com/?Perezida-Kagame-yahaye-Inteko-Zishinga-Amategeko-umukoro-wo-guhangana-n-ibibazo

  • Benzema yakatiwe igifungo_ inkuru irambuye #rwanda #RwOT

    Karim Benzema, Rutahizamu w'Ubufaransa na Real Madrid, kuri uyu wa Gatatu tariki ya 24 Ugushyingo 2021, yahamijwe icyaha cyo gucura umugambi wo gusebya mugenzi we akoresheje amashusho.

    Umucamanza yahaye Benzema igifungo cy'umwaka umwe kandi amutegeka gutanga amande y'amayero 75.000. Nubwo ubujurire bwatangiye, iki gifungo akenshi kiba gisubitse.

    Benzema w'imyaka 33 yari umwe mu bantu batanu baburanishijwe mu kwezi gushize kubera gushaka kwambura Umufaransa Mathieu Valbuena.

    Uru rukozasoni rwatangaje umuryango w'umupira w'amaguru mu bufaransa kandi aba abakinnyi bombi batakaje umwanya mu ikipe y'igihugu.

    Uru rubanza rwatangiye muri Kamena 2015, ubwo aba bakinnyi bombi b'umupira w'amaguru bari mu myitozo y'Abafaransa.

    Ubushinjacyaha bwatangaje ko ubwo bari mu myitozo y'ikipe y'igihugu, Benzema yashyizeho igitutu kuri Valbuena kugira ngo yishyure abantu bari bafite amashusho y'urukozasoni Valbuena yari arimo. Ariko byagaragaye ko ari umugambi yari yacuze.

    Benzema yamye ahakana ibivugwa kandi ashimangira ko yashakaga gusa gufasha Valbuena kwikuraho ayo mashusho.

    Benzema ntabwo yari yitabye urukiko i Versailles kugira ngo acirwe urubanza, ndetse na Valbuena ukinira ikipe ya Olympiakos yo mu Bugereki ntabwo yari ahari.

    Ku wa gatatu, bane mu baregwa hamwe na Benzema mu rubanza nabo bahamwe n'icyaha. Bakatiwe igifungo kuva ku mezi 18 kugeza ku myaka ibiri n'igice.

    Abunganira Benzema bavuze ko bazajuririra igihano cye.

    Ariko igihe yatangaga imyanzuro, umucamanza yavuze ko Benzema 'yagize uruhare ku giti cye, binyuze mu mayeri no kubeshya, kugira ngo yemeze mugenzi amanyanga'.

    Umwaka ushize, nyuma y'imyaka itanu Benzema ahagaritswe mu ikipe y'igihugu kubera iyi saga yaje kugaruka. Ntibiramenyekana niba kuva ahamwe n'icyaha azongera guhagarikwa.

    Source : https://impanuro.rw/2021/11/24/benzema-yakatiwe-igifungo_-inkuru-irambuye/