Author: webrwanda

Icyumweru kirenga kirashize imikino y'igikombe cy'isi yaberaga muri Qatar irangiye, ikipe y'igihugu ya Argentine niyo yegukanye iki gikombe itsinze ikipe y'igihugu y'u Bufaransa ku mukino wa nyuma hitabajwe penariti. 

Kapiteni Lionel Messi ari mu bakinnyi bagize uruhare rukomeye kugira ngo ikipe y'igihugu cye yegukane iki gikombe, mu mikino yose yakinnye muri iki gikombe cy'isi cy'uyu mwaka yatsinzemo ibitego 7 harimo na 2 yatsinze u Bufaransa ku mukino wa nyuma. 

Lionel Messi yakoze amateka abifashijwemo na bagenzi be, atwara iki gikombe cy'isi yari yarahize ariko yarakibuze. Muri 2014 yari yarageze ku mukino wa nyuma ariko batsindwa n'u Budage, ndetse na 2018 bari bageze muri 1/8 batsindwa n'u Bufaransa. 

Kuva Messi w'imyaka 35 yatwara iki gikombe bamwe bahise batangira kumugira umukinnyi w'ibihe byose, kuko igikombe cy'isi aricyo yari asigaje gutwara mu buzima bwe bw'umupira w'amaguru.

Icyumba Lionel Messi yararagamo kigiye  gushyirwa mu nzu ndangamurage

Nyuma y'uko Lionel Messi yegukanye igikombe cy'isi, mu rwego rwo kumuha icyubahiro kaminuza yo muri Qatar yatangaje ko icyumba uyu mukinnyi yararagamo ubwo yari ari mu mikino y'igikombe cy'isi cyabereye muri iki gihugu, igiye kukimurira mu nzu ndagamurage nto.

Nyuma yo kwitwara neza mu gikombe cy'isi akaba umukinnyi watsinze ibitego byinshi, Kylian Mbappe arifuza ibintu 3 kugira ngo akomeze gukina  muri  Paris Saint-Germain imufata nk'umukinnyi uzayicungura akayihesha Champions League ishaka ariko yabuze. 

Uyu mukinnyi w'imyaka 24 mu mpeshyi y'uyu mwaka nibwo yongereye amasezerano azamara imyaka 2 muri iyi kipe, Mbappe yashyizeho ibimeze nk'ibyifuzo kugira ngo Paris Saint-Germain imugumane nibura indi myaka 3. 

Ikifuzo cya mbere cy'uyu mukinnyi ni uko umukinnyi ukomoka muri Brazil Neymar asezererwa muri iyi kipe byihuse, gusa ntatangaza impamvu atamushaka.

 Neymar utifuzwa na Mbappe

Nk'uko tubikesha ikinyamakuru cyandika kitwa Sportskeeda, ikifuzo cya 2 cya Kylian Mbappe ni uko umutoza witwa Christophe Galtier usanzwe atoza Paris Saint-Germain yagenda, hakaza umutoza w'umufaransa Zinedine Zidane udafite ikipe atoza kugeza ubu. 

Naho ikifuzo cya 3 ni uko Paris Saint-Germain yagura Harry Kane, watakira ikipe y'igihugu y'u Bwongereza na Tottenham. Uyu mukinnyi ibyo ari gusaba biri mu masezerano ye kuko kugira ngo yongere amasezerano muri Paris Saint-Germain yemerewe ko azajya agira uruhare mu myanzuro izajya ifatwa mu ikipe, akagira uruhare mu bakinnyi basohoka n'abinjira mu ikipe ndetse akagira n'uruhare ku mutoza ugomba gutoza Paris Saint-Germain.

 Kylian Mbappe byavugwaga ko yasesa amasezerano kubera umwuka mubi yari afitanye na bagenzi be, ikipe yamushakaga cyane ni Real Madrid ariko kugeza ubu ntabwo ikimufite mu mishinga nyuma y'uko atayerekejemo. Kugeza ubu uyu mukinnyi amaze gukinira Paris Saint-Germain imikino 236 ayitsindira ibitego 190.

Mbappé ukomeje kugora Paris Saint-Germain

Kuri uyu wa Mbere ni bwo ikipe ya Liverpool yumvikanye n’umukinnyi ukomeye witwa Cody Gakpo wari usanzwe akinira Psv Eindhoven yo mu Buhorandi. Nk’uko tubikesha Daily Mail, uyu mukinnyi yamaze kumvikana na Liverpool ko igiye kumutangaho Miliyoni 37 z’amapawundi ashobora kuzagera kuri miliyoni 50 z’amapawundi bitewe n’uko azitwara.

Gakpo w’imyaka 23 biteganyijwe ko azashyira umukono ku masezerano y’ibyo yumvikanye na Liverpool mu mpera z’iki cy’umweru, yarangiza agakorerwa isuzuma ry’ubuzima mu cyumweru gitaha. 

Liverpool kugira ngo yegukane uyu mukinnyi, yahigitse andi makipe akomeye arimo Manchester United yari ikiri kuganira n’uyu mukinnyi ku mafaranga yatangwaho. 

Mbere y’uko uyu mukinnyi ajya muri PSV Eindhoven y’iwabo yari yabanje gushakwa n’amakipe yo mu Bwongereza arimo Leeds na Southampton ariko yanga kuyerekezamo kubera ko yashakaga amakipe makuru akina Champions League.

Gakpo wakoze akazi gakomeye mu gikombe cy’isi 

Kugeza ubu Liverpool ku ruhande rw’ubusatirizi ifite ikibazo cya Luis Dias uri mu mvune ndetse na Darwin Nunez baguze muri Benfica utari wamenyera neza ngo atangire gutsinda ibitego, ariko uyu mukinnyi ukina anyuze ku ruhande rw’ibumoso cyangwa akataka anyuze mu kibuga hagati ashobora kubafasha kongera kwitwara neza cyane mu mikino ya shampiyona no muri Champions league. 

Uyu mukinnyi yigaragagarije cyane mu mikino y’igikombe cy’isi afasha u Buhorandi kwitwara neza ndetse anatsinda ibitego 3 mu mikino yose y’igikombe cy’isi. Mu mikino 159 yari amaze gukinira PSV Eindhoven, yatsinzemo ibitego 55 anatanga imipira 50 ivamo ibitego. PSV Eindhoven ibinyujije ku mbuga nkoranyambaga zabo nabo bemeje ko bamaze kumvikana na Liverpool kuri Cody Gakpo.

Gakpo usanze Virgin muri Liverpool basanzwe bakinana mu ikipe y’igihugu y’u Buhorandi

Liverpool yaguze umukinnyi ukomeye

Kaberuka Isaac Kaberuka yagaragaje impano ye, ubwo yari umwe mu bitabiriye igitaramo cyo gutanga ibihembo bya Kalisimbi. Uyu musore na bagenzi be basabye Mc Nario ko yahabwa umwanya, akerekana ko afite impano yo kuririmba.

Nario wari uyoboye ibirori yabimwemereye. Kaberuka yabanje kuririmba indirimbo yitwa 'Peace of Mind' ya Shemi, abantu benshi bari bateraniye ahabereye igikorwa batangarira impano y'uyu mwana w'umuhungu.

Uyu musore yahise asabwa na Nario kuririmba indi ndirimbo y'umuhanzi akunda, aririmba 'Gusaakaara' ya Buravan. Iyi ndirimbo yayiririmbaga arira, abajijwe impamvu asubiza ko uyu muhanzi yari yaramwemereye ubufasha ariko ku bw'amahirwe make akitaba Imana batongeye guhura ngo amujyane muri studio.

Ati ''Buravan twahuye muri CHOGM yishimira impano yanjye. Icyambabaje nyuma yahise arwara bityo aza gupfa atanjyanye muri studio, nk'uko yari yabinsezeranyije.''

Mugunga wari umwe mu bitabiriye igikorwa cyo gutanga ibi bihembo, yabanje aza imbere amufumbatiza amafaranga. Nyuma aza kugaruka kubera kunyurwa n'ubuhanga bw'uyu mwana asaba ijambo, avuga ko amwereye kumwishyurira amashusho n'amajwi indirimbo ebyiri.

Kaberuka wemerewe gukorerwa  indirimbo afite imyaka 18, yiga mu mwaka wa gatatu w'amashuri yisumbuye. Avuka mu bana barindwi akaba uwa kabiri. Uyu musore wavukiye muri Nyarugenge yatangiye umuziki mu 2018.

Abahanzi akunda harimo Nel Ngabo, Kenny Sol na Ish Kevin. Yiga ku Kabusunzu.

Mugunga Christian wamwemereye ubufasha yabonye izuba ku wa 18 Kanama 1983, avukira i Burundi mu nkambi y'impunzi yarimo bamwe mu banyarwanda bari barahejejwe ishyanga kubera imiyoborere mibi yari mu Rwanda.

Ni umwe mu bahanzi baririmba injyana gakondo. Ubusanzwe aba mu Mujyi wa Dubai aho acuruza 'avoka'.

Kaberuka yagaragaje impano itangaje mu kuririmba yemererwa na Mugunga kuzamufasha 

Kaberuka yari yemerewe na Buravan ko azamufasha akajya muri studio, uyu musore ahita arwara ndetse aza gupfa bitamukundiye 

Mugunga [ubazana ibumoso] yavuze ko azafasha uyu mwana uko ashoboye. Mugunga ari no mu bashyikirije ibihembo umwe mu bacyegukanye muri Kalisimbi Entertainment Awards

REBA INDIRIMBO YA MUGUNGA AHERUKA GUSHYIRA HANZE

“>

'Ni uko iravuga iti umuntu ntakabe wenyine reka muremere umufasha umukwiriye' ayo ni amagambo atangiza indirimbo 'Igitego', imwe mu ndirimbo z'ubudasa uyu muhanzi asohoye mu mpera z'uyu mwaka.

Iyi ndirimbo iririmbanye umwimerere w'ijwi ry'uyu muhanzi, amashusho yayo yifashishijemo umunyarwenya Arthur Nkusi n'umugore we Miss Fiona bari mu nzu iwabo banyuzwe n'urukundo rwabo.

Usibye Arthur na Fiona kandi, muri iyi ndirimbo hagaragaramo Yannick na Christellee bamaze igihe gito barushinze, ariko bakaba bari bamaze igihe mu munyenga w'urrukundo ruhorana ibyiza.

Sibo gusa kandi kuko hagaragaramo umuhanzi Ngarambe François, wanyuzagamo agakina ubuto bwe n'umugore we mu byaranze ubusore bwabo byabereye urugero rwiza rw'abato no kurushinga rugakomera.

Ni indirimbo kandi igaragaramo Ibihame mu mbyino za Kinyarwanda, ndetse n'ibikoresho byinshi bya Kinyarwanda. Ikaba ari indirimbo ya kane iri kuri Album 'The Pleasure and Pain' intekerezo yayo ikaba yaraje kubw'urukundo.

Arthur Nkusi n’umugore we bagaragaye mu ndirimbo Igitego ya Andy

Igitego ni indirimbo yanditswe na Andy Bumuntu, ikorwa na Khrisau afatanyije na Bob pro naho amashusho yayo afatwa na Serge Girishya.

Iyi ndirimbo imaze amasaha 13 isohotse, imaze kurebwa n'ibihumbi 25,396, ikaba imaze gutangwaho ubutumwa burenga 200 bw'abayikunze, ndetse n'abagera ku bihumbi bitatu na Magana abiri bayikunze bakoresheje ikimenyetso.

Ngarambe n’umugore we bagaragaye mu ndirimbo na Andy

Andy Bumuntu yihariye umwimerere w’ijwi mu ndirimbo Igitego

Christelle na Yannick wanashinze Soho bagaragaye muri iyi ndirimbo

Umukinnyi w’ikipe y’igihugu ya Portugal, Cristano Ronaldo nyuma yo gusezererwa muri 1/4 mu gikombe cy’isi cy’uyu mwaka cyaberaga muri Qatar, yahawe impano y’imodoka y'akataraboneka mu rwego rwo kwizihiza Noheli.

Ku munsi w'ejo nibwo ku isi yose hizihijwe ibirori bya Noheli, ndetse hanatangwa impano. Uyu munsi Georgina Rodriguez usanzwe ari umunyamideri akaba n’umugore wa Kizigenza Cristiano Ronaldo, yamutunguye amuha imodoka iri mu bwoko bwa New Rolls Royce ifite agaciro ka Miliyoni 250 z’amayero.

Iyi modoka yakozwe mu mwaka wa 2022 ikaba ifite imyanya 4 yo kwicaramo. Cristano Ronaldo mu rwego rwo kwishimira iyi mpano, yagiye kuri Instagram ye ikurikirwa n’abarenga miliyoni 523 ashyiraho ifoto y’imodoka, munsi yandikaho ngo 'wakoze rukundo rwanjye'.

Impano Cristiano Ronaldo yahawe

Georgina Rodriguez nawe abinyujije kuri Instagram ye yashyizeho amashusho yafashwe, igihe yatunguraga Cristano Ronaldo amuhereza iyi modoka. Uyu mukinnyi akimara kubona imodoka umugore we yamugeneye, yahise ayisimbukiramo ari kumwe n’abana be. 

Cristiano Ronaldo wahawe impano ihenze kugeza ubu nta kipe afite, uyu mukinnyi yavuye muri Manchester United ku bwumvikane ariko kubona indi kipe yifuza bikomeje kugorana. 

Amakuru ashyirwa hanze n’ibinyamakuru mpuzamahanga ni uko uyu mukinnyi ashobora kwerekeza muri Saudi Arabia, kujya gukina mu ikipe ya Al Nassr iri kumuha ibifurumba by’amafaranga.

Kizigenza Cristiano Ronaldo aseka kubera gutungurwa n’umugore we

Ronaldo n’umuryango we wose bicaye mu mudoka yahawe nk’impano