Author: webrwanda

Ni ikigo cyafunguwe mu Murenge wa Karangazi ku wa 21 Kanama 2025.

Ubwo cyatahwaga kandi, Heifer International ku bufatanye n'ikigo cyitwa Hello Tractor bahaye abahinzi bo muri ako Karere imashini 10 zihinga, bazishyura mu byiciro mu rwego rwo kubafasha kuzamura umusaruro w'ubuhinzi

Umuyobozi w'Umuryango Heifer International mu Rwanda, Ruzibuka Verena yatangaje ko ku ikubitiro mu Ugushyingo 2024 hari imashini 15 zihinga bahaye abahinzi mu Karere ka Kayonza zishyurwa mu byiciro, zimaze gufasha mu mirimo y'ubuhinzi ku buso burenga hegitari 3000 buhingwaho n'abarenga 6000.

Yagaragaje ko icyo kigo giherereye i Kayonza hamaze guhugurwa abashinzwe kwita kuri izo mashini barenga 20 kugira ngo bajye batanga serivisi zo kuzikora igihe zagize ikibazo.

Ruzibuka yakomeje avuga ko bifuza ko iki kigo kizatanga serivisi zitandukanye hakoreshejwe ikoranabuhanga cyane cyane imashini zihinga.

Ati 'Iki kigo twifuza ko gikomeza gutanga umusaruro ku bahinzi n'aborozi bo muri aka gace aho bazajya bakora ubuhinzi bifashishije ikoranabuhanga cyane cyane imashini zihinga n'ibindi bikoresho bihinga kandi bakabikora babungabunga ibidukikije.'

Umuyobozi w'Akarere ka Nyagatare, Gasana Stephen yavuze ko iki kigo cyafunguwe kigiye gufasha mu kuzamura cyangwa kugera ku cyerekezo cy'ako karere cyo kuba igicumbi cy'ubuhinzi n'ubworozi mu Rwanda.

Ati 'Ibi bigiye gufasha mu cyerekezo cy'Akarere ka Nyagatare kubera ko twifuza kuba igicumbi cy'u Rwanda cy'ubuhinzi n'ubworozi. Turashimira Leta iri kuduha ibyangombwa bikenewe kugira ngo dushobore kubigeraho.'

Ibarura ry'abaturage riheruka gukorwa mu 2022 ryagaragaje ko 59,3% by'abaturage ba Nyagatare bakora ubuhinzi na ho 39,2% bakora ubworozi.

Gasana yavuze ko mu 2024/2025, ubutaka bwahinzwe muri ako Karere buri ku buso bwa hegitari ibihumbi 83.190, mu ubwahinzwe bukaba bwaratanze umusaruro ungana na toni ibihumbi 261.640 muri ako karere.

Kuri ubwo buso burenga hegitari ibihumbi 83, ubutaka bwahinzwe hakoreshejwe uburyo bw'imashini ni hegitari ibihumbi 7.654 ku buso.

Yagize ati 'Ibyo rero byagiraga ingaruka ku bikorwa dukora harimo kudahinga ubutaka bwose, kudahingira igihe ndetse n'izindi ngaruka zitandukanye. Twizeye rero y'uko izi serivisi twegerejwe zigiye kudufasba gushyira mu bikorwa gahunda za Leta zitandukanye zirimo nkaho twari twaratangiye guhinga ubutaka bwari bwaragenewe isuri kubera ko twashakaga abakozi benshi mu gihe kimwe.'

Umuhinzi wo mu Murenge wa Karangazi mu Karere ka Nyagatare, Olivier Niyitegeka, yavuze ko kuva yatangira guhinga akoresheje imashini umusaruro wiyongereye ugereranyije n'abakoresha amasuka muri rusange kubera ko umusaruro wiyongereye cyane.

Ati 'icyiza cyo guhinga ukoresheje izi mashini ni uko bitandukanye no guhingisha amasuka kuko ndibuka mu mwaka ushize nakoresheje imashini ihinga gusa hari umuntu duhanye imbibi, nahinze ubuso bungana na hegitari we ahinga ubuso bungana na hegitari 2 ubwo umusaruro uza gutandukana kuko njyewe nakoresheje imashini we ahingisha amasuka toni 7 n'ibiro 700 noneho we akuramo toni 9 muri hegitari 2.'

Umunyabanga wa Leta muri Minisiteri y'Ubuhinzi n'Ubworozi, Dr. Telesphore Ndabamenye, yibukije urubyiruko rwo muri Nyagatare ko rukwiriye kubyaza umusaruro ibikorwa nkibi baba begerejwe mu rwego rwo guteza imbere ubuhinzi n'ubworozi bakoresha imashini zigezweho mu kuzamura umusaruro w'ubuhinzi.

Ati 'Iyi serivisi y'imashini zihinga n'ibijyanye na yo ni nziza kubera ko ihanga imirimo mu buryo butandukanye bigatuma abantu biteza imbere. Turakangurira rero urubyiruko rwo muri aka Karere gukoresha izi mashini kubera ko aya ari amahirwe akomeye babonye. Twifuza ko kandi abahinzi bo muri Nyagatare batangira kwiga kuzikoresha neza ndetse bakazibyaza umusaruro.'

Umuyobozi ushinzwe ibikorwa muri Hello Tractor, Folu Okunade, yagaragaje ko nubwo hari intambwe yatewe, mu Rwanda hagikenewe izindi mashini kugira ngo umusaruro w'ubuhinzi ukomeze wiyongere mu gihugu

Umuyobozi w'Umuryango Heifer International mu Rwanda, Ruzibuka Verena yasabye ibigo bitandukanye gukomeza gushora imari mu bijyanye no kongera izi mashini kugira ngo zibashe kugera mu gihugu hose

Umunyabanga wa Leta muri Minisiteri y'Ubuhinzi n'Ubworozi, Dr. Telesphore Ndabamenye, yibukije urubyiruko rwo muri Nyagatare ko rukwiriye kubyaza umusaruro ibikorwa begerejwe byo gukoresha imashini zigezweho mu buhinzi

Abahinzi bahawe inguzanyo na BDF izabafasha kwishyura izi mashini

Uyu mugabo yatawe muri yombi ku bufatanye bwa RIB, Polisi n'abaturage bagaragaje ikibazo cy'isaranganywa ry'amazi ridakorwa neza.

Iperereza ry'ibanze rigaragaza ko ubwo habagaho ikibazo cy'igabanyuka ry'amazi, kuva mu kwezi kwa Gicurasi 2025, uyu mugabo yagiye yaka bamwe mu baturage amafaranga kugira ngo abashyire ku muyoboro uvana amazi ku isoko uyajyana mu mavomo yabo bidaciye ku kigega rusange abandi bafatiraho nyamara binyuranyije n'amabwiriza ya WASAC Group.

Iti 'Ibi bikaba byaragize ingaruka ku baturage bafatiraga amazi aturuka mu kigega kiri mu Kagali ka Ruhanga kigaburira imidugudu ine ari yo; Ruhanga, Rugende, Mirama na Nyagacyamo.'

RIB yahamije ko ukekwaho icyaha afungiye kuri Sitasiyo ya RIB ya Kacyiru mu gihe iperereza rikomeje hanatunganywa dosiye kuri iki cyaha ikazashyikirizwa Ubushinjacyaha.

RIB na Polisi byaburiye abakoresha inshingano n'ububasha bahabwa mu nyungu zabo bwite kubihagarika kuko bigira ingaruka ku iterambere ry'umuturage n'Igihugu muri rusange ndetse no kuri bo ubwabo kuko bihanwa n'amategeko.

RIB ifatanyije na Polisi ikomeje iperereza ku bikorwa bigayitse nk'ibi mu bindi bice by'Igihugu, inashimira abakomeje gutanga amakuru kugira ngo ababifatirwamo bahanwe nk'uko amategeko abiteganya.

#RIB ku bufatanye na @Rwandapolice yafunze Manirakiza Straton, umukozi mu Kigo gishinzwe Amazi, Isuku n’Isukura (WASAC) ushinzwe ibikorwa byisanwa ry'umuyoboro w'amazi wa Ruhanga mu Murenge wa Rusororo, ukurikiranweho icyaha cya ruswa.

Uyu afunzwe nyuma yuko abaturage…

— Rwanda Investigation Bureau (@RIB_Rw) August 22, 2025

RIB yavuze ko izakomeza gukurikirana ibyaha nk’ibi ngo ababikora bahanwe

Ubusanzwe mu Kirwa cya Nkombo usanga abagore baho bakunze kugira umuco wo gukarabya ibirenge abagabo babo cyangwa kubuhagira umubiri wose mu rwego rwo kubereka ko babakunda kandi babubaha.

Ni umuco wa kera ukigaragara muri iki Kirwa, ndetse abagore babikora baganiriye na TV1 bagaragaza ko banezezwa na byo kuko ari ikimenyetso cy'urukundo no kubaha abagabo babo.

Umwe ati 'Hari n'ubwo umwoza umubiri wose, iyo akubwiye ngo nubwo bimeze bitya ndumva naniwe ndashaka koga umubiri wose ariko hari nubwo wafata amazi ukamwoza ibirenge. Ubwo iyo atagiye ku kiyaga ngo ajye koga ushobora kumwoza umubiri. Ubwo se nabura kubimukorera? uwo ni umukunzi wanjye sinabura kumwoza umubiri wose.'

Yakomeje ati 'Ntabwo ari igikoloni kuko ni byo mama na data bakuriyemo kandi baraducukije, barabitubwiriza nanjye sinabireka. Ubwo nabikuye kuri mama na data.'

Undi yagaragaje ko ari umuco wa kera ariko kuri ubu usanga abato bo batabikozwa.

Ati 'Ni ko twabigenzaga ariko abubu bo ntabwo bakibikora.'

Abagabo bozwa n'abagore babo na bo bavuga ko babyishimira kuko ari ikimenyetso cyiza cy'urukundo kuri bo.

Umwe ati 'Nanjye Papa apfuye vuba, mama yamwozaga ibirenge mubona. Umugore wanjye na we namuzanye abona mama yoza data ibirenge. Umugore wanjye arabikora rwose. Si rimwe si kabiri, aranyuhagira akanyoza ibirenge.'

Undi ati 'Umugore koza umugabo we ni urukundo, baba bakundana, nanjye baranyogeje.'

Umusaza w'imyaka 50 yagaragaje ko umugore we bamaranye igihe akunze kumwoza ibirenge kandi ari ikimenyetso cyiza.

Ati 'Nzana umugore wanjye yatangiye kunyoza amaguru, iyo nagiye gusinda nkaza nazubaye arandeba akavuga ngo umugabo yazubaye reka mwoze, akanyambura akanyoza.'

Abagore bo mu Kirwa cya Nkombo usanga ari bo bakora imirimo ivunanye irimo gutwara imizigo no guhinga mu gihe abagabo bakunze gukora akazi ko kuroba.

Abagore bo ku Nkombo ni bo bakunze gukora imirimo ivunanye

Abagabo bo ku Nkombo bakunze gukora imirimo y’uburobyi

Byatangajwe ubwo abarenga 40 bari mu cyiciro cya mbere muri igi gahunda bashyikirizwaga impamyabushobozi nyuma yo kumara amezi atandatu bahabwa amasomo y'imyuga n'ubumenyi ngiro.

Umuyobozi ushinzwe ibikorwa muri BK Foundation, Pascal Nkurunziza, yabasabye kutirara ahubwo bagakoresha ubumenyi bahawe biteza imbere ndetse bakagirira igihugu akamaro.

Umuyobozi wa BK Foundation yavuze ko abana barangije kwiga hari igihe birara bakanga imirimo ngo iraciciritse kandi iyo bashaka ntayihari ugasanga bikomeje gukurura ubushomeri kandi bashoboye.

Yagize ati 'Dushaka kubona abana bishyuriwe na BK Foundation biteza imbere bakaba abantu bahindura n'umuzima bw'abandi, kuko aba ni abana baba baragize amahirwe macye yo kudakomeza amashuri asanzwe kubera ibibazo bitandukanye ariko tukongera tukabaha amahirwe yo kuzagira icyo bimarira mu buzima.'

Nkurunziza kandi yasobanuye ko gufasha aba bana biri mu mushinga mugari wa BK Foundation wo guteza imbere uburezi mu bana batagize amahirwe yo gukomeza amasomo, bagahabwa amahirwe yo kwiga imyuga mu mezi atandatu bishyurirwa na BK Foundation.

Yavuze ko buri mwaka hatoranywa abana 200 bateganyirizwa ingengo y'imari ya miliyoni 42 Frw izabafasha kubona amasomo.

Aba 40 basoje ni icyiciro cya mbere muri 200 batoranyijwe binyuze mu mushinga w'Umuryango Nyafurika ukora ivugabutumwa ukorera mu Rwanda (African Evangelistic Enterprise, AEE) mu mushinga wayo wa Igire Ubaka Ejo.

Uyu muryango kandi wahaye aba banyeshuri ibikoresho byo kwifashisha gushyira mu bikorwa ibyo bize bifite agaciro k'arenga miliyoni 15 Frw.

Inema Vanessa mu bishyuriwe binyuze muri ubwo buryo yavuze ko mbere yo kwiga iyi myuga ubuzima bwari bumugoye cyane ko ari imfubyi ndetse akaba afite n'ubumuga.

Icyakora agaragaza ko ubu afite ibyiringiro by'ejo hazaza kuko yabonye n'igikoresho kizamifasha kugera ku nzozi zo gushinga atelier ye.

Yagize ati 'Nkimara kwiga nahise nshaka akazi nishyiramo ko ngiye gukora cyane nkagura imashini yanjye nkarekera gukorera abandi. None ubwo imashini nyibonye ngiye kurekera gukorera abandi nikorere, kugira ngo nzagere aho nshinga atelier yanjye nanjye njye ku isoko ry'umurimo nk'abandi.'

Umuyobozi ushinzwe guhuza ibikorwa mu mushinga wa Igire Ubaka Ejo, Albert Mabasi, yavuze ko ubusanzwe iyo umuntu yumvise Banki ya Kigali atekereza serivisi z'imari gusa gufasha aba bana bigiye guhindura imyumvire ya benshi bakamenya ko ari ikigo cyita no ku bana batagize amahirwe yo kwiga ngo barangize nk'abandi.

Yagize ati 'Kubona ikigo nk'iki kirenga ku kureba inyungu zacyo ahubwo kigatangira no kwita ku mibereho y'abantu, kigakorana n'umuryango nyarwanda mu kuzamura imibereho y'abantu, ni ikintu gikomeye cyane, ndetse twifuza ko ubu bufatanye bwakomeza.'

Aba bana barangije ni abo mu Karere ka Kayonza, basoje amasomo ajyanye gusudira, gukanika imodoka, kudoda, guteka, gukora inkweto n'ibindi bikoze mu mpu, gukora imisatsi n'inzara, kubaka n'ibindi.

Abanyeshuri 40 basoje amasomo y’imyuga bishyuriwe na BK Foundation

Abasoje amasomo y’imyuga n’ubumunyingiro bishyuriwe na BK Foundation bahawe impamyabushobozi

Abanyeshuri bari basoje amasomo y’imyuga n’ubumenyingiro ku nkunga ya BK Foundation bashimiwe

Umuyobozi ushinzwe ibikorwa muri BK Foundation, Pascal Nkurunziza yasabye abana basoje amasomo kuyabyaza umusaruro

Prof Olu Akinkudge ni impuguke mu bijyanye n'ubukungu, ubifitiye Impamyabumenyi y'Ikirenga yakuye muri Kaminuza ya Ibadan yo muri Nigeria.

Mu bushakashatsi yakoze harimo ubwerekana uburyo inzego zitandukanye z'ubukungu zuzuzanya ndetse n'ibyago zigenda zitezanya.

Ubu bukoreshwa muri Nigeria mu kugena agaciro k'ibintu, imisoro n'ibindi.

Prof Akinkuge yayoboye za kaminuza zitandukanye zo mu bihugu nka Nigeria, Afurika y'Epfo, Zambia, Eswatini, Botswana, Namibia, Canada, Leta Zunze Ubumwe za Amerika, no mu Bwongereza.

Si mu burezi gusa yakoze kuko yagiye ahabwa n'inshingano zitandukaye nko kuba umujyanama w'ibigo bitandukanye birimo Ishami rya Loni ryita ku Iterambere (UNDP), Banki ya Afurika itsura Amajyambere(AfDB), ndetse n'Umuryango wa Commonwealth.

Muri UoK uyu muyobozi azafasha iyi kaminuza mu gukomeza umubano wayo na kaminuza mpuzamahanga mu kongerera ubushobozi abanyeshuri n'abarimu

Bizakorwa binyuze mu kwiga kuri izo kaminuza no kubona amahugurwa aziturutseho, hagamijwe kugira iyi kaminuza imwe mu zikomeye ku ruhando mpuzamahanga.

Yitezweho gushyiraho gahunda zitandukanye zirimo izo kongerera ubushobozi kaminuza mu bijyanye n'imyigishirize, guteza imbere ubukungu ndetse no guha amahirwe abanyeshuri benshi yo kwiga muri Kaminuza ya Kigali.

Kaminuza ya Kigali isanzwe ifite intego ihura n'iy'igihugu yo kugira u Rwanda igicumbi cy'ubumenyi, Prof. Akinkugbe akaba aje gufasha iyi kaminuza mu rugendo rwo kugera kuri iyi ntego.

Kaminuza ya Kigali yatangiye mu 2013 ifite abanyeshuri 35 ariko ubu yakuze ku buryo ifite abanyeshuri barenga 8000 biga mu mashami atandukanye arimo irya Kigali n'irya Musanze.

Prof. Olu Akinkugbe yagizwe Umuyobozi Mukuru Wungirije wa Kaminuza ya Kigali ushinzwe amasomo

Amanota y'ibizamini bya Leta yatangajwe ku wa 19 Kanama 2025, Minisiteri y'Uburezi itangaza ko ibigo byigenga byatsindishize neza ku kigero cya 99%.

Umuyobozi w'Ishuri rya Winners Mount Academy, Muhizi Elie, yagaragaje ko bishimira kuba abanyeshuri babo bakoze ibizamini bya Leta baratsinze neza ku kigero cya 100%.

Muri bo 80% bahawe ibigo bya Leta bigamo barara mu gihe abandi bahawe ibyo kwigamo bataha.

Ati 'Batsinze 100/100, ibanga dukoresha ni ukugirira abana icyizere no gukora cyane. 80% bahawe ibigo biga bararamo.'

Yagaragaje ko iri ishuri rifite umwihariko unashingiye ku cyizere rikomeje kugirirwa n'ubunyamwuga mu myigishirize yayo bituma umubare w'abarigana ugenda wiyongera.

Yagaragaje ko umwihariko wabo ushingiye ku kuzamura indimi zose zikamenyekana neza mu bana, gufasha abafite intege nke mu myigire kugira ngo bajyane n'abandi no kuba bakorana na Leta y'u Budage mu kubona abarimu hagamijwe guteza imbere indimi no kuba abana bakwigirira icyizere.

Yagaragaje kandi ko iri shuri rishyira imbere ikoreshwa ry'ikoranabuhanga no gufasha abanyeshuri kugira ubumenyi kuri ryo kandi ko kuri ubu hagiye gushyirwaho icyumba kizajya cyifashishwa mu bushakashatsi ku banyeshuri n'abarimu.

Ati 'Ikoranabuhanga, mu gihe gito tuzaba dufite icyumba cy'ikoranabuhanga (ICT room) kigomba gufasha abanyeshuri n'abarimu mu kwiga no gukora ubushakashatsi.'

Mu bindi bifasha abana harimo ibikorwa bya nyuma y'amasomo bibafasha ku ruhuka no gusabana birimo imikino itandukanye nk'umupira w'amaguru, Volleyball, imikino njyarugamba n'imbyino gakondo.

Winners Mount Academy yashinzwe mu 2018, itangirana abanyeshuri 20, ariko kubera icyizere yakomeje kugirirwa n'ubunyamwuga mu myigishirize yayo, umubare w'abanyeshuri wagiye wiyongera.

Kuva mu 2020 kugeza 2022, abanyeshuri bariyongereye bagera ku bari hagati ya 300 na 400, abakozi bayo bagera hagati ya 20-25.

Muri 2022-2024 abakozi na bo bariyongereye bagera kuri 30, na ho mu 2025, abanyeshuri banyuze mu maboko y'iki kigo, bamaze kugera kuri 700.

Ubwo hizihizwaga imyaka irindwi iki kigo kimaze, Muhizi yagaragaje ko gifite intego zikomeye mu myaka itanu iri imbere, aho giteganya kugeza ku kwakira abanyeshuri 2000 no gutanga imirimo ku bakozi barenga 500.

Umuyobozi w'Ishuri rya Winners Mount Academy, Muhizi Elie, yagaragaje ko bishimira kuba abanyeshuri babo bakoze ibizamini bya Leta baratsinze neza ku kigero cya 100%

Bamwe mu banyeshuri biga muri Winners Mount Academy

Ubu bukangurambaga bwabereye mu turere twa Nyanza na Rusizi, bwibanze cyane ku batwara abagenzi kuri moto bo muri utwo turere, bwari bukubiyemo ubutumwa bubashishikariza kwitwararika birinda uburangare n'amakosa ashobora kuba intandaro y'impanuka zishobora kubavutsa ubuzima cyangwa zikabakomeretsa.

Umuyobozi wungirije mu Ishami rya Polisi rishinzwe umutekano wo mu muhanda ushinzwe gukurikirana abatwara abagenzi kuri moto by'umwihariko, CSP Vincent Habintwari, yagarutse ku myitwarire ikwiriye kubaranga mu kazi kabo birinda icyabateza impanuka no gutesha agaciro umwuga bakora.

Ati 'Abamotari mugira uruhare runini mu gutwara abantu, ariko nanone mugomba no kugira uruhare mu kurengera ubuzima. Umurimo mukora ukwiye gukoranwa ubunyamwuga, ikinyabupfura no kurangwa n'isuku kandi mukubahiriza amategeko agenga umuhanda kugira ngo akazi mukora gakorwe neza, kabashe kabagirira akamaro n'imiryango yanyu n'igihugu muri rusange.'

CSP Habintwari yakomeje ababwira ko hari abamotari bakora uyu mwuga bakunda kugaragara mu makosa arimo guparika no kunyura ahatemewe, gupakira ibirusha ikinyabiziga ubushobozi, guteza akavuyo ahabaye impanuka, kutagira ibyangombwa byuzuye, gukora amasaha y'umurengera atuma bananirwa bikabije no kwinangira kwishyura amande, abashishikariza kuyacikaho kuko uwabaswe nayo bimubyarira ibyago birimo no kuba yakora impanuka agatakaza ubuzima.

CSP Habintwari yasoje ashimangira ko hazakomeza gushyirwa imbaraga mu gushishikariza abakoresha umuhanda kubahiriza amategeko y'umuhanda ku bufatanye n'abandi bafatanyabikorwa kugira ngo ubutumwa bwo kurwanya impanuka bugere kuri benshi mu rwego rwo kurengera ubuzima bw'Abaturarwanda, ariko na none avuga ko abazakomeza kuvunira ibiti mu matwi babirengaho nkana, bazajya babihanirwa nk'uko biteganywa n'itegeko.

Umuyobozi w'agateganyo w'Akarere ka Nyanza, Kajyambere Patrick yashimiye Polisi y'u Rwanda ku mikoranire n'ubufatanye, asaba abakora umwuga wo gutwara abagenzi kuri moto bo mu Karere ayobora, kugaragaza uruhare rwabo mu gukumira impanuka zo mu muhanda n'imikorere myiza kugira ngo babashe kwiteza imbere.

Mu butumwa bwatangiwe mu Karere ka Rusizi, umuyobozi wungirije ushinzwe ubukungu n'iterambere muri ako karere, Habimana Alfred yasabye abamotari kudapfusha ubusa aya mahirwe, barushaho kubahiriza ibyo basabwa mu rwego rwo kurinda ubuzima bwabo n'ubw'abandi basangiye umuhanda.

Gerayo Amahoro ni ubukangurambaga buhoraho bukorwa na Polisi y'u Rwanda kuva mu mwaka wa 2019, hagamijwe gushishikariza abakoresha umuhanda kwirinda ikosa iryo ari ryo ryose ryaba intandaro y'impanuka zituruka ku myitwarire idakwiriye n'uburangare.

Abitabiriye ubukangurambaga bishimiye uburyo Polisi ibegera, ibagezaho ibiganiro nk'ibi bibafasha kurushaho gusobanukirwa inshingano n'uruhare rwabo mu guharanira umutekano wo mu muhanda urambye no gutanga serivisi inoze, bashimangira ko bazakomeza gukaza ingamba zo kwirinda impanuka n'icyabangamira urujya n'uruza rw'ibinyabiziga cyose.

CSP Vincent Habintwari yaburiye abamotari bafite imyitwarire mibi

Tariki 22 Kamena 2025 nibwo inkuba yakubise umunara wo mu Karere ka Rusizi wifashishwaga mu gufata ibipimo by'ubutaka hakoreshejwe ikoranabuhanga.

Abaturage batari guhabwa serivisi harimo abakeneye kugabanyisha ubutaka, abakeneye kumenya imbibi z'ubutaka, n'abakeneye kubarirwa ngo bazahabwe ingurane.

Umuyobozi w'Akarere ka Rusizi, Sindayiheba Phanuel yavuze ko impamvu izi serivisi zitari gutangwa ari ukubera ko inkuba yakubise umunara wifashishwaga.

Ati 'Kuva tariki 22 Kamena, mu Karere kose nta kintu cy'ubutaka turi gukora, kubera ko umunara inkuba yarawukubise, dutegereje ko abahanga baza bagasimbuza icyumba cyangirirtse, kugira ngo serivisi yo gupima ubutaka yongere gutangwa'.

Serivisi zitari gutangwa n'izitangwa hagendewe ku ikoranabuhanga rya GPS.

Biturutse ku kibazo cy'inkuba yakubise uwo munara, ubu mu Karere ka Rusizi abatwara ibinyabiziga bakenera kuyoborwa n'ikoranabuhanga rya GPS nabyo ntabwo biri gushoboka.

Mu ishami rishinzwe ubutaka n'imyubakire mu Karere ka Rusizi abaturage bari guhabwa serivisi ni abafatiwe ibipimo by'ubutaka mbere y'amezi abiri ashize.

Raporo ya 2024 y'Urwego rw'Igihugu rw'Imiyoborere RGB, ku ishusho y'uko abaturage babona imiyoborere n'imitangire ya serivisi mu nzego zibegereye igaragaza ko Akarere ka Rusizi kari imbere mumitangire ya serivisi z'ubutaka n'imyubakire mu Ntara y'Iburengerazuba kuko gafite abaturage 66,2% bashima izi serivisi.

Nubwo bimeze gutyo ariko mu gihe iri koranabuhanga rya GPS ritasubira ku murongo vuba hari impungenge ko abaturage bashima izo serivisi bagabanuka.