Webrwanda Backend

Author: webrwanda

  • Sobanukirwa ibintu 6 umugore akora akisenyera urugo atabizi #rwanda #RwOT

    Ibintu bikunze gukorwa n'abagore bigatuma bisenyera urugo batabizi, nk'uko byatangajwe n'urubuga Lifehack ruvuga ku mibanire:

    Gusiganira kwitanaho

    Rimwe na rimwe uzumva umugore avuga ko ubwo umugabo we atamwitaho ko nawe nta mpamvu zo kumwitaho, akirengagiza ko mu rukundo utanga ukabona guhabwa. Ako gasigane ko gutegereza ko umugabo wawe abanza akakwitaho nawe ukabona kumwitaho, gatuma arushaho kujya kure yawe nawe ukaba kure ye. Iyo bikomeje bigera aho wumva asa nk'aho atakiri mu buzima bwawe nawe bikaba uko, mukazisanga urugo rwanyu rwarasenyutse.

    Kuvuga umugabo wawe ibibi

    Abagore bamwe bagwa mu mutego wo gushaka kwerekana ko bagowe, bagakoresha intwaro yo kuvuga ibibi by'abagabo babo. Uko ugenda uganyira uwo muhuye wese ububi bw'umugabo wawe, niko urushaho kubigira bibi ndetse abenshi bakumvisha ko wagowe kandi ababo ari babi kurusha uwawe. Iyo uhuye n'abajyanama babi, bashobora kugusenyera bivuye ku kantu gato.

    Kugira abandi ushyira imbere y'umugabo wawe

    Umugabo mwasezeranye kubana, nta wundi muntu wari ukwiye kumurutisha. Nyamara abagore kenshi usanga bakunda abana babo ndetse akaba ari nabo bitaho kurusha abagabo babo, abandi bafite ibindi bitayeho nk'ubwiza bwabo, amafilimi n'ibindi, akaba aribyo baha umwanya munini kurusha uwo baha abagabo babo. Ukwiye guha umugabo wawe umwanya wa mbere kuko iyo utangiye kugira abandi umurutisha, uba utangiye kwisenyera urugo.

    Kumva ko uhora mu kuri

    Iyo umugore atajya yemera ikosa rye ngo ace bugufi ahubwo agahora yumva ko ari mu kuri atera umugabo we umutima mubi, ndetse akabona ko utamwubaha kuko utajya ugira umutima wo guca bugufi. Ibyo ahanini birasenya, kuko abagabo hafi ya bose bakunda ko abagore babo babagaragariza ko babubashye.

    Gukoresha imibonano mpuzabitsina ugasaba icyo wifuza

    Hari abagore bamwe bafatirana abagabo babo bakabasaba ibyo bifuza, mu gihe babasabye ko bakuzuza inshingano z'abashakanye. Iyo ubikora gutyo uba wirengangiza inshingano zawe kandi ukanisuzuguza bigatera umugabo wawe gufata umubiri wawe nk'igikoresho kuko nawe ariko uwufata. Bishobora kandi gutera umugabo kutishimira kongera gutera akabariro, kuko aba azi ko ariho uzamutegera umusaba ibyo wifuza. Iyo bitangiye kugera kuri urwo rwego rero, biba byanatuma urugo rwanyu rusenyuka.

    Guhora wibutsa umugabo wawe ibyahise

    Abagore bamwe na bamwe bakunze kuririra ku kantu gato, ugasanga bazuye n'iby'ahashize byose bibi umugabo yaba yarabakoreye. Ibyo akenshi bakabikoresha mu rwego rwo gushyira umugabo hasi ngo bamwumvishe ko ntacyo aricyo. Niba ushaka kubaka urugo rukomeye, wari ukwiye kureka ibyahise bigashirana n'akahise, aho guhora ubigarura mu biganiro byanyu.

    Ibi ni ibintu umugore wese ushaka kubaka urugo rukomeye aba agomba kwirinda, n'ubwo akenshi bifatwa nk'ibintu byoroshye, iyo bimaze kuba akamenyero bishobora kugusenyera urugo.

    Refe:elcrema.com

    Source : https://umuryango.rw/ubuzima-115/udushya/article/sobanukirwa-ibintu-6-umugore-akora-akisenyera-urugo-atabizi

  • Abakinnyi 10 bahembwa agatubutse mu Rwanda : Jacques Tuyisenge arayoboye #rwanda #RwOT

    Uru rutonde rwasohowe na Radio B&B FM Umwezi, ruyobowe na Tuyisenge Jacques rutahizamu wa APR FC uhembwa miliyoni 3,5 Frw ku kwezi.

    APR FC kandi ifitemo Manishimwe Djabel uherutse gusinya amasezerano y’imyaka itanu muri iyi kipe y’Ingabo z’u Rwanda, ahembwa Miliyoni 1,2 Frw akaba ari ku mwanya wa 6.

    Ku mwanya wa kabiri hariho Umunya-Uganda, Emmanuel Okwi uherutse gusinya amasezerano muri Kiyovu Sports uhembwa miliyoni 3 Frw, iyi kipe kandi ikaba ifitemo Niyonzima Olivier alias Seif uri ku mwanya wa 9 akaba ahembwa ibihumbi 900 Frw.

    Police FC ifite abakinnyi benshi muri iyi top 10, ifitemo Hakizimana Muhadjiri uri ku mwanya wa gatanu uhembwa Miliyoni 1,3 Frw, Danny Usengimana uri ku mwanya wa karindwi akaba ahembwa Miliyoni 1 Frw na Rutanga Eric uhembwa ibihumbi 900 Frw.

    AS Kigali na yo iri mu makipe ahagaze neza muri iki gihe, yo ifitemo abakinnyi babiri ari bo Lamine Moro uri ku mwanya wa gatatu uhembwa Miliyoni 2 Frw na Mutyaba Mzamiru uri ku mwanya wa 7 uhembwa Miliyoni 1 Frw.

    Naho Rayon Sports iri mu makipe akomeye mu Rwanda, yo ifitemo umukinnyi umwe ari we Muhire Kevin akaba na Kapiteni wayo aho ahembwa miliyoni 1,5 Frw.

    Source : http://www.ukwezi.rw/11/article/Abakinnyi-10-bahembwa-agatubutse-mu-Rwanda-Jacques-Tuyisenge-arayoboye

  • Umuhanzi w'umunyarwanda Platin (Baba) akomeje gutaramira abanya-Sierra Leone. #rwanda #RwOT

    Uyu muhanzi w'umunyarwanda Platin p ukunze kwiyita Baba akaba Ari mu bitaramo byinshi akaba ari gutaramira abaturage batuye igihugu cya Siralewone (Sierra Leone), akaba Atari yo wenyine ahubwo ari kukwe n'umu-Dj ukomeye mu Rwanda ariwe Dj Brianne.

    Ubundi uyu muhanzi akaba yitwa Nemeye Platin akaba yari umuhanzi umwe mu bagize itsinda rya Dream boys, ubwo iri tsinda ryatandukanaga umuhanzi Nemeye Pratin yahise atangira umuziki ku gite cye aho yahise afata izina rya Pratin p ( Baba) akaba amaze kumenyakana mu Rwanda ndetse no hanze y'Igihugu.

    Iyo festival yagiye kuririmbamo ikaba yiswe Eco-Fest ibyo bitaramo bikaba biri buze kubera kuri stade nkuru y'iki guhugu cya Sierra Leone, akaba ari buze gufatanya n'umu-Dj ukomeye mu Rwanda witwa Dj Brianne.

    Uyu muhanzi Platin tubibutse ko mbere y'uko ajya muri Sierra Leone akaba yari akubutse mu birori bya AFRIMA ( All Africa Music Awards) hakaba hari mu birori byo gutanga ibihembo bya Afrima, ibi byose bikaba ari iumusaruo mwiza akomeje gukura mu masezerano aherutse kugirana n'abashinzwe inyungu ze aribo One percent bakaba bakorera muri Nigeria.

    Uyu muhanzi akaba afite indirimbo nyinshi zikunzwe cyane harimo Helena, Shumuleta, Attention ndetse n'izindi nyinshi.

    Iki gihugu cya Sierra Leone kikaba ari igihugu giherereye mu give cya Afurika y'iburengerazuba kikaba cyegereye inyanja ya Atlantic, iki gihugu kikaba gifite umurwa mukuru wa Freetown kikaba cyarabayeho nyuma Yuko ako gace gashyizwemo abacakara bari bavuye gukora ubucakara muri Amerika bakaba barahaje nyuma yuko ubucakara buhagaritswe mu kinyejana cya 18 ndetse n'ikinyejana cya 19.

    Tubibutse ko mbere y'uko Platin P asinyana amasezerano One percent yari asanzwe afitanye amasezerano na Kina Music, inzu itunganya umuziki ikanahagararira inyungu z'abahanzi ikuriwe na Clement.

    Abakurikiranira hafi imyidagaduro yo mu Rwanda bakaba batangaza ko amasezerano ye na Kina Music yaba ari mu marembera.

    Source : https://impanuro.rw/2021/11/26/umuhanzi-wumunyarwanda-platin-baba-akomeje-gutaramira-abanya-sierra-leone/

  • Umusore w’umwirabura w’imyaka 35 yasezeranye n’umucyecuru w’umuzungukazi w’imyaka 70 #rwanda #RwOT

    Uyu musore witwa Bernard Musyoki w’Umunya-Kenya yagaragaje akanyamuneza atewe no kuba we n’umucyecuru Deborag Jan Spicer ukomoka muri America bateye intambwe mu rukundo rwabo.

    Bernard Musyoki avuga ko uriya mucherie we w’imyaka 75 bamenyaniye kuri Facebook ubundi akamusaba urukundo undi akarumwemerera.

    Ati 'Nari namusabye ko twakwibanira nk’umugore n’umugabo none yarabyemeye. Ubu ni ibyishimo bisendereye.'

    Bernard Musyoki wagombaga kujya muri America muri 2018 ariko aza kurogowa no kwimwa Visa kuko nta mpamvu ifatika yaragazaga yari itumye ajya muri America.

    Uriya mucyecuru wihebeye uyu musore abyaye, we yiyemeje kuza kwirebera umukunzi we, yurira rutemikirere yerecyeza muri Kenya baza guhita berecyeza mu gace kitwa Kitui aho umukunzi we atuye.

    Ubu bamaze no gusezerana kandi urukundo rwabo ruracyari pata na rugi, buri wese mu rugo aba yita undi honey, babe n’utundi tuzina tw’abakundana.

    Source : http://www.ukwezi.rw/13/article/Umusore-w-umwirabura-w-imyaka-35-yasezeranye-n-umucyecuru-w-umuzungukazi-w-imyaka-70

  • Bagaragaye basomana! Hamisa Mobetto wabyariye… – #rwanda #RwOT

    Hamisa Mobetto umwe mu byamamarekazi byo mu biyaga bigari ukomoka muri Tanzania akaba yarigeze kugacishaho n’umuhanzi Diamond Platnumz ndetse bakanabyarana umwana, kuri ubu ari mu rukundo n’ikirangirire Rick Ross umuraperi kabuhariwe akaba n’umuherwe. Kugeza ubu aba bombi bari kubarizwa muri Dubai aho bakomeje kugirirayo ibihe byiza nyuma y’igihe bahakanye ko badakundana.

    Iby’umubano wa Hamisa Mobetto na Rick Ross byatangiye kuvugwa no kugaragara ubwo aba bombi babwiranaga amagambo meza asize umunyu binyuze ku mbuga nkoranyambaga cyane cyane kuri Instagram aho Rick Ross atahwemaga kugaragaza urukundo afitiye umunyamidelikazi Hamisa Mobetto.

    Ubwo Hamisa Mobetto yabazwaga niba yaba akundana n’umuraperi Rick Ross yarabihakanye avuga ko badakundana ahubwo ari inshuti zisanzwe. Icyakora nubwo yabihakanye ntabwo byabujije gukomeza kugaragara ko bombi bakundana n’ubwo ntawe urabyemera ku mugaragaro.

    Ikinyamakuru Tuko Enterntainment cyandikirwa muri Tanzania cyatangaje ko Hamisa Mobetto yuriye indege mu minsi itatu ishize yerekeza Dubai asangayo Rick Ross wari ufite igitaramo aho yagombaga gutaramira mu kabyiniro kamwe ko muri Dubai. Mu mashusho Hamisa Mobetto yakomeje gushyira kuri Instagram yerekanye we na Rick Ross bari kugirana ibihe byiza aho bari bishimanye bikomeye ndetse bananyuzamo barabyinana.

    Hamisa Mobetto na Rick Ross bakomeje kugirana ibihe byiza muri Dubai

    Hamisa Mobetto kandi yerekanye indabo nziza Rick Ross yamwakirije amuha ikaze muri Dubai, izi ndabo ni nazo Rick Ross yerekanye kuri Instagram Stories aho yanditseho ati: “Ni izagenewe Umwamikazi wanjye” nkuko ikinyamakuru Hollywood Unlocked cyabitangaje. Yaba ari Rick Ross na Hamisa Mobetto bombi bakomeje gusangiza abafana babo ibihe byiza bari kugirana babinyujije ku mbuga nkoranyambaga zabo.

    Ibi bibaye nyuma y’igihe kinini bivugwa ko Hamisa Mobetto wabyariye Diamond Platnumz yaba ari mu rukundo n’umuraperi Rick Ross gusa bombi bakabihakana.Iyi kandi ibaye inshuro ya mbere aba bombi bahuriye i Dubai aho bari kuryoshya nyuma yuko byagiye bivugwa ko bafite gahunda yo kuzahahurira.

    KANDA HANO UREBE HAMISA NA RICK ROSS BARIMO GUSOMANA 

    Source : https://inyarwanda.com/inkuru/111914/bagaragaye-basomana-hamisa-mobetto-wabyariye-diamond-platnumz-ari-kuryoshya-ubuzima-na-ric-111914.html

  • Huye : Umugore w’imyaka 33 akurikiranyweho gutwikisha amazi umugabo we w’imyaka 61 #rwanda #RwOT

    Uyu mugore ukurikiranywe n’Ubushinjacyaha ku rwego rwisumbuye rwa Huye, akekwa gukora kiriya cyaha cyakozwe mu ijoro yo ku ya 12 Ugushyingo 2021.

    Ubushinjacyaha buvuga ko uyu mugore w’imyaka 33 yasutse amazi ashyushye ku mugabo we w’imyaka 61 amuziza ko yamutwaye amafaranga 700.

    Mu ibazwa rye, ukekwa yemeye ko yamusutseho amazi yari agiye gutekesha ubugari mu maso, mu gatuza no ku maboko arashya nyuma yo gutongana bapfuye ko umugabo yari yamutwariye amafaranga 700 yagombaga gutanga mu itsinda (ikimina).

    Icyaha cyo gukomeretsa ku bushake umugabo we akurikiranyweho kiramutse kimuhamye, yahanishwa igifungo kigera ku myaka 08 n’ihazabu ya miliyoni 2 Frw nk’uko biteganywa n’ingingo y’121 y’itegeko riteganya ibyaha n’ibihano muri rusange.

    Source : http://www.ukwezi.rw/1-1/Amakuru-anyuranye/article/Huye-Umugore-w-imyaka-33-akurikiranyweho-gutwikisha-amazi-umugabo-we-w-imyaka-61

  • Rusizi : Umugenzacyaha wa RIB ukurikiranyweho gusambanyiriza umugore kuri Kasho yasabiwe gufungwa imyaka 15 #rwanda #RwOT

    Ubushinjacyaha bw’u Rwanda bukurikiranye umugenzacyaha w’Urwego rw’Igihugu rw’Ubugenzacyaha RIB, ukekwaho gusambanya inshuro nyinshi umugore wari ufungiye kuri Kasho ya RIB ya Kamembe mu Karere ka Rusizi ubwo yamwizezaga ko azamufunguza akaza kumutera inda.
    Ubushinjacyaha buvuga ko uyu mugabo usanzwe ari Umugenzacyaha kuri station ya RIB ya Kamembe, iyo yakoraga ijoro, yasohoraga muri kasho umugore akekwaho gusambanya wari uhafungiye ubundi akamujyana mu nzu ibikwamo ibikoresho akamusambanya.

    Muri uko kumukoresha imibonano mpuzabitsina, yamwizezaga ko azamufunguza, ndetse yaje no kumutera inda.

    Ubushinjacyaha buri kuburana n’uyu Mugenzacyaha, buvuga ko hari imvugo z’abatangabuhamya bari bafunganye n’umugore wasambanyijwe, babimushinja ndetse na raporo y’abahanga mu gupima ibimenyetso (Rwanda Forensic Laboratory) yagaragaje ko uregwa ari we se w’umwana wabyawe n’uwo mugore wahohotewe.

    Mu iburanisha ryabaye kuri wa Kabiri w’iki cyumweru tariki 23 Ugushyingo 2021, bwagaragarije Urukiko ko nta gushidikanya ibikorwa byakozwe n’uregwa bigize icyaha cyo gukoresha undi imibonano mpuzabitsina ku gahato kuko kuba uwahohotewe yari afunze ari mu maboko ya RIB, umugenzacyaha akamutegeka gukorana na we imibonano mpuzabitsina ntayandi mahitamo yari afite bitewe n’ibibazo yari arimo.

    Ubushinjacyaha bwatanze umwanzuro wabwo, busaba Urukiko Rwisumbuye rwa Rusizi guhamya ibyaha uyu mugenzacyaha, rukamuhanisha igifungo cy’imyaka 15 n’ihazabu ya Miliyoni 2 Frw.

    Source : http://www.ukwezi.rw/1-1/Amakuru-anyuranye/article/Rusizi-Umugenzacyaha-wa-RIB-ukurikiranyweho-gusambanyiriza-umugore-kuri-Kasho-yasabiwe-gufungwa-imyaka-15

  • NABU yatangije ikoranabuhanga rifasha abana gukunda gusoma kuri Internet #Rwanda #RwOT via @kigalitoday #rwanda #RwOT

    Ubwo buryo bushya bufasha abana gusoma (online) butuma byorohera abana kumenya gushaka ibitabo bakunze no kubisoma bidasabye ko hagira ubibafasha, bakabyikorera bikabaremamo umuco wo gukunda gusoma.

    Ubwo buryo bushya (App) ntibufasha abana gusa ngo bakunde gusoma gusa, ahubwo bufasha n’abakuze kumenya gusoma mu Cyongereza.

    Aganira na KT Press, Umuyobozi wa NABU yagaragaje ko mu mpera za 2021, bafite intego yo kuba bagera kuri Miliyoni imwe y’abantu basoma bakoresheje ubwo buryo bushya bwo gusoma ‘Online’.

    Amos Furaha, Umuyobozi wa NABU (Global Users) yagize ati “Ubu buryo bushya buzadufasha kumenya umubare w’abasoma ibyo twandika, binadufashe kumenya aho dukwiye kongera ubukangurambaga. Intego ni ukugera ku bantu Miliyoni imwe basoma bakoresheje ubu buryo bitarenze umwaka wa 2021”.

    Isomero rya NABU (The NABU library), ubu risomeraho abantu bagera 1000, ngo hakaba hariho inkuru z’abana ziri mu ndimi zitandukanye harimo izanditse mu Kinyarwanda, Kiswahili, ‘Creole’ no mu Cyongereza.

    Ibyo bitabo by’abana biri mu ndimi zitandukanye, ubu ngo biboneka kuri Google Playstore ndetse no kuri iOS app store.

    NABU ni Umuryango utegamiye muri Leta kandi udaharanira inyungu, ukaba ufite intego yo gukemura ibibazo bijyanye no gusoma, ukora ku buryo buri mwana ashobora kubona uko asoma no kugaragaza ubushobozi bwose yifitemo.

    NABU yatangiye gukorera ibikorwa byayo mu Rwanda mu 2015, itumiwe n’Umuryango wa ‘Imbuto Foundation’, ariko yatangiye ku mugaragaro ku itariki 15 Ugushyingo 2021 muri Kigali Convention Centre.

    NABU kandi inasohora ibitabo by’abana mu ndimi zitandukanye, ikaba yarahawe igihembo cyo guteza imbere ikoranabuhanga rifasha abantu kugera ku bitabo no gukundisha abana gusoma mu rurimi gakondo rwabo.

    source : https://ift.tt/3lahI4o

  • Dr Uwineza yahembwe mu bagore 20 b’indashyikirwa muri siyansi muri Afurika – #rwanda #RwOT

    Ibi bihembo bizwi nka ‘L’Oréal-UNESCO For Women in Science Sub-Saharan Africa Young Talents Awards’ bitangwa buri mwaka aho bihabwa abagore babaye indashyikirwa mu byiciro bitandukanye bya siyansi birimo ubuvuzi, ubugenge, ibinyabuzima, imibare n’ibindi.

    Ibi bihembo bitangwa n’Ikigo cyo mu Bufaransa gikora ‘makeup’, amavuta n’imibavu cya L’Oréal Group binyuze mu kigo cyacyo gishinzwe guteza imbere imibereho myiza hibandwa ku bagore, Foundation L’Oréal ku bufatanye n’Ishami ry’Umuryango w’Abibumbye ryita ku Burezi, Ubumenyi n’Umuco (UNESCO).

    Umuhango wo gutanga ibi bihembo ku nshuro ya 12 wabereye mu Rwanda muri Kigali Convention Centre kuri uyu wa Kane, ndetse Annette Uwineza aza muri 20 babyegukanye.

    Uyu muhango witabiriwe n’abanyacyubahiro batandukanye barimo Ambasaderi w’u Bufaransa mu Rwanda, Antoine Anfré, Minisitiri w’Uburezi, Dr Uwamariya Valentine na Minisitiri w’Ikoranabuhanga na Inovasiyo, Ingabire Paula.

    Wanitabiriwe kandi n’abegukanye ikamba rya nyampinga w’u Rwanda barimo Iradukunda Liliane na Nimwiza Meghan.

    Visi Perezida Ushinzwe Ibikorwa muri L’Oréal Group akaba na Visi Perezida wa Foundation L’Oréal, Alexandra Palt, yagaragaje ko u Rwanda rwahawe kwakira uyu muhango kubera intambwe rwateye mu bijyanye n’uburinganire ndetse no guteza imbere siyansi.

    Yavuze ko COVID-19 yabaye imbogamizi ku burenganzira bw’abagore, aho ihohoterwa rishingiye ku gitsina n’ibindi bihungabanya uburenganzira bw’abagore byiyongereye.

    Yakomeje avuga ko ibyinshi bikorwa muri siyansi bitashoboka abagore batabigizemo uruhare, ndetse agaragaza ko abagore bakwiye guhabwa umwanya bakagira uruhare mu bushakashatsi butandukanye bukorwa muri siyansi.

    Yakunze siyansi kuva mu bwana

    Dr Uwineza uri mu begukanye iki gihembo ni umuganga mu Bitaro bya Kaminuza bya Kigali (CHUK) akaba n’umwarimu muri Kaminuza y’u Rwanda mu ishami ryigisha ubuvuzi.

    Amashuri yisumbuye yayize muri muri Ecole des Sciences de Byimana, mu ishami rya Bio-chimie, aho yavuye ijya mu yahoze ari Kaminuza Nkuru y’u Rwanda i Butare. Yarangije amasomo ye muri iyi kaminuza mu 2006 afite impamyabumenyi y’icyiciro cya kabiri cya kaminuza mu buvuzi rusange.

    Dr Uwineza afite impamyabumenyi y’ikirenga yakuye muri University of Liège, aho yaminuje mu bijyanye na Human/Medical Genetics.

    Yagiye akora ubushakashatsi butandukanye ariko bwose bufite aho buhuriye n’indwara z’uruhererekane mu muryango.

    Mu kiganiro yagiranye na IGIHE, yavuze ko yatangiye gukunda siyansi akiri muto.

    Ati “Nakunze siyansi kuva nkiri umwana muto nkimenya ubwenge. Numvaga ko nshaka kuba umuhanga muri siyansi, numvaga mfite amatsiko. Iyo nabonaga ikintu nibazaga impamvu, nkumva rero kuba namenya siyansi byamfasha kuba nasubiza ibibazo numva binteye amatsiko.”

    “Nagize Imana ngira abantu bo mu muryango wanjye na bo bize siyansi bamfasha kubona icyerekezo, bamfasha kwiga amasomo y’ibanze azamfasha gukora akazi gafite aho gahuriye na siyansi.”

    Yakomeje avuga ko abana bato b’abakobwa bafite inzozi zo kuzakurikirana ibijyanye na siyansi badakwiye guha amatwi ababaca intege.

    Ati “Umuntu ni we wiyubakira ubuzima bwe. Niba ukunda ikintu ntugacibwe intege n’ibyo abantu bakubwira ni wowe uzi ejo hawe hazaza n’icyo ushaka. Ikindi kintu nasaba abana b’abakobwa ni ukumenya ko iyo bize bibafungurira amarembo haba mu rwego rw’ubushakashatsi, haba mu kubona akazi.”

    Uretse Uwineza igihembo nk’iki cyanegukanywe na Motswedi Anderson ukomoka muri Botswana, Lenye Dlamini (Swaziland), Theresa Mazarire (Zimbabwe), Hendrina Shipanga (Namibia), Jacky Sorrel Bouanga Boudiombo (Gabon), Vinie Kouamou (Cameroun), Sephora Mianda Mutombo (RDC) na Ruth Nana Njantang (Cameroun).

    Hahembwe kandi Bibi Sharmeen Jugreet wo mu Birwa bya Maurice, Agil Katumanyane (Ugand), Mary Murithi (Kenya), Hyam Omar Abass Ali (Sudani), Menonli Adjobimey (Benin), Motunrayo Coker (Nigeria), Esther Laurelle M. Deguenon (Benin), Abena Dufie Wiredu Bremang (Ghana), Sandra Jusu (Sierra Leone), Ndeye Maty Ndiaye (Senegal) na Lois Okereke wo muri Nigeria.

    Kugira ngo umuntu ajye mu bahatanira ibi bihembo arabisaba, ubundi hakabaho itsinda ry’inzobere ritoranya abujuje ibisabwa ari nabo bahembwa.

    Mu bigenderwaho hatoranywa abahembwa harimo kuba bafite imishinga ishobora gufasha Umugabane wa Afurika kuva mu bibazo urimo. Muri iyi mishinga harimo ijyanye n’imicungire y’amazi, gupima kanseri n’indwara z’uruhererekane mu miryango, kurwanya malaria n’ibindi.

    Umuhango wo gutanga ibi bihembo witabiriwe n’abantu batandukanye

    Ni igikorwa cyari cyiganjemo abagore n’abakobwa bakora mu bijyanye na siyansi

    Abitabiriye uyu muhango bagize umwanya wo gusabana no kumenyana

    Hari inyandiko nto zisobanura ibikorwa by’abagore n’abakobwa bahembwe

    Bamwe mu bitabiriye iki gikorwa basoma amateka y’abagore n’abakobwa bahembwe

    Ni ku nshuro ya mbere u Rwanda rwakira uyu muhango wo gutanga ibi bihembo bizwi nka For Women in Science Awards

    Ambasaderi w’u Bufaransa mu Rwanda, Antoine Anfré ari mu bari bitabiriye uyu muhango

    Minisitiri w’Uburezi, Dr Uwamariya Valentine aganira na Minisitiri w’Ikoranabuhanga na Inovasiyo, Paula Ingabire

    Nimwiza Meghan wabaye Nyampinga w’u Rwanda yitabiriye uyu muhango

    Minisitiri w’Uburezi, Dr Uwamariya Valentine ashyikiriza, Dr Uwineza Annette igihembo yegukanye

    Dr Uwineza yahembwe mu bagore 20 bo muri Afurika yo munsi y’ubutayu bwa Sahara b’indashyikirwa muri siyansi

    Visi Perezida Ushinzwe Ibikorwa muri L’Oréal Group akaba na Visi Perezida wa Foundation L’Oréal, Alexandra Palt yasabye ko abagore barushaho guhabwa umwanya mu bijyanye na siyansi

    source : https://ift.tt/2ZnZO6m

  • Rulindo: Ambasade ya Israël yoroje inka imiryango 20 itishoboye – #rwanda #RwOT

    Izi nka zatanzwe kuri uyu wa 25 Ugushyingo 2021 ku bufatanye n’Ikigega cya Israël cy’Iterambere n’Ubufatanye, MASHAV, gisanzwe gitanga ubufasha ndetse kigakora imishinga itandukanye mu bihugu bimwe bya Afurika.

    Umwe mu bahawe inka, Mukeshimana Honorine, yavuze ko kuba yorojwe atabona icyo abigereranya na cyo kuko ubu agiye kujya aha abana amata ndetse anafumbire imyaka ye.

    Ati “Nakoraga imirimo y’ubuhinzi ariko kubera guhinga nta fumbire singire icyo nsarura, ariko ubu ngiye guhinga nkoreshe ifumbire nsarure mpaze umuryango kandi nsagurire n’isoko. Ikindi ubu abana banjye batatu ntibazongera kubura amata ku meza.

    Uwitwa Niringiyimana Innocent we yagize ati “Inzozi zanjye zibaye impamo, ndashimira cyane ambasade ya Israël ndetse na guverinoma y’u Rwanda kubwo gushyiraho iyi gahunda ya Girinka. Inka mbonye ngiye kuyitaho, abana banjye banywe amata nsagurire n’abaturanyi.”

    Umuyobozi w’agateganyo w’Akarere ka Rulindo, Bizumuremyi AlBashir, yashimye ambasade ya Israël mu Rwanda ku bwo gushyigikira gahunda ya Leta yo koroza imiryango ikennye, aho yasabye abazihawe kuzifata neza kugira ngo zizababyarire umusaruro.

    Ati “Iyo umuntu ahawe inka aba agize ubushobozi bwinshi. Icya mbere aba abonye amata, iyo ubonye inka uba ubonye ifumbire, ni ukuvuga ngo umuturage wahingaga azeza, azagurisha atere imbere mu by’ukuri iyo umuntu amaze guhabwa inka ni igihe gito akaba avuye mu bukene, agatangira akiteza imbere.

    Ambasaderi wa Israël mu Rwanda, Dr. Ron Adam, yavuze ko iki gihugu gishimishijwe cyane no gutanga umusanzu muri gahunda ya guverinoma y’u Rwanda yo guteza imbere imibereho y’abaturage, kuko ari kimwe mu bishimangira umubano mwiza ibihugu byombi bifitanye.

    Ati “Israel yishimiye gutanga umusanzu muri gahunda ya Girinka yatangijwe na Perezida Paul Kagame. Twabonye ko inka ari bwo bufasha bukomatanyije ushobora guha umuntu uri mu bukene, kuko abona amata, ifumbire ndetse akaba yayigurisha agakuramo amafaranga.”

    Si ubwa mbere iyi amabasade itanze inka kuko mu 2020 no muri Kamena 2021 yoroje imiryango 40 yo mu Turere twa Gisagara na Nyamasheke ibintu ivuga ko izakomeza gukora mu rwego rwo gufasha imiryango itishoboye kwikura mu bukene.

    Kuva iyi gahunda yatangira mu 2006 imiryango 10.264 yo mu Karere ka Rulindo ni yo imaze guhabwa inka muri iyi gahunda ya Girinka.

    Abahawe inka biyemeje kuzifata neza kugira ngo zizabyarire umusaruro

    Ambasaderi Adam yavuze ko Israël izakomeza gutanga umusanzu mu gufasha Abanyarwanda kwikura mu bukene

    Inka 20 ni zo zorojwe imiryango itishoboye mu Karere ka Rulindo

    source : https://ift.tt/3nUlsIR