Author: webrwanda

Sitasiyo nshya yafunguwe na Vivo Energy Rwanda kuri uyu wa Gatatu tariki 27 Mata 2022. Umuyobozi wa Vivo Energy Rwanda, Saibou Coulibaly yavuze ko kuva mu myaka itatu yashize bakomeje gushyira imbaraga mu kwagura ibikorwa byabo bagamije kuba ikigo cya mbere gitanga serivisi z'ibikomoka kuri peteroli mu Rwanda.

Ati 'Twaguye ibikorwa byacu, dukuba inshuro ebyiri umubare wa sitasiyo za Engen kuva mu 2020. Gutangiza iyi sitasiyo nshya hano muri Kigali no kwagura ibikorwa byacu hirya no hino mu gihugu ni ikigaragaza ko ubukungu bw'igihugu cyacu burimo gukura vuba.'

Sitasiyo Engen Nyakabanda yafunguwe kuri uyu wa Gatatu ni imwe muri aka gace ndetse ikaba izajya inatanga izindi serivisi zirimo kugira iguriro n'izindi serivisi zizafasha mu guhaza ibyifuzo by'abakiliya.

Visi Perezida wa Vivo Energy muri Afurika y'Amajyepfo n'Uburasirazuba, Hans Paulsen yavuze ko ibyo bakora byose baharanira guhaza isoko ry'u Rwanda.

Ati 'Dushaka kuvugurura umuhate wacu wo guhaza isoko ry'u Rwanda. Dukomeje kureba uko twajya ahandi hari amahirwe y'ishoramari kandi u Rwanda ni igihugu gikurura abashoramari muri uru rwego rw'ingufu.'

Yakomeje agira ati 'Gukomeza gusunika turenga imbibi za serivisi dutanga, ikoranabuhanga no guhanga ibishya nibyo dukora. Kandi duharanira kugira uruhare mu mibereho y'abakiliya bacu mu buryo bubagirira akamaro.'

Ifungurwa ry'iyi sitasiyo nshya ya Vivo Energy Rwanda mu Mujyi wa Kigali ryahuriranye n'uruzinduko Umuyobozi Mukuru wa wa Sosiyete ya Vivo Energy ku Isi, Stan Mittelman yagiriye mu Rwanda ku nshuro ye ya mbere.

Stan Mittelman wari witabiriye iki gikorwa yashimiye Leta y'u Rwanda ikomeje korohereza abashoramari, agaragaza ko byose babivoma mu miyoborere myiza irangajwe imbere na Perezida Kagame.

Ati 'Ni iby'agaciro kuri njye kuba ndi hano uyu munsi kugira ngo nishimire ifungurwa rya sitasiyo nshya. Nishimiye by'umwihariko kuba mu Rwanda, igihugu cy'imisozi 1000 ndetse n'inseko 1000.'

Yakomeje agira ati 'U Rwanda rwabereye urugero Isi biturutse ku mpinduramatwara mu nzego zose z'ubuzima bw'igihugu n'ubucuruzi muri rusange. Twabonye igihugu kiba igihangange ku Isi, turashimira ubuyobozi bwiza. Vivo Energy yishimira gukorana n'u Rwanda no kugira uruhare mu nkuru y'ugukura no gutera imbere kwarwo.'

Muri Werurwe 2019 ni bwo Vivo Energy yinjiye ku isoko ry'u Rwanda. Ubu imaze imyaka igera kuri 10 itangiye ibikorwa byayo muri Afurika, ikorera mu bihugu 23 mu izina rya ENGEN na Shell.

Vivo yanagiranye amasezerano na sosiyete yo muri Leta Zunze Ubumwe za Amerika imenyerewe gutegura amafunguro yihuse azwi nka 'Fast Food', KFC (Kentucky Fried Chicken) aho icuruza ibikorwa byayo ahari station za ENGEN.

Hafunguwe sitasiyo nshya ya lisansi mu Nyakabanda

Umuyobozi Mukuru wa wa Sosiyete ya Vivo Energy,Stan Mittelman yahaye lisansi abamotari

Umuyobozi Mukuru wa wa Sosiyete ya Vivo Energy,Stan Mittelman yishimiwe n’abamotari bari bamaze guhabwa lisansi y’ubuntu

Abakozi ba Vivo Energy Rwanda bahise batangira gutanga serivisi

Umuyobozi Mukuru wa wa Sosiyete ya Vivo Energy, Stan Mittelman yashimiye ubuyobozi bw’igihugu bukomeje guteza imbere ishoramari

---

Source : http://igihe.com/amakuru/u-rwanda/article/vivo-energy-rwanda-yafunguye-sitasiyo-nshya-mu-nyakabanda

Iyi nama izaba ku wa 3-6 Gicurasi 2022, izitabirwa n'ibihugu 18 bya Afurika biri mu Muryango wa Commonwealth byibumbiye mu Ihuriro ry'Inzego zishinzwe kurwanya ruswa muri Commonwealth Africa.

U Rwanda rwahawe kuyakira cyane ko ari rwo ruzaberamo Inama ya Commonwealth [CHOGM] iteganyijwe kubera ku butaka bwarwo mu cyumweru cyo ku wa 20 Kamena 2022.

Ni inama yateguwe hagamijwe kumva kimwe ububi bwa ruswa no gufatira hamwe ingamba zo kuyikumira. Ifite insanganyamatsiko igira iti 'Kurwanya ruswa hagamijwe imiyoborere myiza n'iterambere rirambye muri Afurika'.

Umuvunyi Mukuru, Nirere Madeleine, yabwiye IGIHE ko abahagarariye ibihugu bizitabira iyi nama bazaganira ku ngaruka za ruswa, ibyakozwe mu kuyirwanya no gusangira inararibonye n'ingamba zafatwa mu rugamba rwo kuyihashya.

Yagize ati 'Kuba u Rwanda rwakiriye inama ni intambwe ikomeye mu mibanire y'ibihugu kandi bijyanye n'icyerekezo cyarwo cyo kurwanya ruswa kuko ruri mu bihugu byitwaye neza muri Afurika no ku Isi.'

'Uyu azaba ari umwanya mwiza wo kwigira ku bandi kuko buri gihugu kiba cyarashyizeho ingamba zo kurwanya ruswa. Si izo nzego zo kuyirwanya gusa zatumiwe kuko hazaba hari Urwego rw'Umuvunyi, Inteko Ishinga Amategeko, sosiyete sivile, za Minisiteri zitandukanye, Ubushinjacyaha n'izindi.'

Nirere yavuze ko usibye amasomo u Rwanda ruzakuramo, ruzunguka mu buryo bw'ubukungu, binarumenyekanisha muri gahunda ya Visit Rwanda.

Ati 'Inama nk'izi iyo zije zigira ingaruka ku bukungu kuko abazitabira bazaza bajye mu mahoteli, hari n'ibyo bazagura inaha. Bizanazamura uko u Rwanda rugaragara.''

Umuvunyi Mukuru yasabye abatanga serivisi zitandukanye kuzakira neza abazitabira inama.

Ati ''Nejejwe no kurarikira ibindi bihugu kuzitabira. Ndizera ko iyi nama izagenda neza kandi hazigirwamo ibintu byiza bizadufasha kurwanya ruswa. Uyu ni umwanya mwiza ku Rwanda wo kwerekana ibyiza twagezeho, umuco, guteza imbere ibikorerwa mu Rwanda n'ibindi. Ndashishikariza Abanyarwanda kuzakirana abashyitsi urugwiro nk'uko bisanzwe.''

Iri huriro ry'Ibihugu bihuriye muri Commonwealth muri Afurika ryashyizweho mu 2011. Riterana buri mwaka, rireba ingamba buri gihugu cyashyizeho zo kurwanya ruswa mu kurushaho kuyihashya muri Afurika.

Iyi nama yagombaga kuba mu 2020 na 2021 ikomwa mu nkokora na Covid-19. Igamije kandi gukomeza intego y'Umuryango wa Afurika Yunze Ubumwe (AU), yo kurwanya no guca burundu ruswa kuri uyu mugabane.

U Rwanda rwashyize imbaraga mu kurwanya ruswa. Raporo y'Umuryango Mpuzamahanga urwanya Ruswa n'Akarengane, [Transparency International] yo mu 2021 yarushyize ku mwanya wa 52 ku Isi, rusubira inyuma ho imyanya itatu ugereranyije n'uko rwari ruhagaze mu myaka yashize.

Ihuriro ry'Inzego zishinzwe kurwanya ruswa muri Commonwealth Africa rigizwe n'ibihugu 18 birimo Botswana, Cameroun, Eswatini, Ghana, Kenya, Lesotho, Malawi, Mauritius, Mozambique, Namibia, Nigeria, u Rwanda, Seychelles, Sierra Leone, Afurika y'Epfo, Tanzania, Uganda na Zambia.

Inyungu u Rwanda rwiteze mu Nama ya 12 y'inzego z'ibihugu zishinzwe kurwanya ruswa

---

Source : http://igihe.com/amakuru/u-rwanda/article/inyungu-u-rwanda-rwiteze-mu-nama-ya-12-y-inzego-z-ibihugu-zishinzwe-kurwanya

Perezida Kagame yabikomojeho ubwo yasobanuriraga abadipolomate intandaro y'umwanzuro u Rwanda ruherutse gufata wo gusinya amasezerano n'u Bwongereza, agamije kwakira bamwe mu bimukira binjiye muri icyo gihugu cy'i Burayi mu buryo bunyuranyije n'amategeko.

Muri iki kiganiro cyabereye muri Kigali convention Center ,yavuze ko hari Abanyarwanda bemerewe kuba ku mugabane w'u Burayi barabanje kubeshya ko bahunga ubutegetsi bubi bw'u Rwanda, kandi barasize bakoze ibyaha.

Perezida Kagame yavuze ko ubwo yari muri Rwanda Day mu Buholandi mu mwaka wa 2014 ,yigeze kubabwira ko igihe ibihugu by'I Burayi bizamenyera ko babibeshye,bizabohereza.

Yagize ati'Umuntu uvuze ati'nari ngiye gupfa ,Kagame yari kunyica baravuga ngo hano ni muri demukarasi,mu bwisanzure ,tumutabare'.Ariko uyu muntu mu by'ukuri yishe abantu mu Rwanda,none arimo kubeshya kugira ngo yemererwe kuba i Burayi.Icyo gihe mu 2014 narababwiye 'Umunsi umwe buzamenya uku kuri ndabibabwiye,kandi buzaza kuri buri umwe muri mwe,bumubaze ngo 'wageze hano ute', babapakire muri kontineri cyangwa ikindi kintu ,babasubizeyo'.

Umukuru w'igihugu yavuze ko u Bwongereza nk'igihugu cy'I Burayi, gikwiye kohereza aba bimukira barebwa n'amasezerano ariko kikanohereza Abanyarwanda kimaze imyaka irenga 15 kibacumbikiye, nyamara ngo bakabaye bafungiwe ibyaha basize bakoze mu Rwanda.

Yagize ati'Rero ndizera ko muri UK(Bwongereza),mu gihe bakohereza aba bantu,bakwiye no kutwoherereza bamwe bacumikiye mu myaka irenga 15,bakoze ibyaha hano .Twohereje dosiye zabo,zikorwaho iperereza ,izi ni dosiye zisobanutse.Aho gucumbikira muri UK ,bakabaye bafunzwe ;haba muri UK cyangwa hano .Bagera muri batanu ntabwo nibuka umubare'.

Aba Banyarwanda batanu bacumbikiwe mu Bwongereza ni :Bajinya Vincent ,Munyameza Charles,Mutabaruka Celestin,Ugirashebuja Celestin na Nteziryayo Emmanuel.Ubushinjaha bw'u Rwanda bwabashyiriyeho impanuro zo kubuta muri yombi muri 2007,bubakurikiranyeho uruhare muri Jenosie yakorewe Abatutsi.

Perezida Kagame yavuze ko mu mwaka wa 2015 aribwo yabonye ikibazo cy'abimukira n'Abanyaburayi, kizarushaho gukomera uko iminsi izagenda iza.
Icyo gihe byari mu Ukwakira 2015 ubwo yari muri Rwanda Day mu mujyi wa Amsterdam mu Buholandi.

Akurikije uburyo icyo kibazo cyari kimaze gufata intera, Abanyafurika bajya i Burayi ku bwinshi, yabonye ko umunsi umwe igihe kizagera abanyaburayi bakarambirwa.
Ati 'Abanyarwanda bari baje ari benshi, mbabaza bagiye baza mu Burayi.

Narababwiye nti 'murabizi, bamwe muri mwe mwaje mubeshye, yego hari abaje mu nzira nziza, ariko benshi muri mwe mwarabeshye.' Bamwe mwaje muvuga ko mwavuye mu Rwanda muzira politiki, bamwe mwasize mukoze ibyaha hanyuma muza mwiruka muvuga ko muhunze Guverinoma mbi mu Rwanda.'

Perezida Kagame yakomeje agira ati 'Narababwiye nti umunsi umwe ubu Burayi muri gufatirana, buzagera aho bumenye ukuri kandi buzagaruka bubabaze buti harya wageze hano ute? Bazagushyira muri kontineri bakugarure aho waje uturutse.

Bazagira igihe bamenye ukuri kuko nabo bafite ibibazo byabo bashaka gukemura.'
Kugeza ubu bimwe mu bihugu by'i Burayi bifite ibibazo by'ubukungu, ibindi bifite ubwoba bw'abimukira kubera ibikorwa by'iterabwoba bigenda byiyongera, ibyaha, urwango rukomeza kwiyongera mu baturage ku bimukira n'ibindi.

Hari icyegeranyo cyakozwe ku mpunzi mu Burayi mu mwaka wa 2017, kigaragaza ko 38 % by'Abanyaburayi batekereza ko abimukira baturuka hanze y'uwo mugabane, nta cyiza bawuzanira uretse ibibazo.

Perezida Kagame yavuze ko byigaragazaga ko hari igihe kizagera abanyaburayi bakarambirwa.

Ati 'Nta kuntu wafata Afurika ngo uyuzuze mu Burayi ngo u Burayi buceceke, bazagira rimwe bakanguke.'

Yasabye ibihugu by'i Burayi gukora isesengura no ku bantu bamazeyo igihe baje biyita impunzi cyangwa abimukira kuko harimo abashobora kuba barasize bakoze ibyaha aho bavuye.

Ati 'Ndizera ko mu Bwongereza nibohereza aba bantu bazanaturebera abo bamaranye imyaka nka 15 basize bakoze ibyaha hano. Hari abantu batanu bafite dosiye hano, bishe abantu. Bafite abantu bagakwiriye kuba bari muri gereza haba mu Bwongereza cyangwa se mu Rwanda.'

Abo Perezida Kagame yavugaga ni Vincent Bajinya, wari umuganga; Celestin Mutabaruka, wari umupasiteri; Celestin Ugirashebuja, Charles Munyaneza na Emmanuel Nteziryayo bari ba burugumesitiri bakekwaho ibyaha bya Jenoside bamaze igihe mu Bwongereza.

Yavuze ko u Rwanda rwiteguye gufatanye n'uwo ari we wese wifuza ibyiza, bipfa kuba bikozwe mu bwubahane.

Ati 'Turi abantu beza, twaba abafatanyabikorwa beza n'ababyifuza muri mwe ariko mukwiriye kutumenye neza , ibigize ubufatanye bwacu bikaba bizwi neza.'
Mu 2021, Umuryango w'Ubumwe bw'u Burayi uvuga ko wakiriye ubusabe bw'abimukira basaga ibihumbi 600. Ni imibare bivugwa ko hatagize igikorwa ishobora gukomeza kwiyongera mu myaka iri imbere.

Ubushakashatsi bwakozwe n'ikigo Pew Research Center mu 2016, bugaragaza ko umuvuduko w'abimukira mu Burayi nukomeza uko biri, bizagera mu mwaka wa 2080, abaturage 'u Burayi bamaze kwiyongeraho miliyoni 121 kubera abimukira.
Ni ukuvuga ko u Burayi buramutse nta bimukira na bake bwakira, byazagera muri uwo mwaka bufite abaturage miliyoni 399 ariko imibare igaragaza ko icyo gihe buzaba bufite miliyoni 520.

Mu myaka ya 2050, umubare w'abakiristu i Burayi uzaba waragabanyutseho 18 % mu gihe uw'abayisilamu uzaba warikubye hafi kabiri, ugeze kuri miliyoni 71 %.

Source : https://umuryango.rw/amakuru/mu-rwanda/politiki/article/perezida-kagame-yasabye-ubwongereza-kuzana-abimukira-bazanye-n-abanyarwanda

Mu murwa mukuru Juba, byibura abantu 72 bamaze kwicwa naho abagera kuri 11 bakomerekejwe bikabije n'ututsiko tw'abaturage bahanganye muri Soudan y'Epfo.

Ingabo za l'ONU zishinzwe kubungabunga amahoro muri ako gace UNMISS zasohoye itangazo rigenewe abanyamakuru rivuga ko bamaze kwakira ibirego 64 by'abagore bafashwe kungufu mu gace abaturage bashyamiraniyemo.

Riti 'UNMISS ihangayikishijwe bikomeye n'ibikorwa by'ubunyamaswa byibasiye abaturage bo mu gace ka Leer kugarijwe n'imirwano , birimo kwibasira abagore bafatwa ku ngufu, ubwicanyi, ubuhotozi, gutwika abantu ari bazima n'ibitero byibasiye icyaro Leer muri Soudan y'Epfo.

'ibyo bayaha by'urugomo byose byibasiye inyokomuntu, biri gukorwa n'urubyiruko rwitwaje intwaro mu gace ka Koch na Mayendit.'

Babiri barokotse urwo rugomo bavuze ko insore sore zabafashe ku ngufu ubwo bari basohotse aho bari bihishe bagiye gushakira abana babo ibyo kurya

'undi mudamu uherutse kubyara yavuze ko nawe yafashwe kungufu aranakubitwa bikabije mugihe kingana n'iminsi itatu.ati nahungabanyijwe n'igitero cy'ubunyamaswa ku baturage ba Leer

Uhagarariye ubunyamabanga bukuru muru Soudan y'apfo Nicholas Haysom yavuze ko 'bagomba kugira icyo bakora bafatanije kugirango abarokotse ubu bwicanyi bahabwe ubutabera bukwiye kandi bahabwe ubufasha bakeneye byihuse.
UNMISS yavuze ko Raporo yayo yagaragaje ko byibura abantu ibihumbi 40,000 bamaze guhunga ubwicanyi bubera mu gace ka Leer naho abandi ibihumbi bambutse uruzi rwa Nile bahungira I Fangak mu mugi wa Jonglei.

Imirwano ishyamiranije abaturage bo mucyaro cya Leer ishingiye ku bwumvikane bucye hagati y'amoko no gushaka kwigarurira tumwe muduce n'imitungo muri Soudan y'Epfo.

Source : https://umuryango.rw/amakuru/mu-mahanga/umutekano/article/soudan-imvururu-zahitanye-abantu-70-naho-11-barakomereka

Ibyo yabitangaje ubwo mu gitondo cyo kuri uyu wa Gatatu tariki 27 Mata 2022, Ubushinjacyaha bw'u Rwanda bwakiriye Micomyiza woherejwe na Suède, ukurikiranyweho ibyaha bitatu birimo icyaha cya Jenocide, ubufatanyacyaha muri Jenocide n'ibyaha byibasiye inyokomuntu.

Suède yohereje Micomyiza kugira ngo aburanishwe ku byaha bya Jenoside ashinjwa, ko yakoze ari umunyeshuri muri kaminuza y'u Rwanda i Butare mu 1994.

Yaburanye mu nkiko za Suède arwanya koherezwa mu Rwanda, ubucamanza bwaho mu kwezi k'Ukuboza 2021 bwanzura ko nta mpamvu yatuma atoherezwa mu Rwanda.

Ku ya 31 Werurwe 2022, nibwo Guverinoma ya Suède yafashe iki cyemezo cyo kohereza Micomyiza mu rwego rwo kubahiriza ubusabe bw'u Rwanda, nk'uko ibitangazamakuru byo muri icyo gihugu byabitangaje. Gusa abamwunganira muri Suède, bahise batangaza ko bagiye kwitabaza urukiko rw'Ubutabera mu Burayi.

Umuvugizi w'Ubushinjacyaha bw'u Rwanda, Nkusi Faustin avuga ko iyo umuntu yaburanye ari mu mahanga ariko bikaba ngombwa, ko yoherezwa kuburanira aho yakoreye icyaha icyo gihe bifatwaho icyemezo.

Ati 'Icyo gihe ibyemezo byafashwe n'inkiko Gacaca bivanwaho kugira ngo urubanza rutangire bundi bushya, niko bigenda. Niba rero yaraburanye cyangwa ataraburanye bigeye gusuzumwa kuko agiye gutangira kuburanishwa vuba, aho azamenyeshwa ibyaha aregwa n'ubushinjacyaha mu rwego rw'ubugenzacyaha nyuma agezwe mu bushinjacyaha, dosiye iregerwe ku buryo ibijyanye n'amategeko byose bizasuzumwa'.

Nkusi avuga ko Ubushinjacyaha bw'u Rwanda bwashyizeho impapuro zita muri yombi Micomyiza mu bihe bitandukanye guhera muri 2013, ariko urupapuro rwa nyuma rwashyizweho muri 2020 ari narwo rwakurikijwe kuri ubu mu kumuta muri yombi.

Yongeraho ko n'ubwo bitaragera ku rugero rushimishije ariko hamaze guterwa intambwe ku bihugu by'amahanga, mu kohereza abanyabyaha bakekwaho kugira uruhare muri Jenocide, cyane ko ari ibyaha bidasaza, akavuga ko Micomyiza ari umunyabyaha wa 29 ukekwaho kugira uruhare muri Jenocide umaze koherezwa kuva muri 2005 kugeza uyu munsi.

Nkusi yagize ati 'Intambwe irahari ariko ntibiramera neza cyane, kuko mu mpapuro twohereje mu bihugu by'Afurika n'u Burayi zigera ku 1,147 hamaze koherezwa makumyabiri n'icyenda (29) gusa, icyo twifuza ni uko byihuta'.

Yongeraho ko hari ibihugu biburanisha abanyabyaha hanze, aho hari ibyaburanishije abantu bagera kuri 24 harimo na Suède yaburanishije abantu batatu mu bihe bitandukanye, ndetse bakatirwa igifungo cya burundu, tukanabishima.

Umuvugizi w'Ubushinjacyaha avuga ko hari imbogamizi zikigaragara nyinshi mu guta muri yombi abanyabyaha.

Ati 'Imbogamizi zirahari kandi ni nyinshi, zirimo abahindura imyirondoro, kwimuka mu gihugu ava muri kimwe akajya mu kindi, ndetse n'abatanga amatangazo ababika ko bapfuye kandi bakiriho'.

Yongeraho ko ibyo bitabaca intege kuko uko bahinduye imyirondoro barabimenya nk'ubushinjacyaha bw'u Rwanda, noneho bagakomeza gukurikirana kugeza bataye muri yombi ukekwaho ibyaha.

Source : https://umuryango.rw/amakuru/mu-rwanda/article/byatangajwe-ko-urubanza-rwa-micomyiza-woherejwe-na-suede-ruzatangira-bundi

Source : https://www.kigalitoday.com/amakuru/amakuru-mu-rwanda/article/minisitiri-w-ingabo-w-u-rwanda-yagiranye-ibiganiro-na-mugenzi-we-wa-botswana

Uyu muramyi ukunzwe na benshi cyane akunze kugaraga mu bikorwa by'urukundo afasha abantu bababaye akabafasha kugarura ikizere cy'ubuzima.

Aline Gahongayire ufite ubuhamya bukomeye ndetse benshi bigiraho akunze kugaragaza Mama we nk'inshuti ye magara abinyujije ku mbugankoranyambaga ze.

Kuri iyi shuro noneho yongeye kuzamura amarangamutima y'abantu benshi ubwo yagaragazaga amashusho arimo yambika Mama we Impeta ayivugiraho amasezerano menshi nkuko tubizi kubashyingiranwa cyangwa se dufata impeta nk'igihango gikomeye.

Ni amashusho yashyize ku rukuta rwe rwa Instagram arangije agira ati”Iyi ni impeta nkwambitse y'ikimenyetso cy'urukundo dukoranye uyumunsi, ndagusezeranya ko ntazaguhemukira, ko ntazaba ikirara, ko ntazaba uworoheje, Nzaba umuntu ukomeye,nzubaha Imana, nzakorera Imana, Nzaguhesha ishema, nzaguhoza amarira warize,Nzubaha Imana yawe, Imana yawe izaba iyange,iki n'ikimenyetso dukoranye uyu munsi ko utazongera kurira ukundi ahubwo uzasaza useka, uzajya urota useke, ubyuke useke kuko ntakintu kibi kizakugeraho kuko urakunzwe asoza agira ati Urukundo ngukunda ruruta urwo undi muntu wese yagukunda.

Aline kuri we ntago yabonye ko bihagije yakomeje kumagambo yaherekeje aya mashusho agira ati” Mama ni wowe tuziranye igihe kirekire imyaka 35 nziranye nawe nasanze uri ndahemuka, inyangamugayo, umushumba utaragirira ibihembo.

Arakomeza ati” Ni wowe Rukundo, ndashima Imana yemeye ko mvukira muri wowe, Mama ni wowe wampetse kugeza nubu umbikiye amabanga niwubahwe.

Ku myaka 60 Imana ikikuduhaye ku isi ndayishimiye kandi nyisaba gukomeza kukongerera indi myinshi kuko iyo wahawe wayibyaje umusaruro na magingo aya uri Intwari.

Yongeraho ati” Mama nkunda ko uri umubyeyi wa bose kandi utarobanura, icyo ntabasha kuguha Imana izakiguha arangije aramushimira.

Aline Gahongayire yasoje yifuriza Mama we kubaho nk'umubyeyi afata nk'ujyanama we ukomeye ati” ubereye ibyiza Mubyeyi Isezerano ngiryo.

Source : https://umuryango.rw/imyidagaduro/article/aline-gahongayire-yambitse-mama-we-impeta-amusezeranya-ibintu-bikomeye

Kuva kuri uyu wa Kabiri tariki 26 Mata 2022 ingingo ikomeje kugarukwaho cyane cyane ku mbugankoranyambaga ni iy'uburyo abakobwa bitabiriye irushanwa rya Nyampinga w'u Rwanda bagiye bakorerwa ihohoterwa rishingiye ku gitsina.Ni nyuma y'aho umwe mu bayobozi bategura iri rushanwa atawe muri yombi kuri uyu wa kabiri.

Akaliza Amanda ,witabiriye iri rushanwa muri 2021 na we yanze kuripfana maze ahamya ko bene iri hohoterwa na we arizi koko ko ryabayeho.Uyu mukobwa yifashishije urukuta rwe rwa Twitter, agaragaza ko hari ibyo azi kuri iyi ngingo yari yarabuze uko abivuga.

Ati ' kenshi nashatse kugira icyo mvuga ariko icyo gihe sinabishoboye kuko kuvuga nta bimenyetso byari kwangiza kuruta uko byari gufasha. Ubu noneho ntabwo nshobora gukomeza guceceka. Ibi nanditse ni uburyo bwo kugaragaza aho mpagaze nizera ko byatera imbaraga abakobwa kwihagararaho bakabwira ibyabo polisi mu gihe babyifuza.'

Akaliza Amanda yavuze ko ntawe avugira mu bakobwa bose bitabiriye irushanwa rya Miss Rwanda, gusa yiteguye gushyigikira buri wese uzashaka kugaragaza ibyamubayeho.

I am simply here to stand in solidarity with the girls. I will support you when you feel it’s time to speak up. I will defend you when you need me to, and I will understand you if you choose to deal with this in your own way.

— Amanda Akaliza (@ssouljahh) April 26, 2022

But now that it is in the open I cannot stay silent this time. This tweet is to publicly show where I stand in hopes that it will encourage the women to stand up for themselves and speak to the police if they so wish.

— Amanda Akaliza (@ssouljahh) April 26, 2022

Source : https://yegob.rw/miss-akaliza-amanda-yunze-mu-ryabakobwa-bakorewe-ihohoterwa-rishingiye-ku-gitsina-muri-miss-rwanda/

Umuyobozi w'Intara y'Amajyepfo, Kayitesi Alice mu muhango wo Kwibuka ku nshuro ya 28 Jenoside yakorewe Abatutsi mu gice cy'Amayaga, aho abarokotse Jenoside mu Murenge wa Mugina na Nyamiyaga mu cyahoze ari Komine Mugina, bibutse kuri uyu wa 26 Mata 2022, yashimiye Abarokotse Jenoside ku mbabazi batanze. Ahamya ko ari ubutwari kandi ari impano ikomeye, abasaba kuyikomeza. Muri uku kwibuka, hanashyinguwe mu cyubahiro imibiri 108 yabonetse.

Guverineri Kayitesi, mu gushimira Abarokotse Jenoside yakorewe Abatutsi aha mu gice cy'Amayaga ku gikorwa cy'imbabazi batanze, yagize ati' Ndashimira Abarokotse Jenoside ku mpano ikomeye mwatanze, impano y'imbabazi, ni mpano ikomeye, mwarababariye kandi muzabikomeze, kubabarira ni umutima wa kimuntu utagirwa na buri wese'.

Akomeza ati' Turabashimira rero n'uruhare mugira mu gukomeza kwiyubaka mu bibazo by'inzitane mwasigiwe na Jenoside'. Ashimira Leta y'u Rwanda yahagaritse Jenoside, igakomeza kunga Abanyarwanda, igaharanira ko Abanyarwanda bashyira hamwe mu Gihugu buri wese yibonamo.

Guverineri Kayitesi, yahumurije Abarokotse Jenoside yakorewe Abatutsi, agira ati' Ndagira ngo rero mbahumurize, mbabwire ko Leta izakomeza gukora ibishoboka byose kugira ngo ikurikirane uwo ariwe wese waba waragize uruhare muri Jenoside kuko icyaha cya Jenoside ni icyaha kidasaza. Ikindi ni uko izakomeza kwita ku mibereho myiza y'Abarokotse Jenoside'.

Avuga kandi ko hazakomeza guhabwa agaciro imibiri y'Abarokotse Jenoside igenda igaragara hirya no hino igashyingurwa mu cyubahiro. Yibukije buri wese ko ari mu gihugu kimukunda, ko nta Jenoside izongera kubaho ukundi, ko kandi nk'Abanyarwanda bahisemo kuba umwe nk'amahitamo akwiye y'Igihugu.

Mu rwibutso rwa Mugina, hasanzwe hashyinguwe mu cyubahiro imibiri y'Abatutsi 59,059 biciwe muri iki gice cy'ahahoze ari Komine Mugina, bamwe bari bahatuye abandi baraturutse hirya no hino bahunga abicanyi. Abashyinguwe mu cyubahiro kuri uyu wa 26 Mata 2022 bariyongera ku mibiri isanzwe, aho bose hamwe bangana n'imibiri 59,167.

intyoza

Source : https://www.intyoza.com/kamonyi-kwibuka-28-ndashimira-abarokotse-jenoside-ku-mpano-ikomeye-yimbabazi-mwatanze-guverineri-kayitesi/

Ubuyobozi bwa Radio Fine FM, bwatangaje ko ikiganiro cy’imikino cyari gikunzwe cyane kizwi nk’Urukiko rw’Ubujurire cyabaye gihagaritswe kubera impamvu zitabaturutseho.

Ikiganiro ‘Urukiko rw’Ubujurire’ cyatangiye kumvikana kuri Fine FM tariki ya 4 Ukwakira 2021, kikaba cyakorwaga n’abanyamakuru batatu Kalisa Bruno Taifa, Horaho Axel na Sam Karenzi bose bakoranaga kuri Radio10, nyuma baje kongeramo imbaraga bazanamo Niyibizi Aime utarahatinze kuko yahise ajya kuri Radio 1 n’ubundi basigara ari 3.

Iki kiganiro cyari gikunzwe na benshi bitewe n’uburyo abagikoramo bagikoraga, bavuga ukuri kose badaciye ku ruhunde (bakundaga kwita ubwino cyangwa kumena umuceli), uburyo bajyaga impaka n’ibindi, guhera tariki ya 22 Mata 2022 ntabwo cyari kicyumvikana kuri iyi Radio.

Mu itangazo iyi radio yasohoye, yavuze ko iki kiganiro cyabaye gihagaze kubera impamvu zitabaturutseho ariko bizeza abakunzi bacyo ko kizagaruka vuba.

Bati 'Fine FM 93.1, iramenyesha abakunzi b’ikiganiro Fine Sports (Urukiko rw’Ubujurire rw’imikino) ko kubera impamvu zitaduturutseho ikiganiro Urukiko rw’Ubujurire rw’Imikino cyahagaze by’igihe gito, kuva tariki ya 22/04/2022. Tuboneyeho kubamenyesha ko iki kiganiro kizagaruka mu minsi ya vuba. Ikiganiro Urukiko rw’Ubujurire rw’Imikino kizagaruka mu isura nshya n’amakuru y’imikino utasanga ahandi nk’uko bisanzwe.'

Amakuru ISIMBI yamenye ni uko impamvu yo guhagarara kw’iki kiganiro ari uko bamwe mu bagikora bagiye kwimukira muri Leta Zunze Ubumwe za Amerika.

Ku isonga hari Kalisa Bruno Taifa, amakuru avuga ko mu minsi ya vuba we n’umuryango we bazimukira muri Amerika kuko ibintu byose byamaze kujya ku murongo, ni nyuma y’uko mu minsi ishize yatsinze ikizamini (Interview), ibindi byangombwa byo yari yarabibonye.

Undi ni Axel Horaho urimo kwitegura gukora ubukwe na Masera Nirira Nicole buzaba tariki ya 11 Kamena 2022. Biteganyijwe ko nyuma y’ubu bukwe na we azahita ajya kubana n’umugore we muri Amerika kuko ari ho asanzwe aba.

Bivuze ko iki kiganiro cyari gisigaranye umunyamakuru umwe, Sam Karenzi akaba n’umuyobozi w’iyi radio gusa na we akaba amaze iminsi ari mu gihugu cya Kenya aho bivugwa ko ari muri gahunda zitandukanye n’akazi k’itangazamakuru asanzwe akora.

Bivugwa ko izi gahunda ariko arimo azifatanya no gushaka no abasimbura b’aba banyamakuru bagiye kuva muri iki kiganiro kugira ngo kizagarukane uburyohe nk’ubwo cyahoranye.

Fine FM yemeje ko iki kiganiro cyahagaritswe by’agateganyo

Abanyamakuru bari basanzwe bakora mu Rukiko rw’Ubujurire, Axel Horaho (ibumoso) na Taifa Kalisa Bruno (hagati) bagiye kwimukira muri Amerika, Sam Karenzi (iburyo) ni we usigaye wenyine

Source : http://isimbi.rw/siporo/article/bidasubirwaho-ikiganiro-urukiko-rw-ubujurire-cyakorwagamo-n-abarimo-sam-karenzi-na-taifa-cyabaye-gihagaze