Author: webrwanda

Izi mfungwa zafunguwe by’agateganyo nk’umwanzuro wemejwe n’inama y’Abaminisitiri yabaye kuwa 8 Nzeri 2022 iyobowe na Perezida wa Repubulika Paul Kagame.

Ifungurwa ry’aba bafungwa rije rikurikira ubusabe bw’abarimo umuyobozi wa Transparent International Rwanda,Ingabire Marie Immaculee utarahwemye kugaragaza ko ubucucicike bukabije mu magereza yo mu Rwanda ari ikibazo gikomeye.

Ubushakashatsi bw’Umuryango Mpuzamaganga urwanya ruswa n’Akarengane, ishami ry’u Rwanda bwo mu mwaka 2021 bugaragaza ko ubucucike mu magereza yo mu Rwanda bugeze ku 174% buvuye ku 136% bwariho muri 2020.

Ubucucike mu magereza bwariyongereye mu myaka itatu ishize kuko wavuye kuri 136% bugera ku 174%.

Gereza ibarwa nk’irimo ubucucike bwinshi kurusha izindi mu Rwanda ni Gereza ya Muhanga ifite ubucucike bwa 222%, bivuze ko abayifungiwemo bakubye hafi 3 abagomba gufungirwamo.

Abatungwa agatoki kubigiramo uruhare ni inzego zirimo Abashinjacyaha n’abacamanza.

Ubu bushakashatsi bwa TIR bwarebaga ku bijyanye n’ishyirwa mu bikorwa ry’ubundi buryo bwo kugorora mu Rwanda, bwagaragaje ko ubucucike mu magereza bukomeza kurushaho gutumbagira.

Kugeza ubu Gereza zo mu Rwanza, zifungiyemo abarenga ibihumbi 87 .

Ubusanzwe amategeko yo mu Rwanda, avuga ko kuba umuntu ukurikiranyweho icyaha yaburana adafunze ari ihame, akaba yafungwa mu gihe hari impamvu zikomeye.

Umuhanzi nyarwanda uheruka gufungirwa mu Burundi, Bruce Melodie yasohoye indirimbo ishima Imana yakomoye ku isengesho yavugiye mu gihome.

Mu ntangiro z’uku kwezi nibwo Bruce Melodie yafungiwe i Burundi n’inzego z’umutekano zamushinjaga ubwambuzi yakoreye Bankuwiha Toussaint wari wamutumiye mu gitaramo ntabashe kujya kuririmbayo ndetse ntasubize amafaranga yari yahawe.

Uyu muhanzi kugira ngo arekurwe ndetse anakore ibitaramo bye yari afiteyo bivugwa ko yishyuye ibihumbi 2 by’amadorali, miliyoni 30 z’amarundi Toussaint yavugaga yakoresheje mu kumwitegura ndetse n’andi miliyoni 12 z’indishyi y’akababaro.

Gusa hari n’andi makuru yavuze ko inzego z’ubutabera mu Burundi zahise zibyinjiramo aya mafaranga bayaka Toussaint barayafatira ndetse bikaba bigomba kujya mu manza.

Ku munsi w’ejo ubwo yari ageze mu Rwanda, Bruce Melodie yemeje ko iki kibazo yari agifitanye na Toussaint ariko abajijwe ku by’amafaranga yishyuye n’uru rubanza aryumaho avuga ko ntacyo yabitangazaho kuko biri mu nzego z’ubutabera rero ashobora kwikanga yavuze ibidakwiye.

Ati 'Iyo rero bigeye mu mategeko dore umunyamategeko ng’uyu njyewe ntabyo nsobanukiwe cyane, bibazwa abanyamategeko kandi hari n’amakuru aba akiri ibanga umuntu atatangaza kuko inzego z’Ubutabera ziba zikiri mu kazi ka zo ntabwo nabivugaho birebire.'

Ku by’urubanza yagize ati 'nari maze kuvuga ko ntari bubivuge? Nari maze kuvuga ko ayo makuru ntazi neza niba nemerewe kuyatanga ni yo mpamvu ndibwirinde kuyatanga kugira ngo ntagira ibyo nangiza. Ntabyo ndibuvugeho kuko ntazi ibyo naba nangije kuko iby’amategeko ntabyo nsobanukiwe.'

Uyu muhanzi kandi akigera mu Rwanda ku mugoroba w’ejo hashize ku wa Gatandatu tariki ya 9 Nzeri 2022, yasohoye indirimbo ishima Imana ikubiyemo isengesho yavugiye muri gereza ubwo yari afunzwe.

Abinyujije ku mbuga nkoranyambaga ze, Melodie yavuze ko ari nkuru mpamo y’ibyamubayeho i Burundi.

Ati 'Ni indirimbo ishingiye ku nkuru mpamo, mu bihe bishize nanyuze mu bihe by’umwijima, narasenze ndi muri kasho, indirimbo ivuka mu masengesho yanjye. Iyi ndirimbo ndayibatuye.'

Iyi ndirimbo yise 'Urabinyegeza' ijambo ry’ikirundi, mu Kinyarwanda ugenekereje ni 'Urabihisha', avuga ko Imana yamukoreye ibikomeye ubwo yari afungiwe i Burundi ko ku bw’izo mpamvu buri Cyumweru azajya ajya gusenga.

Bruce Melodie yashimye Imana ku byo yamukoreye i Burundi

Ni mu biganiro byabaye kuri uyu Kane tariki 8 Nzeri 2022, aho byari byitabiriwe n’imbaga y’abatuye muri Kangondo na Kibiraro.

Ni ikibazo kimaze igihe kuko mu 2017 ari bwo Umujyi wa Kigali watangiye kubarira abari batuye muri utwo duce ingano y’umutungo wabo kugira ngo bazimurwe.

Mu 2018 bakorewe igenagaciro nubwo bamwe bagiye barihakana abandi bakaryemera.

Umuyobozi Nshingwabikorwa w’Akarere ka Gasabo, Umwali Pauline, yasabye aba baturage kwimuka kuko inzu zamaze kuzura kandi ari izabo.

Ati 'Mugomba kwimuka ni ibintu mugomba kumenya. Hari abatubwira ngo ese ko ntabona icyangombwa cya njyenyine ? Inzu zubatse mu buryo bw’amagoroba zigira amategeko azigenga. Ibyangombwa birahari, buri wese ku mazina ye, kandi ushobora kugitwara no muri banki ukagitangamo ingwate. Inzu ni izanyu ntabwo tubabeshya.'

Yakomeje agira ati 'Mu ijambo rimwe tuje kongera kubibutsa ko igihe cyo kwimuka cyageze kandi inzu zaruzuye. Zitaruzura cyari ikibazo ariko ubu zirahari.'

Ku rundi ruhande ariko abaturage batari bimuka bagaragaje imbogamizi zo kuba badahabwa ingurane ku nzu cyangwa ubutaka bwabo bafite muri aka gace ka Kangondo kugira ngo babashe kujya kugura ahandi cyangwa kwiyubakira ahandi.

Umwe muri aba baturage witwa Sahinkuye Emmanuel yavuze ko ibiri kuba byose biri guterwa n’ubuyobozi buri gutsimbarara ku ngurane y’inzu mu gihe hari umwe mu myanzuro ya Njyanama y’Akarere ka Gasabo wemeza ko n’ukeneye ingurane y’amafaranga agomba kuyahabwa , ati” Ba Nyakubahwa Bayobozi mureke kwica amategeko arimwe muyashyiraho”

Akomeza asaba ubuyobozi kuborohereza ushaka ingurane y’inzu akayihabwa ndetse n’ushaka iy’amafaranga akayibona ndetse ko ari ubutumwa bifuza ko bwagera kuri Perezida Kagame ati” Rwose mureke gukomeza kugumura aba baturage mubangisha n’ubuyobozi , ntabwo aribyo ‘‘

Undi witwa Shikama avuga ko abantu ubuyobozi bufitanye nabo amasezerano yo kujya gutura mu Busanza bubazi bityo ko abatazahitamo indishyi ikwiye y’inzu bazahabwa indishyi ikwiye y’amafaranga.

Ati” Naho uriya uri kutujijisha ngo Nyakubahwa Perezida wa Rebupulika ari kutwubakira amazu yimubeshyera, Isi yose ibimenye batagira ngo Perezida niwe uri kurenganya abaturage ba Nyarutarama, ni ishoramari ryabizanyemo ruswa na Komisiyo”

Undi muturage avuga ko ubuyobozi bushaka kubateranya na Leta kuko niba bavuga ko umuturage uzanga kwimuka azaba yigometse kuri Leta ndetse ko azakuriranwa n’Itegeko , ati” Ese Umuyobozi we wimuye umuturage ku ngufu atamuhaye ingurane ikwiye , Itegeko rizamukurikirana ni irihe ? '’

Karegeya nawe utuye muri Kangondo ya Kabiri avuga ko hari n’abantu bimuwe bivugwa ko ari amanegeka kandi mu byukuri ari ahantu hazakoreshwa n’umushoramari bityo ko ari abantu bazanya akaboko karekare mu mitungo abaturage baruhiye.

KANGONDO : Tuzatera akabariro gute turyamanye n’abana ? Mwibeshyera Perezida Kagame si we uturenganya

Polisi y’u Rwanda ivuga ko Gukoresha telefone igendanwa utwaye imodoka ari ukurenga ku mategeko n’amabwiriza y’umuhanda.

Mu myaka yashize, Polisi y’u Rwanda yagiye ikora ubukangurambaga ku bijyanye n’umutekano wo mu muhanda kugira ngo ihindure imyitwarire y’abakoresha umuhanda hagamijwe kubungabunga umutekano wo mu muhanda.

Kurinda ikoreshwa rya telefone igendanwa mu gihe utwaye ikinyabiziga kugirango urokore ubuzima bwawe n’ubw’abandi ni kimwe mu byagarutsweho muri ubu bukangurambaga.

Imibare yatanzwe n’ishami rya Polisi rishinzwe umutekano wo mu muhanda yerekana ko mu mpanuka 12 zahitanye ubuzima bw’abantu zabaye kuva mu ntangiriro z’iki cyumweru, 6 muri zo zatewe n’abashoferi barangariraga muri telefone.

Umuvugizi w’ishami rya Polisi rishinzwe umutekano wo mu muhanda, Senior Superintendent of Police (SSP) Rene Irere, yavuze ko ibi byatumye hongerwa ibikorwa byo kurwanya iyi myitwarire idahwitse kandi yangiza ubuzima bwa bamwe mu batwara ibinyabiziga.

Yagize ati : 'Mu bikorwa byakozwe hagati yo ku wa Mbere no ku wa Kane, mu gihugu hose, abashoferi 273 bafashwe bakoresha telefone batwaye ibinyabiziga.'

Yongeyeho ko ibi bikorwa bikomeje ngo abantu bakoresha telefone batwaye ibinyabiziga bafatwe kandi bahanwe.

Mu mujyi wa Kigali hafashwe abashoferi 246, mu Ntara y’Iburasirazuba hafashwe abashoferi 11, mu Ntara y’Amajyepfo hafatwa abashoferi 7, mu Ntara y’ Iburengerazuba hafatwa abashoferi 6, naho mu Ntara y’Amajyaruguru hafatwa batatu.

SSP Irere, yagiriye inama abashoferi bumva ko gukoresha telefone utayishyize ku gutwi mu gihe utwaye imodoka ari bwo buryo bwiza, ababwira ko bibujijwe kuko byateza umushoferi kurangara bikamuviramo gukora impanuka.

Ati : 'Ntabwo byemewe na gato mu gihe utwaye imodoka, telefone uko wayivugiraho kose waba wayirambitse mu modoka cyangwa wakoresheje bimwe mu bikoresho bigufasha kuyivugiraho utayifashe ntibyemewe kuko bituma umushoferi arangara bityo bikaba byamuviramo gukora impanuka yahitana ubuzima bwe cyangwa ubw’abandi bakoresha umuhanda, nimwirinde gukoresha telefone mutwaye ibinyabiziga, ni mwubahe amategeko y’ umuhanda.'

Hashize amasaha atari menshi cyane Umwamikazi Elizabeth wa II atanze azize uburwayi, aho yapfiriye mu gace ka Balmoral mu gihugu cya Scotland. Ibi byababaje benshi cyane ndetse kugeza ubu benshi batangiye ibikorwa byo kwibuka no guha icyubahiro Elizabeth II, watanze afite imyaka 96. Muri ibi bikorwa biri gukorwa nyuma yo gutanga kwe, harimo n’ishyirwa ku isoko kwa bimwe mu bikoresho byakoreshwejwe nawe akiriho.

Isosiyete y’Ubucuruzi yitwa eBay ikorera kuri murandasi yo muri Leta Zunze Ubumwe za Amerika, yamaze gushyira ku isoko amajyane yo mu bwoko bwa ”Tea Bag’ yakoreshejweho n’Umwamikazi Elizabeth II. The New York Post yatangaje ko aya majyane yavuye mu gikoni cy'i Bwami mu 1998, avanyweyo n'umukozi watekeraga Umwamikazi icyo gihe.

Amajyane yakoreshejwe n’Umwamikazi Elizabeth yashyizwe ku isoko kuri $12.000 angana na miliyoni 12 Rwf.

Uyu mukozi akaba yarajyanye agakarito k'amajyane ya Tea Bag akuye i Bwami kakoreshejwe n’Umwamikazi, akakagurisha. Nyuma y’imyaka 24, aya majyane yari abitswe n’ikigo cy’ubuziranenge muri Amerika cyitwa Institute of Excellence in Certificates n Aunthenticity.

Iki kigo kikaba cyayahaye sosiyete y’ubucuruzi ya eBay ari nayo yayashyize ku isoko, aho ari kugurishwa $12.000. Aya mafaranga uyashyize mu manyarwanda abyara miliyoni 12Rwf. The New York Post ivuga ko aya majyane agiye kugurwa aka kayabo nyuma y’imyaka 24 akoreshejwe n’Umwamikazi Elizabeth II, ndetse hari n’ibindi bikoresho yakoresheje nabyo byashyizwe ku isoko.

Ku mugoroba wo kuri uyu wa Gatanu tariki 9 Nzeri 2022, nibwo Bralirwa na BK Arena bashyize umukono kuri aya masezerano mu muhango wabereye muri bimwe mu bice bigize iyi nyubako y'imyidagaduro ya BK Arena.

Ni nyuma y'uko abayobozi ba Bralirwa babanje gusura bimwe mu bice bigize BK Arena, bakerekwa ahari 'stand' yabo bazajya bacururiza ibinyobwa byabo n'ibindi.

Ni amasezerano y'imyaka itatu ariko ashobora kwiyongera, kandi Heineken izajya igaragara ku byapa byo muri BK Arena n'igihe hari ibikorwa biri kuberamo nk'imikino, ibitaramo by'abahanzi n'ibindi Heineken igaragare ku nyakira-mashusho nini za BK Arena.

Umuyobozi wa Bralirwa, Étienne Saada yashimye buri wese wari muri uyu muhango, ahereye ku batumirwa, abacuruzi, by'umwihariko abakiriya bagira uruhare mu iterambere ry'umunsi ku munsi ry'uru ruganda. Ati 'Muri ab'agaciro.'

Étienne yavuze ko bishimiye amasezerano y'iterambere bagiranye na BK Arena yubakiye ku gufasha abantu kwishima binyuze mu muco, siporo, imyidagaduro n'ahandi. Ati 'Ibi biri mu ndangagaciro za Heineken na Bralirwa muri rusange. Bivuze ikintu kinini muri iyi mikoranire. Turishimye.'

Uyu muyobozi yavuze ko ibinyobwa bya Bralirwa nka 'Cheetah Energy', ibidasembuye n'ibindi bizajya bigaragara muri BK Arena.

Avuga ko hari ibikorwa byinshi bazatangaza mu minsi iri imbere, kandi nta gihe kinini gishize basinye amasezerano n'Ishyirahamwe Nyarwanda rya Basketball, FERWABA, afite agaciro ka miliyoni 240 Frw. Ati 'Tuzakoresha aha hantu [BK Arena] mu gutangaza amakuru meza. Ni iby'ingenzi kuri twe gukorera hano.'

Étienne yavuze ko BK Arena 'habaye mu rugo' kandi 'namwe ni iwanyu (mu rugo)'.

Umuyobozi wa QA Venue Solutions [Ikigo cyatsindiye gucunga BK Arena mu gihe cy'imyaka irindwi], Kyle Schofield yavuze ko BK Arena ari inyubako ya buri wese, kandi bafite intego ihamye yo kuba igicumbi cya siporo n'imyidagaduro muri Afurika yose.

Kyle yavuze ko kugera iyi ntego bisaba ubufatanye n'abandi, ari nayo mpamvu uyu munsi basinye amasezerano na Bralirwa.

Uyu muyobozi yavuze ko gukorana na Bralirwa ari ibintu byiza kandi byereka buri wese ko buri kimwe gishoboka.

Kyle yavuze ko mu gihe cy'imyaka ibiri ishize bahawe gucunga BK Arena bishimira intambwe bari gutera, 'harimo n'amasezerano bagiranye na Bralirwa'.

Umuyobozi ushinzwe Iyamamazabikorwa muri Bralirwa, Gatabazi Martine yabwiye InyaRwanda ko aya masezerano bagiranye na BK Arena akubiyemo gucururiza ibinyobwa byabo muri iyi nyubako y'imyidagaduro.

Ati 'Twasinyanye amasezerano hamwe na BK Arena yo kuba turi abatanga ibinyobwa hano muri Arena igihe habaye ibikorwa runaka byaba ari ibitaramo, imikino […] Abakiriya baje hano kureba imikino, ibitaramo cyangwa ibikorwa bijyanye n'umuco nibyo bazajya banywa igihe cyose bazaba bari hano.'

Martine yashimangiye ko ibinyobwa by'uruganda rwa Bralirwa bizacururizwa muri BK Arena, yaba Bralirwa yagize uruhare mu itegurwa ry'ibyo bikorwa biri kuhabera cyangwa se nta ruhare yabigizemo.

Ati 'Niba hari umuntu wateguye igitaramo ariko twebwe tutayiteye inkunga ntabwo twebwe tuzajya tugaragara ariko tuzaba dufite ibinyobwa abantu bazabasha kunywa.'

Uyu muyobozi yavuze ko aya masezerano ashobora kuzongerwa mu gihe cy'umwaka umwe.

Yavuze ko aya masezerano anagamije gufasha abakunzi ba Bralirwa kwisanga muri BK Arena, basanganirwa n'ibinyobywa by'uruganda. 

Ati 'Mu ndangagaciro za Heineken harimo gushimisha abakunzi b'ibinyobwa byacu. Twahuje rero kugira ngo tubashe kuzuzanya. Twongere iyi nzu tuyigire inzu y'abakunzi b'ibinyobwa byacu, kugira ngo bazajye baza bisange, bumva ko n'icyo banywaga mu rugo n'aho mu kabari na hano baza kubihasanga.' 

Nk’uko bigaragara mu itangazo rya Minisitiri w’Intebe, Edouard Ngirente ryashyizwe ahagaragara ku gicamunsi cyo kuri uyu wa Kane, Perezida Kagame yategetse ko Ibendera ry’u Rwanda n’iry’Umuryango wa Africa y’i Burasirazuba ari mu Rwanda, yururutswa kugeza igihe Umwamikazi Elizabeth II azatabarizwa.

Umwamikazi Elizabeth Windsor w’u Bwongereza yatanze ku mugoroba wo kuwa Kane tariki 8 Nzeri 2022, azize uburwayi nk’uko byemejwe n’Ingoro ya Buckingham.

Ku mugoroba w’ejo hashize, Perezida Kagame yanditse kuri Twitter ashima umusanzu Umwamikazi Elizabeth yatanze mu gihe cy’imyaka 70, anihanganisha umuryango we, Abongereza muri rusange ndetse n’ibihugu byo mu muryango w’abavuga icyongereza wa Commonwealth.

Elizabeth II Alexandra Mary Windsor wari umaze imyaka 70 ayobora Ubwami bw’u Bwongereza, yavukiye i London mu 1926, yima ingoma muri Gashyantare 1952 asimbuye Se, George VI. Biteganijwe ko azatabarizwa nyuma yo kwimikwa k’umwami Charles III wamusimbuye ku ngoma.

Itangazo rya Minisitiri w’Intebe